الكبيره ٢ بقلم / لولو_محمد

الحلقه ٤

(((((((( الكبيره ٢))))))))
#لولو_محمد
الحلقه ٤
نجاه / امال بتعملى معايا كدا ليه حبسانى هنا ليه
امايا / عشان سلامتك و عشان حلمك حلمك اللى من غير جوزيف عمرك ما هتوصليله
نجاه / انتى فاكره انى بحلم ان ابويا يموت يا اميره ان اهلى يتازوا تفتكرى دا حلمى دا كابوس
امايا / ما بيدوروش عليكي راجعين مصر فى طياره تسعه
نجاه / كدب عمرهم ما هيقدروا يرجعوا من غيرى دا لو هيرجعوا بيا جثه فى قفه مش هيهدوا و لا يناموا الا اما يرجعونى بلدى مش احنا اللى نرمى لحمنا مش اهلى اللى يتخلوا عنى و لو صدقتوا انهم رجعوا فعلا تبقوا سزج لو صدقتوا انهم هيسيبونى و يسيبوا حقى بالبساطه دى تبقي واهمه دا ان ما رجعوش بيا هيرجعوا بتارى 
امايا / ما هم سابوا تارى عادى لقوا كل السكك مسدوده كملوا حياتهم عادى ... ما حدش مات بعدى يعني
نجاه / انا مت ... انا كنت بموت فى اليوم مليون مره من عياطى و قهرتى عليكى
امايا / و عشان كدا انتى معايا هنا مش معاهم
نجاه / انا بكرهك و لو منك اصب الباب ده خرسانه مسلحه عشان ما اقدرش اخرج من هنا ابدا لانى هاكل قلبك نى انتى فاهمه هقتلك يا اميره هقتلك
امايا / ما حدش بيموت مرتين
نجاه تروح الحمام و تفك الطرحه و تحط راسها تحت المايه تحاول تهدى مش قادره تتنفس من عصبيتها
......................
فى اوضه اكرم
الباب يخبط بالراحة يروح يفتح يلاقي مهره واقفه بتفرك فى ايديها و باصه فى الارض و باين عليها الحزن ترفع عينها و تبصله
مهره / حضرتك زعلان منى ؟
اكرم / ادخلى تعالى
مهره تدخل و هى باصه فى الارض
مهره / انا ما قدرتش انام تانى و حاجتى كلها ملمومه و دماغى هتنفجر من التفكير
اكرم / انسي اللى قولته يا مهره انسيه احسن ... كانت لحظه غريبه و راحت لحالها
مهره / يعني مش هتطلق ماما
اكرم / هو انتى بتقعدي مع امك اصلا و لا بتشوفيها هى تفرق معاكى فى ايه اساسا هى عمرها فكرت فيكى و لا فى اخواتك امك ما عبرتكيش غير لما اتفتحت عليها الحمله بتاعه الانتخابات
مهره / بس لولاها ما كنتش عرفتك ... انا ما عنديش استعداد اخسرك بعد ماما امنيه انا ما عادليش حد ما عدتش فارقه مع حد ما حدش فهمنى و لا سمعنى و لا اهتم غيرك انا عارفه ان حضرتك مش ملزم ناحيتى بحاجه بس
مهره تعيط اكرم يمسك ايدها و يمسح دموعها
اكرم / انا عمرى ما هقدر ابعد عنك انا متعلق بيكي زى ما انتى متعلقه بيا بالظبط و حتى لو حصل و انفصلت عن مامتك انا عمرى ما هسيبك تقدرى تيجي تعيشي معايا نقدر برده نسافر سوا و نكمل زى ما احنا و كان مفيش حاجه اتاثرت
مهره / ازاى ازاى و ماما ازاى هعمل كدا اصلا
اكرم / ليها عندك ايه الدنيا كلها ليها عندك ايه المهم تبقي مرتاحه و مبسوطه انا شخصيا اقدر اكتفى بيكي عن الدنيا كلها انتى بقي مستعده تكتفى بيا عن الدنيا
مهره تبصله ببراءه و هى مش مستوعبه الكلام
مهره / بس هم كدا هيكرهونى
اكرم يتنهد و يروح يقعد
مهره / هيفتكروا انى بعتهم هيفتكروا ان انا السبب فى انك سبتهم
اكرم / انتى بريئه اوى ... هو فى حد فيهم معبرنا اصلا يا بنتى فوقى بقي
مهره / طب ادى ماما فرصه اخيره انا هكلمها يمكن يمكن يمكن ربنا يهديها و تتغير يمكن الفرصه دى تنقذ بيت جميل عشان خاطرى و عشان خاطر اخواتى
اكرم / حاضر لو ده هيسعدك انا مش معترض اديها فرصه بس صدقيني مفيش حاجه هتتغير و لعلمك انا القرار ده واخده من سنين و كل مره اديها فرصه ورا التانيه ورا التالته لما بطلت اعد
مهره / اخر فرصه عشان خاطرى اخر فرصه و انا اوعدك هكلمها و احاول اغيرها اوعدك
اكرم يبتسم مهره تبص فى الارض
اكرم / نامى شويه و ارتاحى انتى شكلك مرهق جدا انا غلطان انى صحيتك اصلا حقك عليا
مهره / انا و الله مش انانيه ..  بس انا بحبك اوى
اكرم يبتسم
اكرم / و انا كمان يا مهره بحبك بحبك حب عمرى ما حبيته لحد قبل كدا و دا اللى تاعبنى
مهره / تاعبك !!
اكرم / بقولك ايه انتى شكلك عشان نمتى شويه هتفوقى عليا انا مش قادر انا هنام ساعتين كدا و لا حاجه و اهو كل حاجه ملمومه يلا يلا شوفيلك حته نامى فيها لحد الصبح يلا
………………………
قدام بيت ضلمه فى حى كله اشجار
بابلو و جوزيف راكبين عربيه مصفحه راكنه فى الضلمه
بابلو / انت متاكد ان ده العنوان الصح المكان شكله هادى زياده عن اللزوم
جوزيف / تقدر ذكاء همام بكام من عشره
بابلو / تقريره بيقول اربعه و نص
جوزيف / يعني ما يقدرش يكتشف مكان الشريحه اللى لزقتها على كتفه فى المستشفي بالسرعه دى و بالتالى فاحنا فى المكان الصح
بابلو / ما هو ممكن يكون غير هدومه و نزل المكان ضلمه مفيهوش لمبه واحده قايده
جوزيف / موبايله هنا هو كمان
بابلو / طب و ما دام متاكد انه جوه هنفضل هنا لحد امتى
جوزيف / ان كان همام اربعه و نص فالزنايته و الجوارحه عندهم ناس تانيه بتفكر يعني مستحيل يسيبوه لوحده مستحيل البيت يكون من غير حراسه  فى حاجه غلط
بابلو / طب ما يمكن يكونوا لقوا الشريحه و فهموا احنا بنحاول نعمل ايه فجابونا هنا و عملولنا فخ
جوزيف يبص فى الساعه موتوسيكل دليفرى يعدى
جوزيف / فى معاده
طيار الدليفرى ينزل يضرب الجرس و معاه بيتزا النور يايد و الباب يتفتح و راجل يطلع يكلم الطيار همام يطلع يبص لحظه و يدخل تانى و الراجل يقفل الباب و الطيار يرجع بالاوردر النور ينطفى جوزيف يبص لبابلو بابلو يطلع مدفع قنابل و يفتح الشباك و جوزيف يشغل العربيه و يسوق بابلو يطلع المدفع من شباك العربيه و يضرب قنبله موقوته على ثوانى تلزق على باب البيت و العربيه تمشي على سرعتها و فى شاحنه بوكس محمله رجاله بابها مفتوح تدخل من الناحيه التانيه اول ما القنبله تنفجر الرجاله ينطوا من الشاحنه و يدخلوا البيت ظلام تام و مفيش اى حد يبصوا لبعض باستغراب واحد منهم يتحرك خطوه يدوس على لغم مزروع فى الارضيه الكل يبص لبعضه يجوا يجروا اللغم ينفجر و البيت كله ينفجر و جوزيف متابع اللى بيحصل فى المرايه
بابلو / ايه اللى حصل ده
فجاه عربيات و موتوسيكلات كتير تظهر حوالين عربيه جوزيف و تطارده و تفتح عليه النار
......................
فى اوضه عمران
صابر بيتكلم فى التليفون
صابر/ خليك متابعهم برده لحد ما الطياره تطلع بيهم و جابر هيخلى الرجاله فى مصر يتابعوهم لحد باب بيتهم ... و انت مالك انت و بعد باب بيتهم هيعملوا ايه و لا حاشر نفسك ليه فى اى حاجه اصلا ما تعمل اللى قولتلك عليه و خلاص
عمران / فى حاجه و لا ايه
صابر / سلام ... لا ما فيش ... دول الجماعه اللى بيحرسوا مهره و اكرم بيه واضح كدا انهم قلقانين شويه عمالين يتنقلوا بين الاوضتين و مش مرتاحين خالص
عمران / الراجل ده من اكتر الناس المحترمه اللى شوفتها فى حياتى
صابر / حقه انا اتصدمت لما عرفت انه جوز امها مش ابوها
عمران / و ابوها ابن الورمه ما بيعبرهاش بتفه موبايل حتى
صابر  / فى ابهات بيعتبروا نفسهم فلوس و بس
عمران / انا متاكد ان الراجل وصلاله مشاعرى ناحيته
صابر / يولع ما تحطوش فى دماغك ... انت مش هترتاح شويه يا جابر كدا ممكن تقع مننا وقت الجد
جابر / و هو فى وقوع بعد كدا و لا جد اكتر من اللى احنا فيه مش قادر ابطل تفكير فى كل السناريوهات اللى ممكن تكون بتعيشها
صابر / انا السيناريو الوحيد فى دماغه بيخلى ولاد الكلب دول يصعبوا عليا
عمران / نجاه مش لقمه طريه و مش هيقدروا عليها بالساهل
دمعه تنزل من عين جابر يقوم يجرى يطلع بره و هو بيمسحها
عمران / احنا قولنا حاجه غلط ؟
صابر / داهيه ليكون عارف حاجه احنا مش عارفينها
صابر يطلع ورا جابر و عمران قلقان
…………………………
فى طريق وسط غابه فى تركيا
جوزيف سايق و وراه عربيات كتير بتضرب عليه نار
بابلو / انا سعيد بكل دولار اندفع فى العربيه دى
جوزيف / شغل الدرون
بابلو يطلع تابلت و يشغله جوزيف يدوس على زرار جنبه فى الكرسي من تحت شنطه العربيه تتفتح الدرون يطير و يحدف قنابل موقوته على العربيات تفضل تتقلب واحده ورا التانيه و العربيات ما بتقفش لبعض بتكمل ورا عربيه جوزيف
بابلو / لا جديده دى ... انا اوت
جوزيف / هانت
بابلو / جلت منك انت دى يا جو يا خويا ما كنتش عامل حسابهم دول
جوزيف / بالعكس هما مكان ما انا عاوزهم بالظبط
بابلو / فى ضهرنا و بالاعداد دى
جوزيف يبتسم و يحود فجاه يطلع على الطريق السريع
بابلو / انت ساحبهم على فين
جوزيف / على البحر
بابلو / طب مش كنت تقول لاخوك كان جاب المايوه
جوزيف يبتسم و يبص فى عربيه بتطارده سايقها همام
بابلو / اربعه و نص مخ عشرين على عشره عضلات
بابلو يشوف البحر بيظهر قدامه و جوزيف طاير على اقصي سرعه يتخض و يصرخ
بابلو / انت ناويها و لا ايه
جوزيف ينط بالعربيه فى الميه همام يفرمل قبل ما يقع وراه و ينزلوا جرى من العربيه مفيش اى اثر لاى حد همام يصرخ من قهرته و يتصل بحد فى التليفون
.........................
قدام المستشفي فى البلد
عباده قاعد فى الارض تحت الشجره مختار يدخل يقعد جنبه
مختار / و اخرتها ... هتفضل للصبح قاعد هنا كدا
صمت
مختار / ما هو لو اللى بتعمله ده هيرجعها هسابقك فيه بس احنا لازم نجمد يا عباده لازم نشوف طريقه على الاقل نرد بيها على اللى حصل
صمت
مختار / افرجها من عندك يا رب
.........................
فى شقه جوزيف
جوزيف و بابلو يدخلوا مبلولين و بيضحكوا
بابلو / ما تعملش بس عامل حساب كل حاجه كنت على الاقل جهزت غيارين بدل ميتنا اللى احنا فيها دى
جوزيف / سيبك انت انبسطنا
بابلو / لا بس الواد همام ده دخل دماغى ما تسيبلى نوجه اللعب معاها و تفكر فى طريقه تجنده بيها
جوزيف / نوجه اللى هتجنده اوعى اما ادخل اغير
امايا تطلع
امايا / ايه اللى عمل فيكوا كدا
بابلو / جو كان حران شويه فنزلنا ناخد غطس
امايا / تمام غيروا هدومكوا بقي عشان تتخلصوا من جثه ماريا
جوزيف / افندم
امايا / ما سمعتش الكلام و دخلت لنجاه و نجاه ما قصرتش معاها بصراحه
جوزيف يروح يبص على الكاميرات و يراجع التسجيل
امايا / انا قولتلها ما تدخلش ما سمعتش الكلام دخلتلها ما اعرفش ليه قفلت عليها الباب لحسن نجاه تهرب
بابلو / كان ممكن تساعديها
جوزيف / التعليمات ان ما حدش يفتح الباب و انا مش موجود و ماريا خالفت و خدت عقابها
بابلو / انا رايح انام ابقي صرفها انت بقي
جوزيف / لا هسيبها لبكره خليها تونس نوجه شويه
امايا / ليه كدا
جوزيف / عشان انا كمان مش قادر خالص يا ايمو بجد كان يوم طويل و صعب و لسه بكره كمان فاهدى كدا عليا
امايا / ما ينفعش تسيب نجاه مقفول عليها مع جثه
جوزيف / نجاه اللى قتلتها
امايا / برده يا جو ما ينفعش
جوزيف / يووووووه انا ما بحبش الزن الكتير اللى اقوله يتسمع بقولك مش قادر دلوقت ايه انتى معايا و لا معاها
بابلو / اعصابك يا جو اول مره اشوفك متعصب كدا
جوزيف / انا رايح انام
جوزيف يسيب المكان و يمشي
بابلو / يال سخريه القدر اللى تحطيه فوق دماغك يحطك تحت جزمته
امايا / على قلبي زى العسل ما لكش انت فيه
بابلو / اشبعى بيه يا اختى كدا كدا مش هيختارك ... هو اختارها خلاص
بابلو يشاور على الشاشه امايا تبص تلاقي نجاه بتصلى
بابلو / انا كمان تعبان و عاوز انام و انتى كمان لازم تنامى شويه هى كدا كدا مش هتروح فى حته
بابلو يمشي امايا تبص على الشاشه و تقرب الصوره و تحاول تسمع بتقول ايه الكلام مش واضح
........................
فى المطار
مهره بتتكلم فى التليفون
مهره/ طب ما كنت خليتك لحد ما تتاكد انك بخير ليه تخرج و انت مش خفيت لسه افرض جرحك فتح و لا حاجه
عمران / مش مرتاح هنا
مهره / طب ما تشوف مستشفي تانيه اعلى شويه
عمران / سبيها لله ... لما توصلى باذن الله ابعتيلى مسج او كلميني او اى حاجه
مهره / انا مش عاوزه اسافر بصراحه مش قادره ارجع من غير نجاه حاسه انى ندله اوى
عمران / بالعكس دا احسن قرار باذن الله توصلى بالسلامه و باذن الله اكلمك فى اى وقت ابشرك اننا لقينا نجاه و راجعين بيها بخير
مهره / باذن الله
اكرم يشاور لمهره
مهره / انا مضطره اقفل عشان هركب الطياره خلاص
عمران / فى حفظ الله
مهره تقفل و تجرى على اكرم و يتحركوا يقفوا فى طابور
اكرم / ها يا ستي اطمنتى عليه
مهره / اه بيكتبوله خروج هيكمل علاجه فى مكان تانى
اكرم/ تمام تعالى يلا عشان امك مستلمانى مكالمات بتطمن هنوصل امتى
مهره / كلمتها ؟
اكرم / فى ايه
مهره/ و لا حاجه
اكرم / مهره حبيبتي مفيش فايده من الكلام مع امك
مهره/ طب خلاص بلاش نتكلم دلوقت بعدين بعدين تمام
اكرم / ماشي كلامك انتى اى حاجه تقوليها ماشيه طبعا
مهره تبتسم و تتحرك مع اكرم
..................
فى اوضه نجاه
نجاه قاعده جنب الجثه بالظبط بتقرا فى المصحف الباب يتفتح تقوم تقف و تتعامل بهدوء شديد تلاقى امايا داخله شايله صينيه اكل و بابلو داخل وراها
نجاه / و انت كمان !!
بابلو / كان نفسي اقرب اكتر بس النصيب بقي يا نوجه
امايا تحط الاكل على المرتبه فى جنب و بابلو يروح يقف قدام نجاه 
بابلو / انا هنشيل الجثه من هنا قبل ما تعمل ريحه
نجاه/ وطى خدها
امايا / تعالى كلى يا نجاه الاكل ده حلال 
نجاه / جوزيف فين
بابلو / بيتابع من الكاميرات 
نجاه / ايه مش قادر يواجهنى باعتلى كلابه
بابلو / حاسبي لتزعليها الكلاب غاليين اوى عليها
نجاه / ما عشان منهم و عشان كدا خانتنا و اختارتكوا عشان كلكوا كلاب زى بعض
بابلو يشيل عينه من على نجاه و يبص لامايا بضحك
بابلو / هتسكتى
نجاه تستغل رد الفعل و تضربه بالرجل فى صدره يرجع خطوتين لورا و هو مصدوم نجاه تجرى تنط تتعلق فى رقبته و تقلبه فى الارض تجرى تديله بالرجل فى وشه يمسك رجلها و يسحبها تقع على ضهرها رجليها تبان تحاول تعدل الهدوم بابلو يسيطر و يقعد فوقيها و يحاول يثبتها و هى بتقاوم
بابلو / فكرانى من العيال الهبله اللى عايشه معاهم انتى مجرد حته بت تافهه ابوها مدلعها مش اكتر انا لو عاوز اقتلك مش هتاخدى فى ايدى لحظه انتى فاهمه
نجاه تتف عليه يضربها بالقلم و يخنقها امايا تجرى تزقه و تشدها بعيد
امايا / انت اتجننت ... انتى كويسه
بابلو يشيل ماريا و يمشي و يقفل الباب وراه امايا قاعده جنب نجاه ساكته
امايا / انتى كويسه ؟
نجاه تبصلها
امايا / ما ينفعش تحاربى فى معركه خسرانه انتى مش قده
صوت جوزيف / خسرتى بس عشان لبسك و دينك خسرتى عشان حدودك قصاد واحد ما لوش حدود اصلا كنتى مسيطره و كان ممكن تكسبي و تقتليه حتى امايا ما كانتش هتدخل اسدالك العره ده خسرك مبسوطه بنفسك دلوقت حالك كان هيبقي ايه لو ما كانتش امايا ادخلت انتى فاكره ان اسوء حاجه ممكن تحصلك هى انك تموتى انا لو دخلتهولك تانى هتتمنى لو ما كانتش امايا لحقتك و سابتك تموتى اصلا
امايا / جوزيف كفايا
نجاه / سبيه سبيه
امايا / هو مش هيفهمك انا فهماكى
نجاه / اضرب و لاقى مش كدا درسناها فى التمرين الظابط الطيب و الظابط الشرير صح هو يشد انتى ترخى صح
امايا / فى يوم من الايام الايام هتثبتلك انى بحبك و انى عمرى ما هاذيكي ... تعرفى ... لو حاولتى دلوقت تقتليني انا مش هدافع عن نفسي قدامك
نجاه تبص قدامها
امايا / اجيبلك لبس تانى غير ده
نجاه / و ما دام انتى جدعه اوى كدا ما ساعدتينيش من شويه ليه
امايا / انتى حوله ما انا اللى نجدتك منه
نجاه / ما تستهبليش كان ممكن تدخلى بدرى عن كدا
امايا / مش هقدر عليه
نجاه / تمام
امايا / صدقيني مش بقدر عليه
نجاه / انا عاوزه اكلم بابا
امايا / ما اقدرش اساعدك فى حاجه زى دى
نجاه تبص فى للكاميره و تزعق
نجاه / عاوزه اكلم اهلى عاوزه اكلم ابويا
صوت جوزيف / و المقابل
نجاه / عاوز ايه
جوزيف / نتجوز
نجاه / انت عبيط صح ... تمام مفيش مشكله خلينا قاعدين انتوا مش فاضيين انا فاضيه ... و انتى اطلعى بره خلينى ارتاح بلا قرف يلا
امايا / تمام ... كلى عشان يبقي عندك طاقه ... هتحتاجيها ... الاكل ده حلال
امايا تروح ناحيه الباب الباب يتفتح تعدى و نجاه عينها على الباب نجاه تاخد وضع الجنين و تحط راسها بين رجليها و تحاول تنظم نفسها و تهدى ترفع راسها و تبص للكاميره متركزه عليها تقوم تدخل الحمام تتوضي
..........................
فى فيلا متحاوطه بسور عالى و حراسه
جابر بيساعد عمران ينام فى سرير فى اوضه بسريرين و صابر يحط الشنطه جنبه على الارض
جابر / ارتاح هنا و صابر هيخليه جنبك يراعيك
صابر / و انت رايح فين
جابر / مش قادر اقعد يا صابر مش قادر ابان هادى اكتر من كدا
صابر / هتغلط يعني هتديهم رد الفعل اللى مستنينه من امبارح صح
جابر / اربعه و عشرين ساعه يا صابر ... نجاه معاهم بقالها اربعه و عشرين ساعه ... لوحدها
صابر / لو فى حاجه هتحصل لنجاه فهى اكيد حصلت خلاص فاهدى و احسبها عشان ما نندمش كلنا بعدين
جابر / انا واعى للى انت بتقوله انت واعى
عمران / صابر بيتكلم صح ... شوف همام بيعمل ايه ... هم اللى بيروحوله
جابر / و انا هخرجلهم يمكن يجولى
صابر / تمام يبقي ما تخرجش الا لما نبقي مرتبين لها احنا بنلعب على ارضهم ركز
جابر / كان نفسي ... بس مش قادر
صابر / انت ما نمتش من امبارح لحظه خد مهدئ و نام كام ساعه عشان تركيزك يعلا
جابر / يا اخى بطل برودك ده دى حرمه برده
صابر / و تخصنى زى ما تخصك و محروق قلبي عليها زيك بالظبط
جابر / لا مش زيي
صابر / ماشي ... انت اكتر ... بس خلينا بعيد عن العواطف ... انا المفروض هرجع لرجالتى فى الجبل ازاى و انا ما عرفتش احمى بنت بلدى هاه ... مش هقولك بقي عشره السنين و لا تدريباتنا سنين زمان سوا و لا اى حاجه ... انا مش راجع البلد من غيرها ... يا ارجع قفه بقي دى حاجه تانيه ... انت محتاج تركيزك كله عشان تنقذها و تركيزك ده محتاج اكل و نوم
جابر / مش قادر يا اخى انت ايه ما بتحسش
عمران / خد المنوم زى ما قالك و اهدى
صابر يروح يطلعه من الكيسه و يطلع ازازه ميه
صابر / خد ربع حبايه و شويه ميه و اهدى
جابر الدموع تفلت منه يروح يقعد على كرسي بعيد و يعيط فى صمت صابر يقرب كرسي تانى منه و يقعد جنبه
جابر / كنتوا سبتونى اموت نفسي و اخلص
صابر/ ما كانتش هترجع برده ... هو اللى خاطفها ده نبى و لا ولى من الاولياء الصالحين ما هو عيل ابن كلب ملحد يعني ما لوش مله و لا عهد
جابر / ما كنتش عيشت الاحساس ده
صابر / بطل هبل و خد الحبايه و هترجع باذن الله ما تقلقش ... ما حدش فينا هيرجع من غيرها
جابر يحاول يكتم مشاعره مش قادر صابر يقسم الحبايه و يديله ربعها جابر ياخدها من غير ميه و يمسح وشه
صابر / نام و اهدى
جابر يقوم ينام فى السرير التانى و لسه مفتح
عمران / هترجع باذن الله هترجع تفائلوا بالخير تجدوه
جابر يغمض و يروح فى النوم صابر يقوم يغطيه
صابر / لو احتجت حاجه دوس على الزرار اللى جنبك
عمران / انت هتروح فين
صابر يبتسم و يمشي و يقفل الباب عمران يحاول يقوم ما يقدرش ينام و هو بيتالم يدوس الزرار راجل يدخل
الراجل / تؤمر بحاجه يا سي عمران
عمران / صابر فين
الراجل / اناديهولك
عمران يهز راسه الراجل يطلع بره بيجرى و شويه و يرجع
الراجل / ما لحقتوش مشي ... اكلمهولك على المحمول
عمران يهز راسه لا
عمران / تسلم روح ارتاح انت
الراجل يمشي
عمران / اللهم انى استودعتك اهلى و احبتى فاحفظهم بحفظك الذى لا يضام
............................
فى الشركه عند دياب
وفاء نايمه على الكنبه و مستغطيه ببالطو و دياب واقف يبص من الشباك على عربيات بتنضف البلد و بوليس فى كل حته دياب يبص فى الارض و يتنهد و يطلع بره يلاقي المهندسين فى منهم نايم على جهازه و منهم اللى شغال و منصور شغال على جهاز يقفل باب المكتب و يروحله
دياب / وصلت لاى حاجه
منصور / مش قادر اركز اكيد فى حاجه فى التسجيلات فايتانا مش ممكن انا راجعتها مليون مره ايه مفيش حد فى الدنيا ما بيسبش وراه دليل او طرف خيط حتى
دياب / طب روح ارتاح و نام شويه عشان تقدر تركز و انا هبص مكانك
منصور / انهى نومه و لا راحه اللى ممكن حد يشوفها النهرده و لا بتحلم لو الواحد هيقدر يخطى بيته اصلا و يبص فى عين اهله ...طب اقولهم ايه السلام عليكم انا ما عرفتش الاقى نجاه فجاى انام شويه
دياب يبص على المهندسين
دياب / مش هنقدر نشتغل بالشكل ده مش هنقدر نكمل
منصور يبص حواليه حتى اللى شغالين بيدعكوا فى عنيهم و الارهاق باين على الكل
دياب / وقت الجد ما حدش فينا هيبقي قادر يصلب طوله و لا يفتح عينه و هنقع كلنا وقعه ما لهاش قومه لازم نرتاح و نهدى لازم ننام عشان تقدر نركز و نفكر
منصور / نام انت
دياب / لما وفاء تصحي انا هنام ... رجاله رجاله
الكل يفوق و يتعدل
دياب / قسموا نفسكوا اللى قادر يكمل يكمل و اللى مش قادر يقوم يروح يرتاح فى بيته او يفرش فى اى حته و ينام ما حدش يجي على نفسه ... التركيز مطلوب فى شغلنا و الراحه مهمه
مهندس ١ / راحه ايه بس يا باشمهندس فى الظروف دى
دياب/ لازم ... قسموا نفسكوا و روحوا لو فى جديد هنبلغكوا ... يلا يا منصور معاهم  ... ارتاح و لما وفاء تصحى هنام انا و هى تكمل مكانى
منصور / طب ما تاخدها و تروحوا هى نومه الكنبه جوه راحه اصلا
دياب / مش هقلقها لا ... اسمع الكلام و خد الناس و روحوا ارتاحوا ..  لو ما اتقسمناش يا جماعه هيجي وقت و هنقع كلنا ... اسمعوا الكلام مش عاوز اعلى صوتى اتفضلوا
دياب يدخل جوه و منصور يبص للمهندسين بيبصوا لبعض منصور يتنهد و يقوم
منصور / ما فيهاش احراج يا رجاله اللى غفل و قادر يكمل يخليه و اللى مش قادر يقوم معايا نروح كام ساعه و نرجع ... و انا باذن الله بعد كدا هخليهم يوضبوا مكان بسراير مريحه لظروف زى دى حقكوا علينا ..  يلا اتفضلوا
شاب يقوم و الكل بيبص عليه مهندس تانى يقوم و يتقسموا و الباقيين بيبصوا لبعض
مهندس من اللى قاعدين / انا هعمل قهوه لينا كلنا عشان نفوق و نصحصح
المهندس يروح المطبخ و باين عليه الارهاق
......................
تحت الشجره قدام المستشفي
عباده قاعد مكانه ما بيتحركش مختار يروح يقعد جنبه
مختار / انا كبرت على اللى بيحصل ده  .. عامل ايه
عباده مفيش اى رد فعل
مختار/ قوم ارتاح شويه قوم الحكايه ما خلصتش و مش هتخلص على كدا
عباده / خلصت يا مختار ... خلصت بالنسبالى ... اتكسرت و ما عادليش قومه خلاص
مختار / تفائلوا بالخير تجدوه ما تقولش كدا هترجع باذن الله
عباده / بص حواليك يا مختار الشيله كانت اتقل منى بكتير و انا اللى كابرت انا ضيعت كل حاجه بما فيها روحى
مختار / اللى حصل ده مش جديد احنا فيه من يوم ما وعينا على الدنيا نسيت و لا ايه احنا بنتولد بنشيل روحنا على كفنا و نخرج من بيوتنا ما نعرفش هنرجع و لا لا ايه اللى جد
عباده / اللى جد ان اللى راحت المرادى بنتى ... ربنا ادانى بدل الرساله كتير اخرهم الطلقه اللى عجزتها سنين بس انا كنت فرحان و فخور بيها اوى كنت عاوز الدنيا كلها تعرف ان دى بنتى ... و عرفوا و صورتها نزلت فى كل القنوات حوالين العالم و اتعرف ان كان فى بنت بطله اتخطفت فى ظروف غامضه ... كان نفسي بنتى تبقي احسن واحده فى الدنيا ... اهى الدنيا كلها بتتكلم عنها و عننا ... قالى هاخدها ... قالها هياخدها ... ما حدش فينا صدقه و استهونا بيه و هو ليل نهار لابدلنا فى الدره لا حس و لا خبر سنين بيخطط و يجهز صبره مش على حد خطفها و اختفى
مختار / ما اختفاش هو ما خلصش دوره ... لسه قافل مع همام حكالى اللى حصل ... همام حاطت نفسه فى وش المدفع طعم بيحاولوا يقتلوه زى ما عملوا مع عمران و جابر و صابر
عباده / هم عاملين ايه
مختار / الحمد لله
عباده / هند عرفت ؟
مختار / مش عارف ما اتكلمناش و مش ناوى اتصل بيها ازعجها انا ببعت رساله كل فتره اكتب احنا بخير ما تقلقيش و هى بتعمل سين و خلاص
عباده / طب انا هبعت لخديجه اقولها ايه ... احنا بخير ازاى بس ... طب انهى خير ده بس ... اللهم انى لا اسالك رد القضاء و لكنى اسالك اللطف فيه اللهم انى استودعتك ابنتى فردها الى من غير سوء اللهم انى لا حول لى و لا قوه فبدل حالى بحولك العظيم
مختار / امين ..  امين يا خويا امين
.....................
فى الفيلا عند اكرم
اكرم يدخل هو و مهره مفيش حد فى الفيلا الهاوس كيبر تدخل
الست / حمد الله على السلامه يا اكرم بيه ... هبعت حد يطلع الشنط حالا تحبوا تاكلوا حاجه دلوقت 
اكرم / هى الهانم و البنات فين
البنات فى النادى عندهم تمرين من ساعه و الهانم مشيت فى معادها الصبح و لسه ما رجعتش
اكرم يبص لمهره مهره تبصله بحرج
اكرم / طب حضريلنا الاكل بسرعه انا جعان ... تعالى يا مهره معايا المكتب عاوز اوريكي حاجه
مهره / حاضر
مهره تروح ورا اكرم المكتب يدخلها و يقفل الباب
اكرم / اقعدى
اكرم يروح يجيب البوم صور من رف و يروح يقعد جنبها
اكرم / دا بقي يا ستي موجز انجازاتى تقدرى تقولى كدا من يوم ما شوفت فيلم اب و انا بحاول اعمل زيهم كدا كنت صغير وقتها بس لما كبرت شويه قولت و ليه لا اهو حاجه لما اكبر افرجها لعيالى عشان يصدقونى ما انا مش هعمل زى كل الابهات و اقول انى كنت الأول على المدرسه بالكدب و خلاص ... انا فعلا كنت الاول على المدرسه فى ابتدائى  .. ابتدائى بس اعدادى مسحت بيا الارض
مهره تضحك اكرم يفرجها الصور
اكرم / فى ثانوى بطوله الجمهوريه فى الكراتيه ... و هنا مرحله الجامعه كنت ما حصلتش
مهره / و لسه ما حصلتش
اكرم يبتسم
اكرم / كنت بحب الموتوسيكلات اوى ... ساعات كتير كان بيبقي نفسي اقول لعمران اديني لفه بس بتحرج و للاسف مره كنت بتكلم مع امك و اقولها ايه يعني لو ركبت واحد زى زمان مره قالتلى و لما الناس تشوفك تقول شوفوا الراجل المتصابى بيعمل ايه هنعمل ايه ساعتها
مهره / ما حدش له حاجه عندك اعمل اللى يسعدك
اكرم / لو الدنيا كلها انتى ... مين هيبقي تعيس بس
مهره تقلب الصور
اكرم / و انا بلف العالم
مهره / الصوره دى جامده
اكرم / كانت فى برلين ايامها كنت بدوس على الارض تتزلزل تحتيا مفيش حاجه ممكن توقفنى احلامى ما لهاش نهايه و طموحى ما لوش حدود كنت فى منتهى السعاده حوليا ناس كتير زيي
مهره / راحوا فين الناس دول
اكرم / انشغلت عنهم بالشغل و انشغلوا عنى و كل واحد راح فى طريق ... سنه الحياه بقي 
مهره / طب ما تحاول تتواصل معاهم تانى
اكرم / فكرت فى الموضوع مره من فتره و فتحت فعلا و عملت سيرش عنهم على السوشيال ميديا منهم اللى بقي زيي و منهم الاسوء و منهم اللى مات بس منهم واحد ما اتغيرش لما شوفت صوره حزنت على نفسي اوى حسيته ما كبرش يمكن بالعكس شكله بقي احلى
مهره / تصدقنى لو قولتلك ان شكلك دلوقت احلى بكتير من الصور دى
اكرم / انا ما بكونش حلو الا فى عنيكى الحلوه دى بس
..........................