((((((((( الكبيره ٢))))))))
#لولو_محمد
الحلقه ٦٠
نجاه/ ما انا مش هتحبس فى اوضتى يعنى يا بابا
عباده/ يا بت دا انا لسه موديكى الجبل بنفسي
نجاه / انا ما بحبش قاعده البيت بتخنق
عباده/ لا حول و لا قوه الا بالله يعني عاوزه ايه دلوقت
نجاه/ ما دام مش هنزل الجيم اروح السوق
عباده/ اشمعن السوق يعني
نجاه / اى حته يابا اهو اضيع وقت
عباده / طب ما تشوفى حاجه مفيده احسن
نجاه / ما انتوا قافلين الجيم ... خلاص خلاص اروح المران اهو مفيد اهو
عباده / اى فرهده و خلاص
نجاه تتقمص عباده يضحك
عباده/ خلاص خلاص كلو الا البوز ده ما اقدرش عليه عنيا يا ستى هاخدك المران ... بس مش هنطول
نجاه / ليه بقى
عباده / لا حول و لا قوه الا بالله ... نجاه انتى مش صغيره على الزن ده انتى ادرى بظروفى و شغلى و مسؤلياتى مش كدا
نجاه / خلاص عندى فكره
عباده / اتفضلى
نجاه / قولهم يمشوا ورايا مش معايا كدا هبقي فى امان و برده مش خلوه و مش محتاجه محرم ايه رايك فى الفكره دى
عباده / طب ما انا عندى فكره احلى
نجاه / انجدنى
عباده / اكتب كتابك على جابر و تروحوا و تيجوا براحتكوا ايه رايك
...........................
نجاه تكشر عباده يضحك
عباده / خلاص خلاص يا فقريه بناقص هو الكسبان
نجاه / جابر دا سيد الرجاله كلها مفيش منه قوله بقي ... هو مش هيقول لحضرتك لا
عباده / ليه و هو انا اسمى نوجه
نجاه/ يابا بس بقي
عباده يضحك بصوت عالى
عباده / خلاص خلاص دا انتى قماصه بشكل ... هكلمه بس لو وراه حاجه مش هطلب و لا ازن
نجاه / يلا بقي يا كبير الكبارات كلهم يلا
عباده يضحك و يطلع الموبايل نجاه مش قادره تقف ثابته من الحماس
عباده / ايوه يا جابر انت فين ... فى الموقع بتابع شغل ... بيتابع شغل مش فاضي
نجاه / قوله
عباده / بقولك يا جابر فاضي تاخد كام نفر معاك و تمشوا ورا نجاه من بعيد كدا عاوزه تخرج و هبقي مطمن عليها و انت جنبها ... و من بعيد يعني عشان المحرم انت عارف
نجاه / قالك ايه ... قال ايه بقي
عباده / تمام يا حبيبي تمام فى حفظ الله سلام
نجاه / قال ايه
عباده / ما تهمدى لما اقفل مع الراجل هو فى كدا الراجل مش قريب دا بعيد
نجاه تحبط
عباده / بس جاى فى الطريق على ما تجهزى
نجاه تنط و تحضن ابوها و هو بيضحك
عباده / اخره الدلع ده ايه بس جننتيني
نجاه تبوس عباده من خده و تجرى و ترجعله
نجاه / هشوف مهره لو تحب تيجي معايا... بحبك اوى يا احلى بابا فى الدنيا
نجاه تطلع تجرى و عباده بيضحك
عباده/ و انا كمان بحبك يا كبد ابوكى انتى
.......................
فى شقه محمود
الباب يخبط محمود يروح يفتح يلاقي واحده فى نقاب اسود اول ما تشوفه ترفع النقاب ملامحها اوروبيه
البنت/ ادخل و لا هتنكسف
محمود / انتى مين يا حرمه انتى
البنت / انا كيرا اخت سيليا اللى جتلك فى القسم لحقت تنساها ... انا عارفه انك لوحدك فدخلنى احسن ما حد يشوفني ويسألني بعمل ايه هنا و ساعتها ... حتى لو زى ما قولت لاختى ما عناش دليل مع ان معانا ... العيار اللى ما يصيبش يدوش
محمود/ قولت قبل كدا اعلى ما فى خيلكوا اركبوه
كيرا / خلاص ... ما ترجعش تزعل لما صابر يتجوز نسمه و يحط ايده على أرض الجزار اللى انت عملت كل ده عشان توصل لها ... بما فيها قتل ابن عمك
محمود يشد كيرا جوه و يخنقها و يقفل الباب
محمود / انا اقدر ادفنك هنا و اقول صابر اللى كريكى دا ان ما كانتش دى الحقيقه
كيرا / مد ايدك فى جيبي طلع الموبايل و افتح الفيديو بتاع اعتراف يس تفتكر لو الفيديو ده وقع فى ايد صابر او حتى الحكومه انت هتقف قدامى كدا عادى انا عوزاك انت مصلحتى معاك انت
محمود يسيبها تتنهد و تطلع هى الموبايل و تناولهوله ما يرضاش ياخده
محمود / و انا اش ضمنى ان الفيديو حقيقي
كيرا/ ما تخلص بقي يا حوده ما تقرفنيش دا احنا دافنينه سوا فى الجبل ... بقولك ايه انت عاوز ارض الجزار و احنا عاوزين نسمه
محمود يبص لها
كيرا / ما تقلقش حياتها تهمنا و يهمنا اكتر ان جوزها يكون واحد من رجالتنا
محمود / انتوا مين بالظبط
كيرا / تقدر تودى الفيديو لدياب او منصور يتأكدوا انه حقيقي و ساعتها انت عارف انهم هيجروا على صابر و يا سيدي انت برئ و الجدع ده بيقول اى كلام ... هو مش قولنا العيار اللى ما يصيبش يدوش
محمود / الخلاصه ... انتى عايزه ايه بالظبط
كيرا / صابر ... ما ينفعش يتجوز نسمه ... انت اللى هتتجوزها لحد ما نقرر هنعمل فيها ايه
محمود / و ان ما وافقتش
كيرا / لا دى مشكلتك بقي لان لو اتجوزت غيرك انا هقتلك.. مش هيبقالك لازمه بالنسبالى
محمود/ و لو اتجوزتها
كيرا / هتبقي نفدت من قتلك لمحمود و خطفك لبدر دا انت كمان نفدت من زنك على ودان رعد طول الوقت ازاى يوقع بين اخوه و مراته ... هو مش دخول صابر الموضوع دا كان شورتك
محمود يستغرب
كيرا/ ما قولنا حبايبك اعترفوا بكل حاجه قبل ما يموتوا ان كان ده و لا ده و ادونا اسامى ناس تانيه لسه عايشه عندهم باقي غسيلك الوسخ ... اصل احنا ناس بنحب نعرف كل حاجه عن اى حد هيشتغل معانا ... بس سيبك انت من كل ده ... انت هتطلع بفوق الارض وزنك دهب و اكتر و مش بس كدا ... انت هتروح تشترى البيت الكبير اللى قدام المدرسه الاعداديه بنين عارفه بتاع الحج فواز شرف الله يرحمه
محمود / الله يرحمه ايه دا عايش ... حى يرزق
كيرا/ ما هو ما رضاش يبيع و انت عارف ولاده بقي كل واحد له أحلامه و نفسه يحققها و احنا اسباب على الارض يا محمود يا حبيبي فأنت هتشترى البيت ده و تدى لكل واحد حقه بما يرضي الله
محمود / منين بقي ان شاء الله
كيرا / ايه ده هم لسه ما كلموكش !!
محمود / يا وليه انجزى امى زمانها جايه
كيرا / لا ما تقلقش صحباتي بيفسحوها شويه لحد ما اخلص ... انت يا ابنى مش اشتركت امبارح فى مسابقه الجائزه الكوبرى و كسبتها
محمود يستغرب
كيرا/ هيكلموك و هيسلموك الجايزه هتاخدها و تسافر مصر تروح لشركه تارجت تقولهم انك عاوز تستثمر فى البورصه هناك هيقابلك واحد اسمه احمد ممدوح هياخد منك الفلوس و يشغلها و فى اقل من شهر هيبقي معاك تمن البيت يكون الراجل مات تصفى حساباتك فى البورصه و تشترى البيت و تستنى اقولك تعمل فيه ايه
محمود/ انتى بتتكلمى جد
تليفون محمود يرن
كيرا / مبروك يا حوده
كيرا تمشي و تقفل الباب وراها الموبايل لسه بيرن فى ايد محمود يرد
محمود / السلام عليكم
.........................
فى السوق
نجاه و مهره و احلام بيتمشوا وسط المحلات و مهره باين عليها الارهاق و بعيد شويه جابر قاعد فى عربيته
نجاه / ايه رايكوا فى العبايه دى
احلام / عندى زيها ... هو مفيش حاجه جديده نزلت و لا ايه
البياعه / فى شغل كتير جوه اتفضلوا اتفضلوا يا اهلا و سهلا يا مليون اهلا و سهلا
البنات يبتسموا و يدخلوا المحل مهره تشوف كرسي تجرى تقعد
مهره / اخيرا كرسي انا غلطانه و الله انى نزلت معاكوا
الست / طلعوا الشغل الحلو كله يا بنات ... اؤمرونى بتدوروا على ايه
نجاه / و الله مفيش حاجه معينه احنا قولنا نتفرج و لو حاجه حلوه عجبتنا نجيب ... بقولك ايه عندك اطقم اللى هى عبايه بزراير او كباسين من قدام و تحتها بنطلون بس العبايه للارض
الست / عندى اختها بسوسته
احلام / لا ما تنفعش
نجاه / استنى بس وريهانى ... لو حلوه اغير السوسته و اركب واحده دبل تفتح من فوق و من تحت عادى هتبقي حلوه
الست / ما هى سوستتها دبل امال ايه
نجاه / شوفتوا بقي انى مرزقه
الست / يا مها هاتى بدل الفجر مقاس ستك نجاه
نجاه / مقاس نوجه يا مها ... ايه ستك دى انتى عاوزه تكبرينى و لا ايه
جابر يجيب كرسي و يقعد على باب المحل
احلام / حلوه البجامه دى هاتى منها مقاسي ... ايه يا مهره مفيش حاجه عجباكى خالص و لا ايه الحجه تزعل كدا
نجاه / لا خدى بالك عروستنا قهراويه يعني ما بيعجبهاش العجب
مهره/ انتى بتقولى ايه
الست / يا نهار ابيض طب دا احنا عندنا الحلو كلو هي بس تاشر ... اجيبلك حاجه ساقعه و لا عصير شكلها يا كبدى فعلا مش واخده على الجو عندنا فرهدت يا قلبي منكوا
مهره تبتسم بحرج بنت تدخل تحط لنجاه الطقم اللى اختارته و تحط لأحلام البجامه نجاه تبص على البجامه
نجاه / حلوه اوى البجامه اللى اخترتيها يا احلام بجد ... انا عاوزه منها و نلبس زى بعض ايه رايك
احلام/ و هاتى لمهره كمان واحده و نعمل بجاما بارتي
مهره / انا مش عاوزه حاجه تسلموا
نجاه / بس يا بت ... هاتى تلاته من دى و دى هاخدها لونها حلو و عاوزه بنطلونين فردانى نفس اللون لو عندك انا ما بتعشليش بناطيل
احلام / من تنطيطك بيتفتقوا او يدوبوا
نجاه / يا جزمه اهمدى بدل ما اتغابى عليكى … الله استنى حلوه عبايه البيت دى ايه رايك يا مهره حلوه مش كدا
مهره / جميله فعلا
نجاه / هاتيهالها
كلب يدخل يشمشم على نجاه
الست / ايه اللى دخله هنا ده ... هش هش ... الكلاب بقت كتير اوى ما عدناش ملاحقين
نجاه / سبيه دا جميل ... انا هطلعه بره بالراحه
نجاه تهش الكلب بره تطلع تلاقي السوق مليان كلاب
نجاه / ايه ده !!
جابر / افه البلد الجديده الشيلتر و اللى بيجي منه ... خلصتوا نمشي و لا لسه مهره شكلها مش قادره
نجاه / هحاسب و نمشي
جابر / اركبوا العربيه و انا هجيب الحاجه و أحاسب عشان عربيه الكلاب هتيجي دلوقت و المكان هيبقي قلق تعالى
نجاه / ايه حوار عربيه الكلاب دى
جابر / تعالى بس مش وقته
نجاه تروح ناحيه العربيه الكلب ماشي وراها تفتح الباب و تركب ينط يقف و يسند برجليه القدمانيه على رجلها
نجاه / انت جعان و لا ايه
الكلب ينبح نجاه تنزل
نجاه / تعال نشوف لك حاجه تأكلها
نجاه تنزل من العربيه و تبص حواليها تلاقي فرارجى معلق على فراخ فى شوايه
نجاه / تعال
نجاه تروح و الكلب وراها جابر يطلع من المحل و معاه مهره و احلام شايلين الاكياس يبص على نجاه مش فى العربيه يبص لواحد يشاورله على محل الفراخ يتنهد و يركب احلام قدام و يقفل الباب و مهره ورا و يقفل الباب و يروح ناحيه نجاه الراجل بيديها الفرخه بتحطها فى الارض و تنسرها للكلب بياكل
جابر / انتى بتعملى ايه
نجاه / جعان
جابر / الاكل فى الشيلتر هو عارف طريقه لو اكلتيه هنا مش هيمشي من المكان ده ده مكان اكل عيش ناس
نجاه/ و هو ما بياذيش حد
الكلاب تتلم و تاكل مع الكلب
جابر / اتفضلى ... الراجل ده بقي يسترزق ازاى و بعدين الناس هتضايق من وجودهم فى السوق
نجاه / ماشي... لو سمحت عاوزه فرختين كمان
جابر / هو عند يعني
نجاه / هحطهم بعيد مش هقدر اسحب الاكل من قدامهم بياكلوا فى امان الله يا جابر ما بياذوش حد دول جعانين حرام عليك دول روح برده
جابر / انا بقول ايه و هى بتقول ايه… يا بنتى اكلهم مالى الشيلتر
نجاه / خلاص يا جابر اهدى بقي
جابر مش عارف يقف من كتر الكلاب اللى حواليه
الراجل يدى لنجاه كيس تاخده و تمشي
جابر / العربيه من هنا
نجاه / جايه جايه ثوانى
جابر / هو ايه اللى جايه تعالى هنا
نجاه تشاور للكلاب تروح وراها يروحوا لحد ما تطلع بره السوق و جابر وراها
جابر/ يا نجاه استنى
نجاه / ما هم ماشيين فى هدوء اهو مالك بقي مش الناس مضايقه انا باخدهم بعيد
جابر / دى مش شغلتك دى شغله البلديه فلو سمحتى
نجاه/ ممكن لو سمحت تهدى
جابر / حاضر .. بس ما تنسيش انى سايب احلام و مهره فى العربيه لوحدهم
نجاه / هنرجع اهو و بعدين ما تقلقش احنا فى البلد
نجاه تروح ناحيه ميدان و تفتح الكيس و تبدأ توزع الاكل و الكلاب تاكل و تهز رجليها
نجاه / الاكل مش هيكفى ارجع اجيب فرختين كمان؟!
جابر / اقسم بالله انا على تكه
نجاه / الله يا جابر انا عملت ايه بس
جابر / على العربيه و انا هحاسب بتاع الفراخ و اجى
نجاه / حاضر بالراحه
نجاه تروح ناحيه العربيه الكلاب تمشي وراها تقرفص و تلاعبهم و تضحك
نجاه / طب روحوا كلوا قبل ما يخلص و بعدين تعالوا اشكرونى ... سبحان الله انتوا لطاف اوى
جابر / نجاه
نجاه / بيشكرونى يا جابر … حاضر ... أنا لازم امشي هبقي اجى تانى
نجاه تروح ناحيه العربيه و الكلاب حواليها مش عارفه تركب
نجاه / هبقي اجى تانى بجد... انا لازم امشي
جابر يروح يساعدها و يهش فيهم و رجاله تدخل لحد ما نجاه تركب جابر يشاور لواحد على بتاع الفراخ يهز راسه جابر يلف و يركب و يسوق
جابر / فى التابلوه فى وايبس اديها تمسح ايدها
احلام / دى محتاجه تستحمى ... ايه يا نجاه ده
احلام تناول نجاه الوايبس تفضل تمسح فى ايديها و العبايه بتاعتها
مهره / كان شكلهم حلو اوى على فكره لو كنت قادره كنت نزلت اللعب معاهم انا كمان ... ربنا يجعله فى ميزان حسناتك
نجاه / شايفين الناس اللى بتفهم
احلام / كتر خيرك احنا ما بنفهمش بس الكلاب دى كلاب شوارع و عددهم مرعب و الله يعين الاطفال و الناس اللى ماشيه على رجليهم بجد
نجاه / ما بيضايقوش حد يا احلام
احلام / لا بيضايقوا مش كل الناس بتحب الكلاب او بتعرف تتعامل معاهم لو ام شايله عيل صغير و خايف هتتعامل ازاى راجل شايل اكل و مروح و لا حاجات تقيله و لا عيال صغيره عاوزه تنزل فى الشارع تلعب و لا تروح دروسها انتى مش عايشه وسطينا فمش حاسه بالمعاناه و الشكاوى
نجاه تبص لمهره و تسكت
جابر / البلديه كل يوم بتعدى تنقلهم ناحيه الشيلتر بيرجعوا تانى انتى اصلا منطقه الشيلتر دى هتعانى عشان تدخليها من كميه الحيوانات و الناس اشتكوا فعلا
نجاه / و المطلوب
جابر / مفيش احنا بس بنقولك ان فى مشكله
مهره / بس هم فعلا لذاذ و عشريين و لو الناس اتعلمت تتعامل معاهم بجد ممكن نستغلهم فى حاجات كتير كويسه
احلام/ زى ايه يعني
مهره/ اولا الكلاب كائنات وفيه و ذكيه يعني اللى اعرفه انها بتحفظ ريحه سكان المنطقه يعني مش هتهاجمهم هتهاجم الغرب او على الاقل هتهوهو عليهم فالناس تنتبه ان فى غريب فى المكان ثانيا الكلاب السعرانه او المريضه مش بتعيش فى باكس يعني طول ما هم جماعه اعرفى انهم كويسين و سلام
نجاه / شكرا
جابر / تحبوا تروحوا فين تانى
مهره / نروح معلش و الله انا عارفه انى بوظت خروجتكوا بس بجد تعبانه اوى
احلام / انتى عارفه انك حقيقي بطله
جابر / حقيقي
احلام / يعني انا بصراحه ما اتعاملتش مع حد مر بالتجربة دى بس السينما و كدا بنشوف يعني فى الأفلام بيبقي ردود فعلهم غيرك خالص انت فعلا عاوزه تخفى و بتقاومى بكل طاقتك
مهره / لانى ما كنتش عاوزه ابدء اصلا و لا عارفه ده حصل ازاى انا مستعده اعمل اى حاجه عشان امسح الفتره دى من حياتى و للاسف ما فيش فى الدنيا كلها حاجه ممكن تمسحها الا لو اخترعوا تايم ماشيين بقي
نجاه / بسيطه اطلبى من عمران يخترعهالك ما هو المخترع بتاعنا
الكل يضحك الا مهره
نجاه / يا بنتى مرحله و عدت بحلوها بمرها نركز فى اللى جاى
مهره / اللى هو ايه بقي ... ايه اللى جاى
جابر / خير بإذن الله اى كان اللى جاى خير احنا فى دار ابتلاء و الحمد لله انها جت على قد كدا و هنا هتلاقي فرص كتير ليكي و تقدرى تبدئي حياه جديده زى ما تحبى
نجاه / قولتلك الكلام ده صح
جابر / شغل هتلاقي خيل هتلاقي صحبه حلوه هتلاقي اهل هتلاقي محتاجه ايه تانى
مهره / هحتاج ايه بعد كدا الحمد لله
احلام / على فكره جابر بيتكلم صح جدا انتى بس ركزي انك تخفى و بعد كدا كل حاجه هتمشي لوحدها زى ما ربنا مقدر لها
مهره / و نعم بالله .. معاكوا حق ربنا يقدم اللى فيه الخير
نجاه تمسك ايد مهره و تطبطب عليها مهره تبص لها و تبتسم
.........................
فى السرايا
هند / لا طبعا مش هنروح كلنا انا و انتى و كام حد كدا
خديجه / مش من ضمنهم نجاه انا بقول اهوه
هند / لا كدا كدا نجاه مش هينفع تيجي عشان مهره بصي احنا مش هناخد حريم خالص انا و انتى و ياسمينا عشان هتشبط بس بحاول معاها عشان الحمل تقعد و ترتاح مفيش فايده دماغها صرمه قديمه خصوصا ان بتقول انها كلمتها قبل كدا أو حاجه كدا مش فاهمه الحوار بس تمام هى و جوزها بقي يصطفوا
خديجه / الله يعينه جوزها مش ملاحق دا ماجده بتقولى العيال اتهلكوا شغل
هند / منهم لله اللى كانوا السبب ... المهم هنلبس ايه
خديجه / اى حاجه حلوه من عندنا ولما يبقوا يجوا يعملوا الليله هنا نبقي نجيب جديد
هند / دى خطوبه ابنى يا خديجه هو فى ايه هو انا مش من حقي افرح يعني
خديجه / انا اقصد ان كل اللى عندك بالنسبالهم جديد
هند / لا برده يا اختى معلش دا انا ام العريس
خديجه / ههههههههههههه و ماله يا ستى حالا اكلم الاتيليه يبعتلك احلى موديلات لام العريس و خاله العريس
هند / هو انا مش المفروض اجيب لها هديه كدا زى ما أديت لرحمه ادى لنور و كدا
خديجه / لما ربنا يكرم و تنور البيت هنا ابقي صبحى عليها انما دى حياله خطوبه
هند / انتى شايفه كدا؟!
خديجه / هاتى هديه عاديه يعني خاتم اسوره حلق بس مش كردان يعني حاجه خفيفه كدا بتاع تلاته اربعه جرام يعني
هند / ما تهزريش يا خديجه ايه ناصر يزعل
خديجه / يا بنتى دى هديه تعارف لما ربنا يتمها على خير هاتيلها الحلو كله ما هى هتبقي بنتك
هند / طب اخليه اللماظ ؟
خديجه / اعملى اللى يريحك بس انا بقولك ما تافوريش مش حساها اصلا
هند / انتى كمان !!
خديجه / ناصر واخدها عند ما هى قدامه من سنين ايه ما حليتش فى عينه غير لما عرف ان اميره عايشه
هند / حسبي الله فى اللى كان السبب... هاتى التاب اما انقيلها حاجه
خديجه تناولها التاب و الاتنين يتنهدوا
.....................
فى الشركه عند على
مختار / انت ليه دايما بتختار الحل الصعب
على / انت ليه مش عاوز تفهم انى مش عاوز اى علاقه تربطنى بيكوا انا لا عاوز اقابلك و لا اعرفك هى تلاقيح جتت اسمع يا جدع انت
مختار / اسمع انت !!! انا جايلك فى الصالح و الصالح ليك انت انا مش طالعلى منه حاجه فاتهد و اسمع
على / انت انسان مش محترم
مختار/ ابنك مدمن
على / يادى ابنى يا سيدي ابنى ابن كلب ما اترباش و ابنك اللى لاف على بنتى و اتجوزها من ورا ابوها تسميه ايه
مختار / ما اتنيلش
على / دى حاجه ما تخصنيش مهره بالنسبالى و بالنسبه لأمها ماتت يوم ما اتجوزت الحيوان ابنك
مختار/ انا ابنى ارجل من عيلتك كلها ... اقولك حاجه انت راجل هزء و خساره فيك الدقيقه اللى هضيعها عليك ... انت اب انت !! دا انت فاجر
على / ما تخلينيش اطلب لك الأمن
مختار/ دكر ياله اطلبه و انا أوريك الوش التانى و لا انت فاكرنى هسكتلك انا بس ما بحبش اتشطر على الغلابه التافهين اللى زيك اتفو عليك و على اللى ربوك و طلعوك واطى قليل الاصل كدا دى بنتك يا حيوان
على يقوم يقف و يزعق
على / انت فاكر نفسك فين انت فاكر نفسك فى الزريبه اللى جاى منها
مختار يتهجم على على و يخبط راسه فى المكتب على يقع فى الأرض مناخيره بتجيب دم و مصدوم
مختار / البهايم اللى فى الزريبه عندها نخوه اكتر منك ... روح يلا اعملى محضر خلينا نشوف هتقدر تستمر فى المحضر كام ساعه قبل ما تروح زى الكلب تسحبه و رجلك فوق رقابلك اتفو عليك راجل نجس
مختار يمشي و هو عصبى
على / منك لله يا مهره انتى و الأشكال اللى بتتحدف علينا من وراكى
على يقوم و يكتم مناخيره بمنديل و يتصل بحد
على / ايوه يا اكرم الزفت ده جالى تانى و انا مش فاضي للهمج دول احنا لازم نتقابل و تقولى عملت ايه
اكرم / ما قولتلك هدى اللعب و سايسه لحد ما اشوف للجدع اللى معاهم سكه الله
على / انت بتضيع وقتى بالشكل ده
اكرم / بقولك ايه هى مش بنتك شيل شيلتك دا انت راجل هزؤ
اكرم يقفل السكه
على / الو الو اكرم الو ... هو فى ايه النهرده
.........................
فى اوضه نجاه
نجاه خارجه من الحمام بتنشف شعرها
مهره / لحقتى
نجاه / يا دوب كبيت على جسمي شويه ميه و طلعت جرى حتى شعرى كنت غسلاه على الحوض قبل ما ادخل الكابينه
مهره / و ليه يا بنتى ما تاخدى وقتك و تستمتعي بالحمام بتاعك دا المايه السخنه بتفك العضم كدا و بتجدد الدوره الدمويه
نجاه / اقولك ايه بس فى حاجات انك ما تعرفيهاش احسن و اريح
مهره / مش فاهمه
نجاه / زمان لما كنتى تحبى تدعى لحد كنتى بتدعيله بالصحه و طوله العمر ... بسعه فى الرزق ... بالخلف الصالح ... انما دلوقت اللى يحب حد يدعيله بالستر ... ما عادش فى حاجه تانيه اهم منها ما عادش فى رزق اكتر من انك تكون مستور ما عادش فى حاجه اسهل من ان الستر يترفع عنك ... فى ثانيه ... لولا ستر ربنا كاميره قد النمله تصورك و كلو شير شير شير و ضاع العمر يا ولدى
مهره / يا بنتى انتى فى بيتك انتى اتجننتى الكلام ده تقوليه مثلا فى فندق أو لو بايته فى شقه إيجار... دا حتى الفندق لو حصل فيه حاجه زى دى تبقي فضيحه للفندق و مشكله كبيره جدا
نجاه / يا فرحتي... يا بنتى بقولك كاميره قد النمله ... بصي التكنولوجيا وصلت لمرحله مرعبه ما عادش فى امان فى اى حاجه الموضوع ما عادش هاكينج على موبايلك مثلا دا ... يا بنتى بقولك حشره ممكن تكون اصلا ميكرو روبوت و كدا بصي ما تشغليش بالك انتى انا برانويد انجوى انتى حمامك و حياتك مش لازم تفهمى كل حاجه ... الحياه صعبه اوى على اللى بيفهموا
مهره / و الله !! طب سبنالك الفهم انتى يا اختى ياللى فاهمه فى كل حاجه انتى
نجاه تضحك و تروح تقعد جنب مهره
نجاه / تعرفى انى بحبك اوى
الباب يتفتح فجاه الاتنين يتخضوا احلام تدخل شايله سماعات و شنط مكياج و شنطه ضهر و محتاسه فيهم نجاه تجرى تساعدها و مهره تقفل الباب
احلام / انا جبت كل حاجه ممكن نحتاجها حتى الشيبسيهات و البسكوتات و الشيكولاتات جبت كلو كلو فى شنطه ضهرى دى
مهره / يا بنتى مش قولتلك انى هنام
احلام / مفيش نوم فوقى كدا انتى عمرك كله رايح فى النوم اساسا قومى يا بنتى خلينا ننبسط دا العمر بيخلص فى لحظه
نجاه / يعني لو العمر لحظه هتقضيها فى الرقص !!
احلام / انتى ناويه تربى دقنك امتى ما تهدى على نفسك كدا انتى بقيتي قفيله اوى
نجاه/ ما دى المشكله فعلا ... المشكله فيا
نجاه تضحك باستهزاء
احلام / على فكره انا ممكن اخد الحاجه و امشي دا ايه الفصلان ده و لا انتى فاكرانى زى اخويا لما تحتاجيني هتشاوريلى اجى و لما مزاجك يقلب هتقلى منى و اسكتلك
نجاه / فى ايه يا احلام ايه اللى وصل الكلام لكدا و بعدين انا اصلا ما اجرؤش اقل من جابر دا اخويا الكبير
احلام / يا شيخه بقي دا انا زهقت لك سلف ... اقولك حاجه خلى الحاجات عندك انا كدا كدا رايحه انام بلا قرف
احلام تمشي نجاه تبص لمهره و الاتنين مستغربين
مهره / يمكن افتكرت لما قولتى العمر لحظه هتقضيها فى الرقص انك بتنظرى عليها او انها اتحرجت عشان كلمتيها قدامى
نجاه / انا بجد مش عارفه هو فى ايه هى اصلا عارفه ان الجو ده مش جوى و انتى تعبانه بتفرضه علينا ليه
مهره / طب معلش خليكي انتى الكبيره و روحى راضيها
نجاه / لا انا هنام وسعى
نجاه تروح تشد الغطا عليها و مهره متابعاها بحزن تتنهد و تقوم تطفى النور و تنام جنب نجاه و كل واحده مديه التانيه ضهرها
...........................
فى قاعه كبيره
ناصر بيسقى نور الشربات وسط زغاريط كتير و تسقيف و فى بنات صغيرين داخلين طابور شايلين صوانى الشبكه و يلفوا حوالين المعازيم يفرجوهم لحد ما يوصلوا للكوشه و يبدا ناصر يلبس عروسته الشبكه هند تروح تساعدها و الكل سعيد و على الباب بره واقف جوزيف بيتابع من بعيد عمران يروح له
عمران / واقف لوحدك ليه مش لاقي نفسك زيي و لا فى حاجه مضيقاك
جوزيف / مش لاقى نفسك فى فرح اخوك !!
عمران / لا الجو نفسه ... بص محمد مثلا هايص هناك ازاى و بص شاكر عمال يصور انا بقي مش عارف اعمل ايه
جوزيف / انبسط
عمران / ما انا مبسوط بس مش هكدب عليك ... استنى اما ننزل البلد فى الفرح اللى عندنا هوريك الانبساط اللى على أصوله
جوزيف يبتسم
عمران/ انت مش مظبوط
جوزيف / ليه
عمران / مش حاسك
جوزيف / واو !! انت بتحسني!!!
عمران / ما ترخمش يا عم بس ... انت مش وحش
جوزيف / وحش مين ياله دا انا قمر
عمران و جوزيف يضحكوا
جوزيف / انتوا بتعرفوا تفرحوا و دى حاجه جميله... اخوك الاهبل اللى لابس بدله و عامل عريس ده عارف كويس ان خطوبته دى هتفتح على البنت الغلبانه دى أبواب جهنم هى و اهلها و مع كدا بيرقص
عمران / احنا اكيد مش هنسيبهم يعني
جوزيف / حبيتوا مين و حميتوه يا عمران
عمران الابتسامه تروح من وشه
جوزيف/ مش لازم حبايبك ... دا مجرد علاقه زماله كفيله انها تباصي اللعنه
عمران / انت بتلمح لحاجه
جوزيف / ضميرك واجعك ؟! انك ما سمعتش كلامى ساعتها
عمران / على فكره انت
جوزيف/ اهدى احنا فى فرح
عمران / و ما دام انت عارف اننا فى فرح بتفتح الموضوع ليه
جوزيف / بشوف النيرف اللى عندك فين
عمران / ما يغركش هدوئى ... قلبتي وحشه
جوزيف / انا شخصيا ما بعملش حساب غير للهاديين اللى زيك بس انا قولت قبل كدا انا مش جاى اتصاحب عليكوا انا جاى اعمل منكوا نسخ اقوى و أفضل... و طول ما انت بتفقد أعصابك لما بلمس نقطه ضعفك هتبقي فى خطر ... هى هتبقي فى خطر
عمران / انت عاوز ايه بالظبط انا الغلطان يعني انى جيت اتكلم معاك دا انت غريب جدا بجد
جوزيف / تمرينات الثبات الانفعالى عندكوا تعبانه محتاجين تتمرنوا اكتر ... نصيحه مش اكتر اتمنى انكوا المرادى تسمعوها
عمران يبص لجوزيف بقرف و يمشي يروح يقعد جنب شاكر عمال يصور و مبسوط جوزيف يسيب المكان و يمشي
……………………..
فى استوديو
المذيع / و الموضوع ده هيستمر قد ايه يا فندم
الضيف / مش اقل من ست شهور لحين استكمال البنيه التحتيه للمحطه و بعدين نبدا فى مرحله التشغيل باذن الله
المذيع / باذن الله ... بيبلغونى فى المايك بحاجه غريبه جدا دلوقت
الضيف / يا رب خير
المذيع / بيقولوا فى هاشتاج ظهر على تويتر من ساعه واحده بس ... فى ساعه واحده بس طلع ترند و بقي رقم واحد و دى حاجه ما حصلتش فى التاريخ... الهاشتاج بيقول ايه زوروا الأهرامات السما هتمطر بنات
الضيف و المذيع يضحكوا
المذيع / معانا السيد عمر القاضي مدير منصه ايفنتات و اللى اطلق الايفنت و كمان اطلق الهاشتاج ... السلام عليكم استاذ عمر
عمر / و عليكم السلام استاذ منير ازى حضرتك يا رب تكون بخير
منير / عندنا فضول شديد جدا نفهم السما اللى هتمطر بنات فى الأهرامات دى ايه حكايتها يا استاذ عمر
عمر يضحك
عمر / دا عرض هيتعمل باذن الله يوم الخميس الجاى
منير / دا بعد اسبوع
عمر / ايوه حضرتك و هو عرض بالمظلات برعايه السيرك الروسي اللى هيبدأ جولته يوم الاتنين اللى بعد القادم بإذن الله
منير / تحياتى ليك على الحمله الدعائية دى ما كنتش متخيل انى هشوف حمله بتسمع بالسرعه دى
الضيف / العرض كله بنات مفيهوش رجاله خالص
عمر / هو السرك كله مفيهوش رجاله يا استاذ مفيد
التلاته يضحكوا
منير / جديده دى معاهمش و لا راجل
عمر / لا حضرتك السرك كله بنات اداره و عاملات و كل التيم بنات يا فندم
منير / انا متخيل الإقبال على التذاكر من دلوقت يا استاذ عمر
التلاته يضحكوا
منير / طب و بالنسبه للدواعى الامنيه لتامينهم حضرتك مستوعب معايا لما تقول للشباب ان السما هتمطر بنات الوضع هيكون ايه دول هيفرشوا الصحرا سراير يا استاذ عمر
عمر / يا فندم الموضوع مش مقتصر على الايفنت ده بس حضرتك السيرك ده هيلف جمهوريه مصر العربيه كلها و فى كل محافظه هيتعمل كرنفال استعراضي فى شوارع المدينه و طبعا دا اكيد تشجيع على السياحه و مدعوم من وزاره السياحه حضرتك
منير / مدعوم يا استاذ عمر
عمر / طبعا يا فندم حضرتك بتتكلم فى سيرك عالمى و عمله صعبه حضرتك فى نسبه خمسين فى الميه من التزاكر مخصصه للاجانب حضرتك من كل أنحاء العالم عشان يستمتعوا بجمال مصر
منير / و دا برده مدعوم من وزاره السياحه يا استاذ عمر ؟
عمر / لا يا فندم دا ممول من السيرك وفقا لبروتوكول اتمضي مع الحكومه المصريه و اداره السيرك هى المسؤله عن حجوزات التذاكر فبالتالي هى المسؤله عن استضافه الوفود الاجنبيه مقابل نسبه تلاتين فى الميه من تذاكرهم هتروح لوزاره السياحه حضرتك
مفيد / حلو جدا دا غير طبعا العمله الصعبه اللى هتتصرف فى سكن و تنقلات و متطلبات اقامه
عمر / اكيد طبعا
منير / الحقيقه انا سعيد جدا باللى بيحصل ده و اكيد باذن الله هنغطى كل الكلام ده معاكوا اول بأول و لا ايه يا استاذ عمر
عمر / طبعا يا فندم دا شرف لينا حضرتك
..........................
أنت تقرأ
الكبيره ٢ بقلم / لولو_محمد
Hài hướcالحرب لسه مستمره و الحقيقه مسيرها فى يوم تظهر النور و كل واحد لازم يختار طريقه
