الكبيره ٢ بقلم / لولو_محمد

الحلقه ٧٧

((((((( الكبيره ٢ )))))))
#لولو_محمد
الحلقه ٧٧
جابر/ انتى محتاجه تنسي الدنيا دى شويه و تروقى نفسك ... اللى اعرفه انك لو خدتى مفتاح الشقه ده و روحتى كدا قعدتي فى الساونا شويه
نجاه / نعم !!
جابر/ هديكى بالبلحه ... لوحدك دا انا بديكي مفتاحى يعني انا شخصيا مش هعرف ادخل ايه جرالك ايه و ربنا اتغابى عليكى
نجاه تضحك
جابر / و مفيش داعى تروحى السرايا تاخدى غيار و لا تفتحي على نفسك فواتيح هتلاقي هناك كل اللى تحتاجيه و انتى بنفسك فرشاه بايدك و هارفه انه مقاسك
نجاه / بس مش بتاعى
جابر / انا مسامح استخدمى اللى انتى عوزاه ... اقسم بالله بتجيب نتيجه معايا اكيد هتشتغل معاكى ... فضى عقلك و هتلاقي على الحوض فى الحمام الكبير فوق علبه مرهم كدا مرسوم عليها حلزون البتاع ده منصور اللى قايلى عليه ... بس بصراحه طلع نينجا ..  اه يا دنيا جه عليا اليوم اللى اتعلم فيه الاسكين كير من دكر و اعلمه لحرمه
نجاه تضحك بصوت عالى جابر يبص على الغفر متابعيهم و مبتسمين يزغر لها تلم نفسها نجاه تاخد منه المفتاح
نجاه / تمام ... اجرب ... شكرا
جابر / بيتك يعنى فى اى وقت
نجاه تبصله بطرف عينها و تروح ناحيه البيت احلام متابعاها من شباك اوضتها تجز على سنانها ماشي
…………………..
فى شقه نور
نور بتتكلم فى التليفون
نور/ انا عارفه كل ده بس انت فاهم
ناصر / هكلمهم بكره باذن الله تانى و انا باخدكوا الاستابل
نور / بصراحه كلهم كانوا مبهورين بعمران النهرده ما شاء الله عليه ..  يا ترى انت بتعرف تعمل الحاجات اللى هو عملها دى
ناصر / دا تخصص عمران على فكره حتى السواقه بيتخنق من العربيات بيحب الموتوسيكلات بيقول على العربيه قفص حديد
نور / سبحان الله انت بتحب العربيات جدا و متابعها
ناصر / احنا اربع اخوات كل واحد فينا مدرسه يعني شاكر مثلا دكتور بيطرى بسبب المجموع مش هنقول لا بس بيعشق الحيوانات و الجبل و الرمله و الصحرا بشكل مش طبيعي
نور / طب ما الخيل حيوانات برده
ناصر / حصل اما بقي محمد فدا حكايته حكايه ما لوش غير سكه واحده
نور / و دى تطلع ايه
ناصر / الحواوشي
نور تضحك
ناصر / اقسم بالله مراته يوميا على الله يا فطار يا غدى يا عشا لو قدامه اى اكله تانيه و الحواوشي يختار الحواوشي من غير ما يفكر يمد ايده و يدوق حتى
نور / ما بيزهقش
ناصر / لا
نور / بس هو دمه خفيف و رحمه كمان شكلها لطيفه اوى
ناصر / لا هتحبيها جدا
نور / كان فى كلام عن مهره مراه عمران
ناصر / أطلقوا خلاص كان كتب كتاب بس ما اتفقوش
نور / عشان كدا بقي كانت ضاربه بوز و هو كمان بس على فكره بقي الموضوع ده ما خلصش على كدا و بكره تقول نور قالت
ناصر / ليه
نور / كل شويه يبصوا لبعض اه زعلانين بس عنيهم بتدور على بعض
ناصر / ما اتمناهالوش
نور / ليه دى عسوله اوى و اهتماماتهم مشتركه و شكلها بنت ناس
ناصر / دى بنت كلب ... استغفر الله ... أنا مش بشتمها بس ابوها فعلا راجل مش تمام و عامل مشاكل بالهبل و بينه و بين عمران محاضر و قرف
نور / للدرجادى
ناصر / نور بقولك ايه خلينا فينا احنا البيت كبير و كل واحد فيه بحكايه لوحده و اللى يركز هيتوه و يتعب خلينا فى حكايتنا احنا
نور / بس انا هعيش وسطهم و لازم أقرب منهم
ناصر / انا اللى اهمك قربى منى انا و الباقي اعتبريه فى جيبك ساعتها
نور / و انت بقي ايه مدخلك
ناصر/ انتى عاوزه كل حاجه على الجاهز كدا اتعبى شويه و دورى هنا و لا هناك
نور / تعبت كفايا و اخترتك عشان ارتاح ما تتعبنيش انت بقي
صمت
نور / الو ... ناصر
ناصر / معاكى بس مش عارف ارد اقول ايه بصراحه انا اصلي ما ليش فى الكلام و الله ببقي عاوز اقول كلام كتير بس مش عارف اقوله خلينا فى الفعل احسن
نور / و انت فى الفعل عمرك ما قصرت
ناصر / طب الحمد لله … روحى ارتاحى عشان بكره ورانا يوم بعياله تكونى فايقه و رايقه
نور / هتوحشني لبكره
ناصر / انتى وحشاني من دلوقت
نور / ما انت بتقول اهو
ناصر يضحك
نور / تصبح على خير
ناصر / و انتى من اهله
………………………
فى بيت جابر
نجاه واقفه فى الحمام الكبير و بتحط باث بومب فى البانيو و تبص على الازايز و تقرأ و تحط شويه من واحده منهم و ترجع الباقي مكانهم و تروح تطلع شويه ورد مجفف من برطمان و تحطهم فى المايه تسمع صوت قفل الباب تحت و بعدين ضحك بنات تستغرب و تنزل السلم تلاقى احلام و بنات كتير تبتسم بحرج
احلام / حمام السباحه من هنا و الاسبا و الجاكوزي فى الدور اللى فوق و كل حاجه هتحتاجوها موجوده بس اللى أوله شرط آخره نور هتنضفوا مطرحكم انا مش هدبس فى التنظيف لوحدى
بنت ١ / انتى متاكده ان جابر مش هيقول حاجه احنا عارفين انه للحبايب بس
احلام / حبايب مين جابر لا متجوز و لا خاطب و لا حتى مصاحب جابر مفيش حريم فى حياته غيرى ... اخته
نجاه تبتسم
احلام / جرا ايه يا اختى انتى و هى ما تنجزوا مش هنبات هنا يلا خلونا نفرفش و نروش كدا و ننبسط
البنات ينتشروا فى البيت نجاه تقرب من احلام
نجاه / انتى عارفه ان جابر هيزعل صح ؟!
احلام / انتى بتطردينا من بيت اخويا.. بصفتك ايه
نجاه / لا يا لولو ابدا انا لا بطردك و لا ليا دعوه انا سيباهالك و اصطفى مع اخوكى
احلام صوتها يعلا
احلام / يعني ما كفاكيش عاوزه تطردى بنات عمامك من بيت اخويا انا لا و كمان بتهدديني تقوميه عليا يا بجاحتك يا شيخه امال لو لا قدر الله اتجوزتيه هتعمل ايه هتخليه يتبرى مننا
نجاه / ما تخافيش مش هتجوزه
احلام / ما انا عارفه اصل هتتجوزيه ليه ما انتى متمرغه فى خيره و عزه بلوشي
بنت ٢ / هو فى حاجه يا احلام
احلام / اسألي نجاه ... فى حاجه يا نجاه ؟!
نجاه تبتسم و تمشي و تقفل الباب وراها
احلام / ست زفته بتطردنى من بيت اخويا و بتهددنى بيه
بنت ٢ / افتكرى انى قولتلك ان جابر هيضايق دا احنا من يوم ما اتبنى ما دخلناهوش مره و لا حتى عشان ننضفه و مش سامح لحد غيرك انتى و نجاه
احلام / بقولك ايه مش عاوزه امشي مش هيبقي حلال ليها و حرام على الباقيين لما تبقي مراته تبقي تتمرغ فى بيته انما دلوقت زيها زيك بالظبط و ما دام سمح لها يبقي يسمح ليكوا كلكوا
بنت ٢ / ااااه ... لا يا احلام ما تزعليش منى انا مش هدخل فى خناقه بينك و بين نجاه ما لهاش تلاته لازمه انا لو اعرف كدا ما كنتش جيت ... عن اذنك هنادي اختى و نمشي
احلام / بكيفك
بنت ٢ تطلع شويه ثوانى و كل البنات ينزلوا
.........................
قدام اوضه امين
امين / هتكلم معاها اهدى و ما تكلمهاش انت خالص
جابر / دى بالنسبالى القشه اللى قطمت ضهر البعير و أخرى انا جبته و لاخر لحظه اهو بكبرك يا امين و اقول انت اللى ليها مكان ابونا الله يرحمه بس انا مش قادر اتحمل
امين / ما قولت هتكلم معاها يا جابر خلاص اهدى
جابر / لا مش ههدى
امين/ يعني اروح اضربها يعني قولت الصباح رباح نقعد و نتكلم عاوز ايه دلوقت انت
عباده يعدي و ينادى على جابر
عباده / جابر ... تعال عاوزك
امين يطبطب على كتف جابر جابر يروح مع عباده يطبطب على كتفه و يطلعوا السطح
عباده / ايه يا عم ما كانوش عشر دقايق يعني لكل ده
جابر / هم كانوا عشر دقايق ؟!
عباده / ايه حداشر ؟!
جابر / يعني مش خيانه امانه من اختى لما تفتح بيتي بدون اذنى للناس ... و لا ما كانش اختى تطلعني و تطلع نجاه وحشين و تعمل حوار و تولع فى البيت باللى فيه
عباده/ الموضوع اهبل و ملموم
جابر / الدمل مليان صديد يا كبير لازم يتفتح و يتنضف مش هينفع كدا عمالين نغطى من فوق و ندادى و نطبطب و هى فى الطالع ما بتنزلش
عباده/ طب اهدى و انزل انت المرادى
جابر يبص الناحيه التانيه
عباده / هى غلطت... بس ليها وجهه نظر و وصلت
جابر / انا مش عاوزها تدخل فى حياتى
عباده / اختك و بتحبك
جابر / و انا بحبها و عمرى ما استخسرت فيها حاجه بس هى مكرسه روحها الفتره اللى فاتت ازاى فى الرايحه و الجايه توجع قلبي و تقل منى و تهنى و انا اقول اختى الصغيره ما تعرفلهاش اب غيرى انا و امين بتحبنى و زعلانه عليا و خلصت الحجج كلها اقسم بالله مش قادر
عباده/ طب اهدى و فكر بالعقل... انت الكبير دلوقت تحلها ازاى
جابر / مش عارف
عباده / عشان عصبى
مختار يدخل
مختار/ سبحان الله شوفوا مين بيتكلم ... صحيت انت دلوقت انما من شويه بعت خديجه تقول انك نايم و تتاوبلى كأنها نايمه عشان اتحرج و امشي صح
عباده / عاوز ايه يا مختار دلوقت مش وقتك
مختار / انت الكبير ... انت ما ينفعش تاخد قرار او تفكر و انت عصبي... بتنصح الواد و ناسي نفسك خالص
عباده / انا غلطت فى قرار يونس يا جابر
مختار / خليك معايا انا
عباده / اللى حصل فى البحر هو أكبر دليل انى كنت صح
مختار / كانوا حريم ... يعني هى مش هو
عباده / بقولك ايه ان كنت انت لسه ليك نفس تاكل من الكلام ده فانا شبعت
مختار / يونس كان بيحاول يحذرنا من حاجه
جابر / ان السيستم مخترق و سهل يتلعب فيه و دياب و منصور و الرجاله شغالين عليه دلوقت
مختار / اتلهى ... الموضوع غير كدا خالص
عباده / ايه هو بقي الموضوع المهم اوى دا ان شاء الله
مختار/ ما اعرفش
عباده/ و الله !!! امال ايه اللى مخليك متاكد اوى كدا انه غير كدا خالص
جابر / انا اسف على المقاطعه بس انا عاوز اسأل فى حاجه بعد اذنك يا خالى
مختار/ اتفضل
جابر / حضرتك طالع لحد هنا السعادى عشان تتكلم عن يونس مش عشاني ؟!
مختار / و انت محتاج حد يتكلم عنك انت كل البيت ده فى ضهرك
جابر / الا حضرتك
مختار / جابر ... الأسلوب ده مش معايا انا عمرى ما فرقت بينك و بين عيالي و لا قصرت معاك
جابر / لحد ما البيه شرف
مختار / انا قضيت نص عمرى بدور عليه دا كان امانه و انا ما قدرتش اصونها
جابر / حضرتك سلمت الامانه خلاص و عرفته كل حاجه اسمه و دينه و حكايته حتى ورثه استلمه نعمله ايه تانى
عباده / جابر ... انزل ارتاح شويه انت تعبان
جابر يبص لهم الاتنين و ينزل تحت
عباده / ايوه يا مختار سامعك
مختار / انت قولت اللى يشوف يونس يقتله؟!
عباده / مين قالك ؟!
مختار / قولت و لا لا
عباده / ما قولتش
مختار / امال احلام جابت الكلام ده منين
عباده/ انا قولتله لو انا شوفت وشك هقتلك ... ليه ؟! عشان خطف نجاه
مختار / ما حصلش
عباده / لا حصل و مش هتكدبنى انا و تصدقه هو
مختار/ انا راجعت الكاميرات يا عباده ما شوفتوش ... هو ما جاش جنبها و لا لمسها هو دخل الاوضه استناها و لأنك رافض تسمعه او تكلمه قال هى اللى هتسمعه لان الموضوع مستعجل بس هى برده رفضت و قالت لازم تكون موجود بس انت بقي
عباده / انا اب و صعيدي مستني منى ايه دا احنا فضلنا ناوبن مايند ناوبن مايند لما الفتحه بقت و لا نفق الشهيد احمد حمدى
مختار / انت مرتاح كدا يعني
عباده/ انت مرتاح؟!
مختار / لا
عباده/ دور على اللى يريحك و اعمله يا مختار حتى لو هتسيبنا و تجرى ورا ابن صاحبك حبيبك
عباده يطبطب على ضهر مختار و يسيبه و يمشي و مختار كاتم فى نفسه و مضايق
.......................
فى اوضه نجاه
نجاه تطلع من الحمام لافه شعرها بفوطه تلاقي البلكونه مفتوحه و مهره واقفه سرحانه فيها
نجاه / مهره ... مهره
مهره تدخل و تقفل الباب نجاه تشد الستاره
نجاه / مالك واقفه لوحدك ليه ما نمتيش ليه لدلوقت
مهره / انا اسفه على كل اللى قولتهولك
نجاه / ما تتأسفيش اى كان اللى قولتيه و اللى هتقوليه مش هيجي حاجه جنب اللى بسمعه من اهلى اليومين دول
مهره / سمعت جابر و يونس و كلام كتير بس عادى
نجاه / يمكن عندك عندنا لا
مهره / بس جابر فعلا بيحبك انا شوفته فى اكتر من موقف
نجاه/ انا مش مستعده للجواز دلوقت
مهره / ليه ؟! هو حد يلاقى حد يحبه و يقول لا
نجاه / ما انتى قولتى لا
مهره/ امتى ده ... يا بنتى دا انا عمرى كله بتنشق على حد يحبني الا ابدا ... الله يرحمها داده بقي هى اللى ربتني و عوضتني على قد ما قدرت ... الله يرحمها 
نجاه / احنا بنحبك يا مهره و مع كدا عاوزه تمشي
مهره / انا الناس بتناديني لحد دلوقت بالعروسه واحده فى المركب قالتلى خلاص بقي راحت عليكي بقي فى عروسه جديده خلاص و هي هي هي هي
نجاه تضحك
مهره / امال لو عرفت انى اطلقت و لا انى مش عروسه اصلا هتعمل ايه
نجاه / دى مين دى و بعدين عادى بتهزر ساعات الهزار بيبقي غريب شويه حريم بقي و كدا
مهره / سيبك منى
نجاه / انا بفكر انزل معاكى مصر هتحجج بيكي و اهرب من هنا
مهره / انتى بتتكلمى جد !!
نجاه / عارفه انهم مش هيرضوا و ان الموضوع هيكون صعب بس هو ده الحل
مهره / دا عمو مختار كان بيقنعنى استنى عشانك و عشان نفسيتك و الحوارات اللى حصلت و قد ايه انتى متعلقه بيا
نجاه / يعني ما روحناش بعيد حجه منطقيه انزل مصر
مهره / عشان يونس !!
نجاه / و ايه جاب سيره يونس دلوقت
مهره / ليكي مين فى مصر طيب
نجاه / انتى
مهره / بس انا معاكى هنا
نجاه / يعني مش هتسافرى ؟!
مهره / لا و هروح بكره اركب الخيل مع العروسه الجديده فى الاسطبل
نجاه/ انتى بتتكلمى جد ؟!
مهره / انتى عوزانى امشي ؟!
نجاه تبص لها و تسكت
مهره / انتى بتهربى بالظبط زى ما وجودى هنا هروب من مواجهه اهلى انتى بتتحججى بيا عشان تهربى من مواجهه اهلك ... بس الفرق بينا ان اهلك بيحبوكى و انا مش ناويه اهرب من المواجهه انا عاوزه اتكلم معاهم و اقول الحقيقه و احط صباعى فى عين الطخين انا لا عملت حاجه غلط و لا حرام و لا عندى اى حاجه اتكسف منها او استخبى بسببها انا مظلومه و ربنا معايا
نجاه تبص فى الارض
مهره/ انا كمان بحبك و عشان بحبك لازم اقولك انك ما ينفعش تهربى لا دى نجاه اللى اعرفه و لا هتستفيدي حاجه دا غير انه هيعرض حياتك انتى و كل اللى هيحاولوا يحموكى للخطر
نجاه / و انتى عرفتى منين الكلام ده
مهره / عمو مختار قالى امال انا هنا ليه
نجاه / عشانى !!
مهره / اكتر واحده وقفت جنبى حتى من غير ما تعرفنى
نجاه تقوم تحضن مهره
مهره / انا هركب ليل على فكره
نجاه تبص فى الارض و تبعد عن مهره تستغرب
نجاه/ ليل مات فى الجبل
مهره / هو ليل هو الحصان اللى مات
نجاه تهز راسها مهره تضايق اوى و تروح تقعد فى جنب
نجاه / كان اقرب حصان لعمران
مهره / ما كانش بيبطل كلام عنه ... اكيد زعلان عليه اوى
نجاه / كلنا زعلانين دا مهما كان روح
مهره تهز راسها و تبص فى الملكوت بحزن
...................
فى اوضه دياب
دياب نايم تليفونه يرن يرد
دياب/ السلام عليكم
همام / و عليكم السلام لامؤاخذه ان كنت بكلمك السعادى بس شحته غباوه خد رجاله و نزل فى بلد جمبكوا و بعتلك اللوكيشن بالظبط اكيد المكان ده قريب من مكان يونس
دياب / تسلم
همام / كان عمى كلمنى وقال هيبعت امانه بس ما وصلتش لعل المانع خير
دياب / خير خير ما تقلقش
همام / تمام شكلك نايم مش هطول عليك لو احتجت اى حاجه ابقي كلمنى
دياب / عشت تسلم ... فى حفظ الله ... سلام
دياب يقفل الخط و يحاول يكمل نوم
وفاء / خير
دياب/ مفيش نامى
وفاء تهز راسها و تكمل نوم و دياب ينام هو كمان
....................
فى الاسطبل تانى يوم
مهره تنزل من على فرس و تروح تقعد فى جنب بعيد عن الزحمه مختار يروح لها
مختار / تعبتى و لا ايه
مهره / لا زهقانه
مختار / من الخيل !!! دا انا كنت فاكره عشقك
مهره / اه بس مش هنا ... و مش مع دول
مختار / امال مع مين ؟
مهره / لا و الله ما اقصدش حاجه وحشه بس هم لسه بيتعلموا فانا متكفته و مش عارفه اتحرك و لا اخد راحتى غير ان الخيل نفسه مش مرتاح فى الزحمه و متوتر
مختار / دا حقيقي بس ما تقلقيش مش هيحصل حاجه الموقف ده مش جديد عليهم دول شغالين افراح و أعياد و مواسم الله ينور فى عز الزحمه و السوق
مهره تهز راسها
مختار / فى فى الاخر خالص ساحه ترويض صغيره كدا مش كبيره اوى زى دى ممكن تروحى تستجمى فيها مع نفسك بس شوفى نجاه كدا تيجي معاكى تونسوا بعض بدل ما تبقي بعيد عن عنينا و لا تتوهى و لا حاجه مع ان يعني كدا كدا الاسطبل حواليه سور كبير و مش هتوهى و لا حاجه بس يعنى المكان كبير اوى برده
مهره / تمام هقول لها
مهره تروح تتكلم مع نجاه نجاه تهز راسها بحماس و يمشوا جابر يشوفهم يروح وراهم مختار يشاورله جابر يبص على نجاه و يبص على مختار مختار يشاورله روح جابر يروح ورا نجاه عباده يروح لمختار
عباده/ ما اتعودناش نبات زعلانين من بعض
مختار / ربنا ما يجيب زعل
عباده / بس انا زعلان
مختار يقوم يبوس راس عباده
مختار / و ادى راسك و حقك عليا اى كان غلطتى ناحيتك حقك عليا
عباده / لا يا مختار مش هتمشي كدا المرادى مش على حساب العيله و البلد
مختار يبص حواليه و يبص لعباده
مختار / و انا ضد مصلحه العيله و البلد !!
عباده / راجع نفسك
مختار/ و ماله بس راجع انت كمان نفسك
عباده / الكل شايف انه وحش كل الادله ضده
مختار / ازاى احكم على واحد و انا رافض اديله فرصه حتى يدافع عن نفسه
عباده / اديناله كتير ما عملش حاجه اديناله بدل الفرصه ميه كل اللى كان بيعمله انه يستفز الرجاله و يتنطت و لا الفرقع لوز و يستعرض عضلاته و يقعد يضحك علينا لما نقع فى الفخاخ اللى هو راسمها بايده
مختار / انا و رشيد الله يرحمه كسرنا على بعض الحمام لو تفتكر عشان نقنع الكل اننا ضد بعض و هو ما فرقش حاجه عن ابوه يوم ما بنتك كانت لوحدها فى الاوضه تحت الارض جرى و رما نفسه فى النار عشان يلحقهالك فاكره الموقف ده فاكر انه لولا نجاه فتحت الاوضه و دخلته كان زمانه ميت تحت البيت اللى وقع فاكر و لا لا
عباده يبص الناحيه التانيه
مختار / البدله اللى جابها لبنتك نجتها
عباده / ما تقولش صدفه انه يحصل فى نفس اليوم مستحيل تكون صدفه هو مرتبها عشان نجاه
مختار / روح اتكلم مع ابنك كارم و اسأله قاله ايه
عباده / لو كان قاله حاجه كان جه قالهالى
مختار/ مش لما يحس انك مستعد تسمع ؟!
عباده يبص لمختار
مختار / انا مش ضدك انا معاك و فى ضهرك انا اخوك يا اهبل و مش هحابى لابن صاحبى على حساب بنتى ... نجاه ..  اول فرحتنا ... و لا نسيت فرحتى بيها و خناقنا على اللى يشيلها
عباده يبص الناحيه التانيه
مختار / روح اتكلم مع ابنك و اسمعه يونس قاله ان هو اللى كان مقصود مش نجاه
عباده / ازاى يعنى
مختار/ هتفهم لما تسمع
عباده / و انت فهمت ؟
مختار / ما انا مش لاقيه عشان اسمع له ما كنتش موجود للاسف
عباده / احنا عارفين هو فين بس مش بالظبط ... لو روحت هناك انا متاكد انه هيحاول يتواصل معاك
مختار / و بعد ما يتواصل معايا هيحصل ايه
عباده / انت عاوز ايه ؟
مختار / مش عاوز حاجه ... هروح اشوف الجماعه ايه دنيتهم
............................
فى ممر بين بوكسات الاسطبل
نجاه و مهره بيتمشوا و فى حصنه مخرجه راسها من كل صندوق و بيلاعبوا الخيل
مهره / جميله اوى اللهم بارك بس انا مش فاهمه انتوا ليه مطلعين للناس خيل عادى و سايبين الجمال ده محبوس هنا
نجاه / ما انتى قولتيها اهو ... الجمال ده ما ينفعش الناس تتعلم عليه دا محتاج محترفين و ناس بتعرف تقدر قيمه الفرس
مهره تقف قدام واحد ابيض شعره طويل
نجاه / دى فله هديه عمى مختار لعمران فى الثانويه العامه اشتراها من شيخ فى الشارقه فى الامارات
مهره/ جميله اوى
نجاه / فعلا بس ملك احلى
مهره تضحك و تكمل مشى مع نجاه لحد بوكس فاضي و عمران بينضفه
نجاه / ايه ده انت هنا
عمران / ما ليش فى الزحمه
مهره / هو انت متأكد انك واخد طلقه فى كتفك اصلك ما شاء الله يعني عايشها بالطول و العرض و تقع فى النيل شويه و ترقص بالحصان شويه و دلوقت وقفت عليك تنضف انت الاسطبل دا انهى عند ده بالظبط واحد غيرك يرتاح على الاقل
عمران يبص لها و ما يردش
مهره / انا مالى اصلا
مهره تسيب المكان و تمشي جابر يقرب شويه و يقف معاهم
جابر / اعتقد انها بتحاول تقولك انت ما بتريحش نفسك ليه و دا غلط عليك بس بأسلوب الحريم الغضبانه
نجاه / و انت ما شاء الله بقيت خبير فى اسلوب الحريم الغضبان
جابر / ما الحمد لله كل الحريم اللى حواليا غضبانه
نجاه / هروح اشوف مهره راحت فين
نجاه تمشي
جابر / هو احنا المفروض نتعامل مع الكائنات دى ازاى
عمران/ ما نتعاملش
جابر / ما نقدرش نعيش من غيرهم يا ابن خالى
عمران / انا نضفت البوكس لو حد محتاجه يقدر ياخده
جابر/ كان ممكن اى واحد من السياس يقوم بيها
عمران / كان لسه فيها ريحته
جابر / عشان لسه طازه بس ... بعد كدا
عمران / عارف اللى هتقوله من غير ما تكمل بس دا عشره عمر ... حتى لو حيوان ... مش هيتنسي
جابر / احنا هنتنسي يا عمران الخيل مش هتتنسي
عمران / لا مش هتتنسي ما تقلقش هفضل فاكرك
جابر / ايه ده يعنى اتوكل على الله يعني و لا اعملك ايه يعني
عمران / لا بعد الشر عنك انا بطمنك بس
جابر / هم راحوا فين
عمران يبص مش شايفهم الاتنين يروحوا يدوروا عليهم يلاقوهم بيلاعبوا فرسه نونو فى الحلبه جنب مامتها يقفوا بعيد يتابعوهم
جابر / هتسافر امتى ؟
عمران / مع الجماعه باذن الله
جابر / تمام ... طب و ..
جابر يشاور على مهره براسه
عمران / ابوس ايدك مش انت كمان ... مش ممكن يعني بجد
عمران يمشي
جابر / دا ماله ده ؟! انا قولت ايه ؟!
......................
فى اوضه جوزيف
جوزيف نايم امايا تفتح الباب بالراحه و تبص عليه و تدخل تنام جنبه يفتح و يبص لها و يبتسم
امايا / وبعدين انا بدأت ازهق
جوزيف / اؤمرى
امايا/ احنا هنفضل مستنين لامتى
جوزيف / هم مين دول اللى مستنين معلش ما انتى اتحركتى امبارح و برده ما شاء الله عليكي من فشل لفشل ما فيش بعد كدا
امايا / و انت فاكر ان كان ينفع يحصل اكتر من كدا انت ناسي ان شوشو هو اللى مامن الكروز انت عاوزنى اخلى شكله وحش قدامهم
جوزيف / و هو كدا شكله اتحسن
امايا / و هو كان فيهم حد يقدر يعمل اكتر من اللى عمله
جوزيف / و ناويه على ايه بعد كدا
امايا / لما تقولى انت ناوى على ايه اقولك انا انا ناويه على ايه
جوزيف يبتسم
امايا / ما وحشتكش
جوزيف / نجاه ؟!
امايا/ هو فى غيرها
جوزيف / هتيجي
امايا/ فين ؟! هنا !!! بتحلم يا بيبي نجاه عمرها ما هتعمل حاجه من ورا اهلها
جوزيف / لا ما اهلها اللى هيجيبوها ما تقلقيش
امايا تبص له يهز راسه و هو مبتسم
………………..
فى اوضه عباده
عباده / لا يعنى لا
نجاه / ليه
عباده / عشان كل الأسباب اللى فى الدنيا انتى ايه ما بتهمديش دا احنا جوه البلد و مش خالصين هنتفرق تانى بين هنا و مصر و نفضل نجرى وراكى فى كل حته... يا بنتى انتى مش مجرد بنت انتى الهدف هم عاوزينك انتى الجدع قالهالك فى وشك انا ما عنديش غيرك اخاف عليه
نجاه / بس السرايا مش مريحه بالنسبالى الفتره دى
عباده / حلى مشاكلك ما تهربيش منها دا بيتك يعني مهما لفيتي ما لكيش مطرح غيره
نجاه / بس انا عايزه اسافر مع مهره
عباده / اقنعيها ما تسافرش
نجاه / ازاى يعنى طب و دراستها دا فاضل اقل من شهر
عباده / كلمت فاروق و قال بيته مفتوح ليها حبت تروح تقعد هناك اهلا و سهلا ما حبتش انا ما خلفتهاش و نسيتها عشان اجرى وراها دا انا اللى خلفتها مطلعه روحى و مش ملاحق عليها
نجاه تبص له بحزن
عباده / لما ربنا يهديكي و تعقلى و تقررى تبقي ام باذن الله هتفهمى انا و امك بنحس بايه كل لحظه من ساعه ما عرفنا انهم حاطين عينهم عليكي  ... فى كل لحظه بشوفك بتبصيله او بيبص لك
نجاه / يابا دا كله وهم مفيش اى حاجه
عباده/ دلوقت يمكن بس بكره ما اضمنوش
نجاه/ انت بتقولى انا الكلام ده انا بنتك يابا
عباده / ما عشان بنتى خايف عليكي و عشان هو ابن رشيد انا بقول الكلام ده
نجاه ما تقدرش تكتم ضحكتها
عباده / فرقع لوز مستفز ... نسخه من ابوه
عباده يروح يبص من الشباك و هو بيغلى نجاه تحط ايدها على كتفه بدلع
نجاه / يعني انا قدامى جابر بطوله و عرضه و ما حبتوش هحب يونس يعني
عباده/ جابر مش حلنجى و لا بيعرف يقول الكلام المايع بتاع العيال دول
نجاه / و مين قالك الكلام ده بقي
عباده يبص لنجاه
نجاه / انا مشكلتى مع جابر انه ما بيبطلش قواله يابا
عباده / برده مفيش سفر و اقطعى زن بقي انا تعبت
عباده يروح يقعد على الكرسي يبص على نجاه بصاله بدلال يبص الناحيه التانيه تروح تقعد على ايد الكرسي و تحضنه
عباده / برده قولت لا
نجاه ما بتتحركش
عباده / لا يعني لا يعني لا
……………………….