الكبيره ٢ بقلم / لولو_محمد

الحلقة ٩٤

(((((( الكبيره ٢ )))))
#لولو_محمد
الحلقه ٩٤
فى شوارع البلد
عربيات رش الناموس بتلف الشوارع قدام المسجد واقف الشيخ مع راجل و اتنين شباب بيتكلموا العربيه تعدى
الشيخ / شايف يا وله لما تدى العيش لخبازه بيديك حاجه عظمه ازاى
شاب ١ / و الله عندك حق يا عم الشيخ البلد بقت ريحتها حلوه امال هم كانوا بيرشوا لنا ايه السنين اللى فاتت
الراجل / مرض بعيد عنك دخان يكتم على نفسك و يهيج صدرك بيموتوا مع الناموس حسبي الله و نعم الوكيل فيهم... كلها شغل رشاوى و محسوبيات و قرف
شاب ١ / اه و الله هو احنا بقينا عالم تالت من شويه
بنات تعدى و شاب ٢ عينه عليهم مش قادر يشيلها
الشيخ / يا اخى ربنا يهديك بقالى ساعتين فى الدرس بتكلم عن غض البصر و انت كلتهم بعنيك
شاب ٢ يبص فى الارض من كسفته
شاب ١ / ما هم برده يا عم الشيخ مش مظبوطين كدا و
الراجل/ ما تلم نفسك انت راخر ايه اللى جرالك انت كنت شوفت منهم ايه ... لينا كلام تانى لما نروح البيت حقك عليا يا مولانا حقك عليا انا حقك عليا عن اذنك عن اذنك
الراجل يزق الشابين يمشوا و الشيخ واقف يضرب كف على كف
.......................
فى اوضه عباده
عباده نايم فى السرير و واخد خديجه فى حضنه
خديجه/ يعني انت مستخسر فيا مره شغلت بالك و كنت مستعجل على شوفتى
عباده / يا بت ما تبقيش زى القطط تاكلى و تنكرى دا انتى ما بتغيبيش عن بالى
خديجه / امال مالك بقي
عباده / مستغرب بس ... دا انا النهرده كان ورايا هم ما يتلم ما عرفتش اركز فى اى حاجه ما عملتش اى حاجه و لا عرفت اتكلم مع الناس كلمتين على بعض دا انا حتى الصلاه ما ركزتش فيها
خديجه / يمكن إرهاق ما انت لا بتنام و لا بتشم الراحه و بعدين مش هنكدب على بعض يعنى احنا كبرنا ما عدناش زى زمان
عباده / طب عينى فى عينك كدا كبرنا و ما عدناش زى زمان
خديجه / يا راجل بطل انت فاهم قصدى
عباده / على العموم ادينى اخدت النهرده اجازه اهو و قولت لهم ما حدش يزعجني و هرتاح و مش هشغل دماغى باى حاجه
خديجه / صدقنى بكره هتلاقي اليوم ده فرق معاك جدا
عباده / بس انتى مش مستغربه حاجه
خديجه/ مش هترتاح انت ابدا صح
عباده/ اصلى مستغرب الهدوء اللى السرايا فيه ده من امتى بقول لهم ما حدش يزعجنى و ما حدش بيزعجنى فعلا ... دا احنا اسبوع العسل اليتيم بتاعنا قامت فيه الدنيا و ما قعدتش
خديجه / يا اخى ما تحمد ربنا و تستمتع بلحظه الهدوء دى قبل ما حد يخبط على الباب و يقل راحتك
عباده/ معاكى حق ... و الله معاكى حق
عباده يبص للسقف و يتنهد خديجه تعدل راسها فى حضنه
عباده/ هو عيالك فين
خديجه تبص له و ترفع حاجبها
خديجه / بنتك من ساعه ما رجعت هى و مهره ما خرجتش من اوضتها و عيالك رجعوا من الشغل واحد راح الجيم و التانى قال هينام و دخل قفل على نفسه الباب غطس ما قبش
عباده يهز راسه
.......................
فى اوضه منصور
منصور خارج من الحمام بينشف شعره بالفوطه ياسمينا نايمه فى السرير يروح ينام جنبها و يحضنها
منصور / وحشانى اوى
ياسمينا تلف و تنام فى حضنه
ياسمينا / ما عندكش شغل و لا ايه
منصور / ما صدقت الكبير قال مصدع و فركش القاعده قولت اطلع اشبع منك شويه قبل ما انزل و كانى كنت فى القاعده
ياسمينا / يعني هتمشي برده
منصور / غصب عنى و الله اديكي شايفه الشغل ما بيخلصش
ياسمينا / ربنا يعينك ... بس ما تنساش انت وعدتني اول ما ربنا يتمها عليا و اولد هتاخدنى فى اى حته انا و انت و الولاد و بس لا شغل بقي و لا ليا دعوه باى حاجه انت بجد واحشنى اوى
منصور / اعمل ايه بس يا ياسو ما انا خايف عليكي لحد ما تولدى طب و الله لولا انك فعلا كنتى وحشانى اوى ما كنت استجريت
ياسمينا / و الله غصب عنى ما انت عارف عيالك و عمايلهم
منصور / يشرف بس و انا اطلع عليه كل اللى عمله فيا
ياسمينا / طب نرجع لموضوعنا هتنفذ وعدك و اول ما اولد و اشد حيلي هتسفرنى اغير جو
منصور/ وعد و عيل اللى يرجع فى كلامه
ياسمينا / و انا جوزى سيد الرجاله كلهم
منصور / صعبان عليا اسيبك و امشي و انتى حلوه كدا ... هو انا لو طنشت و ما روحتش النهرده هيحصل حاجه ؟
ياسمينا / لا روح شوف اللى وراك و ارجع لى بالسلامه
منصور يبوس راسها و يقوم يطلع طقم و يلبس و يمسك ازازه البرفيوم ياسمينا تحمحم
منصور / بعتذر و بشده هحط فى العربيه
ياسمينا تبتسم منصور يسرح شعره و ياخد الازازه و يمشي ياسمينا تقوم تقفل الباب بالمفتاح و تطلع غيار و تدخل الحمام
..........................
فى اوضه نجاه
نجاه قاعده على سور البلكونه و بتتفرج على الجنينه و سرحانه مهره تطلع تقف جنبها و تديها ورقه مكتوب فيها
مهره/ هو انا ينفع ابدا اشتغل من امتى
نجاه / من بكره الصبح لو تحبى
مهره تهز راسها موافقه
نجاه / هروح اجيب الموبايل اكلم ابويا اشوف لو حددوا مواعيد للاكاديميه مش عاوزين نروح نلاقى المكان محجوز لناس تانيه
مهره تكتب
مهره / هو فى اكاديميات تانيه هناك
نجاه / مش اكاديميات بالمعنى ... بس اكيد فى ناس كتير بتتمرن على الخيل او بتمرن عيالها ... هو بصراحه حوار الخيل قل كتير عن زمان بس ابويا بيشجعهم و بيعمل مسابقات و جوايز كل فتره عشان الناس تفضل تركب خيل الكل بقي بيستسهل العربيات دلوقت
مهره تبص من البلكونه نجاه تروح تجيب الموبايل و تتصل ما حدش رد
نجاه / تفتكرى لسه نايم... دا لو نايم كان صحى من رنه التليفون
مهره تكتب و تديها النوته
مهره / يمكن نايم و عامله صامت
نجاه تهز راسها و تتصل بحد تانى يرن
نجاه / ايه عمى مختار كمان نايم و لا ... و عليكم السلام ازيك يا عمى صحيتك و لا ايه... لا انا بس كنت بسأل هى مهره تروح الاسطبل الساعه كام لو عاوزه تبدا شغل يعني ... سته ؟! اشمعن سته ... لا حلو و الله جميل و تراوه كمان ... بس ... طب تمام مصلحه حلو جدا ... لا ما اتحرمش منك ... فى حفظ الله
نجاه تقفل
نجاه / شكله كان نايم أو مش فايق مش عارفه ... تفتكرى يكون زعلان منى من حوار المستشفي ؟
مهره تكتب
مهره / حوار ايه ؟
نجاه / مفيش حاجه ما تشغليش بالك ... المهم بكره باذن الله الساعه ٦ هروح انا و انتى الاسطبل و نبدأ سوا على بركه الله و اه تعملى حسابك انى هنزل انا و انتى الجيم اعلمك ازاى تدافعى عن نفسك و امرنك بدل ما انتى ورور كدا
مهره تبص لنجاه بطرف عينها
نجاه / بصي انا ما بحبش القاعده نهائى بس شكلنا مطولين فاستحملى بقي
نجاه تشوف جابر معدى رايح بيته يدخل و يقفل الباب من غير ما يبص على بلكونتها
نجاه / هو ماله دا كمان ... شكله مش مظبوط
مهره تكتب
مهره / كلميه اطمنى عليه
نجاه تبص لمهره و تهز راسها لا
نجاه / بيتهيألي نتكلم وش لوش افضل ... ايه رايك؟
مهره تهز راسها موافقه
نجاه تلبس عبايه سوده و تنزل مهره تروح تقف فى البلكونه و تتنهد
......................
فى جنينه الجوارحه
دياب نازل رايح ناحيه عربيته يفتح الباب يشوف شاهين قاعد لوحده و مدي له ضهره يبص فى الساعه دياب يقفل الباب شاهين يبص و يقوم يقف
شاهين / على فين السعادى
دياب يبص فى الساعه
دياب / هو الوقت اتأخر للدرجادى ؟! خير قاعد لوحدك كدا ليه ... انت كويس ؟!
شاهين / كان نفسي نوصل لحاجه بس واضح ان كل واحد فيه اللى فيه و ما صدقتوا
دياب / و احنا قعدتنا من غير الكبار هيبقي ايه لزمتها
شاهين / على الاقل نتكلم و نتناقش يمكن نوصل لحل وسط و نوفر على الكبار الهات و الخد الوقت مش فى صالحنا يا ابن عمتى
دياب / انا مش قادر افهم انت ليه مستسهل موضوع النزول ده و ليه مصر عليه بالشكل ده
شاهين / عشان وجود حاجه زى دى تحت البلد تاعبنى حاسس اننا فاشلين و شويه خوجات جم ختمونا على قفانا و قاعدين بيضحكوا علينا و احنا خايفين نرد عليهم
دياب / عربيتين خرسانه يترموا فى المداخل و المخارج بتاعه الإنفاق دى هتجيب تعبهم الارض
شاهين / و اش عرفك أن دا آخرهم اش عرفك أن الإنفاق دى ما فيش منها كتير
دياب / برده !!
شاهين / احنا مشكلتنا اننا دايما رد فعل بنفكر كتير و بناخد وقت و الضربه بتيجي فى ثانيه
دياب/ ما خسرناش كتير بكره نقعد و نتكلم و كدا كدا لا رايي و لا رايك هيفرقوا فى حاجه الكبار مش هيرمونا فى البير من غير ما يكون قدامهم داتا كامله و الرسومات اللى جابر عملها بتضرب رسوماتك فى مقتل انا لو منك اشتغل اكتر على رسومات الانفاق دى قبل ما افتح الموضوع تانى
شاهين / و هو جابر ماله بالموضوع ده هى نجاه سيباله فرصه يتلفت حتى من كتر الفرك وراها
دياب / لما تشوفه ابقي اسأله ... انا رايح الشركه هتحتاج منى حاجه ؟
شاهين / تسلم
دياب يبتسم و يمشي و شاهين متابعه
شاهين / دا انتوا عيله تجيب الهم
.......................
فى بيت جابر
جابر بيغير هدومه جرس الباب يرن جابر يبص فى الساعه و يتنهد و ينزل يفتح يلاقي نجاه واقفه بعيد شويه يطلع و يبتسم و يبص لها باستغراب
نجاه / ازيك
جابر / انا الحمد لله انتى عامله ايه ؟
نجاه / فينك مختفى من ساعه ما جينا البلد  .. اخبار الحرق بتاعك ايه بتغير عليها بتهتم يعني و لا شاغل نفسك بايه
جابر يبتسم
جابر / انا مش مختفى انا على بعد رنه منك و الحمد لله انا احسن كتير و بدهن باستمرار
نجاه / بدأنا مع مهره العلاج النهرده و بكره باذن الله هتبدا شغل فى الاكاديميه ... الساعه ٦ ... يعني هنمشي من هنا على خمسه كدا نروح و نجهز و كدا يعني... حبيت اقول لك يعني يمكن تكون فاضي
جابر / ربنا يسهل
نجاه / يعني ايه ربنا يسهل يعنى جاى و لا مش جاى
جابر يضحك
جابر / و الله انا ورأيا شغل بس لو محتاجانى معاكى افضيلك نفسي عادى
نجاه / لا مش عاوزه اعطلك اكيد وراك حاجات مهمه انا بس حبيت اقول لك عشان ما تقولش انى مطنشاك و تزعل و لا حاجه يعني
جابر / ما اقدرش ازعل منك و انتى عارفه
نجاه تهز راسها
نجاه/ انا مش هعطلك اكتر من كدا شكلك اصلا راجع مرهق و كدا ... تحب اعملك حاجه تاكلها ؟؟ جعان؟
جابر / تسلمى اكلت مع الرجاله لقمه فى الشركه
نجاه / تمام الف هنا ... يعنى مش عاوز منى اى حاجه قبل ما اطلع انام ؟
جابر / هعوز سلامتك هعوز اكتر من كدا ايه
نجاه / انت كويس
جابر يضحك
جابر / انتى كويسه
نجاه / تصبح على خير
نجاه تسيبه و تمشي يضرب كف على كف و يدخل و يقفل الباب
.........................
فى مطار اندونسيا
مروان قاعد فى اوضه تحقيق و متوتر يدخل راجل يقعد قدامه
الراجل / ازيك يا مروان عامل ايه
مروان يستغرب
مروان / مين حضرتك
الراجل / حد يعمل كدا برده يا راجل ... انت مش عارف انت جاى فين و لا عقوبه تعاطى المخدرات هنا ايه ؟
مروان/ بس انا ما اتعاطيتش
الراجل / امال اللى لقيوه فى شنطتك ده ايه ؟
مروان / ما اعرفش انا فجاه لقيتهم سحبونى من الجروب و حبسونى هنا و انا مش فاهم اى حاجه
الراجل / و الله كان نفسى اصدقك بس
مروان / انت لازم تصدقنى اصل اشمعن انا اللى اتفتش اصلا و بعدين انا شنطتى كانت نضيفه ما كانش فيها حاجه انا بقولك انا شنطتى كانت نضيفه
الراجل / هو انت فاكر انك لما تخبى المخدرات بتاعتك فى شنطه أمير صاحبك من وراه احنا هنسكت لك ... دا انت واطى اوى !!
مروان / انت ايه اللى بتقوله ده
الراجل / بس انا مش مستغرب ما اللى يعمل كدا فى اخته هيبقي على صاحبه
مروان / انت مين يا جدع انت
الراجل / عندك امنيات اخيره قبل ما تتعدم... اى رساله تحب توصلها لاى حد
مروان يقف و يخبط على الترابيزه
مروان / انا ما كانش فى حاجه فى شنطتى انتوا اللى حطيتولى القرف ده انتوا عاوزين منى ايه انتوا فاكرينها سايبه فاكريني هسكت انتوا ما تعرفوش انا مين و ابن مين
الراجل / انت ابن كلب ... اقعد ياله انت فاكر نفسك فين هنا ... اقولك بلاها أمنيتك الاخيره ... بس عشان ابقي أديت رسالتى كامله ... اللى انت عملته فى اختك مفيش حاجه ممكن تصلحه و موتك لوحدك هنا برده مفيش حاجه هتنجيك منها
مروان / يمين بالله
الباب يتفتح و يدخل رجال الشرطه الاندونسيين ياخدوا مروان و يمشوا
مروان / استنى يا عم انا ما ليش دعوه بكل ده ... انا برئ انا ما عملتش حاجه اقسم بالله ما بتاعتى اقسم بالله شنطتى كانت نضيفه هم اللى حاولى القرف ده اقسم بالله مظلوم ... يا عم استنى ... استنى بقولك
الراجل يطلع التليفون و يتصل بحد
..................
فى سرايا الزنايته
جابر مستنى نجاه قصاد الجيم تطلع له
نجاه/ فى ايه قلقتنى خير
جابر / خير ... مروان اتقبض عليه فى اندونسيا بتهمه تعاطى المخدرات و دى عقوبتها هناك الإعدام
نجاه / اخيرا ... دا انا كنت هطق بس انت قولت انقبض عليه فى اندونسيا !! مش مصر ... عدى من مصر
جابر / انا بلغت عنه مش عن امير اللى معاه و طبعا لما اتفتش هنا كان فعلا نضيف بس حبايبنا على السير لما الشنطه عدت و استغربت فتشوا الشنط و لقوا الحاجه فعلا فى شنطه أمير و رجعوها مكانها و قدمنا البلاغ تانى هناك فاتعكش الحمد لله و اكيد الخبر وصل لابوه ... تعرفى كان ممكن نلاقي له صرفه هنا أو اى حاجه العقوبات هنا مخففه انما غدره بصاحبه كملت عليه يستاهل اهو لبس هناك فى اعدام مفيش فيها اى أعذار
نجاه / لا حول و لا قوه الا بالله ادى اخره الدلع زرعه مايله تجيب لاهلها المصايب بس هو يستاهل
جابر / هتقولي لها ؟
نجاه / اعتقد المفروض اعمل كدا انت ايه رايك
جابر / اعملى اللى انتى شيفاه ... انا بس قولت ابلغك بآخر التطورات انا كدا عملت اللى عليا و مش مطلوب منى اى حاجه تانى
نجاه / ما نتحرمش ما قولتليش هتيجي معانا الاسطبل النهرده؟
جابر / للاسف مش فاضي بس ما تقلقيش معاكوا ناس كفايا
نجاه/ تمام ... انت هتفضل قافل عليك البيت كتير طيب ؟
جابر / انا مش قافل على نفسي البيت و لا حاجه ما انا واقف معاكى اهو
نجاه / لا كتر خيرك و الله
جابر يضحك مهره تطلع من الجيم
نجاه / لحقتى تخلصى ؟
مهره ترفع صابعينها لفوق كأنها بتدعى و تسيبهم و تطلع فوق
نجاه / فرفوره
عباده يعدى يشوف جابر واقف مع نجاه
عباده / جابر ... تعال عاوزك
نجاه/ لوحده ؟
عباده/ ما اتحرمش منك بس خليكي انتى لحاجه تقيله
نجاه / اتوزعنا
نجاه تطلع فوق ورا مهره و جابر عينه عليها
عباده / هستناك كتير
جابر / لا مؤاخذه يا كبير تحت امرك
عباده يروح المكتب و جابر وراه
...................
فى الشركه عند على
على واقف و قدامه رجاله كتير لابسين بدل
على / يعني ايه ما تقدروش تعملوا حاجه امال انا بدفع ليكوا الفلوس دى كلها ليه لو مش هتنفعونى فى موقف زى ده يبقي قلتكوا احسن
راجل ١/ يا على بيه
على / بلا على بلا زفت انا مش هقبل أعذار يا تقدموا لى حلول يا تصفوا حسابكوا و تغوروا و ابدل الواحد فيكوا بعشره انتوا فاكرين نفسكوا ايه يا فشله
الرجاله يبصوا لبعض فى صمت تليفون على يرن
على / اطلعوا بره ... اطلعوا بره ... اهلا اهلا يا منير بيه ايه يا راجل ان ما كناش نتصل احنا بيك ما تفتكرناش خالص على فكره انا زعلان جدا من لؤى و هو عارف عمل ايه بس لحد دلوقت مش عاوز ادخل بين الاولاد  ... ايه!! ... مين اللى قالك الكلام الفارغ ده ... انا ابنى ... مهره !! ... هى حصلت !! انا ما اسمحلكش ..  الو الو  .. اه يا ولاد الكلب اييييه فاكرين نفسكوا ايه دا انا على الدسوقي يا غجر
تليفون على يرن
على / ايوه يا ايلين ... ايه !! فين الكلام ده ... استنى معايا
على يدور على ريموت التليفزيون و يقلب لحد ما يلاقى قناه عليها صوره مروان و هو بيتقبض عليه فى المطار
على / ما اعرفش عرفوا ازاى و امتى ما اعرفش ما اعرفش ... مش عاوز اسمع اسم الحيوان اللى اسمه لؤى دا تانى انتى فاهمه ... عمران!! و ايه علاقه عمران بالموضوع؟ ... راحله امتى و بيعمل كدا ليه هو الواد ابن الكلب ده عاوز منى ايه مش كفايا اللى عمله ... اقسم بالله ما هرحمه هنسفه من الدنيا نسف
....................
فى جنينه فيلا كارمن
كارمن قاعده سرحانه فى الجنينه صوفيا تدخل تقعد معاها
صوفيا / شوفتى الاخبار
كارمن / ابوكى كلمك ؟
صوفيا/ و هيكلمنى ازاى بعد اللى قاله فى اخر مكالمه يعني
كارمن/ ابوكى ما يعملش كدا يا صوفى ما يعملهاش مين دى و عرفها امتى طب انا طلقني... دا روحه فيكوا ... و بعدين يا حبيبتي انا بقولك ابوكى جاله تليفون نزل يجرى و ركب عربيه و من ساعتها اختفى ابوكى اتخطف و عمرى ما هصدق غير كدا ابدا
صوفيا/ تمام اللى تشوفيه ... بس هو الاخبار مش بخصوص بابا ... دى بخصوص مروان ابن اونكل على ... اتقبض عليه فى قضيه مخدرات فى بالى
كارمن / مروان !!
صوفيا / بياتريس بتقول ان كدا ممكن يكون هو اللى جر رجل مهره للادمان
كارمن تبص لصوفيا
كارمن / و جوازها من ورانا من الواد الفلاح اللى كانت ماشيه معاه ... مروان برده اللى دبسها فيه
صوفيا / هو حضرتك ما حاولتيش تكلميها خالص او هى ما حاولتش تتصل بيكى خالص
كارمن / انتى ايه اللى فكرك بيها دلوقت اصلا احنا فى ايه و لا فى ايه ؟
كارمن تقوم و تيجي تروح ناحيه الفيلا
صوفيا / هو احنا لو غلطنا هتبيعينا زيها كدا
كارمن تبص لها
صوفيا / احنا ما عادلناش غير حضرتك بابا اللى
كارمن / ابوكى ما سابناش ابوكى اتخطف و هيرجع و هتشوفى
صوفيا / تمام اللى تشوفيه ... عن اذنك
صوفيا تروح تركب عربيتها و تمشي
.........................
قدام كليه عمران
عمران طالع من الكليه يلاقي شباب واقفين بيتصوروا على الموتوسيكل بتاعه يقف يستناهم يخلصوا و يطلع الموبايل يلعب فيه و يبص على الشباب ريحوا و واقفين يضحكوا و يهزروا يروح يستاذنهم
عمران / بعد اذنكوا يا رجاله بس عشان امشي
شاب ١ / طب ما تمشي يعني هو ايه تلاقيح الجتت دى
عمران / اه .. لا ما هو الرايس ده بتاعى
شاب ٢ / و دا امك اللى جيباهولك و لا جوزها
عمران / انت قد جر الشكل اللى انت بتعمله ده
شاب ٣ / بقولك ايه يلا يا تروح تقف بعيد يا تشوف لك عربيه تروحك
شاب ٤ / بس يا عم ما تحرجوش بقي ليكون جوز امه
عمران يضرب شاب ٤ بالرجل ينطره على ضهره الشباب يهجموا عليه و يتخانقوا و هو بيدافع عن نفسه شباب كتير يدخلوا و فجاه كلو بيضرب فى كله وسط الخناقه واحد يحاول يضرب عمران بمطوه عمران يمسك ايده و يشده عليه يضربه بالدماغ و يسحب من ايده المطوه و يرميها بعيد واحد يضربه على دماغه من ورا بخشبه عمران يبص وراه و فجاه رجليه تخونه و يدوخ و يقع فى الارض
...........................
فى البلد
عمال على ونش بيشغلوا شاشه الاعلانات العامل يشاور للونش ينزله و الشاشه تشتغل اعلانات عاديه و فجاه اعلان السيرك يشتغل عروض حيوانات و بنات بترقص العيال تتلم و تقف تبص للشاشه و تضحك على البنات و هى بتدلع و تغمز العيال يطلعوا الموبايلات و يصوروا الإعلان و بعدين اعلانات عاديه تشتغل الناس تمشي
..................
فى المحافظه
عباده/ لا يا باشا احنا ما اتفقناش على كدا
المحافظ / يا عباده بيه انا مقدر موقفك
عباده / يا باشا دا كل اعلان منهم اسخم من اللى قبليه هو اعلان سرك و لا حاجه تانيه لامؤاخذه يا باشا احنا صعايده و محافظين مش خوجات
المحافظ / بس هم خواجات يا عباده بيه و ارجوك تهدى انا شرحت لك موقفى
عباده / هى الإعلانات دى اتعرضت فى القاهره و لا اى حته راحوها اصلا ... فى اى رقابه شافت الفيديوهات دى
المحافظ / اكيد طبعا و بعدين البنات مش طالعين عريانين يعني اوى للدرجادى
عباده / يقلعوا ملط يعني و لا ايه مش فاهم دا الفيديو كلو غمز و لمز و هز و مسخره و قله ادب
المحافظ / طب انا هحاول اتكلم معاهم تانى يعملوا اعلانات تانيه
عباده / يعني لحد ما يغيروه القرف ده هيفضل يتعرض عندنا فى البلد مش كدا
المحافظ / صدقني يا عباده بيه السيرك ده مش مجرد ايفنت عادى دا عليه توصيات من جهات مهمه جدا
عباده/ على راسي يا باشا
المحافظ/ حقك عليا انى رجعتك من غير ما اراضيك بس انت مقدر موقفى
عباده / يا باشا احنا خدامين الحكومه هو احنا لينا بركه غيركم
المحافظ / دا العشم برده
عباده يقوم يسلم على المحافظ و يطلع بره يلاقى مغاورى واقف
مغاورى / خير
عباده / الحكومه متكتفه
مغاورى / يعني ايه ؟!
عباده / يعني يعملوها الكبار و يصلحوها الصغار يا ابو شاهين
مغاورى / اااااه ... قولتلى ... الليله تكون خلصانه
عباده/ تموت انت فى لعب العيال
مغاورى / ما تحرجنيش بقي يا ابن عمى
الاتنين يضحكوا
.............................
فى جنينه الزنايته
جابر بيحط شنطه فى شنطه العربيه نجاه تطلع من السرايا
نجاه / جابر
جابر يقفل الشنطه و يبص لها تروح له
نجاه / انت ليه ما قولتليش انك مسافر اسكندريه
جابر / الكبير لسه قايل لى الصبح
نجاه / و دلوقت احنا داخلين على المغرب
جابر / انا مسافر اسكندريه يومين مش مهاجر
نجاه / طب رايح تعمل ايه ؟
جابر/ شغل
نجاه/ انت بقيت بتخبى عنى على فكره و خليك فاكر عشان لما اخبى عليك ما تزعلش
جابر / انا لا مخبى و لا نيله انا انطلب منى حاجه معينه قولت حاضر لا بخطط و لا كنت ناويها اصلا انا حتى كنت مرتب حاجات تانيه محتاجه تتعمل
نجاه / طب هتتاخر ؟
جابر / نسأل الله التساهيل المفروض يومين زى ما قولتلك باذن الله ما يجدش حاجه تعطلنا ... هو انتى مش رايحه مع مهره الاسطبل
نجاه / ما تغيرش الموضوع
جابر يسند على العربيه و يبتسم
نجاه / انتوا مخبيين عنى ايه ؟
جابر / هو انتى ما بتقدريش على ابوكى بتتشطرى عليا ؟!
نجاه / انت بتعاملنى كدا ليه
جابر / عملت ايه اصلا انا واقف بكلمك عادى اهو
نجاه / يعني مش حاسس ان فى حاجه غلط خالص
جابر / طب حقك عليا يا ستى ما يهونش عليا زعلك بس ممكن يعنى لو ما فيهاش تتقيل عليكي تلفتى انتباهى انا مقصر فى ايه او ايه اللى عملته ضايقك اوى كدا عشان اخد بالى بعد كدا و ما اكرروش
نجاه / انت مستفز على فكره
جابر / انتى فى حاجه مضيقاكى ... غيرى يعني
نجاه / انا مفيش حاجه مضيقانى اصلا انا طالعه اللبس عشان ما اتأخرش ... و اه هتفهم لما اعاملك بنفس اسلوبك ده 
جابر / المهم انك انتى تفهمى انى بعاملك بنفس طريقتك
نجاه / انا !!
جابر / اه
نجاه / و انا كنت عملت ايه بقي ان شاء الله
جابر / و لا حاجه بالظبط زى ما انا دلوقت ما عملتش اى حاجه ... غير انى قللت اهتمام  بيكي شويه
نجاه تبص له باستغراب يبص لها بسعاده
جابر / كنت واخد قرار ان لو ما اضايقتيش و لا فرقت معاكى انى هصدق انك ما بتحبنيش و احاول اشيلك من دماغى بس انا حاليا فى منتهى السعاده
نجاه / انت فى منتهى العبط عن اذنك
نجاه تدخل السرايا و جابر متابعها و مبتسم
.........................
فى المستشفي عند عمران
عمران نايم فى السرير رابط دماغه و حواليه زمايله و ناصر واقف فى جنب
شاب ١ / يا عم هو اقسم بالله دا راجل واطى و انا عارفه
شاب ٢ / يا ابنى ما لو عاوز يعمل حاجه زى دى ما كان عملها من زمان و بعدين هو فى ايه و لا فى ايه ربنا يصبره على ما بلاه
شاب ١ / ربنا ياخده دا راجل ابن ستين تيت دا بيسقط نص الدفعه عشان يلهف فلوس السمر فى كرشه تقولش ناقصه فلوس
عمران / يا جدعان خساره حسناتكوا اللى عمالين تبعتروها دى
شاب ٢ / المهم بس انت قولت ايه فى المحضر
عمران / و لا حاجه انا فعلا ما اعرفش حاجه عشان اقولها
شاب ٣ / يعني ايه يا زميلى يعنى دمك كدا راح هدر
عمران / ايه يعني اول مره تدخلوا خناقه يعني و لا ايه
شاب ٢ / خناقه ايه يا وحش دا بيقولوا كنت مولعها لولا اتغدر بيك
عمران / بس انا كدا عرفت انا ما بخفش ليه ما هو من عينك من عينك اللى جيبانى الارض
شاب ١ / سيبك انت منهم و ركز معايا كدا مش وقت رقده ما تشمتوش فيك
عمران / لا ما تقلقش انا تمام و مفيش اى حاجه هتتاثر
شاب ٣ / لو تحب نعدى عليك نساعدك فى المذاكره مفيش مشكله
شاب ٢ / نساعده ايه دا هو اللى بيساعدنا
عمران / اطلع بره يلا اطلع بره ... مستقبلى بيضيع قدام عنيا انت ايه اللى جابك
شاب ٣ / انا اللى جبته
عمران / اطلع بره انت كمان اطلع بره
الكل يضحك مختار يفتح الباب و يدخل بلهفه
مختار / السلام عليكم ... عامل ايه يا عمران ايه اللى حصل
ناصر / ما حصلش حاجه يابا اهدى ما هو زى القرد قدامك اهو
عمران / انا زى الفل يا بابا الحمد لله ما تقلقش حضرتك عليا
مختار / السلام عليكم ازيكم يا شباب عاملين ايه ... زمايل عمران فى الجامعه؟
شاب ١ / ايوه ازى حضرتك
مختار / ايه يا ناصر المنظر ده ما فيش اى حاجه للرجاله مفيش عصير شاى نص فرخه اى حاجه
الكل يضحك
......................
قدام بيت محمود
ابو محمود يفتح الباب و حواليه رجاله يدخل يغطى مناخيره من ريحه وحشه يدوروا فى الاوض لحد ما يلاقوا محمود ميت ابو محمود يقع فى الارض و الرجاله تسنده
…………………..
فى وسط البلد
عيال بتلعب بالدرون فجاه الدرون يخبط فى نص الشاشه يكسرها العيال يرموا الريموت و يجروا راجل يحاول يمسك حد منهم ما يعرفش اتنين رجاله يدخلوا يتكلموا بصوت عالى
راجل ٢ / لا حول و لا قوه الا بالله عيال مين ولاد الكلب دول
راجل ٣ / ما اعرفش بس شكلهم مش غريب عليا
راجل ١ / مش حرام فلوس الناس دى بسبب عيال ناقصه ربايه
راجل ٢ / لا حول و لا قوه الا بالله
الرجاله يضربوا كف على كف و هم مش قادرين يمنعوا ابتسامتها
……………………….
فى القسم
عباده يدخل
عباده/ خير يا احمد بيه ايه اللى حصل
ابو محمود / و ربنا ما هسيبك انت فاهم و لا لا
احمد / لو سمحت يا حج تهدى الأمور ما بتمشيش كدا ... اتفضل يا عباده بيه
ابو محمود / تمشي ايه و يقعد ايه انا ابنى اتقتل فى بيته جرا ايه يا حكومه جرا ايه يا بلد جرا ايه يا عالم
عباده/ انت ما كلمتوش خالص من ساعه ما نزل البلد
ابو محمود / لو فاكر اننا بنسيب تارنا يبقي لسه ما عرفتش عيله الجزار
عباده / انا مقدر موقفك بس لو ما حاسبتش على كلامك هيبقي ليا انا كلام تانى
ابو محمود يقف و يزعق
ابو محمود / هتعمل ايه هتقتلنى انا كمان اقتلني اقتل لو راجل تقتل
عباده / هو حضرتك باعتلى ليه يا باشا خير انا متهم بحاجه ؟
……………………..