الكبيره ٢ بقلم / لولو_محمد

الحلقه ٣١

((((((( الكبيره ٢)))))))
#لولو_محمد
الحلقه ٣١
الست / و محمود قال انه مرتب كل حاجه و لا يكونش خاطر المحروسه اهم عندك من تار اخوك
عبد الهادى / ما تدخليش مراتى فى الكلام ... ما تاخذينيش ياما بس ابنك ما كانش يتبكى عليه
الست / ابنى كان سيد الرجاله كلها انت فاهم و لا لا
عبد الهادى / مش هنكدب على روحنا انتى عارفه هو مات ليه
الست / عشان الحيوان اللى كانت عينه فى مراتك
عبد الهادى يقاطعها بصوت عالى و قهره
عبد الهادى/ عشان ما صدقتهاش ... عشان كانت بتشتكيلى من اخويا و ما بصدقهاش لحد ما اتجرا و كرا عليها اخويا ابن امى و ابويا ابنك ياما ابنك اللى ما فكرش فيا و هونت عليه
الست / هى اللى
عبد الهادى / ارحمونى بقي ارحمونى انا فى نار فى مش قادر اعيش و لا اتنفس انا تعبت
الست / انت بتعلى صوتك عليا يا عبده هى دى اخرتها
عبد الهادى/ انا عشان ارضيكي بختار بين انى اموت او اتسجن بختار اموت او اتسجن عشان دم واحد انا كنت ناوى اقتله اصلا
الست/ تقتل اخوك يا عبده !!
.............................
عبد الهادى / مفيش فايده ... و الله ما فى فايده انا داخل انام
الست / حقك ... ارتاح يا عبده... ارتاح يا ضنايا ... انا هكلم محمود و اقوله انى ما عادش فى خلفتى رجاله و ان تار ابن عمه فى رقبته هو ... و انت بقي ... خليك جنب مراتك ... و انسي ان ليك ام من اصله ... يحرم عليا بيتك و يحرم عليك بيتى ... سلام
الست تروح تفتح الباب و تمشي و ترزعه عبد الهادى ما يمنعهاش يروح يقعد على كرسي و التعب باين عليه نسمه تقرب بتردد و حزر يحس بيها يبصلها تقف مكانها يبص قدامه و يتنهد تروح تقعد جنبه
نسمه / بكره تهدى
عبد الهادى / عمرها ما هتهدى دا كان الغالى
نسمه / ربنا يرحمه
عبد الهادى / الكل بيترحم عليه مع انه قتلنى و ما حدش اترحم عليا
نسمه تطبطب على كتفه
نسمه / انا عارفه انك فى موقف ما حدش يحسدك عليه و حاسه بيك بس اللى ايده فى المايه مش زى اللى ايده فى النار و الناس ما تعرفش الحقيقه و مش هينفع نشرحلهم انساهم و عيش لعيالك
عبد الهادى يبصلها
نسمه/ صابر من مطاريد الجبل ما عندوش اللى يخسره لا له زوجه و لا عيال و لا حتى اهل دا غير كل الرجاله اللى تحت رجليه و يفدوه بحياتهم انما انت عندك انا و العيال و عندك امك و ارضك و بطولك يا كبدى الحرب مش فى صالحك و يا ريتها على حاجه ياريت الكسبان هيطلع منها بحاجه كل ده ليه عشان يتقال انك خدت بتار اخوك ؟!! حرام
عبد الهادى يقوم يدخل الاوضه و نسمه متبعاه بحزن
..................
فى سرايا الزنايته
نجاه / انت كداب
جوزيف / ماشي
نجاه / دا ايه البرود اللى انت فيه ده
جوزيف / انتى مش عاوزه تصدقى دى مشكلتك انا مالى
عمران / يعني اكرم بيه مهرب
جوزيف / ما قولنا لا هو بس كان عنده مشكله فى الشغل و انا حليتها و خدت عمولتى مش هغنيها يعني
عمران / انه يستورد بضاعه غير مطابقه للمواصفات و غير صالحه للاستهلاك الادمى امريكا كانت هتعدمها فى المينا فقرر انه يرشي و يشتريها لمصر بدل البضاعه النضيفه اللى كانت المفروض توصل انت بتعتبر ده مجرد مشكله فى الشغل !!
جوزيف / مقارنه بحاجات كتير شوفتها دى حاجه هبله و بعدين دى حاجه حصلت مره واحده يعني ما كررهاش فعادى يعني غلطه و عدت
جابر / تناحه ليفل الوحش
نجاه / انا ماليش دعوه بكل ده انا ابويا مهرب
جوزيف / و عمك و خالك و عيلتك من كبيرها لصغيرها بما فيهم الباشمهندس اللى واقف وراكى ... تنكر
نجاه تبص لجابر بصدمه عينه ما بتنزلش عن جوزيف واقف هادى مختار يدخل الكل يبصله
مختار / الاجابه عندى انا مش عنده
جوزيف / اعتقد ان موضوع عائلى زى ده انا ما ليش مكان فيه فهستاذنكوا ادخل اوضتى
جوزيف يروح اوضته و يقفل الباب
نجاه / هو سؤال واحد يا عمى ايجابته سهله يا اه يا لا ... انتوا مهربين
مختار / مفيش حاجه ايجابتها سهله ... انتى قتلتى قبل كدا يا اه يا لا
نجاه / قتلت
مختار / تبقي قاتله صح
نجاه تسكت
مختار/ كان ليكي اسبابك و اللى حصل كان غلط و اكيد فى ظروف تانيه ما كنتيش هتعملى كدا بس هو اجبرك الموقف اجبرك و انتى عملتى الصح و احنا كمان بنعمل الصح
فارس / يعني فلوسنا دى كلها من تهريب السلاح
مختار / مش كلها و اسمها تجاره السلاح و دى حاجه مش بالمعنى الحرفى الناس كلها بتشيل سلاح و ما حدش بيجيبه بطريقه رسمي احنا كان لازم نلاقى طريقه نسيطر بيها على سوق السلاح فى الصعيد و نوفر الكميات المطلوبه لحماياتنا و لمتطلبات السوق و الحكومه كانت عارفه ايوه مش قانونى ايوه لو اتمسكنا هنتنفخ عادى بس كانوا عارفين باللى بنعمله و عارفين بنعمله ليه و ما كانش فى بديل
نجاه / بيقول انك لسه شغال فى التهريب يا جابر
جابر / و احنا فى الحرب دى مش بنحتاج سلاح يعني هنجيبه منين ما عدناش بنتاجر فى السلاح المتهرب بس بنحتاجه عشان نحمى روحنا احنا فى حرب
نجاه تبص لمختار
كارم / و ليه بطلنا نتاجر
مختار / عشان الباب اللى بيجيلك منه الريح سده و استريح و الباب ده زى ما كان بيساعدنا نوفى احتياجات السوق و احتياجاتنا كنا بنساعد الحكومه تقفله قصاد باقي المهربيين اللى بيتاجروا فى الاثار و المخدرات و البشر و عشان كدا الحكومه كانت بتدعمنا لاننا فرضنا الامن و سهلنا عليهم شغلهم
كارم / امال ليه بطلتوا
جابر / بسبب فيرا و اللى عملته لقت شغلها مش ماشي قررت تعادينا و الحرب الكبيره قامت و راح مننا ناس كتير
مختار / قررنا نسد الباب لا احنا و لا هم بس للاسف من يوميها و احنا مش قادرين لازم سلاح لازم نحمى روحنا و هم ما بيخلصوش
عمران / و صابر و المطاريد عارفين الكلام ده
مختار / عنينا اللى فى ضهرنا و عكازنا لو حد فينا وقع
فارس / يعني كل الناس عارفه الا احنا
مختار/ الحقيقه ما لهاش وش واحد و ما لهاش اسم واحد و مش كل الناس هتقبلها ... امك رفضتها زمان و ما فهمتش ... و عشان كدا ابوكى هو الكبير مش انا
نجاه و عمران يبصوا لمختار
مختار / ما كانتش من الدنيا بتاعتنا ما قدرتش تفهم و اتاخدت من الدار للنار بس وقت الجد لما هجموا على السرايا سحبت سلاحها و طاحت فى الكل و لما خطفوها ما قعدتش جنب الحيطه تعيط دافعت عن نفسها و عن شرفها ... احنا اتغيرنا كتير عن زمان و عشان كدا خبينا بس مش عشان كنا غلط عشان ... يمكن كنا بنحاول نحميكوا
نجاه / و اشمعن جابر عارف
مختار / مش لوحده فى كتير عارفين ..  صفوه الصفوه ... الحمل ده ما يشيلوش الا ال
نجاه/ الرجاله صح
مختار/ قبر يلم العفش احنا بنقول ايه و هى بتقول ايه
كارم / ما انا ما كنتش اعرف ابقي مش راجل
نجاه / بس انت من الجيل التانى
فارس / هو موبايل
نجاه / ما تستظرفش الكل عارف ان جابر و دياب و منصور و انا من جيل و انتوا كلكوا جيل تانى
عمران / الفرق بيني و بينك سنتين ما تستهبليش
مختار / كلامك بيقول انك دخلتى الجيل الاول كوسه يا ست البنات
نجاه / بمجهودى و عرقى و تعبى
مختار / ست الكل ... نرجع لموضوعنا... احنا ما بنعملش الحوار ده كتير و امين اللى ماسكه و جابر دراعه اليمين و مغاورى من الجوارحه و منصور و دياب دراعه اليمين برده
نجاه / يعني شاهين ما يعرفش
مختار/ اكيد لا طبعا
نجاه / طب و اخرتها
مختار/ اخرتها زى اولها نعمل ايه يعني وضع و اتفرض علينا نموت يعني نعمل ايه
عمران/ طب و اكرم
مختار/ ماله زفت
جابر / مفيش حد ما بيغلطش و الحوار ده حصل من سنين و بيقولك ما اتكررش
عمران / و انت اش عرفك
جابر / عندك دليل عليه بلغ عنه احنا مش هنصلح العالم
عمران / ما يمكن كداب
جابر / جايز ما استبعدش عنه اى حاجه بس انت ما شوفتش الرعب اللى مسك فى جته اللى اسمه اكرم لما يونس عرفه باسمه الامريكانى
مختار / انا مش عاوز اقطع كلامكوا بس يعني لو مش هتطفل عليكوا حد يتطوع و يفهمنى الحكايه ... ماله اكرم
نجاه / انا هحكى لحضرتك
مختار / اتفضلى سامعك
........................
فى اوضه عباده
خديجه / مفيش حاجه بتستخبى
عباده / ما كلمتنيش تعاتبنى و لا تسألني عن اى حاجه
خديجه / و لا اخواتها كلموك
عباده / يمكن غلطنا لما خبينا كانوا فهموا مننا من صغرهم زى ما شربناها من صغرنا
خديجه / يمكن ما اتكلمتش عشان اتفهمت
عباده / مختار بيقول كل واحد قافل على نفسه اوضته و مفيش غيره هو و جابر فى الهول و يونس و شاهين قاعدين فى الجنينه
خديجه / شاهين !! و ايه اللى ودى شاهين هناك اصلا
عباده / بيقول عنده حوار مع شركه موبايلات نصبت عليه فرايحلهم بنفسه ... بس هو بيكدب ... شاهين راح سلم و سال على يونس و راح خبط عليه و اخده و طلعوا بره و بيتكلموا
خديجه / ما حدش ساله طيب عاوز يونس فى ايه
عباده / لا مختار اعتبرها مصلحه عشان يونس يسحب شاهين بره السرايا لحد ما الدنيا تهدى لانه دخل و الكل بيتكلم فلموا الليله و طلعوا قفلوا على نفسهم اوضهم
خديجه / طب اقولك ... كلمها انت
عباده / تفتكرى
خديجه / ابدا بفارس و بعدين كارم و بعدين نجاه
عباده / اشمعن
خديجه / ما اعرفش حسيت ... ابدء باللى تبدا بيه المهم كلمهم و اسمعهم و لو حسيت انهم مش تمام روحلهم ما تعديش اللى حصل ده و يونس ده
عباده / كدا كدا كانوا هيعرفوا ... مش غلطته الكلام جاب بعضه
خديجه / طب سمى الله و كلمهم و شوف الدنيا هتمشي معاك ازاى
عباده يهز راسه و يمد ايده ياخد الموبايل
..................
فى الجبل
راجل يدخل لصابر
الراجل / لا مؤاخذه يا كبير
صابر / خير
الراجل/ فى اخبار مش ولا بد
صابر يبتسم
الراجل / بيقولوا اللى اسمه عبد الهادى ده ناويهالك و بدء يرتب مع رجاله انهم يوقعوك و يخلصوا منك ... عشان تار اخوه و كدا يعني
صابر يهز راسه
الراجل / انت هتسكت يا رياسه... انا بقول نبعت نجيبه نعرفه مقامه
صابر / و لا حد يمس منه شعره ... ربنا يصبره على ما بلاه
الراجل / يا كبير اضرب المربوط يخاف السايب و دا يوم ما شطح نطح
صابر / و هو عبد الهادى شويه ... سيبه مش هيعمل حاجه
الراجل / طب فكر فيها طيب
صابر / فتحوا عنيكوا و خلاص و زى ما قولت ما حدش يستفزكوا بحرف و ما حدش يقرب منه
الراجل / امرك يا كبير ... بالاذن
الراجل يطلع بره صابر يتنهد
........................
فى الجنينه
شاهين / يا سيدي غلطت مره و تبت ما انت عملت بلاوى و ما حدش كلمك
جوزيف / ما تقارنش نفسك بيا
شاهين / يعني مش هتساعدنى
جوزيف / ازاى
شاهين / ما اعرفش امال انا جيتلك ليه انت مش بقيت مننا دلوقت انا لو حد عرف هموت و ابويا اول واحد هيقتلنى ما حدش هيسمى عليا هى مش البت دى تبعك
جوزيف / كانت تبعى دلوقت انا منكوا و هى منهم
شاهين / طب هو مش انت هاكر ... ما تهكر جهازها و تمسح الفيديو ده و لا شوف هى فين اراضيها و انا ابعتلها حد تبعى
جوزيف / طبعا انت ما تجرؤش تطلب الطلب ده من منصور و دياب
شاهين / مش هيفهموا انا غلطت و تبت و اتغيرت و نسيت الحكايه دى
جوزيف/ قولهم كدا
شاهين / مش هيفهموا ما تبطل تناحه يا اخى انا جايلك لحد عندك
جوزيف / انت عارف انهم ماشيين على الخطه بالمللى ما غيروش فيها حرف ما ابتكروش نهائى
شاهين / انت بتتكلم عن ايه
جوزيف / اصل انت السبب الوحيد اللى مخليك عايش انهم يبتزوك و يجندوك ... دى خطتى و انت ماشي عليها بالظبط نفس رد الفعل اللى رسمتهولك الفرق انك جيتلى لو انا ما كنتش موجود كنت هتعمل ايه ..  هتسمع كلامها و تطاوعها
شاهين / انا اقدر اديها الفلوس اللى تطلبها ..  اى رقم بس تمسح الفيديو ده ... ما انا كان ممكن اقول انه متفبرك بس منصور هيعرف ..  ابوس ايدك ساعدنى و انا هبقي من ايدك دى لايدك دى
جوزيف / هى مدياك رقم تتواصل معاها عليه
شاهين / الموبايل بحاله اهو ..  هى حتى ملياهولى حاجات لا مؤاخذه ليها بس انا و الله ما رضيت اتفرج انا راجل متجوز و عندى عيال و اللى حصل كان لحظه شيطان و راحت لحالها انا اتغيرت
جوزيف / طب ما تقول لاهلك الكلام ده قولهم كان قدامى الغلط و ما غلطتش
شاهين / مش هيرحمونى بقولك مش هيسموا عليا
جوزيف / اى كان عقابك وقتها مش هيكون قد عقابك لو عرفوا انك طاوعت امايا
شاهين/ انا مالى بيها مش هطاوعها
جوزيف / ما انت لو ما طاوعتهاش هتبعت الفيديو و تفضحك ... يعرفوا منك احسن ما يعرفوا منها صدقنى
شاهين / يا عم انت لو ساعدتنى مش هيعرفوا خالص
جوزيف / و المطلوب
شاهين / هكرها و لا كلمها و لا اعمل اى حاجه ... انا عارف دماغك هتعرف تتصرف بص هى كلمتنى من رقم على الموبايل ده تتبعه و اعرفلى مكانها
جوزيف / و هى هبله مش عارفه كل الحركات دى
شاهين / دى عيله و انت برده ليك حركاتك يعني و لا ايه يا جو
جوزيف / انت مسكين اوى
جوزيف يجي يسيب شاهين و يمشي شاهين يمسكه
شاهين / انت رايح فين مش هتساعدنى
جوزيف / انت الوحيد اللى تقدر تساعد نفسك بلغ اهلك و احرقلها الورقه اللى لاويه دراعك بيها
شاهين / دا اخرك يعني
جوزيف / انا عاوز انصحك نصيحه بما اننا بقينا فى فريق واحد
شاهين مش مهتم
جوزيف / انت الحلقه الأضعف فى عيله الجارحى و كلنا كنا مراهنين عليك انك سهل تتجند و انك هتكون السبب فى دمار عيله الجارحى عشان كدا ما حاولناش مع اى حد من الجوارحه و لاننا ما لقيناش حد من عيله الزيني بمستواك المبهر كان لازم نلعب على قلب نجاه و عواطفها و حلمها انها تبقي الكبيره و عاوز اقولك ان السكه دى ما كانتش مضمونه بنفس الدرجه اللى سكتك كانت مضمونه بيها
شاهين / انا بقى اللى عاوز انصحك انت نصيحه ... انت هنا ضيف هتقضي مصلحه و هتطير و الناس اللى جوه دى كلها مش طايقينك فما تعاديش الكل يا صاحبى
جوزيف / معاك حق ... بس انا لو حبيت اكسب حد ينفعنى و يقف جنبى مش هيكون انت ... عن اذنك
جوزيف يسيب شاهين و يدخل جوه تليفونه يرن يطلعه يلاقيه الموبايل الجديد
شاهين / عاوزه ايه
امايا / ما كنتش متخيله انك هتجيلى بالسرعه دى
شاهين / بقولك ايه من الاخر كدا تاخدى كام و تفكك منى
امايا / انت ترتيبك الكام بعد ابوك ... تفتكر ان لو لا قدر الله عمو مغاورى جراله حاجه انت هتشمها ... دياب و بعديه منصور و بعديهم لسته طويله من الجوارحه انت مش فيهم
شاهين / يا ستي ربنا يديله طوله العمر
امايا / زى ما جوزيف بيمرن نجاه عشان تعدى جابر و تبقي الكبيره
شاهين / عمرها الحريم ما بيحكموش
امايا / مين هيقف قصادها ... جابر ؟ دا خاتم فى صباعها ... نجاه كانت على كرسي بعجل و بتحرك الكل بطراطيف صوابها زى الماريونيت كل البلد بما فيها ابوك نفسه كانوا بيتحركوا بس بامر من نجاه ... حتى رجاله بحرى و اولهم همام
شاهين / عشان حرمه و عشان
امايا/ عشان احنا فى ضهرها ... انت كنت بتعرض عليا فلوس مش كدا ... طب ايه رايك اخليك حرفيا اغنى واحد فى الجوارحه و فى البلد كلها ما حدش هيصدق النجاح اللى انت حققته هخليك تنط جابر و دياب فى الترتيب و ما يقدروش يحصلوك ... ساكت يبقي الكلام على هواك ... انا عارفه انك راجل متجوز بس ما تنكرش انك كان نفسك فيا ... انا لسه فاكره كنت بتاكلنى بعنيك ازاى
شاهين / انا مش هقدر افيدك بحاجه انا العين عليا من الكل شليني من دماغك
امايا / و ان شلتك من دماغى تقدر تقولى ازاى هشيلك من قلبي
شاهين / انا مش اهبل زى ناصر هتقدرى تضحكى عليا و تسجليلى انا مش خاين
امايا / خاين ... خنت اخوك و ابن عمك خنته لما جريت ورا جسم مراته خنته و ما كنتش بتعمل ده بتردد او تانيب ضمير ... انت كنت مستمتع ... نفسك فيها صح نفسك فى ياسمينا
شاهين / كان شيطان و راح لحاله انا توبت و اتغيرت
امايا / اللى مش معايا ... عدوى ... و فرق تسد ... هبعت الفيديو لمنصور و هو هيمسك فيك و الكسبان فيكوا ابقي اشوف هعمل معاه ايه ... اللى هو اكيد هيكون منصور بامكانياتك دى
شاهين / انا هقولهم الحقيقه
امايا / مش هتقدر انت اجبن من كدا
شاهين / بالعند فيكي هقولهم و عليا و على اعدائى
شاهين يقفل و هو بيغلى يبص حواليه مفيش حد غير غفر ناحيه البوابه مش مركزين معاه
شاهين / هقولهم على كل حاجه ... مش شاهين الجارحى اللى حرمه تبتذه لا مش انا
……………………..
فى اوضه نجاه
نجاه قاعده على الشباك بتبص للسما تليفونها يرن تروح تشوفه تلاقيه ابوها
نجاه / السلام عليكم خير ايه اللى مصحيك لدلوقت
عباده / مصحيني اللى مصحيكي
نجاه / ما تقلقش عمى مختار شرحلنا كل حاجه و انا فاهمه وجهه نظركوا ... بس اكيد كان الافضل انى اسمعها منكوا
عباده / معاكى حق
نجاه / انا عوزاك تطمن ... انا بنتك ... احنا الصح و الغلط بالنسبالنا مختلف عن باقي الناس و اللى بيحكمنا هو الحلال و الحرام و انا عارفه ان عباده الزيني ما يقبلش الحرام ابدا و لا يتهاون فيه
عباده / مستحيل
نجاه / هو انا بعمل ايه هنا
عباده / لحقتى !!
نجاه / انا بجد ... انا ... انا لسه تايهه
عباده / كلنا تايهين ... اللى يقولك انه عارف هو عاوز ايه و هيوصله ازاى يا بيكدب يا هو اصلا عبيط و مماشيها بركاوى
نجاه تضحك
عباده / سبيها على الله
نجاه/ و نعم بالله ... هو يونس انسان كويس يابا
عباده / انتى اكتر واحده كنتى مقتنعه انه ممكن يتغير و اننا لازم ندعمه و نديله فرصه
نجاه / لما بيتكلم عن ماضيه مش بيبقي ندمان او اى حاجه بالعكس باكس و عينه قويه فاهمنى
عباده / يمكن عشان ما غلطش فى وجهه نظره
نجاه / هو ممكن الواحد يصلى بس و يعمل كل حاجه تانيه غلط ؟ طب هو ممكن الواحد يصلى تمثيل ؟
عباده / كل حاجه ممكن ... بس فى الحالتين دى حاجه بينه و بين ربه
نجاه / صح
عباده / انا مش معاه و مش ضده ... انا سايبك هناك تتعلمى حاجات جديده
نجاه / مفيش ما اتعلمتش حاجه من ساعه ما جينا و احنا ... مش عارفه بنعمل ايه و ايه اللى بيجرا بالظبط و ايه الفرق بين هنا و فى البلد ..... مفيش خطه و لا منهج مفيش هدف مفيش اى حاجه يوم بيعدى و يفوت و خلاص و يجر اخوه
عباده / و انتى مش قادره تفرضي سيطرتك يعنى
صمت
عباده / بخصوص مهره
نجاه / هو اكرم ده
عباده / مش دورنا و ما يخصناش ... يمكن مهره تخصنا عشان ... عشان رد الجميل لحد ما ... ربنا يفرجها
نجاه / مش فاهمه
عباده / انا و عمك يعني حاسين بكيميا كدا بس من بعيد
نجاه / عمران ؟!
عباده / و الله وارد نكون غلطانين بس ... الله اعلم
نجاه / هى بنت كويسه و انا بحبها
عباده / يبقي هتعرفى تتصرفى
نجاه/ تمام
عباده / بدل قعدتك دى قومى صلى ركعتين قضاء حاجه و اطلبى من ربنا يريح قلبك و يدلك على الصح و ينور بصيرتك
نجاه / حاضر
عباده / لو احتاجتى تتكلمى فى اى وقت كلميني ... اى وقت
نجاه/ ما اتحرمش منك ابدا
عباده / استودعتك الله اللذى لا تضيع ودائعه ... فى حفظ الله سلام
نجاه / سلام
نجاه تقفل و تتنهد و هى مبتسمه و تروح تقفل الشباك
........................
فى الارض
عبد الهادى شغال وسط رجاله محمود يدخل ينادى عليه
محمود / عبده ... عبده
عبد الهادى يبصله محمود يشاورله يروحله عبد الهادى يستاذن من الرجاله و يروح
عبد الهادى / خير يا محمود فى حاجه حصلت و لا ايه
محمود/ لا بس هيحصل ... الليله
عبد الهادى / هو انا كلامى ليك ما كانش واضح و لا ايه
محمود / انا رتبت كل حاجه و هنفذ مع الرجاله الليله ... تيجي ما تجيش دى حاجه ترجعلك ... انا مش هضغط عليك ... بس انا مش همشي مطاطى راسي وسط الخلق يا ابن عمى
عبد الهادى / هو مستنينا ... لو روحتوا دلوقت ما حدش فيكوا هيرجع
محمود/ يا عم انت عندك حرمه و عيال تخاف عليهم خليك انت جنبهم انما انا ما اسيبش تارى ابدا و رعد الله يرحمه عندى فى غلاوتك و اكتر
عبد الهادى / و عشان غلاوتك عندى يا محمود بقولك استنى شويه استنى اما الحكايه تهدى و تنام و ياخد راحته
محمود / و لا يوم واحد انا بلغتك عشان ما ترجعش تقول ما قولتليش انما تيجي او ما تجيش مش هترجعنا عن قرارنا و لعلمك امك اتصلت بيا امبارح وعيطتلى و انا هديتها و وعدتها انى هبرد نارها و نارنا كلنا
عبد الهادى / يا ابنى افهم
محمود/ انا شكلى معطلك عن شغلك بالاذن يا ابن عمى
محمود يمشي و عبد الهادى ينفخ و يروح و الرجاله واقفه بعيد مستغربه
........................
فى الشركه عند مهره
مهره بتطبع ورق تحطه فى فايل و تخبط على مكتب رامى و تدخلهوله
رامى / تعالى يا مهره ... خلصتى ؟
مهره / ايوه الورق اللى حضرتك طلبته بعد التعديل
رامى ياخد الورق و يراجع و يمضي
رامى/ وراكى حاجه بعد الشغل النهرده
مهره / كنت متفقه اطلع اركب خيل مع صحبتى
رامى / انتى ما بتزهقيش انتى مش قضيتي نص يومك امبارح فى تمرين الخيل ادى لنفسك فرصه يعنى
مهره / فرصه من ايه دى اكتر حاجه بحب اعملها فى حياتى
رامى / مش يمكن عشان ما جربتيش تعملى حاجه تانيه
مهره / لا اكيد جربت حاجات كتير بس الخيل دايما مختلف
رامى يقفل الملف و يبصلها
رامى / واحد صاحبى بيفتتح مطعم جديد عباره عن مركب كبير عايم فى النيل يعني مش بس هتاكلى فى فيو على النيل لااااا دا انتى هتاكلى و انتى عايمه وسط النيل حرفيا و فيو السما بيتحرك فوقك مع حفلات يوميا لمطربين و باندز من كل انحاء العالم يعني تجربه لازم تتعاش
مهره تبتسم
رامى / معايا دعوتين و مفيش حد يجي معايا ايه رايك
مهره / ما اعتقدش ان مروان وراه حاجه النهرده و اكيد هتستمتعوا سوا اكتر على كلامه انتوا صحاب انتيم من زمان
رامى / طبعا مروان ده مش مجرد صاحب و بس دا شريكي كمان
مهره / كويس ... كلمه ... هستاذن حضرتك
رامى / اتفضلى
مهره تطلع و رامى متابعها
....................
فى اوضه نجاه 
نجاه قاعده على الشباك و ماسكه تابلت و بتكتب عليه بالقلم تسمع صفاره تبص تلاقى جوزيف بيشاورلها تنزل تهز راسها لا يحط ايده فى وسطه و يعوج راسه و يطلع الموبايل و يتصل موبايل نجاه يرن تدخل تشوف اسم يونس تكنسل يتصل تانى تكنسل و تقفل الموبايل و تروح تحطه فى الدرج بعنف و عصبيه
نجاه / مش بمزاجك هو انا مش ..
نجاه تلف تلاقيه بيدخل الاوضه من الشباك
نجاه / انت اتجننت انا رايح فين انت عاوز تموت صح
جوزيف / فى بينا كلام ما خلصش
نجاه / اطلع بره بدل ما احدفك من الشباك ده انا روحى فى مناخيرى 
جوزيف / امبارح ما عرفناش نتكلم بسبب شاهين من فضلك اسمعيني
نجاه / مش فى مود انى اسمع منك اى حاجه انا بجد
جوزيف / خليني اساعدك
نجاه / انت حتى مش قادر تساعد نفسك
جوزيف / بس اقدر اساعدك زى ما انتى تقدرى تساعديني خلينا نساعد بعض
نجاه / انت مش زيي
جوزيف / يااااه انتى فاجئتيني بالموضوع تصدقى ما كنتش واخد بالى
الباب يتفتح و جابر يدخل يبص لنجاه ترتبك
نجاه /  الموضوع مش زى ما يبان على فكره
جابر / بمنتهى الهدوء هتطلع بره قبل ما حد يشوفك ... و انتى لمى حاجتك هترجعى مع الجماعه البلد و مش عاوز كلام كتير
جوزيف /  و انت مين بقي ان شاء الله
جابر / انت ايه حكايتك جاى تفضحها و تسوء سمعتها صح هى دى خطتك مش كدا دور المسكنه و الملعنه بتاعك ده فاض بيا منه و اقسم بالله لولا انى مش عاوز اكبر الموضوع عن كدا ما كنت خرجتك من هنا على رجلك ... افرضي كان حد غيرى عدى و سمع افرضي حد كان شافه و هو داخل اوضتك و لا خارج منها و الباب مقفول عليكوا
جوزيف / انا دخلت من الشباك
جابر / كمان !! طب يا ترى فى حد من الغفر شافك بقي و لا ... انت اصلا يهمك فى ايه ... انت فاكرها واحده من الكلاب بتوعك اللى مدورينهالك دى اشرف من اللى جابتك
جوزيف / انا هستناكى تحت
جابر / مهياش جايه ... اسمع ... اللى حصل النهرده هو القشه اللى قسمت ضهر البعير خلصت على كدا لا ليك دخل بينا و لا لينا دخل بيك ارجع من مكان ما جيت و ما ترجعش تانى
جوزيف / مش بمزاجك ... ما تاخدش قرار تندم عليه انت و كل اهلك
جابر / انت مش جاى فى خير و مش هيجي من وراك خير و اللى شوفته منك لحد دلوقت يخليني اتأكد
نجاه / جابر
جابر / كلامنا بعدين دلوقت اطلع بره و يا ريت بره السرايا خالص
جوزيف يقرب من جابر و الاتنين مش طايقين بعض
جوزيف / انا لو عاوز اعمل حاجه هعملها
جابر / اطلع بره يا جوزيف
جوزيف يبتسم و يطلع بره
نجاه / جابر
جابر / لو ليا ذره غلاوه عندك ما تكلمينيش دلوقت... ما عنديش استعداد انى اخسرك
جابر يطلع و يرزع الباب وراه نجاه تروح تحاول تفتح الباب تلاقى جابر ماسك الاوكره من بره و مانعها تخرج تسيب الباب و تروح تتكلم فى التليفون
...........................
فى الشركه عند رامى
رامى بيتكلم فى التليفون
رامى / بقولك قفلتنى و لمحتلى عليك
مروان / و المطلوب
رامى / زقه هتها و تعال و بعدين استاذن لاى سبب ترقص مع واحده تتكلم فى التليفون كدا يعني
مروان/ انت عبيط ما هى معاك فى الشركه طول اليوم ما تفتح معاها المواضيع اللى انت عاوزها
رامى / هنا مش نافع هنا فى شغل و ناس داخله و ناس خارجه و هى كمان جد اوى اكيد بره الشركه
مروان / جد برضه ... بس مش عليك ... كلو بالحنيه بيفك ... الله يحرقك محسسني انى بقرون و انا بتكلم عن اختى كدا
رامى / طب بص خليها تجيلك الكافيه و انا هاجى و انت اعمل بروفتك و نمرتك و انا و هى هنقعد نتكلم على ما تخلص تمام
مروان / ماشي هكلمها بس ما اوعدكش هى تقريبا متفقه مع جماعه صحابها يروحوا يركبوا خيل فى الجيزه و يجروا فى الصحرا و كدا يعني باين هى متحمسه اوى للخروجه دى فانا هشوف الدنيا و ارتب و ابلغك
رامى / اى وقت
مروان / ما تتعلم خيل يا رامى الموضوع ده هياكل معاها اوى
رامى / يا عم ارحم امى بقي خيل ايه و زفت ايه انا ناقص هبل يلا اقفل اقفل و كلمها يلا
مروان / سلام
..........................