الكبيره ٢ بقلم / لولو_محمد

الحلقه ٣٩

((((((( الكبيره ٢ ))))))))
#لولو_محمد
الحلقه ٣٩
ام نسمه / قومى يا نسمه اعملى الشاى انا هستناكى فى اوضتك عوزاكى فى كلمتين
ام عبده / انتى بتكسرى كلامى
ام نسمه / اهدى يا ام عبده انتى لسه يا اختى دافنه اتنين اهدى لتحصليهم ... انا جوه فى اوضتك بلعب مع العيال هاتى الشاى و حصلينى
ام نسمه تدخل الاوضه و نسمه واقفه ساكته ام عبده تروح لها
ام عبده / و ربى اللى عمرى ما بحلف بيه كدب ابدا ان ما مشيتى امك من هنا
نسمه / ما اقدرش ... دى امى ... زى حضرتك بالظبط تاكلوا بعض لكن ما اقدرش اجى على حد على حساب التانى
ام عبده / مشيها بدل ما انادى النسوان يجيبوها من شعرها و يرموها بره بيتي
نسمه / ما حدش هيقدر يقرب من امى ... الميت له حرمه الناس تقول علينا ايه ما صبرناش جتته تبرد و كلنا فى بعض هى كدا كدا ما بتطولش هتاخد واجبها و تمشي بس بالادب عشان دى امى و مش هقبل ان حد يقل منها زى ما انا ما بقبلش ان حد يقل منك
ام عبده / و انتوا تقدروا تقلوا منى و لا تدوسولى على طرف و لا تكونى يا بت فاكره انك ورثتى بجد و حسك هيعلا عليا فى البيت ده
نسمه / اعملك معانا شاى ياما
ام عبده / تطفحوه بالسم الهارى
ام عبده تدخل اوضتها و ترزع الباب نسمه تبص لصوره عبد الهادى
نسمه / انا صابره لجل خاطرك انما كدا كتير
............................
فى شقه ناصر
ناصر يفتح الباب يلاقي مختار
مختار / السلام عليكم عامل ايه
ناصر يهز راسه من غير كلام مختار يدخل و ناصر يقفل الباب و يروحوا يقعدوا
مختار/ حقك على راسي اتاخرت عليك بس الدنيا مش ساهله خالص لا فى البلد و لا فى مصر
ناصر / لسه قافل مع شاكر و حكالى كل حاجه ... هو ليه بقي عايش فى الجبل حتى بعد ما صابر رجع
مختار / هو مرتاح هناك
ناصر / و امى بقي مرتاحه و كل واحد من عيالها فى بلد
مختار/ ما انتوش متغربين فى اخر بلاد المسلمين يعني دا فرده كعب و امكوا مش بعيد اللى عاوزها هيقدر يوصلها خلينا فيك انت
ناصر / انا !! انا مش عارفه اقول لحضرتك ايه
مختار / حسيت بايه لما سمعت صوتها
ناصر ساكت
مختار / انا اتوجعت اوى ... البت دى كانت بالنسبالى بنتى زيها زى ياسمينا بالظبط
ناصر / ما تقارنش خالتى بالجزمه دى
مختار / لسه جزء منى بيتعاطف معاها بقول صغيره و ما تفهمش حاجه و اتلعب بيها و اللى خلانا نسامح يونس
ناصر / احنا ما سامحناش جوزيف يابا احنا بس مدينه فرصه و هى خدت الفرصه دى و رمتها فى الزباله اللى هى جايه منها
مختار / و نور ؟
ناصر / مالها نور بنت ناس و اخلاق و عارفه ربنا بنت تشيل اسمى و تبقي ام عيالى باذن الله
مختار / حركه حلوه منك انك قولتلها على كل حاجه
ناصر / انا حياتى كانت هتروح بسبب واحده كدابه و غشاشه و انا مش هبدء حياتى مع بنات الناس على كدب و غش لازم تبقي فاهمه هى داخله على ايه و لعلم حضرتك نور بنت جدعه جدا و هتقدر و انا متاكد من ده كويس ... بس فى حاجه كنت عاوز اقولها لحضرتك
مختار / قول
ناصر / التوقيت ان الكلبه دى تتصل دلوقت و بعد ما اقفل مع نور بالظبط
مختار / احنا زودنا الحراسه على نور و اهلها و دياب شغال على موبايلات عيلتها و باذن الله هيامنهم احسن تامين
ناصر يهز راسه
مختار/ انا اهم حاجه عندى انى اطمن انك مش هتظلم نور معاك و لا هتاخدها مرحله تعوض بيها اميره
ناصر / لا يابا انا نور بالنسبالى حاجه تانيه خالص انا ما حسيتش الاحساس ده مع حد تانى و مشاعرى القديمه ماتت و اتولد مكانها كره و حقد و غل تعرف يابا اقسم بالله انا لو شوفت البت دى و لا وقعت تحت ايدي ما هيفرق معايا حرمه من عيله من دا كله انا هوريها النجوم فى عز الضهر هندمها على اللحظه اللى هتخرج فيها راسها من جحر التعابين بتاعها هولع فيها و اقف اتفرج على النار و هى بتنهش فى لحمها النجس ده
مختار / تفتكر بعد كل ده هترتاح ؟
ناصر / حقى منها حرقه قلبي و بكايا عليها السنين دى كلها
مختار / ربنا يهديك و يصلح لك الحال ... انا هقوم اخش الحمام و اتشطف و اتوضي خلينا ننزل نلحق اول صف فى الجامع يمكن ربنا يهدى سرك و يريح بالك
ناصر / تمام اتفضل حضرتك انا متوضي
مختار يهز راسه و يقوم و ناصر متابعه يجيب موبايله و يقلب فيه
........................
فى اوضه نجاه
كارم قاعد على طرف السرير و الكل ملموم حواليه ما عدا جوزيف
كارم / مش قادر اصدق اللى حصل
فارس / امال احنا نقول ايه دا انت كنت فى البلالا خالص
عمران / يعني انت مش فاكر اى حاجه خالص كدا
كارم / اخر حاجه فاكرها اننا لما نزلنا من فوق فرشت فى الارض عشان انام فجاه صحيت لقيت نفسي مربوط فى السرير
نجاه / عدت على خير الحمد لله دلوقت كل واحد فيكوا ياكل لقمه بسرعه عشان يلحق الصلاه ... و معلش يا عمران خبط على يونس قال هيدخل ينام و فاتنا خالص نفكره بالفجر
فارس / مش صغير عشان نشيل همه
نجاه / و لا احنا كبار عن الثواب اللى بيعمل حاجه لله ما بيفكرش فيها مرتين يا فارس باشا
كارم / هو انا ضربتك بجد !!!
نجاه / دا انت اديتنى واحده نطرتنى لاخر الاوضه ايه يا وله بلابيع هلاوس دى و لا منشطتات يا وله
الكل يضحك
نجاه / صحيح كل واحد جواه قوه روحيه بتظهر لما بيخاف
كارم / و انا كنت خايف من ايه بقي ان شاء الله
نجاه / ما احنا لو نعرف نرتاح بس تقول ايه فوقت مش فاكر اى حاجه بس اللى اقدر اقوله انى قومت عليك جرى بسبب صريخك و زعيقك كان فى حاجه بتهاجمك
كارم / اقسم بالله ما فاكر حاجه
عمران/ مش فارقه مش فارقه قوموا يلا نلحق الفجر الاذان فاضله خمس دقايق و لسه هنزل اخبط على يونس
فارس / ما تلمسش الاوكره بيكهربها
نجاه / يلا يلا اتحركوا و تعملوا حسابكوا انى هقفل عليا الباب بالمفتاح و انام و هقفل موبايلي و اللى هيقرب من الباب هشقه انا بنام على روحى مفهوم
جابر /  مفهوم يا وحش خلاص بالراحه علينا
نجاه تبتسم الكل يتحرك و جابر اخر واحد
جابر / كان فى بينا كلام ما خلصش ... لما تصحى باذن الله نكمله
نجاه / كلام ايه ده ؟
جابر/ لما تصحى بقي
نجاه/ و انت بقي لما تخلى فضولى يشتغل يا ترى ايه يا ترى ايه هعرف انام كتر خيرك يا سيد الرجاله
جابر يبتسم و يمشي
نجاه / يا جابر جابر ... طب بخصوص ايه طيب ... جابر..  يا زفت ... طب لما ترجع ... ماشي
.........................
فى الجبل
شاكر قاعد فى نفس المكان بيرتل قران بصوت جميل
شاكر / ولو نشاء لأريناكهم فلعرفتهم بسيماهم ولتعرفنهم في لحن القول والله يعلم أعمالكم ولنبلونكم حتى نعلم المجاهدين منكم والصابرين ونبلو أخباركم
صابر يدخل يقعد شاكر يسكت صابر يشاورله يكمل
شاكر / صدق الله العظيم
صابر / ياله انت طالع بخيل لمين دا انا بسمع صوتك باجى استمتع بتسكت ليه
شاكر / هو انا صوتى عالى
صابر/ صوتك جميل بيدخل القلب كمل خلينى اسمع
شاكر / مش بعرف
صابر  / اروح ادارى يعني و بعدين لتكون بتتكسف و لا حاجه هو ايه اللى مش بتعرف اقرا زى ما كنت كانى ما جيتش هبقي ادارى هناك و اسمع من بعيد بعد كدا ما دام انت بخيل اوى كدا
شاكر / و الله مش بخل بس ... سميها يا عم بتكسف ... برتبك مش عارف لما بيبقي حد باصصلى بتوتر
صابر / قول و الله و دا بقي فى القرآن بس و لا فى حاجات تانيه كمان اصل دى حاجه سهل تتعالج على فكره
شاكر / مش عارف
صابر / طب حاول كمل اقولك بلاش سوره محمد انا بحب سوره الرحمن اقراها ... سمى الله و اقرا ... يا عم سمى الله و ابدا كانى مش موجود ... سمى يا عم هتحايل عليك
شاكر يسمع الآيات
شاكر / اعوذ بالله من الشيطان الرجيم بسم الله الرحمن االرحيم  الرحمن علم القرآن خلق الإنسان علمه البيان الشمس والقمر بحسبان والنجم والشجر يسجدان والسماء رفعها ووضع الميزان ألا تطغوا في الميزان وأقيموا الوزن بالقسط ولا تخسروا الميزن والأرض وضعها للأنام فيها فاكهة والنخل ذات الأكمام والحب ذو العصف والريحان فبأي آلاء ربكما تكذبان
صابر يشاورله يقف
شاكر / صدق الله العظيم ... صدقتنى انا مش بعرف بلاقى نفسي بسمع بس حاولت كتير انا مره جربت اسجل لنفسي عشان لما اقولهم يصدقونى طلعت تسميع برده
صابر / دى مشكله كبيره على فكره مش مشكله هو انا مش فاهم بس ليه يعني ايه السبب طب انت حد سمعك بترتل قبل كدا و اداك اى تعليق سلبى اللس عليك مثلا ضايقك
شاكر / لا خالص ما حدش يعرف اصلا
صابر / فأنت طول عمرك بتسمع القرآن زيك زى اى حد كدا بسم الله و تكر صدق الله العظيم و شكرا صح ؟
شاكر يهز راسه و يبتسم
صابر/ اه لو يعرفوا الكنز اللى عندهم من سنين ما كانوش سابوك ... هو انت مش واثق فى نفسك يا شاكر ؟ يعني بتخاف تغلط بتخاف تواجه كل واحد فينا جواه عيب عادى بس بنشتغل عليه بنواجهه و نقومه و نحاول ايوه الكمال لله وحده بس ادينا بنسعى
شاكر / و انت ايه عيبك
صابر / عيبى !! لا انا بعيد عنك مشخرم تعرف انت ياله انا لو صوتى زى صوتك كدا دا انا كنت عملت سيديهايه
شاكر يضحك بصوت عالى
صابر / انت اصلك مش فاهم انت مش بتقعد تسمع انت بتقول من قلبك انت لازم تشتغل على نفسك فى الحته دى سيبك انت من كل اللى اتعلمته و اللى هتتعلمه انت دى كنزك الحقيقي انت لازم تطورها و تشتغل عليها
شاكر / ما انا حافظ القران كله
صابر / ما انا متاكد بس انت بتقرا بصوت حلو جدا ... تعرف انت هتأم بينا الصلاه النهرده
شاكر / يا عم ما تضيقهاش عليا بقي انا ما مبأمش انا
صابر / ليه ياله ناقصك ايه
شاكر / انا كدا بحب ابقي فى حالى
صابر / و انت لما تأم تبقي فى حالنا ما انت هتبقي فى حالك برده ... انت ايه مشكلتك طيب ما بتحبش تقود و لا ما بتحبش تواجه و لا انت خايف الناس تنتقدك و لا خايف تغلط و لا ايه السر يعني ما انا لازم افهم انا هتجنن
شاكر / مفيش سر انا بحب كدا بحب ابقي فى حالى
صابر / خساره
شاكر / و لا خساره و لا حاجه كل واحد بيرتاح فى حاجه يعملها و بعدين انا من يومى كدا تعرف انت لو ناصر اه كنت اقولك يتخانق عليها و يحب يبقي الإمام اوى بس عمران لا و لا محمد الاتنين زيي ما بينافسوش على حاجه ... عاوزها خدها المهم راحه البال 
صابر / طب و لو الحاجه دى بتحبها و نفسك فيها مش هتنافس عليها برده هتسيب غيرك ياخدها و يتمتع بيها و انت واقف فى جنب تتفرج
شاكر يبتسم و يسكت ثوانى
شاكر / الدنيا كلها ما فيهاش حاجه نحارب و لا نوجع قلبنا عشانها اهو يومين و بنقضيهم و بعدين مش يمكن هو هيأم احسن منى و لا هتفرق معاه اكتر منى ما فيهاش حاجه لو وقفت وراه و سندته عادى ما هو اخويا برده
صابر / بس انت الكبير
شاكر / الكبير بيحتوى و يلم
صابر / الكبير بيضحى يعني ؟
شاكر / لا مش تضحيه عادى يعني
صابر / و دا فى الصلاه و لا فى حاجه تانيه يعني مثلا ما عمركش حلمت تبقي الكبير مثلا فى يوم من الايام
شاكر يبتسم و يهز راسه لا
صابر / نهائى دا انا اسمع ان ابوك كان قاتل نفسه عليها
شاكر / و رماها على اخر دراعه عادى برده ... و بعدين زى ما قولت انى اكون فى الصف الأول و أسند الكبير و ابقي فى ضهره و شورته و سنده مش وحش ما ابويا اهو و عمى مغاورى اهو تعرف حتى عمى عباده مش هو الكبير ما بياخدش قرار من غير ما يشور و ياخد راى الكل و يسمع و يفكر الدنيا دلوقت ما ينفعش تمشي بدماغ واحده
صابر / طب انت ايه شغفك يعني انت بتصحى كدا متحمس لايه او عموما ايه اللى انت بتحبه اوى يعني انا أعرف أن عمران بيعشق الخيل زى نجاه كدا
شاكر / اهى دى بقي مش صح عمران بيحب الخيل بس بيعشق القراءه زى ابويا بالظبط لو لقيته لوحده دايما فى ايده كتاب او تابلت مفتوح على كتاب برده المهم يكون بيقرا فى حاجه او بيتعلم حاجه نجاه اعتقد هى اللى حلمها تبقي الكبيره مع انها بنت بس مش عشان تبقي الكبيره على فكره لا
صابر / امال ليه
شاكر / عشان هى بتشوف ابوها ده حاجه ما حصلتش و بتشوف نفسها نسخه منه و ما عندهاش ثقه اعتقد ان اللى هيجي بعده هيمشي بفكره و سلوه و يحفظ اسمه و سيرته زيها اعتقد يعني نجاه حبها فى الكبيره فى حبها لابوها مش فى انها تكون الكبيره و خلاص
صابر / ممكن بس نجاه بتنافس و بشراسه
شاكر / عشان تشوف بس نظره الفخر فى عنيه لما بتنجح فى اى حاجه نجاه عايشه لابوها و بيه ابويا بيغير منه جدا بسبب الحكايه دى و بيقعد يقطمنا طول الوقت و يقعد يقول لامى كل شويه عاوز بت عاوز بت
الاتنين يضحكوا قوى
شاكر / هى خلفه تشرف الصراحه ... نجاه اقصد
صابر / عقبالك
شاكر يتكلم من غير شغف
شاكر / يارب
صابر / و مالك بتقولها كدا ليه
شاكر / عادى يعني مش لما اتجوز الاول ابقي ادور على الخلفه
صابر / طب خلينا نرجع للقرآن
شاكر / اقسم بالله حاولت كتير قبل كدا هى ما بتطلعش غير لما ببقي مع نفسي كدا بيني و بين ربنا غير كدا لا
صابر / انا جوعت تيجي تاكل معايا لقمه
شاكر / تمام يلا
صابر و شاكر يقوموا يتمشوا
صابر / تعرف انا ليه بحب الجبل ده يا شاكر و عايش هنا مرتاح عن البلد ... لانه على قد ما يبان ناشف و ميت من بره بس الحقيقه ان حضنه واسع و بيحتوى كل اللى ما عادلوش حضن يرمى روحه فيه
شاكر يبتسم و يهز راسه و يمشي مع صابر فى صمت
.........................
فى فيلا نجاه
ناصر و مختار قاعدين مع عمران و فارس و كارم و جابر
ناصر / يعني مش فاكر اى حاجه خالص ... نهائى
كارم / بص هو عشان ما اكونش كداب فى حاجات بتيجى و تروح بس زى الحلم كدا أو الكابوس بمجرد ما بتفوق منه القبضه بتفضل موجوده بس التفاصيل مش بتفتكرها ممكن مع الوقت تحس بيها او تيجي فى خيالك كدا بس انك تكون فاكرها و تقدر تحكيها لا مفيش الكلام ده معايا
مختار / انا مش فارق معايا اى حاجه من اللى قبل الكابوس انا فارق معايا كنت حاسس بايه من اول ما اتلدعت
كارم / هو الموضوع ما كانش سريع اوى بس ما كانش بطئ برده يعني المسأله كلها دقايق فى الاول عادى مش حاسس بحاجه شويه و زغلله اخر حاجه فاكرها كنت مخنوق و نفسي تقيل بعد كدا مش فاكر حاجه
مختار يهز راسه
عمران / اكيد فى حاجه نأمن بيها نفسنا من الحاجات دى اللى حصل ده لو كان حصل فى مكان عام
مختار / ما اعتقدش فى مخدر بيدخل الجسم و يخرج منه بسرعه شديده لدرجه انه ما يبانش فى تحاليل الدم يمكن احنا اتصرفنا غلط لما ما حللنالكش اول ما عرفنا اللى حصل و عرفنا نوع و تفاصيل المخدر ده ايه بس اللى يطمن ... او يطمن شويه انه لو لا قدر الله حصل هنبقي عارفين نتصرف ازاى
فارس / معلش يا عمى بس هو احنا المفروض نتصرف ازاى
مختار/ المفروض تاخد بالك من تفاصيل و تصرفات اللى حواليك يعني اخوك لما اتلدع اول حاجه كان المفروض تعملها
فارس / ما كان يمكن ناموسه عادى يعني
جوزيف يخرج من اوضته 
مختار / الناموسه لما هتقرصك مش هتقول تعبان و نازل انام و لا ايه
كارم/ ما انا كنت مرهق فعلا انا شخصيا ما اخدتش بالى بالاعراض خالص
جوزيف/ السلام عليكم
مختار / و عليكم السلام صح النوم عامل ايه
جوزيف / تمام كويس... امال نجاه فين
جابر / لسه نايمه
جوزيف يقعد و يبص لناصر
ناصر / اهلا
جوزيف / كلمتك صح ؟
مختار/ عرفت منين
جوزيف / منطقى ... شاهين و بعدين ناصر ترتيب منطقى جدا
فارس / انا بس نفسي افهم حاجه انت المفروض عايش وسطينا ليه اذا كنا ما بنطلعش منك باى حاجه
جوزيف / و انا بطلع منكوا بايه معلش
مختار/ هو يقصد
جوزيف / انا فاهم قصده هو اللى مش فاهم انى مش مجبر اسكتله طول الوقت و انى مش بتكلم بلساني
فارس / امال بتتكلم ب
جوزيف / تحب اقوم اوريك بس ما ترجعش تعيط
مختار / هو مفيش احترام لوجودى و لا ايه
جوزيف / انا هحترمك و اسكت المهم هم بقي
مختار يضحك
مختار / شاكر افضالك ... اتلم يا خويا منك له ... ما علينا انا عاوزك على انفراد
جوزيف / فينك من بدرى قوم نتهوى دا القاعده هنا خنيقه يا راجل قوم قوم
مختار يضحك و يطلع مع جوزيف الجنينه
ناصر/ مستحملينه ازاى ده
فارس / خلصنا محصول اللمون كله و مش جايب نتيجه
جابر / سيبك منه انت عملت ايه مع عروستك
ناصر / و الله ما عارف اقول ايه بس انا روحت لها و ....
......................
فى شقه محمود 
ام عبده قاعده بتعد فلوس
ابو محمود / ما هو لو صبر القاتل على المقتول كان مات لوحده
ام عبده/ بس المبلغ ده بيثبت ان اللى اتقال صحيح و انك بعت محصول سنتين بتمن سنه واحده و دى خساره كبيره اوى لينا
ابو محمود / مين اللى قال الكلام ده دا انا بايع محصولكوا اغلى ما ببيع محصولى ما تخليش ولاد الحرام يوقعوا بينا و يسخنوكى علينا و بين هو المحصول بتاع السنتين ده هيزرع نفسه مش هتحتاج عمال و تقاوى و سماد و بلا ازرق مين هيتحمل التكاليف دى كلها مش انا
ام عبده / لا فى دى معاك حق بس برده المبلغ قليل عبده كان بيحط الفلوس فى عبى كل سنه و عارفه و بعدين المفروض سعر المحصول بيزيد كل سنه
ابو محمود / ما المصاريف بتزيد برده يا ام عبده ... بقولك ايه استنى انا هقوم اجيبلك باقي الفلوس من جوه و انتى مشيها زى ما تمشيها انا مش طالعلى حاجه من الدوخه دى عشان اتسرق فى الاخر
ام عبده / ما عاش و لا كان اللى يسرقك بس انا بتكلم فى الصالح
ابو محمود/ انتى لازم تفهمى ان التجار عرفوا ان رعد و عبده راحوا للى خلقهم و بقيتي بالنسبالهم مطمع خلاص دا انا طلعت روحى عشان اوصل للسعر ده الناس طلعت روحى
الباب يتفتح و محمود يدخل
ابو محمود / الله ايه اللى رجعك بدرى كدا
محمود / مفيش ...خير ازيك يا عمتى منوره خير ... امال امى فين
ابو محمود / فى المطبخ بتجهز الغدى ... مالك شكلك مش مظبوط
محمود / بعدين بقي
ابو محمود / فى حاجه و لا ايه
محمود / انا كنت فى الارض بتاعه رعد الراجل عويس ده و ابن اخوه جم و اتخانقوا معايا و بهدلونى قدام الانفار
ام عبده / و انت سكت لهم
محمود/ هقول ايه بس دا الميت له حرمه يا ناس و دول ما صدقوا عمالين يتكلموا فى ورث و شرع انا مالى بالكلام ده اصلا هو انا كلت ورث ولاد ابن عمى دا انا بحافظ لهم عليه حسبي الله ونعم الوكيل اقسم بالله لولا حرمه الميت كنت خليت الانفار يعلموهم الادب
ام عبده / كنت خليتهم الله يرحمك يا عبده ما كانش كلب يستجرى يفتح بقه و انت عايش
ابو محمود / الموضوع ده مش باينله اخر الناس دى مش هتسكت و كل يوم بيعدي صوتهم بيعلا اكتر
ام عبده/ ليه ما لهمش كبير و لا ايه حالا هطلع على الكبير يخرسهم عنى و عن ارضي خالص
ابو محمود / و انتى تضمنى اللى عندك ... بدل ما تحرجك
ام عبده / مين !! ام بدر ؟؟ دا انا اولع فيها
محمود / ما تقوليش كدا تتأخد عليكي و يشبطوا فى الكلمه و يقولوا اننا مش امان عليها و تلاقيها لامه عيالها و دهبها
ام عبده / دهبها!! دا دهب ابنى و عز ابنى و فلوس ابنى هى نسيت كانت جيالنا ازاى دا انا الجلبيه اللى عليها انا اللى دافعه تمنها من خيرى و فلوسي انا و ابنى
محمود / يا عمتى بلاش الكلام ده يتقال عننا ايه ... و بعدين احنا بناكد عليكي تعامليها حلو الفتره دى
ابو محمود / بس هى فعلا لازم تروح للكبير
محمود / ازاى يعني ايه ولاد الجزار مش عارفين ياخدوا حقهم و لا ايه
ابو محمود / يا غشيم افهم الست ام عبده ليها برده دلالها عند الكبير تتصعبن عليهم و تقولهم هو عشان عيالي راحوا ما حدش هيقفلى هو انا مش من حقى أنقى اللى يدير مالى
محمود / المشكله هي هياها ينادوا ام بدر و تقول عاوزه ابويا يديرها كدا بحكم الكبير الارض تروح لعويس بالمستريح و داهيه بقي لما العده تخلص و يجوزوها حد من تبعهم
ابو محمود / ساعتها نطلب حضانه عيالنا فى حضننا
محمود / امها عايشه و القانون لسه فى صفها
ام عبده / تانى تانى بتفتحوا الموضوع ده تانى انا ما فيش حد هينام فى فرشه ابنى انا لولا عيالها تربيهم كنت دفنتها فى حضن جوزها بالحيا ما تنقطونيش
محمود / الكلام ده لولاد الاصول يا عمتى بس البت صغيره و أهلها ممكن يضغطوا عليها يجوزوها
ام عبده / مش هيحصل
محمود يبص لابوه
محمود / انا هقوم اشوف امى مالها سيبانا كل ده و بتعمل ايه
محمود يقوم
ابو محمود/ منوره يا ام عبده
ام عبده تبصله و تهز راسها و الغضب عاميها
.......................
فى جنينه نجاه
مختار / ما قولتلوش حاجه تانى يعني ؟
جوزيف / لو قولت هكدب ليه انا قولتله يجي يعترف على نفسه بس اللى اعرفه ان الفيديو اللى اتسرب مش الفيديو بتاعى و بحسبه بسيطه اقولك ان امممم باشمهندس فتوح لعب فيه بسرعه و هو اللى سربه عشان تضحكوا على منصور و دياب ان الفيديو متفبرك و انا احنا اللى مفبركينه بس يا ترى عملتوا حسابكوا على رد فعلهم لما يعرفوا انكوا اتامرتوا عليهم عشان تنجوا شاهين
مختار يبتسم و يبص فى الارض
جوزيف / طبعا انتوا عملتوا كدا عشان تنقذوا منصور مش شاهين لان اكيد كان هيتهور و يقتل شاهين و يضيع مستقبله و مستقبل عياله و الكلام ده صح ؟
مختار / ما اعرفش
جوزيف يبتسم
جوزيف / على كل ما تقلقش سرك فى بير معايا
جوزيف يغمزله
مختار / انا عاوز أعرف حاجه انت كنت عارف ان شاهين
جوزيف / لا ما كنتش اعرف انه هيفتح اللينك و لا انه وسخ كدا بس كنت عارف انه خايب و ممكن ازغلل عينه بس بايه ما كنتش اعرف ما افتكرش انه محتاج فلوس كنت معتمد انه نفسي يبقي الكبير و الطريق مسدود قدامه بس طلع له دخله تانيه
مختار / ما حدش كبير على الغلط ابنى نفسه وقع فيه ما قتلتوش خد عقابه و كمل حياته عادى
جوزيف / متاكد؟
مختار / قصدك ايه ؟
جوزيف / ما فيش حاجه بتعدى عادى مفيش الكلام ده
مختار / قصدك اميره ؟
جوزيف / ابنك بيحبها بدليل انه بيحاول يملا فراغها بنور البنت الوحيده اللى ادته ريق حلو فى الكليه
مختار / كان فى بينهم كميا و كنت عارف بس ضميره كان مانعه
جوزيف / ماشي
مختار / انت عاوز تقول ايه
جوزيف / عاوز اقول ان الحرب الجايه تقيله عليك و على عيالك و انا يمكن على كلامهم مش قادر افيدكوا لان لازم تقعوا فى فخاخ كتير انا اللى ناصبها بنفسي بس اللى اقدر اطمنك بيه ان ما فيش حاجه هتحصل لنجاه انا كفيل بيها اتكفلوا انتوا بس بالباقي
مختار يضحك و يبص الناحيه التانيه و يرجع يبصله
مختار / اشمعن نجاه و ما تقولش الخطه انها تتجند لأنك متاكد و هم اكيد اتاكدوا انها مش هتتجند
جوزيف / يبقي انت مش فاهم الخطه لحد دلوقت ... انا شوفت الخطه بتنجح على ناس اخطر من نجاه ...الام بتعمل معجزات عشان خاطر عيالها
مختار/ مش هيبقي منك
جوزيف / خليني ابقي بجح معاك شويه ... نجاه كانت قدامى ... و انا اللى رجعتها ... رجعتها من غير ما يتلمس منها شعره مع العلم انى كنت اقدر اخد منها اكتر من اللى انا عاوزه و بكيفها
مختار / مستحيل
جوزيف / الكيميا ما لهاش كبير يا هندسه المهم تعرف تستخدمها
مختار / برده مش فى وعيها
جوزيف يبتسم
مختار / تمام تمام ماشي فاهمك بس انت فكرت ثانيه انت ما عملتش كدا ليه
جوزيف / امايا منعتني
مختار يتفاجئ من الرد
جوزيف / هو ده اللى حصل الخطه اترسمت فى الاول ان نجاه مش هترجع غير و هى مسلمانى طفل بس امايا حبت نجاه و للاسف وعدتها انها تحميها و تحمى شرفها و دا شئ انا ما قدرتش اغيره فيها مش هتتنازل و لا حتى عشان خاطرى حتى هى اللى غيرت لها هدومها ما سمحتش لاى حد يحط ايده عليها
مختار / خساره ... كنت متاكد ان فيها حاجه حلوه ... خساره انها اختارت السكه دى
جوزيف / ما حدش بيختار حاجه انا ما اخترتش و لا انت اخترت و لا اى حد فينا اختار يكون كدا ما حدش فينا عنده رفاهية الاختيار
مختار / انت اخترت تكون يونس مع ان فرصك كانت احسن و انت جو
جوزيف يبتسم و يهز راسه
مختار / مش عارف هتصدقنى و لا لا بس بالرغم انك عمرك ما شوفته و لا اتعامل معاه بس نفس البدى لانجويتش بتاعته كانه واقف قدامى بيتحرك و يتكلم و يضحك و يتلامض ... نفس الذكاء ... سبحان الله ... حقيقي سبحان الله
جوزيف / و كان عامل ايه مع البنات
مختار يضحك بصوت
مختار / كان خاربها
جوزيف/ طب تمام كدا اتاكدت انه ابويا فعلا
مختار يضحك اكتر جابر يطلع من الفيلا يشوفهم بيضحكوا يبان عليه الضيق و يدخل تانى
..........................
فى سرايا الجوارحه
الرجاله واقفين فى الجنينه منهم منصور و عباده و دياب عربيه تدخل و ينزل منها مغاورى و شاهين الكل ينتبه
مغاورى/ اخوك قصادك يا منصور و اللى ترضاهوله ما حدش هيراجعك فيه
منصور يبص لدياب و يرجع يبص لشاهين
منصور / حقك عليا يا ابن عمى ظلمتك
شاهين / حقك انت عليا انا اللى حطيت نفسي فى موضع شبهه بالحوارات الكتير اللى مرينا بيها و خليتهم يطمعوا فيا
عباده / حصل خير يا رجاله احنا برده اهل و اكيد مش هنشمت الاعادى فينا و نخليهم يقفوا يتفرجوا علينا و احنا بناكل فى بعض
سماح تطلع تجرى من السرايا مغاورى يشاورلها تقف تبلع ريقها و تتابع
عباده / حب على رأس اخوك الكبير و راضيه
شاهين يبوس راس منصور منصور يطبطب على ضهره و واضح على منصور انه مش مبسوط دياب يطبطب على ضهر منصور
مغاورى / اطلع اوضتك اتشطف و كلك لقمه نضيفه و ارتاح و خد بالك من مراتك ربنا يصبرها هى كمان عدت بيومين صعبين
شاهين يهز راسه و يجرى على جوه سماح تاخده بالحضن و تزغرط و يدخلوا جوه
عباده / تمام يا رجاله فضينا المولد و اللى وراه حاجه يتوكل على الله يعملها اتفضلوا ... عاوزكوا يا رجاله
عباده يبص لمنصور و دياب و مغاورى
مغاورى / اتفضلوا جوه فى المكتب نشرب حاجه
عباده يهز راسه و يتحرك جنب مغاورى و منصور و دياب وراهم منصور يوطى على ودن دياب
منصور / خليك فاكر كلامى انا مش بالع ذره من اللى بيحصل
دياب يهز راسه و يمشي فى صمت
.......................
قدام شركه رامى
مهره خارجه عربيه تركن و تزمر و ينزل منها اخوات مهره بياتريس و صوفيا مهره تشوفهم تتفاجئ و تفرح و تروح تاخدهم بالحضن
مهره / وحشتونى اوى ايه المفاجاه الحلوه دى
صوفيا / انتى نادله جدا و لولا المفاجاه اللى بنحضرها ما كناش عبرناكى بس يلا خلينا احسن منك
مهره / ما انتوا فعلا احسن منى ها قولولى مفاجاه ايه بقي اللى بتحضرولها
بياتريس / هنتكلم هنا فى الشارع ايه يا بنتى مالك و بعدين انتى ايه حكايه سكرتيره و لا كمان مساعده سكرتيره اللى انتى اشتغلتيها دى على فكره انا مش طيقاكى بجد
صوفيا / طب بصوا خلونا نشوف مكان نقعد فيه نشرب حاجه و نتكلم تمام
بياتريس / فى كافيه هناك اهو مش عارفه خلونى اشوف الرايت بتاعه على الابليكايشن
صوفيا / احنا هنقى خلصونا بقي ورانا مليون حاجه نعملها اتحركوا
مهره تروح مع اخواتها يقعدوا فى الكافيه وايتر يدخل يحط تلت منيوهات
صوفيا / اسبريسو دبل شوت ويز الموند ميلك بليز
مهره / ثوانى هنبص على المنيو و ناديك
صوفيا / كافيه ربع نجمه
بياتريس/ ندخل فى الموضوع دلوقت انتى عارفه ان عيد ميلاد مامى الاسبوع الجاى
مهره / ايوه فاكره و فعلا مرتبه هديه حلوه اوى
صوفيا / مفيش هديه احسن من اننا نصالحها على دادى و انتى هتساعدينا
مهره / انا ما اعتقدش اقدر اعمل حاجه فى الموضوع ده
بياتريس / ازاى يا بنتى دادى بيحبك جدا و بيعملك خاطر كبير اوى
مهره / اكيد مش اكتر منكوا انتوا بناته و لا ايه
صوفيا / و انتى ايه ؟؟
مهره / انا بنت مراته و حاليا بنت طليقته
صوفيا / بعد كل اللى عمله معاكى
بياتريس / اوك انتى زعلانه منه عشان طلق مامى اوك احنا كمان زعلانين بس فى ايدنا نصلح الموضوع انتى عاجبك اللى بيحصل ده يعني
مهره / صدقيني حاولت امنعه اتحايلت عليه كتير جدا ما سمعليش
بياتريس / خلينا نجرب مره تانيه ... اخر مره يا ستى
الوايتر يدخل تانى
الوايتر / اخترتوا حاجه
مهره / تلاته قهوه فرنساوي من غير سكر من فضلك
الوايتر يهز راسه و يمشي
بياتريس / انا مش هشرب حاجه فى البتاع ده
مهره / هنكبهم التلاته بس كان لازم نطلب خلونا فى موضوعنا ... انتوا متاكدين ان باباكوا هو احسن هديه لماما
بياتريس / داااااه يا بنتى دول كانوا اسعد زوجين فى الدنيا
مهره / مش على كلام باباكى دول انفصلوا فى ثانيه ما حدش فيهم بكى على التانى لحظه
بياتريس / ايجو مش اكتر اسالينى انا مامى منهاره من غيره و هو مستحيل يكون قادر يعيش حياته طبيعي
مهره تبص لصوفيا
صوفيا / ما تبصليش اى كان الوضع قبل كدا اكيد احسن من دلوقت تمام ؟
مهره / ليه احسن ؟ لو الاتنين مش مبسوطين مع بعض و أسعد و هم منفصلين خلاص
بياتريس/ انتى اللى  بتقولى كدا انتى عوزانا نبقي فى اسره مفككه
مهره / اكيد لا و اقسم بالله كلمته كتير جدا انا عيطت جدا لما قالى انه ناوى على الطلاق عيطت و انهرت و اترجيته قالى انى انانيه و ما تهمنيش سعادته
صوفيا / امتى الكلام ده
مهره/ فى تركيا
صوفيا / و سكتى ؟
مهره/ هقول ايه بس ..  كان عندى امل بس ما فيش فايده نفذ اللى فى دماغه
بياتريس / اخر كلام انتى مش معانا يعني
.........................