الكبيره ٢ بقلم / لولو_محمد

الحلقه ٥٧

((((((( الكبيره ٢ )))))))
#لولو_محمد
الحلقه ٥٧
جوزيف / اهلا !! ايه العربيات الحلوه دى ايه الفرسه بتاعتك تعبانه و لا ايه
صابر / اركب عاوزك
جوزيف / عيونى
جوزيف يلف و يركب
صابر / خير كنت بتعمل ايه كدا لوحدك فى البلد
جوزيف / بشوف الجديد بصراحه الرجاله عاملين شغل جامد بس للاسف برده مش كفايا
صابر / افتح التابلوه هتلاقي فلاشتين
جوزيف يفتح التابلوه و يطلع الفلاشتين
صابر / انا محتاج منك جميل و هديك اللى انت عاوزه
جوزيف/ لو قبضت التمن مش هيبقي جميل بلس انك ما تقدرش على تمنى
صابر / و انت ما تعرفنيش
جوزيف / لا عارف كويس و عارف ايه اللى فى الفلاشتين و عارف هتطلب ايه و اقدر اريحك دلوقت لو تحب
صابر يفرمل و يبص له
جوزيف / حوار عيله الجزار اللى انت ادبست فيه ... الا قولى صحيح انت بجد بتحبها ؟؟
صابر / خرجها من الموضوع
جوزيف/ انا ما دخلتهاش اصلا انا بتكلم معاك عادى
صابر / مين اللى خطف الواد
...........................
جوزيف/ العيال اللى ماتوا
صابر / مين وراهم مين ساعدهم ازاى الواد دخل مخزنى
جوزيف / ما تسأل اللى لقاهم فيه
صابر / ما تصعش انت عارف انت بتقول ايه دى تطير فيها رقاب دى حرب ما لهاش اول من اخر
جوزيف / هى حرب فعلا بس المهم انك تكون عارف مين فيها حبيبك من عدوك ... السؤال بقي يا ملك الجبل... هو انت فعلا عارف مين حبيبك من عدوك؟؟
صابر يبص قدامه
جوزيف / سؤال صعب جدا ... انا شخصيا ما اعرفش اجابته
صابر يبص لجوزيف
صابر  / ليكوا دخل باللى حصل
جوزيف / انا شخصيا ما ليش ... بس لو تقصد بليكوا دى المجلس ... فحتى لو ما لهمش دخل هيلاقوا ثغره يدخلوا منها و يخلوه لصالحهم ... ما جاوبتنيش ... البنت دى مهمه بالنسبالك قد ايه
صابر / قولتلك خرجها من الموضوع انت ما بتفهمش
جوزيف / انت اللى ما بتفهمش ... صابر ابن الجبل ما كانلوش مدخل و لا ايد توجعه طلع فى و ايد طريه كمان
صابر يمسك جوزيف من رقبته جوزيف يبتسم صابر يسيب و يبص قدامه
جوزيف / لو اتخطفت و اتقالك اقتل نفسك أو خون عشان خاطرها هتعمل ايه
صابر ساكت و مش بيبص لجوزيف
جوزيف / هيجولك و انت عارف مساله وقت مش اكتر
صابر يبصله و يبتسم
صابر / يانسوا و ينوروا و انا مش هرجعهم من غير احلى واجب ضيافه و اسأل بس عن ضيافه صابر القط
جوزيف / انزل ؟ و لا عاوز منى حاجه تاني ؟
صابر/ تحب اوصلك فى حته معينه او ارجعك شقتك ؟
جوزيف / تسلم ... فتح عنيك بس
صابر يهز راسه جوزيف يهز راسه و ينزل صابر يمشي رساله توصل موبايل جوزيف يتصل بحد
جوزيف / ايه الدنيا ... حلو اوى ... عاوزه عايش ما تتغاباش ... تمام مستني التقرير ... سلام
جوزيف يقفل و يحط الموبايل فى جيبه و يتمشي
.......................
فى اوضه عباده 
نجاه / ازاى يعني ما تعرفش عمران فين ؟! من امتى الكلام ده
عباده/ منصور عارف لما أعوذ اعرف هساله
نجاه / طب و ما بتسألوش ليه
عباده / عشان لما احلف انى ما اعرفش مكانه ما ابقاش بكدب يا نجاه فى ايه عوزاه فى ايه عمران اصلا
نجاه / انا متاكده ان مروان و رامى هم اللى ورا اللى مهره فيه يونس اكدلى انهم وحشين و قال لجابر لو البنت تهمكوا ابعدوها عنهم و جاب تاريخهم الوسخ كله و ما حدش اهتم انا متاكده ان
عباده / انا مش دورى انصب المحاكم للناس لما مهره باذن الله تقوم بالسلامه تقرر بنفسها هى عاوزه تعمل ايه و تعمله ازاى
نجاه/ حضرتك كمان هتديها ضهرك
عباده / ما حصلش بدليل انى سبتك تروحيلها من الاول ... نجاه انتى لازم تهدى شويه احنا مستهدفين و سفرنا رايح جاى على الطريق بيعرضك للخطر و بيعرض الرجاله للتعب و الارهاق
نجاه / انا مش عاوزه اسافر انا بس عوزانا نهتم و نسأل و نحقق
عباده/ لما تقوم بالسلامه نشوف هى عاوزه ايه و نعمله
نجاه / انا زعلانه منك
عباده يبص لنجاه
نجاه/ منكوا كلكوا ... انتوا ما كنتوش كدا ... كنتوا بتدوروا على الحقيقه
عباده / الحقيقه ما تخصناش ما يمكن و احنا بندور نلاقى حاجات هى مش عوزانا نعرفها هى اللى لازم تدور احنا اخرنا نساعدها و نحميها انما نفكر و نقرر بدالها
نجاه / و عمى مختار لما جوزها لعمران و بتاريخ قديم
عباده / ما كانش فى حل تانى عشان نخرجها من هناك
نجاه / نفس المبرر يخلينا
عباده / فى فرق كبير بين الاتنين هنك كل ثانيه بنتاخرها كانت بتعرض حياتها للخطر
نجاه / و كل ثانيه بنتاخرها دلوقت بتعرض الحقيقه للخطر و بتسمح للمجرم الحقيقي انه يفلت بعملته
عباده / انتى وصيه على العالم يعني
نجاه / لو اللى تحت دى بنتك
عباده / ما هياش بنتى
عباده ياخد نفس و يهدى نفسه و يبص لنجاه مصدومه
عباده / لا عمرى هرميكي زى ما ابوها عمل و لا عمر امك ما هترميكي كدا دا اولا ثانيا انتى منين واثقه اوى كدا انها فعلا ما اخدتش السم ده بمزاجها
نجاه / قلبي مصدقها
عباده / تمام يبقي نستنى اما تخف و تدينا الاذن ندور على اللى عمل فيها كدا عشان ما نحرجهاش لو لا قدر الله كان فى احتمال واحد فى المليون ان قلبي غلطان
نجاه / مفيش الاحتمال ده
عباده / على ايامى ما كانش فى دكر يجروء يقف قدام ابوه كدا ما بالك بحرمه بقي و ترجعى تقولى اننا بنفضل الرجاله عليكي عشان انتى بنت
نجاه / دى غير دى و بعدين انا لما بتكلم و اناقش فدا عشان الحق مش عشان اى حاجه تانيه
عباده / استهدى بالله يا نجاه و روحى ارتاحى و لا شوفيلك حاجه اعمليها... اقولك حاجه ... انزلى الجيم
نجاه / هطلع بملك الجبل
عباده/ رتبى مع حد من الرجاله و خديه معاكى
نجاه تهز راسها و تروح ناحيه الباب و تقف و تبص لابوها
نجاه / انا عمرى ما اقدر ازعلك ابدا
عباده يتنهد و يبتسم نجاه تمشي و تقفل الباب
عباده / ابو التربيه الايجابيه على ابو اللى اخترعها اللى قصفت نص عمرنا فى المناهده دى
………………………..
فى منطقه شعبيه فى البلد
جوزيف بيتمشي و يخرم من شارع لشارع يوصل لبيت يدخل و يطلع السلم لحد شقه و يضرب الجرس عمران يروح يفتح
عمران / يونس !!
جوزيف / هو انتوا بتعملوا كدا ليه بجد ... دخلنى ... بعتولك اكل و لا انت معتمد على الاكتفاء الذاتى ... فى راجل بيعمل طواجن على الناصيه ريحتها خطيره ايه رايك تاكل معايا
عمران / انت عرفت مكانى منين
جوزيف / هو انت كدا مستخبى اصلا ... لا بجد قولى الحقيقه عشان ما ازعلش انت كدا مستخبى
عمران / ماشي خلاص تمام دا المتاح بالنسبالى اهدى بقي
جوزيف / انا هادى ... و رجاله شحته سحبوا رامى فى حته تبعى و هيقرروه
عمران/ مين اللى قالك تعمل كدا
جوزيف / ما باخدش اوامرى من حد ... بس انا قولتلكوا رامى و مروان دول شمال انتوا اللى ما صدقتونيش او تجاهلتوا كلامى
عمران / طب و تفتكر هتطلع منه بحاجه
جوزيف يحط التليفون على الترابيزه
جوزيف / مساله وقت مش اكتر
عمران يهز راسه
جوزيف / معلش بس بجد انا فى حاجه مش فاهمها
عمران / اتفضل
جوزيف/ أنت ناوى على ايه
عمران / فى ايه؟
جوزيف يعوج راسه و يبتسم بسخريه
عمران / فى ايه ؟ مش فاهم
جوزيف يتنهد و يهز راسه موافق
جوزيف / اشمعن انت اللى ابوك دبسك فيها طيب ما انا كنت موجود هو موجود رجاله ما لهاش عدد لو طلب من اى حد بطاقته موجود و اهو كلو حبر على ورق ... اشمعن انت ... دا انا ما فكرتكش لما بس اتهجموا عليها و طرت عليا زى المجنون عشان خاطرها
عمران / انا بس مش عاوز يكون لى ذنب فى اذاها
جوزيف يضحك
جوزيف / مفيش فايده... يا خبر بفلوس بكره يبقي ببلاش
عمران / قصدك ايه
جوزيف / يعني هنعيش و نشوف هتطلقها و لا كيوبيد هيبقاله رأي تانى
عمران / احنا اصلا مش متجوزين عشان نطلق ... بالنسبه للورقه الهبله دى فهروح أطلقها رسمي انما شرعا احنا ما فيش حاجه تربطنا
جوزيف / و بعدين ؟
عمران / هى حره فى حياتها بقي
جوزيف / ما حدش فى الدنيا دى حر فى حياته يا عمران يا خويا و لا حتى انت
عمران / انت عاوز ايه بالظبط عشان انا خلقي بيضيق كل شويه
جوزيف / ادونى الاذن و انا اتعامل مع ابوها و اخلص لك الحوار كله
عمران / كنت فاكرك ما بتاخدش اوامرك من حد
جوزيف / انا قولت اذن ما قولتش امر ... يا عم انا بعرض عليك مساعدتى دا غيرك حالا كان لسه عارض عليا كنوز على بابا عشان اساعده و قولتله ما تقدرش على تمنى
عمران / مين ؟
جوزيف / خليك فى بلوتك دلوقت ... انت عاوز ايه
عمران / يا عم انت اللى جايلى انا مش عاوز حاجه
جوزيف / يعني مش عاوز البت دى ... مش فارقه معاك ... مش داخله دماغك
جرس الباب يضرب عمران يتنهد
عمران / ما تعزموا الحكومه بالمره ما هى زاطت
عمران يروح يفتح الباب يلاقي مختار مبتسم عمران يفتح الباب على آخره مختار يشوف جوزيف الاتنين يبتسموا اوى لما يشوفوا بعض
………………………
فى بيت جابر
نجاه تخبط على الباب و تقف بعيد جابر يفتح
نجاه / انا اسفه انى اتعصبت عليك
جابر يبتسم
جابر / انا مقدر مشاعرك انا كمان مضايق اوى عشانها على فكره
نجاه / بفكر اروح الجبل تيجي معايا
جابر يستغرب
نجاه/ فارس مش راضي و كارم مش هنا و بتصل بيه مش بيرد
جابر / بس انا ما انفعش ... احم ..  انا لسه مش محرم
نجاه / تمام شكرا
نجاه تمشي تروح المضيفه و جابر متابعها
جابر / و الله ما عارف انتى صح و لا انتى تاعبه نفسك على الفاضي و لا اخرتها ايه حكايتك دى
…………………….
فى شقه فى مصر
كاميره فيديو مفتوحه و رامى متعلق من رجليه
رامى / اقسم بالله قولتلك كل اللى اعرفه انما انا ما ليش دخل و لا طالعلى منه اى حاجه حتى اسالوها انا عمرى ما وجهت ليها كلمه حتى ابوس رجلك بقي نزلنى بقي ابوس رجلك
الراجل يقفل الكاميره و يطلع بره
رامى/ يا باشا انا يا باشا يا عم انت يا جدع انت نزلنى بقي
الراجل يقفل وراه الباب و يسلم الكاميره لواحد ياخد منها ميموري كارد يحطه فى ريدر متوصل بالموبايل و فى راجل تانى بيتكلم فى التليفون 
الراجل / ايوه يا باشا ... قال مروان و اكرم السبب فى كل ده بس هو ما يعرفش ازاى او تفاصيل بس هو متاكد ان مروان اللى كان بيحطلها المخدرات و ادانا اسم الديلر و كمان اسم المعمل اللى بيضرب له التحاليل انه مش مدمن و اسم الفنى اللى شغال فيه تحب نكمل لحد فين ... تمام يا باشا هنستني التعليمات ... كتر خيرك يا باشا خيرك سابق ... فى حفظ الله معاليك فى حفظ الله
الراجل يبص على الرجاله
الراجل / الفلوس وصلت الحساب يا رجاله ..  قولتلكوا الباشا ما بينساش حبايبه
…………………….
فى شقه عمران
مختار / انا كنت متاكد انك لا هترتاح و لا هتريح يا يونس
جوزيف / بص انا مش هنكر انى حبيتك و عشان كدا بقولك ان البلد عمرها ما كانت مفتوحه قد دلوقت
مختار / و انت فاكر اننا مش عارفين
جوزيف / لا ما انا كنت هكمل و اقولك انى اقدر اقفلهالك
عمران / و المقابل
جوزيف / عندك ايه انا محتاجه؟
عمران / ان شكلك يفضل كويس قدام المجلس
جوزيف / المجلس بعت فريق تانى لو حضرتك مش واخد بالك الفريق ده عنده تعليمات زى اللى عندى بالظبط لو حد فينا وقف فى طريق التانى اقتله
مختار / يعني انت محتاج رجاله يقفوا معاك قصادهم
جوزيف / للاسف الرجاله حاليا ما ينفعوش ... دى امايا و بما انى عارفها اكتر من نفسي فمش هتسمى على الرجاله ... بس هتخاف على الحريم
عمران / لحظه افهم انت بتحاول تقول لينا ايه
جوزيف / الفتره الجايه فتره الحريم مش الرجاله الحريم تقدر تفكك البلد دى و تقدر تجمعها يقدروا يقوموها او يوقعوها وقعه ما تقوموش منها ابدا
مختار / الحريم ما تقدرش على الرجاله لو حطينا حريمنا فى وش المدفع فى وش امايا دى هنبقي فتحنا جبهه تانيه قصاد رجاله تانين احنا مش هنبقي قدهم
جوزيف / يبقي تتعلموا تضربوا فى الحريم و يكون فى علمك كل الحريم انت حر فيهم الا امايا اللى هيمس منها شعره انا هقتله حتى لو ابنك
مختار / انا اصلا مش ناوى اقتلها انا كل اللى محتاجه اتكلم معاها بالعقل
جوزيف / يبقي تبعت نجاه تقول اللى انت عاوزه او طنط هند هتفى بالغرض بس نجاه ليها دلال اكتر لأنها بتحبها حقيقي بتحبها جدا انما انت ... ما تزعلش منى انت ممكن تموت قبل ما تقرب منها اصلا
عمران / معلش هى مش امايا دى هى اميره ... دى عيله يا جدعان ايه الرعب الاوفر ده
جوزيف يبتسم
مختار / انا لازم اتكلم معاها
جوزيف / مش هقدر افيدك ... لحظه ... الشيلتر ... الكلاب اللى فيه ... لازم تاخد بالك من الكلاب ... اهم سلاح عند امايا الكلاب
عمران / دا البلد مردومه كلاب بسبب الشيلتر ده دا احنا عندنا فى كل شارع مش اقل من كلبين تلاته
مختار يفكر و يبص لجوزيف
……………………..
فى الجيم
نجاه بتتمرن كيك بوكسينج على ساند باج بمنتهى العنف عباده يدخل تشوفه تروح تقلع الجلوفزلت و تشرب
عباده/ انتى زعلانه منى ؟
نجاه / مش زعلانه من حد ... معين
عباده/ طب اطلعى ارتاحى و بكره اخدك الجبل بنفسي
نجاه / تسلم بس للاسف بكره مش فاضيه
عباده يستغرب
عباده/ خير وراكى ايه
نجاه / تمرين
عباده/ حلو هتمرن معاكى
نجاه تهز راسها
عباده / اطلعى ارتاحى بقي دلوقت
نجاه / مش جايلى نوم
عباده/ ما قولتش نامى قولت ارتاحى فى فرق
نجاه / طب اعمل ايه طيب ما انا فى البيت اهو سيبوني اعمل اللى انا عاوزه اعمله ... انا مش عاوزه ارتاح ... و اه زعلانه من حضرتك ... و منكوا كلكوا ... بس كدا
عباده يضحك نجاه تبص بعيد
عباده / انا دلعتك و انتى صغيره ما عدتش قادر عليكي لما كبرتى
نجاه/ ايوه ليه بقي انا عملت ايه ... انا بتمرن لوحدى فى بيتي عملت ايه ... ليه ما عدتش بعجب اعمل ايه طيب او غلطت فى ايه
.. اقول لحضرتك حاجه ... حاضر ... كلمه حاضر بتريح ... بتريحكوا انتوا مش مهم راحتى انا
عباده / راحتك دى انا اللى جاى لحد عندك افكرك بيها انتى لما يجيلك اصابه فتيج هتفرحى نجاه انتى بقيتي صعبه جدا مش فاهم بقي دى هرمونات و لا حساسيه زياده و لا ضغوطات و تراكمات جواكى انا مش فاهمك ... انا و كل اللى هنا ما عندناش اى حاجه اهم منك ... احنا بقينا كلنا عايشين بس نلف حواليكي
نجاه / انا محبوسه فى بيتي
عباده / بقرارك مش مننا انتى اللى قررتى تطبقي موضوع المحرم
نجاه / مش ده الصح يابا
عباده / عشان كدا شجعناكى و عشان كدا نبهت على الكل و بما فيهم عمك مختار ان على قد ما تقدروا ما يحصلش خلوه ده الصح ده اللى المفروض كنا نعمله من زمان
نجاه / بس دا صعب
عباده / الا ان سلعه الله غاليه
نجاه تقعد فى الارض عباده يتنهد و يروح يقعد جنبها
نجاه / هو مش المفروض ان دينا ده دين يسر و التكليف فيه على قدر الاستطاعة ما احنا مش قادرين نتعامل اهو مش قادرين نتمرن و لا نتفسح و لا حتى نعمل اى حاجه اكيد ربنا مش عاوز كدا
عباده/ ربنا عاوزك منصانه
نجاه/ اكيد مش محبوسه يعني
عباده/ اخرجى وسط حريم و فى حراسه رجاله حواليكوا
نجاه / انا مش زى الحريم يابا انا مش لاقيه نفسي وسطهم حتى
عباده / دى غلطتى انا ... سامحيني عليها
نجاه/ غلطتك فى ايه بس انى طلعت قويه بعرف ادافع عن نفسي انى شاطره فى ركوب الخيل ... هو الست مكانها المطبخ بس
عباده / ما هو لازم حد يطبخ يا نجاه... و بعيدا عن الطبخ ... لازم حد يربى العيال و ياخد باله من البيت لحد ما الرجاله تعمل الحاجات الصعبه و ترجع
نجاه / انا بعرف اعمل كل الحاجات الصعبه بتاعتكوا
عباده / بس انا ما بعرفش احمل و اولد و ارضع
نجاه / انا بتكلم جد
عباده يضحك
عباده / طب ما انا بتكلم جد
نجاه / يعني هو ده دورى فى الحياه ارنبه!!
عباده/ اعمار الارض ... تكوين اسره ... انتوا المستقبل يا نجاه ... لو الستات كلها بتفكر زيك مين هيشيل الرايه من بعدك و بعد جيلك
نجاه / مش واقفه عليا يعني
عباده / كنت زمان بتقولى انا بنت عباده الزيني
نجاه / و ما زلت
عباده / ما نفسكيش تسمعى انا ابن نجاه الزيني
نجاه / حتى دى تبقي عيبه و شتيمه ... العيال بتتنادى بأسم الاب مش الام
عباده/ بس دا ما يلغيش دورك
نجاه/ و ليه ابقي جندى مجهول فى وقت انا اصلا فيه احسن من يقود الجيوش ... انا مش مسترجله انا بقتدى بالصحابيات الأوائل... نسيبه بنت كعب ، ام حكيم بنت الحارث بن هشام و خوله بنت الازور
عباده / و لا واحده منهم رفضت الجواز و اتفرغت للحرب دى كانت ظروف اتفرضت عليهم وقتها لكن الجيش ما كانش واقف عليهم أو كانوا بيقودوه يا نجاه
نجاه / بس انا
عباده / انا عمرى ما ضغطت عليكي فى حاجه و لا عمرى هضغط ... القرار دايما قرارك و احنا كلنا فى ضهرك حتى لو هتسحلينا و تطلعى عينا انا فى ضهرك
نجاه تبص فى الارض
عباده/ انا عاوزك مرتاحه مش اكتر عاوزك سعيده هعوز ايه اكتر من كدا ... يا بت دا انا الدنيا كلها فى كفه و انتى لوحدك كدا بطولك فى كفه ... هو انا حكيتلك عن أول مره حطوكى فيها فى حضنى يا نجاه
نجاه تبتسم و تهز راسها اه
نجاه/ بس احكيها تانى عاوزه اسمع
عباده / قبلها الدكتوره كانت قايله بنت و انا عادى بالنسبالى بنت واد مش فارقه كلو نعمه من ربنا بس احنا يعني مش هننكر ان فى حته كدا جوانا بتبقي عاوزه الواد عشان يشيل
نجاه الابتسامه تروح من وشها
عباده/ بس اول ما حطوكى بين ايديا و انتى حته لحمه حمره ملفوفه فى كوفرته بيضا كدا يااااااااه على دا احساس يا نجاه يااااااه ... مش عاوز حاجه تانيه من الدنيا... و لا ربع الاحساس ده حسيته لما شيلت اخواتك ... انتى كان قلبي خرج من بين ضلوعي و دخل فى جسمك ... طول ما بينبض جواكى انا عايش تحزني أحزن تفرحى افرح تقعى أقع
نجاه / ربنا ما يحرمنى منك ابدا
عباده/ و لا يحرمنى منك يا ست البنات ... قومى بقي اطلعى ارتاحى فى اوضتك شويه و لا اقولك انا عارف انتى مش هترتاحى طول ما مهره تعبانه ... ما انتى بنت أصول برده ... روحى نامى فى المضيفه معاها و خلى بالك منها
نجاه تهز راسها و تقوم تحضن ابوها يطبطب على ضهرها نجاه تقوم تطلع بره تلاقى جابر ساند على الحيطه قرب الباب بشويه يشوفها يتعدل تبصله و تبتسم يبتسم تطلع السلم و هو متابعها يتنهد عباده يطلع من الجيم
عباده/ اقسم بالله ما عارف اللى عملته دلوقت ده هيريحها و يريحنا و لا يرجع يفتح علينا الباب اللى كنا ما صدقنا انه اتقفل
جابر / اتقفل !! هو طول ما خالى ... انا رايح انام يا عمى عن اذنك
جابر يمشي
عباده / ربنا يهديك يا مختار انت كمان
.........................
فى اوضه هند
هند نايمه مختار يدخل يقفل الباب بالراحه و يروح يقعد على كرسي يقلع الجزمه هند تقوم تقعد
هند / تاعب نفسك اوى بصراحه !!
مختار / كنت عند عمران
هند / ما تاكلنيش يا مختار انا جايبه جاز
مختار يروح يمدد جنبها على السرير و ياخدها فى حضنه
هند / انا زعلانه بجد
مختار / ما انا بصالح اهو و لا انزل اجيب دبدوب احمر و علبه شيكولاته
هند تعوج راسها و تبص له بطرف عنيها
هند / ابنك فين
مختار / فى شقه متجهزه من مجاميعه
هند / دا انهى واحد فيهم اللى بسأل عليه ؟
مختار / عمران ... امال بتسالي عن مين
هند / ما دى المشكله انك ناسي ان ليك بدل الابن اربعه يا مختار واحد فى الجبل و واحد فى بنها و واحد فى شقه متجهزه من كله و الصغير اخر العنقود هو اللى يا كبدى متمرمط بين هنا و هناك
مختار / مين ده اللى صغير دا متجوز و مخلف راجل ملو هدومه
هند / و هم الكبار ايه ان شاء الله
مختار/ و الله فكرتيني عاوز الصبح اتصل بالواد ناصر اشوفه راح لحماه و لا اتفقوا على ايه ... زمانه نايم دلوقت
هند تنفخ
مختار / لا اله الا الله ليه كدا بس
هند/ دا هوا دا انا فاضلى تكه و اطلع بداله نار
مختار / انا فى ايدي ايه و ما عملتوش بس دا انا و انا صغير عن كدا كنت بقعد اكتر من دلوقت
هند / ما كان قصادك وقت ترتاح بس انت اللى جريت على ابن صاحبك
مختار / و الله الواد ده غلبان و كل ده حلاوه روح ... لا اب و لا ام و لا عيله و لا عمر حد طبطب عليه و لا احتواه ... بيصعب عليا اوى و حاسس ناحيته بالذنب
هند / ربنا يهديه لنفسه مش لحد
مختار / آمين
هند / بخصوص شاكر انا عاوزه اعرف الواد ده ايه حكايته و هيفضل كدا لامتى... ابنك مش قد صابر خصوصا دلوقت اديك شايف حواليه هم ما يتلم انت فين من كل ده
مختار / شاكر مش صغير
هند / و لا انا يا مختار على حرقه الأعصاب دى
مختار / هكلمه بكره الصبح
هند / تمام ... تصبح على خير
هند تدى لمختار ضهرها
مختار / ما قولت هكلمه بلاش رخامه بقي
هند تلف و تبص لمختار باستغراب
مختار / ما تحن يا جن
هند تضحك
هند / انت مش لسه كنت بتقول كبرنا
مختار ينام على ضهره و يحط رجل على رجل و يهز رجله بتناك
مختار / فشر يا بت دا الدهن فى العتاقى
هند تضحك مختار يقوم يرقص بأيديه و هو بيغنى بروقان
مختار / ضحكت يعني قلبها مال و خلاص الفرق ما بينا اتشال يلا يا قلبي روح لها يلا قولها كل اللى بيتقال ... باذنك يا رب هنقول للصبح
هند تضحك
.......................
فى فيلا اكرم
اكرم قاعد فى الجنينه كارمن تدخل تقعد جنبه
كارمن / انت لسه صاحي لحد دلوقت
اكرم / قالت إنها فى بيت جوزها
كارمن / مين ؟ مهره !! انا حقيقي اسفه يا اكرم انك مريت بكل ده بسبب بنتى بس انا فعلا مش عارفه اعمل معاها ايه اكتر من كدا
اكرم / انا اللى مجننى امتى ... و انا كنت فين وقتها ... و بعدين انا ما كنتش بفارقها طول الوقت معاها حتى لما كان بيكلمها كنت ببقي واقف ما فيش مره نظره حتى فلتت مفيش كلمه مفيش موقف ... سنه ازاى و انا كنت فين السنه دى كلها
كارمن / مش غلطتك صدقنى
اكرم / طب لما مشيت من هنا ما راحتلوش ليه ما جريتش على جوزها ليه ايه اللى يقعدها فى شقتها لوحدها و مروان يروح يقعد معاها ... طب كانوا بيتقابلوا امتى و فين ... انا هتجنن
كارمن / انت شاغل نفسك بيها كدا ليه ما تولع
اكرم / امال لو ما كانتش بنتك
كارمن / بناتى نايمين جوه عارفه عنهم كل حاجه انما دى انا دفنتها من زمان اوى
اكرم / روحى نامى و انا كدا كدا من بكره هشوف لى مكان تانى اعيش فيه ... مش عاوز اشوف خلقضتك تانى
كارمن/ تصدق انى غلطانه انى قلقت عليك
اكرم / دا بنتك ما بتقلقيش عليها هتقلقى على طليقك و لا تكونى بتحلمى انى ممكن ارجع لك دا انا اموت و لا انيش اربط اسمى باسمك تانى دا انتى سرطان
كارمن تقوم و تمشي اكرم يتف على الارض وراها تليفونه يرن
اكرم / الو
جوزيف / انا زعلان منك اوى
اكرم/ مين معايا
جوزيف / برادلي... دانيال برادلى ... كنت فاكر ان رسالتى لرزق وصلتلك
اكرم / اعتقد ان دى مسائل عائليه و مفيش اى داعى انا او انت ندخل فيها
جوزيف / ما انت أدخلت... و عكيتها
اكرم / انا عملت للبنت دى كل حاجه
جوزيف / حصل ... دا انت حتى ما راعيتش انها قد بناتك و كنت عاوز تتجوزها
اكرم / كدابه مفيش الكلام ده
جوزيف / بس مش هى اللى قالت لى
اكرم / امال مين
جوزيف / بعدين ... دلوقت هتروح لعلى و هتقنعه يشيل عمران من دماغه
اكرم / ما اقدرش دا ابوها و من حقه
جوزيف / قدامك لحد بكره الصبح لو ما قدرتش تقنعه اسهم شركتك و شركته فى البورصه هيفضلوا ينزلوا لحد ما تفوقوا لنفسكوا و تعرفوا انتوا بتتعاملوا مع مين ساعتها هرفعها تانى لقيمتها الحقيقيه
اكرم / طب انا عاوز اعرف عمران ده
جوزيف يقفل السكه
اكرم / اتجوزها امتى... الو الو ... يوووووووه و انا المفروض اعمل ايه يعني فى الهبل ده دى بقت عيشه تقرف مش ممكن الكلام الفاضي ده
اكرم يدخل الفيلا و هو بيفرك و يبرطم
..........................
فى المضيفه
مريم / ما انتى لازم تاكلى حاجه كدا هنعتمد على المحاليل ما ينفعش خالص يا مهره يا حبيبتي
مهره باصه فى الارض و بتعيط مريم تقعد جنبها
مريم/ انتى شايفه ان ده وقته ... يا حبيبتي اقفى على رجلك و بعدين شوفي هتعملى ايه العياط مش هيحل اى حاجه
مهره / مفيش حاجه تتحل اصلا ... كل حاجه باظت ... كل حاجه راحت ... تعبى و سمعتى و اهلى و كل حاجه راحت
مريم / مفيش حاجه بتروح
مهره / ازاى بس ... انا عشت عمرى كله بتقى ربنا اقوم فى الاخر اتفضح كدا مدمنه و متجوزه من ورا اهلها من سنه ازاى انا اعمل كدا ازاى طب ابص فى وش اهلى ازاى
مريم / على فكره و الله حاسه بيكي و فهماكى
مهره / ربنا ما يكتب عليكي احساسي ... انا بدعى ربنا ياخدني و يريحني بس حتى لما اموت الناس هتفضل
مريم/ طز فى الناس ما يهموناش
مهره / ازاى ازاى بس ازاى
مريم / ممكن تاجلى تفكير فى كل ده لما تقومى بالسلامه و تخفى
مهره / هو عمران لسه ما جاش
مريم / هيفرق فى ايه عمران يعني انا مقصره معاكى فى ايه
مهره / عوزاه يطلقني... عوزاه يقول لبابا الحقيقه
مريم / اكيد هيحصل بس لما تخفى و الا هترجعى المصحه دى تانى
مهره / طب اكلم اخويا ..  اقوله الحقيقه اكلم مروان زمانه بيلعن اليوم اللى وقف جنبى فيه اكيد حطيته فى مشاكل جامده مع بابا اكيد زعلان منى و انا و الله مظلومه و الله ما عملت حاجه انا لا ليا فى سجاره و لا حبايه دا انا أخرى البنادول ادمن ازاى يا ناس هتجنن حد يفهمني ازاى
مريم / لا حول و لا قوه الا بالله العلى العظيم
الباب يخبط مريم تتنهد و تروح تشوف مين تلاقى مختار
مريم/ ازيك يا عمى عامل ايه
مختار/ مهره خالعه راسها و لا أقدر ادخل اتكلم معاها كلمتين
مريم تبص مهره بتعدل لبسها
مريم / اتفضل يا عمى
مختار يدخل و على وشه ابتسامه مهره تمسح دموعها مختار يبص على الاكل
مختار / انتى لسه ما اكلتيش
مهره / ما ليش نفس ... لو سمحت انا عاوزه عمران
مختار/ عيني هبعتله يجي حاضر بس خير يمكن اقدر انا اساعدك
مهره / عوزاه يطلقني
..............................