الكبيره ٢ بقلم / لولو_محمد

الحلقه ١٣١

(((((( الكبيره ٢))))))
#لولو_محمد
الحلقه ١٣١
عباده / و اللى احنا عارفين ان اكيد لا كلهم صحفيين و لا كلهم سياح بس برده هنامن من تحت لتحت و من غير اى مشاكل
راجل ٢ / يا كبير حط فى بطنك بطيخه صيفي وراك رجاله
عباده يطبطب على كتفه
عباده/ احسن رجاله و احسن وحوش ... يلا على بركه الله
مختار يطلع من المسجد عباده يروح له
عباده / ابو العريس
مختار / ايه الدنيا
عباده / اخبار حبيبك ايه
مختار/ ما جاش بس كلمته قال صلى فى الزاويه اللى جنب بيته تعبان و هيفضل فى البيت النهرده
عباده / و الله وفر عليا كتير المهم فعلا يفضل فى بيته عشان كدا عاوز اطلب منك خدمه العمر
مختار / خير اؤمر
عباده / تفضل جنبه فى بيته تفضل ضامن انه مش هيدخل فى اى حاجه هتحصل النهرده و بالمره تطمن عليه و تشوف طلباته و انا شخصيا بعت جابر على البيت برده خلى اليوم يعدى عشان نعرف ناخد نفسنا
مختار  / تمام ... عن اذنك
مختار يمشي و عباده باين انه مبسوط
.......................
فى اوضه قاسم
قاسم يفتح الباب ما يلاقيش احلام يبص يمين و شمال يروح الحمام ما يلاقيهاش يطلع الموبايل يتصل عليها
قاسم / انتى فين ؟
احلام / على البحر قدام السرايا
قاسم / طب هتيجي و لا اجي لك
احلام / عاوزه اقعد لوحدى لو سمحت
قاسم / كدا مفيش حاجه هتتحل على فكره
احلام / الناس كلها صاحيه بالليل نبقي نتكلم و نشوف هنعرف نحلها و لا لا
قاسم / دا كلامك يعني ؟
احلام / انا ما ليش كلام الكلام كله كلامك انت
قاسم/ برده
احلام / تحب اجى احضر لك تفطر و لا فطرت مكان ما كنت بايت
قاسم / ما فطرتش
احلام / تمام هروح اعمل لك فطار ... تحب تفطر فين
قاسم / فى اوضتنا
احلام / دقايق و يكون عندك ... سلام
قاسم يتنهد و يقعد على السرير الباب يتفتح يتفاجئ بامه
ام قاسم / فرحنى بخلفتى
قاسم / فى ايه يا اما مالك
ام قاسم / كنت بايت فين أمبارح يا قاسم ... قولت لك مش هتريحك انما ايه كلب و لقى عضمه
قاسم / انا كلب يا اما تسلمى مفيش مشكله ... حاجه تاني ؟
ام قاسم / عاوزه اعرف اللى حصل
قاسم / ليه ؟ يفرق معاكى فى ايه ؟ حصل اللى حصل واحد و مراته بينهم و بين بعض و بابهم مقفول عليهم تعرفى ليه
ام قاسم / والله
قاسم/ ايه اللى جد فى حياتى يخليني احكى لك مشاكلى طيب هو انا كنت بحكى لك زمان ما كنا بنتخانق و اسيب البيت و ارجع و نتصالح و نتخانق تانى و اللى فى البيت كلهم ما كل واحد بيشد مع مراته بكلمتين و بيتصالحوا ايه الغريب فى اللى حصل امبارح يعني يخليكي تدخلى عليا بالشكل ده و تكلميني كدا
ام قاسم / لا ما انا هستاذن عشان ادخل اوضه ابنى كمان
قاسم / و فيها ايه يعنى البيوت ليها حرمه على فكره و فى حاجه اسمها خصوصيه
ام قاسم / ناقص تقولى اطلعى بره دا ايه الهم ده
قاسم / ما اقدرش اقولها و حضرتك عارفه
ام قاسم / اسمع بقي خلاصه الكلام ... انا مش فارق معايا اى حاجه بوظ حياتك زى ما انت عاوز بس خليك فاكر مفيش عريس بيغضب و يسيب عروسته بالسرعه دى الا لو كانت
قاسم / انهى عريس ؟! انا عريس !! انا مش عريس  ... انتوا بتعاملونى على انى عريس ؟! بتعاملوها على انها عروسه ؟! فى ايه ياما فى ايه انا بينك و بينها على فكره
ام قاسم/ انت بتهددنى يا قاسم
قاسم يضرب كف على كف
قاسم / انا !!! لا حول و لا قوه الا بالله
ام قاسم / خلاص خلاص سيبهالك خالص ... اياكش اموت و ارتاح و اريحك منى ... اريحكوا كلكوا منى ... كلكوا هترتاحوا مش كدا
قاسم / لا يا امى ما حدش فينا هيرتاح لو جرالك حاجه بس انا لو جرالى حاجه هترتاحى ؟
ام قاسم / انت بتسألني انا السؤال ده يا قاسم ؟!! دا انا ما ليش غيرك يا ابنى
قاسم / و انا كل اللى انا فيه ده عشان ارضيكى و مش عارف ... انا مش بطردك بس احلام تحت بتحضر الفطار و هتطلع فى اى وقت ممكن بعد اذنك نلم الدنيا دى عشان انا مطبق من امبارح و بجد تعبان جدا
ام قاسم / و انا يهمنى راحتك يا ابنى
قاسم يبوس ايد مامته تطبطب على ضهره و تطلع بره و تقفل الباب وراها قاسم يقعد على السرير و باين عليه الحزن
……………………..
فى البلد
طيارات بتعمل استعراضات فى الجو و تكتب و ترسم فى الجو و بنات بتعمل استعراضات فى الشارع مجموعات كل مجموعه شايله علم بلد مختلفه و لابسين لبس و بيرقصوا رقصه ليها علاقه بالبلد و بنات ماشيين على الجناب معاهم مدافع ورق بيضربوها ناحيه الناس اللى واقفه بتتفرج و تصور و شماريخ دخان اللوان مختلفه و الناس عماله تتفرج و تصور
…………………….
فى الشركه
دياب بيتابع اللى بيحصل فى الكاميرات منصور يدخل يقعد
منصور / بص انا مش هتكلم كتير العدد ده مع كميه الكلاب اللى قالوا عليها ... احنا نشوف لنا شغلانه تانيه أسهل
دياب / استعراض قوه مش اكتر
منصور / لا يا بابا دا مش استعراض دا اثبات قوه و ما تقولش بقي حريم و عبط الكتره تغلب دى معاها يجي خمس نسوان لكل دكر فينا
دياب / اوعى اوعى اوعى منصور الجارحى هينخ قدام خمس نسوان
منصور / خمسه من نجاه فى وقت واحد هتبقي عبيط لو استهونت بيهم خصوصا ان لا ليهم قوانين و لا ... انا بقول ايه اصلا يا ابنى
دياب/ هى بتعمل كل ده ليه اصلا ... ما عشان انت تخاف كدا
منصور/ ما لازم اخاف يا دياب ما ينفعش استهون بخصمى دول بيطلعوا منين كل دول طالعين من انهى سرك انهى مساحه كانت شايله كل دول … شوفت الطيارات
دياب / اه شميتهم
منصور / غطت البلد كلها بالغاز ... كلها مش تقولى عربيتين رش ناموس
دياب / واضح عليك على فكره
منصور / لا و انت برنس عصرك و اوانك مفيش اهدى من كدا
دياب / انا مفرهد 
منصور / صبرنى يا رب
مغاورى يدخل
مغاورى / خير يا رجاله فى ايه صوتكوا جايب باب الشركه
منصور / شوفت الكرنفال يا خالى شوفت العدد
مغاورى / شوفت ... بقولك يا دياب ... انت روحت ليونس امبارح البيت؟!
دياب / هو عمى مختار ما كلمش حضرتك ؟
مغاورى / لا ما كلمنيش خير كان فى حاجه و لا ايه
دياب / ايوه بس هو طلب منى ان هو اللى يتكلم معاكوا فيه و أنى اسكت
مغاورى / اه !! ان كان كدا ماشي ... اكلم عمك مختار
دياب / تسلم يا خالى
مغاورى / ايه الدنيا عندك
دياب / المتوقع استعراض عضلات و رش على ودنه
مغاورى / قدامها قد ايه و تخلص ؟
دياب / حسب التصريح ساعتين كمان و الكرنفال يخلص بس افلح ان صدق
مغاورى / لو فى جديد بلغنى
دياب يهز راسه مغاورى يقوم يمشي
منصور / هو ايه حوار يونس اللى خالى كان بيتكلم عليه ده ؟!
دياب / دا ده حوار
منصور يقعد و يبان عليه الاهتمام
......................
فى اوضه قاسم
احلام واقفه فى جنب و باصه من الشباك
قاسم / اكلتى طيب ؟
احلام تهز راسها اه من غير ما تبص له
قاسم/ طب ممكن نتكلم بهدوء و اشرح لك وجهه نظرى
احلام تبص له قاسم يقوم و يحضنها من ضهرها هى مش بتحضنه
قاسم / لا انا كدا و لا الموضوع كدا انتى ظلمانى و الله
احلام / اتمنى
قاسم / انا سهل عليا اسيبك انتى و مازن هناك و اجيلك خميس و جمعه بس دا لا جواز و لا دى عيشه انا عاوزك معايا على طول
احلام / و انا مش هقدر و قولت لك من الاول انى مش هقدر انت اهلك مش اغلى عندك من اهلى
قاسم / مش موضوع اهل ... موضوع شغل
احلام / اتفقنا انك تفتح فرع هناك و بدل ما تجيلى خميس و جمعه يبقي خميس و جمعه و سبت و حد و ابقي تعال هنا باقي الايام او قسم الاسبوع زى ما تحب و لا اقولك خلينا ايام الدراسه هناك و نيجي هنا خميس و جمعه و سبت مش لازم يحضر كل الايام يعني كفايا ٤ و نيجي نتفسح هنا كل ويك اند و انت برده تشوف شغلك
قاسم / يا ريتها كانت بالبساطه دى
احلام/ و ابسط لو عاوزها هتكون ابسط الفرع اللى فى البلد هيحتاجك لحد ما يقف على رجليه و تعين ناس و تمرنهم اكيد هتحتاج وقت هناك و بعدين افرض حصل حمل اكيد هكون مرتاحه اكتر و انا جنب امى و اهلى انا شوفت بنات كتير بتتعب اوى فى الحمل خصوصا الاول ... قاسم انا كنت واضحه معاك انا ما ضحكتش عليك
قاسم/ و لا انا ضحكت عليكي انا بس حياتى مختلفه و عاوزك جنبى
احلام / اعمل اللى انت شايفه
احلام توسع ايده و تروح تعمل ساندوتش
قاسم / انتى مش قولتى اكلتى
احلام تاكل فى صمت
قاسم / طب سيبي الهبل ده و قومى نخرج ناكل حاجه حلوه بره
احلام / ماشي
قاسم / ايه ده مش هتعملى مقموصه و لا و الكلام ده
احلام / انا زعلانه مش هبله هقعد فى الاوضه هنا اعمل ايه اخرج احسن طبعا
قاسم / ان كان على العمايل احنا ممكن نعمل كتير
احلام / انا قايمه اللبس
قاسم / ما كنتش اعرف ان زعلك وحش اوى كدا
احلام / ما كنتش اعرف اننا لما هنزعل مع بعض هتسيبني اهرى و انكت فى نفسي طول الليل و تروح تبات بره
قاسم / الا ما سالتى حتى كنت بايت فين
احلام / ليه صغير و بعدين انت حر تبات مطرح ما تبات انت الخسران اصلا هتلاقي احلى من كدا فين
قاسم / لو على الحلاوه ليكي نصيب الأسد بس نقول ايه فى عرق النكد
احلام / انا قايمه اللبس بدل ما تبات بره النهرده كمان
قاسم يضحك و احلام تروح تطلع طقم من الدولاب
………………………
فى البلد
منصور  / عاوزين نروح لام الدكتوره دى تشوف لنا هتفقسي امتى بقي كدا كتير
ياسمينا / حاجزه الاتنين الجاى ما تقلقش
منصور / اللى جاى ده ؟! و ما قولتليش ليه ؟
ياسمينا/ ميجو كانت هتيجي معايا الله يعينك على اللى انت فيه
منصور / ايوه بس
ياسمينا / ما بسش ربنا يعدى الايام دى على خير انا مش قادره أصدق ان كل ده يحصل من اميره ... دى كانت... اقول ايه بس
منصور / دى عليها بجاحه ... ما حصلتش و لا هتحصل بتتكلم كأنها بلد ابوها و احنا ضيوف عندها و هى عشان بتحبنا بتتكرم علينا و تسيبنا نشاركها فيها شوفتى عمرك بجاحه كدا
ياسمينا / ربنا يهديها
منصور / ربنا ياخدها انتى اصلك مقفول عليكي هنا مش داريه بالمدعكه اللى بره
ياسمينا / لا واخده بالى
منصور / النهرده بدرت البلد نسوان اشى كت و اشي شورتات و اشي فساتين قصيره و الطويل منها لا ساتر و لا نافع حاجه قرف
ياسمينا / لا واضح انك كنت شايف شغلك النهرده كويس
منصور / ايوه افرضي واحده منهم رمت حاجه و لا زرعت حاجه هنا و لا هنا اعمل ايه ساعتها
ياسمينا / لا طبعا ما يصحش بس غريبه يعني سبت نافوره الحريم دى و جيت لى يعني
منصور / اصل انا أنف و ما ليش فى الرمرمه ان ما كانتش نمره ون ما اقبلش أبدا
ياسمينا / يعني انا نمره ون
منصور / فرز اول وربنا حاجه كدا ايه كلاس على الآخر
ياسمينا / لا دا انا انزل اعمل لك صينيه كيكه بقي تاخدها معاك الصبح الشركه تستفشخر بيها وسط الباشمهندسين زمايلك
منصور / حبيبي اللى مسيطنى
ياسمينا / نص ساعه و هطلع لو لقيتك نايم يا منصور
منصور/ يا ستى صحيني عيني غفلت منى صحيني حتى ادوق الكيكه و هى سخنه
ياسمينا / ماشي ... عاوزها شيكولاته و لا فانيلا
منصور / ميكس
ياسمينا / عيني
ياسمينا تلبس العبايه و تسحب موبايلها و تمشي و تقفل الباب وراها منصور يفرد ضهره على السرير و يلعب فى الموبايل و هو بيتاوب
…………………….
فى فندق
احلام/ و الله كنت عارفه انك هتعمل كدا
قاسم / دخلتى سينما ؟
احلام/ دخلت
قاسم / اتعشيتي عشوه محترمه ؟
احلام/ حصل
قاسم / عملتى شوبينج و جرجرتيني وراكى فى المول شايل و محمل ؟!
احلام / هو فى ايه ؟!
قاسم / فى دم فى احساس فى نظر فى شويه دلع من اللى اتمنع دا انا جوزك مش حد غريب يعني
احلام / كان ممكن تاخد الدلع فى البيت عادى ايه اللى جابنا هنا
قاسم / بت انتى مش سالكه
احلام / انت شايف كدا ؟!
قاسم / يا لولو فكيها بقي انا بصالحك اهو اعمل ايه تانى
احلام / و لا حاجه
قاسم / طب هخلينى انا الكبير و اخدك بكره فى اليخت حته دين رحله انما ايه انا و انتى و البحر تالتنا
احلام / بس انا ما بعرفش اعوم
قاسم / مصلحه عشان ما تعرفيش تفلتى منى
احلام تضحك قاسم يسقف
قاسم / ايوه بقي
....................
فى المطبخ عند ياسمينا
ياسمينا تطلع الصينيه من الفرن و ترميها على الرخامه و واضح عليها الوجع تسند على الرخامه و هى ماسكه بطنها تمد ايدها تجيب الموبايل و تتصل بمنصور يرن ما حدش بيرد
ياسمينا / نمت و لا ايه ... ااااه مش قادره ايه الوجع ده
ياسمينا تتسند ناحيه الباب شاهين يدخل المطبخ
شاهين / هى الريحه الحلوه دى جايه من عندك؟
ياسمينا / فى كيكه كل اللى انت عاوزه وسع لى
ياسمينا تحاول تعدى شاهين و هى باين عليها التعب و مش قادره تفرد طولها
شاهين / انتى كويسه ؟
ياسمينا تهز راسها لا
شاهين / طب كلمتى منصور
ياسمينا / شكله نايم مطبق من امبارح هطلع لميجو اصحيها تيجي معايا المستشفي حاسه انى
ياسمينا تنزل فى الارض و شاهين متابعها
شاهين / عارفه انتى ايه مشكلتك
ياسمينا / لا ما حصليش كدا قبل كدا ... هو دياب فين بره و لا روح معاك و لا فين ؟
ياسمينا تقلب فى النمر تطلع نمره دياب و شاهين عينه عليها يوطى ياخد منها الموبايل يرميه على الرخامه و يحاول يشيلها
شاهين / و اشمعن دياب ما انا موجود اوديكي مكان ما انتى عاوزه
شاهين يشيلها من على الارض و يحاول يطلع بيها بره المطبخ و هو بيضمها عليه و يشم فيها ياسمينا تحاول تزقه يكمل فى اللى بيعمله و يزيد
ياسمينا / انت بتعمل ايه بتعمل ايه اوعى اوعى ابعد اوعى ابعد
شاهين / ما عدتش قادر ابعد ما عدتش قادر آنتى ليه مش قادره تحسي انا احسن منه مليون مره انا ابقي لك
ياسمينا تحاول تصرخ يكتم نفسها و يثبتها فى الارض و هى بتعانى انها تفلت منه يشد كيس واقع فى الارض و يحشره فى زورها و يدخله بايده و هى بتحاول تخربشه يكتف ايديها وشها يبدأ يزرق شاهين مش واخد باله و مكمل
شاهين / انا بحبك انا اكتر واحد بيحبك انا هبقي كبير العيله دى هبقي كبير البلد كلها انتى مكانك معايا انا انا بحبك انا
دياب يشد شاهين و يمسك راسه و يفضل يخبط فيها فى الحيط بغل و هو بيصرخ ويشتم
دياب / يا واطى يا عديم النخوه يا نجس يا نجس يا ازبل خلق الله يا واطى
شاهين يقع فى الارض دماغه مفتوحه و الحيطه عليها دمه
دياب / دى كانت الناهيه دى الناهيه
دياب يبص على ياسمينا يلاقي وشها ازرق يجرى عليها و يفتح بقها و يمد صابعه يشد الكيس و يفضل يعمل لها سى بى ار شاهين يستغل الفرصه و يطلع موبايله و هو بيقوم بالراحه يصور دياب و هو بينفخ فى بق ياسمينا و يبعت الصوره و يطلع يجرى و هو بيصرخ
شاهين / الحقونى اللحقوا ياسمينا اصحوا يا بشر اصحوا
شاهين يفتح باب السرايا طلقه تيجي فى رجله يقع فى الارض و هو بيصرخ البيت كله ينزل من فوق بيجرى دياب يروح يشيل شاهين و يروح ناحيه العربيه يفتح الشنطه و شاهين بيصرخ
شاهين/الحقونى الحقونى
دياب يحطه فى شنطه العربيه و يقفل عليه الغفر يجروا على دياب يكون ركب العربيه و طار يبعدوا من طريقه قبل ما يطيرهم مغاورى يطلع بيجرى من السرايا و فى ايده التليفون يشوفه طاير بره السرايا
مغاورى / كلو على العربيات... وراه هاتوهولى حى عاوزهم عايشين
سماح / ايه اللى حصل يا مغاورى ايه الصوره دى و فين شاهين
منصور يطلع بيجرى بره السرايا شايل ياسمينا يجرى بيها على عربيته وسط صريخ الستات و ارتباك بين الرجاله مغاورى يصرخ فيهم
مغاورى / انتوا لسه واقفين وراهم عاوز دياب هاتولى دياب من تحت الارض
الرجاله كلها تركب عربياتها و تجرى سماح تدخل تجرى تطلع فوق ترزع على اوضه وفاء مش بتفتح تفضل تخبط وفاء تفتح و الموبايل فى ايدها
وفاء / فى ايه حد يخبط على حد السعادى بالشكل ده
سماح / جوزك فين
وفاء / ما اعرفش مش جوه لسه ما جاش
سماح / انتى هتعمليلى فيها نايمه على ودانك افتحى المخروب ده و حددى مكانه
سماح تشد الموبايل من وفاء ما تعرفش تفتحه
سماح / انا مش قليله الأصل انى ادخل العيال فى المواضيع دى بس بلغى جوزك النسوانجى الواطى ان العين بالعين و البادى أظلم سماح تسيب وفاء و تمشي مغاورى يقابلها يرجع سماح تقف تتابع
مغاورى / حددى لى مكانه
وفاء ما بتردش
مغاورى / بناقص خدماتك انا هعرف اجيبه بمعرفتى
مغاورى يمشي سماح تبص لوفاء
سماح / انا ما بحبش أكرر كلامى لو مس شعره من ابنى مش هيكفيني فيكي موتك انتى و لا عيالك
وفاء تدخل و تقفل الباب و تفضل باصه للموبايل
.....................
فى شقه جوزيف
مختار ينزل بيجرى و جوزيف وراه
مختار / جيب العواقب سليمه يا رب سلمها لابنها يارب سلمها لابنها يا رب
مختار يركب العربيه جوزيف يركب جنبه جوزيف يسوق
مختار / استرها معاها يا رب نجيها لابنها يا رب نجيها يا رب
جوزيف يبص لمختار اللى عمال يدعى و مش عارف يتلم على اعصابه
مختار / انا مربى البت دى من و هى قد كدا ... دى بنتى انا ... اول بنت ليا ... انا مش قادر اصدق مش قادر اصدق
جوزيف / دياب ما يعملهاش
مختار/ عارف عارف انه ما يعملهاش بس هيعمل الأسوء هيقتل شاهين هيضيع نفسه
جوزيف / هيعمل الصح
مختار / مش هو اللى يحدد
جوزيف / هتفضلوا سذج كدا لحد امتى شاهين كان لازم يموت من زمان ... شاهين هو الخاين اللى بينكم
مختار يبص لجوزيف
جوزيف / كدا كدا اتحرق و كدا كدا هيموت ... دوره خلص
مختار / انت ازاى كدا ... ازاى كدا بجد
جوزيف/ على فكره انا قولت لمنصور على شاهين قبل كدا و ما صدقنيش و قولت لنجاه كمان و لمحت لكوا كلكم و برده لا حد اهتم و لا حد صدقنى اصلا
مختار  / انا حاسس انى هتجلط
جوزيف بيبص على مختار مختار يسوق و باين عليه التعب و الحزن
.........................
فى سرايا الزنايته
فاطمه / انتى بتقولى ايه
وفاء / بقول اللى حصل انا ما اعرفش تفاصيل انا اتفاجئت زيي زيكوا و مع انى واثقه ان دياب عمره ما يعمل حاجه زى دى بس خفت لما سماح قالت لى انها ممكن تاذى ولادى و انا ما ليش مكان تانى اروحه بيهم غير هنا و الأمر يرجع لكوا هم ولادكوا زى ما هم ولادى
خديجه / مهما كان الموضوع ما فيش حد هيلمس العيال احنا من امتى بندخل العيال فى مشاكلنا اكيد سماح ما كانتش تقصد
فاطمه / انا هقوم اللبس و اروح المستشفي
خديجه / هتعملى ايه هناك السعادى اصبري و لو فى جديد هيقولوا
فاطمه / اقف جنب ولادى يا خديجه هروح اشوف بنتى و اتكلم معاها هصبرها و افهم منها سماح لا تقول و لا تعمل كدا سماح مش كدا انا ما ربيتهاش على كدا
فاطمه تطلع فوق
خديجه / دخلى العيال الاوضه دى يا وفاء و ارتاحى و ما تخافيش و لو احتاجتى اى حاجه انا هنا اهو
وفاء / تسلمى
وفاء تدخل الاوضه  و تقفل عليها الباب خديجه تتصل بالموبايل
خديجه / ايوه يا عباده ايه الاخبار
عباده / فى العمليات ادعي لها
خديجه /  كل ده فى العمليات!!! لا حول و لا قوه الا بالله ... طب مفيش اخبار عن دياب
عباده / فى حد مشفر بياناته مش قادرين نحدد مكانه بس المهندسين لقطوا عربيته على طريق الجبل و بلغت صابر و باذن الله يلحقوه
خديجه / طب و يونس ما يقدرش يساعد انكوا تحددوا مكانه بدقه انا اعرف يعني انه جامد فى التكنولوجيا و كانت نجاه قالت لى انه بيستخدم قمر صناعى و لا حاجه زى دى
عباده / يونس كان هنا و قال كلام غريب جدا و مشيته من هنا قبل ما يمسك فى مغاورى و حد فيهم يخلص على التانى
خديجه / ايه الكلام ده
عباده / بيقول ان شاهين كان خاين و انه كان يستاهل يموت و انه لمح عنه اكتر من مره و انه كدا كدا هيموت لو مش دياب هيبقي امايا
خديجه / ايه العبط ده ازاى يعني
عباده / المشكله ان شاهين فعلا له اكتر من موقف خصوصا مع ياسمينا و احنا حاولنا ننضف وراه كتير و قولنا اتصلح حاله بس سماح مش قابله الكلام ده
خديجه / لو فيه العبر يا عباده نجيبه و نحاكمه قدام الكل مش كدا دياب كدا بيضيع نفسه خصوصا بالصوره اللى شاهين بعتها للكل دى الصوره صعبه اوى
عباده / و هو انا قولت موافق على اللى بيحصل ... الرجاله فى كل حته بيدوروا و مختار منهار هنا هو و هند و عبد الله جوه فى العمليات مع الدكاتره انا واقف هنا هتجنن
خديجه / و منصور فين منصور لحسن يتجنن و يعمل فى نفسه حاجه
عباده/ فى المسجد مع الرجاله محوطين عليه بس ما اعتقدش انه مستوعب اللى بيحصل اصلا ... لسه مصدوم مش قادر يصدق
خديجه / جيب العواقب سليمه يا رب ... اه وفاء جابت العيال هنا خافت من سماح بتقول هددتها بيهم
عباده / ايه الكلام ده ؟!
خديجه / ماما بطه جيالك فى الطريق تشوف الموضوع و تتكلم معاها
عباده / تمام كدا كدا كويس ان العيال عندك احسن برده
خديجه / لو فى جديد طمنى
عباده /دعواتك بس 
...............................
فى الجبل
دياب راكن العربيه و بيحفر و فى صوت خبط و ترزيع و صريخ من جوه العربيه دياب يروح يرمى الجاروف و يروح يفتح شنطه العربيه شاهين ينط منها دياب يجيبه من قفاه و يضربه بوكس و يسحله فى الارض ناحيه الحفره
دياب / كان ممكن انهى كل ده بطلقه فى قلبك بس انت ما ينفعش تموت بالسهوله دى الوساخه دى لازم يكون ليها تمن
شاهين / انا ما عملتش حاجه احلف لك بالله انا
دياب يزق شاهين فى الحفره و يبدأ يردم عليه
شاهين / ابوس رجلك يا دياب انت كدا بتضيع نفسك انت كدا ... دياب انا ابن خالك الوحيد ... ابويا مش هيسكت ... دياب ... انا دليل برائتك الوحيد انا الشاهد الوحيد ان مش انت اللى اتهجمت على ياسمينا ... دياب انا صورتك ... يا دياب حرام عليك كدا ... دياب ... دياب اقسم بالله ما كنت فى وعيي ... انا كنت ناوى اوديها المستشفي
دياب / مستشفي اه باماره الكيس اللى كان فى زورها يا ابن الجزمه ... اخرس بقي اخرس
شاهين / طب حلفتك بالله اديني فرصه اخر فرصه ههرب من البلد كلها و مش هتشوفوا وشي تتانى و الله ما هتشوفنى تانى
دياب / ما احنا فعلا مش هنشوفك تانى هنرتاح منك للأبد هننضف من وساختك و نجاستك و الله كان قلبي حاسس انك وسخ كنت بديك فرصه و بدى ابوك المسكين فرصه ايدك النجسه دى كانت المفروض تتقطع من ايام نجاه فاكر ايام نجاه يا حيوان ... ابوك بدل ما يربيك حلق لك أقرع.. كان المفروض يقطع راسك مش يحلقها ... ولا ولا الفيديو القذر اللى كنت بتريل فيه على مرات اخويا ده كان حقيقي مش فايك صح كل المواقف اللى اشتكت فيها منك و سكتناها فيها كانت حقيقي صح ... انت ازاى كدا ازاى قدرت تضحك علينا الوقت دا كله ازاى قدرت تخرسني عنك الوقت ده كله لا و جاى تقول لى دليل برائتى دا انا هروح البلد اعمل فرح و ادبح و اقول لهم انا اللى قتلته ... نضفت البلد من وساخته و نجاسته ... دا انا هرفع راسي وسط الناس و اقف بكل فخر كدا و اصرخ و اقول ... انا اللى قتلت شاهين الجارحى النجس !!!!
دياب يفوق من انفعاله يلاقي نفسه ردم على شاهين يرمى الجاروف و يروح يسوق العربيه و يلف و يرجع يقابل عربيات يكسروا عليه يوقفوه و ينزلوا يرفعوا عليه نار صابر راكب عربيته وسطهم شايف المنظر يبص قدامه مكان ما دياب جاى و يفكر و يسيبهم و يمشي واحد يروح يخبط على الشباك دياب يفتح له و هو باصص قدامه
الراجل / الكبير عاوزك حى
دياب / كنت رايح له
الراجل / شاهين فين ؟
دياب / مكان ما المفروض يكون
الراجل / دياب ما تجبش لنفسك المشاكل شاهين فين ؟
دياب يبص له
دياب / الكبير مستنينى
الراجل / انت عملت ايه يا دياب و ايه الصوره دى
دياب / صوره ايه ؟!!
................................
فى المستشفي
الدكتور / احنا قدرنا بمعجزه اننا ننقذ الجنين بس طبعا هيحتاج شويه متابعه فى الحضانه لحد ما نطمن عليه تماما ساعتها تقدروا تستلموه
منصور / و ياسمينا امه امه فين
الدكتور/ احنا عملنا كل اللى نقدر عليه و الباقي على ربنا ادعوا لها حالتها مش مستقره نهائى و حطيناها فى العنايه المركزه
الدكتور يجي يمشي منصور يمنعه
منصور/ يعني ايه مش مستقره يعني ايه عملتوا اللى عليكوا يعني خلاص كدا
مختار / اهدى يا منصور اهدى
منصور / لا ما اهداش ... ياسمينا فين ... انا عاوز اشوفها عاوز اطمن عليها فين العنايه دى فين العنايه !!!!
الدكتور يمشي مختار يروح وراه و منصور بيدور على العنايه و هند و نجاه بيجروا وراه
مختار / دكتور ... دكتور... بعد اذنك ... انا عارف انكوا احسن دكاتره و انكوا عملتوا اللى عليكوا بس انت فاهم دى تبقي مين بالنسبالى لو فى ذره امل واحده تلحقها انا مش هتاخر هسفرها اخر بلاد المسلمين هصرف اللى ورايا و اللى قدامى كل فلوس الدنيا مش خساره فيها بس تقوم لعيالها بالسلامه ... ابوس ايدك يا دكتور انا مش هستحمل حاجه تجرأ لها
الدكتور / انا مقدر حالتك و الله بس ... ادعو لها
الدكتور يسيب مختار فى صدمه و يمشي عباده يدخل بيجرى
عباده / مختار ... مختار ... ايه الاخبار ... خرجوا من العمليات ... ايه اللى حصل
مختار / ايه اللى حصل ؟! ... دا اللى نفسي اعرفه ... ايه اللى حصل ؟! ... و ازاى و امتى و ليه ... ايه اللى حصل
عباده / ياسمينا !! ياسمينا جرا لها حاجه؟!
مختار / نقلوها العنايه بيقولى ادعى لها ... ادعى
عباده / وحد الله ما لناش غيره ... صدقنى دا فى حد ذاته خبر حلو ... ربنا كريم ربنا كبير رينا قادر على كل شئ ما تقلقش... ربنا رحيم بينا و بيها ... رينا ما بيعملش حاجه وحشه فى حد ... وحد الله وحد الله ياما شوفنا و ياما
مختار/ لا ما شوفناش ... عشنا قد ما عشنا ما شوفناش ... ما شوفناش اخ اتهجم على مرات اخوه ما شوفناش دى ما شوفناش
عباده / انا متاكد ان الحقيقه
مختار / انا مش هسكت على اللى حصل ده و الله العظيم ما هسكت
مختار يمشي عباده يجرى وراها
عباده / رايح فين ... رايح فين استنى
عباده يحاول يوقف مختار مختار يزقه
مختار / اوعى ... إياك تحاول تمنعنى ... ادوس عليك و مش هبص ورايا ... ابعد !!!
عباده / طب هاجى معاك  .. اى كان اللى هتعمله انا اخوك و ما ينفعش اسيبك لوحدك ... زى ما نجاه تخصك ياسمينا تخصنى ... انا معاك ... جاى معاك
مختار / ما ينفعش ... البلد دى لازم يفضل ليها كبير يحكمها ... خليك هنا
جوزيف يدخل يقف بعيد عباده يشوفه يقف مختار يمشي عباده و جوزيف يبصوا لبعض عباده يشاور له براسه على مختار جوزيف يهز راسه موافق و يجرى ورا مختار
عباده / كان مستخبى لنا فين ده بس يا ربى
عباده يضرب كف على كف و هو رايح ناحيه العنايه
........................
مكان قبر شاهين
صابر بيحفر لحد ما يطلع شاهين فاقد الوعى يفضل يعمل له سي بى ار لحد ما يقوم و يفضل يصرخ و يتفزغ صابر يبعد عنه و يقف
شاهين / صابر ... صابر ... شوفت دياب عمل ايه ... شوفت عمل فيا ايه ... شوفت ... أنا مش هسكت له ... مش هرحمه ... انا ... أنا
صابر / انت تخرس خالص و تحكيلي ايه اللى حصل بالظبط
شاهين / دياب دياب اتهجم على ياسمينا و أنا ... انا صورته و لما شافني حاول يقتلنى
صابر يضربه طلقه فى رجله السليمه شاهين يصرخ
شاهين / آآآآآآه... بتعمل ايه انت بتعمل ايه
صابر / ايه اللى حصل
شاهين / هو ده اللى حصل اسألهم أنا خفت و بعت الصوره للعيله كلها انا صورته و هو فوقيها بيبوسها
صابر ينشن على دماغ شاهين
شاهين / اقسم بالله بقول الحقيقه اقسم بالله انت ليه مش عاوز تصدقني
صابر/ عاوزنى اكدب صاحب عمرى و اصدقك انت
شاهين / صاحب عمرك؟! انا كنت فاكركوا ما بتطيقوش بعض
صابر / لآخر مره بسألك... ايه اللى حصل يا شاهين
شاهين / هى دى الحقيقه و الله هى دى الحقيقه
صابر / تمام يبقي كانى ما جيتش
صابر يرفع المسدس نار تنضرب تحت رجله يجرى ورا العربيه ياخد ساتر يشوف عربيه داخله عليه و فاتحين النار يضرب النار و يحصل تبادل لحد ما العربيه توصل و الباب يتفتح بنات ملثمه يشدوا شاهين يركب و يطيروا بعد ما يجيبوا الاربع فرد بتوع صابر على الارض صابر يطلع وراهم و يفضل يضرب نار لحد ما المسدسين بتوعه يفضوا
....................
فى العنايه
منصور يدخل لابس مريله عمليات يروح يقف قدام ياسمينا نايمه فى السرير يفضل متابعها بحزن و صمت يروح يقعد جنبها و يمسك ايدها و يبوسها
منصور / سامحيني ... ابوس ايدك سامحيني ... انا ... أنا مش لاقي كلام اقوله ... مش لاقي لنفسي عذر انا ... انا  ... ياسمينا ... حقك عليا و الله ... انا مش عارف اقول لك ايه ... لو مش عشانى عشان خاطر ولادك ... انا مش هسميه ... هستناكى انتى تسميه ... انا ... قومى بقي ... قومى
ممرضه تدخل
الممرضه / كفايا كدا
منصور يمسح دموع
منصور / انا ما لحقتش
الممرضه/ غصب عنى و الله بس حضرتك عارف
منصور يهز راسه و يطلع بره العنايه يلاقي مغاورى واقف
مغاورى / مسكوا دياب
منصور يبص لمغاورى و الاتنين فى اسوء حالاتهم
مغاورى / مش عاوز يقول شاهين فين و لا عمل فيه ايه ... شهاده ده قصاد شهاده ده الوحيده اللى تقدر تفصل هى ياسمينا
منصور / عاوز تقنعنى ان اخويا الوحيد ممكن من غير اى سبب يعمل فيا انا كدا ... طب ليه ؟
مغاورى / انا ما كنتش موجود انا زيي زيك لا شوفت و لا
منصور / بس صدقت... صدقت حاجه ما فيش اى عقل فى الدنيا ممكن يصدقها
مغاورى / كل واحد بيصدق اللى يريحه زيك بالظبط ... الصوره تخزق عين الطخين اخوك كان فوق مراتك و ابنى اللى مصورها اخوك عندى و ابنى مش لاقينه
منصور / اخويا فين
....................