الكبيره ٢ بقلم / لولو_محمد

الحلقه ٤٢

((((((( الكبيره ٢)))))))
#لولو_محمد
الحلقه ٤٢
محمد / منك نستفيد ... يبقي المفروض نشتغل بقي على الميكروروبوتس دى ... سمعت عنها يا شاهين دى شبه الحشره و حجم الحشره بس هى فى الاصل روبوت دول حقنوا منصور بالبى كاى بواحده شبه النحله فاكر يا منصور
منصور / و سي زفت بيقول ما لهاش اى حاجه مضاده
محمد / ستاره الهوا ما تنفعش مش دى بتمنع الحشرات عشان مش بيقدروا يطيروا جواها اهى بالظبط اكيد الروبوتات دى مش خارقه يعني بحجمها ده عشان يقدروا يطيروا تحتها
امين / طب و برا السرايا هتحمى روحك ازاى هتمشي بستاره الهوا فوق راسك و لا ايه
محمد / جرا ايه يا عمى و انا ابو العريف و لا ايه اكيد مش انا اللى هحل كل العقد حليت واحده ادى الفرصه لغيرى بقي و لا ايه يا شاهين
شاهين / و لا ايه يا محمد
محمد / مالك يا عم بهز معاك مش انت اللى انقذت الليله النهرده و لا ايه
شاهين / اهدى شويه يا محمد اهدى انت جايب الطاقه دى كلها منين اهدى
امين و منصور يبصوا لبعض منصور يركز فى السواقه و شاهين باصص من الشباك و سرحان بيفكر
………………………..
فى عربيه جابر
همام طاير على الطريق سايق و جابر جنبه بيتكلم فى التليفون و عمران و ناصر راكبين ورا عمران بيتابع تصوير بالقمر الصناعى على تابلت
جابر / مفيهاش بكره تخلقلى معدات من تحت الارض و من احدث نوع من اول اللودر للكراين للجرار ... و رجاله طبعا هو انا هشتغل المعدات دى بنفسي يعني و عربيات تنقل الردم مش عاوز يطلع علينا نهار الا و الارض دى كلها نضيفه و متساويه بالأرض ... انا الكلام ده ما يلزمنيش اللى قولته يتنفذ
جابر يقفل السكه
جابر / ما تدوس شويه يا همام
همام / كنت جبتلنا طياره اسهل
جابر / كنت عارف انهم هيستوطوا و يهاجموا الفيلا اكيد بس مش يفجروها يعنى
عمران / الفيلا لسه ما وقعتش بس النار ماسكه فى الدور اللى فوق كله اعتقد اولى انك تشوف عربيات مطافى احسن من الحاجات التانيه دى
جابر / زى ما بتفكر غيرك بيفكر احنا زرعنا القنابل كلها فى اماكن عمدان اه مش فى كل العمدان بس فى عمدان اساسيه عشان تضمن ان المكان لازم هيقع ... لو مش دلوقت يبقي بكره بس كدا كدا واقع او على الاقل مش نافع
ناصر / برده ما يضرش لو جبنالنا فنطاسين تلاته مايه نجرب نطفيها و بعدين نبقي نهدها وقت تانى و لا انت شايف ايه
همام / كلامهم صح ما ينفعش نسيب حاجه للظروف لو وصلنا بالعربيات و النار كانت والعه مش هتعرف تدخل و هتعطل برده لحد ما تطفيها
جابر يهز راسه و يتصل بحد تانى
.........................
فى الفيلا عند نجاه
الراجل يحط ايده على الايربود و نجاه بتحاول تبص على السلم يزغدها بالمسدس فى راسها
الراجل / لقيتها ... حالا طالعين ... المكان ده هيتساوى بالأرض فاتحركى احسن لك 
نجاه تاخد نفس و تلف بسرعه و هى بترمى نفسها فى الارض و تيجي تضربه بالنار المسدس ما يشتغلش نجاه تستغرب و تحاول مره و اتنين و تلاته و هى بتقوم تقف و الراجل هادى ما بيتحركش نجاه تحاول مع المسدس و تشوف الخزنه الراجل يضرب نار جنب راسها نجاه تبصله
الراجل / خلصتى هبل اتحركى بقي
نجاه / فلتت منك ؟؟ و لا انت خايف تيجي فيا ما تاخدش المكافأه  ..  هيدوك كام يمكن اديك انا اكتر 
الراجل / هم قالوا عاوزينك عايشه بس ما حدش جاب سيره انك تكونى سليمه الطلقه الجايه هتعجزك اتحركى بالزوق احسنلك
صوت قنبله و النجفه تقع من السقف بينهم الاتنين يحموا وشهم نجاه تهجم عليه تضرب المسدس من ايده و توقعه فى الارض تجرى تاخد المسدس بتاعه و تيجي تضرب بيه ما يضربش الراجل يجرى عليها تحدفه بالمسدس يفاديه و يوقعها فى الارض تقلبه و تبقي هى فوقيه تضربه بالكوع فى مناخيره يفقد الوعى تحس بمسدس فى دماغها تتنهد باستسلام
الراجل / اتحركى بالزوق احسنلك انا مش هموت عشان خاطر سواد عنيكي هقولهم لقيتك ميته و اطلع أجرى قبل المكان ما يتهد فوق نفوخى
نجاه تقوم تقف بالراحه و عينها فى الارض على المسدس و بتجز على سنانها الراجل يزغدها بالمسدس فى كتفها
الراجل / بقولك اتحركى يا بنت الكلب
نجاه تلف بسرعه و تخطف المسدس من ايده و تضربه دبل كيك واحده فى جنبه و التانيه فى دماغه تنطره يقوم و لسه هيهجم عليها طلقه تجيله فى نص دماغه من ورا يقع فى الارض نجاه تبص تلاقى جوزيف نازل على السلم و الدم مغرق وشه و ساند على الترابزين قنبله تنفجر السلم ينهار و جوزيف يتدحرج فى الارض و الالم باين عليه نجاه تجرى عليه تسنده
نجاه / يونس يونس انت كويس يونس قوم معايا قوم قوم
نجاه تسند جوزيف ناحيه الجيم
جوزيف / الباب مفيش باب
نجاه / ثق فيا ثق فيا
نجاه تسند جوزيف ينزلوا الجيم قنبله تنفجر السقف ينزل تراب فوقيهم جوزيف يشوف باب الاوضه يستغرب و هو ماسك دماغه
نجاه / بسرعه انزل مفيش وقت انزل بسرعه
جوزيف يروح ينزل على السلم نجاه تدخل و تشد الباب يتقفل قنبله تنفجر تنطرها تقع من على السلم تنزل فوق ضهر جوزيف تساويه بالأرض يتوجع
جوزيف / ما كنتى سبتيني اموت فوق اسهل آآآآآآه ايه ده
نجاه تقوم و هى ماسكه ضهرها و باين عليها الوجع
جوزيف / سلامتك يا شابه جت جامده عليكي يا اختى ... معلش معلش ... ايه بقي المكان ده
النور ينطفى لحظه و نور الطوارئ يشتغل ليد ازرق فى الاركان
جوزيف / حلو اوى ... دا كدا بجد احلوت اوى
نجاه / استنى اشوف لسه فى مايه فى الحمام تغسل وشك و لا هننيل ايه
نجاه تروح حمام صغير جدا فى جنب و تفتح حنفيه فى مايه
جوزيف / لا ما تقلقيش مفيش نيله بعد كدا انتوا بتشتغلونى يا نجاه دا انا رميت روحى فى النار عشان الحقك ... بس العيب مش عليكى العيب عليا انا
نجاه / تعال اغسل وشك و بعدين نتكلم و نشوف مين فينا له حق عند التانى
جوزيف يغسل وشه و الدم يملا الحوض
جوزيف / بس حلو المكان ده لا حلو ... دا جابر صح ... بيعجبنى الواد ده بس عنده مشكله واحده ... انه غبى
نجاه / ما تغلطش فيه
جوزيف / انا مش طايقك فتجنبيني لحد ما اهدى ماشي ..  و دى هتسيب علامه بقي و لا هتلم و لا هعمل فيها ايه دى
نجاه / ما تنشف يلا مالك دا خربوش
جوزيف يبصلها بغل و يحوش نفسه عنها و كاتم على راسه بالفوطه
نجاه / هروح ادور على بلاستر و لا مطهر و لا اى اسعافات أوليه
جوزيف / حقك ما انا الغلطان ... انا اللى اتشقلبت عشان اللحقك انا الغلطان ... انا مالى ما تشيلوا طينكوا انا مالى
نجاه / ما حدش طلب منك حاجه و لعلمك انا المفروض ما كنتش طلعت و كنت سبتها تطربق فوق دماغك اياكش ساعتها حبايبك اللى خنت ثقتى فيك عشانهم كانوا نفعوك
جوزيف/ و ما دام انا خاين بقي طلعتى ليه يا ست نوجه
نجاه / عشان انا مش زيك و ما تقوليش نوجه
نجاه تروح تقعد فى ركن و هى مضايقه
جوزيف / دى حقيقه ما اختلفناش انتى فعلا مش زيي ... بس انا ما خنتكيش انا جيتلك طاير
نجاه / كنت فين من امبارح
جوزيف / انتوا عارفين كنت فين
نجاه/ ايوه عارفين بس ما اعرفش ليه ... انت معانا و لا معاهم
جوزيف / معاكى ... انا معاكى  ... اللى فى دماغى ده عشان انا معاكى ... للمره المليون بقولك احنا مش قدهم و لازم نسايسهم لحد ما نجهز نفسنا
نجاه / و ليه ما قولتليش انك رايح لهم ليه بتتصرف من ورايا
جوزيف / و انتوا يعنى اللى بتقولولى كل حاجه ... انتوا بتثقوا فيا اصلا
نجاه / هنثق لو انت صارحتنا
جوزيف / ما ينفعش ... فاكره اليوم اللى جابر اختفى فيه و بعدين رجع لوحده فاكره قالك كان فين ... انا بقي كنت عارف هو كان فين و قولتله انى عارف بس اكيد ما قولتلوش انى عارف ان الاسلحه بايظه بس بما انى عرفت و بما انى قولتله صريحه انى حطيت التاتش بتاعى كان المفروض يفهم من نفسه بس لا غبى عمل يوم التسليم هو نفس اليوم اللى هيهجم فيه على المقر و هو عارف انى هناك قالى انه هيعمل كدا ؟؟
نجاه / عمل كدا عشان
جوزيف / عشان غبى انا راكب موتوسيكل عمران و عارف ان فى جي بى اس و راكنه قرب المكان تفتكرى انا بالغباء انى اغلط غلطه زى دى انا بقولهم انى هناك بقولهم انى هناك فى معاد التسليم عشان تاخدوا بالكوا بقولهم فى حاجه غلط ... بس تعرفى الغلط عندى انا من الاول مش منكوا
جوزيف يطلع الموبايل مفيش شبكه يحطه على الميني بار و يروح يقعد جنب نجاه
جوزيف / هنفضل هنا بقي لحد ما يطلعونا تمام خلينا قاعدين
نجاه / فى اكل و ميه فى التلاجه
جوزيف يبصلها و يبص قدامه و يتنهد
نجاه / انت بتقول على جابر غبى ... طب و ايه ؟؟ انا كمان غبيه ؟
جوزيف يبصلها
جوزيف / انا اللى غبى يا نجاه ... انتى عبيطه بس
نجاه ما تقدرش تمسك نفسها و تضحك جوزيف يبص قدامه و هو مضايق
نجاه / انا المفروض ما كنتش هطلع من هنا خالص بس لما شوفتك لوحدك طلعت عشان اساعدك
جوزيف / كتر خيرك اصيله و بنت أصول
نجاه / انا محطوطه تحت ضغط ما حدش فى الكون يستحمله بسببك
جوزيف / بجد !!
نجاه / احنا ما شوفناش منك شويه و مع كدا عندى امل فيك ... و مع ان المفروض لا يلدغ مؤمن من جحر مرتين و انى ما ينفعش أكرر غلطه اميره ... قصدى امايا
جوزيف / انا غيرها هى اصلا
نجاه / اللعن ... انت اللعن... فى امايا كانت جيالنا ملاك عيله صغيره و احنا صدقناها انما انت ... و مع كدا مصدقاك مش عارفه ليه بس واثقه فيك ... هو انا عبيطه بجد !!
جوزيف يبص فى ساعته
نجاه / بكلمك على فكره
جوزيف / اه يا نجاه عبيطه ... عشان ما كانش ينفع تطلعى من هنا حتى و لو عشانى ... كتر خيرك و كل حاجه بس انا كنت هقدر اتصرف انا لو ما كنتش نزلت فى الوقت المناسب
نجاه / تتصرف ايه انت لولا انى دليتك على هنا كان زمانك تحت الانقاض
جوزيف / كنت هطلع منها سليم برده على فكره
نجاه / دا ايه الثقه المبالغ فيها دى
جوزيف / اللى زيي ما بيموتوش بالسهوله دى يا نونو
نجاه / ما تقوليش نونو قولت و ليه يعني الموت بيجي على اهون سبب
جوزيف / دا للطيبين بس انتى ناسيه انى الشرير فى روايه أحدهم لا دا مش أحدهم بس دا انا الشرير فى جميع الروايات ... الاشرار بيعيشوا اطول
جوزيف يلعب حواجبه
نجاه / انت الخبطه أثرت جامد على دماغك
جوزيف / لا على ضهرى خفى محشي شويه مش كدا
نجاه / جايلك قلب تهزر يعني
جوزيف/ بصراحه لما هديت شويه لقيت انها مش بطاله النص المليان من كبايتي طلع فيه مانجه ساقعه مشبره فمش هحرق دمى على النص الفاضي كدا جبرت اوى
نجاه / مش فاهمه
جوزيف / هتفهمى لما يفتحوا الباب ده و يلاقونا سوا
نجاه تبص حواليها و ترتبك
نجاه / دا وضع طارئ يعني مش بكيفنا
جوزيف / انا اتكلمت و لا فتحت بقي حتى
نجاه / انت مستفز اوى على فكره انا هقوم اتوضى و اصلى انا مش هضيع وقتى فى الكلام ده عن اذنك
جوزيف / الحمام من هناك
نجاه / دا انت مستفز
نجاه تقوم تروح الحمام و جوزيف بيتالم
جوزيف / و انا قولت ايه ... الحق عليا يعني ... اااااه هو فى كدا
............................
بره الفيلا
عربيات كتير و كراكات و عمال شغالين بأيديهم و رجاله بتحمل و خليه نحل شغاله مختار يدخل بعربيه و جنبه دياب و ينزل منها
مختار / ايه كل ده و لسه ما خلصتوش هنقعد اليوم كله و لا ايه .. تعالا لى
جابر يروح مع مختار فى جنب
مختار / ادينى معاد نجاه تبقي واقفه فيه قدامى سليمه و الا اقسم بالله
جابر / تفتكر يا خالى انى هقصر فى حق نجاه الرجاله شغاله زى النحل و لو المكان كان يستوعب معدات اكتر ما كنتش استخسرت دا اللى مش معاه معده شغال بالمرزبه و الازميل و لو يطولوا يحفروا فى الصخر بسنانهم كانوا قرقشوه يا خالى
مختار / انا سمعت كلامك و سبتك تظبط كل حاجه على دماغك و خيالك و سألتك عامل حساب كل حاجه يا جابر قولتى ايوه يا خالى فى اى حاجه ممكن تحصل لنجاه يا جابر قولتلى برقبتى يا خالى يمين بالله يا جابر شوف يمين بالله
جابر / انا هاذى نجاه يعني يا خالى بتقولى انا الكلام ده ايه مش عارف غلاوتها عندى بس انا اقسم بالله حاطت لها اكل و ميه يكفيها اسبوع بحاله و احنا باذنك يا رب مش هيطلع علينا نهار الا و هى معانا هنا ما تقلقش انا حتى طلبت عربيه اسعاف تبقي معانا لعل و عسي ما نبقاش سايبين حاجه للظروف
مختار / كويس بتتعلم قولتلك ناخدها معانا و نلبسها اى حاجه ما كدا كدا سايبين الشرايح فى البيت قولتلى لا يا خالى هنا امان ليها هيعرفوا اهم يا خويا هدوا البيت فوق راسها ... انت مالى ايدك من البتاعه دى
جابر / برقبتى
مختار / روح شوف شغلك
مختار يروح لدياب واقف جنب موتوسيكل جوزيف مرمى فى ركن
مختار / هو ؟
دياب / هو
مختار يبص حواليه
مختار / حاول توصل للكاميرات حوالين الفيلا انا عارف ان كاميرات الفيلا فصلت كلها بس انا متأكد انك هتقدر تجيب لى اى حاجه
دياب / تمام هفحصهم كلهم و باذن الله هلاقى اى حاجه على كارت ميموري الطوارئ اللى عليهم بس اهم حاجه يكونوا اصلا سلام بعد الانفجارات و الحرايق دى كلها
مختار / اتشقلبلى المهم اعرف هو فين
دياب يهز راسه و يمشي
.................
فى الاوضه
نجاه بتصلى و جوزيف قاعد على الارض و ساند راسه على كنبه وراه ورايح فى النوم نجاه تسلم و تقعد تسبح تبص على التلاجه و تبص لجوزيف راسه مايله تتخض و تجرى عليه تهز راسه
نجاه / يونس يونس !!
جوزيف يتفزع نجاه تتعدل و تقعد جنبه و نفسها عالى و مخضوضه
نجاه / ربنا يهديك خضيتني افتكرك جرالك حاجه من الخبطه و الدم اللى نزل ده ... لا حول و لا قوه الا بالله
جوزيف / هو انا نمت !! واو ... دا انا روحت فى النوم كمان ... يمكن عشان انا عارف ان المكان مقفول و هيحتاجوا وقت عشان يخرجونا من هنا
نجاه / انت بتقول ايه ؟!
جوزيف / انا ما بنامش قولتلك قبل كدا حتى لو نمت عيني بتبقي مفتوحه و واعى لدبه النمله ... فاكره ؟؟ مش قولتلك انتى بتنامي زى العيال الصغيره و دا لازم يتغير
نجاه تهز راسها
جوزيف/ انا ما بنامش ... الغدر بيجي فى لحظه و من اقرب الناس
نجاه / تمام انا بس ... انا هسيبك ترتاح نام و لو تحب تفرد ضهرك على الكنبه مفيش مشكله انا هكمل صلاه ... اناولك ميه او اى حاجه تاكلها تعوض الدم
جوزيف / لا مش دلوقت لو عاوزه كلى انتى
نجاه / تمام
نجاه تقوم تروح تقف على السجاده
جوزيف / هو انتى اتخضيتى عليا و لا خفتى تحتاسي بيا و انتى لوحدك و لا فى سبب تالت
نجاه / تكونش روح مثلا
جوزيف / روح !!
نجاه / اه روح ايه مالك مستغرب ليه كدا
جوزيف / مفيش صلى صلى
نجاه تتعدل للقبله
جوزيف / يعني بغض النظر انى روح يعني لو اى حد مكانى يعني هتتخضي نفس الخضه دى كدا
نجاه / مش باين لها صلاه صح
جوزيف / لا يا اختى صلى لاشيل وزرك انا مالى صلى
نجاه تبتسم و تروح تقعد على ركبها قدامه يلم رجليه و يتعدل و يستغربها
نجاه / انت قولت ايه دلوقت ؟
جوزيف / قولت صلى
نجاه / لا قولت وزرك
جوزيف / منعوها و لا ايه
نجاه / لا بس انت قولتها يعني انت فاهم معناها يعني ... مؤمن بيها ان فى حسنات و فى سيئات و فى ربنا بيحاسب و كدا
جوزيف / البنات دول عليهم حاجات غريبه اوى الواحد بيتكلم بحسن نيه فجاه يلاقى فى كتالوج بيشرح الكلمه اللى قالها
نجاه / يعني انت مؤمن و لا لا
جوزيف يسكت
نجاه / تمام
نجاه تربع قدامه و هى مبتسمه يرفع حاجبه باستغراب
نجاه / ممكن اتكلم معاك شويه ؟
جوزيف يبص حواليه
جوزيف / يعني زى ما انتى شايفه انا مشغول جدا و فى ايدى مليون حاجه لازم تخلص و دى مصالح ناس و
نجاه / بس بقي
جوزيف / سكت
الاتنين يبتسموا
نجاه/ تعرف انى كنت جيبالك هديه النهرده
جوزيف/ شوفت ... و شوفتك و انتى بتفتحى الباب دا انتى كنتى سكر
نجاه / انا بتكلم جد
جوزيف / لا عجبتنى بجد جتلك ازاى الفكره دى
نجاه / عاوزه اتكلم جد
جوزيف/ اتفضلى
نجاه / كنت جيبالك مصحف و كتب تفسير و مجموعه كامله لموسم برامج شيوخ انا بحترمهم و بسمع لهم بيردوا على كل الاسئله اللى عندك
جوزيف / و هم عرفوا اللى جوايا منين
نجاه / اللى عندك عند غيرك
جوزيف يهز راسه لا
جوزيف / ما حدش شاف اللى شوفته
نجاه / غيرك شاف اسوء و انت ربنا بيحبك
جوزيف / انا !! طب ما يجر…
نجاه / ما تكملش ... بالله عليك ما تكمل... يونس بالله عليك ما تاخدش الكلام ده بالبساطه دى
جوزيف / يا نجاه الكلام سهل
نجاه / طب انت تسمع عن سيدنا ابراهيم
جوزيف / اكيد و انه كسر الاصنام و حرقوه بالنار بس ما اتحرقش عارف قصته و ابنه اسماعيل لما حلم انه بيدبحه انا عارف كل ده
نجاه / حلو اوى سيدنا إبراهيم اكتشف ان ربنا موجود لوحده ما حدش دله عارف عرف منين
جوزيف / من الشمس و القمر
نجاه / برافو عليك
جوزيف/ هو انا عيل صغير ايه الاسلوب ده ناقص تديني بونبونى
نجاه / معلش خدنى على قد عقلى
جوزيف / عنيا
نجاه / تخيل ان بس من تتابع الشمس و القمر قدر يفهم ان فى ربنا احنا بقي بعد ما بقي عندنا تكنولوجيا و شوفنا اللى ابعد و اكبر بكتير من مجرات و نجوم و طلعوا بنفسهم القمر و درسوا سرعه دوران الارض حوالين نفسها و سرعه دورانها حوالين الشمس و المدارات المحدده لكل كوكب على بعد محدد من التانى تفتكر ان النظام الدقيق ده حصل صدفه كدا فى حاجه فى الدنيا مفيهاش غلطه للدرجه دى جسمك مثلا و اجهزتك
جوزيف / انا حافظ كل الكلام ده على فكره سمعته مليون مره و اقدر اسمعهولك كمان
نجاه / عارفه لأنك ذكى انت بس رافض تشوف
جوزيف / لا شايف
نجاه / شايف ايه
جوزيف / شايف إيمانك و هدوئك و ثباتك مستحيل تكونى مؤمنه بحاجه غلط و تتعرضي لكل الحاجات دى و ما تنهاريش
نجاه تروح تقعد جنبه و تسند ضهرها على الكنبه
نجاه / بنهار و بقعد فى ركن اعيط ... بس ما تقولش لحد دا سر بينا
جوزيف مبتسم و يقفل بقه بالسوسته
نجاه / بس ما بطولش بقول لنفسي هيفيد بايه يعني اشتكيت و شيلت اهلى الهم هيحصل ايه هيغيروا حاجه ... لا ... فبروح للوحيد اللى فى ايده الحل و التغيير و اشتكيله و ادعيله و اترجاه ...على فكره انا بدعيلك اوى
جوزيف / تعرفى منين انها استجابت
نجاه / انك لا تهدى من أحببت و لكن الله يهدى من يشاء
جوزيف / أحببت!!!
نجاه/ ايه يا عم دى ايه فى صوره القصص مش فاكره رقم كام بالظبط بس هى فى الصفحه اللى على الشمال فى نص الصفحه بالظبط
جوزيف / بتهزرى بقي
نجاه / استنى هعدهم
نجاه تسمع فى دماغها جوزيف يقوم يجيب المصحف و يفتح و يدور
نجاه/ ٥٥ لا لا ٥٦
جوزيف / يا بنت اللعيبه عملتيها ازاى دى
نجاه / لا دى حاجه بسيطه كدا ... يا عمى ركز معايا انا كنت بكلمك فى حاجه مهمه
جوزيف / معاكى
نجاه / فى ناس بتقول ان تفسير من يشاء دى انها عايده على ربنا ان اللى ربنا عاوزه يتوب بس هو اللى هيتوب و اللى ربنا مش عاوزه يتوب هيفضل فى الضلال
جوزيف / يعني الانسان
نجاه / بس ليها تفسير تانى بس من دلوقت بقولك انا ما اعرفش مين فيهم التفسير الصحيح للايه لان حكمه ربنا فوق كل شئ انا و انت ما نقدرش نستوعبها مهما كنا عباقره فاهمنى
جوزيف / كملى ايه التفسير التانى
نجاه / ان يشاء دى عايده علي الإنسان هل هو عاوز الهدايه هل بيسعى ليها هل بيفكر فى الكون اللى حواليه على فكره انت سهل اوى تتكلم مع ربنا
جوزيف / ايوه انى اصلى و ادعى قالولى
نجاه / و انا فى المدرسه قالولى انك لو عاوز ربنا يكلمك افتح المصحف و لو عاوز تكلم ربنا صلى بس لما كبرت شويه عرفت ان مش دة الطريقه الوحيده انى اكلم ربنا ربنا ممكن يدينى اشاره علامه يبعتلى حد او موقف او حتى حيوان ... يعني انت عارف قصه قابيل و هابيل
جوزيف / اولاد ادم اللى اخ قتل منهم اخوه و الخروف اللى ربنا تقبله قربان و نزل اندبح مكان سيدنا إسماعيل
نجاه / عارف حكايه الغراب
جوزيف / عارف
نجاه / كلنا اتعلمنا الدفن من غراب مين علم الغراب لا مين بعت الغراب فى الوقت ده بالتحديد عشان قابيل يشوفه و يتعلم يدفن اخوه بنفس الطريقه
جوزيف / معاكى
نجاه / كنت بقولك ان ربنا بيحبك
جوزيف يبتسم
نجاه / انت كان ممكن تموت من زمان اوى بس لسه عايش عارف ليه
جوزيف / نفسي اعرف
نجاه / عشان تتوب عشان يبقى ليك فرصه تعرف الحقيقه و تدور و تتاكد و تؤمن بقلبك قبل عقلك و بيحبك اكتر عارف ليه
جوزيف / ليه
نجاه / عشان حطك فى طريقي انا اصلى لما بحط حاجه فى دماغى ما باستسلمش ابدا يعني هفضل وراك لحد ما اقنعك مع انك بصراحه نشنت و نشانك رشق انا اقل واحده تقدر تتناقش و تتكلم بالعقل فى المواضيع دى
جوزيف / ليه مع انك مؤمنه جدا
نجاه / مش عارفه اصل انا بصراحه عمرى ما جربت اتناقش مع حد فى الحاجات دى يعني انا كل اللى حواليا اللهم بارك اديك شايف احسبهم احسن منى مليون مره بس باذن الله انت هتنافسهم كلهم ... انا متعشمه فيك خير
جوزيف / ليه
نجاه / من غير ليه ... حاسه ... اصل ابوك الله يرحمه كان زيك الفرق اللى بينكوا انه عارف الحلال و الحرام بس بيختار طريقه و يقول بكره ربنا يهديني او تقريبا كان فاقد الامل فى الهدايه مش فاكره بس عمى مختار ما فقدش فيه الامل فضل وراه لحد ما ربنا صلح حاله
جوزيف / و ايه اللى حصل لما ربنا صلح حاله
نجاه / مات
جوزيف / الله اكبر
جوزيف يسقف و يضحك
نجاه / بس بقي بتكلم جد ما كلنا هنموت بس مات موته عظيمه الناس بتترحم عليه لحد دلوقت مش زى ناس تانيه يا ابنى احنا بنعيش عمرنا كله ندعى ربنا بحسن الخاتمه
جوزيف / و انتى شايفه اللى بيني و بينك ممكن يكون زى اللى بين مختار و رشيد
نجاه / لا صعب ... بص فكره ان يكون فى حاجه بينا دى مش ... مبلوعه... اصل مفيش صداقه بين واحد و واحده معروفه ... بس خليني اوعدك بحاجه ... طول ما انت بتحاول و بتسعى انا عمرى ما هفقد فيك الامل
جوزيف / و انا عمرى ما هاذيكى و لو فيها موتى
نجاه تبتسم و تقوم تقف
نجاه / بقولك ايه ما تقوم تتوضي و تجرب تأم بيا
جوزيف يضحك
نجاه / قوم و الله بجد اصل انا ما ينفعش ائم بيك و لو انت ئميت هناخد ثواب الجماعه قوم يا عم .. بص اقرا باللى انت حافظه مش انت حافظ اى حاجه ... امال بتصلى مع الرجاله ازاى ؟
جوزيف / بلاش احسن
نجاه / طب بص لو غلطت هصلحلك عادى حتى لو عيدنا الصلاه مليون مره احنا بنتعلم
جوزيف / انتى جايبه الطاقه دى منين واحده غيرك كانت
نجاه / ما تقوم بقي بطل لكاعه قوم بجد احنا فى عرض حسنه قوم
جوزيف يتنهد و يقوم يروح الحمام يتوضأ و نجاه متابعاه و فرحانه اوى 
………………….
فى الشركه عند منصور
منصور شغال على اللاب و حاطت الموبايل جنبه و فاتح الاسبيكر
منصور / الداتا وصلت اهى هحللها انا و الرجاله هنا و هبلغك باى جديد بس القمر الصناعى هنا مش لاقط اى أجسام حراريه جوه فلو هو تحت الانقاض يبقي تعتبره جثه و تشتغلوا براحتكوا و تنجزوا
دياب / عم مختار عاوز جثته سليمه عشان يكرمه
منصور / يعني هيسيب نجاه فى التربه اللى
دياب/ ملافظك يا تحش
منصور / لا مؤاخذه نجاه اولى يا دياب
دياب / جابر هادى يعني اكيد بخير
منصور / انا مش قادر اصدق ان الكبير طاوعه فى الهبل ده كله
دياب / اقفل و ركز فى اللى فى ايدك و لو عندك اى جديد بلغنى
منصور / تمام
دياب / و ما تفكرش فى اللى حصل فى الطالعه اللى جاى اهم
منصور / مش تلميذ يعني بيحصل عادى
دياب / تمام سلام
منصور يقفل الخط و يطلع بره المكتب
منصور / كل واحد وصل لجهازه لينك عاوزه يسيب اى حاجه فى ايده و يفرز الداتا اللى فيه لحظه بلحظه و يركز على جوزيف الخواجه مفيش بريك و لا مرواح من هنا لحد ما حد فيكوا يطلعهولى
الكل ساكت
منصور / تمام و لا ايه
مهندس / تمام يا باشمهندس
منصور يهز راسه و يدخل تليفونه يرن يروح يرد
منصور / ست الكل .. السلام عليكم
ياسمينا / انت ما جيتش مع شاهين ليه
منصور / طب ردى السلام طيب
ياسمينا / و عليكم السلام بص انا حفظاك ما تقوليش ان دياب هياخد وفاء وقت طالعه و يروح يتفسح و انت تطبق و تطلع من هناك على الشركه الا اذا كان فى حاجه
منصور / هو انتى ما سمعتيش ان الطالعه فكست
ياسمينا / فكست ايه دول عاملين فرح هنا
منصور/ اساسي
ياسمينا / منصور
منصور / قلبي اقسم بالله فى ايدي شغل مستعجل
ياسمينا / تمام هقفل دلوقت ... ابعتلك اكل
منصور / اه و اعملى حساب كل الرجاله اللى هنا
ياسمينا/ شوفت شوفت
منصور / ياسمينا
ياسمينا / حاضر ... استودعتك الله الذى لا تضيع ودائعه
منصور / فى حفظ الله ... سلام
منصور يقفل و يروح يكمل شغل
...................
فى اوضه مغاورى
مغاورى قاعد فى البلكونه و حاطت الموبايل قدامه و عينه عليه سماح داخله الاوضه مبسوطه جدا و شايله صينيه عليها حلويات
سماح / الحمد لله انى لقيتك صاحى كل بقي الحلو ده و هو سخن عارفه انك بتحب الحاجه طازه
مغاورى / تسلم ايدك
سماح / الله ما مديتش ايدك تدوق حتى يعني الاول
مغاورى / مش جعان يا سماح
سماح / مالك يا خويا فيك ايه قافل على نفسك الباب من بدرى دا بدل ما تنزل تحتفل بابنك و تباركله
مغاورى / عمل ايه ابنى عشان كل ده يعني ايه صابت معاه مره هنهيص ما غيره ياما عملوا اجمد من كدا و ما حصلهمش كل الهيصه دى
سماح / دا كلامك يعني
مغاورى / انتى مش عملتى اللى فى دماغك و احتفلتى خلاص بقي يا سماح ما توجعيش قلبي السعادى
سماح / اوجع قلبك ايه يا مغاورى هو فى ايه هو مش ده ابنك الوحيد طب يعمل ايه يعني عشان يحس مره من نفسه انك فخور بيه يعني لما يغلط تنصوبوله المشانق و لما ربنا يكرمه و ينفخ فى صورته كانك يابو زيد ما غزيت هو ده العدل يا كبير
مغاورى / هو انتى فاكره ان ابنك فتح عكه لكل ده
سماح / لا بس انقذ فلوسنا اللى الخواجات كانوا هينصبوا علينا فيها ابنى انا اللى اخد باله من اللى لا منصور و لا رجاله الزنايته خدوا بالهم منه و لولاه كان زمانكوا كلكوا بتغنوا ظلموه دلوقت
مغاورى / كتر خيره سبيني فى حالى بس السعادى الله لا يسيئك عشان انا الهم راكبنى دلوقت و مش فايق لاى كلام بالله عليكي اهدى عنى
سماح / لا مش ههدى عنك و مش هسكت الا اما افهم انت ايه اللى جرالك و ايه الهم اللى راكبك يخليك ما تفرحش حتى لابنك الوحيد بالشكل ده
مغاورى/ احب ما على قلبي يمكن لما تشيلى شيلتى تهدى و تقعدى فى حته ... نجاه يا ستى اتحبست لوحدها فى اوضه تحت الارض و الفيلا وقعت عليها انبسطتى
سماح تتصدم و تقعد على اقرب كرسي
مغاورى / على الله بقي الرجاله تلحق تطلعها قبل ما الاكل و الميه اللى عندها يخلصوا
سماح / و احنا هنقعد حاطين ايدينا على خدنا يا يلحقوا يا ما يلحقوش ؟؟
مغاورى / الجماعه هناك مش مقصرين و مختار واقف على روسهم و احنا برده مش عاوزين الناس تحس ان فى حاجه خصوصا امها
سماح / و هتخبوا عليها لحد امتى
مغاورى/ هنخبى عن الكل سماح عدنك
سماح / اخص عليك يا مغاورى انا برده اطلع سرك بره و على العموم انا كدا كدا مش هتعتع من هنا لحد ما نطمن على البت
مغاورى يهز راسه
سماح / طب مش عاوز تدوق حتى حته صغيره
مغاورى يبصلها باستغراب تقفل بقها بالسوسته و تقعد ساكته يضرب كف على كف و يبص الناحيه التانيه و هو بيتنهد تعوج بقها اول ما يبص تتعدل و تبتسم بحرج
........................
فى اوضه نجاه
نجاه بتلم السجاده و جوزيف قاعد فى الارض و ساند ضهره على الكنبه
نجاه / هو بغض النظر انك طلعت فستك بس تمام اوى حلو انا مبسوطه منك
جوزيف / فستك !! دا انتى تحمدى ربنا انى لسه قادر اقف على رجلى اصلا بعد كل اللى حصل انا ضهرى قاتلني على فكره و للاسف معيش حتى حبايه مسكن واحده
نجاه / سلامتك ... و بعدين كلو بثوابه يعني ... انا عاوزه انام هم طولوا كدا ليه انا بجد بدات ازهق ... و الله لما اطلع لوريك يا جابر على حبستى دى
نجاه تبص حواليها بزهق
جوزيف / احسن اديله ما تسكوتيلوش و انا فى ضهرك ما تقلقيش ... بس على العموم الكنبه اهى افردى ضهرك و نامى عادى يعني
نجاه / لا طبعا ما ينفعش انت موجود
جوزيف / لا يا شيخه انتى لسه واخده بالك انى موجود دلوقت !! طب اعمل ايه يعني ما اكيد مش هحبس نفسي فى الحمام يعني
نجاه / انا ما قولتش كدا و بعدين يا سيدى انت على راسي بس انا بجد بدات اتخنق من الوضع ده هم اتاخروا كدا ليه
جوزيف يقوم يقف و يبص على المكان و يروح يقلب الكنبه يوقفها على ايدها و يلفها و يرجع ينزلها بالراحه تبقي ضهرها ناحيته يزقها فى الحيطه تبقي كانها صندوق مفتوح من فوق و مقفول من الاربع جوانب
جوزيف / اتفضلى اوضه منفصله اهى
..............................