الكبيره ٢ بقلم / لولو_محمد

الحلقه ١٣٤

((((((( الكبيره ٢)))))))
#لولو_محمد
الحلقه ١٣٤

فى شقه جوزيف
الباب يخبط يروح يفتح يلاقي امايا يفتح لها الباب تدخل تمسك ايده و تحط له الاسوره اللى كانت فى ايد حاتم جوزيف يبص لها و يبتسم
امايا / بقيت حنين اوى يا ... يونس ... كنت مستنيه منك رد اقوى من كدا
جوزيف /  و احرمك من المتعه دى
امايا / لا طبعا ما يصحش
جوزيف/ اخبار شاهين ايه
.............................
امايا / تفتكر ؟!
جوزيف/ اتاخرتى اوى بصراحه
امايا / مش هقدر انكر بصراحه كان مفيد و عامل دوره على أكمل وجه بالعكس ... هيوحشنى
جوزيف / و للاسف مش هتقدرى تلاقي له بديل
امايا / شغاله على الموضوع ما تقلقش مسأله وقت مش اكتر
جوزيف / تشربى ابه
امايا / لا مش ناويه أطول... هنزل عشان هروح الشلتر محتاجه شويه ادويه من هناك ... عندى كام كلب بطنهم وجعاهم شويه... اصلهم اكلو  لحمه معفنه
جوزيف / تمام
امايا / كويس انى اطمنت عليك ...باى
امايا تمشي جوزيف يقفل الباب وراها و يروح يتصل بحد
جوزيف / السلام عليكم ... محتاج اشوفك ... مسافه السكه  سلام
........................
فى اوضه نجاه
نجاه و احلام و مهره قاعدين على السرير
نجاه / و ناويه تعملى ايه
احلام/ مش عارفه قاسم شخص جميل اوى و بيعمل كل حاجه عشان يسعدني بس انا كنت خايفه من النقطه دى بالذات و كنت رافضه عشان الحوار ده بالذات انا مش مرتاحه خالص هناك... يا بنتى احنا تقريبا حاجزين اوضه فى فندق بشكل مستمر رايحين جايين عليه دا لولا ياسمينا كنا خدنا يخت و طلعنا البحر بدل الفندق
نجاه / هو انا ليه مش لاقيه شكوى فى كلامك ما تنبسطي يا بنتى و تستمتعي بالفسحه و الفندق و اليخت و البحر ... بصي فتره العسل هتخلص و هيبدأ يروح الشغل روحى معاه و اشتغلى و اشغلى نفسك
احلام / و هى دى تبقي عيشه يعني
نجاه / يعني ان تبقي انتى فى بلد و هو فى بلد دى عيشه و بعدين الراجل زى ما بتقولى ما فيهوش عيب و اهله يعني رخمين شويه ايه يعني ما شوفتيش اى مشاكل مع اى عروسه جديده ما ياما شوفنا ... فتره لحد ما الكل يطبع ببعض و الحواجز تفك و هتلاقي الحياه بقت فله
احلام / بس انا بحس نفسي لوحدى اوى هناك
نجاه / طبيعي انتى ما تعرفيش حد اتعرفى عليهم بالراحه و حاولى تقربى و فى نفس الوقت خليكى جنب جوزك و انبسطى على قد ما تقدرى و اقولك حاجه استغلى برده الموضوع ده ... يعني قوليله مثلا انا هعمل كدا عشان خاطرك و هديهم فرصه بس تعمل حسابك لو ما ارتحتش يبقي على قديمه هتلاقيه بيعمل كل حاجه عشان يريحك
احلام / و انتى فاكره انى اقدر اعمل كدا
نجاه / و ما تقدريش ليه تقدرى طبعا انتى بس ادلعى شويه و بعدين هو انا اللى هعلمك دا انا الدكر اللى فيكوا
احلام / ايه رايك يا مهره
مهره تشاور على نجاه و تعمل بايدها لايك
احلام / اجرب مع انى بصراحه خايفه اوى
نجاه / بقولك ايه تعالى ننزل نطمن على ياسمينا و نلعب بالنونو شويه بدل القاعده دى
احلام / احسن برده
مهره تكتب على الموبايل
مهره / هروح ابص على عمران و بعدين انزل
نجاه / حقك يا عم الحج بس ما تتاخريش علينا مش من لقى احبابه نسي أصحابه هاه
احلام / ما تبقيش رخمه بقي
احلام و نجاه يبصوا لمهره و يضحكوا مهره تنكسف و تسيب الاوضه و تطلع بره
نجاه / يا بت انتى يا بت ... ماشي اتلككى اتلككى ... الله يسهلوا بقي
احلام و نجاه يضحكوا
……………………….
فى ارض على النيل
جابر بيفرج قاسم
جابر / انا بفكر فى حاجه اوت دور كدا جنبها مبنى دورين على الشارع الدور الأول المطبخ و التيك اواى و الدور التانى صاله كبيره مقفوله مكيفه مفروشه على احسن طراز للى بيحبوا الاندور و بالنسبه للاوت دور فاحنا هنعمل بلاى جراوند محترمه هنا للأطفال و الجزء اللى على النيل ده كله ترابيزات و لو تحب ممكن اعمل لك ميكانزم برجولات بيفتح و يقفل بحيث مثلا فى الشتا و المطر تقفل الاوتدور و تستفيد بالمساحه ايه رايك فى الكلام ده
قاسم/ جامد طبعا بس دا كله هياخد وقت قد ايه
جابر / انت بتتكلم فى سكه شهرين تلاته بالكتير
قاسم / بالسرعه دى ؟
جابر / احنا مش بنتكلم فى برج دا مبنى دورين مش حوار يعني الفكره كلها هتبقي فى الفرش و انا حبايبي فى المنطقه دى كتير و مش هيخذلونى ان شاء الله
قاسم / على بركه الله مفيش مشكله تحب نمضي العقود امتى
جابر / عقود ايه
قاسم / عقود الارض
جابر / دى ارض مراتك اتفق انت معاها بقي انا مالى انا قالت لى اوريهالك و اظبط لك الدنيا و انا ما اتاخرتش غير كدا بره عنى
قاسم / بس انا ما بحبش الدنيا تبقي عايمه بصراحه
جابر / حقك بس تانى بقولك دى حاجه بينكوا اقعدوا و خلصوها سوا و اديني رنه و قولى ابدء نفذ و ليك عليا فى يوميها العمال هيكونوا فى الارض بيظبطوا الدنيا
قاسم / تمام يا جابر ... هتكلم مع احلام و ارجع لك
جابر / تمام تحب تروح فى حته و لا نروح ناكل لنا لقمه
قاسم / خلينا نروح احسن
جابر / عيونى
……………………….
فى الشلتر
امايا تدخل المخزن و تقلب فيه و الكاميره متابعها تاخد علبه و تبص للكاميرا و تطلع من جيبها فلوس و تشاور بيها للكاميرا و تحط الفلوس على الترابيزه و تيجي تمشي تلاقي شاكر بيركن العربيه يشوفها يستغرب
امايا / ازيك كويس انى قابلتك
شاكر / خير
امايا / كنت محتاجه الدوا ده و سبت لك تمنه جوا ... انا كدا مش حراميه صح
شاكر يبص لها و يسكت
امايا/ هو صحيح المكان ده هيتقفل
شاكر / لا
امايا / امال فين الكلاب اللى كانت هنا
شاكر / فى الفرع التانى هنا بقي المخزن و المركز الطبي بس
امايا / انت ليه شغال هنا لوحدك... ليه ما فيش دكاتره تانين بيساعدوك و لا عمال و لا اى حد ... مفيش حتى حراسه تحمى الحاجات الحلوه اللى جوه دى
شاكر / فى كل حاجه بس احنا مقسمينها مواعيد و بعدين هنحط حراسه على حاجه احنا عاملينها وقف لله !! مش منطقيه صح
امايا / ولاد الحرام ما خلوش لولاد الحلال حاجه
شاكر / ما كنتيش سبتى تمن علبه الدوا جوه و ما كناش هنعتبرك سرقتيها برده لأنك اكيد محتاجاها لكلابك العيانه مش وخداها مرازيه يعني و لا سرقه ... انا ممكن ابص لك عليهم لو تحبى هاتيهم
امايا / اجيب ايه
شاكر / الكلاب
امايا / انت طيب اوى يا شاكر ... اطيب حتى من ناصر ... اشوفك بعدين
شاكر يتابعها لحد ما تمشي يتنهد و يدخل يشيك على الحاجه كل حاجه فى مكانها يلاقي الفلوس يحطها فى الدرج و يسجل الدوا فى دفتر و يروح يبص على الحيوانات اللى فى الاقفاص
……………………….
فى جنينه الموالح
عباده / و الحكايه دى اخرتها ايه ؟
جوزيف / ما اعرفش انا بس ببلغكوا بالمستجدات... حاتم بقي فى زمه الله خلاص
مختار / ابوه مش هيسكت و احنا مش ناقصين قرف
جوزيف / انا ممكن اتعامل معاه
مختار / بلاش انت خليك لحاجه كبيره
جوزيف/ اوك
عباده / ما قالتلكش حاجه عن شاهين
جوزيف/ هتقول ايه يعني
عباده / اللى خطفوا شاهين كانوا حريم دا كلام صابر
جوزيف / يبقي قدامك احتمال من اتنين يا الاول انه مات و دا الأرجح يا اما فى احتمال ضعيف جدا انه يكون عايش معاها تحت لسبب ما انا شايفه مش منطقى تماما و غالبا رجوعه هيعمل ليكوا مشاكل كبيره اوى فالافضل انه يكون مات
مختار / عادى كدا ... نعتبره مات ؟! لا قبر و لا غسل و لا صلاه حتى 
عباده / الله يكون فى عون ابوه ... بخصوص المستشفي
جوزيف / مالها
عباده / انت قولت قبل كدا ان سيستم المستشفي فى قصور
جوزيف / لا قولت ان سهل نلعب فيه بس السيستم زى الفل اللى شغالين هناك بقي مش زى الفل اعتقد مش هتلاقوا أوضح من كدا ... انا لا بلمح و لا بعمل اى حاجه دياب عامل شغل عظمه اقسم بالله الواد ده انا لو من مكان المجلس  اخلص عليه وقتى ... او اجنده ... بس دياب انا عارفه كويس موته افضل
مختار/ انت بتعجن بتقول ايه
جوزيف / المجلس له شعار واحد لو مش معانا علينا و الموضوع ده بيطبق بشكل اساسي على النبغات يعني كل ما هتتفوق فى مجال و تعمل حاجه ما حصلتش هيتعرض عليك او هيتجس نبضك فى انك تبيع ضميرك لو فى امل منك هتكمل معاهم لو ما فيش يبقي يسيبوك ليه ما دام مش هتفيدهم مجرد انك تفيد غيرهم انت كدا بتضرهم... دياب بقي عداء واضح مش بقي تضارب مصالح مثلا او واحد فى حاله لا ... دياب ده المفروض بلاك ليست وش
عباده/ ما هى كلمته فعلا
جوزيف / شوفت
عباده / و كلمت منصور
جوزيف / يجى منه بس هيحتاج مجهود و ما يتامنلوش بسهوله عشان دياب مش هيسيبه بسهوله فالافضل نبدأ بحد اضعف شويه
عباده / زى مين
جوزيف/ زى اختك مثلا
عباده / عشم ابليس فى الجنه
جوزيف / انا بكلمك بناء على داتا قدامى مش بخمن يعني باختصار هى حاليا و خصوصا بعد اللى حصل هى اضعف حلقه فى السلسله مع العلم انها مش سهله يعني لو امايا قدرت تقنعها باى شكل هتوجعكوا جامد
عباده / انا ماشي
جوزيف / فى حفظ الله
عباده يبص لجوزيف و يمشي
جوزيف / انا كنت بتكلم بجد على فكره ... سماح سهل اوى يعشموها ان ابنها يرجع او تنتقم من اللى كانوا السبب فى موته ... سماح ملفها اسود حرفيا و مغاورى بذل مجهود جبار انه ينضف وراها
مختار / كانوا فاكرين مغاورى حلقه ضعيفه زمان و فاجئهم
جوزيف / اتمنى عشان فعلا لو قدروا يقنعوا سماح هتاذيكوا جامد اوى
.........................
فى شقه قاسم
احلام / نام اخيرا
قاسم / كويس عشان عاوز اتكلم معاكى فى موضوع مهم
احلام / قبل اى حاجه عندى ليك خبر حلو ...او ما اعرفش انت هتفكر فيه ازاى ... بس انا فكرت فى موضوع اسكندريه
قاسم / خير
احلام / انا قررت اديهم فرصه تانيه بس دا عشان خاطرك انت بس
قاسم / صدقيني كلامك ده فرق معايا اوى
احلام/ بس انا عاوزه اطلب منك طلب
قاسم / اؤمرى
احلام/ ما تضغطش عليا و اقف جنبى
قاسم / كل خطوه هتحاولى تقربي بيها من اهلى اوعدك انى هاخد قدها عشر مرات مع اهلك
احلام / طب و انا ؟!
قاسم يقرب فى السرير
قاسم / لا لو على القرب انا أقرب اوى أقرب اوى كمان
قاسم يقرب اكتر احلام تضحك
احلام/ كنت عاوز تكلمني فى موضوع مهم
قاسم / هو فى اهم من كدا
احلام / يا قاسم بقي
قاسم / يووووه... كنت عاوز اتفق معاكى هنعمل ايه فى الارض اللى على النيل اللى ناويين نعمل عليها المطعم
احلام / مالها
قاسم / هنعمل ايه هتبعيها و لا هتاجريها و لا هتعملى ايه
احلام / هشاركك بيها ايه رايك
قاسم / نعم يا قلبي ؟!
احلام / من امتى الزيني فرط فى أرضه يا قاسم و بعدين حتى لو هبيعها عمرى ما هقدر ابيعها ليك انت عارف كويس ان دى حاجه ممكن تعمل مشكله كبيره اوى مع اهلى ارض الزيني ما تطلعش بره
قاسم / تمام حقك طبعا يبقي أجرها و بأعلى سعر على فكره
احلام / تمام ما عنديش مشكله بس ممكن اسالك سؤال ؟
قاسم / اكيد
احلام / انت ليه رفضت انى اشاركك
قاسم / مش بحب حد يدخل فى شغلى ما برتاحش
احلام / و انا يهمنى راحتك بس حتى لو مش هكون شريكتك على الورق يؤسفني اقولك انى شريكتك فى الحقيقه و هنزل معاك الشغل و هتعملى مرتب كمان
قاسم / احلى مرتب و تقعدى فى البيت ايه رايك
احلام / بزهق يا قاسم
قاسم / مش هنصيع على بعض انتى اصلا بيتوتيه و ما بتحبيش الخروج كتير من البيت
احلام / حبيته معاك
قاسم / بصي انا مش ناوى اضغط عليكي بما انك يعني فرحتينى فانا هفرحك ... جربى بس تعملى حسابك ان الاولويه عندى للبيت و مازن
احلام / ما يكونش عندك اى فكره
قاسم / تحبى تقبضي كام بقي و تقبضيهم ازاى
احلام / هسيبها لتقديرك و متاكده انك مش هتظلمنى و لا تظلمني ما انا محفظتك كلها معايا
قاسم /يا ساتر...ما تغلاش عليكي ... هافف عليا اقوم اعملك شويه كوكتيل اروق بيهم على قلبك زى ما روقتى بالى دلوقت
احلام / هاجى اساعدك
قاسم / تساعديني ايه ... دا بدل ما تلبسيلى حاجه كدا و لا كدا الواد نام
احلام / مش هرد عليك
قاسم / ثوانى و راجع لك
قاسم يغمز لها و يطلع بره و يقفل الباب وراه تستغرب و ما تهتمش و تضحك و تقوم تفتح الدولاب
احلام / و دى هنعملها ازاى دى
.......................
فى مضيفه الزنايته
ناصر / انا شايف ان مش هيحصل حاجه لو اجلناه شويه
ياسمينا / ياما دقت على الراس طبول و برده بنتجوز و نفرح عادى و بعدين فى دى بالذات انا مش هقبل بحزن اساسا الواطى ده ما يتزعلش عليه و لا ليه عندى عزا
مختار / عمك مغاورى ما يتزعلش عليه يا ياسو
ياسمينا تسكت
مختار / انا فاهم طبعا و معاكى حق بس الزعل هنا مش على شاهين الزعل على ابوه اللى ما حلتوش غيره و اتصدم فيه ... عمك مغاورى ضهره مكسور جامد اوى دلوقت و مش حمل اى وجع
صمت
مختار/ حتى لو شاهين كلب و يستاهل الدبح ما هو للاسف ابننا ملطوطين بيه برده
ناصر / و احنا مالنا
مختار/ ما حدش كبير على الغلط يا ناصر
عمران / بس فى أخطاء عن اخطاء يابا فى أخطاء بتاذى صاحبها بس و فى أخطاء تانيه بتاذى الناس
مختار / ما فيش خطأ بياذى صاحبه بس صاحبه ده مش له اهل بيحبوه و بيخافوا عليه الناس مش هتتكلم عن أهله انهم ما عرفوش يربوه اهله دول مش هيزعلوا عليه و على تعبهم فى ربايته ... يا ابنى عمك مغاورى دون عن باقي الناس ما اترددش ثانيه يرمى روحه فى النار عشانا بدل المره مليون عمك مغاورى عمره ما اتأخر عننا نحس بيه و بوجعه الراجل عمل كل اللى يقدر عليه عشان يعمل من ابنه الوحيد راجل .. الراجل مكسور ما نكملش عليه و لا ايه رايك يا منصور
منصور / هاه ... معلش كنت سرحان هو احنا بنتكلم فى ايه
ياسمينا / انت كويس ؟
منصور / اه سرحت شويه عادى يعني ... كنا بنتكلم تقريبا عن فرح عمران ... هيبقي امتى ان شاء الله
مختار / هناجله شويه
منصور / تمام ... هروح اعمل قهوه حد يشرب
مختار / انا بقول تنام احسن كدا كدا ناصر اطمن على خالته اهو و هنطلع كلنا نرتاح
منصور / و ليه بس ما انتوا قاعدين و القاعده حلوه
مختار / حلوه بأهلها نتجمع بكره تانى و بعدين كلنا تعبانين يعني
ياسمينا / تمام يا ابيه
مختار يسند عمران و يقوموا ناصر يفتح الباب و يمشوا و منصور يقفل الباب وراهم
ياسمينا / انت كويس
منصور / محتاج انام بس
ياسمينا تهز راسها منصور ينام جنبها سند يعيط منصور يتنهد و يقوم يجيبه من سريره يحطه فى حضنها و يقعد جنبها
.....................
فى فندق فى القاهره
ابو حاتم يدخل يطلع على اوضه يخبط الباب بابلو يفتح له
بابلو / فى معادك بالملى مرحبا
الراجل / قولتلى انك هتساعدنى ارجع ابنى
بابلو/ طبعا انت عارف مكانه و عند مين و عارف ان اللى قدروا ياخدوه من اوضته وسط الحراسات دى كلها اكيد مش سهل ابدا ترجعه من عندهم
الراجل / و كنت رايح اتفاوض معاهم و انت كلمتنى و قولتلى اجيلك و هتساعدنى و رجعت و جيت لك ممكن بقي تنجز و تخش فى الموضوع
بابلو / و جيت لى عشان عارف انك مش هتقدر تقف قصادهم بطولك و ما غلطتش لما جيت على فكره ... بس تعمل حسابك الموضوع ده هيكلفك
الراجل / لو على الفلوس أمرها سهل بس يرجع
بابلو / تمام اقعد بقي و اسمع الخطه عشان دى طريقك الوحيد انك تشوف ابنك تانى
الراجل يقعد
.........................
فى سرايا الجوارحه
دياب يدخل و يطلع على اوضته يقابل سماح
سماح/ يا بجاحتك يا اخى جاى لحد هنا عادى
دياب / دا بيتي و رايح اوضتى
سماح/ لآخر مره بسألك بالزوق يا دياب ابنى فين
دياب / هوصله ما تقلقيش يا مرات خالى اوعدك انى لا ههدى و لا ارتاح الا اما اكمل اللى بداته عن اذنك
سماح / و وعد فوق وعدك انى لا هسكت و لا هسيبك تنام ليله بالك مرتاح فيها يا دياب يا ابن عباس السكرى
دياب / الله يرحمه بقي مات من زماااااان ... يعني الكلام ده ما عادش يستفزني و انا برده مقدر انك ام و قلبك موجوع على ضناكى الوحيد بس مش انا السبب فى اننا نوصل لهنا و لا حتى كان ليا دور فى الموضوع... هو السبب و اكيد حضرتك كان ليكي دور ... هستاذنك ادخل اتشطف و اغير هدومى عشان انا لا منصور و لا وفاء و لا حتى امى ... البيت ده بيتي و الاوضه اللى هناك دى اوضتى ... يعنى هاجى كل يوم اغير و اتشطف و ابات فيها عادى جدا و حتى لما هينقلوا البيت الجديد ... انا برده هفضل اجى و اغير و ابات هنا عادى ... ده بيتي يا مرات خالى
سماح / و ماله دى حاجه تفرحنى كل ما كنت أقرب كل ما كانت أسهل
دياب / كويس يهمنى راحتك برده ... عن اذنك
دياب يسيب سماح و يروح يفتح الاوضه و يقفل الباب بالمفتاح و سماح واقفه متابعاه
.........................
فى الجبل مكان ما شاهين كان مدفون
مغاورى واقف لوحده و الحزن ماليه عباده يدخل بعربيته مغاورى ينتبه و يلم نفسه و يمسح دموعه عباده يركن العربيه و ينزل
عباده / عامل ايه ؟
مغاورى / بقول لنفسي يا ريت صابر ما كان طلعه على الاقل كانت القصه انتهت
عباده / ربنا يصبرك
مغاورى / يا ترى ابنى فعلا خاين و امايا هربته اصل لو عاوزه تقتله ما ضربتوش بالنار هنا ليه ... ليه تاخده ... ليه ما منعتش صابر يخرجه من الحفره و خلاص و كدا كدا مات ليه تاخده لو مش عوزاه عايش ... طب لو عايش ... انا هعمل ايه ... هدور عليه و لا هعتبره مات ... طب لو لقيته هعمل ايه ... هاخده فى حضنى و لا هقتله على اللى عمله ؟!! طب لو ما دورتش و اعتبرته مات ... افرض كان محتاجنى ..  افرض انه فى وضع او ظروف مخلياه محتاجنى ... طب عياله ... اعمل ايه ؟!
عباده/ روح ارتاح
مغاورى / فين ؟ ... فى مسرح الجريمه ... مكان ما كنت نايم على ودانى و كل ده بيحصل حوليا ... انا كنت فخور بيه اوى الفتره اللى فاتت ... كنت طاير بيه و بالتغير اللى حصل له ... كان بقي زى ما طول عمرى بحلم و احسن كمان ... انا عشت عمرى كله بدعيله ... بقول ربنا يهديه ... بقول فى بآلى بكره يعقل و يبقي قد المسؤليه ... كنت فاكر ان ربنا استجاب لى ... عشمنى جامد اوى ... شوفته ... انا كنت فخور بيه بجد ... طلعت حمار
مغاورى يعيط عباده يطبطب على ضهره مغاورى يزق ايده بالراحه و يمسح دموعه و يلم نفسه
مغاورى / انا اللى قصرت كل ده غلطتى انا كل ده ذنبى انا انا اللى ما اهتمتش بتربيته و شديت عليه انا اللى دلعته و قولت وحيد امه ما تكسرش بخاطره و خاطرها لحد ما كسرنى شخصيا ... انا السبب ... انا الغلطان
عباده / مش انت يا مغاورى... مش انت لوحدك ... كلنا اشتركنا معاك فى الغلط
مغاورى / انا ابوه يا عباده ... انا اللى ابوه مش انت
عباده / من امتى فى بينا الفرق ده يا مغاورى من امتى كان فى ابنى و ابنك انا ليا فى شاهين زى ما ليك بالظبط و حزنى عليه ما يقلش عن حزنك
مغاورى / زعلان عليه حتى بعد اللى عمله !!!
عباده/ زعلان يا مغاورى طبعا ... زعلان ان دى كانت آخرته... زعلان اننا ما انتبهناش بدرى نمنعه و نقومه ... مقهور و خايف و حزين ... اقولك ايه ... اى حد ممكن يبقي مكانك دلوقت ... اللى حصل ده كان تقيل اوى ... علينا كلنا ... بس الحمد لله ... الحمد لله ان ربنا كبير و رحيم و غفور ... الحمد لله على كل حاجه ... الحمد لله قدر و لطف
مغاورى / انا عاوز اروح السيرك ... عاوز اتكلم مع امايا
عباده يبص له و يتفاجئ
مغاورى / لازم يا عباده ... لازم
..........................
فى جنينه الزنايته
نجاه واقفه فى الجنينه مع جابر
نجاه / و هيفضل كدا لامتى
جابر / حقه ... اللى مر بيه مش شويه دا كفايا اللى حصل فى المستشفي
نجاه تتنهد
جابر / المشكله ان احنا لازم ناخد بالنا كويس اوى منه الفتره الجايه
نجاه / ما يعملهاش يا جابر منصور مش شاهين
جابر / بس هى مش هتسكت عماله تتنطت من واحد للتاني راحت لدياب و لمنصور و النهرده شاكر
نجاه / شاكر !! هو شاكر عايش معانا اصلا
جابر / على راى اخوكى احنا نقعد و نستنى دورنا
نجاه / فاكر عمى مغاورى زمان لما اشتغل فيرا انه هيبقي فى صفها
جابر / و ما عرفش يعمل حاجه و ابو المحروس هو اللى جاب الناهيه
نجاه / الله يرحمه و لعلمك انا لما بيجيب فى سيرتك ما بسكتلوش فمن فضلك احترم غيبته من نفسك عشان هضطر اردها
جابر / ما اعتقدش انه يقدر يغيب كتير
نجاه تنتبه تلاقي جابر بيبص وراها و الغفر بيفتحوا البوابه لجوزيف يدخل نجاه تستغرب
جوزيف / ايه اللى مسهرك لدلوقت
نجاه / على اساس انك شايفني فى حلمك مثلا ما انت صاحى انت كمان
جابر / خير ايه اللى جابك السعادى
جوزيف / جاى لمختار اتصل بيا قالى مش عارف انام تعال عاوزك ... هو فين ؟
مختار يطلع من السرايا
جوزيف / هناك اهو ... عن اذنكوا
جوزيف يروح ناحيه مختار
نجاه / انا هروح اشوف عاوزه فى ايه
جابر / ايه الفضول ده عيب كدا
نجاه / لا مش عيب هو اصلا جايبه البيت
جابر / نجاه.. نجاه
نجاه تسيب جابر و تجرى وراهم تلاقيهم قفلوا عليهم المكتب تخبط و تدخل مختار يبص لها باستغراب و جوزيف يبتسم
نجاه / هو فى ايه ؟
مختار / مفيش حاجه ... ينفع تعملى لنا شاى
نجاه / ينفع
نجاه ترزع الباب و تمشي
جوزيف / عنيفه اوى
مختار / اقعد سمعنى اللى عندك
جوزيف/ انتوا غاويين تمشورونى ما انا قولت اللى عندى 
مختار / ما انت ما قولتش حاجه ... يا ابنى انا محتاج اى طريق امشي وراه ... المستشفي دى اهم نقطه عندنا
جوزيف/ انت ليه مش قادر تصدق ان الموضوع موضوع أفراد... ما دام فى رجاله كتير هيبقي فى اكيد بينهم واحد أو اتنين على الاقل مستعدين يبيعوا او على الاقل ممسوك عليهم حاجه
مختار / فضلت ساكت لحد ما ياسمينا كانت هتضيع ما حدش عارف مين اللى هيدفع تمن سكوتك
جوزيف / انت ليه مش مصدق ان اى حد هفضحولك هيموت و ان اكيد فى غيره انا ما اعرفوش ... صدقنى ان اديك المعلومات دى بضرنى انا بس مش بضرهم فى حاجه انا بحتاج الناس دى
مختار / فى ايه ؟
جوزيف / بحتاجهم … و ما تضغطش عليا عشان هقول حاجات انت مش عاوز تعرفها
مختار / حاجات وحشه
جوزيف / بالنسبالى لا ... ما اعرفش بالنسبالك بقي ... بص ... انت محتاج تعمل مكان تانى او مستشفي تانى يكون جوه البيت هنا مثلا للطوارئ و خلو المستشفي لعامه الشعب
مختار / بتهزر صح
جوزيف / اصلك مش هتقدر تضمن ولاء كل الناس... مختار شاهين كان أبن كبير الجوارحه و جندوه انت جايب الثقه منين انهم مش هيجندوا غيره فمتقفش بقي على كام ممرض و لا عامل نظافه و لا حتى دكتور من اهل البلد ... نص اهل البلد الأصليين باعوا أراضيهم للمجلس و سافروا و النص التانى اللى جه مكانهم نصهم تبع المجلس اصلا فأنت مش هتقدر تخلص من كل دول
مختار/ طب و اخرتها
جوزيف / غير طريقه اللعب شغل زمان ما عادش ينفع انتوا مش نفس العيله الواحده اللى قلبها على قلب بعض
مختار / مش حقيقي و اتحداك ... شوف احنا كام فرد بقالنا كام سنه قلبنا على قلوب بعض مش معنى أن فى وأحد واحد من وسط الوف طلع نبت فاسد تبقي المنظومه فاسده
الباب يخبط و نجاه تفتح و تدخل شايله صينيه عليها ٣ كبايات شاى مختار يضحك و يكتمها
نجاه / الشاى
جوزيف / تسلم ايدك
مختار / و الله ما بنتكلم فى حاجه تخصك حطى الشاى و روحى شوفى وراكى ايه قبل ما ابوكى يرجع
نجاه / الله !! يعني القاعده دى كمان طلعت من ورا ابويا
نجاه تدخل تحط الصينيه
مختار / نجاه
جوزيف / كنا بنتكلم فهل ... ركزى معايا ... هل ... هل العيله زى زمان قلوبها على قلب بعض و لا فى احتمال كبير يكون فيها اكتر من شاهين
الابتسامه تروح من وش نجاه
نجاه / قلوبنا على قلوب بعض طبعا
جوزيف / يعني مستحيل امايا تقدر تعوض شاهين و تجند غيره ؟
نجاه / كل إنسان ممكن يضعف او يغلط بس دا مش معناه ان السيئه لازم تعم ... شاهين مشكلته ما كانتش انه خان لو كان جه و اعترف و اتحمل نتيجه غلطته و حاول يصلحها كان صلحها و كنا سامحناه بس هو دخل فى حته ما فيهاش رجوع ... الشرف ما فيهوش رجوع
جوزيف / بتقولى انى لو اتسببت فى موت او أصابه اى حد فيكوا اهون من انى أقرب من منطقه الشرف ؟!
نجاه تبص لمختار و ما تعرفش ترد
جوزيف / هنلعب لعبه سرعه ... بعد اذنك يا مختار ... جاوبي بسرعه و من غير تفكير
مختار ياخد كبايه الشاى و يسند على المكتب
جوزيف/ راجل
نجاه / ابويا
جوزيف / بنت
نجاه / مهره
جوزيف / كبير الجوارحه
نجاه/ خالى
جوزيف / بعديه
نجاه / دياب
جوزيف / كبير الزنايته بعد ابوكى
نجاه / جابر
جوزيف/ احسن منك ؟
نجاه / انا بنت
جوزيف / مصلحه البلد تبقي فى ايد حد ما يستحقهاش لمجرد انك بنت ؟
مختار / انت بتحاول توصل لايه
نجاه / جابر مش قليل و هيعرف يصون الأمانه و مش هيكون لوحده احنا كلنا معاه جابر حنين على الناس و بيخاف عليهم و فاهم مشاكلهم جابر ما بيرتاحش و لا عمره فشل فى اى حاجه حط دماغه فيها
جوزيف / جابر فشل يحميكي و كان هيتسبب فى موتك اكتر من مره
نجاه / انا اللى فى كل مره بخرج عن البروتوكول و اتعبهم معايا انا السبب فى إصابتك انت و هو انا السبب فى خطفى المرتين سواء فى تركيا أو مصر ... جابر مستعد يضحى بعمره عشان اكون بخير جابر لا عمره قصر و لا تقدر تتهمه بالفشل و اى موقف وحش اتحط فيه دايما كان بسببي
جوزيف / يعني جابر انسب منك يبقي الكبير
نجاه / ايوه
جوزيف يبص لمختار
نجاه / انا تعبت اكتر من اى حد ... حصل ... بس ما اقدرش انكر ان جابر تعب و ما اقدرش انكر دوره فى حياتى دا لو حتى كان بتشجيعه فرقت... إيمانهم بيا و وقوفهم جنبى انا تعبت اكتر عشان انا بنت لا عندى نفس الكتله العضليه و لا القوه فطبيعي اتعب جدا عشان بس أفضل فى المنافسه
جوزيف / بس تتفوقى عليهم بان عندك ذكاء و اصرار و شخصيه مش عند حد
نجاه / فيا عيوب مش فيهم برده ... عاطفيه اكتر مثلا
جوزيف / مين افضل يبقي الكبير لو ما فيش مجلس مشترك بين الزنايته و الجوارحه دياب و لا جابر
نجاه / جابر
جوزيف / بس دياب اقوى من جابر فى حاجات كتير و جاهز اكتر
نجاه / دياب بيفكر بعقله بس جابر عنده قلب
جوزيف / يعني جابر عاطفى ... نفس العيب اللى فيكي يعني انتى احسن من جابر و تستاهلى تكونى الكبيره
نجاه تسكت ثوانى و بعدين تجاوب جوزيف يقاطعها
نجاه / بس جابر
جوزيف / تؤتؤتؤ ... فكرتى
نجاه / انا برده مش فاهمه ايه علاقه كل ده بموضوعنا
جوزيف / ما لوش علاقه انا قولت لمختار كل اللى عندى انا بس بحب اتكلم معاكى و افتح مواضيع مش اكتر
نجاه تبص على مختار باصص لجوزيف اللى بيمد ايمده ياخد كبايه الشاى مختار يحط كبايته
جوزيف / بس ده نفس المنطق اللى لو حاولوا يجندوكى هيدخلولك منه بس ما حدش هيحاول لأنك ما عندكيش نقطه ضعف واحده يدخلولك منها حتى الهدف الوحيد اللى فى حياتك متقبله انك تتظلمى عادى و يروح لحد تانى اقل ما يستحقهاش
نجاه / جابر مش
جوزيف / المشكله مش هنا المشكله ان انتى نقطه ضعف ليهم كلهم يا نجاه و دا اللى مخليكى هدف
نجاه / ما هم كلهم نقطه ضعفى يا يونس و برده نقطه قوتى و برده نقطه ليهم عليا انا لو جرا لحد فيهم حاجه انا ممكن اتشل زى الاسطبل كدا لما شوفت عمران بينصاب هم هيكون رد فعلهم اهدى
مختار / ما شوفتيش جابر لما بيجرالك حاجه... ابوكى ... انا ... اهدى ايه اسكتى بالله عليكي انتى ما تعرفيش حاجه... بس فى حاجه يا يونس و المفروض انك شوفتها بعنيك ... لو احنا بينا و بين بعض مصانع الحداد و جيت جنب حرمه تخصنا هتلاقينا كلنا على قلب راجل واحد ضدك يعني لو المجلس او غيره حاول ياذى نجاه ... فالحقيقه هيبقي عمل فينا و فى البلد دى اكبر جميل ممكن تتخيله ... لانه هيخلى البلد كلها على قلب راجل واحد بهدف واحد هو يا ينقذوها يا ياخدوا تارها غير كدا ناكل فى بعض عادى
جوزيف / دا لو المشكله فى حرمه واحده ... يعني مثلا لو هتضطر تختار بين نجاه و هند مثلا او بين نجاه و فاتن او بين هند و فاتن هتبقي هى هياها ... بص انا شايف ان الكلام فى الموضوع ده فرضيات ما لهاش لازمه و لسه عند رايي السيستم عندك ما فيهوش مشاكل المشكله فى الأفراد محتاج تشتغل على الموضوع ده كتير
مختار/ تمام
جوزيف / هو انتى استخدمتى المكوه اللى جبتهالك
نجاه تتفاجئ
نجاه / ايوه جربتها ... ليه ؟
جوزيف / و لقيتي انهى الاحلى الليس و لا موج البحر
نجاه تبص لجوزيف باستغراب يبتسم
مختار/ قوم روح يا حبيبي قوم يا بابا
جوزيف / ماشي يا عم ماشي دا انت غريب جدا ... سلام
جوزيف يمشي و نجاه باصه فى الارض بتفكر
...........................