((((((( الكبيره ٢ )))))))
#لولو_محمد
الحلقه ٧٠
جوزيف يركن و ينزل و الموبايل فى ايده و يعدى الناحيه التانيه يفتح باب نجاه
جوزيف / مش قولتلك لو وقفتى فى طريقي مش هسمى عليكي و لا ما قولتش
امايا / اتاخرت يا بيبي انا اخدت اللى انا عوزاه خلاص
جوزيف / بس ما عملتيش حساب زعلى
جوزيف يلف الكاميره على نجاه و يطلع المسدس و يضربها بالنار تقع فى الارض و هى بتصرخ امايا تصرخ
امايا / نجاه نجاه لو جرالها حاجه هقتلك فاهم هقتلك ... نجاه ردة عليا نجاه
جوزيف يركب العربيه و يمشي
امايا / انت رايح فين انت هتسيبها جو نجاه لا يا جو نجاه لا
جوزيف / اشبعى باللى عندك بقي
امايا / لو جرالها حاجه عمرى ما هسامحك هقتلك بايدى فاهم و لا لا
جوزيف / انهى الفيلم ده و انا ارجع لها انهيه حالا
امايا / ماشي انتهى ... بس لعلمك هنتقابل و قريب اوى كمان ... و اللى حصل ده هتدفع تمنه غالى اوى
جوزيف يقفل الخط و يرجع مارشدير يلاقى عربيه مختار وصلت لنجاه
...............................
مختار / انت مجنون انت عاوز تجنني و لا انت ايه حكايتك بالظبط
جوزيف / انتى تمام
نجاه / انت سبتني لوحدى و جريت
جوزيف/ ايه ثوانى جرالك ايه يعني انشفي كدا ... اتصل اطمن شوف ايه اللى حصل ... بتبصلى كدا ليه
كارم / المفروض ابص لواحد خطف اختى ازاى
جوزيف / اتصل بصابر شوف سابت الولد و لا لا
تليفون مختار يرن
جوزيف / تمام
مختار يرد
مختار / السلام عليكم طمنى ... ايه !!!!
الكل يبص لمختار بصدمه
.......................
فى المستشفي
جابر واقف على باب اوضه عمليات دياب يدخل بيجرى
دياب / طمنى ايه اللى حصل
جابر / فى العمليات من ساعتها الطلقه دخلت استقرت جوه و ان شاء الله ما فيش حاجه وحشه هتحصل
دياب / انا مش قادر اصدق ان ده حصل ازاى سبتهم يطلعوا لوحدهم انا قولتلهم ان ده فخ انا قولت ان
جابر / صابر ما كانش بيسمع لحد و شاكر كان زى ضله لا ده بيفكر و لا ده بيفكر و انا كنت بلف المنطقه وقتها لما قالوا انهم دخلوا فجاه صابر قالهم يطلعوا من السلم التانى و لقوه مسدود بكراكيب كتير جدا فى الدور التانى ما عرفتش يكملوا طلوع فعلى ما لفوا و حصلوه كانوا اتقفل عليهم و لما وصلت لقيت الوضع كدا ما عرفتش اعمل اى حاجه اول ما الباب اتفتح نقلناهم على هنا
دياب / انا هتجنن بقي حته عيله زى دى تعمل كل ده
جابر / ما تضحكش على نفسك هى بتنفذ خطه التعبان اللى حاوينه وسطينا ... طول الفتره اللى فاتت كان بيحوم حوالين صابر و لمح ان هو الهدف الجديد
دياب / و هو ايه علاقه يونس بمشاكل عيله الجزار و تصرفاتهم الغريبه
جابر / ام عبد الهادى تعيش انت
دياب / قالولى ان حالتها مستقره و مستنين
جابر / مستنين يقتلوها ... حالتها مستقره منعوا عنها الزياره ليه ... دورها خلص خلصوا عليها قبل ما تفضحهم
دياب / الكلام ده كبير
جابر / طول عمرى ما برتاحش لمحمود الجزار و انت عارف
دياب / مش سالك و كلنا عارفينه بس رعد هو اللى فتح الدوامه اللى احنا فيها دى يا جابر رعد مش محمود
جابر / يا سيدي اصطاد فى المايه العكره لسه قافل مع امين قالى انهم كانوا بيحاولوا يضغطوا على نسمه تتجوز محمود
دياب/ طبيعي ما ابوها اللى هو ابوها كان بيضغط عليها تتجوز ابن عمها ما حدش هيسيب ارض الجزار تروح من ايديهم دة تسوى شئ و شويات
جابر / ربط الأحداث بمخك بقي
دياب / يا سيدي مربطها و عشان كدا بقولك يونس بره الحكايه دى ... هى كلها صدفه
جابر / مكان زى ده ما بيجهزش صدفه يا جابر تكنولوجيا زى دى مش بتلاقيها فى كل بيت هم نزلوا المحطه دى بالتحديد لسبب
دياب / معاك حق
جابر / و السبب ده عند ام محمود ... اللى خرجت تصرخ فى الشارع اختى اختى و اختها زى الفل و ما راحتلهاش اصلا
دياب / هحاول اوصل للتحقيقات و اشوف قالت ايه مع انى متاكد انى مش هتوصل لحاجه
جابر يهز راسه
.........................
فى اوضه امايا
بابلو يدخل
بابلو / ايه قله الزوق دى ينفع اللى بتعمله صحباتك معايا ده كل ده عشان ادخل لك
امايا / عاوز ايه يا بابلو
بابلو / لعبها حلو و خالت عليكي حافظك و حافظ نقطه ضعفك
امايا / و انا كمان حفظاه و عارفه نقط ضعفه
بابلو / هم كتير اوى كدا
امايا / انت بتبص لأكبر واحده فيهم
بابلو / و ناويه تستغلى ده ازاى
امايا / انت ناسي انك فى الفريق المنافس و لا ايه
بابلو / انا طول عمرى معاكى انتى اللى طول عمرك بايعه اللى شاريكى و شاريه اللى بايعك
امايا / كان نفسي أطول معاك فى الكلام اكتر من كدا بس للاسف ورايا سفر زى ما انت عارف
بابلو / و ماله يا قلبى تروحى و ترجعى بالسلامه
امايا تسيب المكان و تمشي و بابلو بيبص عليها باستهزاء
........................
فى الجبل
كارم قاعد فى ركن جوزيف يروح يقعد جنبه كارم يبص له و يبص قدامه
جوزيف / ما كنتش هاذيها بعمرى يا كارم
كارم / كان ممكن تقول لينا هتعمل ايه بدل ما تحرجنا بالشكل ده قصاد الرجاله دى كلها ... انت فاكرنا فى الساحل ؟! احنا فى الصعيد ... فى الجبل الرجاله دى انشف من الصخر اللى تحت رجلك ما يفهموش الكلام
جوزيف / ما كانش فى وقت اشرح انا كنت بحاول احل موقف كنت بحاول اساعد
كارم / بكره الناس كلها مش هيبقى ليها غير سيره واحده الخواجه خطف بنت الكبير من وسط الرجاله و سحبها على الصحرا فى الخلا
جوزيف / الموضوع كله دقيقتين هلحق اعمل ايه فى دقيقتين يعني دا انا لو ... استغفر الله العظيم ما تستفزنيش عشان بترجعوا تزعلوا لما بتكلم
كارم / انت ليك نفس تهزر
جوزيف / اختك عندك ما فيهاش خربوش
كارم / انت بتلعب بالكل
جوزيف / حتى انت !!
كارم / ما بتاخدش حاجه جد و لا بتفكر فى العواقب
جوزيف / كلام الناس مش اهم من حياه ابن عمك ... انتوا اللى ملخبطين اولوياتكوا ... الناس هتتكلم ... الناس كدا كدا بتتكلم
كارم / الغريب اعمى و لو كان بصير
جوزيف / تمام
جوزيف يقوم و يركب عربيه كارم يقوم و ينادى
كارم / رايح فين ؟؟
جوزيف / هروح اطمن على ابن عمك
كارم يهز راسه و يقعد مكانه تانى و جوزيف يمشي
.......................
فى جنينه الزنايته
نسمه / ابوس ايدك خليني اروح اشوفه و اطمن عليه
امين / يا ام بدر وحدى الله و خليكي مع ابنك جوه لحد ما الدنيا تروق ما صدقنا
نسمه / هيروحوا ياخدوه انا عارفه مش هيسكتوا و هياخدوه
امين / ما حدش هيستجرى يهوب من الواد هيرجع بس نطمن على الجماعه و يرجعوا كلهم سوا اى حد هيركب الطريق بطوله دلوقت يبقي بينتحر ما حدش عارف ايه اللى مستنينا بره
نسمه / انا راضيه خلى بدر معاكوا و
امين / و مين هيربى بدر و فايز لو جرالك حاجه ما هم هياخدوهم ... ما تسيبيهولهم بقي بكيفك احسن و توفرى على روحك كل ده
نسمه تبصله بحزن
امين / يا ام بدر انتى زى اختى بالظبط و يمين بالله بكلمك من قلبي انا خايف عليكي و ضناكى فى عنينا و بخير الحمد لله و فتحولك الكاميره و شوفتيه بنفسك و سمعتى حسه فاضل ايه بس تاخديه فى حضنك هانت الصبر
نسمه تهز راسها و تدخل المضيفه تفضل تروح و تيجي مهره تدخل
مهره / اسفه على التطفل انا مهره
نسمه / العروسه ؟!
مهره / عروسه !!
نسمه / لا مؤاخذه اصلي اول مره اشوفك يعني و انا تقريبا عارفه اللى فى السرايا كلهم فقولت يمكن انتى واحده من العروستين الجداد بس شكلك كدا عروسه عمران صح ؟!
مهره / انا كنت واقفه فى البلكونه شوفتك متوتره و رايحه جايه بتعيطى قولت يمكن محتاجه حاجه اقدر اساعدك بيها
نسمه / تسلمى يا غاليه بس ما اعتقدش بايدك اى حاجه تقدرى تساعديني بيها بس تسلمى على سؤالك
مهره / تمام ... اسيبك ترتاحي
نسمه / هو الفرح بكره هيتم فى معاده ؟!
مهره / و الله ما اعرف اى حاجه انا هنا زيي زيك
نسمه/ تمام تسلمى
مهره / اسفه لو كنت ازعجتك
نسمه / بالعكس سعيده انى اتعرفت عليكي
مهره تبتسم و تطلع بره تقابل احلام
احلام / الله انتى بتعملى ايه هنا ناقصك حاجه ؟ محتاجه حاجه ؟
مهره / هو الفرح بكره هيتعمل فى معاده ؟
احلام / بيتهيألي الحمد لله لقوا الواد المخطوف و هيرجعوا على طول بإذن الله
مهره / امال طنط هند فين و ليه البنت دى كانت بتعيط فى الجنينه اوى كدا
احلام / ام يا مهره مستنيه منها ايه غير كدا ... ما تقلقيش اول ما ربنا يكرم و ابنها يرجع فى حضنها هتبقي زى الفل
مهره تهز راسها بحزن
مهره/ معاكى حق ... مفيش اغلى من الضنا ... هى نجاه فين ؟
احلام / هتكون فين يعنى فى وقت زى ده ... اقولك ايه بس ربنا يهديها
مهره / مش فاهمه
احلام / بصي احنا سلونا من يوم ما ربنا خلقنا الحريم تقعد فى الدار و الرجاله يجروا على اكل العيش و يدافعوا عن البلد ما تعرفيش مين يا اختى اللى لعب للبت دى فى اعدادات نفوخها من يومها حاشره روحها وسط الرجاله و غاويه شيل السلاح و ضرب النار
مهره / انا برده مش فاهمه
احلام / يعني بعد كل اللى عشتيها فى تركيا مش فاهمه
مهره / يعني هى بخير ؟
احلام / الحمد لله
مهره / طب انا ليه حاسه ان الكل متوتر ما دام نجاه زى الفل و الواد لقيوه و راجعين ليه الكل متوتر كدا
احلام / ما تشغليش بالك انتى احنا شعب اوفر
مهره / امال انتى كنتى رايحه فين كدا
احلام / هبص على المضيفه ليكون نسمه ناقصها حاجه عيب
مهره تهز راسها احلام تبتسم و تطبطب على دراعها و تسيبها و تمشي مهره تدخل السرايا مفيش اى حد تطلع فوق تروح على اوضه هند تلاقيها بتسجد و بتعيط و هى ساجده تقف تبص عليها
................................
فى المستشفي
الدكتور يطلع من العمليات جابر و مختار و دياب واقفين مستنين و جوزيف واقف فى جنب لوحده ينتبه
مختار / ارجوك يا دكتور طمنى
الدكتور / احنا عملنا اللى علينا و خرجنا الرصاصه بس الحاله هتفضل تحت الملاحظة على الاقل الاربعه و عشرين ساعه الجايين و باذن الله يعدى مرحله الخطر فى اسرع وقت
مختار / لو محتاج يسافر بره انا مستعد اى مبلغ الفلوس مش مهمه المهم يقوم بالسلامه
الدكتور / ما اعتقدش هيعملوا اكتر من اللى عملناه ... عن اذنكوا
مختار يهز راسه و يوسع للدكتور
جابر/ باذن الله هيبقي كويس يا جماعه ايه مالكوا اهدوا خير بإذن الله
مختار يهز راسه و يروح يقعد فى صمت جوزيف يروح يقعد جنبه
جوزيف / هو الموضوع خطير و لا ايه ؟!
مختار / ما عندوش اللى يتمسك بالدنيا عشانه
جوزيف / هو بمزاجه مش فى حاجه اسمها قدر و اجل و الكلام ده ؟!
مختار يهز راسه
جوزيف / امال بتقول كدا ليه ؟
مختار / ما تاخدش فى بالك انا شكلى كبرت و خرفت
جوزيف / انت مرهق و الحمل زاد عليك بس صدقنى كان ممكن تكون اسوء ... الحمد لله
مختار / انت ايه اللى جابك
جوزيف / انا عملت اللى قدرت عليه ما كانش فى وقت و الفكره جت فى دماغى نفذتها و جابت نتيجه يا عالم لو ما كنتش عملت كدا كان ايه اللى حصل
مختار / عارف
جوزيف / اجيب لك حاجه تشربها او تأكلها؟!
مختار يهز راسه لا
مختار / خد جابر و ارجعوا الجبل و خلى كارم يروح اخته ترتاح عندنا فرح بكره
جوزيف / ما تهرجش يا مختار انت عارف كويس ان كل ده حصل عشان
مختار / الفرح هيتعمل فى معاده بالعند فيها هى و اللى يتشددلها و باذن الله من دلوقت لحد معاد الفرح هنكون رجعنا و على وشنا البشاره
جوزيف / انت بتتكلم جد !!
مختار يبص لجوزيف و يهز راسه
جوزيف / تمام اللى تشوفه
جوزيف يقوم يروح لجابر جابر يبص لمختار مختار يهز راسه جابر يبص لجوزيف و يتنهد و يمشي معاه
.......................
فى الجبل
كارم قاعد لوحده و مضايق نجاه تروح تحط بطانيه على كتفه و تقعد جنبه
نجاه / الجو برد اوى و انت قاعد هنا من بدرى خفت تعيا
كارم يفتح دراعه نجاه تقعد جنبه يغطيها معاه و يبص قدامه
نجاه / قاعد لوحدك ليه
كارم / فارس كان معاه حق
نجاه/ فى ايه
كارم / الجدع ده مش سهل و انا مسلمله رقبتى
نجاه / يونس
كارم / زفت
صمت
كارم / ما كانش المفروض اقف اتفرج و استنى عمى مختار ياخد قرار كان المفروض اكون اسرع من كدا اول ما شدك كنت أدخلت و ضربته
نجاه/ بس هو حل المشكله
كارم / بمشكله اكبر منها يا نجاه كل الرجاله دى شافت اللى حصل
نجاه / ما هم كمان عرفوا اللى حصل بعدها و عرفوا حصل ليه و بعدين كل الرجاله دى رجالتنا اصلا يا كارم يعني ما حدش فيهم هيقول غير اللى حصل بجد دا لو اتكلموا اصلا
كارم / معظم الرجاله دى مطاريد جبل
نجاه / الكلام ده كان زمان ايام جدى و جدك انما من ساعه ما حطينا ايدنا فى ايد وهدان القط الله يرحمه و ابنه و الجبل حاجه تانيه
كارم / اه حاجه تانيه و له قوانين و كل حاجه بس نصهم مطاريد جايين هنا لسبب ... و السبب ده مش شغل و لا فلوس ... دا عشان البلد مش امان بالنسبالهم
نجاه / طب هو اللى انت بتعمله دلوقت ده هيغير حاجه فى اللى حصل ما الحمد لله قدر و لطف و قضا اخف من قضا كان ممكن تكون اسوء ... مفيش اخبار عنهم صحيح
كارم / اللى اعرفه انهم فى المستشفي بيطمنوا على الواد
نجاه / كل ده بيطمنوا على فايز ليه هو كان فيه ايه اصلا
كارم / ما اعرفش اللى اعرفه قولته
نجاه / اجيب لك حاجه تأكلها او تشربها
كارم / لا تسلمى مش عاوز حاجه
نجاه / طب بالله عليك فكها بقي انا مش قادره اشوفك كدا ... طب تصدق بقي انت عشان خاطر ضيقتك دى انا اول ما اشوف اللى اسمه يونس ده هرقعه علقه تنسيه اسمه
كارم يبص لها
كارم / انتى لسه لابسه الهبابه بتاعته دى
نجاه / هقلعها فين يعني يا كارم اه متنيله بيها على فكره هتسلخنى و تطلع عيني شهر قدام لما اجى اقلعها انت مش متخيل طابقه على مراوحى ازاى
كارم / طب لو كنتى قلعتيها مش كان زمان الرصاصه دى
نجاه / يا كارم موقف و عدى و انا ما كنتش قلعتها و هو ما فكرش و اتصرف باللى جه فى باله عشان ينقذ الموقف و الموقف الحمد لله اتحل عمال تجيب و تودى و يمكن و ما يمكنش ليه
كارم / عشان انتى اختى يا نجاه عشان لو جرالك حاجه انا مش هقدر اعيش
نجاه / يا حبيبي و انا جنبك اهو زى الفل
كارم يهز راسه نجاه تحضنه
نجاه / طب و الله بحبك اكتر من روحى
كارم / انتى بتحبى الدنيا كلها اكتر من روحك يا نجاه
نجاه / لا انا بحبك اكتر منهم
كارم يبتسم و ياخدها فى حضنه و يبوس راسها تبصله و تبتسم
نجاه / اتصل بيهم شوف الدنيا رسيت على ايه هيجوا امتى انا عاوزه انام
كارم / خشي نامى
نجاه / فين يا كارم ؟! ما ينفعش طبعا
كارم / طب تعالى و انا هقعد جنبك
نجاه / يا ابنى مش هينفع و الله
كارم / لا هينفع هينفع قومى بس تعالى
كارم يقوم و يقوم نجاه ينضرب عليهم صاروخ ار بى جاى ينطرهم و الرجاله تقوم تجرى تمسك سلاحها و تولع كشافات عملاقه و النار تتفتح عليهم يفتحوا النار و الكل ياخد ساتر
....................
فى شقه نور
ام نور / هو الاكل ده ما لوش اهل يسالوا عليه أعين فين كل ده و مستحرمه يبوظ و يترمى اعمل ايه
نور / ما هم صعايده بقي يا ماما و أهل كرم
ام نور / ايوه بس دا كتير اوى و مبعوت لكل شقه قده مع ان صينيه واحده من دول تأكل البيت كله مش ممكن
نور / يا ست الكل الشقه مليانه علب تلاجه و التلاجه كبيره نعينه عادى
ام نور / و هى يا اختى التلاجه فاضيه ما هم مالينها من خيرات الله اشي فاكهه و اشي حلويات من كل شكل و لون
نور / عشان تعرفى قد ايه ناصر غالى عندهم
ام نور/ يا بنتى ما اتكلمتش انا بتكلم فى الاكل ده اعمل فيه ايه
نور / طب ما تلفيه و تخلى بابا ينزله للرجاله اللى قاعده قدام البيت
ام نور / و الله يا بنتى فكره مش وحشه روحى نادى لابوكى على ما أعبى الاكل
نور / حاضر
نور تطلع بره تلاقي ابوها قاعد قدام التليفزيون و قدامه طبق مكسرات كبير بياذاذ فيه
نور / ماما بتقول لحضرتك تلبس عشان تاخد الاكل اللى جوه تنزله للرجاله ياكلوه بدل ما يبوظ
عبد العزيز / ما انا لابس هو انا قاعد عريان
نور / يا بابا يا حبيبي الرجاله دول فى الشارع هتنزل بالبجامه كدا
عبد العزيز / هى بجامه كاستور دى الإمبراطور
نور تضحك
عبد العزيز / و بعدين هم يعنى لابسين اسبور دول لابسين عمم و جلاليب ما تعمليش تكليف كدا و خلى البساط أحمدي
نور / انا اقصد يعني ممكن حد يقابلك كدا بالصدفه يكون معدى و لا حاجه و بعدين الانطباع الاول بيدوم برده
عبد العزيز / يعني انتى شايفه كدا
نور / لا طبعا اللى يريحك انا بس بقول رايي
عبد العزيز / امرى لله اقوم اللبس ... مش انا لو كنت جبت جلبيه الجمعه معايا بالعباية الصوف اللى عمك جبهالى من العمره كنت بقيت الاجا دلوقت
نور / انت قمر فى اى حاجه انجز بقي ابوس ايدك
ولد و بنت يطلعوا من اوضه بيتخانقوا
الولد / يا بابا شوفلك حل فى بنتك دى خلصت الكاجو كله
البنت / ايه ما انت خلصت الفسدق و ما اتكلمتش
نور / نهاركوا اسود خلصتوا اتنين كيلو مكسرات فى قاعده انتوا عارفين الحاجات دى بكام يقولوا علينا ايه مفاجيع
الولد / ايه مالك انتى بتكلمينا كدا ليه بقولك ايه يا اختى الجوازه لسه ما تمتش عشان تعيشي علينا اوى كدا هم يعنى حاطينهم هنا نتفرج عليها و نتحنس مثلا ما هم محطوطين عشان يتاكلوا
نور / بابا
عبد العزيز / هبقي اجيب غيرهم خلصنا بقي انا داخل اغير
نور تتنهد و عبد العزيز يدخل الاوضه ام نور تطلع من المطبخ
ام نور / ابوكى فين انا خلصت
نور / دخل يغير
ام نور / يا سلام ليه يعني نازل يوصل الاكل لمعالي رئيس الوزرا هو ايه اللى جرالكوا
الولد / اسألي عروسه المولد بنتك
نور / ما تخلينيش اتغابى عليك
الولد / انت تقدرى دا انا كنت رزعتك على قفاكى
ام نور / بس منك ليها في ايه مالكوا صوتكوا عالى ليه انتوا فاكرينا فى بيتنا الحيطان ليها ودان الجيران تقول علينا ايه ما عرفناش نربى
نور / هو البيه بس مضايق عشان خلصوا الاتنين كيلو مكسرات
الولد / يا شيخه دا انتى لو جيباهم من فلوسك مش هتذلى اللى جابونا كدا مش ممكن دى لما هتتجوز هتتبرى مننا
الولد يدخل الاوضه و يرزع الباب
البنت / سيبك منه دا عبيط دى لما هتتجوز و يتحط قدامها الاكل دا كله هتطخن و تفشول و تبقي قد الخرتيته
نور تجرى ورا البنت و البنت بتضحك
ام نور / يا عبد العزيز يا عبده دا ايه بيت المناخوليا ده بس يا ربى يا بت بس منك ليها دوختونى ... يا عبده
......................
فى الشركه عند منصور
منصور / خرج كل الدرونز الموجوده عندك
وفاء / دياب فى الطريق
منصور / مش هيلحق
وفاء / تمام ... عمى عباده خد مجموعه من الرجاله و طلعوا على الجبل
مهندس ١ / عم مغاورى خد عربيه لوحده معاه شاهين بس ما طلعش على الجبل
منصور/ رايح يجيب الهليكوبتر
وفاء / مدخل طريق التربيعه الجديد مكشوف
منصور / اسحب المجموعه اللى بتحرس بيت العروسه الجديده و ابعتهم هناك
وفاء / ما ينفعش دا دول الهدف اصلا
منصور / ما احنا لو امنا المداخل مش هيقدروا يدخلولهم اصلا اللى حصل ده حصل فى الجبل عشان يسحبونا بره البلد
مهندس ٢ / الدرونز وصلت ... ايه ده !!!
بروجكتور يشتغل من السقف على حيطه بيضه كبيره و الكل يسيب اللى فى ايده و يبان على وشهم الصدمه و الرعب
............................
فى عربيه جابر
جابر طاير على الطريق و دياب جنبه و جوزيف شغال على الموبايل ورا دياب يبص على جوزيف
دياب / بتعمل ايه
جوزيف / بعلى كفاءه البدله
دياب/ و هى البدله دى هتصد مع الخيال العلمي اللى بيحصل فى الجبل ده
جوزيف / هنشوف
جابر / هنشوف !!! انت هتستعبط
جوزيف / بقولك ايه لو تعرف تعمل اللى بعمله اتفضل شيل غير كدا ركز فى سواقتك و وصلنا هناك
دياب / يونس
جوزيف / ما اعرفش حاجه انا الحاجات دى جديده عليا زى ما هى جديده عليكوا بالظبط هو انتوا فاكريني جوجل
جابر يهز راسه باستنكار دياب يطلع الموبايل و يتصل
دياب / ايوه يا خالى انت فين ... تمام ... تمام ... خالى تقريبا وصل بالهليكوبتر و معاه الار بى جى باذن الله هينهيها كالعاده
جوزيف / فكروني تانى كدا معلش خالك هيضرب مين بصواريخ الارب بى جى دى نجاه و لا كارم و لا مين بالظبط انتوا بتهرجوا !!!
دياب يبص لجابر و يتصل تانى بالتليفون جابر يدوس بنزين على آخره
...........................
تحت بيت نور
عبد العزيز شايل الصينيه و خارج من البيت ما يلاقيش حد خالص يتلفت يمين و شمال و يبص فوق و تحت و فى كل حته
عبد العزيز/ هم راحوا فين ... الله !!!
عبد العزيز يستغرب و يطلع تانى يفتح الباب و يحط الصينيه على السفره
ام نور / الله هم ما رضيوش ياخدوا منك الحاجه و لا ايه
عبد العزيز / هم مين دا مفيش صريخ ابن يومين فى الشارع
ام نور / يا راجل انت بتقول ايه
عبد العزيز / اقسم بالله زى ما بقولك كدا مفيش حد خالص حتى بصي من البلكونه و انتى تتأكدي بنفسك
ام نور / طب ناولني الطرحه
عبد العزيز يناول مراته الطرحه و يطلعوا يبصوا من البلكونه
ام نور / الله دا صحيح هى الناس راحت فين ... ايه الحاجات اللى هناك دى
عبد العزيز يبص على درونز كتير طايره ناحيتهم
عبد العزيز / دى درونز ما يغركيش الجلاليب هى الناس دى هم اللى معاهم فلوس فى البلد دى تعرفى انتى اقل واحد من دول بكام ... يا ولاد يا ولاد تعالوا اتفرجوا على الدرونز يا ولاد
ام نور / وطى حسك الناس تفتكرنا ما شوفناهمش قبل كدا يقولوا علينا ايه ... يلاهوى دول شكلهم جايين علينا
عبد العزيز / ما تخافيش الحاجات دى بيبقي فيها كاميرات لما يشوفون...
الدرونز تهجم على عبد العزيز و تفضل تخبط فيه و تحاول تقلبه من البلكونه و مراته بتصرخ و تمسك فيه و تسحبه على جوه مش مالكه عشان بتخبط فيها هى كمان
.................
فى الجبل
كارم وشه كله دم بيضرب نار على راجل لابس ألى ضخم بالكامل مش باين غير راسه و الراجل عامل ايديه اكس و بيصد كل الرصاص و يقرب من كارم يخبطه بالرجل كارم يطير يتقلب فى الارض الراجل يقرب منه و يرفع رجله و لسه هيدوس نجاه تجرى قدام اخوها و تعمل ايديها اكس تصد رجل الراجل بتقلها عليها نجاه تصرخ
نجاه / كارم قووووم كارم
كارم يحاول يقوم مش قادر الراجل يدوس اكتر نجاه تنزل على ركبتها و تصرخ
نجاه / كااااااارم
راجل يدخل برشاش يفتح النار على الراجل الآلى ما بيتهزش
نجاه / الراس نشن على الراس
الراجل ينشن على الراس و يفتح النار الآلى يصد كل الطلق بايده و يحمى راسه
نجاه / سيب السلاح و اسحب كارم مش قادره اقاوم اكتر
الراجل يجرى يحاول يسحب كارم الآلى يسحب رجله نجاه تقع على وشها يجي يدوسها الراجل يسحبها من رجلها قبل ما الآلى ينزل فوق ضهرها نجاه تقوم تقف و تتعصب
نجاه / دا انت ابن كلب اوى
نجاه تهجم عليه يخبطها بايده يطيرها و يجي يروح ناحيتها الراجل يفتح النار فيه تانى ألى تانى يدخل يشوط الراجل ما يقومش و يتحرك ناحيه نجاه نجاه تجرى و هم بيتحركوا وراها فى الصحرا
...............
فى المستشفي
ممرضه تدخل لابسه كمامه شايله صينيه عليها ادويه تلاقي مختار قاعد على الباب بيقرأ قرآن الممرضه تفتح الباب و تدخل و قبل ما تقفل الباب تلاقي مختار ماسك الباب
الممرضه / مين حضرتك و بتعمل ايه هنا
مختار / انا سالت قالوا ما لوش اى علاج قبل الساعه تلاته انتى اللى مين و بتعملى ايه هنا
الممرضه / و حضرتك بقي سألت مين ان شاء الله
مختار / اطلعى بره قبل ما انسي اصلى و ارد عليكى رد ما يعجبكيش
الممرضه / تمام انا هبلغ الأمن باللى انت بتعمله ده و هم يتحاسبوا معاك و عشان تبقي عامل حسابك فى كاميرات فى كل حته بتصور اعتدائك عليا و انا بحاول اعمل شغلى
الممرضه تشاور فوق على الاركان مختار عينه ثابته عليها الممرضه تمشي مختار يطلع الموبايل و يتصل بحد
مختار / الممرضه اللى كانت هنا تابعها ... انا عارف ان كلكوا غرقانين فى الزفت مش مرتاحلها ... تمام بعدين ... اى جديد طمنى
مختار يقفل الباب و يقعد مكانه
مختار / عدى اليوم ده على خير يا رب ... ما لناش غيرك
مختار يبص مكان ما الممرضه مشيت تليفونه يرن يرد
مختار / السلام عليكم
امايا / انت واقف قدام الاوضه الغلط ... ابنك اللى المفروض تبقي واقف تحميه
مختار/ احمى مين و لا مين ربنا كان كريم معايا رزقنى بدل الواحد اربعه
امايا / ما انا هاخدهم الاربعه
مختار / ربنا اللى بياخد انتى مجرد سبب
امايا / اللى بيحصل فى الجبل ده انا ما ليش دعوه بيه بس اقدر انهيه ... بمقابل مناسب
مختار / اسمع
امايا / الولد اللى انت حاميه يلزمنى
مختار / انتى بتضحكى على مين يا اميره اللى بتموت فى الجبل دلوقت هى اللى ضيعتى خطه مثاليه عشان تنقذيها
امايا / ما فيش حاجه ضاعت انا اخدت اللى انا عوزاه و اكتر و الولد ده انا هاخده ... بطريقتك بطريقتى هاخده انا بس مش عاوزه اقتلك ... دلوقت ... احنا برده بينا عيش و ملح خليك متعاون
مختار / انا كبير كفايا انى اعرف ان مش كل العيش و الملح بيبقي ... معظمه بيروح فى الصرف و لا مؤاخذه
امايا / هتوحشنى
تلات ممرضات يطلعوا من الممرات مختار يقوم يقف
مختار / جربت كل حاجه ما فاضلش الا دى ... و ماله
اول بنت تضرب مختار بالرجل يصد رجلها برجله التانيه تضربه بالبوكس يصد بايده و بايده التانيه يديها بالبوكس فى بطنها ينطرها التالته تضربه فى ركبته من ورا ركبته تتنى و ينزل فى الارض البنت الاولى تضربه بالركبه فى وشه يقع على ضهره يقوم يقف و مناخيره بتجيب دم
بنت ١ / هتوحشنا يا اونكل
...............
فى الجبل فى الصحرا
نجاه بتجرى فى الضلمه باقصي سرعه و هم بيجروا وراها واحد يضرب صاروخ ينفجر تحت رجليها ينطرها تتشقلب و تنزل واقفه و تكمل جرى كشافات عربيه دفع رباعي تضرب فى عنيها نجاه تقف و هى بتنهج تبص وراها تلاقي الاليين جايين نجاه تلف حوالين نفسها مش عارفه تروح فين
صاروخ ينضرب تحت رجلين الاليين نجاه تبص تلاقى مغاورى على الهليكوبتر ماسك الار بى جاى نجاه تبتسم و تجرى ناحيه الجبل تانى و مغاورى يلقم صاروخ تانى و يجى يضرب واحد من العربيه ينزل بار بى جاى يضربه فى الهليكوبتر الطياره تقع مغاورى ينط منها تنفجر بالسواق مغاورى يصرخ
مغاورى / مرزوووووق
الراجل يلقم صاروخ تانى و الاليين يقوموا يقفوا مغاورى يشوفهم بيجروا ناحيته يطلع المسدس و يضرب النار لحد ما المسدس يخلص يبصلهم و هو مصدوم نجاه تفك الطرحه و تفضل بالتلبيسه تنادي من بعيد و هى بتشوح بالطرحه
نجاه / انا هنا انا هنا
مغاورى / يا مجنونه اجرى اجرى
نجاه / انا هنا انا هنا
الاليين يتحركوا ناحيه نجاه تجرى يجروا وراها مغاورى يجرى ورا نجاه الراجل يضربه بالار بى جاى ينفجر وراه بالظبط ينطره على وشه الراجل يركب العربيه و يتحرك ورا نجاه و يحاول يدوس مغاورى مغاورى يلف بسرعه يفاديه و يقوم و الرعب مالى ملامحه ناحيه نجاه يجرى وراهم ما يحصلهمش يقع فى الارض على ركبه يبص مش شايف غير نور العربيه من بعيد يصرخ
مغاورى / نجاااااااااااه
.....................
أنت تقرأ
الكبيره ٢ بقلم / لولو_محمد
فكاهةالحرب لسه مستمره و الحقيقه مسيرها فى يوم تظهر النور و كل واحد لازم يختار طريقه
