الكبيره ٢ بقلم / لولو_محمد

الحلقه ٨٦

((((((( الكبيره ٢)))))))
#لولو_محمد
الحلقه ٨٦
شاهين / افتح الباب و اعمل اللى قولت لك عليه
الراجل / يا سي شاهين
شاهين / ما لكش دعوه افتح
الراجل يتنهد و يروح يشيل سجاده و يروح يجيب اتنين ساكشن كوب و يضغط بيهم على سراميكه كبيره و يرفع السراميكه تتشال و يبان تحتها باب حديد بمفتاح الراجل يحط المفتاح و يبص لشاهين
الراجل / انا بيبقي واقف معايا عشر رجاله بالسلاح و انا بنزل ليهم الاكل احنا بطولنا
شاهين / هتخيب و لا ايه مش هنقدر على شويه حريم و لا ايه
الراجل / الكتره تغلب الشجاعه و دول على قد علمى محترفين دا غير ان حياتهم مهمه
شاهين / افتح و نزلنى و اقفل ورايا و لو مت حتى ما لكش فيه
الراجل/ طب اتصل بسي مغاورى
شاهين / هتفتح و لا لا ضيقت خلقى
الراجل يلف المفتاح و يفتح الباب شاهين يرمى قنبله غاز و يقفل و يبص فى الساعه
الراجل / انت عملت ايه
.........................
فى شقه عباده
عباده قاعد حاطت رجل على رجل و مختار واقف محبط و نجاه بتصرخ فى جوزيف بارد
نجاه / انا هاين عليا ادب ايدي فى كرشك اطلع مصارينك دلوقت
جوزيف / ما عنديش كرش
نجاه / دا انت مستفز اييييه!!!!!
نجاه تدخل الحمام و ترزع الباب
مختار / ليه عملت كدا
جوزيف / عملت الصح
مختار / انك تقتل روح
جوزيف/ انى انقذ روحين ... روحين ايه قول تلاته اربعه بتعرف تعد لحد كام
عباده / عشان تبقي تصدقنى بعد كدا
جوزيف/ اولا مهره ما كانتش هتقدر تربى طفل سوى اتفرض عليها مهره لتانى مره كانت بتحاول تنتحر عشان تخلص من القرف اللى شيلاه
مختار / كان فى مليون حل غير ده
جوزيف / تجوزها لحد تدبسها لابنك اكتر ما هو مدبس فيها... ايه ما اسموش اختلاط أنساب ده يا شيخنا
مختار / ما كانش لازم يبقي كدا يعني
جوزيف/ طفل من غير اب و ام رفضاه فى مجتمع مريض زى ده بنت مش قادره تشيل مسؤليه نفسها هتواجه عالم مريض و انتهازى عشان خاطر طفل اتفرض عليها انا شوفت الفيلم ده كتير اوى و نهايته دايما واحده
مختار / و انت بقي كدا انقذت الوضع يعني
جوزيف / انا عملت الصح بغض النظر بقي انت متفق معايا و لا لا انا عملت الصح عملت الصح اللى لو اتحطيت فى نفس الموقف مليون مره هعمل كدا برده عملتها قبل كدا كتير و لحد اخر يوم فى عمرى هفضل اعمل كدا
عباده يسقف
جوزيف / شكرا
مختار يبص على الاتنين و يضرب كف على كف
جوزيف / كان فى بنت عندكوا فى البلد اسمها سحر باين فاكرينها
مختار / دى كانت
جوزيف / ماتت و ابنها مات و الحيوان اللى عمل فيها كدا و انتوا ساعدتوه
عباده / ما ساعدناهوش
جوزيف / ساعدتوه و سلمتوها ليه و لولا امايا كان زمانه عايش و مبرطع عادى ... سحر لو كانت سقطت اللى فى بطنها و قتلت حماده من الاول كان زمانها عايشه
عباده/ كانت ماتت فى نفس الساعه لانه أجلها
جوزيف / انت فاهم قصدى ما تقعدش تحدفنى يمين و شمال انت فاهم المبدا ... انا أديت فرصه لمهره تعيش اديتها فرصه تتنفس ... أديت لعمران فرصه يتنفس
عباده/ هو كان اشتكالك
جوزيف / و هو انت بتسمع اصلا عشان يشتكى
عباده / و لا انت بتسمع
عباده يقوم يقف قدام جوزيف
عباده / انت بتعمل اللى فى دماغك بس لا بيفرق معاك حد و لا بتفكر غير فى نفسك و مصلحتك و بس فما تجيش عليا و تعمل فيها دور البطل عشان انت مجرد مجرم مش اكتر
مختار / ما تخلوناش نخرج عن الموضوع
جوزيف / هو ده الموضوع ... اه مجرم و مطلوب فى بلاد كتير بس انت مش احسن منى انت زيي بالظبط بس بتعملها تحت غطا بطولى شويه ... غطا وهمى عبيط انك الكبير و بتعمل نفس انواع الجريمه عشان تنقذ قال ايه اهل بلدك ... الا قولى كام واحد من اهل بلدك ماتوا و لا اتصابوا و لا حتى طفشوا من بلدك بسبب بلاويك و أخطائك
مختار/ عيب كدا
عباده / انا عمرى ما قصرت فى حقهم و طول عمرى مستعد أضحى بنفسي و بولادى عشانهم
جوزيف / لا مش عشانهم عشان تفضل الكبير الصح اللى عارف كل حاجه و بيتحكم فى كل حاجه
نجاه تطلع من الاوضه
جوزيف / انا مجرم ... بس كل اللى عملته عملته عشان اعيش و عشان الناس القليلين اللى باقيين فى حياتى يعيشوا ... عشان لو مت ما فيش حاجه هتتغير ما فيش هيجي غيرى يكمل اللى كنت بعمله عادى جدا
نجاه / بس انت بطلت
جوزيف يبص لها
نجاه / انت ما عدتش بتساعدهم ما عدتش عبد عندهم انت اتغيرت و بطلت ..  صح ؟!!
جوزيف / انا عملت الصح و ان كان ربنا هيحاسب حد على اللى حصل ده فهيحاسبنى انا و ربنا عارف انا عملت كدا ليه
عباده / ما تهربش من السؤال ... جاوبها
جوزيف / انا هدافع عن حياتى و حياه اللى بحبهم مهما كانت الطريقه و مهما كانت النتايج يا نجاه
عباده / يعني لا ... هتفضل تحت جزمتهم لمجرد انك خايف تموت
جوزيف / الموت ما بيوجعش اللى بيموتوا بيوجع اللى حواليهم و بيحبوهم و انا اللى فارقين معايا يتعدوا على الصوابع مش هقدر اجازف انى اخسر اى واحد فيهم انى اتحدى مجلس لا انت و لا الاطخن منك يقدروا يقفوا قدامهم
مختار / ربنا معانا
جوزيف / شهدائنا فى الجنه و قتلاهم فى النار صح ؟
نجاه / صح
جوزيف / عشان حواليكي كتير بس
مختار / انت معاك حق فى حاجه واحده ... ربنا هو اللى هيحاسبك على اللى عملته
عباده يضحك باستهزاء و يضرب كف على كف
مختار / انا ما قولتش انه ما غلطش بس قولت كمان ان هى اخدت الحبوب بمزاجها هى عاوزه ده و احنا مش هنقدر نجبرها تشيل حاجه هى مش قبلاها
عباده / دا سريع اوى ... سريع جدا مش ممكن السرعه دى ... و انتى؟! غيرتى رايك و اقنعك انتى كمان ؟
نجاه تبص لجوزيف حزين
نجاه / الصح و الغلط نسبي حسب كل واحد و اللى اتربى عليه و اللى عاشه
عباده ينفخ و يروح يفتح البلكونه
نجاه / بس الحلال بين و الحرام بين و اللى عمله حرام و ربنا أعلم بقي
مختار / عباده
عباده/ انت عارف مشكلتى معاه كويس
جوزيف / هى مشكله واحده
عباده / بالظبط ... كلك على بعضك بكل حاجه فيك بالنسبالى مشكله
جوزيف / كويس عشان تحس باللى بحس بيه لما بجبر نفسي اتعامل معاك
نجاه / يونس
عباده / طب انت ما خليتش فى جهدك جهد انك تأذيني انا بقي عملت لك ايه
مختار / خلاص يا عباده
عباده / ما تديله فرصه يرد يفهمني... قولى ... لو انت مكانى و عملت فيك كل اللى انت عملته معايا هتعمل ايه ... هتسامحنى هتعاملنى عادى هتنسي ما ترد هتعمل ايه ... ردوا انتوا ... قادرين ازاى ... حد فيكوا اتوجع منه زيي حد فيكوا ... اقول ليكوا حاجه ... ما عادتش تفرق اصلا اعملوا اللى يريحكوا انتوا ... انا زهقت
عباده يدخل اوضه و يرزع الباب نجاه تجرى تفتح الباب و تدخل وراه و تقفل الباب
مختار / ما تضايقش نفسك هو
جوزيف / هو معاه حق هو ما غلطش و انا فاهم ده كويس فاهم مش اهبل و لا بستهبل انا عارف ان مهما حصل و مهما عملت مش هقدر اغير اللى فات مش هيتمسح هتفضلوا كارهينى
مختار / احنا
جوزيف / صدقنى مش فارق معايا ... مش فارق معايا حقيقي رايكوا كلكوا فيا و مشاعركوا ناحيتي صدقني ما تهمنيش تصدق بقي ما تصدقش انا كل اللى يهمنى و يفرق معايا انها بخير
مختار / يونس
جوزيف / انا كنت صغير و ما قدرتش احمى امايا منهم على الاقل اساعدكوا تحموا نجاه... لو مش انا هيبقي غيرى و اللى غلطت انا فيه هو مش هيغلط
مختار / قصدك حوار الخطف و
جوزيف / زى ما بابلو أتقدم لأحلام هيجي غيره و غيره و غيره بس المره الجايه هيجي حد من البلد ما هى البلد نفسها ما عادتش بتاعتكوا
مختار / الشركه الامريكانيه صح ؟
جوزيف / لا مش شرط ... البلد دى ما عادتش زى زمان ما عادتش بتاعتكوا
مختار / مش فاهم
جوزيف / و طول ما انت باصص تحت رجليك و ماشي زى الكتاب ما بيقول عمرك ما هتفهم الكتاب ده هم اللى عملوه على فكره عملوه عشان يكتفوك انما هم ما لهمش كتاب بيتحركوا براحتهم كل حاجه مباحه المهم اوصل للى انا عاوزه
مختار/ بس انت تقدر تساعدني تقدر تخليني اشوف اللى مش قادر اشوفه
جوزيف / ما انتوا ما بتصدقونيش
مختار / انت مش صريح قول المعلومه دوغرى
جوزيف / المعلومه غاليه يا مختار المعلومه اللى عاوزها على الجاهز دى تمنها دم لو ادتهادك على الجاهز هموت لازم توصل لها بنفسك بس انا بحاول اوجهك كل المطلوب منك تصدقنى و تركز
مختار / فى أنفاق تحت البلد اخرها ايه ؟
جوزيف / اخرها زى اولها ركز على اولها و حطه تحت عينك هتجيب اخرها
مختار / وحياه امك
جوزيف / و الله ما بهزر ... شوفت بقي انك مش عاوز تصدقنى شوفت بقي انك رافض تشوف الصوره و لا راضي تفهم 
مختار / تمام يا يونس كتر الف خيرك كدا كدا مش ساكتين
جوزيف يضحك باستهزاء و يروح يقعد
مختار/ انا هرجع المستشفي هتيجي معايا ؟
جوزيف / خد نجاه معاك انا هستناكوا هنا
مختار يستغرب و يهز راسه و يروح يخبط على الباب و يدخل يلاقى عباده قاعده على السرير و واخد نجاه فى حضنه تتعدل
مختار / رايح لمهره تيجي ... يونس هنا معاك ... ارجع الاقيكوا انتوا الاتنين سلام ماشي
نجاه / هو انتوا مش هترتبوله اوضه يقعد فيها
مختار / هقول للجماعة تحت
عباده يبص الناحيه التانيه و مختار متابعه
نجاه / هتعوز منى اى حاجه يا بابا
عباده/ سلامتك
نجاه تبتسم و تقوم تبوس راسه و تمشي مع مختار و هى ماشيه تبص لجوزيف يبتسم لها تبص فى الارض و تمشي مختار يقفل الباب عباده يطلع من الاوضه يبصوا لبعض
عباده/ اكلت و لا اجيب لك تاكل؟
جوزيف يبتسم
عباده / هعمل حسابك
عباده يروح المطبخ و جوزيف يتنهد و يطلع الموبايل يبص فيه
.........................
فى المستشفي
مهره ممدده فى سريرها و مركبه محلول و سرحانه فى ملكوتها و عمران قاعد على كرسي جنبها و باب الاوضه مفتوح
عمران / تفتكرى لو ما كنتش قابلتك كان كل ده حصل لك ؟ كان هيحصل بس ساعتها ما كنتش هبقي عارف عنه حاجه ... بس انا مش هلغى انى قصرت برده ... كان المفروض
مهره تبص له
عمران / ازاى حياتك بقت رخيصه عليكي كدا ازاى تاذى نفسك بالشكل ده
مهره تبص الناحيه التانيه
عمران / اللى عمل فيكي كدا اعترف ... ما كانش الوحيد الوسخ فى المكان ... على فكره اتعمل فيهم بلاغات كتير و ابويا راح قال لابوكى بس منه لله اكرم الكلب كان لاعب له فى دماغه
مهره تبص لعمران بحزن
عمران / بس ما تزعليش اكرم ده اكتر واحد هيدفع التمن على فكره هيتربى ... بس هو حلف انه ما كانلوش اى علاقه باللى حصل فى المستشفي و ما كانش عامل حسابه ان الدنيا هتوصل لكدا ... كان فاكر انه هيضغط عليكى بس كلاب المستشفي كانوا اسرع منه... الحقيقه اسرع من ان اى حد يتخيل اصلا دا الموضوع ما اخدش كام ساعه كأنهم ما بيصدقوا ... حسبي الله و نعم الوكيل ... صحيح من امن العقاب اساء الادب مش اول مره يعملوها اخرها ايه يعني ... هيشوفوا اخرها على ايدي باذن الله بس نطمن عليكي اقسم بالله لاندمهم على اليوم اللى اتولدا فيه ... انا ... ما تزعليش منى بالله عليكي انا ... انا ما كانش قصدى حاجه وحشه باللى قولته
مهره تبص الناحيه التانيه و تغمض و تكتم دموعها
عمران / طب انتى ساكته ليه ... قولى اى حاجه ... طب انا اسف حقك عليا
جابر يدخل راسه
جابر / عمران تعال ثانيه
عمران يبص على مهره بتعيط فى صمت يتنهد و يطلع بره
جابر / ما تضغطش عليها سبها تاخد وقتها اللى حصل مش حاجه سهله
عمران / ما بتتكلمش خالص يا جابر
جابر / ماشي ما بقولك اللى حصل مش سهل اكيد نفسيتها تعبانه اكيد هتحتاج مساعده عشان تطلع من اللى هى فيه بس برده هياخد وقت
عمران يدخل يبص عليها و يطلع
جابر/ يا ابنى ضغطك عليها مش هيسرع العمليه اهدى
عمران / و انى اشيل عيني من عليها ممكن يديها فرصه تموت نفسها ... انا مش هقدر اسامح نفسي لو حصل ليها حاجه
جابر / عمران... عمران ... اولا كدا انت ما لكش ذنب فى اى حاجه حصلت ليها انت ما قصرتش نهائى بالعكس انت شيلت شيله مش شيلتك خالص و تشكر اوى على كل اللى أنت عملته فبلاش تحمل نفسك فوق طاقتها
عمران يبص الناحيه التانيه
جابر / روح ارتاح شويه و انا هخليني جنبها لحد ما نجاه و خالى يجوا
عمران / لا هخليني هخليني احسن حاجه
جابر / يا ابنى كدا هتقع مننا
عمران / دا على اساس ان كلكوا نمتوا يعني ما كلنا زى بعض
جابر / مظبوط يبقي نبدل انا هبدا اول واحد و انت روح ارتاح و تعال بدل معايا
عمران / كدا كدا لا هعرف انام و لا ارتاح فخلينى و روح انت احسن
جابر / مفيش فايده يعني ؟
عمران / ما تتعبش قلبي بقي يا جابر
جابر يتنهد و يبص الناحيه التانيه و هو بيهز راسه موافق
.........................
فى شقه عباده
عباده قاعد بيتفرج على مسرحيه العيال كبرت و بيضحك و جوزيف متابعه عباده يبص له
عباده / انت عارف المسرحيه دى شوفتها كام مره المسرحيه دى كانت من سيمات العيد المصرى عيد صغير و عيد كبير نصلى العيد و ناكل لقمه و نريح و نصحى كلنا نتجمع قدام التليفزيون نتفرج عليها ... جيل بيسلم جيل
جوزيف / هى حلوه
عباده يكمل فرجه و ضحك و جوزيف متابعه عباده يبص له
عباده / لو عاوز تدخل تريح شويه ادخل مختار قال لهم يفضولك الاوضه اللى تحت بس لو عاوز تدخل جوه لحد ما يرجعوا خد راحتك
جوزيف / انت معاك حق على فكره ... حبيتك بس تبقي عارف انى فاهم موقفك
عباده/ بخصوص ؟
جوزيف / بخصوصي
عباده يبتسم بسخريه
جوزيف / مهما حاولنا نبان عادى و اننا تمام اللى فى القلب بيفضل فى القلب
عباده/ طب انا قولت لك اللى فى قلبي انت بقي ... ايه اللى فى قلبك ؟
جوزيف يعوج بقه مش عارف عباده يبتسم بسخريه
جوزيف / لا حقيقي مش عارف ... بس بالعقل كدا بغض النظر عن اى حاجه تانيه انا لو عاوز ليكوا شر ... مستني ايه
عباده/ غفله مثلا
جوزيف يضحك بصوت عالى
جوزيف / غفله !! انتوا!! دا انا نفسي تفوقوا مره
جوزيف يضحك
جوزيف / انا اسف بس الجمله دى ضحكتنى اكتر من المسرحيه
عباده يبتسم
جوزيف / ما تحبنيش و ما تثقش فيا  ... بس ... استنى
جوزيف يقوم يجيب مصحف من على رف و يحطه على الترابيزه و يحط ايده عليه
جوزيف / اقسم بالله ما جاى ائذى نجاه ... تمام
جرس الباب يضرب جوزيف يقوم يفتح يلاقي ناصر اول ما يشوف جو عنيه توسع و ينصدم جوزيف يبتسم باستفزاز
.......................
فى المستشفي
نجاه بتساعد مهره تلبس و بتلم الحاجه فى الشنطه و هى بتتكلم و مهره قاعده على السرير بتابعها فى صمت
نجاه / انا مش عارفه افكر فى اى حاجه ... مش عارفه اتعامل مع اى حاجه و لا اخد قرار ده كلامه صح و مقنع و دا كلامه صح و مقنع برده و انا فى النص معقول الاتنين يكونوا صح و الاتنين يكونوا غلط فى نفس الوقت
نجاه تبص على مهره
نجاه / بغض النظر انى مقتنعه انه غلط بس انا متاكده انه خير ... ما هو اقلها انى مؤمنه ان اى حاجه ربنا بيعملها خير بس ... هو عادى انى ما اكونش فاهمه الحكمه فى الموضوع... و برده مش عارفه هل دا كان اصلا ابتلاء و لا الابتلاء خلص و دا كان الفرج ... انتى فاهمه انا بقول ايه صح ؟
مهره تهز راسها لا
نجاه / طب انتى رايك ايه
مهره تتنهد و تبص الناحيه التانيه نجاه تروح تقعد قدامها مهره تبص لها
نجاه / على فكره عمران اتكلم مع الدكتور قاله انك ما بتتكلميش خالص و دا قلقه عليكي أوى ... بصراحه كلنا قلقانين اوى عليكي يا مهره و مش عارفه هتقدرى تكملى فعلا للامتحان و لا لا
مهره تبص فى الارض
نجاه/ على فكره عادى نسقط الترم ده و نعوضه السنه الجايه عادى بتحصل انا شخصيا عملت كدا لما عملت الحادثه عادى الانسان بيتكيف مع الظروف عادى هنعمل ايه يعني ... طب ردى عليا باى حاجه طيب
مهره تبص لنجاه
نجاه / طب انتى مش قادره تتكلمى و لا مش عاوزه يعني دا فقدان قدره و لا فقدان شغف عشان افهم بقي ... هو انتى حتى ما بتشاوريش انتى بجد ... تمام تمام انا فاهمه ... بس انا مؤمنه ان الوجع ده هيخف مع الوقت ... انتى قويه و هتقدرى تبنى لنفسك حياه جديده و بعدين احنا مش هنسيبك برده ... يا بت ارحميني و اعملى اي حاجه ما تقطعيش قلبي بقي
مهره تبتسم بحزن نجاه تمسك ايد مهره
نجاه / حقك عليا يا مهره.. حقك عليا فى كل اللى حصل .. اوعدينى انك مش هتحاولى تموتى نفسك تانى اوعديني انى هتقومى على رجلك تانى انتى خياله و الفرسان ما بيستسلموش بالسهوله دى
مهره تهز راسها
نجاه / انا عارفه انك المفروض ترتاحى هنا احسن بس بصراحه انا حاسه ان البيت امان اكتر لحد ما تشدي حيلك لحد ما نرجع البلد المستشفي مش امان
مهره تبص فى الارض و تقوم مع نجاه
...........................
فى شقه عباده
ناصر / منور
جوزيف / نورك
ناصر / امال الجماعه فين ... اصل لا مؤاخذه يا عمى حضرتك انا كنت فاكر انى جاى اقعد مع ناس تانيه خالص
عباده / مهره تعبت شويه و خدوها المستشفي و زمانهم راجعين
ناصر / خير مالها
عباده / حاولت تنتحر و قطعت شراينها
ناصر/ لا حول و لا قوه الا بالله مش للدرجادى يعني اللى يشوفها ما يقولش ضعيفه اوى كدا و بعدين كانت كويسه فى البلد ايه قابلت اهلها و ادوها كلمتين بسبب جوازها المزيف اللى ادبست فيه هى و اخويا و لا ايه منور يا عم جو
جوزيف / حبيبي تسلم
عباده / خلاص بقي يا ناصر اهدى شويه دلوقت يرجعوا بالسلامه ... قولى اكلت و لا اعملك لقمه
ناصر/ لا واكل تسلم و بعدين انا مش غريب انا صاحب مكان شوف كدا الضيف لو يحب حاجه
جوزيف / عمل ليا ساندوتشين بيض بالطماطم انما ايه حكايه ... ما كنتش اعرف ان رجاله الصعيد بيعرفوا يعملوا كبايه شاى حتى
ناصر / ليه كتع
جوزيف / يا عم ما تاخدهاش على صدرك اوى كدا ادينا بنتعلم
ناصر يبص لجوزيف بقرف و يبص الناحيه التانيه
جوزيف / اخبار العروسه ايه
ناصر/ و انت مالك بيها
جوزيف / بسأل عادى
ناصر / لا تسأل و لا ليك دخل بيها انا بقولك اهو 
جوزيف / مش قولتلك ما تاخدش الكلام على صدرك
عباده / مش خلصنا بقي و لا ايه
جوزيف/ خلصنا ... مش انا ليا اوضه تحت ... هنزل افرد ضهرى لحد ما يرجعوا
عباده يهز راسه جوزيف يقوم و يمشي و عين ناصر معاه جوزيف يبص له و هو مبتسم يغمز له و يفتح الباب و يمشي و يقفل الباب وراه 
ناصر / هو ايه البتاع ده كل ما نقول  خلصنا منه يرجع تانى ايه !!! ايه !!!!
عباده يبص له و يبص الناحيه التانيه
ناصر/ ابويا صح ؟ ابويا... طبعا ابويا ... مخلف اربع رجاله يسدوا عين الشمس و اهم حاجه عنده عيل ابن حرام و لا يسوى تلاته ابيض
عباده / ناصر
ناصر/ ايه!! ايه !!
عباده / اهدى ... و عيب الكلام ده ابوك عمره ما يبدى عليكوا حد
ناصر يهز راسه و يبص الناحيه التانيه
عباده / انا بتكلم جد ابوك عمره ما قصر فى حقك و لا حق اخواتك
ناصر يبص لعباده
عباده / مش وقت خلافات شخصيه يا ناصر مش وقت حساسيات مش وقت نفسي نفسي خالص يا ناصر
ناصر / نفسي نفسي !! دا انا
عباده / ناقصك ايه يا ناصر ابوك قصر فيه قولى
ناصر / ما قولتش انه قصر بس انا مش فاهم هو ليه محابيله اوى كدا الكل كارهه الكل رافض وجوده و ابويا فارضه علينا
عباده/ مش ابوك لوحده
ناصر يضحك باستهزاء و يبص الناحيه التانيه و يفضل يفرك فى ايده
عباده / اى حاجه فيها مصلحتكوا و سلامتكوا انا مستعد اعملها ... حتى لو هحط ايدى فى ايد العفريت
ناصر / و احنا بقي مصلحتنا ... و سلامتنا... واقفين على ابن الحرام ده مش كدا ؟
عباده / ما فيش حاجه بتقف على حد بس
ناصر/ حضرتك ممكن تقنع نفسك بالكلام ده يمكن ... يمكن حضرتك تصدقه ... انما انا ... اسف جدا مش واكل معايا ... و لا شارب ... اقول لك حاجه ... انا هنزل كدا اتمشي شويه على البحر بالعربيه افك كدا و بعدين ارجع اكون لميت نفسي كدا و جمعت افكارى و هديت و سيطرت على النار اللى جوايا دى بدل ما تطلع و تولع فينا كلنا
عباده / ليه كل ده
ناصر / عشان عندى دم ... اسف اسف ... انا همشي دلوقت ..  انا بجد اسف
ناصر يقوم يشد المفاتيح و يمشي و يقفل الباب وراه و عباده بيضرب كف على كف يطلع الموبايل و يتصل
عباده / ايه الدنيا... ناصر كان هنا و ...
.......................
فى مكتب مغاورى
مغاورى / حتى لو اعترفوا حتى لو قدرت تطلع منهم معلومات احنا لا بنضرب حريم و لا بنعذبهم بالشكل ده
شاهين/ و انا كنت خلعت ضوافرها و لا نتفت شعرها و بعدين لحد امتى هنفضل ندلع و ندادى اكل و شرب و لبس و علاج و خدمه خمس نجوم ... لمين اصلا يابا ... دول لو طالوا ينهشوا فى لحمنا مش هيتاخروا ... هو احنا جايبنهم من هايبر دول متهجمين علينا و دخلوا يا قاتل يا مقتول
مغاورى / كان ممكن يجرالك حاجه
شاهين/ كنت مامن نفسي بغاز الأعصاب ما كانوش قادرين يتحركوا و مع أول ألم قرت بكل حاجه
دياب / اول ألم هاه ؟!!
شاهين/ الفيديو عندك شوفه
دياب / ما دا اللى مستغربه انى شوفته و انها فعلا اعترفت من اول ألم
شاهين / اهى عندك روح حقق انت معاها و وريني هتطلع بايه
دياب / و هو فى حد يقدر يعلى عليك برده
شاهين/ دياب ... يا تتكلم عدل يا نفضها سيره انت عاوز ايه من الاخر
دياب / مش عاوز انا بس مستغرب ... هل منطقى ان بنات مدربين بالمستوى ده يقروا من اول ألم بالشكل ده
راجل / يمكن الغاز خلاهم مش مركزين
مغاورى / او فخ
دياب/ مثلا
شاهين / ناخد حذرنا و نشوف هتوصل لايه بس لازم نتحرك الكل حوالينا بيتحرك الا احنا ايه هنفضل قاعدين لما يرزعونا على قفانا تانى دا احنا حتى ما رديناش على القفا اللى فات ... قفا ايه هو كان قفا واحد دى كانت معجنه يابا
مغاورى و الرجاله يبصوا لبعض و دياب عينه على شاهين
شاهين / عملنا احنا ايه بقي بعد المجرزه اللى حصلت و الهجوم على المركب فى البحر عملنا ايه ؟! كل واحد سافر يكمل حياته عادى و البلد فضيت علينا ... الجوارحه
منصور / الزنايته ما قصروش و ان كنت تقصد عمى مختار و الكبير
شاهين / انا ما بقصدش حد و لا بقلل من حد ربنا يعين كل واحد على حاله بس احنا فى حرب و فى مليون جبهه و بعدين انتوا ملمومين و عاملين ليا قاعده عشان ايه عشان قررت الحريم اللى وقعوا فى ايدينا و هم بيحاولوا يقتلونا !! دا بدل ما نشتغل على المعلومات اللى طلعت منهم
دياب / ما المصيبه ان المعلومات طلعت بسهوله جدا
شاهين / و انت فاكر الحرمه هتستحمل تعذيب قد ايه عشان تعترف
دياب / الحرمه العاديه مش هتستحمل بس دول مش اى حريم دول مدربين على أعلى مستوى
شاهين / الحبسه مش سهله برده... على العموم المعلومات قدامكم خدتوها اشتغلتوا عليها كان بها هترموها فى الدرج دى حاجه ترجع ليكوا انا كدا كدا هطلع انام و انا هادى و مرتاح عشان الحريم دول كانوا حرقين دمى جامد
مغاورى / هنشتغل عليها ... بس هناخد بالنا و نعمل حسابنا انه ممكن برده يكون فخ ... تمام يا رجاله
الرجاله يهزوا روسهم موافقين
مغاورى / على بركه الله
...........................
فى شقه عباده
عباده يفتح باب الشقه و هو بيتكلم فى التليفون يلاقي ناصر يفتح له و يكمل كلام و يدخل الاوضه جوه
عباده/ بس دياب معاه حق ... تعال يا ناصر ادخل... يا عم حريم ايه دول مساعير ... خلاص تمام
عباده يقفل باب الاوضه ناصر يدور مكان ما كان قاعد
ناصر / فين ام المحفظه على ابو الكريدت كارد على ام الفلوس انا غلطان انى جيت هنا اساسا
ناصر يقلب الكنبه و يشيل كل الشلت و يدور فى كل حته يوطى تحت الكنبه يشوف تيست حمل يمد ايده و ياخده و يقف و يبص عليه منور الباب يتفتح مختار يدخل وراه نجاه مسنده مهره وراهم جابر شايل الشنطه و وراه عمران
ناصر / هو ايه ده
مختار يروح يحاول يشد منه التيست ناصر يرجع ايده لورا
مختار / لقيته فين ده
ناصر/ ثانيه ثانيه بس مش نعرف الاول دا بتاع مين فيهم
نجاه تهجم عليه و هى بتصرخ فيه و مهره تسند على الحيطه و تعيط و الرجاله بيشدوا نجاه اللى بتصرخ و تشتم و تضرب فى ناصر و هو بيحمى وشه بس و كل ما يشدوها تفلت و ترجع تضرب فيه عباده يطلع من الاوضه و الرجاله تتلم من على السلم
نجاه / اه ياوسخ يا وسخ
مختار / أدبه عندى اهدى اهدى
ناصر / ما قصدتش ما قصدتش و الله ما قصدت
نجاه / اوعوا ... انت بتقولى انا الكلام ده يا واطى بتقولى انا كدا ... اوعى
نجاه تزق جابر
نجاه / ايه !! ايه !! لو مش هترد عنى على الاقل ما تمنعنيش عنه ... ايه !!!
عباده / فى ايه يا نجاه اهدى ... ايه اللى حصل
نجاه / مش كل مره تعملوا معايا كدا مش كل مره تتكاتلوا عليا انا مش كل مره تكتفونى انا ما تستقوش عليا كفايه
عباده / نجاه !! بس !!
نجاه / ايه ؟! انا الغلطانه المرادى كمان ... انا عمرى ... عمرى ما هسامحك
ناصر / اقسم بالله ما قصدت كدا خالص
مختار / اخرس بقي اخرس انت اصلا ايه اللى جابك
ناصر / ايه اللى جابنى ؟!! ايه ؟! بابك مفتوح للكل الا ابنك يعني و لا ايه ؟!
مختار / وحياه امك انت هتعملهم عليا و لا ايه فوق و شوف انت بتكلم مين
ناصر / بكلم ابويا ... ابويا اللى ما رفعش سماعه التليفون يسأل عن ابنه من ساعه من سافرنا من البلد بس فاضي يجرى ورا الغرب كل واحد شويه
مختار / طب ما تجرب كدا تنزل دمعتين يمكن نصدق دور الضحيه المضطهد ده جرب كدا
ناصر / انا لا ضحيه و لا مضطهد و لا مستنى منك حاجه اصلا و انا الغلطان انى جيت هنا اساسا ... انا ماشي
عباده / ماشي رايح فين هو مفيش احترام لكل اللى واقفين دول يعني ما تتكلم عدل
ناصر/ و انا كنت غلط فى ايه يعني هو انا كنت جايب الزفت ده من بيتنا 
نجاه / مفيش فايده ... مفيش فايده
نجاه تزق الرجاله يبعدوا
نجاه / اوعوا من وشى ... غوروا
عباده / رايحه فين انتى كمان ؟ هو فى ايه ؟
نجاه / رايحه فى ستين داهيه بعيد عنكوا
عباده/ نجاه !!
نجاه تمشي و اللى بيقف قدامها بتزقه بعنف
عباده / نجاه بكلمك تعالى هنا ... نجاه
جابر يجرى وراها نجاه تشوف جوزيف واقف فى المدخل تعديه و تفتح البوابه
جوزيف / على فين طيب
نجاه تمشي و هى عصبيه و بتعيط جابر ينزل السلم يجرى وراها جوزيف يتنهد و يمشي وراهم جابر يحصل نجاه
جابر / نجاه نجاه استنى
نجاه / عاوزه ابقي لوحدى لو سمحت
جابر / طب بس اهدى و خلينا نتكلم
نجاه تبص لجابر جوزيف يدارى عشان ما تشوفوش
نجاه / انت ... عاوز منى ايه دلوقت ما تسيبني فى حالى يا اخى ما تفكك منى بقي انت ايه
جابر / هو فى ايه يا نجاه انا كنت عملت لك حاجه
نجاه / ما دى المصيبه دى المصيبه انك وقت الجد ما بتعملش ما بتعملش حاجه ما بتاخدش اى رد فعل بتقف تتفرج و بس و ان اتحركت يعني و خدتك الشجاعه يعني أنك بتتحرك بتمسكنى انا و دى مش اول مره يا جابر مش اول مره تمنعنى اخد حقى مش اول مره تسمح لهم يضيعوا حقى ... تحب اعدهم لك تحب افكرك ان كنت ناسي
جابر / اى حاجه عملتها او اى خطوه بخطيها اى كانت بعملها عشانك
نجاه / و الله ... طب ابقي وفر مجهود اللى ما لوش تلاته لازمه ده انا مش مستنيه منك حاجه قلتك احسن
جابر / عوزانى اعمل ايه يعني ما ابوه واقف و ابوكى واقف
نجاه / يبقي تغور انت فى داهيه بعيد عنى
جابر يبص لنجاه الغضب عاميها تمشي و تسيبه و هو متابعها ثوانى و يجرى وراها بتعند و بتمشي و مش بتبص له
جابر / تمام تمام انا انسان حقير و ما اساويش تلاته نكله بس ممكن لو سمحتى ترجعى البيت و بعدين نبقي نشوف هترسي على ايه
نجاه / مش راجعه
جابر / هتروحى فين يعني
نجاه / فى ستين داهيه انت مالك
جابر / نجاه ... ما تخلينيش اتغابى عليكي ... استهدى بالله كدا و اعقلي الوقت متاخر و الشوارع فاضيه
نجاه / انا هعرف اخد بالى من نفسي كويس مش واقفه عليك
جابر / دا ايه الجنان ده هتباتى فى الشارع يعني
نجاه/ ما لكش دعوه
جابر / معاكى فلوس طيب و لا انتى مش واخده بالك انك نسيتي شنطتك فوق
نجاه تقف و تبص له
نجاه / انت عارف انت بس لو بعدت عنى و اختفيت دلوقت ... كل مشاكلى هتتحل اه و ربنا
جابر / انتى بتسوقى فيها على فكره و انا بحاول استوعبك بس احنا فى الشارع
نجاه تعدى الشارع بسرعه جابر يجى يعدى ميكروباص يعدى جابر يقف الميكروباص مفيم يعدي نجاه اختفت جابر يبص يمين و شمال و يفضل يلف حوالين نفسه بزعر
جابر / نجاااه !! نجااااه !!!!
....................