الكبيره ٢ بقلم / لولو_محمد

الحلقه ١٥

(((((((( الكبيره ٢ ))))))))
#لولو_محمد
الحلقه ١٥
وفاء / خير فى حاجه و لا ايه
دياب / قلقتك و لا ايه حقك عليا
وفاء / فى ايه مالك ايه اللى مصحيك دلوقت
دياب / كنت بتفرج على تسجيل الكاميرات للماتش بين جابر و جوزيف
وفاء / تانى دى تالت مره تتفرج عليه
دياب / الوله حافظ جابر و بيصد قبل حتى ما جابر يبدا حركته
وفاء / ما تقولش انك عاوز تلاعبه
دياب / الحوار ده لولا تدخل احلام ما كانش انتهى على خير
وفاء/ يعني الحمد لله هتشيل الفكره دى من دماغك
دياب / لا عاوز اللاعبه
وفاء/ و الله كنت متاكده ما انا حفظاك و صماك
دياب / تفتكرى حافظنى انا كمان ... طب شافنا بنلعب فين دا احنا بقينا فين و فين لما بنلعب و كل واحد بيتمرن بطوله
وفاء / لا دا انت يومك طويل عن اذنك انا اخش الحمام و ربنا يعينك على اللى انت فيه
وفاء تقوم تروح الحمام و دياب بيضحك
.........................
فى المطبخ
نجاه بتقلى طعميه و سرحانه عباده واقف جنبها يدخل و يخرج الطعميه نجاه تنتبه
نجاه / هات عنك
عباده / عنى ايه بقي هنياله
نجاه / هو مين
نجاه تاخد من ابوها و تحط طاره جديده
عباده / اللى شاغل عقلك
نجاه / هو جوزيف هيمشي امتى
عباده / النهرده
نجاه/ كويس
عباده / هو كان بيقولك ايه عند المضيفه
نجاه / سر ... هو انا المفروض اقولك قالى ايه
عباده يبصلها و يبتسم
نجاه / شكرا على المساعده
نجاه تطلع الطعميه و تحطها فى طبق فى صينيه عليها اكل 
نجاه / ممكن توديله ياكل لحد ما اخلص فطارنا احنا
عباده / ممكن ... هاتى
عباده ياخد الصينيه و يبص لنجاه
نجاه / ايه اقول و لا ما اقولش ما انا مش عارفه ايه الصح الله هو مش انت ابويا
عباده يضحك و يمشي
نجاه / افهم ايه انا طيب
نجاه تنفخ و تبص تلاقى الطعميه هتتحرق تجرى و هى متلهوجه تلحقها و تطلعها
نجاه / انا قولت المطبخ ده مش مكانى حاشريني فين ليه ... كلوها ملسوعه بقي
نجاه تدوق واحده سخنه جدا تقعد تتنطت و هى بتنفخ
نجاه / حلوه حلوه تدارى فى وسط الكميه
نجاه تضحك و تكمل
......................
فى شقه دورين بسلم داخلى و مليانه رجاله
مختار يدخل و وراه همام و كذا راجل
مختار / السلام عليكم يا رجاله
راجل ١ / حمد الله على السلامه يا سيد الناس كل حاجه زى ما امرت بالظبط
مختار / مش عاوزين الجماعه يبقي ناقصهم حاجه
شاكر يطلع من المطبخ
شاكر / ما يكونش عندك فكر كل حاجه تمام ... نورت يا ابن عمى البقاء لله شد حيلك
همام / و نعم بالله ما نعزيكش فى غالى
مختار / ايه رايك فى المكان ... الرجاله هترتاح هنا
همام/ الرجاله بيرتاحوا فى اى حته المهم هو يرتاح وسطيهم
شاكر / ما اعتقدش انها فكره كويسه اننا نخليه هنا معاهم يابويا ... الواد مش قليل
همام / شوفنا اللى يقدر عليه ما شافش هو اللى نقدر احنا عليه
مختار/ ما ينفعش نسيبه يغيب عن عنينا
شاكر / اللى تشوفوه بس انا قولت رايي ... من اللى شوفته منه هو متعاون جدا كل اللى طالبه الاحترام
همام يبص لشاكر
همام / ما تقلقش يا شاكر انا هتعرف عليه و اديله الاحترام اللى يليق بيه
مختار / طب ايه مش هناكل لقمه الاول و لا ايه ... ايه يا شاكر
شاكر / ازاى بس يا بويا الاكل جوه كتير و متقسم فى علب ثوانى اوزع بس
مختار / طب خليني اساعدك الناس جايه من سفر طويل عاوزه ترتاح
مختار يروح مع شاكر المطبخ و الرجاله تتوزع فى المكان
........................
فى المران
نجاه مغطيه عنيها بطرحه و بتركب سلاح بسرعه و جوزيف واقف ماسك ليها استوب واتش اول ما تخلص تشد الطرحه
جوزيف / انتى ميته من ثانيتين و ستاشر لحظه
نجاه / انت محبط جدا انا اول مره اتعامل مع السلاح ده اصلا
جوزيف / ترابيزه زى دى انا قاعد النحيادى و واحد تانى قاعد الناحيه التانيه اللى هيركب سلاحه الاول هيقتل التانى تفتكرى هشتغل بنفس السرعه
نجاه / اكيد لا
جوزيف / طب جربى مره كمان قبل ما ننقل على السلاح اللى بعده
نجاه / انت سايب القنابل فى المضيفه
جوزيف يبتسم
نجاه / ممكن حد يدخل ينضف يتاذى ... ممكن عيل الفضول ياخده و يدخل يلعب فى حاجتك
جوزيف يروح يفتح شنطته و يطلع منها شنطه القنابل و يفردها قصاد نجاه نجاه تبصله
جوزيف / اكيد مش هسيب حاجتى مشاع يعنى
نجاه / انا ما قولتش لحد
جوزيف / عارف بس مش فاهم ليه
نجاه / انت قولت انه سر
جوزيف / كان ممكن حد يدخل ينضف او طفل الفضول ياخده
نجاه / مش عارفه حسيت انه ما ينفعش اقول ... انا اصلا مش مظبوطه كل تصرفاتى غريبه و مش منطقيه
نجاه تنفخ
جوزيف / ايه رايك لو اكتفينا تدريب النهرده و اتكلمنا شويه
نجاه / فى ايه
جوزيف / عنك مثلا ... عنى ... شوفى محتاجه تعرفى ايه او قلقانه من ايه اى حاجه جواكى حاسه انك محتاجه تتكلمى فيها قوليها اى حاجه مضيقاكى ..  حتى لو منى قولى اللى انتى عيزاه انا هسمعك
نجاه / ليه ؟ مش فاهمه يعني المفروض اقول ايه ؟ و انت اصلا هتسمعنى ليه ؟
جوزيف / طب ايه رايك اتكلم انا
نجاه / يا ريت
جوزيف يقعد قدامها
جوزيف / انا شوفت حاجات كتير اوى فى الدنيا دى شوفت راجل طول بعرض مستعد يوطى على رجلك يبوسها عشان ترحمى عياله شوفت اب ما اترددش ثانيه انه يموت نفسه عشان خاطر يفدى بنته مع العلم انه كان متاكد اننا مش هنسيب بنته برده بس قتل نفسه فى لحظه ... شوفت عيال بيضحوا بابوهم عادى عشان ينقذوا نفسهم شوفت اهل قدموا كل اللى يقدروا عليه لولادهم و اولادهم ما قدروهمش ... عباده بقي ... ابوكى يعني ... انتى هتتجننى و تطمنيه عليكي و هو ما فكرش لحظه انه يفديكي
نجاه / عشان ابويا مش اهبل مع العلم ان ابويا تعب جامد و التعب باين جدا عليه مش عارفه انت ازاى مش شايف ده ... هو بيكابر عشان ما نشوفوش مكسور و تعبان بيجى على نفسه و يقف عشان ... عشان احنا محتاجينه ... ابويا ده حاجه ما ينفعش تتكسر ... كلنا هننكسر ... هنموت لو جراله حاجه
جوزيف / تفتكرى لو عندى بنت هتحبنى قد ما بتحبيه كدا
نجاه / لو حبيتها زى ما حبنى و قدمتلها اللى قدمهولى هتحبك اكيد و بعدين دا كله رزق سيدنا نوح عليه السلام ابنه كان كافر دا رزق او ابتلاء ما حدش عارف الخير فين
جوزيف / مش تربيته يعني
نجاه / ما اعرفش
جوزيف / تفتكرى ابويا كان هيحبنى
نجاه / اللى اعرفه انه كان حنين اوى ... باد بوى لو فاهم قصدى بس كان جدع فى وقت الشده معدنه الأصلي بيظهر ربنا يرحمه كان خاربها
الاتنين يضحكوا
نجاه / طلبوا منه يدخل فى وسط رجاله فيرا بما انه ... زيك كدا ... و هناك شاف بنت ... يعني ... مش عارفه اقولهالك ازاى بس هى بنت كويسه و هم بيجبروها تشتغل معاهم و تبقي زيهم بس هى ... صعبت عليه و اشتراها بتلاته مليون و دا كان مبلغ كبير جدا وقتها و حماها و عمل اللى يقدر عليه عشان يلاقيلها علاج من البى كاى ... صحيح البى كاى ... له علاج و لا لازم التلت ايام و الجديد اللى انت حقنتنى بيه ازاى بقي بيشتغل بالسرعه دى كان المفروض
جوزيف / البنت دى تبقي امى
نجاه / لا مامتك واحده تانيه ... بس ماتت برده بتوع البى كاى قتلوها و هم بيجبروها ترجع للحرام تانى
جوزيف / ما ليش اخوات صح
نجاه / مش على قد علمى ... لا ما لكش
جوزيف / البى كاى لسه موجود بس ... مش سهل تحطى ايدك عليه ... لانه يعتبر ... سلاح مش علاج ... و طبعا اشتغلوا عليه كتير عشان يغيروا من خواصه ... بس زى اى ماده بتروح من الجسم بعد فتره
نجاه / سم ... مش ماده
جوزيف / انا ما كنتش متخيل انك هتعدى منه اصلا ... كان هدفى تموتى بالبطئ قدام ابوكى و هو عاجز انه يساعدك
نجاه / فى وشي عادى كدا !!
جوزيف يضحك
نجاه / بس انت اتصلت و اديت لجابر العلاج
جوزيف / و الطبيعى انه ما يصدقنيش و يمنع عنك الميه و وجعك يزيد بس ... هو وثق فيا ... انتوا ناس غريبه جدا
نجاه / الغرقان بيتعلق بقشايه
جوزيف / صحيح
نجاه / امايا
جوزيف / لما كنا فى المعسكر كان معانا ملاك برئ سموه امايا زى ما سمونى جوزيف امايا ماتت و الكلاب كلتها قدامنا و فى نفس اليوم بالليل قالولنا ان بابلو كمان مات و جينا كانت حامل و جالها الطلق و اغم عليها و خدوها و افتكرتها هى كمان ماتت و ساعتها كنت لوحدى … ساعتها قررت انى لازم اموت بس و انا بموت لازم اخد اكبر قدر ممكن منهم معايا ... كان الموت بيهرب منى
نجاه / استغفر الله العظيم انت ايه اللى بتقوله ده استغفر
جوزيف يضحك نجاه تضايق
نجاه / لكل اجل كتاب كل واحد فينا هيموت فى يوم محدد فى ساعه محدده بطريقه محدده و مفيش حاجه هتغير ده انت بس ليك عمر تعيشه انت ازاى عقلك شغال بالطريقه دى
جوزيف / خلينا نغير الموضوع ده
نجاه / لا ... مفيش اهم من الموضوع ده ... انت عمرك ما فكرت انت عايش ليه او ايه الهدف من كل ده
جوزيف / ما فكرتش فى غيره
نجاه / و عمرك ما لقيت الاجابه ؟عمرك ما فكرت ان ربنا خلقنا نعمر الارض و نعبده و
جوزيف / انهى تعمير معلش الانسان ما عملش حاجه غير انه خربها
نجاه / ما حصلش الإنسان اشتغل قرون و تعب و بنى و كبر و انتج و اخترع هو حالك زى حال اهل الكهف مثلا لا طبعا الناس عمروا الارض و لحد قيام الساعه هيعمروها برده
جوزيف / و الحروب و الدمار و الجوع و الفقر و كل الحاجات دى تحطيها فى انهى بند
نجاه / تعال نبدا من الاول تمام ... ربنا سبحانه و تعالى لما خلق الكون و خلق الملايكه و الجن و الشياطين و خلق سيدنا ادم عليه السلام امر الكل يسجدله بس الشيطان استكبر
جوزيف / عارف الحكايه دى و ان الشيطان وسوس لادم و مراته خلته ياكل من الشجره فنزلنا على الارض نتمرمط كدا فاهم القصه اتحكتلى كتير
نجاه / لا القصه مش كدا القصه ان الشيطان اتحدى ربنا الشيطان كان ممكن يتوب فى اى وقت و لحد دلوقت ممكن يتوب يستغفر يندم لكن الشيطان كبره مانعه انه يعترف انه غلط و مستمر فى الغلط و دا الفرق بينا و بين الشيطان اننا بنغلط اه بنرتكب ذنوب بس بنتوب و نستغفر و ربنا تواب رحيم
جوزيف / ايوه ايوه و نلف نرجع نعمل نفس الذنب تانى و نتوب تانى بنلعب احنا
نجاه / انت فاكرها حاجه وحشه و لا حتى حاجه سهله يا ابنى فوق بص اسمعنى بس و حاول تفهم كلامى و تفتحله قلبك انت ذكى بس ... مش عارفه ... بص اسمعنى بس تمام
جوزيف يهز راسه حاضر باستهزاء
نجاه / الشيطان عصا ربنا و بدل ما يتوب و يعتزر اتحداه و قاله انه هيغوى البشر و اه نزلنا الارض و بدا ادم عليه السلام و ستنا حوا يعمروا فى الارض و يتكاثروا و بعدين ايه اللى حصل حصلت اول جريمه قتل قابيل قتل هابيل بدافع الغيره و الحقد و اكيد وسوسه من الشيطان و بدا الناس يتكاثروا برده نسل بعد نسل و يعمروا فى الارض و ظهر ناس تقيه بتعبد ربنا بكل طاقتها و لما ماتوا الناس كانوا عاوزين يفضلوا فاكرينهم عشان ياخدوهم قدوه فبنولهم تماثيل و جيل بعد جيل نسيوا التماثيل دى كانت بتاعه مين و كان بيدعوا لايه و ضلوا طريقهم و بدئوا يعبدوا التماثيل دى اللى هى اصلا اتعملت عشان تفكر الناس بالانسان اللى كان بيعبد ربنا و يدعوا الناس لهدايته الناس ضلت. ربنا لانه رحيم بعتلهم رسول و را التانى و الناس تتهدى و ينضف الارض من الناس اللى بتعصاه بانه ينزل عليهم العذاب عشان برده يكونوا عبره و برده الناس تستقيم شويه و ترجع تضل طريقها تانى و ربنا يرحمهم تانى و يبعتلهم رسول تانى و الحياه مستمره و التعمير مستمر و الضلال برده بيلاقي طريق و يوصل للناس لحد ما جه اكمل الخلق سيدنا محمد عليه الصلاه و السلام خاتم الانبياء
جوزيف / ليه بقي
نجاه / عشان يتم الدين و يكمله
جوزيف / ليه اخرهم ليه ربنا فقد الامل فى الناس و لا بطل يبعتلهم رسل و بطل يتوب عليهم و لا ليه اخر الانبياء ليه ما كانش نبى واحد طول العمر ليه فضل يبعت فى رسل كتير ورا بعض و بعدين قال ده الاخير ليه بقي
نجاه / هو انت بما انك بتراعى مشاعرى طول الوقت و تحددلى مواعيد الصلاه و القبله حتى و انت مش من دينى ممكن تتكلم بأسلوب احسن من كدا
جوزيف / انا ما اقصدش حاجه انا بسال فعلا و يا ستى انا اسف انا فعلا عاوز اعرف ليه محمد ... سيدنا محمد اخر الانبياء
نجاه / ما اعرفش بالظبط لانى عمرى ما سألت فيها بس يمكن لان خلاص ما عادش فى حاجه ناقصه فى الدين هو كدا اكتمل
جوزيف / طب ليه ما نزلش كامل من الاول ليه كان فى اديان او دين متقسم على مراحل ليه ما نزلش الاسلام مره واحده كامل مره واحده من الاول ليه كان فى ديانات ورا بعض يهوديه بعدها مسيحيه بعدها اسلام مش فاكر كان فى ايه قبل اليهوديه
نجاه / الدين كامل من الاول الاسلام هو دين واحد من الاول و دا بنصوص القران المسميات دى الناس اللى سمتها لاسباب انا ما اعرفهاش بس اوعدك انى ابحث فيها ... على فكره انا اول مره اتحط فى موقف زى ده او اتكلم مع حد زيك و انا مش اهل للدعوه و لا انا داعيه انا مسلمه بجاوبك من اللى انا مؤمنه بيه و رايى الشخصي اللى بيحتمل الصواب و الخطا فاهمنى اكيد
جوزيف / ماشي كملى
نجاه / الدين ما بيتغيرش الناس بتتغير و تضل طريقها سيدنا ادم عليه السلام كان مسلم سيدنا ابراهيم كل الانبياء كانوا مسلمين بيعبدوا ربنا ازاى ؟ بيصلوا زينا و لا لا ؟ انا مش متاكده بس سمعت ان كان فى العهد القديم للانجيل و العهده على الراوى لانى ما شوفتش الكتاب بعيني ان كان سيدنا عيسي عليه السلام بيسجد لله هل كان بيسجد زينا او بيقول كلام تانى انا ما اعرفش لان التفاصيل دى انا عمرى ما فكرت ابحث فيها بس اكيد اكيد لازم افرغ نفسي انى ابحث كتير فى الموضوع ده و اجيبلك الاجابات الصح
جوزيف / مش دورك
نجاه / لو هكون سبب فى هدايه انسان انت مش متخيل دى حاجه عظيمه عند ربنا قد ايه
جوزيف يبتسم
نجاه / انك لا تهدى من احببت و لكن الله يهدى من يشاء
جوزيف / ايه ده بالسرعه دى طب استنى نقرب من بعض شويه
نجاه تمسك السلاح و تهدد انها تحدف بيه جوزيف و هو بيضحك
نجاه / دى ايه فى القران اهمد بدل ما اتغابى انا خلقى ضيق ... كنا بنقول ايه
نجاه ترزع السلاح على الترابيزه و جوزيف بيضحك
نجاه / ااااه ... المهم ان الدين اكتمل و القران ثابت محفوظ من يوم ما نزل بقدره ربنا ما فيش حرف اتغير فيه و لا حتى تشكيله اتغيرت فالدين ثابت اهو و كامل و كل يوم بحمد الله و فضله ناس كتير جدا بتدخل الاسلام و الناس دى سبحان الله بيجوا من اخر مكان ممكن تستنى يجوا منه من اكتر مكان بعيد عن المسلمين و دا اكبر دليل على عظمه و صحه الدين ده و الا مستحيل كل الناس دى على مدى العصور دى كانوا هيفضلوا مؤمنين بنفس الدين بنفس التفاصيل بنفس كل حاجه بقوه العقيده دى لو الدين ده غلط
جوزيف / مبدئيا هو كلام جميل جدا بس الحقيقه ان معظم المسلمين مش بيعملوا حاجه من اللى الدين بيقول عليه اصلا
نجاه / ما هو مش كل المسلمين مسلمين فعلا
جوزيف / طيب ما تقوليش بقي اقوى دين و الدين منتشر و الكلام ده ما يمكن نص التعداد ده فايك اصلا
نجاه / لا لا استنى خليني اوضحلك
جوزيف / وضحى
نجاه / انا لو مش مسلمه حقيقيه مش هقدر انشر ديني لانك مش هتشوف ده فيا يعني مثلا انت عمرك ما كنت هتسمعنى و انا بتكلم لو ما شوفتش منى ايمان و ثبات على مبدئى و ديني تنكر ؟
جوزيف / ما اقدرش ... حقيقي فعلا
نجاه / اللى اعرفه ان كان فى مرحله من المراحل فى الحرب كان اليهود بيسيبوا مصر و يسافروا فلسطين و ناس كتير ما رضيتش تسافر فكان الحل انهم يعلنوا اسلامهم و ناس كتير جدا عشان يهربوا من حوار ان مفيش طلاق فى المسيحيه فاعلنوا اسلامهم بس ان كانوا دول و لا دول فهم من جواهم على دينهم القديم و بيتعاملوا قدام الناس بدينهم القديم بس محسوبين على المسلمين ... فانا مش عارفه و يا سيدي ربنا يهدى الجميع ما حدش عارف الخاتمه هتبقي ازاى ... تعرف حكولنا مره عن اتنين ..  قصه كدا فى حسن الخاتمه ... اتنين فى نفس البلد واحد سكرى و خاربها و واحد عابد و شيخ و ربنا يفتح علينا كدا انت فاهم ... المهم العابد ده جه فى مره و قال للسكرى كلمه كدا يعني انه هيولع فى جهنم او هيبقي كافر حاجه زى كدا يعني مش متذكره التفاصيل اوى و سبحان الله يجي السكرى فى يوم يقرر يتوب و يدخل يصلى فى المسجد اهو من باب سبحان الله بقي ربنا اعلم باللى فى القلوب فتطهر و اتوضي و دخل المسجد يصلى و لسبب ما برده الشيخ العابد ده حد غواه و قرر يجرب الخمره فى يوم و سبحان الله ربنا يقبض روح الاتنين تخيل يا يونس ... السكرى مات ساجد و العابد مات سكران دا عشان كدا ديما و انت ساجد ادعى ربنا بحسن الخاتمه
جوزيف / يعني كل اللى عملوه اتمسح و الخاتمه بس اللى تتحسب
نجاه / تخيل
جوزيف / طب ما قشطه بقي اعيش و اهربد و اجى فى الاخر و اتوب
نجاه / و انت بقي يا اذكى اخواتك عارف اخرتك امتى ما يمكن دلوقت يمكن بكره ... سبحان الله اخفاها لسبب و السبب ده اكيد جزء منه اللى انت لسه قايله دلوقت
جوزيف / كملى
نجاه / اكمل ايه ؟ اسال انت
جوزيف / انا مش عاوز اسال فى حاجه انا عاوز اغير الموضوع اصلا
نجاه / بعينك انت فاكر دخول الحمام زى خروجه
جوزيف يضحك
نجاه / لسه كنت بقولك ان كل اللى احنا فيه بسبب كبر الشيطان انه لحد دلوقت ما تابش و مش هيتوب انما الانسان عنده الفرصه دى و انت لو ربنا كاتبلك الهدايه فعلا هتفكر و هتبحث و هتقدر تتاكد بنفسك ان ربنا موجود يا سيدي ابحث فى قصه سيدنا ابراهيم اللى اكتشف ربنا بالتامل فى الكون ... اصل مستحيل يكون الكون ده جه صدفه اكيد فى خالق عظيم ورا كل ده انت بس فكر بعقلك
جوزيف / ابوكى امبارح قالى ان مش صدفه ان من كل البشر على الكوكب ان انا اللى اخطفك يعني مش صدفه ان من كل البشر على الكوكب انا اللى اعيش كل ده و مش صدفه ان انتى مثلا تتربى فى بيت و انا اتربى فى المعسكر مش صدفه انك تلاقى اللى يغطيكي بالليل و امايا تتعرى كل ده مش صدفه صح و المفروض ان فى الاخر انتى تدخلى الجنه و هى تدخل النار صح
نجاه / لا مش صح ... انا اه ظروفى كانت احسن بس فى مليون بنت فى نفس ظروفى و عملوا الغلط و مليون بنت فى ظروف امايا و يمكن اسوء و اختاروا الصح زى امك مثلا و زى ابوك ... و زى سمر مرات ابوك ... اه طبعا النصيب و القدر ليهم دور كبير فى حياتنا بس احنا فى ايدينا نختار و افتكر حوار حسن الخاتمه
جوزيف / بتتكلمى لانك ما جربتيش
نجاه / جربت ... جربت حاجات كتير يمكن مش زى امايا بس جربت ..  و كان على يدك ... قولى انت ... انا اتنازلت كام مره
جوزيف / انا ما رضيتش اكسرك
نجاه / ما كانش بكيفك ربنا اجبرك
جوزيف / طب ربنا سمحلى ليه اقلعك و اتصور معاكى سمحلى ليه اخطفك من الاول
نجاه / بيختبرنى و بيختبر ايمانى و ايمان اهلى
جوزيف / عندك سبب لكل حاجه مش كدا
نجاه / فكر فيها معقول الكون ده كله جه صدفه كل حاجه فيه صدفه طب احنا عايشين ليه و اخره حياتنا ايه لو مفيش حساب ايه اللى يخلى الناس تعامل بعض كويس ليه ما نبقاش كلنا حيوانات و ناكل فى بعض و نقلبها غابه و البقاء للاقوى
جوزيف / ما هى غابه و البقاء للاقوى فعلا
نجاه / دا عشان فى ناس مش مؤمنه بالحساب هى دايره واحده و كل الحاجات بتلف حواليها
جوزيف / انتى مفيش فايده من الكلام معاكى
نجاه / و انت بتهرب لأنك مش عاوز ترد و الاسوء ان الحقيقه قدامك انت اللى مش عاوز تشوفها مش عاوز تفكر
جوزيف يتعدل فى الكرسي و يبتسم
نجاه / انت ليه كنت حريص انى اصلى مع انى كنت فى مكان مش هعرف فيه الوقت و لا القبله حتى
جوزيف / و انتى اش عرفك ان الوقت و لا حتى القبله كانوا صح
نجاه / الوزر عليك
جوزيف / كانوا صح
نجاه / ليه بقي
جوزيف / عشان انتى عاوزه ده
نجاه / انا ما طلبتش منك ده
جوزيف / قلبي دليلى
نجاه/ ما عندكش مبرر انت عملت ده عشان ربنا خلاك تعمل ده يمكن مش عارف انه ربنا بس فى حاجه قويه جواك اجبرتك تعمل ده حاجه ما لهاش مبرر حاجه مش فاهمها حاجه ما لهاش اسم عندك بس حصلت دى اسمها اراده ربنا فوق كل شئ
جوزيف / كل حاجه هتلفيها و ترجعيها لنفس النقطه
نجاه / ما قولتلك هى دايره كلو بيوصل لكلو ... بص خلينا نحسبها بالمنطق ... بص خلينا نتخيل
جوزيف / انتى بترغى كتير اوى 
نجاه / و انت هتسمع على فكره و دا مش عشان سواد عنيك
جوزيف / زراق
نجاه / دا عشان خاطر ابوك الله يرحمه ..  و اهمد بقي قولتلك خلقى ضيق .. الله 
جوزيف يبتسم
نجاه / زمانه حزين على حالك ... الميتين بيحسوا على فكره
جوزيف / و ايه كمان
نجاه / ما بهزرش على فكره بيحسوا فعلا ... مش بجسمهم بروحهم
جابر يدخل
جابر / بتحرقى معاه جاز على الفاضي ... لا مؤاخذه لقيتكوا طولتوا فى الرغى و مفيش تمرين و لا حاجه قولت رغى برغى ادخل ارغى معاكوا
جوزيف / اتنين على واحد
جابر / ما تقولش على نفسك كدا انت بالف
جوزيف يبتسم و يبص الناحيه التانيه
جوزيف / اصلا احنا خلصنا هنا نروح ناكل لقمه و نريح شويه و بالليل نكمل تمرين على حاجه تانيه
جابر / نروح تلم حاجتك و تروح بيتك الجديد ... همام وصل و معاه شويه من رجاله بحرى زياده امان اما نشوف الدنيا هنا هترسى علي ايه
جوزيف / و مين هيحمى اهل همام ... كل المطلوب يخطفوا ابنه او ابن اخوه و خلصت الحكايه همام بقي شوكه فى ضهرك انت و كلب عندهم
جابر / ما تشغلش بالك احنا عاملين حسابنا كويس
جوزيف يشاور على نجاه
جوزيف / ما انا شوفت ... تمام ... اللى تشوفوه اعملوه ... يلا بينا
جابر / يلا
التلاته يقوموا و جوزيف يلم حاجته فى شنطته
جوزيف / انا جاهز و حاجتى كلها معايا وديني يا سيدي البيت الجديد ده اما نشوف مجهزينلى ايه هناك
جابر / اتفضل
جوزيف يتحرك نجاه تيجي تحصله جابر يشدها من ايدها ياخرها
جابر / هو انا بقيت شفاف بالنسبالك عشان اعمل حسابى بس
نجاه / ليه بتقول كدا
جابر / يعني رايحه جايه مع البيه و انا اقوم ادور عليكي ايه الحكايه
نجاه / ما ابويا عارف انى هنا و باعت معانا الغفر
جابر / و انا مالى بابوكى انتى ايه حكايتك
نجاه / ايه !! مالك بابويا ازاى يعني و انا لما احب اخد اذنى اخده من مين منك و لا منه
جابر يبصلها و يكتم جواه و يسكت
نجاه / اهدى يا جابر المكان مردوم كاميرات و انت عارف ما كناش لوحدينا يعني
جابر / انا الكلام ده مش عاجبنى
جوزيف / خير ... هستنى كتير ... فى مشكله عندك يا جابر
جابر / لا مفيش
جابر يبص لنجاه و هى مستغرباه جابر يمشي يسبق جوزيف نجاه تتنهد و تمشي وراه و جوزيف وراهم و الدنيا مش فارقه معاه
.........................
فى مكتب الزنايته
مغاورى / احنا كدا حطينا همام فى وش جوزيف و خلعنا يعني و لا ايه
مختار / لازم يقدروا يلاقوا حل للخلاف اللى بينهم
مغاورى/ خلاف ايه يا ابو شاكر جوزيف و همام مفيش بينهم خلاف دا تار يا ابن عمى دم ابوه اللى لسه حتى ما بردش دول ممكن يقتلوا بعض ... خصوصا ان همام مش لوحده
مختار / انا اتكلمت مع همام و هو عاقل مش هيعمل حاجه
مغاورى / مين اللى عاقل ؟ همام !!
عباده / همام اتغير كتير عن زمان كبر و عقل و فاهم هو بيعمل ايه
مغاورى / انتوا شايفين اللى بيحصل ده صح يعني شايفينه عادى اصلا
عباده يتنهد
مغاورى / على العموم انا كلمت ناس كتير تبعنا فى بحرى و غيره و باذن الله هيكون عندنا قريب رجاله كتير تسد عين الشمس
مختار / مش بالعدد
مغاورى/ و من امتى الجوارحه كانوا عدد بس جرا ايه يا مختار انت كبرت و بقيت تنسي و لا ايه
عباده / و الله حتى لو همام كبر و عقل انت عمرك ما هتكبر يا مغاورى
مغاورى / عشان طول عمرى عاقل
التلاته يضحكوا الباب يخبط فارس يدخل
فارس / الاكل جاهز يا كبير و جابر جاب نجاه بره لو تحبوا الحريم تغرف ناكل
مختار / انتوا لسه ما غرفتوش قولهم بسرعه يا ابنى
فارس / حالا يا عمى
فارس يمشي التلاته يبصوا لبعض و يكملوا ضحك
...................
فى جنينه الجوارحه
وفاء مراه شاهين قاعده فى الجنينه لوحدها ياسمينا معديه تشوفها حزينه تروح تقعد جنبها
ياسمينا / السلام عليكم ... مالك قاعده لوحدك ليه
وفاء / بتشمس
ياسمينا تبص على السما
ياسمينا / الشمس راحت خلاص ... انتى كويسه يا وفاء
وفاء / الحمد لله انتى عامله ايه
ياسمينا / كويسه الحمد لله ... مالك بجد بقالى فتره متبعاكى علاطول لوحدك حتى حماتك ما عدتيش بتقعدى معاها زى الاول دا انتوا ما كنتوش بتفترقوا
وفاء / و لا دلوقت بنفترق دا هى حتى لسه رسمالى تاتو من شويه و صبغالى شعرى
ياسمينا / بجد !! واو لون ايه
وفاء / اشقر
ياسمينا / انهى درجه فى الاشقر
وفاء / ما اعرفش هبقي اوريهولك بعدين اهو اصفر كدا لون خوجاتى ما بحبوش اصلا
ياسمينا / معقول و ما دام ما بتحبيهوش بتعمليه ليه
وفاء تتنهد
ياسمينا / هو وحش اوى كدا ... طب ممكن نطلع اوضتى اشوفه يمكن اقدر اظبطهولك على فكره انا شاطره جدا في الشعر و الميك اب
وفاء / اكيد مش ياسمينا الجمل
ياسمينا / اوعى تكونى بتالسي عليا
وفاء / ابدا و الله ... انا بس ... ما تشغليش بالك تلاقيها هرمونات
ياسمينا / يااااه انتى هتقوليلى عرفاها
وفاء / هو انتى ما بتزهقيش و منصور معظم الوقت بره
ياسمينا / الله يعينه و يسلمه هيعمل ايه دا حتى اوقات كتير اقسم بالله بيبقي هنا فى السرايا و برده بيشتغل و تسمعى منى ... يشتغل بره احسن ما يشتغل فى البيت لما بيبقي هنا حتى النفس ما بجرؤش اتنفسه جنبه و لا ان عبد الرحمن يدخل الاوضه حتى
وفاء / معقول !! ليه بيتعصب و لا ايه
ياسمينا/ مين منصور !! ابدا ربنا يباركله يا رب بس بيصعب عليا لو غلط بيقعد يعيد من الاول و ممكن ما ينامش و يفضل قاعد على القهوه و افضل حاسه بتانيب الضمير انى لو كنت سكت و سبته يركز كان زمانه مرتاح طب اقوله ينام و يكمل بعدين و لا بلاش لالخبطه تانى
وفاء / طب انتى بتشوفى اللى هو بيعمله بتفهمى فيه يعنى 
ياسمينا / نهائى لا افقه شئ فى البتنجان
وفاء / امال بتشاركيه اهتماماته ازاى
ياسمينا / و الله لو عاوز يتكلم فى اى موضوع اكيد هسمعه عادى و ممكن اساله بصنعه لطافه كدا لو هو رايق اتكلم معاه و اكيد ليا نظر للحاله اللى هو داخل عليا بيها لو ينفع اتكلم فى اى موضوع و لا اولى اسيبه يرتاح
وفاء / مش فهمانى ... انا اقصد مثلا ... بصي ... انسي انسي انتوا اصلا عمركوا ما اتخاقنقتوا فمهما اقول مش هتفهميني
ياسمينا / مين قال لا طبعا بنتخانق كتير و بزعل و بتقمص و بيزعل و بيتعصب و كل حاجه اي هو فى اتنين فى الدنيا ما بيتخانقوش
وفاء / بتتخانقوا ليه
ياسمينا / على ايه يعني ؟ لا ما لهاش حاجه محدده كل حاجه ممكنه عادى قولتلك مفيش اتنين ما بيتخانقوش ... هو ده اللى مضايقك بقي انتى قافشه مع شاهين
وفاء / لا مش متخانقين
وفاء تبص الناحيه التانيه بحزن ياسمينا تحس وفاء تبصلها ياسمينا تبتسم بحرج
وفاء / انا مش قليله ... انا بنت ناس
ياسمينا / عارفه
وفاء / و اختى اطلقت عادى ما حدش كلمها و ربنا كرمها بعدها بسنتين بعريس شايلها من على الارض و عوضها يعني عادى
ياسمينا / للدرجادى
وفاء / بس انا بحبه
ياسمينا / طب فين المشكله
وفاء / هو مش شايفني خالص ... انا مش عارفه انا بقولك ليه انتى مش هتفهمى اللى بقوله اصلا و كل ما اشتكى الموضوع يتحور لسكه تانيه و ببقي انا الغلطانه مع انى و الله ما قصرتش ... او على الاقل مش عارفه انا مقصره فى ايه
وفاء تعيط ياسمينا تاخدها فى حضنها
ياسمينا / ما فكرتيش تكملى تعليمك يا وفاء
وفاء تبصلها
ياسمينا / اتسلى فى اى جامعه مفتوحه اونلاين و ليكي عليا انا هساعدك فى اى حاجه تحتاجيها و مش بس كدا هظبطلك نيو لوك كل مره ينسيه اللى قبلها و مش بس كدا تؤ تؤ تؤ دا انا هعملك لو حكمت مكياج كل يوم و اساعدك تظبطى لبسك
وفاء / ما امى سماح بتعمل كدا و مفيش فايده
ياسمينا / يا ستي نجرب لعل و عسي ... مش انتى بتحبيه يبقي خلاص نحاول
وفاء / و انتى هتستفيدي ايه من انك تساعديني انتى اصلا ما بتساعديش حد
ياسمينا / لا بساعد بس بساعد اللى بيطلب بأدب مش اللى بياخدوها حق مكتسب و بيتامروا عليا فى ضهرى انا طيبه اه لكن مش هبله اساعد اه بس ما حدش يستغلنى
وفاء / شكرا
ياسمينا / فكيها بقي ما حدش اصلا يستاهل تضايقي نفسك كدا عشانه
وفاء / قلبي يستاهل يا ياسمينا قلبي متعلق بيه اوى
ياسمينا / ربنا يهديهولك انتوا برضه صغيرين ... انسي انسي ادعيله ربنا يهديه و باذن الله يتصلح حاله
وفاء / يا رب
.............................
فى شقه همام
جوزيف يطلع من اوضه و يقفل الباب يلاقي همام و اتنين رجاله بيتفرجوا على التليفزيون
جوزيف / حد هيحتاج الحمام ... هاخد شاور سريع قبل ما انزل
همام من غير ما يبصله
همام / خد راحتك
جوزيف يبتسم و يدخل الحمام راجل يغمز همام على اوضه جوزيف
راجل ٢ / اديله دقيقتين لما يقلع
همام / اتلموا
راجل ١ / هو احنا هندخل عليه الحمام احنا هندخل نفتش فى حاجته يمكن نلاقى حاجه
همام /  و هو عيل اهبل مش مركب كاميره يلقط وش اللى يدخل
راجل ٢ / اللى فى ايده يعمله انا قايم ابص
همام / ممدوح  ... ممدوح اقعد
ممدوح يروح ناحيه الباب اول ما يمسك الاوكره يتكهرب يصرخ يسحب ايده و هو بينطرها
...............................