الكبيره ٢ بقلم / لولو_محمد

الحلقه ١٤٠

((((((( الكبيره ٢ )))))))
#لولو_محمد
الحلقه ١٤٠
فى شقه جوزيف
تليفون جوزيف يرن يروح يمسك الموبايل يلاقي نجاه يستغرب و يرد
جوزيف / نجاه ؟!!! خير
نجاه/ سؤال اجابته اه أو لا انت روحت ساعدت امايا على اللى حصل النهرده ؟!
جوزيف / روحت
نجاه تقفل السكه يتصل بيها معمول ليه بلوك
جوزيف / ليه ليه ليه بتخرجوا اسوء ما فيا ليه
....................
فى شقه نسمه
فى اوضه تانيه شاكر نايم على سرير مستشفي و متركب له محلول و فى ممرضه  بتفضي حقنه فى الكانوله يفتح عينه و يشوفها
شاكر / انا فين ؟
الممرضه / حمد الله على السلامه انت فى المستشفي
شاكر / انا مش قادر اتحرك ليه ؟
الممرضه / ثوانى هنادي الدكتوره اريج
الممرضه تطلع بره شاكر ما بيحركش غير راسه يمين و شمال مفيش اى علامات غريبه فى الاوضه لونها ابيض و فى دولاب و كنبه و تليفزيون و تلاجه ميني بار و جنبه كومدينو و فى على الشباك ستاره عاديه البنت تدخل لابسه نضاره و حجاب و لابسه بلطوا و فى ايدها ملف
اريج / حمد الله على السلامه انا الدكتوره اريج مكرم اللى مسؤله عن حالتك ها حاسس بايه
شاكر / انا فين ؟
اريج / فى المستشفي
شاكر / انا فين بجد ؟
اريج تبتسم و تفتح الملف و تطلع منه اشاعه
اريج/ واضح ان الضربه اللى اخدتها كانت شديده شويه خلينا نبدأ فى الفحص احسن
شاكر / لو كانت دى مستشفي و انتى دكتوره الكنبه دى عمرها ما كانت هتكون فاضيه ... باب الاوضه ده عمر ما كان هيبقي وراه فاضي ... انا فين ؟
اريج ترفع الغطا عن رجل شاكر و تعدى قلم رايح جاى
اريج / حاسس بحاجه ؟
شاكر / مش فارقه ... نستنى ... ما ورايش حاجه... وراكى انتى
اريج تكرر نفس الموضوع فى الرجل التانيه
اريج / حاسس باى حاجه
شاكر / بتقنعنيني انى اتشليت يعني ؟ تمام اتشليت و بعدين هتستفيدي ايه بقي
اريج/ انا هنا عشان اساعدك
شاكر / غريبه مع انك من ساعه ما دخلتى ما ساعدتينيش بحاجه انتى حتى مش راضيه تقولى انا فين
اريج / ما انا قولت لك انك فى المستشفي ... تحب اخدك فى جوله عشان تتأكد... افتحى الباب يا نهى لو سمحتى خليه يشوف فى ايه بره
نهى تفتح الباب فى طرقه بيضه و باب الناحيه التانيه عليه رقم
اريج / نهى هتساعدك تملا بياناتك عشان نقدر نتواصل مع اهلك لما نبلغهم انك هنا و يجوا باذن الله يطمنوا عليك هتتكسف اوى من البرانويا اللى عندك دى على العموم للاسف انا مش هقدر اقعد معاك اكتر من كدا هسيبك ترتاح ... عن اذنك
شاكر يبتسم بسخريه اريج تطلع بره و تقفل الباب
نهى / تحب اشغلك التليفزيون على اى حاجه ؟
شاكر/ هى المستشفي دى ما فيهاش رجاله ليه
نهى / فيها طبعا بس انا اللى ماسكه الشيفت ده
شاكر / طب اطلعى بره انا مش محتاج حاجه
نهى / طب افرض احتجت حاجه
شاكر / كتر خيرك كفايا تعبكوا معايا لحد دلوقت
نهى / طب على الاقل ممكن تمليني بياناتك عشان نقدر نتواصل مع اهلك و نسجلها
شاكر / و ماله بس الاول لازم اعمل مكالمه تليفون
نهى / للاسف مش هينفع دلوقت انا موبايلي فاصل ممكن كمان شويه يكون شحن
شاكر / تمام نستني لما يشحن هاتيه اعمل مكالمه و بعدها امليكى البيانات اللى تعجبك
نهى / تمام ... على العموم انا هسيب الباب موارب عشان لو احتجت حاجه تنادى و انا هسمعك كدا كدا انا مش بعيد
شاكر يبتسم نهى تطلع بره و تسيب الباب موارب
...................
فى سرايا الزنايته
الرجاله عماله تنضف جابر يطلع من السرايا شايل شوالين كبار يحطهم فى عربيه نص نقل مليانه شوله و يروح الجنينه الورانيه مختار قاعد على المرجيحه باصص فى الارض
جابر / احنا تقريبا خلصنا جوه يا خالى
مختار يهز راسه
جابر/ كنسوا الجيم تحت و نضفوه و الراجل غير الشبابيك و ركبنا حديد و نزلنا المراتب تحت و فرشنا و الحريم و العيال هيباتوا تحت لحد ما نجدد الاوض اللى باظت
مختار يهز راسه
جابر/ انا عرضت و الله يباتوا عندى بس الكبير هو اللى صمم
مختار / مغاورى لسه شادد معايا بسبب الحوار ده عباده معاه حق و بعدين دول يومين تلاته مش حوار الرجاله هتبدا تشتغل من الصبح و باذن الله يخلصوا على طول الحوار مش كبير مش كدا ؟
جابر / لا سهله باذن الله كلها متعوضه يعني
مختار يهز راسه جابر يقعد جنبه
جابر/ شاكر مش كدا ؟
مختار / ليه ما اخدتش ناصر كمان ليه سابوه فى المستشفي ليه اخدوا شاكر بس
جابر / من عملهم الأسود ربنا سلط عليهم عقلهم لو كانوا خدوا نسمه بطولها كنت قلقت لكن شاكر وتد ما يتقلقش عليه
مختار يبص لجابر
جابر / صدقنى  .. مش هيسلكوا معاه
مختار / حد عرف حاجه؟
جابر / ابدا ما تقلقش
مختار / هند لو عرفت
جابر / مش هتعرف ما حدش عارف حاجه و ما حدش هيعرف
صوت كلكس عالى بره مختار و جابر يبصوا لبعض يروحوا قدام يلاقوا الرجاله متجمعه عند البوابه يمدوا لحد ما يوصلوا يلاقوا امايا راكبه عربيه و بتضرب كلكس و الغفر و الرجاله ملمومين تشوف مختار تفتح العربيه و تنزل
امايا / سورى بجد لو جيت فى وقت مش مناسب بس ضرورى لازم نتكلم
مختار / خير
امايا / هنا ؟! قدام الناس ... جرا ايه يا بابا مختار
مختار / تعالى
مختار يروح ناحيه الجنينه الورانيه و امايا تروح وراه جابر يجي يروح امايا تلف و تشاور له
امايا / مره تانيه
جابر يقف و امايا تمشي ورا مختار اللى التعب واضح جدا عليه يقعد على المرجيحه امايا تقعد جنبه الناحيه التانيه
مختار / سامعك
امايا / انا عمرى ما كنت اتمنى ان الدنيا بينا توصل لكدا بس للاسف الظروف اقوى مننا
مختار / ادخلى فى الموضوع
امايا / انا تحت ايدي شاكر و نسمه و الجبل
مختار/ برافو عليكى ... اسقف لك ؟
امايا / انا هرجع لك واحد بس تختاره منهم اى واحد
مختار / و المقابل؟!
امايا / من غير مقابل... عشان تعرف غلاوتك عندى بس
مختار / طب يا ستى كتر خيرك رجعى نسمه
امايا / تمام ... فى الطريق
مختار/ حاجه تانى ؟!
امايا / مش عاوز شاكر و لا الجبل؟
مختار/ الجبل كدا كدا هنرجعه و شاكر انا مش خايف عليه هيعرف يرجع لوحده و لو ما عرفش فانا عندى غيره تلاته الحمد لله
امايا / بحب ثقتك فى أولادك اوى مع ان من مكانى هنا شايفه انهم... محتاجين يشتغلوا على نفسهم اكتر
مختار / عاوزه ايه يا امايا ... بجد ... عاوزه ايه ؟
امايا / عاوزه اتكلم مع نجاه ... بعد اذنك
مختار / و انا ايه علاقتى بالموضوع ما تتصلى على تليفونها
امايا / عاوزه أوضح لها سوء تفاهم انا متاكده انكوا ليكوا دخل بيه
مختار/ آآآآآآه قصدك ان يونس ساعدك فى العجن اللى عجنتيه النهرده ؟
امايا / هو ما ساعدنيش فى حاجه تاذيكوا بالعكس هو ساعدني الاقى اللى عملوا كل ده اصلا
مختار / انتى اللى عملتى كل ده انتى السبب فى خطف نسمه و انتى عارفه ان صابر يبيع الدنيا عشانها و حتى لو مش انتى اللى خطفتيها انتى اللى خرجتيها بره البلد انا مش فاهم انتى هتستفيدي ايه لما نسمه تتجوز فيراس يعني
امايا / فيراس او غيره اى حد غير صابر
مختار / ليه عملت لك ايه هو عمل لك ايه انتى بتعملى كل ده ليه اصلا هتوصلى لايه
امايا / وصلت ... ما كنتش ناويه اوصل بالسرعه دى و لا بالطريقه دى بس وصلت
مختار / الجبل ... تمام مبروك عليكي و دلوقت جايه تعرضيه عليا لا حقيقي مبهور بيكي
امايا / جايه اقولك ان من مصلحتى ان جوزيف يقلب عليكوا بس انا عارفه هو حاسس بايه دلوقت و انت كمان عارف انت الوحيد اللى عارف
مختار / انا ما عدتش عارف حاجه ... انا واحد حته عيله قد ركبته ضحكت عليه و لبسته العمه
امايا / تفتكر انا عاوزه اى حاجه من دى تحصل
مختار / امال بتعمليه ليه ؟
امايا / بمزاجى يعني ... و بعدين لو مش انا هيبقي غيرى ... غيرى مش هيكون زيي صدقنى ... غيرى لا هيخاف على نجاه و لا هيعملك خاطر
مختار / انتى خاطفه ابنى و بتقولي لى خاطر
امايا / ما قتلتوش
مختار / دا ايه البراءه دى
امايا / يعني كنت هتبقي مبسوط لو شاكر و نسمه و الجبل فى ايد حد غيرى يعني انا رجعتهم منهم  على فكره
مختار / ما هو انتى اللى ضيعتيهم من الاول انتى ليه مش قادره تفهمى
امايا / لا مش انا انتوا
مختار / احنا ؟!! انتى تحمدى ربنا انى خلقى واسع و صبور لان غيرى كان جابك تحت رجله
امايا / ما تقدرش
مختار يضحك
امايا / و الله ما تقدر... انت ليه مستهون بيا اوى كدا ... على العموم ابو نسمه كدا كدا كان ناوى يبيعها عشان طمعان فى الارض و فيراس واطى لو ما باعليش نفسه كان هيبيعها لغيرى و صابر كدا كدا كان هيموت و الجبل كان هيتاخد و نجاه هتتاخد و دياب هيتقتل كل اللى حصل النهرده كان هيحصل بصوره اسوء مليون مره لو ما كنتش انا فى الصوره
مختار / انتى عاوزه ايه
امايا / عاوزه اتكلم مع نجاه
مختار / انا هوصل لها رسالتك ... يونس مش خاين ... حاجه تانى ؟!
امايا / نسمه كدا كدا فى الطريق ... لو كنت اخترت شاكر او الجبل كنت هتاخده مع نسمه على فكره
مختار يضحك
امايا / عشان كدا بعرض عليك تانى ... تحب ارجع شاكر و لا الجبل
مختار / انا هعرف ارجعهم تسلمى
امايا / و نجاه ؟
مختار/ انا عاوز انام
نجاه تدخل
نجاه / انتى ليكي عين تهوبى هنا بعد اللى حصل
مختار / كانت ماشيه
نجاه / لا معلش يا عمى مش بالسهوله دى
امايا / جو ما كانش بيساعدنى اخد منكوا الجبل جو كان بيساعدنى نعرف مين اللى ورا الناس اللى اخدوا الجبل ... عدو عدو صديقي
نجاه / بس انتوا مش أعداء
امايا / و لا انتى عدوتى يا نجاه بس نقول ايه
نجاه / انا ما عنديش فكره هم ليه صابرين عليكي بس انا بقي
نجاه تيجي تهجم على امايا مختار يقوم يقف فى النص
مختار/ وقت تانى
نجاه / انت هتسيبها تمشي بعد كل اللى عملته
امايا / عشان عاقل
نجاه / دا انا هوريكى الجنان على أصوله
عباده يدخل
عباده/ نجاه  .. اهلا بست الجبل
امايا / هاى
عباده / خير ايه سر الزياره الكريمه دى
مختار / هترجع نسمه مشكوره
نجاه / نسمه ؟!
امايا / كان ممكن ياخد شاكر و الجبل بس هو شايف انه يقدر يرجعهم بنفسه فتمام خلينا نشوف
نجاه تهجم على امايا ما يلحقوش يحوشوا و الاتنين يمسكوا فى بعض عباده و مختار يفصلوهم
عباده / بس يا نجاه بس
نجاه / انتوا كل شويه تحوشنى عنها ليه سبنى عليها
امايا / انا عارفه علاجك كويس ايه رايك نمشيها بالاصول
نجاه / و انتى تعرفى الأصول منين اصلا
امايا / فى الملعب انا و انتى قصاد بعض ايه رايك
نجاه / موافقه
مختار / بس بقي انتوا الاتنين بس
امايا / هستناكى فى الملعب ما تتاخريش
عباده / مش هتيجي
امايا تمشي نجاه تحاول تمسكها عباده يشد نجاه يبعدها عنها
نجاه / ليه ؟
عباده / عشان ده فخ انتى مش هتطلعى من هنا و مش هسحب رجاله من هنا عشان يحموكى و اعرض حياه كل دول للخطر عشان شويه عند
نجاه / هى كانت تقصد ايه بنسمه و شاكر
عباده / موضوع طويل مش وقته و يا ريت ما يطلعش بره لاى حد
نجاه تبص لمختار
نجاه / هى معاها شاكر ؟
مختار / هيرجع باذن الله
نجاه/ انتوا بتهزروا صح ؟ و سبتوها تمشي ؟
مختار / انتى فاكره انها هتيجي هنا بطولها كدا عادى الا لو كانت مأمنه نفسها كويس
نجاه / كنا اتحفظنا عليها و ساومناها هى مقابل اللى عندها
مختار / مش بالبساطه دى
نجاه / بابا لو سمحت اسمح لى اروح الملعب ارجوك
عباده / لا قال ملعب قال كفايا اللى راح فى يوم واحد كل اللى  راح يتعوض انتى لا
نجاه / شاكر و نسمه يتعوضوا
مختار / نسمه قالت فى الطريق و شاكر راجل هيعرف يرجع لوحده
نجاه / و ان ما قدرش ... احنا اهله ما ينفعش نسيبه لوحده
مختار / الرجاله شغاله على الموضوع و شكرا هنقدر نوصله من غير مساعدتك
نجاه / انا بجد مش مصدقاكوا
مختار / روحى نامى و باذن الله تصحى تلاقى كل حاجه اتغيرت للأحسن باذن الله
نجاه تبص لهم 
نجاه / انا مش قادره افهمكم حقيقي مش قادره افهمكم
مختار / مفيش حاجه من كل اللى بيحصل حوالينا منطقى اصلا مفيش اى حاجه من اللى بتحصل دى ليها معنى او تفسير فما تجيش على تصرفاتنا احنا و تتكلمى ... و اتمنى انك لا تعملى اى حاجه من ورانا و لا تقولى لاى حد اى حاجه مفهوم ؟!
نجاه / حاضر
عباده / الله اكبر ... دا ايه السهوله دى
نجاه / ايه بقي
عباده/ روحى شوفى وراكى ايه
نجاه / ماشيه
نجاه تدخل جوه
عباده / خير كانت جايه ليه بوز الأخص
مختار / تفتكر ؟!
عباده/ مكالمه نجاه ليونس صح ؟
مختار / بتقول انه ما كانش بيساعدها كان بيساعدنا احنا
عباده / دياب مقتنع بنفس الكلام منصور لا و طبعا انت مصدق على كلامها
مختار / انا مش فارق معايا حاجه دلوقت غير ان اوصل لابنى و نلاقي طريقه نرجع بيها الجبل من غير بحر دم
عباده / امال يعني نفشت ريشك و قولت انك هتقدر ترجعهم لوحدك ليه
مختار/ عشان مش عيله قد ركبتى هتجبى عليا بحاجتى مش دى اللى تكسرني مهما كان ليها غلاوه عندى مش هيحصل
عباده / طب اهدى
مختار / مش قادر
عباده / خش نام مع الرجاله فى المضيفه و ما تفكرش فى حاجه
مختار / مش هقدر هروح اتمشي بالعربيه شويه
عباده / ما تعملش حاجه غبيه
مختار يبتسم بسخريه و يمشي
………………….
فى شقه جوزيف
جرس الباب يرن جوزيف يروح يفتح يلاقي دياب
جوزيف / تعال ادخل
دياب / بصراحه انا مش عارف انا جاى ليه بس حابب اتكلم معاك
جوزيف / بيتك اصلا فى اى وقت ادخل
دياب يدخل و يروح يقعد
جوزيف/ تشرب ايه ؟
دياب / و لا اى حاجه … لميت رجاله صابر و قعدت معاهم ... هيعملوا اى حاجه و يرجعوا الجبل بس مش هيقبلوا حكم صابر تانى
جوزيف / متوقع اللى باع مره سهل يبيع مليون مره
دياب / بس هو ما باعش
جوزيف / مجرد مسميات الفكره واحده
دياب / وجهه نظر بس انت لو مكانه كنت عملت ايه ؟
جوزيف / كنت هضربك فى دماغك مش فى صدرك
دياب يضحك
جوزيف / لو كان مقابل حياه حبيبتي حياتك هتاكد انك ميت ... هو ما كانش عاوز يقتلك و انت مش غبى عشان تخرج من غير واقى رصاص ... كدا كدا الموضوع بينه و بين رجالته هيصفى مع الوقت و هو قوى و هيقدر يرجع مكانه تانى ما تقلقش عليه اقلق على نفسك اللى صابر ما نفذوش غيره هينفذه
دياب / ما حدش بيموت ناقص عمر و بعدين اخوك شقاوه قديمه برده مش كنت بتقول الباد بويز مش بيموتو بسهوله
جوزيف يضحك
جوزيف / انت باد بوى ؟! طب قول اى حد تانى يمكن أصدق
دياب / سيبك انت ... كنت نازل هايج كدا و بطلع دخان من ودانك و جالك تليفون رجعك ... ايه القصه
جوزيف / انا ما ساعدتش امايا فى اللى حصل انا ساعدتها تعرف مين اللى عمل كدا و بس و قولت لها انى مش هساعدها تانى ... النتيجه ايه بقيت انا اللى وحش و خاين و ابن ستين كلب مش كدا طب منصور و ربنا يعينه مش متزن و مستنى منه الأسوء لكن ... مش فارقه اصلا
دياب/ نجاه ما تعرفش حاجه عن شاكر و نسمه معلوماتها كلها على الجبل بس
جوزيف / نسمه فى الطريق و شاكر مجرد كرت تلعب بيه لو حاولتوا ترجعوا الجبل تانى
دياب / ما احنا اكيد هنرجعه تانى
جوزيف / ما ينفعش بالسلاح هيبقي بحر دم هى مش هتخسر حاجه شويه درونز و كلاب هتموتوا كلكوا قبل ما رجل واحده تعتب الجبل حتى
دياب / تقترح ايه
جوزيف / لازم يبقى معاكوا حاجه غاليه تساوموها بيها
دياب / و طبعا انت مش هتقدر تقول لنا ايه الحاجه دى
جوزيف / امايا بتحب الكلاب جدا بس لو حد قرب من كلابها هتبقي عنيفه جدا البديل بقي هى نايمه و مطمنه عليه مليون فى الميه
دياب / نجاه ؟!
جوزيف يهز راسه
دياب / و شاكر ؟
جوزيف / العربيه اياها مشيتوا وراها
دياب/ لقيناها بس مش عارفين نوصل من وراها لاى حاجه طريق مسدود
جوزيف يقوم يفتح اللاب و يشتغل عليه دياب يقوم يشوف
دياب / انا وصلت لهنا و لقيت العربيه فى الجراج بس مفيش اى كاميرات فى المبنى تقول راحوا فين من ساعه ما نزلوا فى الجراج و انت بتقول نسمه فى الطريق يعني خرجت من المبنى مع انها مش ظاهره فى ولا فيديو يعني اكيد فى نفق تحت المبنى بيوصله لاى مبنى تانى
جوزيف يفتح كاميره نسمه خارجه من عماره
جوزيف / يمكن كنت محتاج توسع دايره البحث شويه
دياب يتنهد
دياب / فين طيب برده دى منطقه أبراج و كل برج فيه كام دور و كل دور فيه كام شقه دا اللى فوق الأرض ما بالك باللى تحت الارض … يعني ابره فى كوم قش دا ان كان لسه هناك اصلا و ما نقلتهوش فى اى عربيه من اللى دخلت الجراج و خرجت طول الوقت ده
جوزيف / معاك حق …  و طبعا انتوا غروركوا يمنعنكوا من التفاوض مش كدا
دياب تليفونه يرن
دياب / ثوانى … السلام عليكم ... خير ؟ ... بيقولك امايا قاعده فى الملعب و بتقول مستنيه نجاه
جوزيف / ازاى يعني
دياب / عينك ما تتشالش من على نجاه تتابعها خطوه بخطوه لو خرجت من السرايا فى اى وقت تبلغنى … سلام
دياب يقفل و يحط الموبايل فى جيبه
دياب/ ما اعتقدش ان التفاوض معاها ممكن يوصل لحاجه بس مش هيقل منى فى حاجه انى اجرب
جوزيف / هاجى معاك
دياب / تعال
…………………..
فى اوضه شاكر
الباب يخبط و يدخل شاب لابس ممرض
الشاب / صباح الخير ... ازيك النهرده يا رب تكون احسن
شاكر / هى الممرضه ... نهى كل ده بتشحن موبايلها ؟!
الشاب / نايمه على الديسك بره بس السيستم عندى قارى ان ليك دوا
شاكر / مش عارف أودى اهتمامكم بيا فين ؟! بس انا محتاج اعمل مكالمه تليفون
الشاب / طبعا اتفضل موبايلي اهو ... مليني الرقم و انا اطلبهولك
شاكر / شكرا
..................
فى الملعب
امايا قاعده و فى رجاله واقفين على الباب بيبصوا عليها كل شويه و يتودودوا عربيه دياب تركن و ينزل منها هو و جو يدخلوا
دياب / ايه النور ده كله معقول يعني بنفسك
امايا / مش فيقالك
جوزيف / خير ؟ مالك ؟
امايا تبص فى الساعه
امايا / ما كنتش اعرف انها جبانه اوى كدا انا كدا كدا ما كنتش هعورها بس كنت هعرفها حجمها الحقيقي مش اكتر
جوزيف / إيمي
امايا / انت ما شوفتهاش
جوزيف / بس عارفها
امايا / ازيك يا دياب سعيده أن موضوع موتك طلع اشاعه
دياب / محتاجين نتكلم
امايا / خير ؟
دياب / عندى فضول أعرف انتى شيفانا ازاى
امايا/ شيفاكوا ناس زى الفل
دياب / يعني شيفانا ناس بتستسلم بسهوله؟ تفتكرى اللى حصل ده هيعدى عادى و احنا هنتعامل عادى مش هنرد مش هنعمل اى حاجه هنروح بيوتنا و ننام عادى ؟
امايا / اكيد لا امال انا بحبكوا ليه ... تحب احكيك قصه
دياب/ يا ريت
امايا / مره اتنين زعلوني اوى واحد منهم دخلت عليه الكلاب قتلته بسرعه و التانى بخليه يقطع من لحمه كل يوم حته يرميها بنفسه للكلاب تاكلها قدامه و يقعد يتفرج عليهم و هم بياكلو فى لحمه فى المقابل انا بحافظ عليه عايش بعالج الجروح و بديله علاج و فيتامين و اكل تفتكر ايه السبب
دياب / السبب الوحيد فى دماغى انك مريضه
امايا / كلنا مرضي هو حد فينا طبيعي او سوى ... انت سوى ؟!
دياب / على قد علمى
امايا / افضل اقنع نفسك بالكلام ده كتير لحد ما تصدقه ... المهم الاتنين ضحيه تربيه زباله زيهم مخلياهم فاكرين نفسهم فوق الكل بس كل واحد فيهم ليه شخصيه و طاقه و انا بقي لعبت بكل واحد فيهم حسب شخصيته و طاقته تخيل ان اللى لسه عايش منهم لسه مقتنع انه هيروح بيته فعلا و ان عذابه ده ممكن ينتهى تخيل انه لسه عنده امل
دياب/ ربنا قادر على كل شئ
امايا / و نعم بالله ... فهمت ايه من اللى انا قولته بقي
دياب / كان نفسي اقول فهمت حاجه غير انك فعلا مريضه
امايا تضحك
امايا / نرجع لموضوعنا... انتوا مش هتسكتوا طبيعي هيفضل عندكوا امل و طوب ما عندكوا امل انا هكمل ... بس عموما لا انا السبب فى اللى حصل و لا دا اللى كنت مخططه له بس شوف يا اخى تدابير ربنا تلف تلف و تقع فى حجرى تفتكر انت بقي حد مكانى يعمل ايه ؟
دياب / يعمل الصح
امايا / ما انا عملته فعلا ... اللى عملته النهرده ده هو الصح بعينه ... انا لو واحده وحشه كنت سبت نسمه ترجع برده ؟!! و من غير اى مقابل ؟! و لو تقصد شاكر... فصدقنى بيتعامل معامله الملوك و مش بس كدا دا انا حاميه ضهركوا و مفيش جنس نمله تقدر تهوب منكوا من هناك اطلع فى الاخر بقي انا اللى وحشه ؟! ... الوحش هو اللى باعك و باع البلد و الجبل عشان واحده ... و مش اى واحده دة واحده باعته زمان
دياب / ما تدخليش نفسك فى التفاصيل دى هتتعبى ... انا بالنسبالك اخر فرصه فى الكلام
امايا / انت مين أصلا ... دياب انا ما اقدرش اعمل معاك اى اتفاق لأنك مش موجود اصلا انت كدا كدا ميت مسأله وقت مش اكتر ... بس عشان انت راجل جدع و انا بحبك اوعدك أن مش انا اللى هقتلك و لا انا و لا اى بنت تبعى ... الكلاب بقي حاول تتجنبهم شويه لانى مش هقدر اسيطر عليهم اوى دول فى الاول و الاخر حيوانات برده
دياب / بدأت اصدق انها اختك بجد نفس العينه ما شاء الله
جوزيف / لا هى تتفوق عليا فى حته كيد النسا
دياب / خدت بالى .... على العموم انا عملت اللى عليا بس افتكرى ان مفيش اسرع من الايام و قريب اوى هتلاقى نفسك انتى اللى جيالى تتفاوضي معايا عشان اللى جاى وقتى انا
امايا / مش و خالك عايش
دياب / ربنا يديله طوله العمر انا و خالى على قلب راجل واحد ما تشطحيش باحلامك اوى كدا
امايا / دا قدام الناس بس انما فى الحقيقه مهما حصل هتفضل انت الراجل اللى قتل ابنه الوحيد
دياب/ تبقي ما تعرفيش مين هو مغاورى الجارحى ... هى مش هتيجي ما تضيعيش وقتك هنا اكتر من كدا ... سلام يا يونس
جوزيف / سلام
دياب يمشي
جوزيف / معاه حق و حاولى تلمى اللى بوظتيه اللى بيحارب الكل بيخسر
امايا / و انت فاكر انك لما تبقي نص معايا و نص معاها هتكسب حاجه ؟ هتخسرنا احنا الاتنين فى الاخر
جوزيف / على الاقل هضمن انكوا انتوا الاتنين بخير
امايا تبتسم و تمشي و جوزيف متابعها
......................
فى اوضه شاكر
الشاب فاتح السبيكر / الهاتف الذى طلبته ربما يكون مغلقا من فضلك حاول الاتصال فى وقت لاحق
الشاب / ممكن يكون نايم شويه كدا و نجرب تانى
شاكر / طب ما نجرب نمره تانيه
الشاب / و ماله نجرب ان شالله نقضي الليل كله بنجرب فى نمر بس على الاقل تعاون معايا شويه و مليني بياناتك بدل ما الفايل بتاعك فاضي خالص كدا بس الاول المفروض تاخد العلاج بتاعك معاده هيفوت كدا
الشاب يطلع حقنه من جيبه و يحطها فى المحلول
شاكر / هو انا ما كانش معايا بطاقه و لا محفظه ؟
الشاب / فى ناس ولاد حلال لقيوك فاقد الوعى فى الشارع و مش معاك اى حاجه لا موبايل و لا محفظه و لا أوراق و لا اى حاجه
شاكر / انا افتكرت حاجه ما اعرفش هتفرق معاك و لا لا
الشاب / اتفضل
شاكر / ان نهى اللى نايمه على الديسك بره قالت إن هى اللى ماسكه الشيفت النهرده و ما جابتش سيرتك خالص
الشاب / الدوا ده هينيمك شويه لما تصحى هنجرب نتصل تانى بالنمره اللى ادتهانى
شاكر يبتسم و يهز راسه الشاب يطلع بره و يقفل الباب يقابل اريج
اريج/ لسه شاكك
الشاب/ اعتقد انه كدا بقي متاكد انه مخطوف
اريج / سهله لما يصحى خليه يكلم باباه
الشاب يبتسم اريج تمشي
.......................
فى المسجد وقت صلاه الفجر
عباده خارج من المسجد يوقفه شاب
الشاب / صباح الخير يا كبير
عباده / صباح النور اؤمر
الشاب / ابويا راجل كبير يا كبير و مش حمل بهدله
عباده / الا ما سألت عن امك و لا عن اختك يعنى
الشاب / انا كلمت امى امبارح هى بخير مع فيراس فى مصر بيدوروا على نسمه
عباده / قولهم ما يتعبوش روحهم و يرجعولنا بالف سلامه نسمه بخير و فى الطريق ... عن اذنك
الشاب / يا كبير الموضوع مش زى ما انت فاهم اقسم لك بالله انا ابويا عمره ما يحط ايده فى ايد ولاد الحرام دول و فيراس ابن عمى متربي معانا و عارفينه كويس يعني الموضوع
عباده / بس بس بس بس انا مالى بكل ده انا بره عنى القصه كلها هو انا مورايش فى البلد غير عويس و اللى بيجي من ورا عويس لما نسمه توصل بالسلامه هى و امك و زينه الشباب ابن عمك نقعد كلنا كدا قاعده حلوه نشرب الشاى و نتكلم
الشاب / بس ابويا
عباده / اهدى على نفسك و قول هديت انا اللى عندى قولته و احمد ربنا انها جت على قد كدا اختك اكمنها غلبانه ربنا لم الحكايه بسرعه و بأقل الخساير او اتمنى انها تخلص على كدا بقي عشان انا ما عدتش قادر
الشاب يبص فى الارض و يهز راسه
......................
فى استراحه فى الطريق
صابر و نسمه قاعدين على ترابيزه
صابر / يعني ما شوفتيش شاكر خالص ؟
نسمه / لا فوقت لقيت بنت اتكلمت معايا شويه و قالت لى روحى ركبت تاكس و روحت لعم فاروق
صابر / طب ما كانش فى اى علامه مميزه فى المكان اللى كنتى فيه
نسمه / مفيش حاجه فى دماغى خالص و المنطقه كانت عاديه كلها عمارات و أبراج و محلات و الشوارع زحمه جدا و عربيات ما كانش فى اى حاجه غريبه عن شوارع القاهره عادى
صابر / تمام
نسمه / هتلاقوه باذن الله انا متاكده شاكر ابن حلال و باذن الله خير
صابر / باذن الله
نسمه / انت كويس ؟
صابر / بقيت كويس
نسمه / قالت لى انك مش هتقدر تعيش فى البلد تانى و انك عملت حاجه قلبت الكل عليك و انك لو نزلت البلد هتموت الكلام ده بجد ؟!
صابر / ما عملتش حاجه غلط و اى كان اللى عملته هصلحه اطمن على شاكر الاول
نسمه / تمام
صابر / انتى عامله ايه ؟
نسمه / هعمل ايه يعني ؟! العادى ... كل اللى بفكر فيه دلوقت انى اروح لعيالى ... تعرف بفكر بجد اخدهم و اعيش فى مصر هنا و لا فى اى حته بعيد عن البلد ... بس على راى المثل قولت للنكد انا رايح اتفسح قالى وراك وراك هو انا مكسح
صابر يضحك
نسمه / انا مش عاوزه عيالى يبقوا ضعاف زيي عوزاهم يعرفوا يدافعوا عن نفسهم بس ما عنديش فكره هعلمهم دا ازاى
صابر / بس انتى عمرك ما كنتى ضعيفه يا نسمه
نسمه / اكشف نظر
صابر / احنا ما بنختارش اهالينا فاكره لما قولتلك كان نفسي ابقي ظابط
نسمه / بس تنسيقك ما جابش فبقيت دكتور
نسمه تضحك صابر مش بيضحك
صابر / بقيت نسخه من ابويا كبير مطاريد الجبل
نسمه / ابوك ما كانش وحش ظروف و اتفرضت عليه و كان راجل يتحلف بيه و ينضرب بيه المثل
صابر / اقولك حاجه
نسمه تبص له بانتباه
صابر / انا عندى استعداد اقعد وشي فى وشك نتكلم كدا العمر كله خصوصا انى مشتاق اوى للكلام معاكى اللى عمرى ما كنت بشبع منه بس انا مش هقدر أكرر نفس الغلط مرتين ... عدتك فاضل فيها ايام هخلص فيهم الحوارات اللى فيا و اجى اطلبك من ابوكى و المرادى
نسمه / مش هيوافق ... هو اصلا كل اللى بيعمله ده سواء جوازتى من عبده الله يرحمه و لا حتى فيراس او غيره كل ده بس عشان ما نكنش لبعض
صابر يقوم و يلم حاجته
...........................