(((((( الكبيره ٢ ))))))
#لولو_محمد
الحلقه ١٤
ابيك / انا مش نازله مصر المجلس بيرميني تحت الاوتوبيس مستحيل انزل مصر انا
امايا / هنزل مكانك
بابلو / لو نزلتى مصر هتموتى انتى ما بتفهميش
ابيك / ما انا كمان لو نزلت هموت الزنايته لسه بيدوروا عليا هنا فى تركيا و صورى مع كل الناس و مش عارفه اتحرك براحتى عاوزنى كمان انزل أرضهم
هيلجا / دى الاوامر
ابيك / طبعا ما انتى اوامرك انك تحمى القطه و تخبيها بعيد
هيلجا / امرنها و انزل بيها لما تكون جاهزه
ابيك / هى جاهزه و هى اكتر واحده فينا فرصتها تعيش لو نزلت مصر جوزيف هيحميها
بابلو / اللى قفل عليها و خد البت و هرب راح اتحامى وسطهم
هيلجا/ لحد دلوقت احنا مش متاكدين من اللى حصل
بابلو / لا متاكدين البيه اكتشف انه منهم ما اعرفش ازاى بس دول معيشينه جوه السرايا بتاعتهم و بيحموه كمان
هيلجا / ما دى الخطه من الاول انك تدخل وسطهم و اللى امايا اشتغلت عليها سنه كامله و لا نسيتو و اللى انت فشلت فيها لما ما قدرتش تخلى احلام تحبك
امايا تبرطم / و دا مين يحبه اصلا
بابلو يبصلها
.............................
بابلو / على العموم انا مهمتى مش انى اقتل جوزيف انا مهمتى اتاكد انه لسه معانا
امايا / انا اكتر واحده اقدر اوصله لا هياذيني و لا هيسمح لحد ياذيني
هيلجا / البلد كلها عرفاكى صورك كانت فى كل شوارع مصر وشك محروق
امايا / هلاقى طريقه انزل بيها هتصرف
ابيك / الطريقه اللى كنتى بتتصرفى بيها ان جو كان بيساعدك فوقى بقي انتى ولا حاجه من غيره
امايا / خلينا نشوف و نزلونى
ابيك / غورى انزلى حد مسك فيكي
هيلجا / دا مش وقت خناق نركز لو سمحتوا ما ينفعش كدا
بابلو/ امك زمان اختارت جو و رفضت تنفذ اوامر المجلس النتيجه جو عاش و هى ماتت
امايا تسكت و تبصله
بابلو / دلوقت جو نفسه باعنا للمره التانيه و خان المجلس و احنا لازم نختار يا روحنا يا روحه و انا شخصيا هعمل اللى المجلس يؤمرنى بيه من غير ما افتح بقي او اعدل فيه شعره عارفين ليه عشان وقت الجد احنا اللى بنتفرم
هيلجا / بابلو بيتكلم صح
ابيك / تمام
امايا / جوزيف مش خاين
ابيك / هو انتى هبله كان ممكن يخرجك و يهربك معاه لو كنتى فارقه معاه اصلا جوزيف باعك انتى شخصيا فوقى بقي فوقى
امايا تبص لهيلجا
هيلجا / هيبان .. مع الوقت ... كل حاجه هتبان
بابلو / بالظبط دلوقت لازم نلتزم بالتعليمات
امايا تتنهد و تسيبهم و تدخل الحمام و تقفل عليها الباب
هيلجا / سيبوهالى انا هتعامل معاها خليكوا انتوا فى مهمتكوا
ابيك / الانتحاريه ... مهمتنا الانتحاريه
ابيك تسيب المكان و تمشي بابلو يتنهد و يمشي وراها هيلجا تبص على باب الحمام و تتنهد
.........................
فى اوضه احلام
احلام قاعده بتكوى عبايه الباب يخبط و جابر يدخل احلام تلف وشها مقموصه
جابر / وحياه امك
احلام / انا ما قولتلكش ادخل
جابر يدخل و يرزع الباب و يروح يشد كرسي و يقعد احلام تكمل كوى
جابر / عملتى كدا ليه
احلام / مش هكررها هشوفه بيدبحك و لا هتحشرلك و لا هعبرك
جابر / و انا شويه يعني كنت مستنيكي يا اختى تنجديني
احلام / ما شوفتكش رقدته يا خويا
جابر يقوم يقف جنبها تعمل مركزه فى الكوى جابر يعوج راسه و يبصلها من تحت توقف المكوه فى جنب و تروح تعلق العبايه و تبصله واقف متابعها و مبتسم
احلام / انا ليا عنده تار
جابر الابتسامه تروح من وشه احلام ما تقدرش تمسك دموعها
احلام / انا ما ليش دعوه باللى بينه و بينكوا انا ... ليا عنده تار
احلام تعيط جابر يروح يحضنها و يطبطب عليها
احلام / مش هسامحه فى دم بدر و لا هسامح اللى اسمه بلال ده فى اللى كان ناوى يعمله فيا
جابر / حقك عليا
احلام / يا ريتنى كنت صبرت على الميه و لا كنت غليت مكانها زيت يا ريتنى كنت قدرت اعمل اكتر يمكن كنت هديت لكن ما هديتش و انتوا ... انتوا من الدنيا كلها جايبينه هنا لا و اشوفه بيضرب اخويا و اتفرج
جابر يضربها على قفاها بهزار تبصله
جابر / يضرب مين يا بت هو انا قليل اوى كدا و لا ايه
احلام / مشيه بدل و الله اسمه
جابر / هيمشي من غير ما نقل باصلنا و نغدر بضيفنا كدا كدا ماشي
احلام / و هو ما غدرش بينا تضمنه منين تضمن منين انه ما يغدرش بينا تانى
جابر / الكلب لما بيعضك ما ينفعش تعضيه اخرك هتربطيه بسلسله و تحاولى تروضيه
احلام تبص لجابر يمسح دموعها
جابر / ممكن تثقى فيا... يا ستي انا فاشل ثقى فى خالك و عمك
احلام / اخص عليك دا انت سيد الناس
نجاه تدخل تشوف جابر تتخض
نجاه / احلام العشا ... لا مؤاخذه ما خبطتش .. العشا جاهز
جابر / جاى فى وقته لحسن انا واقع ايه يلا يا بومه و لا ايه
احلام / دلوقت بقيت بومه ما حقك صحيح منوره يا ست نوجه
نجاه / و انا مالى يا اختى انتوا اخوات فى بعض عن اذنكوا
نجاه تمشي
احلام / اذا اردت شيئا بشده يا ابن ابويا
جابر / ما هى طايره قدامك اهى يا بنت امى ارحميني انا رايح اكل ... جعان
جابر يروح احلام تتنهد و تفصل المكوه و تقفل الترابيزه
.......................
فى المضيفه
جوزيف بيدهن مرهم الباب يخبط و عباده يدخل شايل صينيه العشا
جوزيف / بنفسك
عباده / دراعك عامل ايه
جوزيف / ياما دقت على الراس طبول زى ما بتقولوا
عباده / اساعدك ؟
جوزيف / لا كدا هبتدى اقلق هو فى ايه مالك
عباده / اساعدك ؟
جوزيف / ساعدنى اما نشوف
جوزيف يدى لعباده المرهم عباده يدهنله بالراحه
جوزيف/ انتوا هتقتلونى قريب صح ؟؟ زى الدبيحه كدا لما بتسمنوها كدا قبل الدبح مش كدا
عباده يبتسم
جوزيف / ما انتوا غراب جدا بصراحه مش فاهمكوا و ما تتوقعوش منى انى هعاملكوا بنفس الطريقه انا بقول اهو اللى هيقع فيكوا هدوسه برجلى
عباده / و هو انت دلوقت واقع يعني
جوزيف يبص لعباده و يقوم يغسل ايده عباده يغسل ايده و الاتنين يقعدوا ياكلوا سوا
عباده / ظبطت ليك بيت تانى تقعد فيه الحريم هنا مش مرتاحين فى وجودك و دا حقهم
جوزيف / انا ما ضايقتش حد فيهم ... غير نجاه لو اعتبرناها حريم و وعد منى مش هضايق حد فيهم ... غير نجاه برده ههههههه ... حتى احلام انا مش زعلان منها و مش هحاول باى شكل ارد على اللى هى عملته بالعكس انا مبسوط منها جدا
عباده / الضيف ليه تلات ايام بس
جوزيف / انا مش ضيف
عباده / انت مين بالظبط عشان احدد ... جوزيف و لا يونس
جوزيف / انت شايفني ازاى
عباده / انت اللى هتحدد انا المفروض اشوفك ازاى
جوزيف / مش حاسك شامم ريحه كدب كدا مش عارف جايه منين
عباده / على حسب ما هتعامل هتتعامل
جوزيف / هنشوف
عباده/ تفتكر الجماعه اياهم هيفضلوا ساكتين لامتى
جوزيف / مش عارف و كل يوم بيعدى بقلق اكتر
عباده / و مع كدا اخدتها الجبل لوحدكوا
جوزيف / صح فعلا تفتكر انى اظهر بوشي فى كاميره انا عارف انها بتتبع وشي و هتبعت للشركه الطويله العريضه خط سيرى ... غلطه زى دى تطلع من واحد زيي برده ... انا بس كنت بوريكوا اماكن الثغرات عشان تسدوها لان غروركم مانعكم تسمعولى
عباده / انا سامعك قولى اعمل ايه و انا اعمل
جوزيف / هى صعبه انا عارف بس كل المطلوب منك حاجه وحده بس ... تثق فيا
عباده / و المقابل
جوزيف/ ليك و لا ليا
عباده / ليك انت هتستفيد ايه
جوزيف / هفضل عايش ... انا غلطت لما هربت بنجاه ... و انا صغير قالولى يونس مات و ممنوع اجيب اسمه على لسانى و الا هموت انا كمان ... بس كان فى صوت فى دماغى بيجي كل فتره بكلمه واحده ما لهاش معنى ... رشيد ... فى الاول قولت بلد و جيت رشيد فعلا و لفيتها شبر شبر ما كنتش عارف بدور على ايه روحت افغانستان ادور على رشيد حرفيا بدور على ابره فى كوم قش لحد ما فقدت الامل ... نجاه قلبها كان وقف لانها زيكوا عنيده فكنت بعملها سي بى ار و اول ما فتحت و شافتنى قالت رشيد ... اتشليت و ارتبكت و عملت اكبر غلطه فى حياتى
عباده / طب ما تصلحها
جوزيف / هيطلبوا منى اثبت ولائى و غالبا هيطلبوا منى اقتل امايا
عباده / اميره
جوزيف / ايوه ... امايا
عباده / تربيه المعسكر برده
جوزيف / لا ... دى تربيه ايديكوا
عباده / احنا ما نربيش الاشكال دى
جوزيف / طب ما تفتحش صدرك اوى كدا عشان انت ما تعرفش اللى انا عارفه ... على العموم هى تربيه ناس زيكوا كدا دقون و جلاليب و قال الله و قال الرسول ناس من اللى بتقول ان الرسول ذات نفسه اتجوز عيله ست سنين و هتقولى لا تسعه لا اختلفوا لا كذبوا انا مش فارق معايا الحقيقه انا بقولك بس ان .. فى ناس غيرى مصدقين الكلام ده و مصدقين بحاجه اسمها ملكه يمين و جوارى ... انا كل اللى عملته انى علمتها تدافع عن نفسها
عباده ساكت و جوزيف بياكل
عباده / و انا بقي عملتلك ايه
جوزيف / ما عملتش
عباده / امال بتكرهنى ليه
جوزيف / ما بكرهكش انت ما تفرقش معايا اصلا ... دا كلو مجرد جزء من الشو مش اكتر
عباده / شو
جوزيف / شو ... عرض يعني اشتغاله ... المهمه معروفه انهى البلد دى من جدورها و دا مش هيتم الا بطريقتين الاولى اننا نقتلكوا كلكوا بس انتوا ايه فيران ما بتبطلوش خلفه و كل ما نضرب فى حته نلاقى مستعمره تنفتح علينا قولنا بس او هم قالوا عشان يعني انا بصراحه الحوار ده ما كانش فكرتى فى الاول انا بس استلمتها من اللى قبلى ما علينا عشان الرغى الخطه البديله هى اننا نتحكم فيكوا
عباده / بانك تتحكم فى نجاه
جوزيف / خليني اسالك سؤال انت زى ابوك زى ابنك و لا كل جيل بيجي اضعف من اللى قبله هتلاقى ان كل جيل أضعف بس التكنولوجيا و الاسلحه بتديله حته كدا عن اللى قبله و مع تقدم التكنولوجيا الجيل اللى جاى هيبقي لا يقهر الا اذا عادلنا المعادله باننا نطلع جيل اصلا فى اساسه ضعيف فاهم انا بقول ايه
عباده / اكل مرشوش و جو ملوث و مخدرات و كدا
جوزيف / لا الحاجات دى جربوها اللى قبلينا من ايام فيرا و اللى قبلها انا بتكلم عن جوه ضعيف من جوه ... الشغف الطموح الايمان
عباده / الإيمان!!
جوزيف / مش شرط باله او ديانه الايمان بقضيه بوطنيه الايمان باى حاجه انك تؤمن بحاجه مصدق ان فى حاجه مستعد تحارب عشانها او تضحى بحياتك عشانها ... يا سيدي ابسطها نجاه و هى بترمى نفسها عشان تفدى جابر لو نجاه مش مؤمنه باهميه التضحيه و الاسره و العبط ده كله كانت استخبت و لا جريت ... همام مثلا فى وسط كل اللى هو فيه يرمى نفسه فى البحر هو و رجالته عشان يجرى يلحقو واحده تحرياتى ماكده انها ماسحه بيه الارض هو و اهله ... عمل كدا ليه
عباده / عشان هو راجل
جوزيف / تؤ البلد دى بايدى منضفها من رجاله كتير اوى كان من مصلحتى يفضلوا فيها و يتكاثروا بس عشان خاطر ايمو و ياسو انا قتلتهم
عباده / الناس اللى اختفت من البلد
جوزيف / الناس اللى جريت تتفرج على فيديوهات ياسمينا نفس البنت اللى المفروض يجروا يغطوها لانها بنتهم و لحمهم ... انت مستعد تموت نفسك انت و عيالك عشان ناس لو لقوا نتشه فى عبايه بنتك مش هيستروها دول هيعملوا كل اللى يقدروا عليه عشان يوسعوا النتشه دى و مش بعيد يعروها و يغتصبوها قدام عنيك عادى جدا
عباده / بنتى كانت معاك لوحدها اغتصبتها ؟
جوزيف / انتوا مش كشفتوا عليها و اتاكدتوا انها فله ؟!
عباده/ ما اغتصبتهاش ليه
جوزيف يضحك
عباده / قلعتها و صورتها و بعتلى الصور ... دخلت عليها واحد و سمعتنى صوت مقاومتها و صريخها و فى الاخر ايه اللى جرا هى اللى رجعتك لعندى
جوزيف يتعدل فى قاعدته
عباده / مش شطاره منها و لا منى ... دا رحمه من اللى خلقنى و خلقك ... خير عملته فى غيرى و اتردلى فى بنتى ... بنتى اخدت طلقه كانت ممكن تنهى حياتها و على العكس انتهت القصه بعاهه غيرها ما بيقومش منها بس من رحمه ربنا انها خفت و قامت و رجعت طبيعيه جدا دا شطاره منى و لا منها ؟ لا .. دا خير عملته انا و هى و ربنا ردهولنا ... انت مثلا ... تفتكر صدفه ان من بين مليارات البشر على الكوكب انت و نجاه تجتمعوا و تتعرف عليك و تقولك حقيقتك
جوزيف / ايه خير عملته انا كمان ؟!
عباده / يمكن خير ابوك عمله يمكن خير انا عملته
جوزيف / انت ؟! و انت مالك بيا
عباده / خير عملته انا فيتردلى انك ترجعلى بنتى سليمه ما حدش عارف الخير فين و عسى ان تكرهوا شيئا و هو خير لكم
جوزيف يكمل اكل
عباده / احنا ما نقدرش نحاسب يونس على افعال جوزيف و انت من اللحظه دى بالنسبالنا يونس
عباده يطلع من جيبه نتيجه التحليل و فلاشه
عباده / يونس رشيد السبع ... الفلاشه دى عليها فلوس ابوك كامله لميناها من كل حته فى العالم و حوشناهالك فى تربه ابوك عندنا هنا فى البلد تقدر تستلم الفلوس فى اى وقت
جوزيف / انت بتديني فلوس ؟!
عباده / بسلمك ورثك زى ما استلمته ... بسلم الامانه ... انا كدا دورى خلص ابوك امنى الاقيك و اسلمك ورثك اكتر من كدا انا مش ملزم ناحيتك بحاجه ... بس عشان خاطر العشره و العيش و الملح اللى كانت بينى و بينه و الجميل اللى داينا بيه زمان انا مش هسيبك و هفضل فى ضهرك و اعتبرك واحد مننا
جوزيف / عشان مصلحتك
عباده / شوفها زى ما تشوفها بس زى ما قولتلك طول ما انت يونس انا مش هقدر احاسبك على تصرفات جوزيف و انت اختار تحب تبقي مين ... الحمد لله شبعت ... عن اذنك
عباده يقوم يروح ناحيه الباب
جوزيف/ يا عم ما انت قاعد فاتح نفسي
عباده / الف هنا ... تصبح على خير
جوزيف / و انت من اهله
عباده يمشي و يقفل الباب وراه جوزيف يزق الاكل بعيد و يقوم يبص على دراعه فى المرايه
..............................
فى اسكندريه
بابلو قاعد مع رزق
رزق / بس ما تاخذنيش انا ما اعرفكش و تعليماتى ما كنتش باخدها منك فعلى الاقل وريني اماره يعني الباشا اللى قبلك قبل ما يقول بسم الله الرحمن الرحيم رمى تحت رجلى شنطه فلوس ... الباشا بقي جاى رجل ورا ورجل قدام ايد ورا و ايد قدام ... الرجاله دى ما بتطلعليش فى بنك الحظ الرجاله بتروح ما بترجعش
بابلو / انت بتتكلم فى فلوس كاش و انا جاى اعرض عليك تبقي مالك لاكبر امبراطوريه اندر جراوند فى مصر
رزق / اندر جراوند ايه لامؤاخذه كلمنى عربى اللهى لا يسيئك
بابلو / طب هبسطهالك فى عندنا كذا فندق كدا فوق الارض على الوش كازينوهات كباريهات خمارات حاجات من دى بس تحت الارض بقي ... فى دنيا تانيه خالص ... سلاح تلاقي نسوان تلاقى مخدرات تلاقى دا حتى تجاره الاعضاء ما بنقولهاش لا و على راى اللى قال حد يقول للرزق لا
رزق / و انا هتملك الحاجات دى كلها كدا عادى
بابلو / لا طبعا مش عادى انت هتركب مسرح و ليك نص الربح اللى هيطلع و النص الباقي بيتحول اوتوماتيك لحساباتنا بره و بالنسبه للحكومه بقي
رزق / ايوه ... الحكومه ... انت اكيد واخد بالك انك كل ما هتكبر كل ما الحكومه هتشوفك و اللى الحكومه ترصده يا ويله
بابلو / الكلام ده للكتاكيت الصغيرين انما الحيتان المصالح بتتصالح و انت مش لوحدك معاك جيش محامين و محاسبين بينضفوا كل غسيلك الوسخ اول باول انت اللى عليك تفكر ازاى تنفذ اللى المجلس بيقولك عليه و تحافظ على امبراطوريتك و تكبرها عشان كل ما المجلس لقى ان الفلوس اللى بتيجى من وراك جايبه همها هيرضي عنك و مش بعيد فى سنه و لا اتنين تلاقى نفسك بتفتح فرع جديد فى دبى و لا قطر و لا حتى امريكا
رزق / ما تشطحش اوى كدا يا باشا
بابلو / براحتك ... فكر و رد عليا ... ابقي شوف حد ثقه يقرالك الورق ده و يترجملك اللى فيه
بابلو يدى لرزق ورق رزق يبص فيه
رزق / يترجم ايه ؟ دا عربى !!
بابلو / عقود تمليك اكبر سلسله فنادق فى مصر
رزق / ااااه تقصد المحامى يكشف على العقود يعني
بابلو يتنهد و يهز راسه بابتسامه
رزق / من غير محامى ... انا معاك بس برده ... الناس اللى هتطلع معاك لازم تتكيش و ما تاخذنيش الورق ده ما بياكلش معاهم
بابلو يهز راسه
رزق / يبقي اتفقنا يا باشا تحب الرجاله تكون جاهزه امتى
بابلو / من ساعه فاتت
رزق / و اتحركوا كمان هستاذنك تليفون
بابلو يهز راسه رزق يقوم و يتكلم فى التليفون
..........................
فى اوضه عباده
نجاه ممدده فى السرير جنب امها نايمه و عباده فارش فى الارض و نايم تليفون نجاه يتهز نجاه تبص تلاقى رقم غريب بيرن و هى عملاه صامت تمسك التليفون و ترد بصوت واطى
نجاه / السلام عليكم
جوزيف / كويس انك صاحيه ... تنزليلى و لا اطلعلك ؟
نجاه / انت عارف انا فين دلوقت اصلا
جوزيف / عشر دقايق بالكتير لو ما لقيتكيش قدامى فى الجنينه تحت هتلاقيني قدامك و اتمنى ان مامتك تكون زيك كدا بتنام بحجابها عشان ابوكى ما يزعلش
نجاه / نزلالك
جوزيف / ما بهزرش لو اتاخرتى هطلعلك
نجاه / قولت نازله سلام
نجاه تقفل و تتنهد و تبص على مامتها نايمه و تبص على ابوها نايم تبص فى الموبايل
نجاه / مش ناوى على خير انت مش ناوى
نجاه تقوم تنزل الأرض لابوها تصحيه بالراحه يبصلها
نجاه/ يونس بيناديني تحت
عباده يقوم و يتنهد و يهز راسه
نجاه / الغفر صاحيين لو عاوز
عباده / هاجى معاكى يلا قومى
نجاه تهز راسها و هى محرجه و تروح تظبط حجابها و لبسها فى المرايه و عباده بيطلع عبايه نضيفه
نجاه / اسبق حضرتك ؟
عباده / اسبقينى
نجاه تفتح الباب و تنزل تلاقي جوزيف بيسخن فى الجنينه
جوزيف / اتاخرتى
نجاه / كنت بصحى ابويا ... انا مش هعمل حاجه من وراه تانى
جوزيف / نمتى كويس ؟ سخنى
نجاه تسخن
نجاه / ما عرفتش انام
جوزيف / لو ما كنتيش نمتى فى سرير جابر زى العيال الصغيره كنت قولت مغيره مكانك اللى شاغل عقلك ... ارجوكى قولى انا
جوزيف يضحك
نجاه / بس يلا ... انت ناسي انك بوظتلى ساعتى البيولوجيه لما صحتنى امبارح بدرى فلما روحت نمت شويه ما عرفتش انام تانى بالليل
جوزيف / انجزى طيب
نجاه / هنفضل نضرب فى بعض برده
جوزيف / ايه الملل ده لا طبعا فى حاجات تانيه مهمه هعلمهالك
نجاه / زى ايه
جوزيف / انك تنطى من فوق السور بعد ما علوه
نجاه / ازاى يعني هتكسر طبعا
جوزيف / ما احنا مش هنبدا من فوق اوى كدا هنبدا واحده واحده قومى
نجاه تقوم تقف و هى بتنطر رجليها
جوزيف / لما تيجي تنطى ما تنزليش بجسمك مفرود كدا التحميل كله بيبقي على الحوض هننزل اسكواد على ايدينا و رجلينا و يفضل نعمل دحرجه على الارض عشان نخفف من الاصطدام فهمتى حاجه
نجاه تهز راسها
جوزيف / طب ما توريني نطى ادحرجى اتفضلى
نجاه / فى مكانى هنا
جوزيف / اطلعك تنطى من فوق السطح يعني انجزى
نجاه تاخد نفس و تبصله يبان عليه الزهق تنط لفوق و تنزل على ايديها و رجليها و تدحرج فى الارض و تقوم تقف و تبصله يروح يسحب كرسي و يحطهولها تطلع و تنط و تدحرج و تقوم تقف يدخل يجيب المرتبه و يحطها على الارض تحت التراس
جوزيف / تعرفى تطلعى من هنا و لا اشبكلك
نجاه تبصله بخنقه و تجرى تنط تتعلق فى سور التراس و تطلع تلاقى ابوها داخل تبتسلمه و تلف تنط و تدحرج
عباده / السلام عليكم
جوزيف / ازعجناك معلش بس انا محتاج هدوء فى التمرين... عيديها و حاولى تطلعى بشكل اسرع شويه
نجاه / ازاى يعني
جوزيف / عيدي
نجاه تهز راسها و تبعد و تجرى تنط تمسك فى السور و تنط جوه التراس عباده يشد كرسي يقعد يتفرج نجاه تلف و تنط تدحرج و تقوم تقف
جوزيف يشد المرتبه بعيد
جوزيف / عيدي
نجاه تتنهد و تروح تعيد جوزيف يحط المرتبه قدام باب المضيفه
جوزيف / اطلعى على السطح و نطى
نجاه / ناوى تكسرنى النهرده صح
جوزيف / معاكى الاساسيات نطى
نجاه / وريني اعملها ازاى
جوزيف يتنهد و يتعلق فى المواسير و يطلع و يروح يقف بعيد و يجرى ينط يتشقلب فى الهوا و ينزل مقرفص يدحرج و يقف و يرجعلها
جوزيف/ اتفضلى
نجاه / مش هعرف
جوزيف / هشقطك ... تالت
نجاه / انسي مش هعرف
جوزيف يبص لعباده قاعد و باصصلهم
جوزيف / تمام ... اجرى من السور للسور و ما توقفيش لحد ما اقولك كفايه
نجاه / اما نشوف اخرتها
نجاه تجرى و جوزيف بيظبط الساعه و يروح ينط يطلع يقعد على السور جنب عباده
عباده / انت مش مسموحلك تبقي هنا
جوزيف / نجاه مش عارفه تتمرن و انت موجود
عباده / دا من امتى
جوزيف / من امبارح ... نجاه نطت امبارح و لما كانت هتقع انا شقطتها النهرده بعد ما علمتها تكنيك النط خايفه تنط لتشوفنى بشقطها
عباده / الكلمه دى عندنا مش لذيذه
جوزيف / اللحقها استقبلها استلقاها هنقذها هولع فيها اى كان الكلمه انت فاهم قصدى
عباده يبص على نجاه بتجرى
عباده / انت بتعمل ايه بالظبط
جوزيف / بفرهدها بشوف اخرها كام دقيقه جرى
عباده / انت عاوز توصل لايه بالظبط و خليني اساعدك
جوزيف / ردود فعلها و هى لوحدها مختلفه خالص عن ردود فعلها فى نفس الموقف فى وجودكوا وجودكوا بيضعفها او بتنكسف مش عارف ما بفهمهاش اوى البت دى
عباده يقوم يقف و يسند على السور نجاه بدات تتعب تبص عليهم متابعينها
جوزيف / سرعتك بتقل ليه اجرى
نجاه تكمل و التعب بدا يبان عليها
جوزيف / ما تدخلش فى اللى هيحصل
جوزيف ينط و يقف يستنى اما تيجي تعدى يمد رجله يكعبلها تقع تقعد و تنطر ايديها و تبصله يروح يمدلها ايده
جوزيف / قومى قومى مش تفتحى و انتى بتجرى
نجاه / انت عبيط كان ممكن اتعور
جوزيف / حقك عليا حقك عليا قومى ابوكى و الغفر واقفين بيتفرجوا قومى
نجاه تزق ايده و تقوم و تبصله بغضب و هى بتنهج
جوزيف / معاكى كاميره و لا اجيبلك صوره من جوه ما تخلصى اجرى
نجاه / على فكره مش هسكتلك كتير انت فاكر نفسك ايه
جوزيف يزقها و هو بيضحك تقع تنط تقوم و تضربه و هو بيصد يحاول يوقعها تتشعبط فيه و تقلبه فى الارض الاتنين يقوموا و عباده مبتسم
جوزيف / ايه الحلاوه دى نسخن بقي
نجاه / وريني اخرك
جوزيف / المهم انك تبقي قده
جوزيف يهجم على نجاه تتشقلب لورا كذا مره و تتعلق فى غصن شجره و تتمرجح تضربه بالرجل تنطره لورا عباده متابع يسقف جوزيف ينط يقوم و هو بيضحك نجاه تجرى عليه و تضرب يمسك ايدها و تيجي تكرر الحركه و تقلبه يتحكم فيها و يثبتها فى الارض ما تقدرش تفلت يسيبها و يمشي و يديها ضهره
جوزيف / بتتحسن بسرعه ... بس شكل ما فيش امل هتفضل واقفه تبص عليا و مش هتتجرا و تضرب
عباده / اديها الدافع
جوزيف / معاك حق ... تعالى لوحدك هعلمك حاجه
جوزيف يروح ناحيه المضيفه نجاه تبص لابوها متابع من فوق تروح ورا جوزيف و تقف عند الباب تلاقيه بيطلع شنطه صغيره و يفردها على ترابيزه
نجاه / انا مش هقدر ادخل
جوزيف يبصلها و يرفع فى ايده القنبله اللى على شكل كوين
جوزيف / انتى عارفه دى تقدر تعمل ايه
نجاه / هى دى قنبله صح
جوزيف / فكراها؟
نجاه ترفع رجلها تيجي تدخل ترجع فى رايها و تفضل واقفه على الباب جوزيف يبتسم
جوزيف / تحبى اعلمك بتتعمل ازاى
نجاه/ انا مش هقدر ادخل بس ينفع انادى ابويا
جوزيف / لا لو هعلمك هتوعديني يبقي سر بينا و دا شرطى
نجاه / و تضمن منين انى مش هطلع سرك بره
جوزيف يبتسم و يقفل الشنطه و نجاه عينها حاطط الشنطه فين جوزيف يروح ناحيتها يوشوشها
جوزيف / ششششش دا سر بينا
نجاه ترجع لورا جوزيف يعديها
جوزيف / اللحقى افطرى قبل الاذان عشان هتصلى الفجر و نطلع نتمرن على النشان
نجاه / انا بعرف انشن كويس
جوزيف / كل انواع الاسلحه ... يعني لو وقع فى ايدك اى سلاح هتعرفى تستخدميه و لا هو مسدسك بس
نجاه تسكت
جوزيف / انتى عارفه انا محتاج ايه دلوقت
نجاه/ خير
جوزيف / طعميه سخنه ... يا كبير عندكوا طعميه سخنه
جوزيف يروح ناحيه عباده و نجاه بتبصله باستغراب
............................
فى اوضه دياب
وفاء تقلق تلاقى دياب قاعد بيتفرج على فيديو و مركز
وفاء / دياب
دياب ينتبه و يبصلها و يقفل اللاب و يروحلها
وفاء / خير فى حاجه و لا ايه
دياب / قلقتك و لا ايه حقك عليا
وفاء / فى ايه مالك ايه اللى مصحيك دلوقت
دياب / كنت بتفرج على تسجيل الكاميرات للماتش بين جابر و جوزيف
وفاء / تانى دى تالت مره تتفرج عليه
دياب / الوله حافظ جابر و بيصد قبل حتى ما جابر يبدا حركته
وفاء / ما تقولش انك عاوز تلاعبه
دياب / الحوار ده لولا تدخل احلام ما كانش انتهى على خير
وفاء/ يعني الحمد لله هتشيل الفكره دى من دماغك
دياب / لا عاوز اللاعبه
وفاء/ و الله كنت متاكده ما انا حفظاك و صماك
دياب / تفتكرى حافظنى انا كمان ... طب شافنا بنلعب فين دا احنا بقينا فين و فين لما بنلعب و كل واحد بيتمرن بطوله
وفاء / لا دا انت يومك طويل عن اذنك انا اخش الحمام و ربنا يعينك على اللى انت فيه
وفاء تقوم تروح الحمام و دياب بيضحك
.........................
أنت تقرأ
الكبيره ٢ بقلم / لولو_محمد
Humorالحرب لسه مستمره و الحقيقه مسيرها فى يوم تظهر النور و كل واحد لازم يختار طريقه
