((((((( الكبيره ٢))))))))
#لولو_محمد
الحلقه ٨٨
ناصر نايم فى السرير بيعيط يسمع صوت باب الشقه بيتفتح يمسح دموعه و يسحب مسدسه و يطلع يلاقي مختار ناصر ينزل سلاحه
مختار / يااااه !! و عليكم السلام يا سيدي قال يعني حد غيرى ممكن يكون معاه المفتاح... ما علينا... مالك عامل كدة ليه
ناصر / كنت نايم و صحيت على صوت الباب
مختار / هو صوت الكالون عالى اوى كدا ؟! انت كويس ؟
ناصر / الحمد لله تمام ... ايه الاخبار ؟ الجماعه كويسين ؟!
مختار/ الحمد لله ... احنا محتاجين نتكلم ... وقت ما تبقي جاهز انا قاعد مستني
ناصر / ما اعتقدش ان فى حاجه تخصنى ممكن نتكلم فيها ... فلو حضرتك عاوز تتكلم فى اى حاجه انا تمام سامعك
مختار / متأكد؟! اصلك ما بتسمعنيش خالص و طول الوقت بتتهمنى انى سايبك و بهتم بناس تانيه فانا جيت لك اهو
ناصر / مفيش حاجه يا بابا ... أنا داخل انام ... البيت بيتك طبعا
مختار/ الراجل هرب منك ازاى مش هتحكيلى
ناصر يبص لمختار
ناصر/ ايه معقول المنطقه كلها ما كانش فيها و لا كاميره تصور لحضرتك اللى حصل
مختار ساكت
ناصر / كان فى ... و حضرتك عرفت هرب ازاى ... بس لا ... هروح اخنق ناصر اكتر ما هو مخنوق اياكش يولع فى نفسه و كلكوا ترتاحوا
مختار / ما تظلمش بنات الناس معاك يا ناصر
........................
ناصر / ابيع بنت الناس اللى بتحبنى عشان خاطر واحده بنت كلب خاينه ما بتحبنيش صح؟!
مختار / ما قولتش كدا ... اصبر و ادى لقلبك فتره يخف من جرحه ... خد اللى بتحبك و بتحبها مش لازم نور و مش لازم اميره البنات كتير اكيد هتلاقى فيهم واحده تحبها و تحبك الحياه ما وقفتش على بنتين
ناصر / مش هتفرق اصل المسأله مش مساله حب ... دى مساله كرامه ... مساله ... انت ما شوفتش كانت بتبص لى ازاى... كانت واثقه فى نفسها بطريقه... كأنها بتقولى مش هتقدر تقتلنى ... كانت شيفاني ضعيف و جبان
مختار / كانت شيفاك راجل مش بيستقوى على حرمه
ناصر / بس دى مش حرمه دى مش حرمه
مختار / انت عملت الصح
ناصر / بالنسبالك ... عشان انت عاوزها تعيش عشان انت لسه عندك امل فيها او ما اعرفش ليه بس انت لسه بتدافع عنها انت كمان لا قتلتها و لا خليت حد يمشي وراها يوم ما جت لحد عندك
مختار / طول ما هى مش بترفع عليا سلاح و لا بتحاول تأذيني
ناصر / بتحاول ... كل اللى هى بتعمله اصلا انها بتحاول تأذيني المركب و اللى حصل فيها و الدرونز و كل حاجه حصلت قبلها هى ما بتعملش حاجه غير انها تحاول تأذيني و تدمر حياتى هى حطانى فى دماغها
مختار / و انت اثبت لها انها مش فى دماغك
ناصر / ازاى و انا سبتها تكسب ازاى و انا ما قدرتش ائذيها حتى ازاى ... انت ما شوفتش كانت بتبص لى ازاى
مختار/ انت اكبر من انك تحط عيله زى دى فى دماغك انت كملت حياتك عادى عيله و شبطت فى حاجه رميتهالها
ناصر / انت بتبسط الأمور و كانك بتضحك على عيل صغير
مختار / هى فارقه معاك ؟!
ناصر / هى وجعانى ... ايوه ... ما اخدتش حقى منها... ايوه ... جرحانى ... ايوه ... فارقه معايا ... لا
مختار / على قد ما وجعتك هتتوجع صدقنى لا عمرها هتلاقي زيك ... صدقنى هى خسرتك و دا أكبر عقاب ليها ... كل اللى عملته فى اهل نور و فى خطوبتك دا أكبر دليل انك انت اللى قاهرها ما تديهاش أكبر من حجمها بقي
ناصر / هو حضرتك جيت ليه ؟
مختار / كان المفروض ما اجيش
ناصر / مش عارف بس مش مقتنع انك جاى تقولى الكلمتين دول
مختار / هو انت عدوى ؟! هو انت فاكر انى ما بحبكش و لا بهتم بيك بجد و لا بجد فاكر انى بفضل عليك اى حد تانى ؟! انت بجد مقتنع انى ممكن انام فى سريرى و عارف انك فى حاجه تعباك او مضيقاك ... انت بجد شايفني كدا
ناصر ساكت
مختار/ بكره لما ربنا يكرمك و يتملك جوازك على خير و تبقي اب هتفهم
ناصر ساكت
مختار / اتعشيت ؟
ناصر / مش جعان ... بس لو حضرتك جعان فى اكل فى التلاجه لو تحب اسخن لك
مختار/ هنام خفيف لما نصحى نبقي نتكلم و نشوف هنعمل ايه
ناصر / فى ايه؟
مختار / فى كل حاجه يا ناصر و لا انت مش حاسس انك عملت اي حاجه يعني
ناصر / يعني فى الاخر انا الغلطان برده
مختار/ لا حول و لا قوه الا بالله يعني انت لقيت حاجه ممكن تديني مبرر للفضيحه اللى عملتها دى
ناصر/ بتاع مين تيست الحمل ده ؟
مختار / مش بتاع حد
ناصر/ ما تكدبش عليا انا مش صغير
مختار / و ما دام مش صغير مش قادر تحترم خصوصيات الناس ليه يا اخى ... يعني مبسوط انك اتهمت نجاه فى شرفها بالشكل ده
ناصر / انا ما اتهمتهاش
مختار/ امال يعني ايه بتاع مين فيكوا يعنى فى احتمال يكون بتاع نجاه ما تقولش انك مش غلطان يا ناصر لو سمحت و ما تقولش انك ما تستاهلش رد فعلها
ناصر / هى ما ادتنيش فرصه اشرح
مختار / تانى انت مش صغير انك تقول كلام أنت مش عارف معناه و لا عواقبه الكلمه زى الطلقه لما بتطلع ما بترجعش
ناصر / مهره حامل ؟
مختار / كانت ... واحد من الدكاتره فى المركز اغتصبها هديت كدا بس البيبي نزل و كنا راجعين بيها من المستشفي و طبعا البنت لما عرفت حاولت تقتل نفسها و انت بكل بساطه جيت كملت عليها و على نفسيتها المدمره
ناصر / و عمران ايه وضعه فى الوحله اللى اتوحل فيها دى
مختار / مفيش واحله و لا زفت موضوع و اتقفل هم زى ما اتكتب كتابهم على الورق أطلقوا برده على الورق و خلصنا
ناصر / و هى قسيمه الطلاق اللى معاها مش هتخليها توحل واحد تانى لا له فى الطور و لا فى الطحين
مختار / انت بتقول ايه انت هى البت عملت حاجه دى اغلب من الغلب و بعدين اللى هيتجوزها بالقسيمه دى هيبقي عارف انها كانت متجوزه قبل كدا و متقبل وضعها و ما اعتقدش اصلا ان مهره ممكن تغش حد اكيد هتحكيله الظروف و اكيد ما دام اصلا كان متقبل واحده مطلقه عادى يتقبل واحده أتعرضت للاغتصاب يعني
ناصر/ واحده اتكتب كتابها و اطلقت غير واحده اتجوزت و جوزها دخل عليها و طلقها
مختار / انت شاغل نفسك بمهره ليه هو انت شوفت العرسان على الباب بنت اتعرضت لابتلاء شديد ربنا يستر على ولايانا منه انت عاوز منها ايه تولع فى نفسها عشان انت ترتاح
ناصر / لا نوحل اخويا بيها !!!
مختار / دا اخوك نفسه كان متقبل انه يكمل معاها و هى حامل و يشيل نفسه الليله و هى اللى رفضت و قطعت شراينها عشان تخلصه من اللى انت بتسميه وحله يا اخى خلى فى قلبك شويه رحمه بالناس مش كدا
ناصر ساكت
مختار / اتمنى بقي ما اصحاش الصبح الاقى امه محمد كلها عارفه ان مهره اغتصبت و حملت و سقطت و كل الكلام الحلو ده
ناصر / و انا هعمل كدا ليه اصلا
مختار/ طب الحمد لله طمنتنى و يا ريت كمان تراجع نفسك ان كنت عاوز تعتزر لنجاه عن سوء التفاهم اللى حصل و لا لا
ناصر / اكيد هراضيها يعني
مختار / هكون شاكر جدا ليك الحقيقه ... انا داخل انام اياكش ما اصحاش على مصيبه جديده حكم انا عارف
مختار يدخل اوضه و ناصر لسه متابعه
.....................
فى اوضه جابر
جوزيف نايم ملفوف ضلوعه و وسطه بشاش ودماغه و متعلق ليه محلول و جابر نايم جنبه ملفوف دراعه و كتفه الشمال جوزيف يان مره التانيه التالته جابر يصحى يبص عليه و يقوم يقعد يبص فى الموبايل يشوف الساعه يشوف الرساله يفتحها جوزيف يان جابر يبص له
جابر / لسه فاضل ساعه على المسكن مش قادر تستحمل اديهولك دلوقت؟
جوزيف يأن جابر يمسك كيس الدوا و يطلع حقنه و يملاها و يحطها فى المحلول
جابر / اديها دقايق بس و هتبقي كويس باذن الله
جابر يرمى السرنجه
جابر / الواحد ما لحقش يغفل حتى
جابر يبعت رساله لنجاه " صاحيه اكلمك؟" ثوانى و تليفونه يرن
جابر / السلام عليكم ايه اللى مصحيكى لدلوقت
نجاه / عمران قلقنى عليك انت كويس
جابر / بسيطه الحمد لله كتفى اتخلع و فى كام لسعه فى ضهرى
نجاه / لسعه!!!
جابر / و الله انا سامع الدكتور بيقول لو اهتميت بالغيار و الدهان مش هتسيب اثر فخير يعني بسيطه
نجاه / لا باذن الله هتلتزم و انا هقف على دماغك بنفسي
جابر / و ماله حد يلاقي دلع و ما يدلعش
نجاه / انت فى ايه و لا فى ايه انا قاعده بقرقض فى ضوافرى هنا و انت رايق و فايق
جابر / و ربنا ما لحقت انام كل ما اغفل يونس يصحيني
نجاه / هو انت معاه فى نفس الاوضه!!!
جابر /انا اللى طلبت باذن الله هيبقي كويس هو الوضع مش خطير باذن الله اصعب منى اكيد بس مش هيموت يعنى
يونس يضحك جابر يلف عينه بزهق
جابر / روحى نامى ارتاحى شويه و الصباح رباح... تمام فى حفظ الله
جابر يقفل و يروح لجوزيف يلاقه مفتح بصعوبه و مبتسم
جابر / احسن دلوقت؟!
جوزيف/ هو بغض النظر انى تعبان جدا بس حلمت حلم غريب اوى
جابر/ خير؟!
جوزيف /حلمت انى لما فجرت السايبورج الكمره وقعت علينا انت جيت و رفعتهم و طلعتنى
جابر يبص الناحيه التانيه
جوزيف / كنت بتناديني و بتقولى ما تموتش هنطلع اهو ما تموتش
جابر /ايوه عاوز ايه يعني
جوزيف / ليه
جابر / هو ايه اللى ليه انت هتفوق عليا انا مش قادر لك
جوزيف /مش كان زمانك خلصت منى دلوقت
جابر / يا صبر ايوب!!! يا ابنى انت... ما علينا حمد الله على سلامتك ليك عمر... محتاج منى اى حاجه؟ انت ما لكش عندى المفروض اى علاج لحد الساعه عشره الضهر بس لو محتاج حاجه او حاسس بحاجه اعملك حاجه؟
جوزيف / ليه رجعت؟
جابر / كان هيبقي احسن لو ما رجعتش يعني انت غريب جدا
جوزيف /انت اللى غريب لو انا ما كنتش رجعت لك
جابر / ربنا ما يحوجنا ليك يا سيدي و الحمد لله ان انا مش انت
جوزيف / نجاه بخير صح؟
جابر / الحمد لله نجت بمعجزه هى كمان... كان مبدل السلوك و عشان النصيب خالى قطع السلك الغلط بالغلط لما انت فجرت السايبورج فالحمد لله ما انفجرتش
جوزيف يبتسم
جابر / اصابتك مش خطيره محتاج بس راحه و تغير على الحرق... انا بص مش هكدب عليك... انا منبهر انك قدرت تدمرهم الاتنين فى الثوانى دول دا عمى عباده بيقول فجروا فيهم كام قذيفه ار بى جاى و انت... حمد الله على سلامتك
جوزيف / مفيش حاجه ما لهاش نقطه ضعف انا خفيف و صغير جدا عنه ما كانش قادر يجارينى اتعلقت على ضهره فى البلايند سبوت بتاعته و دا خلا السايبورج التانى يفتح النار على زميله و فى وسط الهوجه رميت جواه كوين من بتوعى... صغيره بس فتاكه
جابر / عارفها
جوزيف / تحب اعلمك ازاى تعمل زيها؟
جابر / قوم بالسلامه و نشوف
جوزيف / ليه رجعت
جابر / برده!!! رجعت عشان عمرى ما اديت ضهرى لحد لو ما كنتش رجعت كنت هتموت
جوزيف / بس دا لمصلحتك... عشان نجاه
جابر / انت حتى فى وضعك ده بتستفزنى... انت جايب التناحه دى منين
جوزيف / ابدا انا... بص انا ما اقصدش حاجه وحشة بس... مش هنكدب على بعض هى ميلالى انا اكتر
جابر/ انت واهم ما سالتش عنك حتى ولو ما غيرتش السيره دى
جوزيف يضحك بتعب شديد
جوزيف /هتعمل ايه هتقتلنى و انا راقد؟ ما تعملهاش ... بص انت انقذت حياتى و انا هساعدك
جابر / الله الغنى يا جدع انت بطل استفزاز
جوزيف / لما تلاقيها منفعله و بترمى نفسها فى البحر ما تحاولش تمنعها و لا تقنعها بالمنطق نط معاها
جابر / يا سلام!!!
جوزيف / ما تخافش هى بتخاف على اللى حواليها اكتر من نفسها هى ما بتخافش على نفسها لو حست انك هتتاذى عشانها هترجع و لو حست ان القرار فى ايدها هتهدى
جابر / انا رايح اتوضي و اصلى ركعتين قيام ليل و اقرا الورد بتاعى قبل الفجر ما ياذن خليك انت بقي فى مايه البطيخ اللى انت عايم فيها دى
جوزيف يبتسم جابر يقوم و يطلع بره
.........................
فى السيرك
خوان يصحى يلاقى نفسه بملابسه الداخليه على الارض و حواليه اقفاص كبيره مليانه كلاب أحجام ضخمه و عماله تنبح يفوق و يقوم يقف و يبص حواليه بابلو يفتح الباب و يدخل
بابلو / صح النوم
خوان/ بابلو !! انا فين و فين هدومى
بابلو / هجاوبك على اللى انت عاوزه بس الاول هسالك كام سؤال صغيرين يمكن يفرقوا فى شكلك قدام المجلس ... تقدر تقولى المجلس سايب واحد بعين واحده عايش ليه
خوان ساكت
بابلو/ عشان كنت مفيد بتشتغل و تطور اسلحه و تجيب ليهم فلوس ... صح ؟ قول صح ... انت بقي لما تدمر اربعه سايبورج و تفتح عنين اللى يسوى و اللى ما يسواش على الاسلحه اللى عندنا و يبدأو يسالوا و يتطقسوا و ياريت بفايده... تقدر تقولى استفدت ايه ؟! لا قدرت تقتل دانيال و لا تخطف نجاه و لا اى حاجه فشل فوق فشل فوق فشل
خوان / انا كنت مرتب لكل حاجه انا مش عارف ازاى
بابلو / المجلس بيديك فرصه اخيره ... امتحان اخير
خوان / و انا هنجح فيه
بابلو يديه مسدس
بابلو / بمجرد ما هطلع بره و اقفل الباب ده اقفاص الكلاب دى هتتفتح اوتوماتيك و انت و شطارتك بقي
خوان يهز راسه و يشد الاجزاء بابلو يبتسم و يطلع بره اول ما يقفل الباب الاقفاص تتفتح و الكلاب تطلع تهجم على خوان يضرب اول طلقه يقتل اول كلب يجي يضرب التانى يكتشف ان المسدس ما كانش فيه غير طلقه واحده الكلاب تهجم عليه و تنهشه و تاكله بابلو يروح يقعد جنب امايا بتابع اللى بيحصل من ورا شاشه
بابلو / فاشل طول عمره فاشل
امايا تتنهد
امايا / قتل بيبيتوا
بابلو / و خد جزاءه
امايا / تعرف المشكله فين
بابلو / فين
امايا / تخيل لو كان المجلس خلص من الفاشل ده من زمان مش كان زمان بيبيتو عايش دلوقت
بابلو / لو كل واحد غلط مره المجلس صفاه مش هيتبقي فينا حد
امايا / مش هيتبقي غير الاكفأ حتى لو انا مش منهم دا قانون الانتخاب الطبيعي... الدنيا هتبقي مكان احسن لو ما فيهاش ناس فاشلين
بابلو / وجهه نظر
امايا/ اقولك على سر
بابلو / فى بير
امايا/ انا كنت بجاهد نفسي اوى هنا انى ما افتحش الاقفاص و انت جوه و اخلص منك انت كمان
بابلو / ما عملتيش كدا ليه ؟ ايه ؟ ما قدرتيش تفرطى فيا و لا ايه ؟
امايا / تؤ ... صعب عليا الكلاب اصلهم متربين على الغالى ما بسترخصش فى اكلهم
بابلو يضحك بصوت عالى
امايا / نفذت اللى جيت عشانه و قولتله الكلمتين الخايبين بتوعك قبل الإعدام... شوف طريقك قبل ما افقد سيطرتى و تشوف منى وش ما يعجبكش
بابلو / همشي بس خليني اقولك كلمه ... اللى انتى مقريفه من خوفك عليك ده انتى و لا فى خياله و اول واحده هيسال عليها لما يفوق و يخف و يبقي زى الفل مش هتكون انتى هتكون نفس البنت اللى سابك مرميه و هربها
امايا / خلصت ؟! هى عندى فى نفس غلاوته و لو خيروني بين انه يبقي معايا و لا معاها هقوله يخليه معاها ...ارتحت كدا ؟! اطلع بره بقي
بابلو يبتسم بسخريه و يمشي
امايا / ما بيلاقوش غيرك يبعتوه !!! ما هم عارفين ان ريحتك بتعصبنى
امايا تدور على ازازه برفيوم و تفضل ترش فى المكان
.........................
على السلم فى بيت نجاه
نجاه نازله شايله صينيه عليها حله صغيره و طبق فيه فرخه مسلوقه و محمره تروح ناحيه الاوضه اللى تحت السلم و تخبط برجلها بالراحه شاب يفتح الباب
الشاب / ست نجاه !! خير اؤمرى
نجاه / عملت دى لجابر و يونس ابقي اديهالهم على ما نخلص باقي الاكل بتاعنا
الشاب / عيني حاضر
الشاب ياخد منها الصينيه و يدخل يقفل الباب جابر يطلع من الاوضه
جابر / مين يا خالد
خالد / دى الست نجاه جيبالكوا تصبيره لحد الغدى
جابر / تسلم ايدها حطها و هات اطباق من جوه
خالد يحط الصينيه و يروح المطبخ جابر يكشف الاكل جوزيف يطلع من الاوضه بيتسند جابر يروح يسنده جوزيف يبص له باستغراب
جوزيف / انت بقيت مريب جدا و انا بدأت اتوتر منك
جابر / حسبه لله رايح فين
جوزيف / رايح الحمام ... ايه هتيجي تسندنى جوه
جابر / ما تندمش الواحد على المعروف بقي دا انت غتت اوى
جوزيف يضحك و يمشي يبص على الاكل و يكمل خالد يطلع من المطبخ شايل اطباق يشوف جوزيف ملامحه تقفل و يتابعه لحد ما يدخل و يقفل الباب
خالد / هو الجدع ده هيطول معانا ؟
جابر / و انت وجوده او عدمه فارق معاك فى ايه ؟
خالد / يعني ... اصل فى كلام كتير يعني بيتقال بين الرجاله
جابر / كلام ايه ده ؟
خالد / ان الجدع ده هو اللى خطف ست نجاه قبل كدا و من ساعه ما رجعت و هى
جابر / مجنداه ... من ساعه ما رجعت و هو بيعمل بس اللى احنا بنقولهوله
خالد يبص له و ساكت
جابر / الجدع ده كان هيموت و هو بيحاول ينقذ حياتى انا و نجاه و مديون له بحياتي تمام يا خالد ؟! يا ريت نقفل على السيره دى و لو حد فتحها قدامك قوله يحط لسانه جوه بقه بدل ما اجى انا اقطعهوله
خالد / ما حدش بيقول اى حاجه وحشه و الله هم بس مقلقين منه و انه داخل وسطيكوا اوى كدا دا الست نجاه وقفت فى وش سلاح راغب عشان تحميه منه
جابر/ او يمكن عشان تحمى راغب و الرجاله اللى كانت موجوده ... الجدع ده مش سهل و ما حدش يستهون بيه و لا تفكروا تتكاتروا عليه اهدوا كدا و امشوا على تعليمات الكبير
خالد / ما كانت
جابر / عارف انها بتتغير عارف بس الظروف بتتغير هنعمل ايه حصل موقف و اتخانقوا و بعدين حصل موقف تانى و اتراضوا اربط الحمار مطرح ما يعوز صاحبه ... هو طول و لا انا بيتهيألي
جابر يروح يخبط على الحمام
جابر / انت تمام ؟
صوت جوزيف / انا برده اللى غتت
جابر يضرب كف على كف
جابر / اولع داهيه تاخدك
جوزيف يضحك جابر يروح يغرف و ياكل و خالد متابعه
جابر / مستنى عزومه ما تاكل
خالد / مش هنستناه ؟
جابر / مش مستنى حد كل
خالد يبص لجابر باستغراب جابر بياكل خالد يغرف و ياكل
.............................
فى اوضه عباده
نجاه تدخل و فى ايدها صينيه فيها اكل
عباده/ هاكل معاكم بره
نجاه / تمام
نجاه تطلع بره تحط الاكل على الترابيزه و تروح المطبخ عباده يروح يخبط على اوضه عمران عمران يفتح
عباده / الاكل
عمران / انا عملت سيرش عن صوت مهره اللى راح و لقيت دكتور نفسي و بفكر احجز لها ايه رايك
عباده / مفيش حد عندنا فى البلد ؟
عمران / مش عارف ابعت لخالى يشوف لينا حد ... بس انا مش متحمس انها ترجع البلد و هى فى الحاله دى بصراحه ... مش عارف ... شوفوا انتوا رايكوا ايه و اعملوه
عباده / شوف الدكتور اللى لقيته و روح اتكلم معاه ... لا بلاش انت ... خلينا نسأل عن الدكتور الاول ... انا هشوف الموضوع ... مش هنساها ما تقلقش
نجاه تطلع من المطبخ شايله صينيه اكل و تحط على الترابيزه
نجاه / انا نزلت اكل للرجاله تحت و الجماعه اتكفلوا بباقي البيت لو ناقصكوا حاجه نادوني
عباده / امال مهره فين ؟
نجاه / هتاكل فى الاوضه جوه هدخل اكل معاها لو مش محتاجين منى حاجه
عباده يهز راسه نجاه تدخل عباده يقعد
عباده / اقعد
عمران / هو الطبيعي اننا نسكت على اللى حصل ده
عباده/ اقعد كل يا عمران و اهدى ... ابوك لسه ما رجعش ؟
عمران / لا ... هو عند ناصر
عباده / عارف ... بسم الله
عباده ياكل عمران يقعد عباده يقرب منه الاكل عمران يبص له عباده يهز راسه عمران يسمى و ياكل
........................
فى القسم
احمد بيتكلم فى التليفون
احمد/ تمام يا فندم ... لا كلوا واضح معاليك ... اكيد هشرف على الموضوع بنفسي سعادتك ... ما يكونش عند حضرتك اى فكر ... تمام حضرتك ... باذن الله بإذن الله ... مع السلامه مع السلامه مع السلامه
احمد يقفل و يطلع بره يركب عربيته و يسوق ثوانى و يقابل عربيه شاهين فى تقاطع
احمد ينزل و يروح لشاهين
احمد / شاهين بيه ايه الصدف السعيده دى دا انا كنت جايلكوا
شاهين / تانس و تنور يا باشا خير اؤمرنى لو فى حاجه اقدر أقدمها
احمد / انا عارف ان الكبير مسافر اليومين دول بس انت اكيد عندك خبر بحوار السيرك اللى هينصب فى البلد و كدا
شاهين / سمعت اه ... الروسي... بس ما كنتش اعرف انه هيجي بالسرعه دى
احمد / و الله انا شخصيا المكالمه لسه جيالى حالا بتقولى انسق معاكوا عشان نوفر ليهم الحمايه و كل اللى يحتاجوه
شاهين / الحمايه ؟!
احمد / اعتقد ان اللى اعرفه ان معظمهم بنات و اجانب و انت فاهم بقي ... اهم حاجه تنشيط السياحه يا شاهين بيه
شاهين / فاهم طبعا ... ما يكونش عندك فكر انا هتكلم مع الوالد و هبلغه و لو فى اى مشكله هو هيكلمك شخصيا ... بس طبعا دا ما يمنعش انك تنورنا تاخد الواجب بزياده انت على راسنا
احمد / اكيد بس خليها مره تانيه انت اكيد فاهم ضغط الشغل
شاهين / الله يكون فى العون يا باشا الله يكون فى العون
احمد / عن اذنك
شاهين / اتفضل
احمد يروح يركب عربيته شاهين يقفل الازاز المتفيم و يحط موبايله فى التابلوه و يطلع موبايل قديم و يقفل التابلوه و يتصل
شاهين / حصل
امايا / حبيبي ... النفق جاهز لو حابين تقتحموا صدقنى هتلاقوا هدايا حلوه اوى مستنياكوا
شاهين/ اروح معاهم
امايا / اول الصف يا شاهين ... اوعى تنسي ... اول الصف
شاهين / تمام
امايا / ما تقلقش انت حبيبي
شاهين / و هم كمان اهلى خليكي فاكره
امايا / ايه ده هترجع فى كلامك و لا ايه مش انت اللى قولت اننا عشان نوصل للى احنا عاوزينه لازم نخلص منه
شاهين/ لو فاكره انه هيكون معانا تبقي غلطانه دا هيبقي مستخبى ورا مكتبه بيتكتك على الكومبيوتر بتاعه اخواتى انا اللى هيروحوا فى الرجلين
امايا / يبقي امنهم كويس و انزل بتقلك مش كل حاجه هعملهالك
شاهين / بتعمليهالى فعلا !!
امايا / و انت قبل ما تحط ايدك فى ايدى كانوا بيحترموك زى دلوقت ؟!
شاهين/ ما كل ده هيضيع بسبب القرف اللى هتعمليه
امايا / نظام الحكم ما بيتغيرش فى العالم الا فى اربع حالات التوريث او الثوره او الانقلاب او الفوضي ... لازم تخلى الناس تضغط على ابوك عشان يتنازل ليك على مكانه و هو عايش لازم يعرف ان الشيله تقيله عليه فى الوقت اللى هيقع فيه الناس مش هتلاقي غيرك شايل هيختاروك و يبايعوك
شاهين / و ان ما حصلش ان اختاروا دياب ؟!
امايا / يبقي انت فاشل يا شاهين و مفيش امل منك يا قلبي ايه اعمل لك ايه اكتر من كدا.. نفذ اللى قولتلك عليه و اخلص
شاهين / بالنسبه للحريم بتوع السيرك
امايا / هتعرف كل التفاصيل فى وقتها نفذ بس اللى قولتلك عليه دلوقت
شاهين / تمام ... سلام
شاهين يقفل و يبدل التليفونات من التابلوه و يكمل سواقه
………………………….
فى اوضه جابر
منبه يضرب جوزيف يصحى يقفله فى لحظتها يلاقي جابر نايم يمد ايده ياخد كيس الدوا و ياخد منه حبايتين و بعدين يطلع مرهم و يدهن على قد ما يقدر جابر يتقلب جوزيف يبص له و يتنهد و ياخد الكيس و يطلع بره و هو بيتسند يقابل خالد جوزيف يفرد طوله
خالد / خير محتاج حاجه و لا ايه ؟
جوزيف / خير انت صاحى ليه دلوقت
خالد / وأخد فتره حراسه لو ما عندكش مانع
جوزيف يبص حواليه
جوزيف / بتحرس مين من مين معلش
خالد / ما تشغلش بالك بالتفاصيل ... تحب اساعدك فى حاجه ؟
جوزيف/ كتر خيرك انا طالع السطح اشم هوا
خالد / طب حط حاجه على جسمك لتستهوى
جوزيف / ايه ده يا قلبي انت كمان خايف عليا ؟! اما صحيح الدنيا دى غريبه ايه الواحد لازم يموت عشان تعرفوا قيمته و لا ايه .. ما شوفتش تليفونى ؟
خالد / انت جاى باللى عليك مفيش غير الجزمه هتلاقيها عندك عند الباب
جوزيف يرمى الكيس على الكرسي و يروح يفتح الباب و يطلع
خالد / هوا اما يلهفك تنح
...............................
فى اوضه شاهين
وفاء نايمه و شاهين صاحي بيفكر
///////////
شاهين / هتعمل ايه يا شاهين ؟! هتثق فيها ؟! هتامنها على روحك ؟! طب افرض جلت... العمر مش بعزقه هتعمل ايه ... هتلمها ازاى طيب ما هم هيشوفوك فاشل انت اللى وحلتهم انت اللى روحت للبنات و قالولك دا فخ و انت اللى صممت و اديك اتاكلت على قفاك و طلعت هتستر نفسك ازاى بعد الخيبه دى و انت طالع ليهم سايح فى دمك ... انت فى ايه و لا فى ايه انت بجد مستعد تتصاب ... و ليه و عشان ايه ما يولعوا كلهم فى بعض انا عارف الاصابه دى هتيجي فين و ازاى... لا يا شاهين لا ... لا و الف لا مش هعمل كدا انا مش هيحصل ... و ربنا ما هيحصل ... العمر مش بعزقه لا ... بس هى برده عارفه هى بتعمل ايه ... و بعدين انت ما تقدرش تقول لها لا انت عارف كويس انها وحلاك معاها لشوشتك و عارف انها الوحيده اللى هتقدر توصلك لياسمينا ... و اخرتها يا شاهين و اخرتها ايه يعني هنموت روحك على حرمه اوى كدا ... حرمه !!! هى دى اى حرمه !!! دا دى اللى الواحد يموت روحه عشانها بصحيح
شاهين يبص لوفاء
شاهين / صحيح ... ابخات رجاله تنام متهنيه و ناس بالنيله متحنيه ... منك لله ياما على التدبيسه السوده اللى دبستيهانى دى ... ايه؟! ما لهاش صرفه يعني ؟ ... انا مش هعملها مش نازلها انا الطالعه دى و لا هزن عليها انا عملت اللى عليا و جبت المعلومات هم يصطفوا بقي ... هقولها الحقيقه انا قولت لهم و هم قالوا فخ ... انا مالى هجبرهم يعنى ؟! ايه هنزل بطولى و لا ايه ؟ .... داهيه لتقول لى انزل بطولى ... و بعدين ... اخرتها ايه يعني ... دا ايه الهم اللى انا فيه ده
شاهين يقوم يدخل الحمام و يفتح الحنفيه و يفضل يغسل فى وشه و يبص لنفسه فى المرايه و هو مرعوب
.........................
على السطح
نجاه حاطه شال على ضهرها و متعصبه
نجاه / يعني ايه ممنوع
راغب / يعني ممنوع تعليمات الكبير انك ما تطلعيش السطح تانى
نجاه / تمام و لا تضايق روحك انا سيباهالك اشبع بيها
راغب / تسلمى
نجاه تبص له و تنزل و هى متعصبه
نجاه / ما تحبسونى فى برطمان و تقفلوا عليا ارحم دى بقت عيشه
نجاه تسمع صوت انين من بعيد على السلم من تحت تنزل بالراحه تلاقى جوزيف قاعد على السلم و ساند راسه على الحيطه و نايم نجاه تفك الشال و تروح تحطه على ضهره يفتح و يبص لها ترجع خطوه لورا
نجاه / انت بتعمل ايه هنا ؟ كدا تستهوي
جوزيف / انتى بتعملى ايه على السلم السعادى
نجاه / كنت على السطح... قوم ادخل نام احسن و لو ليك علاج خده انت تعبان مش هتكسب حاجه من نومتك دى ... انت اتخانقت معاهم تحت ؟ حد ضايقك ؟ جابر قالك حاجه ؟
جوزيف يهز راسه لا
نجاه / امال بتعمل ايه هنا و بعدين انت ازاى اصلا قاعد كدا افرض حد من الحريم و لا البنات اللى فى البيت شافوك يعني
جوزيف يبص على لبسه
جوزيف / مش قادر اجادلك بس دا مش عوره
نجاه / مش قادر تجادل لكن قادر تقعد عريان على السلم بدل ما ترتاح قد ايه انت انسان مستفز
جوزيف يقوم و هو بيتسند على الحيطه نجاه تقرب عشان تساعد و بعدين تمنع نفسها و ترجع و تبص فى الارض و بعدين تبص له و تبص لفوق و تفضل تفرك فى ايديها و هى متابعاه و هو بينزل بالراحه لما يبعد عن عنيها تنزل بالراحه وراه لحد ما يدخل الاوضه تطلع و تدخل شقتها و تبص على السلم و بعدين تدخل و تقفل الباب بالراحه و هى عينها لسه على السلم
............................
فى شارع عويس
عويس يصحى على صوت دربكه فى الشارع يقوم يحط العبايه على ضهره و يطلع البلكونه يلاقيهم بيعلقوا كهارب
عويس / جرا ايه يا جدع انت مش واخد بالك الساعه كام و لا ايه الناس عاوزه تنام
الراجل / ما تاخذناش يا حج عويس بس اتصلوا بينا و بلغونا نبرد البلد بالنور عشان بكره الصبح و يا دوب نلحق
عويس / تلحقوا ايه يا منيل انت هو المحافظ جاى البلد بكره ... و الله لو المحافظ ما بيتعمل له العيد دا كله دا العيد بجلاله قدره ما بتتعلقلوش الكهارب دى كلها
الراجل / جرا ايه يا حج عويس محافظ مين و عيد مين انت مش عارف و لا ايه مش سي صابر القط راجع البلد بكره بالسلامه
عويس / و انت بقي بروح امك بتعلق الكهارب دى على بيتى بمناسبه رجوع سي زفت ... مين اللى بعتك يا ابن الكلب انت رد قول ... و ربنا لانزلك ان شالله اتحبس فيك العمر كله
الراجل / يا حج انت فهمت ايه بص على الشارع البلد كلها مبدوره اقسم بالله و بعدين لو مش عاوزنا نعلق على بيتك ما نعلقش بس ما تضايقش روحك
عويس / و لا على بيتي و لا فى الحته كلها و لو فضلتوا هنا دقيقه واحده هطلب ليكوا المركز يلمكوا يا شويه غجر
عويس يفتح باب الشقه و ياخد النبوت و ينزل يكسر فى الكهارب و الناس تتلم عليه و الخناقه تكبر
..........................
فى اوضه جابر
جابر يفتح عينه يبص على الموبايل يتفزع لما يشوف الساعه يبص على جوزيف نايم و يبص على كيس الادويه مش موجود يلف بعينه يدور عليه يشوف شال نجاه مرمي على الارض يقوم يمسكه و يبص على جوزيف تانى و يحاول يهدى و يروح يدور على كيس غامق يحط فيه الشال و يطلع يضرب الجرس نجاه تفتح
نجاه / صباح الخير جيت فى وقتك حماتك
جابر / لقيت ده عندى فى الاوضه اعتقد انه بتاعك
جابر يديها الكيس تبص فيه
نجاه/ ما كانش جايلى نوم و عماله افرك و خفت مهره تصحى قولت اطلع السطح شويه ما رضيوش و نزلونى لقيته قاعد على السلم تحت خفت حد من الحريم او البنات يشوفوه يتحرجوا اديته الشال و نزل و انا رجعت هنا ما عرفتش انام برده فقولت اما اقوم اعملى قرقوشتين نفطر بيهم
جابر / انتى شايفه كلامك ده مقنع
.......................
أنت تقرأ
الكبيره ٢ بقلم / لولو_محمد
Hài hướcالحرب لسه مستمره و الحقيقه مسيرها فى يوم تظهر النور و كل واحد لازم يختار طريقه
