(((((( الكبيره ٢))))))
#لولو_محمد
الحلقه ٩٨
احلام تاخد مازن و هدومه و تدخل جوه قاسم يرجع المضيفه
قاسم / هى مين دى ؟
سلطان / حد ما يعرفش الست احلام الزيني
قاسم / اخت جابر
سلطان / اخر العنقود سكر معقود دى ست مفيش منها اتنين حنيه ايه و طيبه ايه و كرم ايه صحيح و هى يعني هتجيبه من بره طب دا الحجه
قاسم / حيلك يا عم قاسم دا انا بنام على روحى ... الصباح رباح
سلطان / لا مؤاخذه
قاسم / بالله عليك لو الواد مازن غفلها و نزل يجرى
سلطان / يغفل مين بس دى الست احلام
قاسم / ابوس ايدك يا عم سلطان تركز بس انا كدا كدا هسيب الباب مفتوح
سلطان / اطمن .. اطمن و حط فى بطنك بطيخه صيفي انا قاعد لك على الباب
قاسم / تشكر
قاسم يدخل يعدل المرتبه على السرير و يرمى نفسه و ينام
.....................
فى المطبخ
مازن قاعد على الرخامه و احلام بتقلى بيض
احلام / بس كدا غلط و مش هقولك بقي تعيي و الكلام الفاضي ده بس انت مش صغير و جسمك ده ما ينفعش ينكشف على كل من هب و دب عيب و حرام
مازن / ما انا لسه صغير
احلام/ مين اللى قال كدا بقي راجل و سيد الرجاله كلهم
مازن / انا راجل !!
احلام / امال ... انت زيني يا مازن و الاسم ده ما يشيلوش الا الرجاله
مازن / طب مش انتى زيني برده
احلام / يا لئيم
مازن يضحك احلام تطفى على البيض و تعمل ساندوتشات
احلام / تمام ... عاوز تاكل ايه جنب البيض يا سيد الرجاله انت
مازن / بسبوسه مدوره
احلام/ ايه البسبوسه المدوره دى ... صينيه يعني
مازن / لا اللى بناكلها فى رمضان
احلام / سمبوسه !!
مازن / المدوره بقي
احلام/ مفيش سمبوسه مدوره
مازن/ بتبقي فيها مكسرات
احلام / قطايف
مازن / المدوره
احلام تضحك
احلام / دا انت داخل على طمع بقي
مازن / اصل انا بحبها بس ما حدش بيرضي يعملها لى الا فى رمضان
احلام / ليه يعني دى سهله خالص طب ايه رايك بقي انك لو خلصت الطبق ده كله هعملك القطايف
مازن / المدوره !!
احلام / بالمكسرات
مازن/ دا انا هنسفه نسف
احلام تضحك و تفتح فى التقفيل و تطلع المكونات و مازن ماسك الطبق و بياكل
………………………..
فى شقه جوزيف
الباب يخبط يروح يفتح يلاقي مختار
جوزيف / اديني فرصه توحشنى ... تعال ادخل
مختار/ خير كنت فين
جوزيف / بجيب شويه مستلزمات كدا ... اه صحيح ليك عندى حاجه حلوه ... عشان تعرف بس انك فى بآلى على طول
جوزيف يفتح صندوق جواه جزمه زى بتاعته يديها لمختار
جوزيف / مقاسك معموله مخصوص عشان خاطر عيون احلى ميخا
مختار/ ياض بطل سئاله انا قد ابوك
جوزيف / ايه يا عم الجو ده تمام اتفضل يا عمو
مختار / دى فيها الإدراج اياها
جوزيف / اخت بتاعتى تمام بس انت رجلك اكبر من رجلى نمره
مختار / شكرا ... تمنها كام
جوزيف/ ايه السؤال ده مش المفروض تسأل جبتها منين و مين اللى جابهالك
مختار/ هو فى غيرها ؟!
جوزيف/ حبيبي اللماح
مختار/ هزرنا كتير نتكلم جد بقي انا منعتهم يهاجموا البيت و قولت نتكلم الاول
جوزيف / كانوا هجموا ما فيش فى البيت غير السكان و بعدين انا ما طولتش اساسا جبت الحاجه و رجعت
مختار / انت نزلت النفق اللى قولت لنا ما ننزلوش
جوزيف/ ما نزلتش انا دخلت لقيت الشنطه متعلقه على سلم النفق انا ما نزلتش تحت و بعدين حتى لو نزلت انا اللى مصممه و هنزل و هطلع مش هيحصل لى حاجه
مختار / يبقي هتنزل معانا
جوزيف / مش هاذيها
مختار / و لا انا
جوزيف / بس هم لا
مختار/ ناصر ذات نفسه بعد كل اللى عملته فيه ما قدرش ياذيها
جوزيف / مش هيعجبك رايي فى الموضوع ده
مختار/ احب اسمعه
جوزيف / ناصر مش تمام... انت فاكر انها اختارت ناصر ليه من الاول حته العيله دى قدرت تشوف نقط ضعف ابنك من اول نظره
مختار / كان صغير و غلط بس دلوقت كبر
جوزيف / تمام
جوزيف يروح يقعد
مختار / ناصر حبها بجد و لولا القرف بتاعكوا كان زمانها ما تفرقش عن رحمه بنتى حاجه بس هى اللى اختارت
جوزيف / ما اختارتش حاجه انا اللى خطفتها من قدام بيت ناصر
مختار يسكت
جوزيف / اه و الله خطفتها و قتلت ابن سحر
مختار / ليه كدا
جوزيف / كان القرار المناسب وقتها ... اقولك الأسوء من كدا ... امايا اتولدت فى المعسكر خدوها هى و امها و طول ما امها بتنفذ الأوامر امايا فى حضنها لحد ما جه امر قتلى ما نفذتش اتقتلت و امايا اتاخدت و بقت لعبه لحد ما وقعت فى ايد واحد من تجار الدين عمل فيها البدع و كرهها فى الدقون و الجلاليب و اى حد بيقول قال الله و قال الرسول و ساعتها كنت انا كبرت و قدرت انقذها بس ما كبرتش اوى انى احميها كان عندها نزيف شديد و مفيش إمكانيات خدوا قرار شيل الرحم و ما قدرتش اعمل ليها حاجه و كملت فى مهماتى فنزلوها تكمل شغل ... عرضت انى احولها لسلاح و علمتها كل اللى اعرفه و من ضمن الحاجات اللى اعرفها انها لازم تستحمل اسوء انواع التعذيب و ما تقرش بحرف
مختار / انت اللى عذبتها ؟
جوزيف يهز راسه لا
جوزيف / بس وقفت اتفرج لانى لوحدى ضعيف و مش قادر احميها … و بعدين بعتونى مهمه و باعوني ففشلت فحرمونى منها و فضلت فى لفه طويله جدا بعمل كل حاجه عشان ترجع لى لحد ما اتجمعنا فى مهمه نجاه هى اتبعتت على البلد و انا شغال فى القاهره لحد ما كان لازم تموت شخصيه اميره اتجمعنا انا و هى تانى ... و اهى قدامك اهى تقدر تلفف البلد كلها على رجل ... و من غيرى
مختار / تقدر تصلح كل ده
جوزيف / مش لما اضمن نتيجه اختيارى الاول ابقي انصحها تقلدني
مختار يقعد جنب جوزيف
مختار / انتى مش مقتنع بتوبتك
جوزيف / انا قولت نتيجه اختياري
مختار/ و دى هتقتنع بيها ازى و هى فى الاخره مش هنا
جوزيف / مش مقتنع انكوا تستاهلوا مساعدتى ... لولا نجاه ما كنتش فضلت هنا ثانيه
مختار / اتكلمنا فى الموضوع ده و قفلناه بتفتحه تانى ليه
جوزيف / هى مش دى الحقيقه و بعدين الحقيقه دى انا قايلها للكل
مختار / مفيش فايده يعني ... ما علينا خلينا فى موضوعنا ... خدها و اهرب
جوزيف عنيه توسع
جوزيف / نجاه!! هترضي تيجي و لا قصدك اخطفها ؟!
مختار / يا ابن ال ... لا حول و لا قوه الا بالله .. يا حبيب قلبي امايا ... اتغيروا لنفسكوا حتى لو مش هتساعدونا
جوزيف / هنموت
مختار / ما كلنا هنموت ... بس فى معادنا ما حدش يقدر يقتلك يوم قبل معادك
جوزيف / بس انت برده سقطت جزء ان نجاه بالنسبالى زى امايا بالظبط يعني ياخدهم الاتنين
مختار / اعقل يا يونس و ما تختبرش صبرى
جوزيف / انا بتكلم بالعقل و الله انت اللى ليه مش قادر تستوعب … نجاه فى خطر
مختار / تمام يبقي عقل امايا و خليها معاك هنا
جوزيف / ما اضمنكوش
مختار / كنا اذيناك يعني
جوزيف / بينج بونج ساعه اطلع بره ما اشوفش وشك تانى و ساعات اهلا اهلا اهلا اهلا باعز الحبايب
مختار يضحك
جوزيف / شغل مناخولينا
مختار / اسم الله على العقل اللى بيشر منك
جوزيف / هو انا لو كنت عاقل كنت هبقي وسطيكوا ... بقولك ايه
مختار / بقولك ايه انت ... اللى انت عملته النهرده فتح العيون على الإنفاق من جديد و كدا كدا انا مش هقدر امنعهم ينزلوا اكتر من كدا انت نزلت و طلعت و كمان شايل و محمل
جوزيف / تمام سيبهم ... اقولك ... خدوا نجاه معاكوا
مختار / ما تهزرش
جوزيف / هى مش هتاذيها
مختار / و لا هتاذيك انزل معانا
جوزيف / ماشي بس استنوا اما اخف خالص انا مش هقدر انزل بالوضع ده ... حتى لو مش هتقتلنى دا مش معناه انى هطلع سليم
مختار / تقصد ايه
جوزيف / هتفهم لما ننزل
مختار / طب ما تقولى ايه اللى تحت
جوزيف / انا هقدر ابطل الفخاخ اللى انا عاملها بس انت ما تعرفهاش قدى ... دا غير الفريق اللى معاها شويه حريم انما ايه ... على جهنم حدف ... و ما تسألنيش ازاى قادره تتحكم فيهم ... عملتها ازاى ما اعرفش ... بس قدرت
مختار / كانت ظهرت عند عمران فى الجامعه فى كذا مكان و بنفس اللبس و الهيئه و فى نفس الوقت و دياب اكد لى ان الفيديو كان حقيقي مش ملعوب فيه
جوزيف / مش بقولك قادره
مختار / انا ما بهزرش
جوزيف / ما انت بتسأل اسأله مش منطقيه بصراحه... ايه ما سمعتش عن المكياج و لا عمليات التجميل
مختار / مش للدرجادى
جوزيف / هتفضل طيب لحد امتى
مختار / ما علينا و اخرتها
جوزيف / عاوزنى انزل معاكوا اصبروا اما اتحسن شويه عاوزين تنتحروا توكلوا على الله انا ما عليا الا البلاغ
مختار يهز راسه و يقوم
جوزيف / على فين
مختار / هروح انام ... و شكرا على الهديه
جوزيف / انت تؤمر بس
مختار يبتسم و يمشي
.........................
فى المضيفه
جابر يدخل يلاقي الباب مفتوح يدخل
جابر / قاسم قاسم
جابر يدخل يلاقي قاسم بيفوق
قاسم / ايه الواد مازن عمل حاجه
جابر / هيعمل ايه يعني ... انت نسيت الباب مفتوح و لا ايه
قاسم / لا سبته يمكن مازن يحب يرجع ينام جنبى تانى
جابر / ليه هو فين اصلا
قاسم / اخر حاجه اعرفها كان مع اختك ... احلام باين
جابر يستغرب
قاسم / كتر خيرها لحقته امبارح انا الواد ده مطلع عيني اقسم بالله ما قادر عليه ... قد الكف بس جبار
جابر يضحك
جابر/ يا عم اللهم بارك و احنا ما كناش عيال و لا ايه
قاسم / كنا بس الحريم عندهم صبر مش عندنا انما الواحد عقله مش فيه و الواد اللهم بارك طاقه ... ما اتعبكش تروح تشوفهولى زمانه طلع عينها و اتحرجت تيجي ترميه فى وشي
جابر/ لا ما تقلقش و حط فى بطنك بطيخه صيفي و كدا كدا هطلع اطمن لك عليه برده
قاسم / لا هاته هصلى الفجر و اتوكل على الله
جابر/ ايه يا عم للدرجادى مش قادر تستحملنا
قاسم / ليه بس طب و الله قاعدتكوا ما يتشبع منها بس انت عارف المشاغل
جابر / الله يعينك و كل حاجه بس مش كدا يعني ايه هتضرب المشوار ده كله على الفاضي كدا ... بقولك ايه انا ما يعجبنيش الكلام ده
قاسم / و انت يا خويا اللى قطعت سرايرنا بيات يا عم ربنا يعين كل واحد على حاله دا انا ورايا هم ما يتلم اللى كنت بعمله فى يوم بعمله فى يومين بسبب مازن
جابر / ربنا يبارك لك فيه بس انا برده مش فاهم ... الواد مش شقي اوى كدا ان ما حدش يقدر عليه من الحريم عندكم اللهم بارك يعني كان نسمه
قاسم / تلاقيه عشان مش واخد عليكوا انما عندنا فى السرايا اجارك الله لو سبته مع مين ما كان ما بيفصلش صريخ و تكسير لحد ما ارجع له
جابر / ما يمكن بيدلع عليك
قاسم/ جربت كل حاجه حتى جيت فى مره و نسيت نفسي و ضربته ما بيهداش و لا يسكت الا فى حضنى و مش قادر عليه
عباده يدخل
عباده / صباح الخير يا رجاله ايه عاوزين نلحق الفجر صف اول
جابر / هطلع اشوف لك مازن... صباح الخير يا كبير
عباده/ كنت عاوزك فى حوار
جابر / نازل حالا
عباده يهز راسه
عباده/ منور يا قاسم يا ابنى على فكره الفطار جاهز لو تحب اجيب لك قبل الصلاه
قاسم / تعيش يا كبير لما نرجع من الصلاه ناكل باذن الله عن اذنك اتشطف و اتوضي
عباده / خد راحتك
............................
على سلم السرايا
نجاه نازله تقابل جابر طالع يبتسم تعديه و ما تهتمش يضحك و يطلع يروح يخبط على باب اوضه احلام ما تردش يفتح الباب بالراحه و يدخل يلاقي احلام نايمه و واخده مازن فى حضنها و فى طبق قطايف على الكومودينو يمد ايده و ياخد واحده ياكلها و يقعد يحرك شعر مازن احلام تفوق
احلام / جابر !! فى حاجه و لا ايه ؟!
جابر/ صلاه الفجر هو ما حدش صحاكى و لا ايه
احلام / لسه رايحين فى النوم اصلا من شويه
جابر / تعبك ؟
احلام / لا و الله عسول اللهم بارك بس شقي و لمض حبتين ... عاوز اهتمام
جابر / و مين يفهم فى العيال قدك
احلام تبص له
جابر / تسلم ايدك ... جامده
احلام / الف هنا فى تحت كتير
نجاه تدخل و فى ايدها علبه مليانه بتاكل منها
نجاه / انتى اللى عملتى الجمدان ده ؟! طب ما غسلتيش المواعين ليه يا حيوانه دا انا هنفخك
احلام / مواعين ايه يا بروطه دى حياله طاسه و حله و خلاط و شويه فكه يلا بره انتوا الاتنين هتصحوا الواد
نجاه / اللى جاب لك يخلى لك يا اختى
نجاه تاخد العلبه و تمشي
جابر / هاخد الواد ابوه عاوزه
احلام / سيبه لما ترجعوا من الصلاه خدوه و الله لسه نايم من شويه هيقريف لو صحيته
جابر / تمام ... ما تخليش الصلاه تروح عليكي
احلام / لا هقوم اهو خلاص هقوم
جابر يبتسم و يمشي يلاقي نجاه بتتلكع على السلم و بتقلب فى علبه القطايف
جابر / اللى ياكل لوحده
نجاه / فكك منى يا جابر مش فيقالك
جابر يمد ايده ياخد واحده و يأكلها
نجاه / خدها كلها يا خويا ما تحرمش نفسك
نجاه تديله العلبه و تيجي تمشي
جابر / ما يهونش عليا خديها
نجاه تحط ايدها فى وسطها
نجاه / يا سلام و انا المفروض عادى يعني
جابر / هو انا عملت حاجه ضايقتك
نجاه / هو انت بتعمل حاجه اصلا
فارس ينزل من فوق
فارس / الله قطايف ... دى احلام دى صح
فارس ياخد العلبه و ينزل
جابر / العلبه يلا ... ولا ... عاجبك كدا
نجاه / و انا مالى ... وسع
نجاه تنزل جابر يجرى وراها
جابر / و اخرتها يعني
نجاه / انت عاوز ايه يا جابر على الصبح ما تروح يا حبيبى تشوف اللى وراك
جابر / طالعه من بقك عسل
نجاه / هى ايه دى
جابر / حبيبي
نجاه / الصبر من عندك يا رب ... هتنقطنى
نجاه تدخل المطبخ تقف مع الحريم
خديجه / صباح الخير يا جابر عاوز حاجه يا حبيبي
جابر / ما اتحرمش ... سلام
جابر يمشي نجاه تبرطم
نجاه / ما قالت حبيبي اهو ما عملتش حوار يعني
هند / بتقولى حاجه يا نوجه
خديجه / سيبك انتى فين يا بت علبه القطايف
نجاه / ابنك سرقها و جرى و ادى دقنى لو طولنا منها حاجه
فاتن ص / احسن عشان تبقي تاخديها و تجرى
هند / على فكره انا خليتهم يسيبولك المواعين مفيش هروب منها يا قلب عمتك فبراحتك بقي كومى كومى
نجاه / لا و على ايه اغسل
نجاه تروح تقف على الحوض تغسل
..........
فى جنينه الزنايته بعد الصلاه
مختار / و فيها ايه لما نصبر
عباده / يا سيدي احنا مش بلد ديمقراطي ... نشوف الناس رايها ايه
مختار / ما تعندش يا عباده
عباده / بس حلوه الجزمه يا مختار لا و مقاسها ايه ... مظبوط
مختار / هى بقت كدا
عباده / الإنفاق دى اخرها الليله يا نجيب اخرها يا تجيب أخرنا
مختار / طب ما هو قالك سدها عربيتين خرسانه و تردم ابوها
عباده يبتسم باستهزاء جابر يدخل
جابر / الرجاله جاهزين
مختار / دلوقت !!
عباده/ لا طبعا ... بالليل بس مش بنتمم على الرجاله و كل واحد يجهز حاجته عشان ما يبقاش ناقصنا حاجه و لا الدنيا بتمشي عندك بالحب و لا ايه
مختار / ما تهدى كدا يا عباده و تقول هديت
عباده / ربنا يهدينا جميعا ... ما تخليش الجماعه يحسوا بحاجه
جابر / هياخدوا مازن و يمشوا على طول
عباده يهز راسه
مختار / تمام ... ننزل بس بشرط
عباده / اؤمر
مختار/ جابر مش هينزل معانا
جابر / انت بتقول ايه يا خالى
مختار / بقول ان لازم ائمن البلد من كل ناحيه و اهمها ان يبقي لها كبير
جابر يرتبك و مختار يبص لعباده
مختار / انا هنزل مكانه و هو هيفضل هنا يحرس الحريم
جابر / هى دى اخرتى
مختار / لو عندك حاجه اهم من اللى جوه دول احرسها يا جابر ... ما فيهاش هزار
عباده / مختار معاه حق
جابر / بس
عباده / ما بسش خليك مع الجماعه لحد ما يمشوا و بعدين حصلنا على عمك مغاورى نكمل باقي الترتيبات ... مش معنى انك مش نازل انك هتريح انت هتشرف على كل الرجاله و تأكد على كل حاجه قبل ما ننزل
جابر / ما تقلقش يا كبير ... عن اذنكوا
جابر يمشي و مختار و عباده يبصوا لبعض
مختار/ ما تنزلش يا عباده انت كمان
عباده / مش انا اللى صممت على النزول يبقي الأولى انا اللى انزل و انت تقعد
مختار/ يبقي مع بعض
عباده / زى ما كنا طول عمرنا
مختار / و مفيش حاجه اتغيرت على فكره
عباده / لا فى ... المرادى انت مختار الناحيه الغلط تقف فى صفها
مختار / مش يمكن انت اللى متحامل عليه بزياده
عباده / طب و العرسه الصغيره
مختار / يا عباده
عباده / انت اخترت و دا حقك و ربنا يقدم اللى فيه الخير لينا و للبلد اى كان مين فينا الصح مش مهم ... المهم الناس اللى فى رقبينا مش هقدر اقف قدام ربنا و اقول كنت شاكك و قصرت مش هقدر
مختار / تمام
عباده / لو جرالى حاجه ... نجاه ما تكونش ليونس
مختار / ابو نكدك على ابو هبلك يا عباده انا رايح افطر
مختار يروح السرايا و عباده واقف يضحك
............................
فى مطبخ الزنايته
مازن / بس انا مش عاوز امشي
احلام/ ما انت هتيجي تانى
مازن / بتكدبى عليا
احلام / لا باذن الله نتفق مع بابا تيجي تزورنا تانى قريب
مازن / طب و انتى ما ينفعش تيجي معانا
احلام/ فى حد بيسيب بيته برضه ؟! و بعدين يا سيدي ليك عليا اى حد رايح اسكندريه هبعت لك معاه قطايف
مازن / بس انا مش عاوز قطايف عاوزك انتى
احلام تبتسم و تحضنه
احلام / افتكر بقي الكلام الحلو ده لما القطايف تخلص
مازن يحضن احلام
مازن / انا مش عاوز امشي
امين يدخل
امين / يلا يا احلام الناس واقفه من بدرى
احلام/ ما تزعلش بابا منك يا مازن يا حبيبي و اكيد هنتقابل تانى
مازن / قوليله نستني شويه
امين / ما ينفعش يا عم مازن ابوك وراه مصالح ليك عليا يا سيدي اخليه يجيبك تانى و بعدين بلدنا ادمان اللى يعتبها مره ما يقدرش يبعد عنها تانى
مازن / طب خليه يوعدنى انه هيجيبني تانى
امين / اتفقنا
مازن / كلام رجاله
امين / كلام رجاله
مازن ياخد شنطه فيها علبه فى ايده و يروح يمسك فى ايد امين و يروح بره
قاسم / ايه يا عم الدلع ده كدا تتعب الناس
امين / و لا تعب و لا حاجه ... بقولك ايه يا عم قاسم اوعدنا انك هتجيبه تانى
قاسم / ان شاء الله
مازن / لا اوعدني وعد رجاله دلوقت انك هتجيبنى هنا تانى قريب
قاسم / ما قولت ان شاء الله يا مازن فى ايه
مازن / اوعدني ... الزيني عمره ما بيخلف وعده
قاسم يبتسم و يشيل مازن
قاسم/ ماشي يا زيني صغير اوعدك هجيبك هنا تانى
مازن / قريب
قاسم / دى بقى لازم نقول فيها ان شاء الله
امين / خلاص بقي يا عم مازن ما تتعبش ابوك قولتلك البلد دى إدمان هيجي غصب عنه و قريب جدا كمان و افتكر ان عم امين قال
مازن يهز راسه قاسم يركبه العربيه
قاسم/ تعبتكوا معايا حقكوا عليا و اعتذر لى للانسه احلام ان كان تعبها و لا ضايقها و اشكرها جامد
امين / دا أقل واجب ما تلبسناش العيبه بقي
قاسم / عشت مع السلامه
امين / ربنا معاكوا توصلوا بالف سلامه ... فى حفظ الله
قاسم يركب و العربيه تتحرك
امين / دا احنا ما كناش عيال اقسم بالله الواد عليه شويه مردات انما ايه
راجل / تربيه ايجابيه
امين / انت هتقولى
....................
فى شارع جانبى فى البلد
يحيي ماشي ورا لوكايشن يشوف البنت واقفه على باب بيت يبص يمين و شمال و يروح لها
البنت / اقفل موبايلك و تعال ورايا
يحيي/ اقفله ليه
البنت / يا عم اسمع الكلام و لا انت عاوز الكبير يقفشك انت مش عارف شركه الجواسيس و النوضرجيه بتوعه بيعملوا ايه طول الوقت
يحيي / عارف يا اختى عارف
يحيي بيقفل الموبايل البنت تمشي يمشي وراها
يحيي / الله على فين
البنت / ما تقلقش دا خطوتين من هنا
يحيي / بس انتى غريبه اوى
البنت / ما غريب الا الشيطان
يحيي / لا بجد اكلمك امبارح تقوليلى خليك بالنهار احسن ... احسن من انهى اتجاه مش فاهم يعني
البنت / فى النهار الناس كلها فى الشوارع و ما حدش بيركز مين راح فين و لا بيعمل ايه انما بالليل العدد قليل و العنين واسعه
يحيي / انتى ادرى بقي
البنت تدخل بيت يحيي يدخل وراها البنت تروح عند حيطه العدادات و تقفل محبس عداد باب سرى يتفتح يحيي يبص لها
البنت / جاهز لدنيا تانيه لا شوفت زيها و لا هتشوف بعدها
يحيي يبتسم البنت تدخل يحيي يدخل وراها الباب يتقفل
.........................
فى سرايا الزنايته بالليل
عباده يدخل المضيفه يلاقي راجل و ست بتعيط قاعدين اول ما يشوفوه يتنفضوا عليه
عباده/ خير يا ابو صالح في ايه ... مالك يا ام صالح قلقتونى خير
ام صالح / انجدنى يا كبير ابوس رجلك الواد هيضيع منى
عباده / خير فى ايه انهى واد فيهم اقعدوا
ابو صالح/ صالح يا كبير الكبير العاقل ... انا مش عارف اقول ايه بس
عباده / قول كل حاجه ماله صالح
ام صالح/ راح المدرسه الصبح ما رجعش من ساعتها قولت يمكن بيلعب مع صحابه و لا وقفوا فى اى حته ارنله مقفول ارن له مقفول
ابو صالح / فت على صحابه واحد واحد كلمت المدرسين كلمت طوب الارض طول النهار مكالمات و لف مفيش خبر فين بعد ما صعبنا عليهم واحد من صحابه قال انه كان مصاحب بت من البلد من على النت و راح يقابلها بعد المدرسه
عباده / بت مين دى
ابو صالح / ما حدش يعرف بس يعني استغفر الله العظيم كانوا بيقولوا فى بينهم صور و فيديوهات كدا ... مش عارف اقول لك ايه و لا اقول ازاى اساسا ... دا ما كانلوش فى الحاجات دى خالص
عباده / على يدى ... من امتى الكلام ده ... و مين من صحابه اللى قالك على الموضوع ده يمكن يقول معلومات اكتر
ابو صالح / أمجد ابو العزايم أبن الاستاذ شريف ابو العزايم مدرس الجغرافيا فى مدرسه ام المؤمنين الاعداديه بنات اهو ده ضله ما بيفارقوش بعض ثانيه
ام صالح/ سره كله معاه فى الاول كان بيقول ما اعرفش حاجه بس لما الوقت اتأخر و الواد ما رجعش و عيطت لأمه فى التليفون قال حوار البت بتاعه النت ده بس قال ما يعرفش تفاصيل
عباده / تمام
عباده يطلع التليفون
عباده/ ايوه يا دياب ازيك ... انت عرفت ... تمام اتصرف و مستنى منك رد
عباده يقفل و هو بيتصل بحد تانى
عباده / بشمهندس دياب خد خبر و بيراجع خط سير صالح من موبايله و بيفرغ كاميرات المراقبه و باذن الله يبات فى بيته الليله ... ايوه يا فتحى عدى على بيت الاستاذ شريف ابو العزايم خليه يعدى عليا دلوقت ضرورى هو و ابنه أمجد... حالا يا فتحى ... تمام فى حفظ الله ... باذن الله خير ما تقلقوش
ام صالح/ جيب العواقب سليمه يا رب
مختار يدخل
مختار/ خير فى ايه ازيك يا ابو صالح ايه اللى حصل
............................
أنت تقرأ
الكبيره ٢ بقلم / لولو_محمد
Humorالحرب لسه مستمره و الحقيقه مسيرها فى يوم تظهر النور و كل واحد لازم يختار طريقه
