الكبيره ٢ بقلم / لولو_محمد

الحلقه ٧٥

(((((( الكبيره ٢ )))))))
#لولو_محمد
الحلقه ٧٥
مختار / يا وليه انا سايب البلد باللى فيها و جاى جنبك خلى عندك دم
هند / ما انا مرزوعه جنبك بقالى ساعه و اكتر و انت مبحلق فى السقف كنت كلمتك
مختار/ انا قايم
مختار يقوم ياخد غيار
هند / و ربنا ان ما رجعت جنى ما انا قعدالك فيها
مختار يبص لها قامت وقفت و حطت ايدها فى وسطها
هند / هو فى ايه مالك
مختار / مش عارف انام و لا عارف ابطل تفكير و لا عارف ارتاح و لا عارف اهدى و الدنيا كلها فوق دماغى و عباده اتعصب بدون سبب و ضيع الورقه الوحيده اللى كانت فى ايدينا
هند/ يونس برده !!!
مختار / سيبك من اننا محتاجينه هو محتاج لينا هو محتاج لى
هند تضحك باستهزاء و تضرب كف على كف
مختار / انا حاسس بيه
هند/ انت حاسس بالدنيا كلها الا انا يا مختار
مختار/ دا انا ؟!! ليه قصرت معاكى فى ايه ؟!!
هند / و لا حاجه روح له
....................
هند تنام و تدى لمختار ضهرها يتنهد و يحط الغيار على الكرسي و يقفل الدولاب و يروح يحضنها
هند / امشي يا مختار امشي و اتأخر و بات بره و سبنى هموت من القلق عليك و على عيالى فى الوقت اللى لازم ابان فيه قدام الكل انى هاديه و قويه و ما فيش حاجه و كل حاجه طبيعي مع انى عارفه ان ما فيش اى حاجه طبيعي
مختار يبوسها من رقبتها هند تغير
هند/ بطل مش هتضحك عليا زى كل مره
مختار/ و انا كل مره بضحك عليكي ؟!
هند / ايوه
مختار / بضحك عليكي ازاى احكيلى و اهتمى بالتفاصيل
هند تبصله يغمزها تتنهد
هند/ شوفت شوفت طريقتك اهو شوفت
مختار / و الله ما شايف غيرك انتى
هند / انا كبرت
مختار / فشر دا انتى أصغر من مراتات عيالك
هند / مراتات !!
مختار / باعتبار ما سيكون يعني ... اسكتى مش بنت الكلب استقصدت الاستاذ عبد العزيز و كانت هتموته النهرده و ابنك الفالح
هند / ايوه ايوه الفالح يبقي ابنى ما دام فالح يبقي ابنى انما انت
مختار / ابنى ابنى انا الفالح ابنى النيله ما كانش مفهمهم الحقيقه كامله كان قايل للبت بس و وقفت قدام الراجل زى الكتكوت المبلول بس ما دام ما مشيوش لدلوقت تبقي الحكايه لسه فيها كلام
هند / البت بتحبه
مختار / و دا اللى مخوفنى
هند / ليه بتقول كدا
مختار / عشان يا ترى هو بقي ..  بيحبها
هند تتنهد و تبص للسقف مختار يبص للسقف هو كمان و بعدين الاتنين يبصوا لبعض و ما يقدروش يمسكوا نفسهم فيضحكوا
مختار / قولت كدا و ربنا تعالى هنا يا شريكه الكفاح
مختار ياخد هند فى حضنه و يبوس راسها
.......................
فى مسجد المستشفي عند صابر
شاكر و جابر و اربعه رجاله كمان فاردين نفسهم فى الارض و شاكر قاعد بيقرأ قرآن و واخد فى حضنه فايز نايم و بدر قاعد جنبه
بدر / انا رايح الحمام
شاكر/ تعالوا هوديكوا ... جابر جابر هوديهم الحمام
جابر يقوم و الاربعه يطلعوا من المسجد يروحوا الحمام اللى جنبه يلاقوا محمود بيتوضى بدر يمسك ايد شاكر جامد شاكر يبص له
محمود / الله انتوا هنا يا حبايبي و انا قالب المستشفي كلها عليكوا
بدر / ابعد عنى
محمود يبص لجابر و شاكر
محمود/ هى لحقت تقلبكوا على اهلكوا
جابر / العيال ما بتكدبش يا محمود
محمود/ بس خيالهم وواسع و كمان سهل تأثر عليهم و بيرددوا اللى بيتقال له ... واد يا بدر انا مديت ايدي على امك انت شوفتنى بمد ايدى على امك
بدر / شوفت ستى و تيته سكينه و هم بيربطوها فى الاوضه و قالوا هتفضل من غير اكل و لا شرب
محمود / و انا كنت فين ... ما خدتكش و روحنا جبنا حلويات و اكل و علاج خطفتك ياض انت و لا اخوك يا اخى حسبي الله و نعم الوكيل فى الحريم و كيدهم هتستفيد ايه من كل ده اصلا يلا اللى عند ربنا ما بيروحش ... بكره لما ارض ابوك و جدك تضيع للغريب هتعرف الحقيقه اوعى انا رايح اصلى
محمود يسيبهم و يروح المسجد
شاكر / تعال ادخلك الحمام
بدر / انا مش صغير انا خمس سنين و اعرف اتشطف لوحدى و اشطف اخويا كمان
جابر يضحك
جابر / ماشي يا سيدي الحمام فاضي شوف هتعمل ايه و احنا هنا اهو
بدر ياخد فايز و يدخلوا الحمام
شاكر / مش بالعه الواد ده
جابر / منصور بيقول هيحطه على جهاز كشف الكدب ان كدبنا احنا و قال ظالمينه مش هيكدب المكنه
شاكر / هو انت تعرف صابر من زمان صح
جابر / دا على اساس انك تعرفه اول امبارح يعني
شاكر / لا اقصد ... نسمه
جابر/ ما لناش دعوه بالحكايه دى
شاكر / يعني فى حكايه فعلا
جابر / شاكر
شاكر / ما لو بيحبوا بعض
جابر / شاكر
شاكر/  ما رأيت للمتحابين مثل النكاح
جابر / صدق رسول الله صلى الله عليه و سلم
شاكر/ بس كدا ؟!
جابر يبص لشاكر
جابر / انا اقدر اعمل ايه انت مش شايف كل حاجه مكلكعه ازاى ..  يا اخى يقوم بالسلامه و بعدين نشوف
شاكر / هيقوم ... زى ما فاق لما حس بيها هيخف عشان ربنا يجمعه بيها
جابر / انت ما روحتش تبص عليه ولا مره ليه لدلوقت
شاكر / بانهى وش و انا اللى مرقده
شاكر يبص فى الارض
جابر/ انت انقذت حياته
جابر يروح يخبط على باب الحمام
جابر / ها يا رجاله ايه الاخبار
بدر / خلاص اهو ثوانى بعدل لفايز هدومه
جابر / راجل ياض و بتاخد بالك من اخوك راجل من ضهر راجل
بدر يفتح الباب و يروح يغسل ايده جابر يشيل فايز و يغسله ايده
.........................
فى اوضه عباده
الباب يخبط و عباده نايم خديجه تجرى تفتح تلاقى نجاه
خديجه / قلبي عاوزه حاجه
نجاه / هو ابويا صاحى
خديجه / نايم خير جعانه اجيب لك تاكلى
نجاه / تسلمى ارتاحى حضرتك جنبه انا بس كنت عاوزه اطمن عليه مش اكتر
خديجه تخرج و تقفل الباب وراها
خديجه / و انا مش عاوزه تطمني عليا
نجاه تحضن خديجه خديجه تتنهد
خديجه / ابوكى تعبان يا نجاه ... مرهق و الحمل تقيل جدا على كتافه
نجاه / عارفه
خديجه/ امال ليه مش بتريحيه يا بنتى مش دا ابوكى حبيبك
نجاه / هو كل حاجه غلطتى انا ياما انا ما عملتش حاجه انا مكان ما بيحطونى بتحط
خديجه/ و الخواجه
نجاه / ماله ما ابويا جه لحد باب اوضتى و قالى هيدربك و قولت له لا و قالى مرنى الحريم قولت حاضر و لسه بقول بسم الله لقيتهم جايبينه لحد عندى و جايب بدله و اللبسيها و ما فاتش ساعه زمن و الدنيا اتهددت من حواليا انا عملت ايه
خديجه / قولى حاضر
نجاه / حاضر
خديجه/ حضر لك الخير ... ابوكى بيقولى انه اكيد هيحاول يكلمك
نجاه/ يمين بالله ما حصل
خديجه/ ما هو مش اهبل عشان يكلمك على الموبايل و لا اى حاجه نقدر نوصله عن طريقها
نجاه / انا قاعده فى السرايا اهو لا روحت و لا جيت و هو مش غبى هو مش هيجي تانى الا اذا احنا اللى طلبنا منه يرجع زى ما عمل عمى مختار قبل كدا انا روحت طلبت منه يمشي و مشي مش ميت علينا يعني
الباب يتفتح و عباده يطلع الاتنين يتخضوا
خديجه / قلقناك و لا ايه
عباده / خير فى حاجه و لا ايه واقفين كدا ليه
نجاه / كنت جايه اطمن على حضرتك
عباده / انا تمام الحمد لله انتى عامله ايه ؟
نجاه / بخير طول ما حضرتك بخير
عباده يهز راسه و يمشي
خديجه/ على فين كدا
عباده / هشوف مغاورى
خديجه / نايم ... عباده... نا ... اكيد فى حاجه جديده حصلت
نجاه / هروح
خديجه/ نجاه ... لسه بنقول ايه
نجاه / هبقي جنبه بس يمكن يحتاجني
خديجه تبص الناحيه التانيه و ترجع تبص لها و تهز راسها
خديجه / ماشي ... تعالى معايا
خديجه تمسك ايد نجاه و يمشوا ورا عباده
.....................
فى مخزن كبير
دياب واقف وسط مهندسين واحد منهم يوصل واحد من السايبورج بكابل بجهاز دياب يدوس انتر تظهرله داتا على اللاب توب قدامه يبتسم تليفونه يرن
دياب / السلام عليكم
كارم / انت فين عاوز اتكلم معاك فى حاجه
دياب / خير اتكلم
كارم / فى التليفون؟!!
دياب / تمام انا فى المخزن الكبير تعال
كارم / مسافه السكه ..  سلام
دياب يقفل الموبايل
دياب / ها يا شباب طلعنا بحاجه و لا ايه ؟
مهندس ١ / لسه بس شغالين
دياب يتصل بوفاء
دياب / السلام عليكم ... اذيك انتى فين
وفاء / مروحه فى الطريق انت مش هتيجي ؟!
دياب / لسه ورايا شغل ... خليهم فى البيت يبعتوا اكل و ضيافه على المخزن الكبير
وفاء / حاضر هبلغهم ... كام فرد كدا
دياب يعد الرجاله
دياب / سته و ابعتى بزياده عشره كدا و لا حاجه
وفاء / عنيا حاضر ... عاوز حاجه معينه
دياب / السهل عليهم المهم مش عاوز اكل شارع ما حدش ضامن حاجه اليومين دول
وفاء / تقصد ايه !!!
دياب / ما اقصدش بس ... حسيت بكدا
وفاء / تمام عنيا حاضر
دياب / تسلم لى عنيكي
دياب يقفل
دياب / هفرد ضهرى هناك لو وصلتوا لحاجه او حد سأل علينا صحوني على طول
دياب يروح يفرد ضهره على صندوق خشب كبير و ينام
.........................
فى شقه عبد العزيز
عبد العزيز قاعد مراته تفتح باب الشقه و تدخل
ام نور / بقولك ايه تنجز و تاخد قرار اختك و العيال بيلبسوا فى الشقه اللى تحت و ما عرفتش اقول لهم ايه
عبد العزيز / و الله ما عارف
ام نور/ امال مين يعرف ما ياما نقول للناس و نلم حاجتنا و نمشي يا تكلم ناصر و تشوف هيعملوا ايه
عبد العزيز يبص الناحيه التانيه
ام نور/ انت قولت ان نسيبك تفكر و من ساعتها و انت يا نايم يا قاعد قدام التليفزيون امال مين هيقرر؟! انا ؟!!
نور تطلع من الاوضه
ام نور / بصي بقي انا بقول نفضها سيره من الجوازه دى و نرجع بيتنا و احنا لسه عايشين الحمد لله
نور / هو فى حاجه حصلت و لا ايه
ام نور / دى بتسأل!!
عبد العزيز / انتى بتحبى الواد ده يا نور
نور تهز راسها
عبد العزيز/ حتى بعد كل اللى حصل ؟!
نور / هو ما لوش ذنب و مش مقصر
جرس الباب يضرب عبد العزيز يشاور ليهم يدخلوا عبد العزيز يروح يفتح يلاقي ناصر
ناصر / السلام عليكم يا عمى ازى حضرتك دلوقت اهدى
عبد العزيز / اهدى ... تعال ادخل ... جيت فى وقتك
ناصر / انا و الله كنت عاوز اسيب حضرتك تفكر براحتك من غير ما اضغط عليك بس شاهين ابن عمى اللى حاجز لينا المركب اتصل و سالنى هنتحرك الساعه كام و انا ما قدرتش ارد عليه
عبد العزيز يتنهد و يروح يقعد على أقرب كرسي ناصر يروح يقعد جنبه
ناصر / اقسم لك بالله يا عمى انا عمرى ما هاذى نور و لا اعرضها للخطر ابدا دا انا افديها بعمرى كله لو حكمت و دا عهد منى قدام ربنا
ام نور تطلع من الاوضه
ناصر / ازيك يا امى عامله ايه ؟!!
....................
فى اوضه مختار 
مختار / اخبط راسى فى الحيط اياكش انساكوا كلكوا واخلص
هند / اهدى بس يا مختار ايه الكلام ده
مختار/ يعني فى وسط كل اللى احنا فيه نلبس و نروح نرقص عشان البيه التانى حاجز مركب ... بكام يعني المركب دى
هند / ما هو معذور برده الناس جايين من آخر الدنيا هتقول لهم ايه و ان حتى قدرت تقنع ابو نور و امها و اخواتها مش هتفتح على نفسك فاتوحه و تقعد تعيد و تزيد لباقي العيله و كل واحد بكلمه و راى و ابقي قابلني بقي
مختار/ يا هند عباده لسه طارد يونس و صابر مصاب و ابنك و جابر و منصور معاه هناك و احنا هنا من اولنا لاخرنا مرهقين و مش قادرين نقف على رجلينا و لا قادرين حتى ننام انتوا مستوعبين
هند / يعني نعمل ايه نلبس و لا نعمل ايه دلوقت
مختار / مش عارف ... اقسم بالله هتجنن
الباب يخبط
مختار / مين؟
عباده / انا
هند تدارى و مختار يطلعله و يقفل الباب وراه
عباده / هو ابنك بيتصرف من دماغه دلوقت
مختار / انا لا خلفت و لا اتولدت اساسا انسانى خالص دلوقت
عباده / هو ايه الهبل ده هو لعب عيال ما تديني كلام أفهمه و اتعامل على اساسه ... هنعمل ايه ؟
مختار / هنعتمد على تأمين شاهين ؟!
عباده / ما اعرفش مغاورى بيقول انه مرتب كل حاجه و ماكد عليها اكتر من مره
مختار / حد كلم همام ؟
عباده / الدنيا عنده هاديه مفيش حاجه
مختار / قولت له يبعت رجاله
عباده / قولتله و وصلوا فعلا المستشفي عند صابر و جابر وزعهم و سكنهم و كله تمام
مختار / و عويس عمل حاجه
عباده / اه راح المستشفي بس محمود لقطه من على الباب و ما دخلش للبت
مختار / برده محمود !! تمام نبقي نشوف حكايته لما نفوق له
عباده / تمام دلوقت هنعمل ايه برده
مختار / انت رايك ايه ؟
عباده / رايي ان المسأله تبقي على الضيق و من غير عيال
مختار / نجاه ؟
عباده / لا نجاه مش هتخرج من السرايا
مختار / نجاه لازم تبقي معاك و تحت عنيك نجاه هى الهدف لو مشينا كلنا و سبنا نجاه هنا مع الحريم و العيال و شويه الغفر يبقي الهجوم هيبقي هنا
عباده / و لو خدناها معانا بنفس المبدا الهجوم هيبقي على الجماعه اياهم اللى احنا بنحاول نلم الموضوع معاهم لحد ما يرجعوا بيتهم بالسلامه
مختار / و العمل برده ؟!
عباده / انا هاخد شويه رجاله و نسبق ناكد على تأمين شاهين و انت شوف مين جاى من عندك و روح هات الجماعه و حصلونا
مختار/ و نجاه برده
عباده يفكر
مختار / الاوضه اللى فى بيت جابر ؟!!
عباده / على جثتى مش هنعيده تانى يا مختار انساها الهبابه دى و ما تفكرنيش و تحرق دمى اكتر من كدا
مختار / ايوه يعني هنعمل ايه برده
عباده / هناخدها معانا ... خليها تحت عيني اضمن ... انا متاكد انه مستنى فرصه و هيروح لها برده ... مستفز ابن كلب
مختار / عباده ..  نعت الوالدين من الكبائر
عباده / استغفر الله العظيم استغفر الله العظيم ... هسبق انا و هستناكوا هناك
مختار يهز راسه و يدخل الاوضه
هند / خير فى ايه ؟!
مختار / اللبسي و كلمى رحمه و خديجه و نجاه يلبسوا و حصلونى على تحت.. ما تتأخريش
هند / و الباقيين
مختار / احنا مش رايحين فرح بجد و مش هناخد معانا لا حامل و لا عيل ما حدش عارف ايه اللى هيحصل هناك... البسوا لبس مريح و مستور احنا هنبقي فى البحر
هند / طب اهدى طيب
مختار/ نفسي و الله نفسي
مختار يمشي و يقفل الباب وراه
......................
فى شقه جوزيف
امايا قاعده بتبرد ضوافرها و جوزيف قاعد بيتابع على اللاب
جوزيف / انا مش فاهمك
امايا / ليه يا بيبي خير
جوزيف / انتى مش هتابعى حتى اللى هيحصل ؟!
امايا / تؤ ... انت هتبقي تديني الخلاصه ... هتحتاج الحمام ؟! هاخد شاور و هطول
جوزيف يضحك باستهزاء
امايا / صحيح ... لو بتدور على اللاعب التالت انصحك ترجع البدله و تخلى حد تانى غير نجاه يلبسها
جوزيف يبص لامايا تهز راسها و تروح الحمام و قبل ما تقفل الباب جوزيف يحط رجله
جوزيف / اشمعن غير نجاه
امايا/ تفتكر نجاه اصلا هتثق فيك تانى لما تعرف انك معايا دلوقت
جوزيف / هى عارفه انك اختى و غاليه عندى
امايا تحط ايدها على صدر جو
امايا / واثقه فيك يعني
جوزيف / مفيش بينا حاجه
امايا / اخص ... خبت و لا ايه
جوزيف/ ما حاولتش اصلا
امايا تضحك و تزقه و تقفل الباب جوزيف يهرش فى قفاه
جوزيف / ما عادتش سهله البت دى
............................
على النيل
العربيات واقفه و أهل نور بينزلوا منها و الرجاله بتساعدهم يركبوا مركب كبير كذا دور و توصل عربيه تنزل منها نجاه و مهره تبص تشوف عمران واقف بعيد مع رجاله تلف وشها و تنفخ
نجاه / فى حاجه و لا ايه
مهره / ما تاخديش فى بالك خلينا نعدى اليوم ده عشان اروح
نجاه / بتتكلمى جد و لا فى حاجه مضيقاكى
مهره / اعتقد اننا كنا متفقين على كدا من الاول
نجاه / تمام مش وقته تعالى
هند / نوجه تعالى
نجاه و مهره يروحوا ناحيه هند واقفه تتكلم مع ستات منهم نور و مامتها
هند / دول بقي بناتى اللى ما خلفتهمش مهوسين خيل باذن الله بكره نطلع كلنا نركب الخيل فى الاسطبل و ما تقلقيش هنقيلك فرسه هاديه
ام نور / لا تسلمى انا هتفرج و اشجع بس
نور / ناصر على طول بيتكلم عنك و مش هتصدقى متحمسه قد ايه انى اتعرف عليكي
نجاه / تسلمى
هند / ايه يا بنات هتفضلوا واقفين كدا ما تاخدوا العروسه و تركبوا
نجاه / تمام يا عمتى ... تعالى
مختار/ ايه يا جماعه مستنين عزومه و لا ايه
ام نور / مستنين باقي الناس بس
مختار يبتسم و يروح ناحيه عمران و يوشوشه عمران يهز راسه و يروح يركب المركب
مختار / ايه الاخبار يا رجاله حد ناقصه اى حاجه ؟
.......................
فى المركب
شاهين بيتمم على صناديق مغاورى يدخل على عكاز
مغاورى / ايه الدنيا بقالك ساعه بتدعبس فى الصناديق دى
شاهين / دى لايف جاكت يابا بتاكد ان كلها تمام و عددها كفايا لكل اللى على المركب و جهزت كمان ست مراكب صغيره عليها رجاله هتحاوطنا من كل ناحيه و كلهم شايلين سلاح ما تقلقش
مغاورى / بس نبهت عليهم يبان انه فرح
شاهين / ما تقلقش مزمار و طبله و رقص للصبح
مغاورى / عجبتنى الفكره
شاهين /  و مش بس كدا دا انا وزعت رجاله على طول الضفتين كمان يعني راجل ابن راجل هوب من المركب دى
مغاورى / هو تمام و كل حاجه بس جبت الرجاله دى كلها منين
شاهين / ما تقلقش يابا دول عمال الشونه و الفلاحين لبستهم غفر و مسكتهم سلاح و اديتهم يوميه عشر ايام و قولتلهم يعملوا منظر يعني مش اكتر ما تقلقش
مغاورى/ ايوه بس انت كدا بتعرض حياتهم للخطر لو جرا فى الأمور أمور
شاهين / يابا احنا صعايده يعني أقل واحد من دول بعشر رجاله فى عين العدو ما تقلقش انت بس انا مش جايب عيال صغيرين دول كلهم رجاله كبار و هنا بخاطرهم يعني مش غصب و كدا
مغاورى/ بس عشان القرش و الحوجه مره يا ابنى
شاهين / ما تقلقش يابا انا عارف انا بعمل ايه و متكلم معاهم و مفهمهم دورهم كويس و مراضيهم و مدلعهم اخر دلع ... دا غير انى بلغت مامور المركز و خليته ينبه على رجالته يفتحوا عنيهم على مداخل و مخارج البلد ما الحكومه ليها دور برده و لا هم بيجوا بلدنا ياخدوا تان
مغاورى يضحك
مغاورى / ما علينا هى الحاجات دى هتفضل فى الصناديق و لا هنوزعها على الناس و لا ناوى على ايه
شاهين / انت رايك ايه انا شايف انها تتلبس دلوقت من قبل ما نتحرك من مكانا
سماح تدخل
سماح / هو انت مش ناوى تريح رجلك اليتيمه اللى بقالك ساعه واقف عليها دى و تقعد شويه يا ابو شاهين
مغاورى / هقعد و ارتاح و استمتع ما شاء الله عليه شاهين مرتب ليله و لا الف ليله و ليله
شاهين / تلميذك يابا
مغاورى / وزع على الناس الحاجه من دلوقت عشان لو فيهم حاجه مش شغاله كويس نلحق نتصرف
شاهين / علم و ينفذ
سماح تسند مغاورى يقعد
سماح/ شوفت بقي ان ابنك مش فاشل و انه كل اللى محتاجه انك تثق فيه و تديله فرصه
مغاورى / ربنا يهديه
سماح/ امال يعني ولاد اختك مش باينين خالص
مغاورى / منصور مش فى البلد
سماح / و دياب ؟!
مغاورى/ و الله ما اعرف يا سماح دلوقت يبان اكيد فى ايده حاجه بيعملها يعني
سماح/ ازاى يعني يا كبير
مغاورى / كبير اه بس هو برده مش صغير عشان يديني خط سيره هو عارف الصح ايه و بيعمله و لو فى حاجه لازم اعرفها هيكلمنى يبلغنى
سماح / و لو فى حاجه مش عاوزك تعرفها ؟
مغاورى يبص لها و يبتسم و يبص على ابنه بيفرق مع الرجاله اللايف جاكت و يساعد الناس يلبسوه
مغاورى / فين اللايف جاكت بتاع امك يا شاهين
شاهين / حالا يابا هخلص الصفه دى و هجيب حالا ما تقلقش انا عامل حسابى بزياده
سماح / ربنا يبارك فيك و يطرح فيك البركه
..........................
فى المخزن
وفاء / طب احنا لا فى الشركه و لا روحنا معاهم و لا روحنا البيت انت فى ايه فى دماغك
دياب / البتاع ده هو الطريق الوحيد للى هجموا و هو طرف الخيط الوحيد اللى فاضل لينا نمشي وراه
وفاء / مفيش درونز خالص فى المخزن
دياب / هيوصل فى خلال يومين شحنه كبيره
وفاء / يومين!!
دياب / الكميه كبيره و مش سهل نعديها اصلا او نوفرها من مدخل واحد
وفاء/ حاجات كتير اوى ممكن تحصل فى يومين يا دياب
دياب يهز راسه وفاء تبص على الجهاز
وفاء / السيستم خلص تحليل الداتا
دياب يقوم يروح يبص و يبدأ يشتغل و يقفل اللاب و هو مخنوق
وفاء / فى ايه
دياب/ الإشارات كلها مصدرها منطقه الجبل ... كانوا قريبين جدا و مستخبيين فى الضلمه
وفاء / مش هم دى مجرد عربيه انما هم بعاااااااااد
دياب يضحك
وفاء / هو انت ممكن توصل لحاجه من سيريال التصنيع
دياب / احاول امشي وراها بس ما اعتقدش هوصل لحاجه
تليفون دياب يرن
دياب / السلام عليكم ازيك يا باشا اخبار معاليك ايه ... ايه ؟!!! ... تمام يا باشا تمام ... فاهم طبعا... هبلغهم حاضر ... تمام يا باشا تسلم ... تمام معاليك ... فى حفظ الله فى حفظ الله
دياب يقفل و يتنهد و يبص لوفاء و هو بيجز على سنانه
وفاء / خير
دياب / الوزاره مهتميه اوى بالأحداث اللى بتحصل هنا فقرروا انهم يعملوا اعاده هيكله لتسعين فى الميه من اللى شغالين فى القسم
وفاء / ازاى يعني
دياب / الحوار ده ما بيحصلش الا لو فى مصيبه كبيره جايه ... مش عارف انا اتفاجئت ليه ما احنا عارفين اننا مستنين امايا و اللى معاها
وفاء / هتيجي فى حما الحكومه يعني ؟!
دياب / مؤقتا
وفاء / طب احنا خلصنا هنا و لا فى حاجه تانيه تتعمل
دياب / لا خلصنا بس قاعدين نحرسه
وفاء / نون !!! نحرسه !!! انت مستوعب انك لوحدك صح
دياب / اخص عليك يا وحش الوحوش هتبعنى 
وفاء تبص على الباب و تبصله مبتسم
دياب / كنتى عاوزه تروحى الفرح
وفاء / لا بس لو ما فيش حاجه نعملها نروح بيتنا اولى بينا
دياب يهز راسه و يروح يفصل الاجهزه
...........................
على المركب
فرقه فنون شعبيه و مزمار و الحريم قاعدين بيسقفوا و الرجاله بترقص و فى رجاله واقفين حوالين المركب بيراقبوا الدنيا نجاه تروح تناول عمران طبق فيه اكل
نجاه / خدمه خمس نجوم
عمران / تسلمى ... ما شاء الله شاهين مدلعنا على الاخر
نجاه / انا شخصيا اتفاجئت قولت هيبقي مثلا جاتوه و ساقع حاجه خفيفه كدا لحد ما نروح طلع جايب طباخ تحت و مرتب وليمه
عمران / كدا منطقى انه يصمم ان اليوم يتعمل فى معاده بعد كل اللى حصل و اللى بيحصل تعب جامد فى ترتيب الليله
نجاه / مهره زعلانه
عمران يبص لها و يبص الناحيه التانيه
نجاه / ليها حق... عرفت كمان ان اهل العروسه الجديده كمان زعلانين لنفس السبب و ان العروسه هى اللى ضغطت عليها يكملوا الحكايه
عمران / و بعدين
نجاه / هو ايه اللى و بعدين ما اعرفش ما تسأل اخوك
عمران / و اسأل ليه ... و بعدين انتى نفسك من امتى ليكى فى اللت ده كله
نجاه / العيب على اللى يديك وش
نجاه تيجي تمشي عمران يلحقها
عمران / يا ستى حقك عليا ما اقصدش بس انا فعلا مش فى المود خالص ..  كنتى بتقولى ان مهره زعلانه ... كلمتنى و بتلومنى اننا خبينا عليها ... و بتقول هتمشي
نجاه / بكره هترجع مصر
عمران يهز راسه
نجاه / هو انت بجد مش مهتم
عمران / هو انتى صدقتى انها مراتى بجد ؟! هى حره تعمل اللى هى عوزاه
نجاه / بس هى ممكن تتاذى
عمران/ هى مش صغيره و دى حياتها تمشيها زى ما هى عاوزه و فى جميع الأحوال احنا كلنا هنكون حواليها يعني لو احتاجت حاجه اكيد مش هنتاخر
نجاه / بانهى صفه
....................