الكبيره ٢ بقلم / لولو_محمد

الحلقه ٦١

(((((( الكبيره ٢ )))))))
#لولو_محمد
الحلقه ٦١
عمر / هو السرك كله مفيهوش رجاله يا استاذ مفيد
التلاته يضحكوا
منير / جديده دى معاهمش و لا راجل
عمر / لا حضرتك السرك كله بنات اداره و عاملات و كل التيم بنات يا فندم
منير / انا متخيل الإقبال على التذاكر من دلوقت يا استاذ عمر
التلاته يضحكوا
منير / طب و بالنسبه للدواعى الامنيه لتامينهم حضرتك مستوعب معايا لما تقول للشباب ان السما هتمطر بنات الوضع هيكون ايه دول هيفرشوا الصحرا سراير يا استاذ عمر
عمر / يا فندم الموضوع مش مقتصر على الايفنت ده بس حضرتك السيرك ده هيلف جمهوريه مصر العربيه كلها و فى كل محافظه هيتعمل كرنفال استعراضي فى شوارع المدينه و طبعا دا اكيد تشجيع على السياحه و مدعوم من وزاره السياحه حضرتك
منير / مدعوم يا استاذ عمر
عمر / طبعا يا فندم حضرتك بتتكلم فى سيرك عالمى و عمله صعبه حضرتك فى نسبه خمسين فى الميه من التزاكر مخصصه للاجانب حضرتك من كل أنحاء العالم عشان يستمتعوا بجمال مصر
منير / و دا برده مدعوم من وزاره السياحه يا استاذ عمر ؟
عمر / لا يا فندم دا ممول من السيرك وفقا لبروتوكول اتمضي مع الحكومه المصريه و اداره السيرك هى المسؤله عن حجوزات التذاكر فبالتالي هى المسؤله عن استضافه الوفود الاجنبيه مقابل نسبه تلاتين فى الميه من تذاكرهم هتروح لوزاره السياحه حضرتك
مفيد / حلو جدا دا غير طبعا العمله الصعبه اللى هتتصرف فى سكن و تنقلات و متطلبات اقامه
عمر / اكيد طبعا
منير / الحقيقه انا سعيد جدا باللى بيحصل ده و اكيد باذن الله هنغطى كل الكلام ده معاكوا اول بأول و لا ايه يا استاذ عمر
عمر / طبعا يا فندم دا شرف لينا حضرتك
..........................
فى سرايا الزنايته
عباده يروح يخبط على باب نجاه و يروح يقف بعيد ثوانى و نجاه تطلع لافه الطرحه بايدها تشوفه تبتسم و تروح له
نجاه / هو حضرتك لسه هنا ما نزلتش و لا رجعت بدرى ... خير اؤمرنى
عباده / لا روحت بصيت على كام حاجه و رجعت ... يونس داخل على السرايا هنا 
نجاه تستغرب بس تبتسم و ما تقدرش تداريها و عباده متابع رد فعلها
نجاه / جم بدرى اوى لحقوا يخلصوا الفرح و يركبوا الطريق
عباده / لا ما هو جاى لوحده ساب الفرح و ركب طياره و نزل هنا و اخد تاكس على هنا و دقايق و يدخل من البوابه
نجاه / تمام هعدل الطرحه و احصلك
عباده / لا انتى هتفضلى فى اوضتك و مش هتطلعى منها لحد ما تمشي
نجاه / ايوه بس مجيته فجاه اكيد وراها حاجه
عباده / يقولهالى و اوعدك انى مش هكرر أخطأنا القديمه و هسمع له انا طالع ليكي بنفسي عشان اقولك ما تطلعيش من اوضتك يا نجاه لحد ما اجيلك بنفسي و اقولك مشي ... اتفقنا
نجاه / هو فى حاجه يابا ؟! حساك متغير
عيل صغير يطلع بيجرى
العيل / الخواجه طالب يقابل حضرتك يا كبير
عباده / دخلوه المضيفه و انا نازل له
العيل / امرك يا كبير
العيل ينزل يجرى و عباده و نجاه بيبصوا لبعض عباده ينزل نجاه تجرى تفتح البلكونه و تبص تلاقيه واقف تحت البلكونه باصص لها و مبتسم  تدخل جرى و هى محرجه و مكسوفه
مهره / هو فى حاجه و لا ايه
نجاه/ هاه !!
.......................
فى الجنينه
جابر يطلع من بيته يشوف جوزيف بيشوط زلطه صغيره و يلعب بيها
جابر / نورت البلد
جوزيف / منوره بأهلها كنت متوقع اشوفك فى الفرح
جابر / كنت مستنيك اتاخرت ليه
جوزيف / اديني جيت ... خير ؟
جابر / الاخبار كلها عندك انت ... ها ؟ خير ؟
جوزيف / انت بتقول كنت مستنيني ... ما جيتش الفرح عشان مستنيني !!
جابر يبص الناحيه التانيه و يبتسم بسخافه و يرجع يبص لجوزيف
جابر / اكيد انت عارف ان الخطوبه هناك لأهل العروسه و هيجوا يعملوا ليله كبيره هنا لأهل العريس و دى انا هحضرها باذن الله ... انت بقي سبت خالى اللى هو اكتر واحد ان ما كانش الوحيد المتقبل وجودك وسطينا و جيت ليه ؟
جوزيف / جاى لكبيرك
جابر / تمام ... و باب كبيرى اكيد مفتوح للكل ... حتى انت
جوزيف يبتسم بخبث
جوزيف / متاكد انه الوحيد ؟!! خالك يعني ... الوحيد اللى متقبلنى و بيفرح لما بيشوفنى ... متاكد ؟!!
جوزيف يسيب جابر و يمشي بعيد و جابر متابعه و واصل لاعلى درجات الثبات الانفعالى و مش مدى اى رياكشنات على وشه عباده يطلع من السرايا جوزيف يروح له 
عباده / قولتلهم يضايفوك فى المضيفه خير واقف كدا فى الجنينه ليه
جوزيف / جاى اتكلم معاك ... لوحدنا
عباده و جو يبصوا لجابر واقف ساكت عباده يشاور لجو على المضيفه و يدخلوا و يقفلوا الباب و يروحوا يقعدوا
عباده / ادينا لوحدنا اتفضل
جوزيف / انت عارف ان الكدب حرام صح ؟
عباده / عارف ... بس عشان اكون امين معاك الكدب له حالات بيكون ضروره و حلال
جوزيف ساكت و بيسمع باهتمام عباده يبتسم و يكمل
عباده / لو فى حاله الحرب او فى حاله الصلح بين اتنين يعني لو واحد جالى قالى هو فلان اتكلم عليا من ورا ضهرى و انا قولت لا ما اتكلمش و هو اتكلم انا كدا بصلح بينهم ... مراتى لو سألتني على اكلها العادب طعمه حلو و لا لا و قولت حلو و انا ببلعه بالعافيه عشان هى ما تزعلش دا حلال
جوزيف/ ما انت لو ما قولتش ان الاكل عادب هتفتكر ان ده زوقك و تاكلك كدا على طول و صاحبك هيفضل مخدوع فى التانى فين الخير فى كدا
عباده / دى مجرد امثله انت مع الوقت هتفهم ما لوش لازمه دلوقت نهرى فى تفاصيل بره الموضوع المهم اللى جايبك ... خلينا فيك انت بتسأل ليه
جوزيف / انا عارف الاجابه بس عاوز اسمعها منك ... تفتكر انا عمرى ممكن يكون ليا مكان وسطيكوا ؟
عباده يبتسم و يبص فى الارض و يفكر
جوزيف / انا عاوز الحقيقه مش الكدب الحلال عاوز الحقيقه ... انا ما عنديش مانع انى اتعامل معاكوا بيزنيس خدمه قصاد خدمه او فلوس ... مع انى مش محتاجها ... بس خدمه قصاد خدمه او شغل مدفوع دا بيزنيس أفهمه و ممكن جدا اخدمك بدون مقابل عادى بس بمزاجي لانى عاوز ده و راضي و بعمله بكيفي ... لكن انى احس ان فى حد بيستغلنى وقت ما يجيله مزاج و باقي الوقت يقل منى ... خصوصا لو الحد ده انا اقدر اساويه بالأرض... دا شئ بيضايقني
عباده / دا شئ يضايق اى حد مش هيضايقك لوحدك ... يعني اكيد لما احنا كمان بنحس بكدا بنضايق ... بص ... كان فى صحابى اسمه طليحه بن خويلد الاسدى الراجل ده كان مشرك و كان بيحارب المسلمين و بعدين راح مع قومه للنبى عليه الصلاه و السلام و اسلم بس ما كانش مؤمن فجه فى أواخر حياه النبى عليه الصلاه و السلام ادعى النبوه و ارتد فالرسول عليه الصلاه و السلام ... المفروض تقول عليه الصلاه و السلام لما تسمع اسم النبى
جوزيف / تمام .. عليه الصلاه و السلام... كمل
عباده / المهم الرسول عليه الصلاه و السلام
جوزيف / عليه الصلاه و السلام
عباده و جوزيف يبتسموا
عباده / امر بمحاربه المرتدين و فى معركه واحد حاول يقتل طليحه بس ما عرفش الضربه جت غلط و الموضوع انتشر بقي على أنه ما بيموتش و نبى بجد و الناس صدقته و الرسول صلى الله عليه وسلم اتوفى و سيدنا ابو بكر كمل الحرب دى و كسبها و هرب طليحه و بعدين لما عرف ان قبيلته رجعت للاسلام رجع للاسلام تانى
جوزيف / يعني هو بيسلم مع قبيلته و بيرتد مع قبيلته ايه ملوش مخ
عباده يبتسم
عباده / الله اعلم بقي عقله شغال ازاى بس اكيد واحد بيدعى انه نبى و بيخترع دين و يحلل و يحرم اكيد عقله وقتها ما كانش شغال بكامل طاقته و لا ايه
جوزيف/ غريب جدا
عباده / خلينى اكملك القصه و نرجع النقطه دى تانى لأنها مهمه
جوزيف يهز راسه
عباده / طليحه كان نفسه يعمل عمره بس كان خايف يواجه سيدنا ابو بكر بس لما سيدنا ابو بكر توفى و مسك سيدنا عمر الخلافه راح طليحه يعمل عمره و قابل سيدنا عمر و دار بينهم حوار اختصاره ان سيدنا عمر قاله و الله لا أحبك ابدا فطليحه رد عليه و قاله كم معاشرة جميلة يا أمير المؤمنين فإن الناس يتعاشرون مع البغضاء يعني مش مهم تحبني أو تكرهني المهم المعامله الكويسه انت مش هتقدر تحب كل الناس المهم تعاملهم بما يرضي الله و خلاص فهمت قصدى
جوزيف / و بعدين
عباده / طليحه اتوصف انه بالف فارس و فضل يحارب مع المسلمين لحد ما استشهد... خلاصه القصه انت ممكن يحصلك انتكاسات و ممكن الناس ما تقبلكش ... بس افتكر ان اللى بيحاسب فى الاخر هو ربنا و هو ده الوحيد اللى انت مجبر ترضيه الباقي عاملهم بما يرضي الله مش مطلوب منك ترضيهم
جوزيف / بالنسبالكوا ما يرضي الله هو اللى يرضيكوا
عباده / مش حقيقي احنا نفسنا بنعمل حاجات غلط منها الاختلاط الأسرى فى الحدود العرفيه اللى بينا و لما انت لفت نظرنا منعناها... او على قد ما نقدر يعني و ربنا يعين
جوزيف/ ما علينا
عباده / بخصوص النقطه اللى فاتت ..  ان الواحد ممكن يدخل الاسلام مع اهله و يخرج مع اهله ... دا بيحصل طول الوقت ... انا شخصيا اتولدت مسلم انت نفسك بقيت مسلم لان ابوك و امك طلعوا مسلمين... بس مش دى القضيه اى حد ممكن يبقي مسلم بس مش اى حد يقدر يبقي مؤمن عشان كدا معظم الثواب و الخير بيتذكر فى القرآن مقرون بكلمه المؤمنين مش المسلمين دى حتى ذكرت فى القرآن تقريبا ضعف عدد المرات اللى ظهرت فيها كلمه المسلمين شوفت الدقه سبحان الله
جوزيف / كلام حلو
عباده / انت واحد هقول اتسبب .. فى اكبر وجع ليا فى حياتى ... على مدار سنين و مع كدا قاعد معاك لوحدنا بتكلم بكل هدوء
جوزيف / الاسلام يجب ما قبله
عباده / عند ربنا ... عندنا بقي بنمشي بمبدأ سيدنا عمر و سيدنا طليحه فهمت حاجه ؟
جوزيف / حقى و حقك يعني ؟
عباده / ما حدش بيزعل من الاصول
جوزيف / الفتره الجايه فتره صعبه الجد بدا ... و انا عارف ان الكلام ده هيضايقك بس ... دى الحقيقه ... انا ما اعرفش ليه بس ... المهم يعني ... أنا فى اتنين بس على الكوكب ده فارقين معايا ... نجاه و امايا
عباده يبص فى الارض
جوزيف / انا صريح معاك
عباده يبص لجوزيف
جوزيف / انا مش هاذيها انا هحميها
عباده / و مين يحميها منك
جوزيف / انا بقول ايه و انت بتقول ايه
عباده / انت ممكن تقتلها بأنك تسوء سمعتها وجودك جنبها هيخلى الناس تتكلم احنا كل ده ما اتكلمناش فى الحلال و الحرام
جوزيف / هيكون فى محرم طول الوقت هكون سواق للعربيه اللى ركباها او جارد حواليها ... انت مش هتقدر تحبسها فى اوضتها طول الوقت ... دا غير انها محتاجه تدريب ... و اللى عرفته انها محتاجه تتابع الجلسات اللى كانت هيلجا بتعملها لها
عباده يضحك
جوزيف / انا هتابع مع الدكتوره بتاعتها لا هحضر الجلسه و لا هلمس نجاه و لا هختلى بيها فى مكان ايه وجه اعتراضك ... انا جايلك لحد عندك
عباده / هى فارقه معاك ليه
جوزيف / اسباب كتير مش لازم تعرفها كلها
عباده / انت متخيل انك رايح تقول الكلام ده لاب صعيدى بحجه انك جايلى لحد عندى او انك صريح عادى كدا ... يا اخى انت فاكرنا ايه ..   فاكرنى انا ايه ... لا حول و لا قوه الا بالله ... انت عارف مشكلتك ايه
جوزيف يهز راسه باستفهام
عباده / انك خواجه ... لا مش دى مشكلتك الوحيده... مشكلتك انك ... و الله ما عارف انت اساسا فى حد ذاتك المشكله
جوزيف يضحك
عباده / انت عارف لو طلبت تلزقلى انا شخصيا ... تاخد فارس و كارم رهاين عندك مدا الحياه انا هقول امين نقرأ الفاتحه ... بس بنتى لا ... الحريم لا حتى لو مش بنتى يا ... يونس يا يونس ... الحريم مكانهم بيتهم ... انا غلطت و مش بنكر انا فرحت بيها و شجعتها و استخدمتها ... طول عمرها كرباج فى ايدي بصحي بيه الدكر لما ينخ او يخيب ... لكن مع الوقت اكتشفت انى كنت غلطان  .. و مستعد اعمل اى حاجه و أصلح الغلط ده و مش قادر... أنت بقي بكل ال مش عارف ايه اللى فى الدنيا جاى و عاوز تكب بنزين على النار و تشوفها بتولع فينا كلنا ... لا و بكيفي و باذنى  ... دا انا بطل انى قادر اقعد اخد و ادى معاك فى الكلام كدا عادى
جوزيف / مش يمكن لان من جواك عارف ان امانها عندى
عباده / طلبت الصراحه ... انت عاوز ايه من بنتى
جوزيف / المجلس شك فيا و لما رجعت اسكندريه بعت امايا مع فريق تانى هدفهم يكملوا اللى انا فشلت فيه عصابه البنات اللى اتهجموا على نجاه فى الحمام كانوا هيخطفوها يوميها و فشلوا المحاوله دى هتتكرر المشكله ان الفريقين فريقي و فريق امايا ما يعرفوش بعض و كل واحد فيهم عنده تعليمات يقتل التانى لو حاول يمنعه بس انا عمرى ما هقدر اقتل امايا و امايا مش هتقدر تاذى نجاه
عباده / جبت الثقه دى منين
جوزيف / لان بينهم وعد عبيط كدا مش فاهم سببه ... و ما تسالش واحده زى امايا ايه اللى يخليها توفى بالوعد ده بس دى الحقيقه ... انا بجازف بكل حاجه بكلامى معاك دلوقت بس ما فيش حد بيحب نجاه قدك ... انت مش هتقدر تحميها من غيرى
عباده / و مش هقدر احميها منك
جوزيف / ما انا رديت عليك و قولتلك هيبقي فى محرم طول الوقت كارم خلى كارم يلزقلى ... انت اللزقلى لو عديت حدودى معاها مره اقتلني
عباده / انت عاوز ايه
جوزيف / مش عاوز حاجه تحصل للاثنين بنتك و اختى و لا انت هتقدر تحمى بنتك لوحدك و لا انا هقدر احمى اختى لوحدى
عباده / انت كمان عاوزنا نحمى الخاينه دى
جوزيف / هحكى القصه كام مره انا اللى حولت امايا لسلاح انا اللى اقنعت المجلس انها ممكن يطلع منها حاجه تانيه غير انها تكون مجرد لعبه من ايد لايد لحد ما تموت كنت فاكر انى بكدا هقدر اشتري لها عمر أطول... بس السلاح اتاخد منى و اللى مرنوها اتكوا على كرهها للرجاله و استغلاليه منهم و هى صغيره ... قال يعني كبرت دلوقت ... ان كنت انا اتخطفت و اتغسلت دماغى فهى دماغها بقالها سنين دماغها منقوعه فى الهبل ده و قبل ما تقول الكلمتين اللى كلكوا حافظينهم خليني برده اقولك انها وسطيكوا ما سلمتش من معاكسات و بصات كلاب البلد و اولهم ناصر بيه و اللى عمله ... مرتين ينبسط و يقوم يشتمها و يمشي و كأنه هو لا غلط و لا عمل اى حاجه و هى اغتصبته مثلا
عباده / غلط و اعترف بغلطه و اتعاقب
جوزيف / و هى ما غلطتش امايا مش مسلمه عشان يتطبق عليها الشرع او حتى تعرف الحلال من الحرام ... ما ينفعش تجيب بنت امريكيه و تقولها انها قليله الأدب لأنها بتعمل حاجات كل الامريكان بيعملوها وصلك اللى بقوله و لا لا ... لما تسلم ساعتها تحاسبها بالحلال و الحرام و حتى دى مش انت اللى تحاسب انت بشر زيك زيها مش انت اللى تنصب المحكمه و تحاسب الناس بهواك ... اقولك حاجه لسه قاريها امبارح فى الكتب اللى نجاه جابتهالى ... ان عقاب الزنا الجلد
عباده / و مين قال غير كدا
جوزيف / امال ليه بتقتلوا البنات بحجه الشرف … حتى لو الزوجه خاينه و دخلت عليها شوفتها مع واحد تانى مفيش اى حاجه بتنص على انك تقتلها و تعتبرها جريمه شرف عادى و تكمل حياتك انت بتعمل ده مش عشان الاسلام امرك بده دا عصبيتك لنفسك هو و المفروض يتفرض عليه حد القاتل العين بالعين و السن بالسن و من قتل يقتل او يدفع ديه
عباده يبتسم
جوزيف / ايه ؟! بتكلم غلط ؟!
عباده / بتتكلم صح جدا ... صح جدا على واحد لسه داخل الاسلام جديد
جوزيف / ما تغيرش الموضوع
عباده / انا موافق
جوزيف / على ايه
عباده / على طلبك... بس بشروط
جوزيف يبتسم
عباده / اى عوجان هديك بالجزمه اتفقنا
جوزيف / هو انت ما تقدرش ... بس انا اوعدك ان مفيش عوجان اصلا
عباده / مع انى اقدر... بس ماشي ... قولى بقي اتعلمت ايه تانى من الكتب اللى نجاه جابتهالك
جوزيف / فى ايه ؟! لا انا تديني سؤال محدد انما مفتوح كدا ما تستناش منى اجابه انا مش هنجم
عباده يبتسم
عباده / اكلت ؟
جوزيف / لا عندكوا اكل ايه
عباده يضحك بصوت عالى و يطبطب على رجل جو و يقوم
عباده / استنى هنا هستعجل لك الاكل
جوزيف / ما ورايش حاجه خد وقتك
عباده يطلع بره يلاقي جابر واقف مكانه فى الجنينه يروح له
عباده / شكل خالك معاه حق
جابر يتنهد
عباده / الفتره الجايه فتره صعبه ... و احنا فعلا محتاجينه
جابر يبتسم بسخريه و باصص بعيد
عباده / ما تمسكوش ايدك اللى بتوجعك و اتعلم تتعامل معاه
جابر / هو انتوا لاقيني قدام المعبد اليهودي ... دا انا لو اسير حرب هيبقالى حقوق عن كدا
عباده يضحك
جابر / حضرتك عارف هو جاى ليه و لمين .. مش هنضحك على روحنا
عباده / هى مش نجاه قالت مفيش تعامل من غير محرم ... خلينا نختبر قرارها
جابر / الصبر من عندك يا رب
عباده / بيحاول يا جابر ... بيحاول ... خلينا نشوف اخره ... و اخرك انت كمان
جابر يستغرب
عباده / هو مش قالهالك فى وشك صريحه ... رد عليه بطريقته
جابر / ازاى يعني
عباده / انك تكون ثابت و هادى ... زيه كدا بالظبط ... عمرك شوفته متعصب علاطول بارد ... اللى بيتعصب بيغلط
جابر/ لا ما انا فاهم بس مش عارف اعمل كدا ازاى
عباده يضحك و يطبطب على كتف جابر و يسيبه و يمشي
جابر/ قولت كدا برده
......................
فى عربيه مختار
هند / دا بجح اوى ... اياكش يطخوه و نخلص منه 
مختار / هى زريبه يا هند هو ايه الكلام ده واحد جاى بادبه هنطخه ليه
هند / انا مش قادرالك
مختار/ اللى غايظنى ان ما حدش كلمنى يقولى ايه اللى حصل لحد دلوقت
هند / و دا معناه انه لسه بيحصل لما يخلص هيبلغوك
مختار / هو انت متأكد انك ما قولتلوش اى حاجه يا عمران امبارح
عمران / بالعكس هو اللى ضايقني مش انا اللى ضايقته
شاكر / هو ليه بيعمل كدا صحيح ليه ما بيحاولش يكسب اللى حواليه ليه بيستفزكوا كلكوا بالشكل ده
مختار / عشان مقتنع بمبدأ ان لما تستطع اسعاد الجميع فعكنن عليهم كلهم
الكل يضحك
عمران/ بس هو مش غبى هو اكيد عارف انى بعامله كويس و متعاطف معاه ليه يخسرني بقي
مختار / زى ما قالك بيختبر ثباتك الانفعالى
هند / اه زى الشتيمه فى وسط الهزار كدا و ايه ده انت زعلت دا انت قموصه اوى دا انا كنت بهزر و كدا ... عيل سهن
مختار / سهن مش هقول لا ... بس عبقري بيعرف يقرأ اللى حواليه و يطلع نقط ضعفهم فى ثوانى
هند / خطر يعني
مختار/ هو فى صفنا دلوقت
هند / للمره المليون بقولك هو مش رشيد
مختار / رشيد كان متفوق عليا طول عمره لان الشارع رباه ان ما فيش قواعد يونس كمان اقوى من ابوه لان المجلس اداله اسلحه و علم مش عندنا
شاكر / ما احنا برده لازم نحاول نستفيد من العلم و السلاح دول
عمران / ما حدش هياخد منه حاجه
مختار / كارم اتعلم منه كتير و فى وقت قياسي ... دا على كلام كارم
عمران / كارم اصلا ما لوش فى التكنولوجيا يعني الكتير بالنسبه لكارم قليل جدا بالنسبه ليونس او حتى منصور و دياب
مختار / هنا بقي دور منصور و دياب انهم يقربوا منه فعلا و يحاولوا يتعلموا منه اللى يقدروا عليه
شاكر / هم دول عارفين يتلفتوا حتى الله يعينهم على كميه الشغل اللى عليهم ... دا كفايا حوار عيله الجزار اللى اتسحلنا كلنا فيها دى ... على فكره صابر محتاج حد كبير يقعد يتكلم معاه كتير... انا ما بقدرش عليه
عمران / و هو صابر ده يقدر عليه إلا ربنا
مختار/ ربنا يزيده احنا هنعوز اكتر من كدا ايه ... صابر عاقل و بيعرف يوزن الأمور ما تقلقش عليه ياما عدى عليه و لسه ياما هيعدى
عمران/ ايوه بس الموضوع ده مريب جدا
هند / سيبك انت من صابر خلينا فيك انت
عمران / مالى
هند / ايه الدنيا الراجل ده ابو مهره ناوى تعمل معاه ايه
مختار / و لا اى حاجه خالص و لا كانه موجود
هند / طب و الغلبانه اللى فى البيت
مختار/ تخف بالسلامه و اللى هى عوزاه هيكون
هند / بالبساطه دى
مختار / ما تعقديهاش انتى و هى تمشي
هند / يا سيدي أعقدها ليه انا البنت كانت عجبانى من الاول اصلا
شاكر / و الله و انا كمان شايف انها حله و لقت غطاها
عمران / و حضرتك يا بابا مش شايف حاجه انت كمان
مختار / و الله الموضوع فى الاول و الاخر فى ايدها هى ما يمكن مش انت اللى فى خيالها اصلا
هند / ليه يعني و هى هتلاقي احسن من عمران فين طب دا انا ابنى مليون من تتمناه يبص لهم بس
مختار / على يدى كنتا قاعده هنا و كنتى قاعده هنا و هو على كلمه واحده ما اخدوش يا بابا ما اخدوش يا بابا
الكل يضحك
مختار/ شوف لنا يا ابنى استراحه قريبه الواحد يفك فيها رجله ... اهو ده درس يا اولاد لما مراتك تقولك نرجع طيران تقول حاضر عشان هيبقي شكلك فنله لما تطلع صح و تتعب من الطريق
هند / ربنا يديك الصحه هو انت بتريح نفسك اصلا
...............
فى اوضه نجاه
نجاه / يعني ايه؟
عباده / زى ما سمعتى
نجاه / ايوه ما انا سمعت بس مش فاهمه... ليه ؟
عباده / مش عاوزه بلاش
نجاه / لا مش عاوزه
عباده يستغرب
نجاه / مش هفتح باب للشيطان و الكلام مش ناويه اعيدها تانى ... بتدونى الاذن و بعدين بترجعوا تهاجمونى انا
عباده / يعني احنا المشكله يعني
نجاه / لا ... انا عارفه الحلال و الحرام و عارفه ان اللى بعمله دلوقت هو الصح ... و مش ناويه انسحب لسكه هتجبرنى ارجع عن قرارى
عباده / تمام هبلغه انك رافضه خدماته
عباده يقوم و هو متابعها و نجاه مش ثابته و بتتجنب عنيها تيجي فى عين ابوها عباده يمشي
مهره / هو ايه الموضوع
نجاه/ مفيش موضوع و لا حاجه
مهره / تمام مش هسال
نجاه / مش حاجه و الله يا مهره ... بصي الموضوع ان ... احنا اتربينا فى بيت عيله و بنختلط و كل حاجه  ... طبعا فى حدود و كدا بس ... يونس ده اصله مسلم جديد ... و سبحان الله اللى بيتعلم الحاجه جديد بياخدها صح مع انى طول عمرى مسلمه بس باخد ديني بالوراثه و التعود لحد ما بقي هذا ما عهدنا عليه اباؤنا حتى لو حرام ... صح فى العرف بس حرام عند ربنا فاهمه حاجه
مهره تهز راسها
نجاه / يونس بقي مش كدا يونس حرفيا حط ايده على اكتر حاجه احنا بنعملها حرام ... الاختلاط
مهره / بس انتى عمرك ما هتقدرى تتعاملى من غير اختلاط يا نجاه للاسف الحياه بتفرض عليكي ده فى كل حاجه دراسه و تمرين و شغل مجرد خروجك من باب البيت هتتعاملى و انتى فى حالتك حتى جوه البيت لازم هتتعاملى
نجاه/ ايوه عارفه ان الموضوع صعب بس لازم احاول
مهره / اكيد كلنا بنحاول بس الدين يسر يعني مش كدا
نجاه / فى فرق كبير بين الدين يسر و بين اتباع الهوى
مهره/ اعملى اللى انتى حساه صح و هيريحك
نجاه / ما دى المشكله انى مش مرتاحه فى اى وضع ... بس بقول لازم اجاهد نفسي و كدا
مهره / تمام حاولى و انا معاكى لو احتاجتى اى حاجه
نجاه / ما اتحرمش منك  .. طمنيني عليكي انتى عامله ايه
مهره / احسن كتير الحمد لله كنا فين ... هو ما فيش اخبار من عموا مختار و عمران
نجاه / عاوزه نصيحتي ... انسيهم ... اهلك اقصد و بعدين من امتى شوفتى منهم خير اصلا ... انسيهم و خليكي وسطينا و ابدئي حياه جديده
مهره / ايه الكلام ده بس
نجاه / انتى هنا ناقصك ايه بس
مهره / و لا اى حاجه بس دول اهلى يا نجاه ابويا و أمى يعني لو اتقدملى حد مش هيسال فين ابويا و امى اكيد هيسال و لا انا بفكر فى ايه اصلا و انا معايا قسيمه طلاق اساسا
نجاه / يا ستي اكم اتكتب كتابهم و اتفسخ عادى ما فيهاش حاجه عادى يعني و بعدين يا بنتى ما فيش حد بياخد واحده من بيت الزيني و يسأل عليها انتى فى ضهرك الكبير الف من يتمنى يناسبه اصلا
مهره / يا ستي على راسي بس انا مش بنت الكبير انتى بنته
نجاه / الكلام الوحش ده ما بينطبقش عندنا هنا فى السرايا هنا اى بنت عايشه تحت سقف السرايا دى تبقي بنت الزنايته و بينطبق عليها قواعد الزنايته و اللى بيجي يطلبها بيجي و يقعد مع رجاله الزنايته و انتى ما ادراكي بقاعده رجاله الزنايته ... الله اكبر عليهم
مهره / ربنا يبارك فيكوا كلكوا بس انا
نجاه / بقولك ايه بقولك ايه سيبي كل حاجه لوقتها ما تفكريش دلوقت فى اى حاجه و خلينا نركز هنلبس ايه فى الخطوبه بتاعه ناصر
مهره / لا انا مش هحضر انا هخليني فى الاوضه هنا
نجاه / و الله ما يحصل بطلى نكد بقي قومى يا بت خلينا نشوف هنلبس ايه ... انتى عارفه مين هتخلص لنا الحوار ده ؟!! البت احلام كنت هقولك ياسمينا بس سمعت ان الحمل تاعبها و ما بتخرجش من السرايا ... تيجي نروح نزور خالتى دى عسل خالص هتحبيها موت
مهره / لا لا لا مالها احلام ما هى مننا فينا ايه يا بنتى مالك
نجاه / تمام قومى يلا نروح نشوف احلام فين و نرخم عليها
نجاه تعدل طرحتها و تقوم مع مهره يطلعوا بره
.....................
فى شقه عبده
ام عبده / و الراجل ده بقي قاله ان الاسهم دى هتدور نفسها و راس المال ثابت و ارباح البورصه دى ناوى باذن الله يستثمرها فى المقاولات
نسمه / و من امتى محمود بيفهم فى المقاولات و لا الراجل ده هو اللى شار عليه بالموضوع ده
ام عبده / لا دى امه
نسمه تضحك
ام عبده / و بعدين مش المقاولات اللى فى دماغك هو لا هيهد و لا هيبنى دا هيشترى شقق و محلات يوضبها و ياجرها و اهى الشقه تجيب رزقها و هى برده موجوده لا بتاكل و لا بتشرب و لا بيصرف عليها
نسمه / ربنا يفتح عليه
ام عبده / شوفتى بقي انه راجل ابن حلال و ربنا بيحبه
نسمه/ ربنا يديله على قد نيته
ام عبده / نيته خير ... يحافظ على ولاد اخوه و مالهم و أرضهم
نسمه / تانى الكلام ده ياما
ام عبده / مش احسن من مجايب ابوكى سي فراس بيه
نسمه / يا ستي ازفت من ستى الا سيدي انا عاوزه اعيش معاكى انتى و عيالى لا عاوزه اتجوز و لا اتنيل انا هعيش عمرى كله اخدمكوا و مش عاوزه اى حاجه خالص ... سيبوني انتوا بس اعيش فى هدوء مش عاوزه اكتر من كدا
ام عبده / و سي صابر هيلد عليه الكلام ده
نسمه / لما يبقي صابر يتكلم اصلا هرفضه انما انا مش فاهمه و الله كل ساعه سيرته بتتجاب فى البيت ده ليه بس
ام عبده/ مش فاهمه يا ام بدر !! استعبطى استعبطى
نسمه / لا مش فاهمه ياما
ام عبده / بكره يا ست البنات لما العده تخلص و دا مش بعيد ... نقعد جنب الحيطه و نسمع الزيطه و نشوف هترسي على ايه
نسمه / انا مش هتجوز ... خلصت
ام عبده تبتسم بسخريه و تسيبها و تقوم
نسمه / و الله ما فاهمه من جمال امى اوى يعني الرجاله مقطعه نفسها عليا اوى كدا دا ايه المرار الطافح ده بس يا ربى
نسمه تبتسم بسخريه
نسمه / جمال ايه !! دا انا مجرد كوبرى عشان يحطوا ايديهم على أرض العيال
نسمه تتنهد و دموعها تنزل منها غصب عنها و تفضل تمسح فيهم
........................
على النيل فى البلد
شاهين يركن عربيته و ينزل يتمشي ناحيه المراكب يشوف حوريه يركب
شاهين / لف بيا شويه فى النيل يا اسطى
المركب تتحرك
شاهين / ما فيش حاجه تتشرب المرادى و لا ايه ؟
المراكبى / فى ايس بوكس تحتيك شوف تحب تشرب ايه
شاهين يبتسم و يمد ايده يسحب ايسبوكس ازرق يفتحه مليان تلج و كنزات
المراكبى / لو ليك فى الريد بول هتلاقى تحت مد ايدك و خد راحتك
شاهين يبص للمراكبى باصص على النيل شاهين يمد ايده و يدور يطلع كنزايه ريد بول يستغرب وزنها يحطها فى جيبه
شاهين / حسابها كام دى يا اسطى
المراكبى / خلى علينا خالص يا سيد الناس خيرك سابق
شاهين / تشكر ... بقولك ايه لف و ارجع انا افتكرت حاجه كدا
المراكبى / عيني يا سيد الناس
شاهين يقفل الايس بوكس و يرجعه مكانه و يروح يقف على طرف المركب
.........................
فى شقه نور
نور / مش هتصدق جالى ايه هديه امبارح
ناصر/ خير
نور / تذاكر للسيرك الروسي
ناصر / دى أغرب هديه سمعت عنها فى حياتى
نور / انا كمان استغربت اوى ... بس بابا بيقول ان فعلا التذاكر كلها محجوزه و انها وصلت لأسعار خياليه فى السوق السودا خصوصا احتفاليه الأهرامات اللى الكل بيتكلم عنها
ناصر / السما هتمطر بنات ... مش محتاجين دعايه احسن من كدا
نور / انت شايف كدا
ناصر / انا ما بشوفش ... قوليلى جهزتوا حاجتكوا و لا فى حاجه ناقصه ... كدا كدا كل حاجه موجوده هناك و احسن من هنا مليون مره فمش عاوزك تقلقي خالص
نور / انا مش قلقانه
ناصر / كويس
نور/ انا متحمسه اوى انى اتعرف على عيلتك بجد
ناصر / اتكلمتى مع اهلك؟
نور / فى ايه ؟
ناصر / قولتى ليهم يعني على الحقيقه... انا و اهلى
نور / لا ... مش عوزاهم يخافوا او يتوتروا
ناصر / طب و انتى مش خايفه
نور / قلقانه شويه ... بس مش خايفه ..  بالعكس مطمنه جدا
ناصر / بس لازم نتكلم معاهم
نور / هتكلم بس ... مستنيه الوقت المناسب
ناصر / مفيش حاجه اسمها وقت مناسب ... الوقت المناسب ده ممكن ما يجيش ... ممكن و انتى مستنيه تحصل حاجات تانيه فى النص... اى حاجه بتتبنى على الصراحه بتدوم و انا عاوز علاقتنا تدوم
نور / مش حاسه انهم هيفهموا
ناصر / و انتى ؟ فهمتى ؟!
نور / لا
ناصر يضحك و يكتمها و يبص فى الارض
نور / ما تستهبلش انت فاهم كل حاجه ... ايه السخافه دى
ناصر / متبادل على فكره
نور/ كتر خيرك و الله ... انت قصدك ايه بمتبادل اوعى تكون بتتكلم عن السخافه
ناصر يضحك بصوت
ناصر / لا قصدى على التانيه
نور / دا اخرك يعني ؟! التانيه !! بس كدا ؟!
ناصر يتنهد
نور / مش هتقولها لى ؟!!
ناصر / اكيد هقولها و قريب جدا كمان ... لما نكتب الكتاب
نور / اشمعن ؟
ناصر / مش عارف ... بحبك يا نور حلو كدا ؟!
نور تبص له بخيبه امل و تلم نفسها و تبتسم
نور / حلو ... حلو
........................