الكبيره ٢ بقلم / لولو_محمد

الحلقه ٨٥

((((((( الكبيره ٢)))))))
#لولو_محمد
الحلقه ٨٥
نجاه / عملتوا ايه ؟
جابر / ما عملتش حاجه ... هو بعت رجالته لموهم كلهم بما فيهم اكرم و عجنوهم ضرب و ما اعرفش وصلوا لايه
نجاه / و مروان ؟
جابر / ما كانش هناك
نجاه / انت زعلان منى صح ؟
جابر / لا مش منك ... انتى معاكى حق ..  انا متكتف بحاضر و نعم ..  مع ان اللى عمله كان ممكن نعمله احنا من اول ما عرفنا انها حامل ... لكن احنا لا لازم نصفى الاحتمالات و ما نظلمش حد و كلام جميل اوى بس ما بياكلش عش
نجاه / بس بيسقي انهار من عسل مصفى
جابر يبص لنجاه بطرف عينه و يبص الناحيه التانيه
نجاه/ الواحد وقت الوجع بيقول كلام ما يقصدوش كلام هو مش مؤمن بيه بيقول اى كلام و خلاص ... و بعدين بيرجع يضرب نفسه مليون جزمه ... كان ممكن يجرالك حاجه
جابر / انتى بتعملى كدا ليه؟! يعني بتحاولى تقولى ايه ؟ انى فارق معاكى مثلا ؟!
نجاه / طبعا فارق معايا يا متخلف انت ..  ايه السؤال الاهبل ده !! جابر دا انا بتخنق لو بس زعلانين من بعض انت بتسأل بجد ؟!
جابر/ يعني بتحبيني يعني ؟!
.............................
نجاه / انت خدت الكلام للسكه دى ازاى ... هو انت ما عندكش غير نوع واحد من المشاعر ما ينفعش تبقي اخويا مثلا صديقي
جابر / انا لا اخوكى و لا ينفع صداقه بين راجل و بنت تمام ... العلاقه الوحيده اللى المفروض تكون بينا هى زوج و زوجه
نجاه / يا كدا يا مش عاوزنى فى حياتك يعني
جابر / هو بمزاجي !! دا كلام ربنا ... دا دينا ... انتى هتفضلى تايهه لحد امتى بس ؟!
نجاه / انت بتخلى الواحد يندم انه جه يصالحك
جابر يبص لها و يتنهد تروح تقعد و تبص له باصص لها تبص الناحيه التانيه و ترفع مناخيرها لفوق بقمصه جابر يبص ناحيه جوزيف باصص له و مبتسم جابر يبص الناحيه التانيه
.........................
فى سرايا الجوارحه
هند قاعده فى اوضه ياسمينا
ياسمينا/ اقسم بالله ما بعمل حاجه
هند / بس ما بتاكليش يا قلبي
ياسمينا / بالله عليكي اعمل ايه اكتر من كدا عشان اثبت ليكوا انى باكل
هند / و الله لو بكلم جدار كان نطق
ياسمينا / طب ما تحلفيش بالله بس
سماح تفتح الباب فجاه و تخضهم
سماح / سمعتوا الخبر
هند تتنفض
هند / ايه اللى حصل حد جراله حاجه
سماح / فال الله و لا فالك يا هند ايه يا اختى انتى ما تعرفيش غير الحاجات الوحشه دى
ياسمينا / خبر حلو بجد !! خير خير فرحينا
سماح/ المحافظه ادت السرك الروسي ترخيص و هيفرشوا فى الساحه الكبيره اللى قدام القسم
هند / دا امتى ده
سماح / لسه عباده مكلم مغاورى و راحوا بنفسهم المحافظه ربنا يهديهم و يغيروا رأيهم
هند / اكيد ليهم وجهه نظر برده
سماح / يا هند البلد كلها فرحانه ما تبقيش نكديه زى اخويا بقي
ياسمينا / لعله خير فعلا حاجه تخرجنا من الجو الصعب اللى عشناه و تخفف على الناس
هند / اللى فيه الخير يقدمه ربنا
......................
فى اوضه مهره
نجاه/ فى واحده عاقله تعمل كدا
مهره مش بتتكلم و سرحانه فى ملكوتها
نجاه / انا عارفه و الله ان مفيش اى كلام هيخفف الوجع او يصلح اللى فات بس ما تقلقيش مسكوا اللى عملوا كدا و باذن الله حقك راجع
مهره تبص لنجاه بنظره حسره
نجاه / انتى فى ابتلاء شديد و انا عارفه بس لازم تصبري.. لازم تبقي مؤمنه ان ورا كل محنه خير اقسم لك بالله عوض ربنا قريب بإذن الله
مهره تحط ايدها على بطنها و تعيط
نجاه / و ليه لا ما يمكن ده اللى يعدل المايله و ينصفك... انتى تعرفى بكره فيه ايه تعرفى اصلا الخير فين
الباب يخبط
نجاه / ادخل
عمران يفتح الباب بالراحه و يدخل
عمران/ عامله ايه ... جالنا تليفون و اللى عمل كدا اعترف و حالا كل الناس اللى اذوكى بيدفعوا التمن غالى اوى
نجاه / عملتوا ايه ؟
عمران / ما عملناش ... هو اللى عمل
نجاه تبص لمهره بتعيط فى صمت و ايدها على بطنها
عمران / ما تفكريش فى حاجه يا مهره اللى كاتبه ربنا هيكون و احنا جنبك اى كان الوضع و انا فكرت فى الموضوع و ... ما عنديش مانع اكمل
مهره و نجاه يبصو له بصدمه
عمران / يعني انتى على الورق مراتى  ... او طليقتى عادى زى ما تحبى و نخلق له حياه يعيشها و انا متكفل بيه
نجاه / انت بتقول ايه ... هو دا ينفع
عمران / ما حدش يعرف اللى حصل غيرنا يعنى نقدر نلمها
مهره تصرخ بشكل هستيرى و تضرب فى بطنها عمران و نجاه يكتفوها دكتوره تدخل تديها حقنه تنام
نجاه / هى الحقنه دى مش خطر على اللى فى بطنها ؟
الدكتوره/ لا ما تقلقيش دى ائمن حاجه
نجاه تهز راسها الدكتوره تبتسم و تمشي
نجاه / انت ايه اللى قولته ده
عمران / كدا كدا دا وضع قائم اى حد هيسال هيعرف ان البيبي ده اتولد فى فتره هى متجوزانى فيها كام واحد يعرف انها كدبه على الورق... نجاه ... الناس فى البلد كانت بتبارك لى كانى اتجوزت فعلا و ما كنتش قادر افتح بقي ... وضع و انا قبلته فى الاول
نجاه / اتفرض عليك
عمران / ما حصلش... انا كنت عارف انا داخل على ايه هم ما غفلونيش و سقونى حاجه اصفره و فجاه لقيت القسيمه فى ايدي انا اللى أديت له البطاقه و عارف ان وارد ان كل ده يحصل
نجاه / بس مش لدرجه انك تنسب لنفسك طفل مش طفلك ... دا لا يجوز شرعا لا هو اخو عيالك و لا ينفع يورثك و اللى هتكدب فيه النهرده بكره هيتكشف و مش هتقدر تهرب منه
عمران / الضرورات تبيح المحظورات و انا كل ده عشان استر بنت ما لهاش ذنب فى اى حاجه... انا اللى قصرت فى حمايتها و انا اللى لازم اتحمل النتايج دى
نجاه / بس مش بالطريقه دى
عمران/ امال بانهى طريقه الطفل عاش حاولت تقتل نفسها و عاش يعني ليه عمر و هيتولد هنرميه فى ملجا و لا فى الشارع و لا هنقتله و لا هنعمل ايه بالظبط
نجاه / يعني ما فيش حل تانى ؟
عمران/ عندك اى حل غير ان الطفل ده يعيش عمره كله على انه جه من خطيئه ما حصلتش اصلا ... بنت شريفه تدفع تمن حاجه ما عملتهاش ... نجاه انا مستوعب انتى بتقولى ايه بس ... انا متاكد ان ربنا مخبيلى خير كبير اوى باذن الله لو سترت على البنت دى
نجاه/ مش بالطريقه دى
عمران / غصب عنى و عنها
نجاه / طب انت ذنبك ايه
عمران / انا يعنى كامل ما كل واحد فينا فيه العبر و الحمد لله مهره جمالها و أخلاقها و دينها و برائتها كفيله انها تخليني اخد القرار ده و انا مرتاح
نجاه / ناقشته مع اهلك ؟ عمى مختار مثلا ؟
عمران / انا خدت القرار و بلغته و سكت يبقي تمام
نجاه / عروسه هتتكسف يعني ما يمكن بيفكر
عمران يلوى شفايفه ما اعرفش نجاه تبص الناحيه التانيه و ترجع تبص له بنفاذ صبر
.......................
فى شقه مختار
جابر / يعني انا فى الاخر اللى طلعت الغلطان
عباده/ قولتلك تعمل حاجه تعملها من سكات
جابر / هى شنطه هشيلها و ارزعها فى العربيه و اجى دى نجاه ... يعني ليها دماغ و بتقول اه و لا و حاضر و ما حاضرش و بعدين كل حاجه حصلت ورا بعض هعمل ايه يعني
عباده / تعمل اللى قولت عليه
جابر / ازاى ... اعملها ازاى
عباده / ايه يعني حته بت هتمشي كلامها على الرجاله و لا ايه
جابر / دا لما تبقي اى بت انما دى نجاه ... بنتك ... ربايتك يا كبير ... ليها صوت و كلمه و راى و شخصيه
عباده / معاك حق ... بنتى ... و ربايتي ... و دلعى ... غلطت و جيت اهو أصلح غلطى
جابر / مش وقته
عباده / امال امتى بقي وقته ده بقي ان شاء الله
جابر / لما الدنيا تهدى
عباده / من يوم ما وعيت انت على الدنيا دى امتى هديت فكرنى كدا عشان مش فاكر
جابر / هتهدى باذن الله... هتهدى ... لما مهره تقوم بالسلامه و تشد حيلها هناخدهم الاتنين و نرجع بيهم البلد بلا تعليم بلا قرف بناقصها ام السنه دى و لا حتى ام الشهاده دى خالص
عباده/ و انت بقي عامل حسابك انه من هنا لحد ما مهره تقوم بالسلامه مش هيلاقي مليون حجه يحشر نفسه بيها وسطينا
جابر / لقي و نفذ و خالى كتر الف خيره مشكورا اشرف على مجهوداته الفذه
عباده / و ادى خالك كمان اللى ما اعرفش ماله خاب كدا ليه على كبر ... اقسم بالله فى عمرى ما شوفت كميه القرف ده قبل كدا عمرى ما عشت فتره زى دى
جابر / هتعدى زى ما غيرها عدى
عباده / و هتاخد معاها مين فينا يا جابر و هى بتعدى و لا انت فاكرها بتعدى بايدها فاضيه
جابر / ان شاء الله خير و اللى كاتبه ربنا هيكون و باذن الله كل اللى كاتبه ربنا لينا خير
تليفون جابر يرن
جابر / خالى
عباده / رد عليه و قوله انى هنا
جابر يهز راسه و يرد
................
فى المستشفي
قدام اوضه مهره
مختار / طلع على البيت عشان يمنع عباده يجي على هنا و يهديه
جوزيف / كان سابه
مختار / اتلم
جوزيف / اكتر من كدا !!
عمران / و بعدين يا جماعه احنا هنسيب النيله دى و نقعد نهزر
جوزيف / انا روحت له لحد عنده اقوله ان مش امايا بس اللى المجلس بعتها او يمكن فى حد غيركوا يهموا ان خطه المجلس تبوظ حتى لو على حساب حياتنا كلنا و اولنا نجاه ما فكرش حتى يسمع
عمران / فعملت ايه انت بقي اتحديته
جوزيف/ بجد !! انت شكلك بتنسي ... انا لو كنت بتحداكوا كان زمانكوا بتغنوا ظلموه ... و انت عارف كويس انا اقدر اعمل ايه
مختار / امال عملت ايه يا يونس لما وقفت قدام الكاميره و اختفيت من السيستم و عملت ربكه فى الشركه
جوزيف / انا لفت انتباهكم لنقط الضعف فى السيستم سواء بتاع المستشفي او بتاع الشركه ...فى سيستم المستشفي كل حاجه متوصله ببعض بمجرد ما بتدخل بتقدر تتحكم فى الكاميرات و دى عباده بنفسه شافها دا اولا ثانيا بتقدر تغير و تلعب فى مواعيد الادويه و تنقل العيانين و تحركهم جوه المستشفي للمكان اللى انت عاوزه ... كل ده بمجرد كليك
مختار / مش اى حد يقدر يدخل سيستم المستشفي
جوزيف / كل دكتور معاه اكسيس... كام دكتور منهم تضمنه بنسبه ميه فى الميه
مختار/ دياب ماكد لى ان كل اكسيس منهم له إمكانيات محدوده على حسب مهام وظيفته حتى التمريض
جوزيف/ بس من الاكسيس البسيط ده اقدر احط فيروس بسيط برده يعمل كام جليتش فمدير المستشفي يدخل بالاكسيس بتاعه و ساعتها بقي هبقي انا مستنيه جوه و ادخل معاه ... دا طبعا الكلام الطبيعي لواحد غيرى... انا بقي مش بحتاج حتى اكسيس... تفتكر فى كام واحد فى العالم ده زيي ... اكيد مش انا الوحيد اللى عندى القدرات دى
مختار يبص لعمران و يهز راسه
جوزيف/ تمام الشركه امانها عالى جدا لأن شغال عليها فوق العشرين مهندس دا غير الناس و البرامج اللى بتجيبوهم من بره ... بعترف شغل جبار ما يطلعش غير من محترفين عارفين بيعملوا ايه بالظبط و تعبانين فيه ... بس المستشفي مش كدا
عمران / ما هى مستشفي مش سجن حربى
جوزيف / مش مكان استراتيجي خطير يعني
عمران يبص لمختار بيبص فى الارض و يفكر
جوزيف / انا بحاول اساعد على فكره ... بالعقل كدا بعد كل اللى عشناه سوا ... لو عاوز ليكوا أذى ايه اللى فى ايدى اعمله و هتخسروا قد ايه ... و بهدوء كدا ... انا حوشت عنكوا قد ايه ... هو انا لازم اموت عشان تعرفوا قيمتى يعني
مختار / يا ابنى انت فعلا مستفز
جوزيف / صاحبك على عيبه يعنى هعمل ايه انا كدا
عمران / تقدر بقي ان الناس اصلا تعبانه و مش قادره لك و كل واحد فيه االى مكفيه و برده تاريخك الحلو مش شويه و ان الناس دى تثق فيك
جوزيف / انا مش عاوزهم يثقوا فيا مش عاوز حد يثق فيا بس مش تنطوا فى البير عند لمجرد انى بحذركوا منه مش للدرجادى الغباء يعني
عمران و مختار يبصوا لبعض تليفون جوزيف يرن يرد يرد
جوزيف/ الو ... بجد !! حلو اوى ... لا ما تعملش حاجه لحد ما اكلمك ... سلام
جوزيف يقفل
جوزيف / واحد من الحلوين اعترف
مختار / متاكد ؟
جوزيف / اؤمر يعني عاوز ايه
مختار / ما يمكن اعترف عشان يوقف التعذيب مش اكتر
جوزيف / تمام ... مش هو و طلع واحد تانى هتفرق فى ايه... انت اصلا ناوى تعمل ايه فى الباقيين ... اكرم ... هتعمل ايه
مختار / هسيبهم
جوزيف يضحك باستهزاء و يبص لعمران
جوزيف / هيسيبهم عشان يروحوا يبلغوا عنه او على الاقل هيسكتوا و بعدين يعملوا كدا فى حد تانى
مختار/ يمكن يتوبوا و يتعلموا من الدرس
جوزيف / يمكن ... طب اللى اعترف هتعمل فيه ايه
مختار / هتك العرض عقوبته الإعدام معروفه عشان كدا بقولك نتأكد
جوزيف / اعترف ... اعمل ايه يعني
مختار يهز راسه
نجاه تفتح باب الاوضه تلاقيهم واقفين
نجاه / خير فى حاجه و لا ايه
مختار / انتى محتاجه حاجه ؟
نجاه / غيار ... ليا و ليها
مختار / تمام تعالى اخدك البيت تجيبي اللى تحتاجيه... هسيب مهره امانه فى رقبتكوا انتوا الاتنين ... و مش هقبل اى عزر
عمران يهز راسه نجاه و مختار يمشوا
جوزيف / هاه ... الخطوه الجايه ايه ... خلصت على كدا ؟
عمران/ ينفع برده ؟! بس اللى هيحصل ده لازم يحصل بعيد عننا و عن عين ابويا قبل اى حد
جوزيف يبتسم و هو بيهز راسه موافق
............................
فى الشركه عند على
على / هو عيل صغير يا كارمن و بعدين انا مش فاهم اصلا انتى سايبه عيلته و معارفه و عيلتك و معارفك و جيالى انا و تقولى الكلام ده
كارمن/ على انا عارفه كل حاجه
على / عارفه ايه بالظبط بقي ان شاء الله
كارمن / ان كان فى حاجه بينكوا مش مظبوطه و متاكده ان الحاجه دى بخصوص بنتك
على / بنتك ... بنتك يا هانم و بعدين ايه فى الدنيا ممكن يكون مش مظبوط بالنسبه لبنتك غير اننا بنحاول نصلح نتيجه اهمالك و فشلك كام
كارمن / و انت ما شاء الله عليك احسن اب فى الدنيا
على / و بعدين انا مش فاهم انتى اصلا بتتكلمى معايا عن اكرم بصفتك ايه هو مش طلقك
كارمن/ براحتك مش عاوز تتكلم معايا براحتك كدا كدا هتتكلم بس المره دى هيبقي مع اهله و معارفه و انت عارف كويس ان اكرم مش لقمه طريه
على / و الله مش هلومه لو كان طفش منك و راح فى اى مكان بعيد عنك و عن قرفك مش عارف انهى شيطان ابن جزمه ده اللى وحلنى مع واحده زيك
كارمن / بقول نفس الكلام كل يوم عنك ما تقلقش
كارمن تروح ناحيه الباب على يتف على الارض كارمن تفتح الباب و تطلع يشوف ايلين جايه بتجرى بتعيط يتنفض يجرى عليها
على / ايلى ايلى حبيبه بابا مالك
ايلين / انت ما ينفعش تسكت على الحيوان لؤى ده
على / طب تعالى بس نتكلم جوه تعالى
على يدخل مع ايلين و يقفلوا الباب
ايلين / الواطى بقاله فتره بيتهرب منى و كل ما اسأل عليه مش موجود سافر شغل باباه بعته مش عارف فين لحد ما حطيت الموضوع فى دماغى و عرفت انه فى الساحل الخاين الحقير
على / بيخونك ... انا حالا هكلم ابوه و افضها سيره الحكايه دى هو فاكر بنات الناس لعبه و لا ايه
ايلين / يا ريته خانى يا ريته ... دا بيتهمنى فى شرفى و انى اتجوزت عرفى و ان الشراكه اللى بين حضرتك و والده كانت عشان تستر عليا
على / ايه الكلام الفاضي ده
ايلين / و الله يا بابا قعدت احلف له ان الكلام ده كدب قالى ان اهله ضاغطين عليه يكمل بس هو مش قابلها على نفسه و ان الكليه كلها ما لهاش كلام غير سيرتى
على / انا هوديه فى ستين داهيه هبلغ البوليس و هرفع عليه قضيه تشهير و اطلب تعويض يقطم ضهره و ضهر ابوه اللى ما عرفش يربيه ده هو فاكرك جايه من الشارع و لا ايه و الله ما هعديهاله اقعدى يا قلبي انتى بس و اهدى و انا حالا هكلم ابوه و امسح بكرامته الارض
.........................
فى شقه عباده
عباده / انا قولتلك لو لسانك خاطب الجدع ده يا نجاه و لا عينك جت فى عينه حتى لا انتى بنتى و لا اعرفك ... حصل و لا لا
مختار / هو احنا ما ينفعش ننقى وقت تانى للكلام ده
عباده / هتحكم عليا اكلم بنتى امتى يعني و لا ايه
مختار / ما ليش حكم لا عليك و لا على بنتك بس بكلمك كاخ يعني لو لسه دى مكانتى عندك
عباده / بطل هبل و شغل ملاوعه انت حد كلمك ... بس دى غير دى ..  بنتى وجعتني
نجاه / اكيد ما اقصدش
عباده / قاصده و مكمله
مختار/ يا عباده الظروف حكمت
عباده / انتى كنتى عارفه انه على السطح يا نجاه ؟
نجاه / اقسم بالله ما كنت اعرف
عباده / نجاه
نجاه / بحلف بالله يابا يعني هخاف من حضرتك و مش هخاف من ربنا اقسم بالله اتفاجئت بيه
عباده / و ما صرختيش لما شوفتيه ليه ما نزلتيش تجرى ليه وقفتى بين الرجاله و بينه ليه
نجاه / عشان جاى يساعد
عباده / يغور اللى هيجي من وشه
نجاه / هو ما عملش حاجه لكل ده
عباده / عمل كل حاجه و اسوء حاجه فاضل ايه اصلا يعمله عشان تفهمى قد ايه الانسان ده ... انتى بجد بتسالي انتى بجد مش شايفه وجعى انتى بجد ... لا حول و لا قوه الا بالله
نجاه / ما عملش اى حاجه عدله يعني تشفعله فى القديم
عباده يبص لنجاه بحزن
نجاه / انا ما عنديش فى الدنيا اغلى من حضرتك ما اقدرش اشوفك بتعمل ذنب و اطاوعك
عباده يرفع حاجبه
نجاه / ما تقفلش باب التوبه فى وش حد ما تقولش لحد ان ما فيش فايده و ان تغيره زى عدمه ما تساعدش الشيطان انه يرجعه للكفر تانى
عباده / دا اختياره
نجاه / احنا اللى قفلنا الأبواب فى وشه
عباده/ و هو مفيش غير بابى انا يعنى مفيش غير بنتى اللى هتهديه مفيش غير كرامته و هيبتي وسط الناس
نجاه / ما عاش و لا كان اللى يجي جنبك
عباده/ عايش و بنتى واقفه قصادى بتدافع عنه ... انا عشت عمرى كله ضهرى مفرود و عيني مرفوعه ما كسرنيش الا الجدع ده ما وقعنيش غيره
نجاه / اتغير
عباده / مش مسامح... مش قادر اسامح مش قادر انسى
مختار / ما تنساش
عباده يبص لمختار
مختار / و ما تسامحش و سبها لربنا يحكم بينكوا فى الاخره و اللى له حق عند التانى هياخده
عباده يرفع حاجبه باستهزاء
مختار / ليك حق عنده دلوقت ما تضيعوش و تروح هناك تلاقى ان صاحب الحق بقي هو المحقوق يا عباده
عباده / يا بخت من بات مظلوم و لا باتش ظالم يعني
مختار / مش قادر تعفو ما تظلمش احتسب صبرك و وجعك عند ربنا
عباده / هتجازف بيا و بيها يا مختار
مختار / افديكوا بعمرى و عيالي و انت قبل الكل عارف ده
عباده يبص لنجاه بتعيط فى صمت
عباده/ تقوم بالسلامه و هنرجع البلد مهره عاوزه تيجي معانا على راسنا عاوزه تفضل هنا مع عمران فى حريم فى البيت كتير يقدروا يحلوا محلك و دا آخر كلام عندى
نجاه تهز راسها موافقه عباده يشاور لها براسه على الاوضه تجرى تفتح الباب و تدخل مختار يروح يفتح باب اوضه جابر يلاقيه قاعد حاطت السماعات فى ودانه يخبط على الباب جابر ما ينتبهش مختار يروح يقعد قدامه جابر يشوفه يقلع السماعات و يبص له
مختار / قافل على نفسك ليه ؟ بتسمع ايه وريني
مختار يحط السماعه على ودنه يبتسم و يشيلها و جابر ساكت
مختار / انت زعلان منى صح ؟!
جابر يلف بعينه فى الاوضه و بعدين يتنهد و يهز راسه اه مختار يبتسم
مختار / انا ما قولتلوش يعمل كدا و اصلا مش موافق على تصرفه بس
جابر / انا مش فارق معايا
مختار/ امال انت زعلان ليه طيب
جابر / بدلع
جابر يضحك بحزن
جابر / هرمونات
مختار / انا بتكلم جد على فكره
جابر / اتكلم
مختار / هو ايه اللى اتكلم ما تتكلم عدل يا جابر مالك
جابر / اتكلم لما يبقي فى حد بيسمع انما غير كدا حرق جاز على الفاضي كدا كدا حضرتك ما بتسمعش
مختار يبص فى الارض و يكتم جواه و يبتسم و يبص لجابر
مختار / هسمع ... اتكلم قول اللى انت عاوزه
جابر / الجدع ده مش هيجي من وراه خير
مختار/ و بعدين ؟
جابر / خلصت
مختار / دا راى شخصي يعني و لا فى دلايل فى ايدك و مؤشرات على الموضوع ده
جابر يبتسم
مختار / عرفت منين ؟ انت تعرف الخير فين اصلا ؟ مش يمكن الجدع ده نهايته تبقي احسن مننا كلنا
جابر / تمام
مختار / هو ايه اللى تمام ؟! ما تعصبنيش بقي يا جابر هو يا امشي على هواكم من غير اقتناع يا ابقي انا الوحش فى الاخر
جابر يبص لمختار و يسكت
مختار / براحتك بس افتكر انا جيت لحد عندك اتكلم معاك اهو و انت اللى ... يا ابنى انا بحبك و عمرى ما فرقت بينك و بين عيالي و ربنا العالم
جابر / و انا ما انكرتش ده حضرتك عمرك ما كنت بالنسبالى مجرد خال حضرتك ليك فيا اكتر من اى حد تانى بس
مختار / ما بسش انا عمرى ما هعمل حاجه ائذيك بيها و لا انت و لا اى حد فيكوا
جابر / عارف بس حضرتك عاطفى زياده عن اللزوم مش بتحكم عقلك... ما عدتش بتحكم عقلك زى زمان
مختار / عجزت يعني ؟!
جابر / استغفر الله
عباده يدخل
جابر / جوزيف ...  امايا... حضرتك لسه مقتنع ان حتى البنت دى لسه فيها خير
مختار يبص لعباده
مختار / انت كمان شايف كدا
عباده يهز راسه ايوه
مختار / ايه خرفت يعني ما عادش ليا نظره فى الناس هو مش رشيد نفسه كلكوا بما فيكوا ناصر الله يرحمه كنتوا شايفينه نجس و زى الزفت ربنا عمل معاه ايه عرفتوا الغيب يعني ربنا عينكوا على باب الجنه و اداكوا كشف بالاسامي مثلا
عباده / استغفر الله بس جوزيف مش رشيد جوزيف راضع منهم هم
مختار/ بس دمه مننا احنا
جابر / العجينه بايظه يا خال
مختار / يا سيدي اعمل اللى ربنا يقدرك عليه انت هتتحاسب قدام ربنا عن نفسك بس اعمل اللى عليك انت و خلاص
عباده / و التمن ؟
مختار / تمن ايه ؟! هو طلب منك حاجه ؟!
عباده/ و لا حاجه
نجاه تدخل
نجاه / انا جاهزه
مختار / الحوار ده لسه ما خلصش هنكمل كلامنا بعدين ... يلا يا بنتى
عباده / نجاه
نجاه تبص لعباده و الكل مستنى و عباده ساكت
عباده / استودعتك الله اللذي لا تضيع ودائعه
نجاه تبتسم و تمشي و مختار وراها عباده يبص على جابر
عباده / مش هتروح معاهم
جابر / لا
نجاه ترجع
نجاه / هو انت مش جاى
عباده يبص لجابر جابر يتنهد و يقوم يروح معاها عباده يفرد ضهره على السرير
عباده / اهم حاجه ... الثبات على المبدا
..........................
فى اوضه مهره
مهره قاعده بتعيط على السرير فى الضلمه تشيل الغطا و تنزل تروح تفتح الشباك و تبص منه و تقرر تنط
جوزيف / بتنيلى ايه
مهره تتفزع تبص وراها تلاقيه واقف فى ركن فى الضلمه يتحرك خطوه قدام يبان
جوزيف / كنت متأكد انك هتختارى الحل السهل ... تقتلى نفسك و تريحي كل اللى حواليكي
مهره بتبص له برعب
جوزيف / انا مش جاى ائذيكي بالعكس انا جاى اساعدك ... لو عاوزه تنطى نطى بس مش من هنا احتمال انك تموتى مش كبير اوى ممكن تطلعى دورين تلاته كمان و تحاولى بس ساعتها حقك هيروح هدر اللى عملوا فيكى كدا هيعملوا كدا تانى فى واحده تانيه انتى الوحيده الخسرانه ... هو مش انتى مسلمه برده هو مش الانتحار حرام برده ؟
مهره الدموع تنزل من عنيها و تبص فى الارض
جوزيف / انا عرفت مين اللى عمل فيكي كدا تحبى تاخدى حقك بايدك ؟
مهره تبص له جوزيف يطلع حبايتين من جيبه
جوزيف / الدوا ده هيساعدك ... مش هيعوض اللى فات بس هينقذ اللى جاى
مهره تبص له
جوزيف / حبوب إجهاض
مهره تجرى تاخدها و تبلعها يناولها مايه تاخدها تقربع
جوزيف / خفى بسرعه عشان تاخدى حقك بايدك من كل اللى دمروكى
مهره ترمى نفسها على أقرب كرسي و تعيط
جوزيف / انا هطلع بره و اسيبك ترتاحى لحد ما الدوا يشتغل من فضلك ما تعمليش اى حركه غبيه ما لهاش لازمه
جوزيف يبص على مهره منهاره يتنهد و يطلع بره عمران قاعد على كرسي يشوفه يقف
عمران / انت كنت جوه بتعمل ايه و دخلت امتى و ازاى
جوزيف / و انت ما استغربتش انى اختفيت يعني و لا ما صدقت ما تقلقش مش هاكلها يعني
عمران / انت فاكر كل الناس بارده زيك ما تختبرش صبرى عشان انا بالذات هزعلك
جوزيف يبتسم باستهزاء و يروح يقعد عمران يكتم جواه و يدخل يلاقي مهره قاعده بتعيط يجرى عليها و يقعد على ركبته قدامها
عمران / مهره ... مهره مالك انتى كويسه ؟! عمل لك حاجه ؟ عمل لك ايه ؟ ... مهره ردى عليا ايه اللى حصل ؟ و الله لوريك يا ابن ال
عمران يجي يقوم مهره تمسك ايده يبص لها تهز راسها لا عمران يبص لها باين عليها التعب ينزل ليها تانى
عمران / مهره انتى كويسه ؟ مالك
مهره تمسك بطنها بأيد و تضغط على ايد عمران بالأيد التانيه
عمران / مهره مالك ... انا هنادي حد يجي يلحقك
عمران يجي يقوم مهره تمسك فى ايده و تقوم و هى بتحاول تمنعه تقع و هى ماسكه بطنها عمران يتخض و يتشل و ما يبقاش عارف يتصرف
......................
فى البلد
شاهين يركن العربيه قدام بيت و يدخل يطلع السلم اول دور يضرب الجرس راجل يفتح
الراجل / شاهين بيه ؟! خير
شاهين يدخل الراجل يبص يمين و شمال ان كان فى حد ورا شاهين و لا لا و يقفل الباب
الراجل/ اؤمر خير ما حدش قالى ان فى حد جاى النهرده
شاهين / فين البنات اللى هنا
الراجل / فى اوضه الحجز تحت
شاهين يروح يفتح اوضه و يروح يحرك شمعدان على الحيطه و يزق الحيطه تتحرك معاه و تظهر اوضه سريه يدخل و الراجل وراه
الراجل / طب فهمنى طيب يمكن اقدر اساعدك
شاهين / انا هبدا استجوبهم بنفسي... و دلوقت.. كفايا دلع بقي لحد كدا كل واحده من دول اكله شاربه نايمه خدمه خمس نجوم يا نطلع منها بحاجه يا قلتها احسن
الراجل / دول حريم يا سي شاهين و بعدين سي مختار منبه عليا ما افتحش الباب ابدا دا الاكل بيدخل بمواعيد و تحت حراسه و مفيش غيرى انا و انت هنا
شاهين / افتح الباب دخلنى و اقفل ورايا و انا هعرف اتعامل
الراجل / لوحدك !!
شاهين / ما تقلقش انا جاى جاهز
الراجل / يا سي شاهين ما تودينيش فى داهيه ابوس رجلك الحريم دول لو عملوا فيك حاجه و لا هربوا و لا حتى فطسوا فى ايدك الكبير هيعلقنى
شاهين / افتح الباب و اعمل اللى قولت لك عليه
الراجل / يا سي شاهين
شاهين / ما لكش دعوه افتح
الراجل يتنهد و يروح يشيل سجاده و يروح يجيب اتنين ساكشن كوب و يضغط بيهم على سراميكه كبيره و يرفع السراميكه تتشال و يبان تحتها باب حديد بمفتاح الراجل يحط المفتاح و يبص لشاهين
الراجل / انا بيبقي واقف معايا عشر رجاله بالسلاح و انا بنزل ليهم الاكل احنا بطولنا
شاهين / هتخيب و لا ايه مش هنقدر على شويه حريم و لا ايه
الراجل / الكتره تغلب الشجاعه و دول على قد علمى محترفين دا غير ان حياتهم مهمه
شاهين / افتح و نزلنى و اقفل ورايا و لو مت حتى ما لكش فيه
الراجل/ طب اتصل بسي مغاورى
شاهين / هتفتح و لا لا ضيقت خلقى
الراجل يلف المفتاح و يفتح الباب شاهين يرمى قنبله غاز و يقفل و يبص فى الساعه
الراجل / انت عملت ايه
.........................