الكبيره ٢ بقلم / لولو_محمد

الحلقه ١٠٤

((((((( الكبيره ٢)))))))
#لولو_محمد
الحلقه ١٠٤
بياتريس/ مالك قاعده كدا ليه؟
صوفيا / مفيش
بياتريس/ لا فى هو انا مش عرفاكى ... دا زمان واخد جنب و خايف من اللى عقلك بيوزك تعمليه دلوقت
صوفيا / ما تفوقيش عليا تمام
بياتريس / يا مامى ... براحتك
صوفيا تبص الناحيه التانيه عمران يدخل صوفيا تفرح جدا و تقوم تقابله بحماس
صوفيا / انت رجعت
عمران / الاكل وصل ؟ ناقصكوا اى حاجه
صوفيا / لا احنا تمام اوى ... بصراحه فكرت انك مش هترجع ... اصلى شوفتك ماشي مع مهره
عمران / اه وصلتها و جيت اشوف لو ناقصكوا اى حاجه
صوفيا / ما عادش ناقصنا خلاص
عمران / طب الحمد لله ... بصي انا تليفونى مش معايا بس انا جبت رقم تاني لو احتاجتى حاجه كلميني عليه تمام
صوفيا تتحمس و تطلع موبايلها و عمران يكتب ليها الرقم
عمران / انا هروح عشان والدتى هتيجي من السفر يعني ارتب البيت اشوف لو ناقص حاجه اجيبها و كدا
صوفيا/ تحب اساعدك
عمران/ لا مفيش داعى هو كدا كدا البيت فيه ناس بس يعني زى ما بتقولوا كدا بشيك على الدنيا بتاكد انها سالكه يعني و مفيش اى مشاكل
صوفيا / هو انا هقابل مامتك صح
………………………..
عمران / اكيد دى جايه مخصوص عشان تطمن على طنط مامتك
صوفيا/ مامى هتفرح اوى لما تقابلها ... و انا كمان متحمسه اوى بجد
عمران / باذن الله  .. تمام لو احتجتى اى حاجه فى اى وقت كلميني الرقم معاكى
صوفيا / اكيد
عمران / كان فى حاجه عاوزه تكلميني فيها مش كدا
صوفيا/ مش وقته مش وقته هنروح من بعض فين
عمران / تمام الرقم معاكى ... استأذن انا بقي
صوفيا تهز راسها و الموبايل فى ايديها عمران يبتسم و يمشي صوفيا تجرى على الاوضه
كارمن / الله ما هى بتضحك اهى امال قلقتيني عليها ليه
بياتريس / ما اعرفش بس هو واضح ان فى حاجه حصلت
صوفيا / هى لسه ما حصلتش بس اكيد هتحصل ... المهم... تزعلى لو سبتك شويه و روحت مشوار بسرعه و رجعت
بياتريس / على فين كدا
صوفيا / بكلم ماما على فكره
بياتريس / بقي كدا
كارمن / روحى يا حبيبتي ما تعطليش نفسك عشانى
صوفيا تبوس كارمن و تجرى و هى فى منتهى الحماس
بياتريس / يا ترى ايه اللى حصل
......................
قدام المركز
مهره خارجه و فى ايدها موبايل عمران تتصل بحد تلاقي عربيه دخلت و نزل منها شاب
حسنى / السلام عليكم ... حضرتك الاستاذه مهره مش كدا انا حسنى بعتنى الباشمهندس عمران اوصل حضرتك البيت بعد ما تخلصى هنا
مهره باصه فى الارض و متوتره
حسنى / هو جاب خط جديد و ده رقمه لو حضرتك تحبى تكلميه تطمني او تستفهمى منه على حاجه هو قالى اطلبه فيديو كول ... و قالى لو حضرتك محتاجه اى حاجه او تروحى اى مكان قبل ما تروحى انا معاكى و لو محتاجه تشترى اى حاجه اى فلوس اى طلبات اى خدمات انا تحت امرك
مهره تاخد منه الموبايل و تدوس على اتصال عمران يرد سايق
عمران / خلصتى
مهره تهز راسها
عمران / طب هم مستنينا فى البيت عندنا و عاملين حسابك فى الاكل هتيجي و لا وراكى خطط تانيه ؟
مهره ساكته
عمران / انا ما اكلتش على فكره و رايح على هناك اهو هستناكى ناكل سوا تمام؟
مهره تهز راسها اه
عمران/ حسنى هيوصلك ما تقلقيش انا مستنيكى
مهره تبتسم حسنى يفتح الباب تركب يقفله و يروح يركب و يسوق
……………………….
فى شقه جوزيف
جوزيف واقف فى البلكونه و بيفكر
جوزيف / انا بعمل ايه هنا !!!
جوزيف يبص على الشارع و يدخل يروح يجيب شنطته و يحط فيها اللاب و يروح يفتح الباب يتنهد و يحط الشنطه على أقرب كرسي و ينزل يمشي فى الشارع حد ينزل من عربيه يمشي وراه جوزيف يلف الراجل يعمل نفسه بيعمل اى حاجه
جوزيف / بتعمل ايه !! بتعمل ايه بجد !! لا حقيقى بتعمل ايه !!! وديني الملعب
جوزيف يروح يركب العربيه و الراجل مستغرب يروح يركب و يبص للى سايق مستغربين
جوزيف / يا حبيبي اطلع على الملعب ما انت كدا كدا كنت هتمشي المشوار كله ورايا اخلص
الراجل يسوق فى صمت
جوزيف / المهم انى لما بكلمهم بيقولوا ان انتوا عشان أمانى و مصلحتى ... دا انتوا ما شاء الله ... احنا بنروح فى داهيه على فكره
السواق / هو فى ايه ؟
جوزيف / ما فيش حاجه يا حبيبي سوق و انت ساكت خلي اليوم يعدي على خير
السواق يبص للى جنبه يهز له راسه بالراحه يتنهد و يكمل سواقه
.....................
فى شقه عمران
نجاه و هند ياخدوا مهره فى حضنهم
هند / على فكره انا قولت لعمك انى هفضل هنا لحد ما نرجع كلنا سوا مع بعض قريب بإذن الله
مهره تبتسم
نجاه / عامله ايه طمنيني عليكي وشك مش مظبوط خالص
عمران/ هى بس ما نامتش من امبارح
هند / حقك يا ضنايا.. طمنيني مامتك عامله ايه دلوقت
عمران / احسن الحمد لله انا متابعها بنفسي
هند / ناكل لقمه و نريح شويه و نروح كلنا نطمن عليها سوا
مهره تبص فى الارض و تهز راسها
نجاه/ اتصلت عليكي تليفونك غير متاح
مهره تشاور انه اتكسر
عمران / سهله انا اساسا لسه جايب واحد اهو هنقل بس منه الخط و ننزل نطلع لك شريحه تانيه لو القديمه مش عندك حوار خمس دقايق
هند / ايه قله الزوق دى و تاخد هى موبايل على زوقك ليه ما اللى يخليها تنزل تطلع شريحه يخليها تنقى احلى و اجدد تليفون
عمران / ما اختلفناش عادى اللى يعجبها
مهره تبتسم نص ابتسامه
نجاه / مش عاوزه اصدمك و اقولك انى اكيد لا هسيبك تنامى و لا ترتاحى عندى كميه رغى متخزنه مش هتستوعبيها
مهره تضحك
هند / مش عاوزه اقولك البت دى عامله ازاى من غيرك بوزها شبرين دا انا ما صدقت انا ايه !! السرايا كلها خديها وديها لمهره خلينا نخلص من نكدها
نجاه / حقى على فكره
مهره تمسك ايد نجاه
هند / طب كفايا رغى بقي و ناكل لقمه عشان هموت من الجوع
الكل يروح يقعد حوالين سفره الباب يخبط
عمران / انا هفتح
عمران يفتح يلاقى صوفيا على الباب عامله شعرها و فى ايدها شنطه هدايا يستغرب
صوفيا / انا جبت دى لطنط قولت اعديها عليها قبل ما اروح
هند / مين يا عمران
عمران يفتح الباب صوفيا تشوف مهره تضايق و تلم نفسها
صوفيا / انتى هنا انا افتكرتك روحتى
عمران / انسه صوفيا اخت مهره الصغيره
هند / اهلا يا حبيبتي تعالى اتفضلى حماتك بتحبك
صوفيا / ميرسي و الله لسه واكله مش جعانه انا جيت بس اسلم على حضرتك و امشي على طول
هند / لا تمشي ايه اقعدى تعالى كلى لقمه جابرى الزاد حتى
صوفيا تضحك و تقعد و عمران يقفل الباب و يروح يجيب طبق و معلقه يديهم لهند تغرف لمهره و يقعد مكانه
صوفيا / يعني ايه ؟!
نجاه / يعنى اجبرى بخاطر الاكل و دوقى و ما تزعليهوش منك
صوفيا / اه ... اوك فهمت... انا صوفيا
نجاه / نجاه بنت عم عمران
صوفيا / اه ... اهلا و سهلا... ما شوفتكيش لما كنت عندكوا فى البلد مش انتى من البلد برده ... كفايا اوى كدا انا مش هقدر اكل كل ده اصلا
هند / كلى اللى تقدرى عليه يا قلبي الف هنا
صوفيا / ميرسي
صوفيا تبص لنجاه
نجاه / اه من البلد و جيت مع عمتى عشان اطمن على مهره
صوفيا/ اااه افتكرت انتى نجاه اللى كانت فى البطوله و اتخطفت صح كدا
نجاه تهز راسها
صوفيا / ايوه ايوه بابى كان حكالى عنك برده بس ما كنتش شوفتك معلش
نجاه / و ادينا اتقابلنا اهو
صوفيا / فرصه سعيده اوى
هند / احنا اسعد يا قلبي
صوفيا / انا قولت انك روحتى لما مشيتي من المستشفي فجاه و ما رجعتيش
عمران/ مهره راحت كورس تعلم لغه الإشاره
صوفيا / بجد !! حلو ده اهو على الاقل نعرف نفهمها
نجاه / ما هو ده معناه ان كلنا لازم نتعلم لغه الإشاره عشان نفهمها
صوفيا/ اه صح !
عمران/ على فكره الموضوع سهل جدا محتاج بس تمرين و استمرارية لغه زى اى لغه
نجاه / عمران اول واحد بدا الموضوع حتى قبل مهره ... بس انا بقي متاكده ان مهره هترجع تتكلم تانى ... مش كدا يا مهره
مهره تبتسم
صوفيا / اكيد
هند / ماما عامله ايه يا حبيبتي
صوفيا / كويسه الحمد لله احسن كتير فى المستشفي بيقولوا انها ممكن تروح بالليل بس باتى بتقول نصبر شويه نطمن عليها اكتر
هند / و ماله فى الحالتين خير ... انا قاعده هنا شويه لو احتاجتى اى حاجه كلميني فى اى وقت اجيلك على طول
صوفيا / دا يسعدني و اكيد برده حتى لو ما احتاجتش ممكن نتقابل و نتعرف على بعض اكتر و كدا
هند / و ماله
نجاه / اى حد من طرف مهره فى قلبنا على طول اصل انتى ما تعرفيش غلاوتها عندنا قد ايه خصوصا عمى مختار ابو عمران بيموت فيها موت كدا
هند و عمران يبصوا لنجاه
نجاه / كلنا بنحبها بس عمى مختار حاجه تانيه
صوفيا / هى تتحب اكيد... أنا أصلا قابلته عموا مختار ... شخصيه لذيذه اوى ... هو اللى جابنى البلد قبل كدا و هو اللى شرح لى سوء التفاهم اللى حصل و انا حكيت لماما بس هى شكلها انها لسه زعلانه من مهره شويه ... بس اكيد كل ده هيروح مع الوقت احنا فى الاخر اهل
هند / اكيد... و حسبي الله و نعم الوكيل فى اللى كان السبب
صوفيا / امين
نجاه تزود فى طبق مهره
نجاه / كلى يا قلبي دا انتى خسيتي خالص كلى مطرح ما يسرى يمرى
هند تبص لنجاه باستغراب تبص لعمران يعوج بقه مش عارف ترجع تبص لنجاه باصه على صوفيا
...........................
فى الملعب
الرجاله بتلعب مع بعض بعنف و جوزيف قاعد بيتابع باهتمام مختار و عباده يدخلوا الرجاله تنتبه
عباده / زى ما انتوا كملوا
جوزيف و عباده يبصوا لبعض و كل واحد يلف وشه الناحيه التانيه
مختار / عامل ايه
جوزيف / تمام الحمد لله زهقت قولت انزل اغير جو
عباده / و من كل الأماكن اخترت الملعب
مختار / يقصد انك لسه تعبان
جوزيف / ما شوفتوش الجبل
عباده/ انا هروح اتكلم مع الرجاله
مختار يهز راسه عباده يمشي مختار يقعد جنب جوزيف
مختار / وصلوا بالسلامه
جوزيف / عارف
مختار يبتسم
جوزيف / عملتوا ايه فى حوار الفرمونات
مختار / هيتحل باذن الله بس المشكله انهم زى الإعلانات لا هيزهقوا و لا فلوسهم هتخلص
جوزيف / كويس انك واخد بالك
مختار / فهنحاول من ناحيه تانيه نتكلم مع الناس و نوعيهم على الاقل يبقوا فاهمين اللى هم حاسين بيه
جوزيف يهز راسه
جوزيف/ المهم قبل اول الشهر
مختار / واخد بالى
جوزيف / نفوره بنات اجانب شبه عريانين هتضرب فى بلد جعانه ... اللى هيقع منهم مش هيتسمى عليه
مختار / منهم دى عايده على مين ؟
جوزيف/ اى دكر فى البلد اى كان سنه ... امايا بتتغذى على الحاجات دى حرفيا ... بتعيش تصطاد اى متحرش اى مغتصب اى واحد شهوته ممكن تسيطر عليه بتقتله
مختار / يعني ترش فرمون و تحط قدامه بنات عريانه و ترجع تلومه لما يفقد سيطرته على نفسه !!
جوزيف / life is unfair
( الحياه مش عادله )
مختار يتنهد
جوزيف / بنات البلد لابسين و مستغطين و كل حاجه و مع كدا فى تحرش و معاكسات فى كل حته ايه حجتهم بقي ... الكل فى النور ملايكه المهم اللى بيحصل فى الضلمه ... مين بيفتح موقع اباحى و مين بيعلق بنات الناس بيه و مين بيعمل علاقات حتى لو مش كامله ... انت يمكن ما تبقاش عارف الكلام ده ... طبيعي مش بلومك قدراتك محدوده ... لكن بالنسبه لامايا ده السبب الوحيد اللى عايشه عشانه تلم الأشكال دى و تخلص منها ... على أمل أن العالم ينضف
مختار/ مش انتقام يعني
جوزيف / جايز جدا اللى شافته ما كانش شويه ... بس صدقنى امايا من جواها لسه طفله هى مخبياها خايفه عليها من الدنيا الوحشه دى
مختار / حزين عليها جدا
جوزيف / اخبار ناصر ايه ؟
مختار / اشمعن
جوزيف/ دا سؤال مجازى ..  بحاول اللفت انتباهك ان دوره الفتره الجايه مش سهل خصوصا المواجهه اللى حصلت بينهم فى مصر ... اللى جاى أصعب و هو خفيف
مختار/ بيتهيألك
جوزيف/ انت اللى مش عارف عيالك
مختار / و لا انت تعرفهم ... ناصر مجروح لكن مش ضعيف و لا شهواني ... غلط زمان بس ما كابرش و اتحمل غلطه و ما كرروش و مش هيكرره
جوزيف / عارف بس لسه بيحبها و مع كدا رابط نور بيه
مختار يتنهد
جوزيف / الحب ده حاجه غريبه اوى ... مش منطقى
مختار يبتسم
جوزيف / انت سبته يبقي الكبير بسبب الحب
جوزيف يشاور على عباده بيتكلم مع الناس
جوزيف / كنت هتبقي احسن منه مليون مره
مختار / كانت هتبقي بنته هو برده
جوزيف يبص لمختار مختار يبص له
مختار / كان زمانك بتكرهنى انا مكانه لان على كلامك الكبير كان هو الهدف فى حوار تركيا و انت صغير لو ما كنتش ملخبط
جوزيف / ملخبط ... لان دا حوار قديم الجديد هو طريقه بصته و معاملته ليا ... تخيل تبقي قادر تجيب بوز واحد تحت رجلك بس مش قادر عشان خاطر بنته هتزعل منك ... منتهى القهر
مختار يضحك بصوت الكل يبص يكتمها
جوزيف / عارف شيطانى بيقولى ايه
مختار يبص له
جوزيف / ان ده مش مكانى و ان كلكوا بتستغلونى مش اكتر بتغسلوا لى دماغى بكلام فاضي و بتستغلوا احتياجى العاطفي
مختار / كلام غريب عليك جدا
جوزيف / انت من ناحيه و نجاه من ناحيه
مختار / كلنا عندنا نفس الشيطان على فكره بس بنستعيذ منه ... عباده مثلا مقتنع تمام القناعه انك لسه جوزيف و مكمل فى خطتك و هيصحى فى يوم يلاقى بنته بتصرخ انك خطفت منها ضناها و رجعت للمجلس و بتجبرها تخدم مصالحك
صمت
مختار / و له حق يحس بده زى ما لك كل الحق تحس باللى جواك
جوزيف يبص لمختار
مختار/ اصل الحاجه الوحيده اللى هتفصل فى الموضوع ده الايام عشان كدا ردى عليك نفس ردى عليه اصبر و شوف الايام هتعمل ايه ... ما فيش حد يقدر يمثل العمر كله
جوزيف / و انا هستناكوا العمر كله عشان تصدقونى
مختار/ و انت اصلا عارف عمرك باقى فيه قد ايه ؟
جوزيف / بالظبط و عشان كدا ما عنديش الوقت اللى انت بتلعب فيه ده
مختار / اللى خلاك انت كمان تصبر الوقت ده كله عشان تعمل المصيبه اللى احنا فيها ما يخليكش تصبر شويه كمان لحد ما تصلحها ... خد بالك ان كل ده ممكن يكون فرمونات اصلا
جوزيف / دا على اساس انى اكتشفت مشاعرى اول امبارح
مختار / قصدى انك مش قادر تصبر و عصبى و مشاعرك هى اللى مسيطره عليك شويه
جوزيف / انت كلمتها ؟
مختار / لمحت و قالت إن الجواز عموما مش فى دماغها دلوقت و ان ابوها مش هيوافق عليك
جوزيف / قولت لها انى بحبها ؟!!
مختار / لا طبعا و لا كان فى اى كلام دار بينا جبتها فى وسط الكلام كدا بتلميح بشوف ميتها هتقول ايه هتتصرف ازاى كدا يعني
جوزيف يهز راسه
مختار / اللى انت محتاجه دلوقت انك تكسب الراجل ده قبل اى حد
جوزيف يضحك باستهزاء
مختار / دا طريقك الوحيد ليها
جوزيف يقوم و يمشي مختار يتنهد
مختار/ ربنا يهديك
............................
فى شقه عمران
الكل قاعد بيشرب شاى و يضحكوا
صوفيا / يا نهار ابيض دا كان انت !!
عمران / ايوه كنت لسه جديد على مصر فكان أسهل طريق انى احفظ كل طرقها بسرعه و فى نفس الوقت اشتغل و اجيب مصروفى هى انى اكون دليفري
صوفيا / بس انتوا مش محتاجين تشتغلوا
نجاه / امال يقعد فى البيت جنب امه زى الولايا و لا ايه
صوفيا / ما اقصدش انا اقصد انك صغير المفروض بتشتغل لما بتتخرج
هند /  يعرف قيمه القرش و المسؤليه ازاى و هو متعود ياخد بس
صوفيا / عاجبنى الكونسبت ده اوى بجد
نجاه/ هقوم اشوف الكيك ... تعالى يا مهره ساعديني
نجاه و مهره يقوموا
نجاه / هى دى اختك بجد
مهره تهز راسها اه
نجاه / يعني مامتك بتعمل عمليه و هى سيباها و جايه هنا بالمكياج و الشعر ده كدا طبيعي
مهره تشاور لها تسكت
نجاه / انا مش مرتاحه لها
مهره تبص لنجاه بحزن
نجاه / انا عارفه انها اختك و ان ما ينفعش اتكلم عليها بس انا شامه ريحه مش عجبانى
مهره تبص على الفرن
نجاه / اكيد ما اقصدش كدا يعني  ... مهره هى بتعاملك كويس صح
مهره تهز راسها اه بقوه
نجاه / امال ايه الاحساس ده
مهره تدور على ورقه مفيش نجاه تطلع موبايلها مهره تكتب
مهره / اقول لك سر
نجاه / اكيد قولى طبعا
مهره / صوفيا معجبه بعمران
نجاه بصوت عالى
نجاه/ ايه الهبل ده
هند من بره/ فى حاجه يا نجاه
نجاه / لا لسه ما استوتش يا عمتى  .. عمران عارف حاجه عن الهبل ده
مهره تشاور لها تسكت
نجاه / ازاى يعني ما ينفعش طبعا
مهره تهز راسها ليه ؟
نجاه / ايه الهبل ده يا بنتى الناس كلها فاكره انكوا كنتوا متجوزين ازاى يعني طلقك عشان يتجوز اختك اكيد لا ما ينفعش
مهره تكتب
مهره / بس احنا ما اتجوزناش و هو من حقه انه
نجاه تحط ايدها على الشاشه مهره تبص لها
نجاه / و انتى مين قالك انه مش معجب بيكي انتى
مهره تكتب
مهره/ بطلى هبل
نجاه / ليه ؟
مهره تبص الناحيه التانيه و تسند على الرخامه نجاه تجبرها تبص لها
نجاه / ما تتكلمى عدل
مهره تكتب
مهره / غيرى الموضوع ما لناش دعوه بحد
نجاه / ماشي بس حتى لو ما فيش حاجه بينكوا هى مش مناسبه ليه
مهره / ده قراره هو مش قرارك
نجاه تلم نفسها و تهز راسها مهره تبص على الفرن و تجيب عود شيش و توارب الفرن و تنغز الكيك و تطفى الفرن و تقفل على الكيك جواه و تبص على نجاه متبعاها تسيبها و تطلع بره
هند / ايه الاخبار
نجاه / مهره طفت عليها هنزل اشوف حاجه تحت و اجى
هند / نجاه
نجاه / نازله لجابر و الله مش هطلع بره البيت و لا حاجه
هند / يا بنتى زمانه نايم أو بيريح من الطريق
عمران / محتاجه حاجه اقدر انا اعملهالك طيب
نجاه/ لا داخله اوضتى عن اذنكوا
نجاه تدخل اوضتها و تقفل الباب و تفتح الموبايل و ترن رنه بسيطه ثانيه و موبايلها يرن تفتح الباب
نجاه / صاحى نزلاله
نجاه تفتح الباب و تنزل و الكل مستغرب
هند / هقوم ابص على مهره
هند تدخل المطبخ تلاقى مهره واقفه فى جنب باصه فى الارض و الحزن ماليها تاخدها فى حضنها الدموع تنزل من عنين مهره
هند / قالت لك ايه البت دى زعلك اوى كدا
مهره تهز راسها لا هند تمسك وش مهره بين ايديها
هند / يصعب عليا اشوف دموعك دى و الله ... ما تكتميش فى قلبك مفيش حاجه تستاهل
مهره تبص فى الارض
هند / انتى اتخانقتى مع مامتك جامد و ده سبب تعبها صح
مهره تهز راسها اه
هند / اتكلمتوا عن اكرم
مهره تهز راسها اه هند تتنهد
هند / مش مصدقاكى برده
مهره تهز راسها لا
هند / انا هخليها تصدق
مهره تبص لهند برجاء
هند / هتشوفى النهرده هخليها تصدق
.......................
قدام الشقه اللى تحت السلم
جابر / ما لو هنطول نجيب كرسيين او نطلع نقعد فوق بقي
نجاه / انا مش طالعه فوق دلوقت
جابر / ليه ايه اللى حصل
نجاه / عاوزه اكلمك فى موضوع ما ينفعش اكلم حد فيه ... هو ما ينفعش اكلم حد فيه عموما و لا حتى انت بس حاسه انى لو سبته جوايا هطق و محتاجه اتكلم
جابر / اتكلمى و كانك ما اتكلمتيش
نجاه / وعد
جابر يهز راسه
نجاه / انا كان نفسي اوى مهره و عمران يبقوا لبعض
جابر / مش بكيفنا دى حاجه ترجع لهم
نجاه / طب انت حاسس ايه ... مش حاسس انهم لايقين اوى على بعض نفس الاهتمامات نفس التفكير تحسهم مخلوقين لبعض كدا
جابر / هو انا محتاج تفاصيل اكتر عشان ادخل معاكى على الخط حاسس انك تعرفى حاجه
نجاه / تفتكر اللى حصل لمهره ممكن يعمل مشكله بينها هى و عمران فى المستقبل
جابر / اللى اعرفه ان عمران ما كانش عنده مانع يكمل فى الجوازه و يكتب اللى كان فى بطنها باسمه وقتها بس فكره بقي هو بيحبها كزوجة و لا واخدها جدعنه و ستر و لا هى صعبانه عليه مش اكتر دى مش عارف هو ما قالش حاجه حتى كلامه كان على احساسه ان اللى حصل لها تقصير منه لانه كان بيحميها
نجاه / طب هو انت ينفع تكلمه ؟
جابر / فى ايه ؟
نجاه / عن مهره يعني تشوف لو فى مشاعر من ناحيته كدا يعني
جابر / ينفع بس ممكن اسال سؤال ؟
نجاه تهز راسها اه
جابر / هى مهره كلمتك فى حاجه ؟
نجاه / كلمتها بس هى قالت ما ينفعش عشان ظروفها
جابر / تمام هتكلم معاه
نجاه / بسرعه
جابر / هو فى حاجه يا نجاه ؟
نجاه/ مش مرتاحه للبت اللى فوق دى ... انت وعدتني مش هتقول لحد
جابر / و الله ما هقول ... صوفيا اخت مهره
نجاه / حربوئه صغيره
جابر / عيب كدا
نجاه / بجد مفقوعه منها اوى لا ما تنفعناش دى
جابر / مش بمزاجنا برده
نجاه / انت عاوز تنقطنى صح
جابر / بتكلم جد المواضيع دى ما بتمشيش على الكيف بتمشي بالنصيب
نجاه تنفخ
جابر / بصي مبدئيا كدا عمران مستحيل يبص لها ... صوفيا دى تمام ... و كل المؤشرات بتقول ان ممكن ... بقول ممكن يكون فى ميل بسيط يعنى ناحيه مهره ... بس ممكن يكون عشره مثلا... او صعبانه عليه... كلو وارد عشان كدا الافضل ما حدش يدخل و نديلهم وقتهم و بعدين دول لسه صغيرين يعني مش هنستعجل عليهم دلوقت خالص
نجاه / واحده امها عيانه و بايته معاها فى المستشفي تروح تعمل شعرها و تروح لواحد بيته ليه
جابر / اعتقد كانت عارفه انكوا هنا
نجاه / تروح لواحد لوحدها بيته ليه ... و من غير معاد ... افرض كنا نايمين او خرجنا او اى حاجه
جابر/ ما يمكن كلمته و قالها تيجي
نجاه/ لا ما حصلش
جابر / ما يمكن اش عرفك
نجاه / كان قال لنا بقولك اتفاجئ بيها ... بص البت دى انا مش بالعاها ... خلص الكلام
جابر / مات الكلام
نجاه تبص له
نجاه / هى هتبات فوق
جابر / عيب بقي دى ضيفه
نجاه / مش عاوزه اطلع و هى فوق
جابر / تحبى نخرج شويه
نجاه / ما ينفعش انا وعدت عمتى مش هطلع من البيت
جابر / تمام
نجاه / ما تطلع معايا
جابر / ماشي بس ... هطلع اعمل ايه
نجاه / تشوف بعينك كيف يكون الحرابيئ
جابر يضحك
جابر / و الله انتى ما طبيعيه
نجاه تبوز
جابر / بس ماشي هطلع اهو بالمره تعمليلى كبايه قهوه من ايديكي الحلوه دى
نجاه / ماشي ... اطلع يلا انا جايه وراك
جابر يهز راسه موافق و يطلع و نجاه تطلع وراه
......................
فى مطعم فى اسكندريه
قاسم / على فكره انا كدا هزعل منك بجد
مازن / مش هاكل يعني مش هاكل
قاسم/ انا لو شيلت الاكل ده لو وقفت على راسك مش هجيبلك لقمه لحد العشا
مازن يبص الناحيه التانيه و يربع ايديه مقموص
قاسم / انا ما كدبتش عليك قولت هوديك بس انا دلوقت عندى شغل لما افضي او يبقي فى سبب هنبقي نروح
مازن / مش واكل برده
قاسم / عنك ما اكلت
قاسم يشاور لواحد يشيل الطبق و يبص لمازن باصص له و زعلان
قاسم / حتى لو روحنا ما احنا هنروح يوم او اتنين بالكتير و هنرجع هنا تانى مش هنعيش هناك العمر كله يعني
مازن يبص الناحيه التانيه
قاسم / طب ممكن اسالك سؤال
مازن يبص لابوه
قاسم / انت فى حد فى البيت عندنا بيعاملك وحش
مازن / سالتونى كلكوا السؤال ده و قولت لا
قاسم / امال تفرق ايه احلام عنهم بس
مازن / بتحبنى
قاسم/ اولا كلنا هنا بنحبك ثانيا ايه الثقه اللى فيك دى انها بتحبك
مازن / يووووه هو انا كل شويه هحكى من الاول
قاسم / اتكلم بأدب
مازن يبص فى الارض
قاسم / اصلا كل اللى انت قولته عادى ممكن يحصل من اى حد
مازن / احلام بس
قاسم / يادى احلام
مازن / انت ما بتحبهاش ليه
.......................