الكبيره ٢ بقلم / لولو_محمد

الحلقه ١١٩

(((((( الكبيره ٢)))))))
#لولو_محمد
الحلقه ١١٩
امايا تحط ايدها على كتفه من الكنبه اللى ورا
امايا / انا هنا
عمران يتخض و ينزل بسرعه من العربيه و يلم نفسه و يروح يفتح الباب الورانى يلاقي الباب التانى مفتوح و امايا مش موجوده عمران يزعق
عمران / دا شغل أشباح يعني و لا جنان يعني
عمران يلف حوالين العربيه يقفل فى الأبواب و يركب و يسوق تليفونه يرن يحط الايربود
عمران / الو
عمران يفرمل بسرعه و يبص فى المرايه يلاقيها قاعده على الكنبه ورا
امايا / انا عايشه فى سيرك
عمران/ تمام ... اؤمرى عاوزه ايه
امايا / عاوزه اشوف نجاه
عمران / طب ما تطلعي لها هى
امايا / قولها بس انى عاوزه اشوفها
امايا تيجي تفتح الباب عمران قافل اللوك امايا تضحك و تنام على الكنبه و تضرب الازاز الباب اللى ورا ناحيه بعيد عن عمران بكعب جزمتها يتكسر عمران يبص وراه و يحاول يمسكها يلاقيها خرجت من الازاز و بتجرى ناحيه بيت يفتح الباب و ينزل يجرى وراها يلاقي كلاب ضخمه خارجه من البيت ناحيته يرجع بسرعه يركب العربيه و يقفل الباب قبل ما يعضوه يفضلوا ينطوا حوالين العربيه لمده ثوانى توصل عربيات و يضربوا نار فى الجو الكلاب تجرى بعيد
……………………….
راجل / انت كويس
عمران يسوق بسرعه و هو مخنوق
الراجل / اتفرقوا و فتشولى المنطقه دى حته حته... و انتوا اقطرولى الكلاب دى خلونا نشوف هتودينا لفين
الرجاله نتفرق و الراجل يتصل بالتليفون
الراجل / فى اى حاجه عندك نمشي وراها ؟
.......................
فى مكتب الزنايته
جابر / تروح لها فين مش هيحصل
مختار / ما حدش قال تروح لها انا بقول نعرف عوزاها فى ايه
جابر / بناقص خليها تفضل تتنطت كدا زى الفرقع لوز و لا هتفرق معانا
ولد صغير يخبط على الباب و يدخل
الولد / يونس بره
عباده / دخله
الولد يطلع يجرى و ثوانى و جوزيف يدخل
مختار / طبعا عرفت اللى حصل
جوزيف يهز راسه و يروح يقعد
عباده/ احنا سمعنا كلامك و سدينا الإنفاق و برده ما اتهدتش
جوزيف / بس طلعت لك على الارض اهو ما نزلتلهاش انت
جابر / عاوزه تشوف نجاه
جوزيف / مش هتعمل لها حاجه ما تقلقش
جابر / و المفروض انى اثق فيها يعني
جوزيف/ براحتك
مختار / طب انت تقدر توصل لها
جوزيف / اقدر
مختار/ تقدر تاخدنى ليها
جوزيف / لا ...لو هى عوزاك هتظهر لك
عباده / امال ما ظهرتش لنجاه ليه
جوزيف / ما اعرفش يمكن عشان ما بتطلعش من اوضتها مثلا ... يمكن مش عاوزه تنقل الخناقه جوه البيت هنا لأن فى اطفال و حريم مثلا
جابر / ما دام مش عاوزه تاذى نجاه خايفه ليه
جوزيف / دا على اساس ان انتوا مش عاوزين تاذوها فى ايه يا جابر انت بتكلم عيل خمس سنين
جابر يبص الناحيه التانيه
مختار / طب انت شوفت الفيديو صح
جوزيف / اه شوفته
مختار / ازاى
جوزيف / قولت لك قبل كدا انها مش لوحدها دول مع ان قدراتها دلوقت تجيب عادى بس مجازفه كبيره اوى
مختار / تقصد ان دى ممكن ما تكونش امايا نفسها و واحده من شبيهاتها بتوع يوم الكليه
جوزيف / كل شئ ممكن انا معنديش معلومه اكيده دلوقت
جابر / و لو عندك مش هتقول
جوزيف / مش فايق لك
عباده / تمام يا يونس تحب تقول لينا اى حاجه اخيره قبل ما تمشي؟
جوزيف / خليها تشوف نجاه
عباده / شكرا تقدر تمشي
جوزيف / ما كنا عملنا اونلاين كونفرانس أسهل
جوزيف يقوم يطلع بره يقابل ناصر داخل عصبى
ناصر / جايه و ناويه على قضاها مش كدا
جوزيف / الحرب دى حرب أعصاب اللى اعصابه هتفلت اسرع هيموت
ناصر / على العموم انا بقولك بس عشان ما تجيش ساعتها و تعيط لى
جوزيف يضحك
جوزيف / بقولك ايه مش معنى ان الكلام ببلاش انك تبقي بتقول اى حاجه بالشكل ده
ناصر  / هنشوف
ناصر يروح الجنينه الورانيه يلاقي عمران قاعد على المرجيحة
ناصر / يا مزاجك الرايق ايه ما شبعتش مرجحه ليوم واحد و لا ايه
عمران / مالك يا ناصر فى ايه
ناصر / ايه ما عكش سلاح و لا نسيت بتستخدمه ازاى
عمران / لا ما نسيتش بس ما كانش فى فرصه و بعدين انت مش مكانى عشان تيجي و تتكلم اصلا
ناصر / على العموم ما تزعلش نفسك هانت هى هتيجي لقضاها لوحدها
عمران يهز راسه تليفونه يرن
عمران / السلام عليكم ... قد ايه ... حاضر ... سلام
ناصر / فى حاجه و لا ايه
عمران / الحريم فوق متجمعين فى اوضه نجاه و عاوزين ايسكريم هروح اجيب
ناصر / ما تبعت اى حد يعني
عمران/ مش هتاخر هاجى على طول
عمران يمشي و ناصر مش طايق نفسه
......................
فى البلد
قاسم / هو احنا بندور على ايه
همام / نفق او مدخل او اى ممر سرى
قاسم / سهرتنا صباحى يعني
همام / لو تعبت روح
قاسم / ما تعبتش بس زهقت مفيش اى حاجه فى المنطقه دى حتى العمارات دى احنا دخلناها عماره عماره و فتشناها شقه شقه و ما لقيناش حاجه
همام / يبقي نفتشها تانى يمكن حاجه فاتتنا
قاسم / قولت لى عندها كام سنه البت دى
همام / ما اعرفش بس بيقولوا صغيره
قاسم / يا فرحتي
همام / انت ليه علاطول كدا
قاسم/ ليه ايه
همام / انت مش حاسس انهم اهلك صح ... مش حاسس ان دى أرضك صح عشان كدا الموضوع تقيل عليك انا عارفك لما حد بيهوب من حد تبعنا بتاكله بسنانك انت هنا فاتر كدا و ما لكش كيف فى حاجه قولى انت مش عاوز تكمل صح
قاسم / ايه اللى انت بتقوله ده
همام / بتكلم معاك ما حدش غيرنا سامع تقدر تصارحني قولى ايه المشكله و انا هحلها
قاسم / يا عم مفيش الكلام ده بس حاسس ان الحرب دى مش بتاعتنا
همام / يا راجل امال انا كنت بقول ايه
قاسم / ما قولتش مش ارضنا و لا أهلنا قولت الحرب نفسها ... لا انا و لا انت و لا اى حد من الرجاله دى قادر يعمل حاجه بنجرى ورا الكلاب فى الشوارع انت شايف ان ده هيوصلنا لحاجه اصلا ... بلاش عمالين ندخل بيوت الناس و نقلبها عاليها واطيها و برده مش عارفين نلاقى اى حاجه ... باختصار الموضوع كبير جدا علينا و احنا مش عارفين نسد
همام / و المطلوب
قاسم/ مش عارف و مضايق انى مش عارف
همام / بفكر اروح ليونس و مش عارف ممكن يفيدنى و لا لا
قاسم/ انا ما ارتحتش الجدع ده
همام / مش هلومك هتبقي اول واحد يرتاح له من اول مقابله
قاسم / فى امل بعد كدا يعني
همام / و لا حتى دى اضمنها
قاسم يضحك
.............................
فى جنينه الزنايته
مبرده ايسكريم تدخل و تفضل تكلكس كتير الكل يطلع من السرايا و الشبابيك و التراس عمران ينزل منها و يقعد على العربيه
عباده / فى ايه يا عمران
عمران / ايسكريم يا كبير اطلب و اتمنى كل الانواع و النكهات من المصنع اليكم مباشره
عباده يبص لمختار
مختار/ عاوز ذبادى توت
عمران ينزل يفتح العربيه و يطلع جالون و يديه لمختار
مختار / دا طلع بجد !!
نجاه تطلع من السرايا و هى بتضحك
نجاه / يا مجنون ايه كل ده
عمران / مش قولتى كتر و خليك كريم
العيال الصغيره تطلع بتجرى عمران يفتح فى الكراتين و يوزع و نجاه بتساعده هند تطلع مختار يديها الجالون
هند / الله الايسكريم اللى بحبه
مختار / و انا اقدر انساكى برده
عمران / انا اللى جايب على فكره
مختار يوطى يقلع الجزمه
عمران / بس ابويا اللى طلب ابويا اللى طلب
الكل يضحك عمران يبص فوق يلاقي رحمه و نور و مهره باصيين من اوضه نجاه
عمران/ حاجه معينه و لا أشكل على زوقى
نور / بحب الشيكولاته اوى
عمران / حصل
نجاه / تعال ساعدني... يا ولاد كله هياخد
جابر يدخل يساعد نجاه فى تفتيح الكراتين و التوزيع عباده يسند على الحيطه و يتابع الفرحه فى السرايا و الضحك مختار يروح يديله كبايه ياخدها و ياكل
مختار / فكره بسيطه فرحت الكل ازاى
عباده / ربنا يسعد الجميع
احلام تنزل من فوق هى و مازن
احلام / انا عروسه انا عاوزه انا ما اخدتش
نجاه / بلاش انتى للفستان ما يحشش
احلام / عن امه ما دخل شوف لى حاجه مانجا
جابر يناولها جالون
جابر / خديه و اجرى
نجاه / الفستان يا بت انتى يا بت هتطخنى مش وقته ... انت عاوز تبوظ الجوازه و لا ايه
جابر / ابو الفستان اختى ما تتحرمش من حاجه ... سيبك انتى الصرف باين
عمران يعلى حسه / عاوزين ننول الرضا
جابر يعلى حسه  / لا كدا الموضوع يستاهل
عمران بنفس الصوت العالى / هو يستاهل بس مش معبر
مختار يعلى صوته / ما هو رضا ما اخدش ايسكريم يا ذكى
عمران بنفس الصوت العالى / دا انا اوصلهاله لحد عنده هو بس يؤمر
نجاه / انتوا كدا بتحرجوها على فكره
نجاه تاخد كرتونه و تطلع فوق و عمران و جابر و مختار بيبصوا لبعض
…………………………
فى المخزن
دياب يفتح الاوضه حاتم يتعدل فى قعدته و ابوه يقوم يروح ناحيه الباب بيجرى يلاقى اكرم واقف ورا دياب
دياب / احنا مونا لك العربيه يا ريت تاخدوا الاستاذ اكرم معاكوا
الراجل / بس كدا
دياب يبص له
دياب / مهره مش عاوزه منكوا حاجه غير انها ما تسمعش اسمكوا تانى ... و الله ما سمعنا اساميكوا يبقى صفحه و اتقفلت ... سمعنا... يبقي على الباغى تدور الدوائر
الراجل / لا باغى ايه انا اساسا وعدتكوا حاتم هيطلع من هنا على المطار هيرجع امريكا و مش هينزل مصر تانى ابدا
دياب / اه صحيح ما تستغربش لو لقيت جمعيات خيريه بتتصل تشكرك على تبرعاتك السخيه
الراجل/ و لو عاوزين كمان هدفع المهم نمشي من هنا
دياب / اتفضل ... الباب مفتوح
الراجل يسند حاتم و يمشوا و اكرم معاهم حاتم يبص لدياب و يضحك دياب يبتسم
دياب / شكلتها هتدور يا ابن العبيطة
…………………….
فى اوضه نجاه
البنات متجمعين بياكلوا ايسكريم
نجاه / تاخدى واحد كمان ؟
رحمه / لا ما اقدرش انا اصلا ما ليش فى الحلويات انتى عارفه
نور / بس انا برده مش فاهمه هو عمل الحركه دى عشان مين فيكوا
نجاه / لا دى مش حركه دا العادى عندنا على فكره
نور / يا سلام يعني تطلبى منه ايسكريم يجيب عربيه ايسكريم كامله و تقولى عادى
رحمه/ اللهم بارك احنا كتير و لو حسبتى الغفر و كل واحد حط حبه فى تلاجته و حطيتي شويه فى الفريزر يا دوبك هى العربيه خلصت
نور / اللهم احفظنا
نور تضحك
نجاه / اللهم زدنا و لا تنقصنا
نور / امين ... بس برده مش فاهمه لما قعدوا ينادوا كدا ما تقوليش عادى بقي معروفه قاصد مهره
نجاه / كل شئ قسمه و نصيب
نور / ايوه بس ما دام بيحبك اوى كدا ليه أطلقتوا و برده ما دام مطلقين بتعملى ايه هنا
نجاه / دا بيتها
نور/ لا مش بيتها
رحمه / بيت الزنايته لكل الحبايب و كل ما زادوا كل ما كان احسن احنا ما بنحسبهاش كدا
نور / انا ما اقصدش حاجه و الله انا بس مش فاهمه
نجاه / فى حاجات كتير هنا هتقابلك مش هتفهميها عيشيها كدا و انبسطى بيها
نور / طب انتى اهلك موافقين انك تبقي فى مكان واحد مع عمران هنا
مهره تسيب المكان و تمشي نجاه تجرى وراها
نور / هو انا قولت حاجه غلط
رحمه / ساعات الفضول بياذى يعني كان ايه اللى هيجرا يعني لو انبسطنا باللمه و كبرنا مخنا عن اى حاجه تانيه
نور / بس مهره المفروض سلفتنا و المفروض نتعرف على بعض اكتر
رحمه / كل بيت و ليه خصوصيته اه احنا بيت عيله بس لازم احترم خصوصيه غيرى
نور / طب انتى لو لا قدر الله محمد طلقك هتفضلى عايشه هنا برده
رحمه / اولا انا كنت عايشه هنا حتى من قبل ما اتجوز محمد يعني ده بيتي اتجوزت محمد بقي بيتي و بيت جوزى و بيت عيالى
نور / صحيح انا مش عارفه انتوا عملتوا دى ازاى برده فى السن ده
رحمه / مش بتقولوا الحب بيصنع المعجزات اهو
نور تضحك
رحمه / على سيره العيال انا عاوزه اروح ابص عليهم كدا اشوف عاملين ايه لو مش هضايقك يعني
نور/ لا ابدا براحتك انا اساسا كنت راجعه اوضتى
رحمه تبتسم و تقوم تمشي و نور تمشي وراها و تبص على الاوضه و تقفل الباب و تمشي
…………………………..
فى السيرك
منصور يدخل يتمشي يقابله راجل
الراجل / لسه الافتتاح بعد بكره
منصور / اه ما انا عارف بس كنت عاوز اتكلم مع اى حد من الاداره او اللى شغالين فى الدعايه
الراجل / مش عارف بس ممكن تسأل الاتش ار اسمها ناتالي بس هى ما بتتكلمش و لا كلمه عربى و المترجم اجازه النهرده فممكن تفوت بكره يترجم لك
منصور / بتتكلم ايه ؟
الراجل / روسي بس
منصور يهز راسه
منصور / و الله كويس انا بتكلم روسي مكسر برده و هى اكيد تعرف تتكلم انجليزى يعني هنتفق باذن الله
الراجل / تمام ثوانى استناني هنا هدخل اناديهالك
منصور/ ما ينفعش تاخدنى ليها انا اسرع
الراجل/ لا ممنوع
منصور / ممنوع اه ... طب تمام ناديها كدا
الراجل يدخل و منصور يحاول يدخل يشوف الدنيا رجاله يطلعوا و يحاوطوه يفضلوا يبص لبعض
……………………..
فى الجنينه الورانيه
نجاه / ما هى ما تعرفش حاجه و لازم تتوقعى اكتر من كدا كمان لو مش نور هيبقي غيرها
مهره تهز راسها
نجاه / على فكره رحمه كلمتنى و قالت إن الاوضه فاضيه يعني ما فيش داعى نفضل هنا ممكن نطلع اوضتنا عادى
مهره تكتب/ اطلعى انتى انا عاوزه افضل هنا شويه لوحدى
عمران يدخل نجاه تشوفه
نجاه / هو انا اكيد هطلع بس حوار لوحدك ده بقي فيها كلام تانى
مهره تبص تشوف عمران تقوم تقف
عمران / انا ممكن امشي بس كنت عاوز اتكلم معاكى فى حاجه
نجاه / ايه ده هم ما بيسقوش الورد اللى هناك ده و لا ايه انا هروح اشوفه
نجاه تروح تقف بعيد
عمران / انا عاوز اتكلم معاكى
مهره تتكلم بالاشاره
مهره / انت غالى عندى اوى و كل اللى عملته عشانى مهما عشت مش هقدر اعوضه و لا ارده بس انا و انت ما ينفعش لبعض
عمران / ليه … انتى ما بتحبينيش
مهره/ انت انسان كويس جدا و انا انسانه مدمره حرفيا انت تستاهل واحده احسن منى ليه تربط نفسك بواحده ما لهاش مستقبل زيي
عمران / مين قالك كدا و لا انتى ازاى اصلا بتفكرى كدا
مهره / دى الحقيقه انا خسرت كل حاجه بس أنت لا
عمران / انا بحبك قولتها خلاص و مش هينفع ارجع استهبل تانى انا بحبك من زمان على فكره من اول مره شوفتك فيها فى الشركه عند باباكى و لما شوفتك فى النادى و لما شوفتك فى الندوه و لما سمعتك و انتى بتتكلمى انا فاكر كل لحظه عشناها سوا فاكر ردودك الدبش و فاكر جدعنتك معايا فاكر تفاصيل مش متعود اركز فيها انا حافظ لبسك كله و بتحبى لون ايه و بتحبى تاكلى ايه انا مش كدا انا ما بركزش خالص مع الحريم ما بستحملش رغيهم بعشق الهدوء بس بحب اتكلم معاكى جدا بحب يجمعنا وقت اى كان اللى بنعمله انا بحب ده
مهره / انت لسه صغير و هتلاقى واحده تانيه احسن تعيش معاها الاحاسيس دى ... خلينا اخوات احسن
عمران / انتى غبيه صح
مهره تتفاجئ
عمران / هو انتى ما سمعتيش اى حاجه من اللى قولتها انا مش هقدر استهبل تانى... بصي عشان انا شخص عملى للاسف مش بفهم اوى فى العواطف دى ... انتى بتحبيني و لا لا لو لا اوعدك ان دا مش هياثر على حاجه و انى هكون برده جنبك لو احتاجتى اى حاجه
مهره / انا مش هقدر ارتبط بيك حرام
عمران / اولا ما حدش قالى اننا راضعين على بعض ثانيا انا ما جبتش سيره ارتباط انا بتكلم عن جواز
مهره / العيب فيا انا مش فيك
عمران / عيب ايه مش فاهم
مهره / انا خايفه
عمران / منى !!
مهره / انا اتاذيت من اقرب الناس ليا مش هقدر اخسرك مش هستحمل تعايرني فى يوم
عمران / لا دا انتى طلعتي غبيه فعلا ... غبيه اللى هو غباء حقيقي مش موقف كدا و السلام … اعايرك بايه هو انتى عملتى ايه غلط اصلا
مهره / وقت الخناق و العصبيه مش هتبقي بتفكر بعقلك هيبقي الشيطان راكبك و ساعتها هتقتلنى مش هتجرحنى بس
عمران / انا عمرى ما هعمل الهبل ده انا ما اتربيتش على كدا و بعدين انتى اصلا مش فاهمه انا لو عملت كدا ابويا هينفخنى ساعتها انا اللى هموت و بجد مش مجازى
مهره / انا مش بهزر
عمران / و لا انا ... انا سألتك سؤال واحد و انتى مصره تتهربى ... انتى بتحبيني و لا لا
مهره تبص الناحيه التانيه و الدموع تنزل من عينها تمسحها على طول
عمران / تمام يا مهره انا مش هضغط عليكي خدى وقتك بس فى حاجه كدا كنت عملتها لازم تعرفيها
مهره تبص له
عمران / انا روحت رديتك على الورق زى ما طلقتك على الورق زى ما اتجوزتك على الورق
مهره تتفاجئ
عمران / كنت حاسس ان حاتم هيعمل حاجه و خفت يضغط عليكي يتجوزك عشان مامتك او عشان اى حاجه فرديتك عشان امنع الجوازه
مهره تضرب كف على كف
عمران / فكرى كدا و قوليلى رايك النهائى ... خدى وقتك ... يا نجيب مازون و نعمل إشهار و نقلبها شرعى و لا اروح اطلقك و ننهيها خالص ... خدى وقتك فى التفكير
مهره/ ازاى هتعمل كدا اصلا ازاى هنتجوز و احنا متجوزين
عمران / لا لا فوقى احنا مش متجوزين ... و الله نفسي بس لا مش متجوزين... لا فى قبول و لا فى إشهار و لا فى اى حاجه من أساسيات الجواز بس لو قصدك هنعملها ازاى اقصد هنعمل فرح و نشهر بس مش هنسجل لانه اوريدى متسجل ... فكرى و ردى عليا و ما ترديش دلوقت خدى وقتك اتفقنا
مهره تهز راسها عمران يبتسم بحزن و يمشي نجاه ترجع مهره تعيط و تترمى فى حضنها
نجاه / ليه بس النكد ده دا انا سمعاه بيقول كلام حلو اوى ... يا ربى بقي الواحد ما بيعرفش يفرح فى البيت ده
……………………….
فى السيرك
منصور واقف و الرجاله محاوطينه بنت تطلع
ناتالى / Добрый вечер
) مساء الخير )
منصور / may I do an interview about the circus?
) ممكن اعمل لقاء صحفى عن السيرك)
ناتالى / я не понял
) مش فاهمه )
راجل من اللى واقفين / بتقول مش فاهمه هى مش بتتكلم انجليزى لو مش بتتكلم روسي تعال بكره يمكن نقدر نخدمك
منصور / ما لو انت فاهم ما تترجم انت
الراجل / على قدى جدا مش هنفعك تعال بكره احسن
منصور يهز راسه و يحييها و يمشي ناتالى تدخل و الرجاله نتفرق
……………………
فى اوضه نجاه
مهره مش عارفه تنام و بتتقلب نجاه تقوم تقعد
نجاه/ طب و اخرتها
مهره تقعد نجاه تقيد النور
نجاه / بصي ما تفكريش فى الموضوع وجودك هنا ما لوش دخل خالص بعمران يعني سواء بقي هو بيحبك او لا دى مشكلته هو المهم انتى بتحبى مين و بعدين الجواز مش كل حاجه يعني
مهره تبتسم بسخريه
نجاه / طبعا انا ما اضمنلكيش انه يبطل زن
مهره تبص قدامها
نجاه / بصي هو عمران ده اصلا طول عمره سهن كدا ما تفهميلوش هدوء مريب صامت كدا حتى موبايله نادرا ما بيخليه يرن علاطول فى وضع الصامت و ساعات وضع الطيران كمان اللى هو مش عاوز حد يوصلى اساسا بس هوب تلاقيه طلع من شرنقته دى بحاجه جامده تلاقينا اللى زيه كان شاكر بس شاكر بقي مش سهن
مهره تجيب الموبايل و تكتب
مهره/ طب و ليه عمران سهن
نجاه / مش بيشرك حد معاه فى حاجه تكونى بتشرحى حاجه مثلا لا يسأل و لا يتفاعل و يفضل صنم قاعد كدا و بما انه هادى فتفتكرى انه محرج يسأل مثلا فتعيدي يفضل يسمع بنفس الاهتمام فتشرحى اكتر و برده مفيش رد فعل فتفضلى تعيدي لحد ما تطلع روحك و تساليه هو انت ايه اللى انت مش فاهمه بالظبط يقولك انا لا ما انا عارفها اصلا ... امال سايبني اعيد و ازيد ليه يقولك اصلى كنت فاكرك هتقولى حاجه جديده فمارضيتش اقاطعك تبقي عاوزه تقلبي فامباير و تعضيه من رقبته
مهره تضحك
نجاه / بس جدع و حنين و ابيض اوى من جوه ... بس سهن
مهره تكتب / انتى معبيه منه اوى
نجاه / بصي انا واحده مجنونه بحب اطير و اجرى و اتنطت عمران هادى اوى هادى لدرجه تشل
مهره تكتب / هو مش كدا خالص
نجاه تبص لها بطرف عينها بخبث
نجاه / امال ازاى !!
مهره تبتسم و تكتب
مهره / عمران راجل كويس
نجاه / و انا قولت انه وحش انتى اللى بتقولى انه مش كدا هو ازاى
مهره تكتب/ راجل كويس
نجاه تنفخ مهره تكتب
مهره / راجل ... كويس ... راجل
نجاه / راااااجل... اه هو راجل طبعا ما نقدرش نتكلم ... بس سهن
مهره تضحك
نجاه/ و يتحب
مهره تبص لنجاه
نجاه / بصي لو انا غلط فهميني ... دلوقت اللى فهمته انك لما حاتم هددك بعمران كنتى موافقه تتجوزيه و انا بحس ان فى بينكوا كيميا حلوه ... لو فى حاجه انا ما اعرفهاش فهميني انتى رافضه للمبدا عموما جواز يعنى و لا عمران بالتحديد
مهره تعمل دايره بأيديها نجاه تهز راسها
نجاه / بس عمران كعمران كويس
مهره تتنهد
نجاه / انا بقول ننام احسن
مهره تهز راسها اه و تدى لنجاه ضهرها نجاه تطفى النور و تقعد تفكر
....................
فى مكتب فيلا كارمن
كارمن / انت تختفي تختفي و راجع تقول لى الكلام ده مش كفايا اللى انت عملته
اكرم / اللى انا عملته عملته فى لحظه ضعف و غلطت و أدبحت عليه انما اللى انت عملتيه فى بنتك يخليني مش قادر اثق فيكي تكملى ربايه بناتى و لا ربايه ايه ما انا عرفت كل حاجه ... بس على العموم لسه فى وقت اللحق اعيد ربايتهم تانى
كارمن / هما قالولك ايه بالظبط عرفنى قالولك ان
اكرم / ما حدش قالى حاجه انا راجع فى الطريق مع حاتم و حكالي كل حاجه و لعلمك حاتم هيرجع امريكا يكمل علاجه ... حاتم المريض النفسي اللى كنتى عاوزه تجبرى بنتك تتجوزه
كارمن / على الاقل يجوز لها مش زيك
اكرم / غلطت
كارمن / و انا كمان غلطت بس انا غلطت عشان غيرت ... ما استحملتش تدخل بينا ما استحملتش تبص لها ... اكرم انا بحبك
اكرم / و انا بكرهك و بحتقرك و مش طايق ابص فى وشك
كارمن / مهره
اكرم / ما تجبيش اسمها على لسانك و بهدوء كدا قبل ما اتخذ معاكى إجراء يخليكي تندمى طول عمرك
كارمن تحط ايديها فى وسطها
اكرم / تشوفى طريقه تخرجى بيها نهائى من حياتى انا و بناتى و كدا كدا هيوصلك بوكيت مونى تصرفى منه ما تقلقيش مش هرميكي فى الشارع مع انك كدا كدا مش هتجوعى يعنى بس هعمل باصلى انا كل اللى فارق معايا انك تبعدي عن بناتى بأسرع وقت
كارمن / و هتقدر تبعدهم هم عنى
اكرم / ما تقلقيش انا كدا كدا هعيد ربايتهم بطريقتى
كارمن / سؤالي واضح ... هتقدر تبعدهم هم عنى ... عن امهم
اكرم / هتساعديني ... هتبيعيهم زى ما بعتى مهره ... عشان ما تتفضحيش عشان الفويس بتاعك و انتى بتقولى لبنتك قد ايه انتى حقيره ما يتسربش للميديا و الناس كلها تشوف قرفك
كارمن / انت بتقول ايه
اكرم / كل حاجه حصلت فى الفندق اتسجلت لو تحبى نزيع قولى زيع و ساعتها هتسمعى بودانك و تصدقى انى مش بقول اى كلام مع انك عرفانى كويس و عارفه انى مش بقول اى كلام
كارمن / اكرم اسمعنى انا بس محتاجاك
اكرم/ قدامك ساعتين ... هروح الشركه و ارجع ما الاقيكيش فى البيت فاهمه و لا لا
كارمن / اكرم انا بحبك انا هتغير عشانك هبقي
اكرم / ارجع ما الاقيكيش يا كارمن
كارمن / طب بس اسمعنى
اكرم ينادى
اكرم / بياتريس صوفيا بياتريس صوفيا
كارمن / اكرم عيب كدا انا بكلمك
البنات يدخلوا
اكرم / انا قفلت الكريدت كارد بتاعتكوا
صوفيا / ازاى يعني
اكرم / زى ما سمعتى وتعلموا حسابكوا انكوا هتنزلوا من بكره شغل تحت التمرين يا تثبتوا نفسكوا يا ما لكوش مرتب
بياتريس / طب و الدراسه
اكرم / انهى دراسه هو حد فيكوا دخل الامتحانات السنادى و انا ما اعرفش
بياتريس / ماما قولى حاجه
اكرم / انا رايح الشركه
اكرم يمشي و يرزع الباب وراه
صوفيا / بابا اتجنن خالص دا ما عادش طبيعي دا يتحجر عليه
كارمن / انتى بتقولى ايه يا بنت
صوفيا / يعني ما سمعتيش قال ايه
كارمن / اسمعونى كويس ... انتوا لازم تقربوا من ابوكوا اوى الفتره دى و تبينوا له قد ايه انتوا كويسين
بياتريس / ازاى بعد اللى عمله
كارمن / اسمعونى بقول... انتوا الأمل اللى باقي عشان اقدر ارجع لابوكوا لو فقد فيكوا الأمل كل حاجه انتهت فاهمين و لا لا
بياتريس / ماما انتى كويسه
كارمن / انتوا عارفين ان ابوكوا مطلقنى بس كان عندى امل نرجع بس للاسف طلب منى امشي و اسيب البيت
صوفيا / و الله اتجنن رسمي قولت
كارمن / قولت عيب انتى ايه ما اتربتيش
صوفيا / ما تزعقليش انا ما قولتش حاجه غلط
كارمن / انا مش هكرر كلامى تانى فاهمه و لا لا
بياتريس / بس احنا مش فاهمين حاجه فعلا
كارمن / هتفهموا بعدين كل المطلوب دلوقت تسمعوا كلامى بالحرف مش اكتر فاهمين و لا لا
صوفيا / انا مش عاجبنى الوضع ده
بياتريس / اسكتى بقي ... تمام يا ماما فاهمين قولى تحبى نعمل ايه
صوفيا / انا مش هشتغل فاهمين و لا لا مش هقبل اعيش فى دور مش دورى انا مش هتذل فاهمين و لا لا ذل مش هتذل حتى لو همشي فى إجراءات الحجر لوحدى
كارمن تضرب صوفيا بالقلم صوفيا ترده لها فى ساعتها كارمن تبص لها بصدمه بياتريس و صوفيا يمسكوا فى بعض
بياتريس / انتى اتجننتى انتى ايه اللى جرالك
صوفيا / انتى ما تعرفيش حاجه ما تعرفيش اللى بتتذل بيتعمل فيها ايه انا مش هقدر اعيش انا اموت اهون
بياتريس / يا ريتك موتى يا ريتك كنا كلنا ارتحنا ما كله بسببك اصلا
صوفيا / انا
بياتريس/ غيرتك من مهره فتحتى علينا حاتم و جنانه و عمران و قرفه
كارمن تقع فى الارض
.........................