الكبيره ٢ بقلم / لولو_محمد

الحلقه ٧٩

(((((( الكبيره ٢)))))))
#لولو_محمد
الحلقه ٧٩
نسمه بتطبق الغسيل امها تدخل
الست/ انتى لسه صاحيه لدلوقت يا نسمه
نسمه / هخلص اللى فى ايدي و انام
الست / عاجبك الشحطته اللى انا فيها دى
نسمه / ياما انا عايشه فى بيتي اللى عاوز يقعد معايا ينورنى اللى عاوز يروح يتفضل انا مش رابطه حد جنبى
الست / عاوزانى اروح و الناس يحكوا و يتحاكوا عليكي
نسمه / و الله ياما انا فيا اللى مكفيني و على أخرى... ما تعرفيش عملوا ايه مع محمود و ابوه و أمه ؟
الست / لا ما اعرفش حاجه ... و بعدين ما ياما قولنا الناس دول مش سالكين تعالى وسطنا انتى اللى قولتى لا و لسه بتقولى اهو
نسمه / فكريني الصبح اكلم الباشمهندس منصور اسأله هيعملوا فيهم ايه اروح اعمل محضر و لا هيتصرفوا هم من بره بره
الست / هبقي اخلى ابوكى يكلمه هو
نسمه/ اريح و اريح ..  خلصت تصبحى على خير ياما
نسمه تشيل الغسيل المطبق و تدخل الاوضه و تقفل الباب و تتنهد
نسمه/ افرجها من عندك يا رب
……………………..
فى اوضه صابر
شاكر / و ناوى على ايه دلوقت
صابر / و لا حاجه
شاكر / و لا حاجه !!
صابر يهز راسه بضعف
شاكر / لحد امتى ؟
صابر / اللى عشناه عشناه بسببي يا شاكر هى بتعانى دلوقت بسببي
شاكر / مش حقيقي
صابر يبتسم بتعب
شاكر / لا مش حقيقي يا صابر انت اه ممكن تكون الهدف فى الأحداث الاخيره بس ... مش ده الحل اصلا
صابر / هو انت مش هتنزل من على دماغى بقي
شاكر / لا هنرجع سوا
صابر / انت فاكر انك هتحميني ... مكانك فى الجبل ... لازم ترجع
شاكر / الجبل بتاعك انت انا مجرد ضيف فيه ما ينفعش ادخل و اعمل نفسي كبير المطاريد لا هيقتنعوا بيا و لا انا نفسي مقتنع
صابر / انت ابن مختار الزيني هيتعملك الف حساب ما تقلقش
شاكر / كرباج صابر القط مش اى حد يمسكه
صابر / و انت فاكر ان الرجاله دى مستعده تديني عمرها عشان ماسك ليهم الكرباج ... دا انت طيب اوى
شاكر / طب ما تعلمني
صابر / هى الناس اللى بيدوك عمرهم يا شاكر ماسك لهم ايه
شاكر يبص لصابر
صابر / بالظبط ... بعاملهم بما يرضي الله واحد منهم مش كبير عليهم كلكوا بشر من طينه واحده و ان مش معنى انه غلط مره و لا اتنين ان الدنيا انتهت و انه ما دام قرر يتوب الباب مفتوح حتى لو بعيد عن عين الحكومه باب الجبل مفتوح يعيش و يشتغل و يصرف على أهل بيته من الحلال
شاكر / طب ما فيش ناس خالص جم الجبل من عينه ديل الكلب
صابر / ما بيعمروش اصل انا اه بديك فرصه تتوب و تشتغل بما يرضي الله بس ما بتنيهاش ... هتقل معايا هسلمك و اخلص منك و القانون على الكل
شاكر يهز راسه
صابر / هتروح الجبل
شاكر / اه بس معاك
صابر / مفيش فايده يعني
شاكر / تؤ و ما تحاولش انت عارف انى عندى
صابر يهز راسه و هو مبتسم
.......................
فى اوضه جابر
جابر بيتكلم فى التليفون
جابر / يعني الراجل ده هيعرف يعمل الكلام ده و لا هيسوحنا ... تبقي عملت فيا جميل العمر ... قلب اخوك و الله تسلم ما اتحرمش ... فى حفظ الله ... سلام سلام سلام
جابر يقفل و يتمطع الباب يخبط يقوم يفتح نجاه ضاربه بوز
نجاه / الاكل جاهز
جابر / تسلم ايدك
نجاه / مالك شكلك مرهق
جابر / ما نمتش لسه بس الحمد لله خلصت اللى فى ايدي و هنام
نجاه / طب و الله كويس على العموم الاكل بره لو تحب تاكل عن اذنك
جابر / اخبار مهره ايه
نجاه / نازلين رايحين الكليه اهو نشوف الدنيا عندها فيها ايه
جابر / طب ليه ما حدش قالى كنت لبست و جيت معاكوا ثوانى مش هتاخر
نجاه / لا ارتاح انت لسه ما نمتش عمران ...
جابر / عمران مين !!! عمران اللى واخد طلقه فى كتفه و رابطه ؟! انهى عمران اللى هيجي معاكوا
نجاه / انت بتتخلق عليا كدا ليه اسمع الاول و بعدين رد كنت بقول عمران و عموا مختار و رجاله كتير جدا
جابر / و انا لما اتهمش و ما حدش يبلغنى باى حاجه و ترتبوا الدنيا من غيرى و افضل فى البيت زى الحريم ... حريم ايه دا الحريم نفسهم خارجين اهو
نجاه تبص له و ساكته
جابر / عشر دقايق بالكتير و هكون تحت
نجاه / براحتك ... عن اذنك
نجاه تمشي و جابر يرزع الباب
جابر / يا رب يطلع اللى فى بالى غلط يارب مش هقدر اخسره بالطريقه دى يا رب اطلع غلطان يا رب
جابر يفتح الدولاب و يطلع طقم و يلبس بسرعه
.............................
فى فيلا على
مروان قاعد فى الجنينه ايلين تدخل تقعد قدامه
مروان / الله هو القمر بقي بيطلع بالنهار و لا ايه
ايلين / هو انت هتفضل مستخبى فى البيت لحد امتى
مروان/ مستخبى !!
ايلين تبتسم
مروان / عاوزه ايه يا ايلى
ايلين / انا مصدقه مهره
مروان يسقف
مروان / قشطه روحى قولى لبابا بقي
ايلين / اقوله ايه
مروان/ انتى عاوزه ايه يا ايلى عاوزه ايه على الصبح
ايلين / و لا حاجه بس نصيحه ... اى كانت اللعبه اللى بتلعبها ما تطولش فيها عشان هتبوخ منك جامد
مروان / حاضر
ايلين تبتسم و تقوم و مروان قاعد يضحك يطلع الموبايل و يتصل بحد
مروان / ايه يا عمنا روحت و قولت عدولى عملت لى ايه فى حوار الالبوم بتاعى ... احلف ... امتى ... النهرده!!! ازاى يعني ... لا مش معترض بس ... لا لا ما تكنسلش يا عم مالك بتتلكك و لا ايه و بعدين انا جاهز و فلوسي جاهزه ... تمام هكون عندك قبل المعاد ... تمام ... سلام
مروان يقفل و يقوم يدخل جوه
....................
قدام مكتب العميد فى كليه مهره
عمران واقف جنب مهره
مهره / طب هو بيعمل كدا ليه اصلا يعني هو مش عاوز يصدقني تمام لكن ياذيني فى مستقبلى كمان دا ايه الكره ده انا عملت له ايه
عمران / اهدى و هتتحل باذن الله زمان بابا كلم اى حد و مش هنمشي من هنا غير و كل حاجه تمام
مهره / طب و انت ... هتعمل ايه
عمران / فى ايه ما انا واقف معاكى اهو
مهره / اذا كان عمل فى بنته كدا هيعمل فيك انت ايه
عمران / ما تقلقيش عليا اعلى ما فى خيله يركبه هو انا يعنى مستنى حته شهاده يعني كدا كدا هاخدها ما تقلقيش
مهره / انا بجد اسفه على كل اللى بيحصل ده
عمران / ما فيش حاجه من اللى بتحصل ده غلطتك عشان تعتزرى عليها ما تقلقيش كلو هيعدى باذن الله
امايا تعدى لابسه كعب عالى على جيب شورت قصير و قميص كت و لابسه نضاره شمس كبيره و مسيبه شعرها على الجانبين و عامله قصه كبيره عمران يشوفها جايه يشبه عليها بس ملامحها مش واضحه من النضارة و القصه و الكل عينه عليها من لبسها و ماشيه الثقه اللى هى مشياها تعدى عمران اللى لسه عينه معاها تدخل مكتب سكرتيره العميد
مهره / عجباك اوى
عمران / هاه
مهره/ كنت فكراك بتغض بصرك بس على العموم انا مالى انت حر
عمران / لا لا انا بس ... بشبه عليها
مهره / و الله !! طب ما تروح كدا تتعرف عليها يمكن تطلع هى و لا حاجه
عمران / ما هو ان شاء الله مش هتطلع هى و لا حاجه
عمران يروح يبص على المكتب امايا واقفه بظهرها و السكرتيرة بتتكلم فى التليفون مهره تسيب المكان و تمشي عمران ياخد باله يجرى وراها
عمران / مهره استنى انتى رايحه فين
مهره / و انت مالك بيا اصلا ما تخليك فى اللى بتبص عليها
عمران / قولتلك بشبه عليها
مهره / بقولك ايه فكك منى عشان اقسم بالله عفاريت الدنيا بتتنطت فى وشي و ثانيه و صوتى هيعلا و هلم عليك امه لا اله الا الله
عمران يطلع الموبايل و يتصل
عمران / تمام بس الراجل اللى جوه ده هتعملى معاه ايه
مهره / ما لكش فيه انا هبطل تعليم و هقعد فى البيت ابعد عنى بقي دا انت غريب جدا
مهره تبص ورا عمران امايا تطلع من مكتب السكرتيرة و تدخل مكتب العميد عمران يبص
مهره / واو دا واضح انها تقيله اوى دخلت على العميد الاجتماع عادى و احنا ملطوعين هنا بقالنا ساعه و اكتر ... صحيح ما هى بالقلع
عمران يضحك
عمران / هروح اشوف قدامنا قد ايه... لو سمحتى تهدى و تستنى هنا
مهره / يا نهار ابيض دا انت تؤمر
عمران / ربنا يهديكي
مهره / امين
عمران يمشي و يدخل مكتب السكرتيرة
مهره / و الله لاقول لابوك
..........................
فى عربيه جابر بره
جابر سايق و جنبه مختار و نجاه ورا بتنفخ من الزهق
نجاه / مش كنت نزلت معاهم هم اتاخروا كدا ليه
جابر/ طب هو لو حد سأله هيقول جوزها انتى هتقفى بقي لوحدك بره لحد ما يخلصوا يعنى و لا كنتى هتعملى ايه
نجاه / زهقت من القاعده
مختار / هكلمه اشوف ايه الدنيا وصلوا لفين
جابر / كلمت لهم الجماعه
مختار / اه ما تقلقش كلو تمام
نجاه / طب لو عرفوا انه طلقها هيحصل ايه
مختار / الطلاق ما اتسجلش رسمي على الورق و بالقسيمه اللى معاه هى مراته
جابر / ربنا يستر من العك ده
مختار يبص لجابر و يبص قدامه و يتنهد
مختار / امين
بنات ماشيين قريب من العربيه و شباب ماشيين وراهم بيعاكسوهم البنات تلف و تشتم و الولاد يردوا و الموضوع يكبر و الناس تتلم
نجاه تيجي تفتح الباب تلاقى اللوك مقفول
نجاه/ افتح الباب لو سمحت
جابر / الرجاله هتتصرف ما تقلقيش
مختار / طب و انا من ضمن الرجاله دول و لا انا ايه وضعى
جابر يبص فى المرايه الرجاله نزلوا من العربيه التانيه و ادخلوا
مختار / انا بكلمك يا جابر
جابر / دا فخ
مختار / انت بقيت برانويا
جابر / انا عارف انا بلعب مع مين
مختار / لا حول و لا قوه الا بالله ... تمام
نجاه / انت هتسكت له البنات هناك بيتعاكسوا
جابر / كل الرجاله دى و انتى اللى هتجيبي الديب من ديله يعنى و لا ايه اهدى شويه
مختار / اهدى يا نجاه جابر ليه وجهه نظر
نجاه / طبعا
جابر يبص على نجاه فى المرايه يلاقيها مضايقه يبص قدامه بكل برود و مختار متابع الخناقه
.....................
فى الكليه عند عمران
عمران يخرج من مكتب العميد يلاقي على فى وشه
على / ما شوفتش فى بجاحتك
عمران / ليه ما عندكوش مرايات فى بيتكوا و لا ايه
على / انت عيل سافل و قليل الادب
عمران / و صوتى ممكن يعلى و اقل منك قدام الناس كلها و افضحك و اللى ما يشترى يتفرج فاهدى كدا
على / لو فاكر ان الموضوع خلص على كدا تبقي غلطان
عمران / لا ما انا وصلنى انك حاولت تسحب ملف مهره بس الحمد لله ربنا وقف لينا ولاد الحلال و كل حاجه رجعت زى ما كانت بالظبط
على / هو انت مش طلقتها مالك بيها بقي
عمران / يمين بالله افوق من اللى انا فيه و ارد لك القلم اللى اديتهولها عشره و بيني و بينك الايام يا على يا دسوقي و اه انا و بنتك ما اتجوزناش اصلا عشان أطلقها دا كله حبر على ورق عشان اخلصها من القرف اللى وحلتها فيه انت و ابنك المدمن
على يتعصب
على / انا ما اسمحلكش
عمران يرفع حاجبه و يبرق على يلم نفسه
على / انا ابنى متربي احسن تربيه
عمران / نفس تربيه ابوه ... عن اذنك عندى محاضره
على / محاضره ايه انا مقدم ...
عمران / ابقي ادخل اتكلم مع العميد فى الموضوع ده ... لم نفسك معايا اللى له ضهر ما بينضربش على بطنه و انا ضهرى شديد اوى عليك يا ابن الدسوقي... عن اذنك
عمران يمشي
على / و الله لاوريك يا ابن الكلب يا واطى
على يدخل للعميد و فى اتنين موظفين واقفين بعيد رامين ودانهم
الاول / اللهم لا شماته صحيح
التانى / ولا يبان عليه بس اقولك برد نارى من الراجل السو ده شوف يا اخى عنده فلوس قد ايه و برده كل شويه يسقط لك نص الدفعه عشان يلهف فلوس السمر كورس فى كرشه ... راجل ناقص دا كان مشغل نص الطلبه و المعيدين فى شركته بالسخره
الاول / يا عم انا بقول ايه و انت بتقول ايه مش بنته دى اللى اتامرت على ابن دكتور رفعت ابو خطوه
التانى / صحيح !!! يا نهار ابيض ازاى سقطتها دى من دماغى دى كانت خناقه اتفرجت عليها الكليه كلها قال ايه انا بنتى ما تاخدش واحد اقل من مستواها اديها خدت عيل من ورا ابوها اهو
الاول / بس دا مش اى عيل برده دا عمران الزيني يعني فلوس ما لهاش اول من آخر دكتور رفعت جنبه برده ناقصه صفر و لا اتنين على اليمين
التانى / الله امال هو متعصب كدا ليه
الاول / شكلها جوازه شمال ... عرفى يعني اصل لو غير كدا كان هيخبى ليه ما كان عمل فرح و كاد الاعادى
التانى / عرفى ايه يا جدع دا الواد عينه ما بتترفعش من الارض من سنين
الاول / ما انت ما تخافش غير من دول و بعدين مش شايف عينه قويه فى الراجل ازاى اكيد كسره و كسر عينه و جاب بوزه الارض
التانى / بقولك ايه دول عالم أكابر ما لناش دعوه بيهم احنا لا سمعنا و لا شوفنا و لا لينا دعوه
الاول / طبعا يا عم دى برده اعراض ولايا ربنا يسترها على حريمنا
التانى / امين يا جدع امين ... يلا يلا روح شوف كنت رايح فين يلا
الاتنين كل واحد فيهم يمشي فى اتجاه الاول يطلع الموبايل و يتصل بحد
الاول / ايوه يا دكتور رفعت ازى حضرتك اخبار حضرتك ايه يا رب تكون بخير .....
............................
فى شركه إنتاج
مروان قاعد مستني جنب واحد صاحبه و بيفرك
صاحبه / اهدى يا عم مالك
مروان / احنا بقالنا قد ايه قاعدين انت مالى ايدك من الجماعه دول
صاحبه / يا عم ان كان لك عند الكلب حاجه قوله يا سيدي
مروان / لا كلب و لا قطه قولتلك انا رتبت الفلوس خلاص و هعملها على حسابى
صاحبه / و هى اول مره يا مارو نجازف فى الطلعه الأولى و نخسر خلينا ناخد الزقه الاولانيه
مروان/ اما نشوف اخرتها
صاحبه / بقولك ايه هو مفيش اى اخبار عن رامى
مروان / ماله رامى
صاحبه/ ايه ده هو انت ما تعرفش اصلا !!! الواد اختفى خالص و أهله قالبين عليه الدنيا و لا بيروح الشركه و لا اى حد يعرف عنه اى حاجه
مروان / تلاقيه غطسان مع واحده هنا و لا هنا و هتلاقيه ناطت لك تانى زى فرقع لوز
صاحبه / من بقك لباب السما لحسن الواد فادى بيقول انه احتمال يكون مات فى حوار جلال
مروان / حوار ايه ده
صاحبه / يووووه ايه يا عم انت كنت مهاجر و لا ايه ... مش الوكر بتاع جلال انفجر باللى فيه دا احنا متسوحين من وقتها
مروان / ما اعرفش حاجه عن الموضوع
صاحبه/ امال انت بتذكر منين يا صاحبى
مروان يبص لصاحبه
مروان/ بطلت
صاحبه يضحك بسخريه
صاحبه / ما فيش حاجه اسمها تبطيل... مش على اخوك
مروان / بقولك ايه ... الجدع ده شكله بيلعب و مش هنوصل معاه لاى حاجه انا ماشي
مروان يقوم يقف و صاحبه يحاول يمنعه باب مكتب يتفتح و تطلع منه بنت جميله
البنت / تمام مستر فؤاد مستنيكوا جوع اتفضلوا
صاحبه / ما تجيش فى الاخر و تخربها بقي ضحكتك الحلوه و ادخل ثبت الراجل
مروان يبتسم بسماجه و يدخل و صاحبه وراه البنات تقفل وراهم الباب و تبص على كاميره فى الركن تروح تقعد
.............................
فى شقه نجاه
مهره و عمران واقفين يتخانقوا و نجاه و جابر و مختار قاعدين بيتابعوا و حاطين ايديهم على خدهم
مهره / لا بصيت و جريت وراها
عمران / لا ما احنا مش هنقضي اليوم كله نعيد و نزيد
مهره/ طب اشهد انت يا عمو لو حد شافه و هو بيعاكسها و اتخانقوا معاه
عمران / عاكستها كمان !!!
مهره / ايوه انا موقفى كان هيبقي ايه فى الخناقه يعني
عمران / اعملى مش عرفانى
مهره / يا سلام!!
عمران / ابوس ايدك يابا بقي
عمران يسيب الشقه و يرزع الباب وراه مهره تدخل اوضتها و ترزع الباب
نجاه / انا هقوم اتكلم معاها
مختار يهز راسه نجاه تقوم
جابر / هو ايه اللى حصل ده بقي
مختار / بجمله الجنان اللى عايشينه
مختار يطلع الموبايل و يتصل بدياب
مختار / السلام عليكم هستني كتير يعني و لا ايه
دياب / ما انا لو لاقي تفسير للى قدامى كنت كلمت حضرتك لكن مش عارف اقول ايه
مختار / يعني ايه الكلام ده
دياب / انا هبعت و حضرتك احكم
مختار / تمام
مختار يقفل
جابر / فى ايه ؟
مختار / يا خبر بفلوس ثوانى و يبقي ببلاش الفيديوهات بتحمل
مختار يفتح اول فيديو لامايا بتعدى جنب عمران تانى فيديو لامايا داخله مدرج تالت فيديو لامايا رايحه الخزنه رابع فيديو امايا واقفه بتضحك مع بنات فى الكافتيريا خامس فيديو لامايا قاعده على كبوت عربيه و كلهم فى نفس التوقيت و بنفس اللبس و التسريحه
مختار / دا ايه ده بقي ان شاء الله
جابر / اسمه جليتش فى الكاميرات و تاتش من حبيبك
مختار يتصل بدياب
مختار / هى الفيديوهات دى
دياب / مش ملعوب فيها نهائى و مشينا ورا كل بنت فيهم لحد ما روحت فى مكان شكل و هبعت لحضرتك عناوينهم كلهم
مختار ينفخ
دياب / انا كلمت واحد حبيبي هيسالي عنهم و ربنا يسهل نوصل لاى حاجه
مختار/ مش هتوصل هتتسحل على الفاضي
دياب / ابقي حاولت
مختار/ تمام ربنا يعينك ... سلام
جابر / طبعا حضرتك مش مصدقني ان الهبل ده كله لعب اللى ما يتسمى
مختار يبص لجابر و يقوم يفتح الباب و يمشي
جابر / مش قادر يسمع عنه كلمه طبعا ... و ماله ... مش فارقه
.....................
فى اوضه مهره و نجاه
نجاه / يعني انتى مش حاسه ان رد فعلك اوفر اوى
مهره / يعني انتى لو مكانى مش هتضايقي
نجاه / لو هو فارق معايا اكيد هضايق
مهره / هو واقف معايا يا نجاه
نجاه / بس عمران عمره عمره ما يبص على اى بنت بنظره وحشه و هو شرحلك موقفه اكتر من مره و قالك ... دا انا بصراحه مستغربه انه استحمل كل الكلام السخيف ده
مهره / يعني انا الغلطانه فى الاخر 
نجاه / لا انا فاهمه وجهه نظرك بس انتى الفتره دى عصبيه زياده و جرحتيه قدامنا كلنا و اتهمتيه انه عاكس البنت
مهره / انا ما قولتش كدا
نجاه / قولتى يا مهره قولتى قدامنا كلنا
مهره تبص الناحيه التانيه و تتنهد
نجاه / اهدى و فكرى تانى فى تصرفاتك انتى شايفه انها منطقيه انتى شايفه ان دى مهره اللى نعرفها ... انتى عارفه عمران من سنين عمرك شوفتى منه حاجه وحشه عمرك شوفتيه اتعدى حدوده معاكى او مع اى بنت
مهره تهز راسها لا
نجاه/ أمال بقي ايه سر الهجوم ده
مهره / الموقف كان سخيف صدقيني
نجاه/ مصدقاكى بس انتى المفروض تبقي واثقه فيه اكتر من كدا و بعدين يعنى هتبقي قدامه مهره و يروح يبص للبت المسلوعه دى
مهره / و انتى اش عرفك انها مسلوعه
نجاه تضحك
مهره / بتضحكى علي ايه
نجاه / و لا حاجه و لا حاجه ما تاخديش فى بالك
مهره / لا هاخد تقصدى ايه
نجاه / ما اعرفش قوليلى انتى ... انتى اضايقتي اكتر انه بص على البنت و هو معاكى و لا انه بص على البنت عموما
مهره / ما تصيعيش عليا يا نجاه و قولى اللى فى دماغك دوغرى انتى لا بتعرفي تلفى و لا تدورى و لا انا فيا دماغ افهم التلميحات
نجاه / ماشي هخليني انا الكبيره ... اقصد انتى غيرتى
مهره / بطلى هبل دا زى اخويا
نجاه / تمام هقوم اشوف هناكل ايه اهدى كدا و راجعى نفسك
مهره تبص الناحيه التانيه نجاه تتنهد و تمشي
مهره / كدبوا الكدبه و صدقوها قال غيره و حب و هبل
.......................
فى شقه تانيه
عمران / اعمل اكتر من كدا ايه انا اصلا بقالى كتير ما بفتحش بقي و لا بشتكي حتى و مع كدا ما حدش حاسس اصلا هو انا المفروض افضل استحمل و امتص لامتى و ليه اصلا انا مالى بكل ده
مختار / ما حدش طلب منك حاجه و ما حدش هيلومك لو اخدت اى رد فعل
عمران / و هى بقي هتستحمل رد فعلى على الهبل اللى بتعمله طول الوقت ... دى ... دى بقت مستفزه جدا
مختار / تستحمل و لا لا يفرق معاك فى ايه اللى يتعدى حدوده معاك حطه عند حده
عمران / يعني واحده خسرت حياتها و انصدمت فى كل اللى حواليها و أهلها رافضينها و اخوها باعها و عاشت كل ده هاجى انا كمان عليها يعني
مختار / و ما دام انت عارف كل ده مضايق ليه ما انت اكتر واحد مقدر ظروفها و اكتر واحد عارفها و عارف هى كانت عامله ازاى البنت مسكينه و بتمر بظروف وحشه و طبيعي تبقي عصبيه و عنيفه و مش على طبيعتها هنعمل ايه
عمران / ما اعترضتش بس هو انا مش من حقى اكون عصبى و عنيف و مش على طبيعتى و لا انتوا شايفينى فله
مختار / اولا انت راجل تستحمل عاوز تتعصب و تتعانف روح الجيم و طلع الطاقه اللى جواك و تروح البيت لوح تلج تدخل عليهم بابتسامه و لا كان فى اى حاجه
عمران / ثانيا
مختار / ثانيا ما حدش هيقدر حزنك على فرسك الا الخيال اللى زيك و دول مش كتير
عمران / ثالثا
مختار / مفيش ثالثا
عمران / تمام
مختار / تحب تروح الجيم
عمران / تؤ هنام
مختار / مش وحش
عمران يهز راسه و يسيب مختار و يدخل اوضه من الاوض
.......................
فى شقه نجاه
نجاه بتحط الاكل جابر يقوم يساعدها
نجاه / مش عاوزه منك حاجه
جابر / افندم
نجاه / ما تساعدنيش مش مستنيه مساعدتك
جابر / ماشي يا وحش بس على الاقل اسمحيلي ارتب المكان اللى هاكل انا فيه و لا انا ما ليش اكل اصلا
نجاه تبص له و تمشي يروح وراها
جابر / طب انا عملت ايه طيب
نجاه تبص له
نجاه / ما عملتش و دى المشكله نيمتنى و كبرت دماغك
جابر يبص وراه
جابر / ما حصلش بس الموضوع محتاج وقت اصبري
نجاه / جابر
جابر / اقسم بالله ما ساكت و صدقيني مش هتطول بس خلينا نلعبها صح عشان ما تجليش
نجاه / طب ممكن تشاركنى اللى بتعمله
جابر/ حاضر بس مش دلوقت
نجاه / ليه بقي ان شاء الله
جابر / لما يبقي فى ايدي حاجه اصبري
نجاه / بص يا جابر انا بثق فيك جدا بس يمين بالله لو طلعت بتنيمنى و لا بتسرح بيا
جابر / امتى عملتها انا دى امتى
نجاه تبص الناحيه التانيه
جابر / هخليه يعترف بكل حاجه بس اصبري عليا
نجاه تهز راسها و تناوله طبقين يبتسم و يروح يوديهم
.....................
فى فيلا على
مروان / يا بابا بس اسمعنى
على/ انا مش هعيش عمرى كله بتكلم فى نفس الموضوع انت ايه ما بتفهمش ما بتحسش انت مش شايف القرف اللى انا فيه
مروان / يا بابا انا مش طالب من حضرتك اى حاجه غير انك
على / بقولك ايه بقولك ايه انت شكلك واخد قرارك كالعاده و انا رأيي تحصيل حاصل فدلوقت اهو بقولها لك يا البيت ده يا الهبل اللى فى دماغك ده انت فاهم و لا لا
مروان / يا بابا حضرتك ليه رافض تسمعني حتى انا المرادى مش عاوز فلوس و لا فى اى حد بيحاول يستغلني زى ما حضرتك كنت بتقول المرادى الشركه هتنتج لى سينجل على حسابهم و هتتكفل بكل المصاريف و الدعايا
على / يا ابنى افهم ... افهم ... الوسط ده مش مكانك انت جربت تدخل وسطهم اكتر من مره كسبت ايه ... انا مش عاوزك ترجع للقرف اللى كنت فيه
مروان / يا بابا انا
على / انت ليه بتكرهنى اوى كدا ليه مش عاوز تفهم انى بعمل كل ده عشانك انت ... انا كل يوم بشوفك فيه فى البيت بقول لنفسي بكره يفوق بكره يفوق بكره يفوق يا ابنى انت مكانك فى الشركه جنبى
مروان / انا فنان يا بابا
على / اعمل اللى انت عاوزه انا رميت طوبتك خلاص ... انت زى قلتك بالنسبالى
على يسيب مروان و يمشي يقابل ايلين على السلم يبوس راسها و يعدى و مروان متابعهم ايلين تنزل
ايلين / انا خارجه عاوز حاجه
مروان يهز راسه لا ايلين تخرج و مروان يقعد و هو مضايق يبص على الباب ورا ايلين و يرجع يبص قدامه و يهز راسه ماشي و يقوم يطلع أوضته
........................
فى اوضه عمران
عمران قاعد فاتح اللاب توصله رساله يبص فى الموبايل يلاقي مهره يفتحها
مهره / انت صاحي
عمران يتصل
عمران / السلام عليكم ... خير فى حاجه و لا ايه
مهره / انا اسفه انى بكلمك فى وقت متأخر اوى كدا بس انا ما عرفتش انام الا اما اعتزر لك
عمران / ما حصلش حاجه
مهره / تمام
عمران / انتى كويسه يا مهره
مهره / هتفرق فى ايه ... الحمد لله ... ما فيش غيرها
عمران / هانت فتره و هتعدى
مهره / باذن الله ... ما سالتكش عملت ايه فى الكليه و قابلت بابا و لا لا ... اكيد يعني قابلته و اكيد قالك كلام زى قلته انت ما لكش ذنب فى كل ده انا بجد اسفه اوى
عمران / انا ما كنتش بطيئه اصلا و لا بقدر احترمه من زمان اوى ... من اول مره شوفته فيها و انا بحتقره اصلا فمش حاسس باى فرق ..  الفكره كلها ان حمل احساسي انى بنافقه فى كل مره بحاول احسسه انى بحترمه فيها اتشال من على كتافى مش اكتر
صمت
عمران / انا اسف ما كانش لازم اتكلم كدا هو فى الاول و الاخر ابوكى برده انا ... أنا آسف
مهره / تمام ... انا اسفه تانى انى كلمتك فى وقت زى ده هسيبك تكمل اللى كنت بتعمله... تصبح على خير ... سلام
عمران/ سلام
عمران يقفل و يرزع التليفون بزهق
عمران/ يخربيت ام صراحتك يا اخى
………………………..