_سهم الغرام_♟️
_ب_: 25
_قداش ماتقاليتي توزني ابنت ناس_
_وصلات وقيتة لعصر_
غفران طلعات لبيت ديالها جبدات قفطان ديال جوهرة غزال فلبيج منبت صدرو وشوية فيديه ودارت ليه حزامو وبانت طايتها لعامرة حيدات زيف على شعرها وتطلق حتى لخصرها وجلسات وبدات كتقاد مكياجها لي بغاتو يكون خفيف وميبينهاش خايبة .
اما لبنيات كل وحدة واشنو لبسات وتزينو بخرو دار بريحة لعود .
فدار لعريس لي لبس سروال بيض خفيف ديال لقندريسة وشوميز فلبيض وسلهام ديالهم فلزرق [بحال عباءة خفيفة] وبليغو فلزرق شعرو لي مقاد وريحتو لي فايحة ، اما للام ديالو وختو وخوه ومرتو لبسو قبل منو.
هزو طيافر لي فيهم كولشي وحطوهم فطونوبيل وركبو كلهم ومشاو قاصدين دار لعروسة .
وصلو لطونوبيل وهي طل نور من لفوق وهي تضحك وبدات كتغوت .
نور: واااغفران واااربي واهاهوما جااو وااههه.
غفران: وصاااف باراكة متخلعي فيااا
تمو داخلين وهي تلقا ليهم زهرة ورحمة ولحاج ميلود ورشيد وهوما فرحانين سلمو على بعضياتهم ورحبو بيهم دخلو لصالون تسالمو مع لعائلة لي فصالون من غير نور وغفران لي مكاينينش .
نور: غفران كون غير درتي ضفران غيجيوك واعرين .
غفران: لا غير خلي ليا صباعي عاادين ونقيين من دوك تخربيق دغيا كيتهرسو.
نور: ههه عندك لحق بلحق خاصك تولفي عليهم .
غفران: مبغيتهمش ههه.
لحاج ميلود: سيادي مرحبا بيكم وصحبتنا وصحبتكم وتبارك الله على ولدي تاج دين .
تاج دين[تبسم]: الله يكبر بيك الحاج .
لحاج ميلود: هذا لمضنون فيك اولدي.
لحاج محمد: الله يكبر بيك الحاج ودار لكبيرة راني عارف .
لحاج ميلود: هذا لمضنون فيك اصاحبي هه.
لحاج محمد: هذاك علاش بغيت نقول ليك ليوم ماجينا لمهاودة ولا لفرقان لغاا بغيت نقولك جينا طالبين راغبين فلبنت ديالكم لمصونة لولدنا تاج دين .
لحاج ميلود: ومرحبا بيك ايلا بغاو بعضياتهم وتقبلوهم وبغاو يديرو ليد فليد باش يغلبو زمان فحنايا معلينا نقولو غير الله يكمل بلخير اخاي .
لحاج محمد: هذا لي كاين الحاج، فاين هي لمصونة.
قبل ميكمل كلامو تمات داخلة هازة صينية فيدها كيف تولفنا فعاداتنا بزينها وسرها لي طاح عليها عينين تاج دين طاحو عليها وتفكر فين فايت شافها وعاد عقل وعرف بلي هي مكتابو تبسم وولا جمع ضحكتو وقبل ميشوفوه بدات كتسلم وعينيها فلرض نابتة وصلات ليه يدو لعريضة لي فيها كورميطة فضية شافت فيها وسلمات ويدها كترعد اما قلبها كيسمع انغامو برا من صدرها شداتها نصيرة وجلساتها حداه علات عينيها غير بشوية ولحشمة طاغية عليها تاتلاقاو مع عينيه لي فيها وصمت داز بيناتهم وعطا نضرتو .
تاقطع حبال نظراتهم كلام لحاج ميلود لي تبسم، اما مونة مخنزرة كثار من بهية لي فلتات ليها لحناء ديال لعروسة لي حيداتها ليها من يديها مغنية .
تاج دين[نطق بصوت باح ]: قبل منعقدو كلامنا ونعطيو فهاماتنا لازم نتكلمو انا وياها ونتفاهمو على شروطها وشروطي وعاد باش نعطيو كلامنا .
لحاج ميلود: اييه اولدي مقلتي عيب طلعو لصالون لفوق وتفاهمو .
يتبع...
