_سهم الغرام_♟️🫀
_ب_: 113
_اييه على يامي كلشي راح ، لي حسبتو حبيبي غذر بيا وراح ، ولي عطيتو قلبي دار دخل ليها وقطع ليها لوتار ، اييه ايامي اش ندير وفاين نعطي بوجهي وانا قلبي كيتقطع كثر من عقلي ، اش ندير بلي فكرشي نقول ليه بلي باك غذار ولا نسيه ونعاود ليه قصص كتار ، مبقيت باغية والو من غير نحط راسي على وتد لمقابر ومانبقا نحتار_
غفران دخلات وجلسات لقاتهم جالسين رحمة وحبيبة وزهرة اما لخرين كلهم مشاو بحالهم.
رحمة كتسلم عليها: خبار لخير ابنتي ياك لاباس وجهك مابشرني بخير.
غفران سلمات عليهم: غنطلق.
زهرة: اويلي وعلاش ابنتي ياك لاباس!
غفران: امي راه لقيتو كيخوني مع مونة اميييي .
سوسن شدات على فمها: اويلي .
غفران: اممم وطلبت طلاق معندي مندير بيه.
حبيبة: وابنتي وهاد لولد لي فكرشك اش ديري معاه.
غفران: غنولدو ونبدا نخدم عندي ديبلوماتي وقادرة بولدي.
رحمة: لاوااه لاواه لي سمعك كتقولي هكذا يقول غير مقطوعة من شجرة.
غفران: انا قلت ليكم.
سوسن: صافي اختي باركة من لبكا صافي.
غفران: كيبان ليك اسوسن هاد شي عادي اممم .
سوسن: عارفة قاصح ولكن صبري اختي صبري.
غفران: اشمن صبر ااشمن صبر اختي.
رحمة: واحنينتي كليتي شي حاجة ولا باقية على الله.
غفران: مكليتش ومقدراش معندي منين يدوز اماما .
رحمة ناضت: لابد تاكلي على وجه ديك شي لي فكرشك لا ابنتي لا.
مشات رحمة تجيب ليها لماكلة اما زهرة قربات لحداها .
زهرة: وزعما متكونش هي لي دارت عليه امم!
غفران: مكيهمنيش امي حيث هو لي كان بيدو كولشي ملي جات عندو للبوتيك يقول ليها سيري اختي ونديها لشي كافي وندوي معاها ماشي فبيت تبدال.
زهرة: اييييه عندك صح وليني راه يمكن لعبات ليه بعقلو.
غفران: وخا منعرف اش تقولي امي مغرجعش ليه حيث كان خلاها برا يديها لقهوة ويهضر هو وياها ملي يسالي معاها يرجع لدار اميييي متعصبينيش.
زهرة: صافي احنينتي صافي صافي، سوسن نعذبك ابنيتي طلعي ليها باليزتها لبيت الله يرضي عليك.
سوسن ناضت بزربة: هي لولة امي راهية ختي غفران انا نطلعها.
جابت ليها رحمة لماكلة وحطات ليها غفران بدات كتاكل تانطقات حبيبة.
حبيبة: وابنتي حيدي طلاق من راسك اش داك لشي طلاق درك عاد هي غدي تفرح ويعجبها حالها ابنتي شدي فراجلك.
غفران: متقولي ليا والو اميمتي راه مغرجعش ليه وبغيت طلاق طلااااااق طلااق.
حبيبة: وصاف احنينتي صافي لتعصبيشاي انا غير هضرت وصافي.
غفران: فين هي خالتي مغنية!
رحمة: علاه ماشي جا وراها داك لبغل ديال راجلها داها بزز من دك ساع مولات هضرات ولا قالت حتى حاجة ولخبار عليها تقطعات عينا نعيطو والو.
غفران: واش بصح وعلاش خليتوه يديها.
رحمة: بزز منينا ابنتي وهي بغات تمشي مبغاتش صداع.
يتبع...
