_سهم الغرا
_ب_: 117
جمعو لماعن مشات غفران غسلاتهم وخلاتهم كيوجدو لغذا ويتهاودو وهي طلعات لبيتها جلسات على ناموسية وحلات سرجم وبدات كطل على شتا كطيح وناس درب كل واحد اش كيدير شي مخبي ولادو من شتا وغادي بيهم للمدرسة شي شاري لخبز شي جايب لخضرا كل واحد واشنو كيدير تاسمعات تيليفونها كيصوني لقات نمرة تاج دين مجاوباتوش لاحتو وبقات كطل تابانت ليها طونوبيلتو داخلة لدرب قلبها مشا وجا وبقات عينها على طونوبيل تاحبسات فراس درب .
تاج دين لي توحشها بغا يدوي معاها بغا غير يشوفها محتاجها غير يشرح ليها يقول ليها اي حاجة وقف بطونوبيل علا عينو فدار لقاها فسرجم كطل خاف عليها من لبرد وجاتو لغيرة انها كطل شحال من واحد يكون شافها .
غفران متحملاتش تبقا تشوف فطونوبيلتو وتتفكر اش دار فيها سدات سرجم وجلسات مربعة رجليها وكتفكر اشنو دير باش تلاهي راسها جبدات ستيلو وورقة من لمجر لي مكيخطاوش بيتها وبدات كتكتب وتعبر على باش كتحس شوية حلات سرجم دخل لبرودة وطلات لقات طونوبيل تاج دين مشات .
غفران: سير سييير كيفما مشيتي غيجي نهار لي غتمشي حتى من قلبيييي سيييير .
بقات كتبكي وتتعصب فلخر تكات كترتاح حيث حسات بشي حريق فكرشها تاني بقات هكذاك تاسمعات رحمة كدق.
رحمة: بنتي محتاجة شي حاجة!
غفران: لا اماما شكرا.
رحمة: واخة ابنتي موهيم غدي ندي لغذا لسوسن ونجي.
غفران: شتا اماما عليك .
رحمة: ماشي مشكل.
غفران: تسنايني نلبس عليا لكاب ونمشي معاك بغيت نسرح رجلي ونشم شوية ديال لبرد.
رحمة: واخة يالله.
لبسات غفران عليها كاب فلاسود وغطات على كرشها لبسات تقاشر وبانطوفة فلاسود وخرجات من لبيت شدات فرحمة وخرجو بجوج غادين.
غفران: تعقلي اماما فاش كنت صغيرة نضل شادة فيك هكذا.
رحمة:اييه ابنتي ودبا نتي غتجيبي لينا شي فنيكيشة ولا فنيكيش يوليو يشدو فيك.
غفران: ههه اه ايمتا ديك نهار يجي.
بقاو غادين وكيدويو تاوصلو للمكتبة خرجات سوسن شدات عليها لغذا ودخلات وهي كتحس برحمة لام ديالها ماشي غير خالتها ورجعات رحمة هي وغفران تاني لدار.
يتبع...
