_سهم الغرام_♟️🥂
_ب_: 70
_دموعي سالو وشعري طاح ولحبيب ديالي راح اش ربحتي ملي فكيتي لي عشي ولكرشي عمرتي وما حشمتي حشومة عليك ولكن راك فزتي سحورك قضا عليا وما بيا وفرقني مع لي عزيز عليا_
صبح صباح لي مضبب وشمسو مخبية بين لغيوم ناض دخل لدوش غسل وجهو وتوضا مشا لصالون لقا هشام جمع لفراش لقا اخ نور دين حط ليه صلاية صلا جوج ركعات ديال صبح وجلس بداو كيحطو لفطور وهي تجي نهاد لابسة شورط وديباردو فلبيض كيبين صدرها وكتافها جلسات وشافت فيه هو لي حاذر راسو هو وهشام ممسوقينش فطرو فهدوء وناضو سلمو على نور دين وخرجو شدو طريق باش يرجعو لديورهم .
فدار لحاج ميلود لي فاقو كيف عادتهم صلاو لفجر وبداو يطيبو فاتاي ولقهوة ويسخنو فلمسمن ولحرشة ولي تم وكيحطو تجمعو كلهم تاتمات جاية عندهم غفران لي لون وجها صفر وذابل لقات سلام لابسة سروال فلاسود وتيشورط فلزرق وشعرها جامعاه.
لحاج ميلود كيكب ليهم اتاي: بنتي اش تم ياك لاباس! لون وجهك مخطوف!؟
غفران تبسمات : والو اباجدي غير عيانة شوية وصافي.
عبد رحمان: ايوا الله يشافيك ابنت خويا هاديك غير عين شر قاستك.
رحمة: فاين هي خالتي مغنية هاد صباح مبانتش ليا !
حبيبة كتقطع فلمسمن: قالت ليا عندها شي غراض ابنتي شوية وتجي.
وهوما باقيين كيفطرو شوية سمعو دقان ناض نوفل بزربة وحل لباب لقاه تاج دين واقف سلم عليه وتم داخل وقف عليهم غفران لي حانية راسها كتشرب اتاي وساهية تاسمعات صوتو وهي توحل ليها بدات كتكح.
تاج دين مشا ليها بزربة كيضرب ليها: بشوية عليك بشوية عليك.
غفران دفعات ليه يدو: صافي مكاين والو .
لحاج ميلود: ولدي جلس تفطر.
تاج دين جلس: لا غير بصحتكوم فطرت.
لحاج ميلود: لاوااه اولدي وخا غير كاس ديال لقهوة اولدي ترد لمجاج راك جاي على طريق كيفما بانتي ليا وحنايا ليوم فقنا معطلين لبارح منعسناش بكري.
تاج دين شد لكاس على زهرة: الله يخلف عليكم شكرا ايوا مكاين مشكل الحاج.
يتبع...
