_سهم الغرام_♟️🫀
_ب_: 48
_تسريع الاحداث_
وتراه في جبر الخواطر ساعياً
وفؤاده متصدع مكسورٌ .
ليلة هي ليلة الحناء لعريس ولعروسة وتافقو بيناتهم باش يجمعوهم فدار لعروسة ويتجمعو كلهم ، اش منك يابخور ويامباخر وريحة وراق الحناء والريحان
صالونات مبخرين ولعيالات مكفطين ومشمرين وعلى شغالاتهم واقفين ليلة حنة بنتهم والحنة جاية من جنة لالة لعروسة يالله جات من لحمام بشموع ومعطرة كيف اي عروسة مغربية دخلات وقصدات بيتها لي فيه تكات ترتاح حيث ضربات تحميمة ديال لالة لعيالات باش تقدر فلعشية تكون زوينة ، ريحة دجاج لمحمر ودغميرتو كتشم من راس لحومة دار عمرات بلحباب لقراب ولبعاد لي جا فرحو على فمو وبغضو مخبيه فقلبو ، فلبيت لي قريب لسطح جالسين حبيبة وزهرة ورحمة وحتى طيابة قدامها شلا طناجر عامرين دجاج وفيدها سفود[قطيب ديال شوا] مرة مرة وتتقب فتجاج يدخلو طياب ولعرق معاها بقوة لبخار اما رحمة وزهرة وحبيبة شادين معاها فلحديث وكينقيو فلوز ويلوحو فيه فلمقلة كيتقلى وبهية كتحرك طلعات اسية وتابعاها كوثر كيوصلو فطباسل طاوس لعندهم اما لبصلة تعاونو عليها بكري وكملوها .
اسية شدات على جنبها وردات قصتها مور ودنيها: ففف والله تاعييت انا.
كوثر: حتى انا لحق يتقال وبزاف دروج .
رحمة: ايوا قالك لي كيقول لعرس ساهل يسقي ليه لما .
زهرة: وفين هي لحناية !
كوثر: ههه نقاشة امي راه دوزنا عندها قلبيلة شوية تلقايها جات .
زهرة: امم ايوا صاف غير عنداكوم شغلكم مانعرف مانعرف .
لتحت كانت عيشة ورقية وشلا عيالات من لحباب جالسين وقوة لهضرة ولهاراج وصداع وباب دار محلولة وشلا ولاد وبنات صغار كيلعبو تاتسمع دقات بجهد فلباب لي خلا عيشة تنوض وتشوف شكون كان راجل كبير فسن لابس جلابة بيضة وداير شاش على راسو [زيف فلبرتقالي] هاز عكازو فيدو وجوج فرارج معاه كيركطو ومرة كبيرة لابسة جلابة فلخضر وزيف فلزرق عامر ورادي هازة صاك وقفة فيدها .
عبد رحمان: واااهلن وااابنت خويييي وكيف راك ومبروك ماراكم ديرو فيييه وااابنيتي .
عيشة ضحكات وعنقاتو وباست ليه يديه وراسو: ومرحبا اعمي شحال هذا مشفنا وجهك اعمي دخلو مرحبا بيكم لاش عذبتو راسكم.
خديجة كتسلم على عيشة : واابنت لوسي تيي شمن عذاب وتي راه مقداتنا فرحة ليكم ومبروك ماكاديرو لزينة لبنات .
عيشة: دخلووو دخلو مرحبا بيكم .
دخلاتهم لصالون لاخر لي كان خاوي وجلساتهم وهي تعيط لرقية سلمات عليهم وطلعات تعيط على رحمة وزهرة وكولشي وعيطو لحاج ميلود لي كان برا دار هو وولادو كيجيبو اش خاص .
يتبع...
