_سهم الغرام_♟️🫀
_ب_: 54
_فدار لحبيب كولشي قريب_
ملي تجمع لمة وتكثر لغا ولكلمة ، قولها ونضحكو عليها توفي دنيا وما فيها ، تلقا لجد مسند ولجدة ركبة ومركد ، بعد لواليدين لي هوما ضو لعينين لي بلا بيهم نبقا وحيدين ، تلقا لحفيد مع لحفيد وولد لخالة مع ولد لعم يجمعو ويتفاهمو غذا يوليو واحد مسند واحد وشادو ويوريه طريق لي يوصلك ليها غير صديق ويوقف معاك فوجه لعدو وزنديق يااامن تجلس فلمجمع تخشي راسك وتنفخ قالك لي ينفخ على لبن يشتاقو ولي ينفخ على حبابو ضور عليه ليام ويلقاهوم طارو .
جالسين مجموعين من غير غفران لي فبيتها كتلبس حيث عروسة خاصها تبان وتزيان لبسات قميص جوهرة مطروز ديال صم فلبيض وزيف فلبيض قادات مكياج خفيف ولبسات بليغة فرجلها بينات حنتها لحمرة لي زينتها رشات من عطرها وهبطات وسلمات عليهم وجلسات مابين امها وعكوزتها .
رحمة: وتباارك الله وعلى بنيتي جيتي غير بيضة وصاف.
زهرة تبسمات ونطقات ولكلامها فرزات ولعينين لعدا عطات وكلاشات: عين جاااار وعين فاار ولي شافت فبنيتي بضر ولغدر بغيتها تعواار.
حبيبة: واامين اميمتي وتبارك الله عليك ابنيتي .
غفران: الله يحفظكم ليا ياربي.
نصيرة: وانااا خديت وعرفت اش خديت نهار حطيت عليك عيني كنتي عاد كتقراي فتاسعة تم فين رشمتك كنت نبات ندعي باش ربي يخليك ويواتيك وتكوني غطا وتاج فوق راس ولدي .
غفران باست ليها راسها: ربي مخيبكش امي.
نصيرة باستها: الله يرضي عليك ابنتي ويكملك بعقلك.
مونة: يااك امي نهار تزوجت انا بولدك عمرك دويتي ولا حكيتي ومدحتي فزيني وطولي .
نصيرة: وتانتي بنتي وحنينتي تاج راس ولدي الله يكمل عليكم بلخير ويرزقكم بدرية صالحة الحنينة .
مونة: امين اخالتي.
رفيعة خنزرات وشافت فيها: امي لفضة باين معدنها ولعدوة باين اصلها ، ملي تشرب من غراف ذهب ماشي لقزدير تفهم رنة طراح من طبل .
مونة خنزرات فيها: لي قلبو سم وكيرش بيه دور ليام عليه ويشرب فيه ، ولي عيبو قريب ونيبو ماضي ضور عليه ليام ويولي بين لكلاب معاطي .
زهرة فهمات بلي بيناتهم حسيفة تبسمات وبغات تهدن : لحنينات وذن ضهر ولا باقي .
غفران: باقي الحنينة .
فصالون لي فيه رجال جالسين حاطين ليهم دواز اتاي وكيتحاكاو.
لحاج ميلود كيضحك وياكل فلفاكية: ههه وايلي علاه نسا اسي لحاج وماادوزنا .
لحاج محمد: ايييه ليااام كنتي تحاامي عليا كنتي كبير عليا ولي زاد ليا تعطيه ورا لودن بحال ولد لعطار.
لحاج ميلود: ههه هذاك الله يذكرو بلخير كان يحكر عليك ويبغي يضاورك بلحق كنت نعطيييه واحد لمرة حطيتو بلكاوو ههه.
تاج دين: تالهاذ درجة الحاج ههه!
لحاج ميلود: اييه كنت قوي ولا قوي كثر من ربي.
يتبع....
