_سهم الغرام_♟️🫀
_ب_: 14
_وما الحب الا فرحة مؤجلة تاتي بعد مشقة العشق_
طيفور عند اهل لعريس وجد فيه كلما شراو من بيجامات وصنادل وريحات وسكر وحناء واي حاجة بقا غير لورد وصاو عليه يوسف يجيبو ليهم . اما لخواتم ديال لخطوبة غيتكلف بيهم تاج دين .
فوسط محال كبير [بوتيك] فيه شلا غادي وجاي لخداما هالي كيستف سلعة وهالي جايبها وكاين لي كيدوي مع لكليان وكاين لي كيرد صرف اما تاج دين شاف لمحال مزيان ولخدامة على ما يرام ركب فطونوبيلتو لي من نوع *فورد* ومشا قاصد قيصارية خاصة بلبيع وشراء ديال ذهب كيفما وصاتو لام ديالو تم داخل وهو معارف اش يدير جبد خاتم من جيبو صغير جابو ليه باه من عند لحاج ميلود خاص بلعروسة بقا كيشوف فيه شحال وولا ردو لجيبو ومشا ، خذا خاتم ليه وخاتم مرصع ديال ذهب ليها وخذا سنسلة فيها قلب ديال ذهب ، وخرج من لقيصارية ديال ذهب .
•فدار لحاج ميلود لي كترة لغا جاي من لكوزينة ريحة لحلوى كتشم من لباب شي كتزين وشي كتعجن وشي كطيب وشي كطبع كلها وشغالها من غير زهرة لي غير كتشوف بعويناتها معاهم.
غفران: وااامي راه بزاف الله يجعل لباركة وزيدون انا عروسة مخاصني نقاد والو .
زهرة: تي قادي وسكتي عليا علاه اجي وكوني عروسة بااقي ابنيتي تولي تخدمي شغال فدار راجلك ويجيك على مزويناتو .
غفران: باقيي معرفت شكون هاذ عريس لغفلة واش زين واش طويل واش كيف داير مانعرف ميعجبنيش .
زهرة: اييه علاه نتي هي مانعرف اش ، تي شاب لي تقدم ليك زين زين ولعقل عندووو وطولة وتجريدة اش نقولك تبارك الله ياربي وخلاص باقي تجي عدي وتقولي ليا والله امي تاوليت نحماق عليه ونخاف يطيروه ليا فزنقا هاني فاين قلتها ليك.
غفران: اممم دبا نشوفو ههه نخاف غير يكون ماعرفت كيف داير.
رحمة: بنااادم بناادم الصكعة شاب وغزال تبارك الله وصواب ولاداب .
غفران: ايوا مااانعرف مانعرف معاكم نتوما خااايفة تلصقو ليا شي شارف .
رحمة: طيبي وسكتي حسن مانضرب ليك كمارتك مع لفران لبوك وجهك يولي مشوي .
غفران: هااهية .
يتبع...
