_سهم الغرام_♟️🫀
_ب_: 10
الدنيا ديار وكل دار فيها اسرار. قلب فرحان وقلب مضرار، واحد خدام وواحد محتار. واحد بايت على الحرير ولوخر بايت على النار، الدنيا ساعة دور والزمان رجع غدار،
كانت النية هكذا قالو ناس زمان، واليوم ولا الجار يهدر في الجار،
كاين ناس تثقل بالذهب قيمتها من قيمة الصرصار، كثرة الخيانة وكثر العار يا لطيف ناس ساكنين في قصر وشايفينو غار، وناس عايشة في الغيران وحامدة ربي هو الستار، الدنيا حكاية طويلة مانقدرش نحكيها في نهار. كل واحد عاش فيها تجربة ،وكل واحد هو سيد القرار.
لحاصول صبح صباح وشميشتو دخلات لدار رجالا ملي فاقو صلاو لفجر تسناو لفطور ناضو قادو لفطور ونوضو غفران لي لبسات عباءة عليها فلاسود وجمعات شعرها وخرجات جابت لكومير ولحليب وسفنج ولبغرير ولحرشة وجات طيبو لعيالات لفطور وحطوه على طبلة تجمعو عليه كيفطرو حتى كملو وناضو.
محسن ونوفل وامين ونور دين خرجو يتساراو فلمدينة ويتقداو مخاص ومعاهم تالحاج ميلود اما رشيد مشا للخدمة .
لعيالات وجدو لغذا وخلاوه يطيب وعجنو لخبز وطيبوه وقطعو شلايض وخلاوهم فلكوزينة وطلعو تجمعو فصالون تاني .
زهرة[جالسة فلارض وطالقة رجليها]: غفران غتمشي تي ونور ولا اسية ولا تومايا بتلاثة شريو لحنة وراق ولورد يكون جاف وشريو ماء لورد ولعكر لفاسي ولبخور وعود ند متنساوهش وشبة هادو كلهم وشوفو شي مريشمات زينين نديرو بيهم شي حليوات وجيبو شي زيوفا دياول لحمام يكونو بويض على قدنا فلحساب[جبدات من حزامها لبزطام وجبدات 200 درهم] هاكو خودو.
اسية: واش امي كضحكي خلي فلوسك ليك وهاد شي انا غادي نجيبو.
نور: اييه حنايا غنجيبوه غير رتاحي امي.
غفران: انا غنجيبو ونجيب شلا صوالح خاصيني.
زهرة: هي لولا يالله خرجو تقداو باش فلعشية تابعنا شلااا ميتقدا .
ناضو لبسو عليهم وهبطو لباب دار اسية ونور خلاو بنياتهم عند زهرة تقابلهم ، ركبو فرونج وكسيراو طول طريق وهوما داوين مع رجالاتهم اما غفران قتلها لقنط وبدات كتقول مع راسها.
غفران: تاانا شي نهار غنبدا ندوي مع راجلي ونحكي ليه ههه يااه شحال زوينة ويكون مغيار ههه وناري هاد شي غزال ههه .
فيقها من سهوتها غير طونوبيل ليحبسات فباب سويقة نزلو وتمو داخلين عند واحد لعطار ياخذو اش وصاتهم عليه جداتهم.
يتبع...
