_سهم الغرام_♟️🫀
_ب_: 51
لفقيه بدا فتودانو وصوت لمقارج كيتسمعو وديك لي كيصيح بكل جهدو ، ناضو كل من عائلة لعريس ولعروسة يصليو لفجر صلاو لفجر وبداو كيقادو فلمقارج على قبل اتاي وتسخان لمسمن باش يوجدو لفطور لحبابهم لي صبحو فرحانين لفرحهم تاتم جاي لصالون عبد رحمان جلس وقاد جلستو وتبسم.
عبد رحمان: اسيدي ليلة حسيت براسي ناعس فجنة .
لحاج ميلود ضحك: علاش!
عبد رحمان: ايواا اش نقولك راحة ولهدنة ولهوة بارد كينش عليا ومحسيت براسي تاسمعت لفروج يصرخ في ودنيا .
لحاج ميلود: هه ايوا مزيان اخاي نبغيوك غير ترتاح.
عبد رحمان ضحك وطبطب لخوه على كتافو: هاذا لمضنون فيك اخاي.
تمات داخلة رحمة وزوجة عبد رحمان ورقية وعيشة وزهرة كيحطو على طبالي فصالون لكبير وفرحانين تجمعو صغار وكبار ومتوسطين كيفطرو ويدويو كملو فطورهم وجمعو ماعنهم لي تعاونو عليهم يغسلوهم ورجال خرجو كراسيهم وجلسو قدام باب دار كيشمو لهوا وكيتدويو بدات ناس كتجي ودار بدات تعمر فينما كانت شي عائلة بعيدة وصلات شوية كيتحبس طونوبيل 207 وهوما ينزلو منها طبالة هازين بنادرهم وغيطاتهم لابسين شيشانهم ومعولين على لفرح نزلو وبدا واحد كيضرب فطبل ولخرين كيشطحو بداو كيغرمو كترت زغارت ولكادويات ولهديات جايين ، لداخل لعيالات كيقادو ويتقادو ويضحو ويشطحو فخفاء ويتسالمو ويخبيو فحوايجهم اما غفران يالله فاقت كانت معاها امينة وكوثر ونور واسية وسوسن فلبيت كيدويو.
نور كضحك: هههه وااصكعة ليام وتي ليلة اش كيساينك.
اسية ضرباتها على فخضها: متخافيش اختي عادي .
سوسن: هههه معنديش نصيحة ولكن نقولك غير رتاحي.
كوثر: والله متخافي ديكشي كيدوز ساهل .
امينة: مديريش فبالك وطلقي راسك باش نمشيو نقادو لمكياج ديالنا وحالتنا.
غفران: وااااااع سكتوو اختي عليا صابحين عليا مخلصينكوم ولا شنو وزيد عليها هاد طبالة طبخولي راسي غنهبط نهز داك طبل ونخشيه ليه فراسو.
كوثر: لاواااه لاوااه ابنيتي تي اش بيك بسم الله عليك.
غفران: مبيا والو دبا خليوني ناكل شي لقمة باش نتحرك وتجبد ليا شي وحدة ليل ولا لعشا غنوريها.
تحل لباب وتمات داخلة زهرة كضحك: واميمتي يانا وعلى عويناتي فاقت وعروستي فاقت وزينة لبنات ولالاهم فاقت.
كوثر: ولاوااه امي قالاك لالانا .
زهرة: سكتي اديك زرمومية .
يتبع....
