_سهم الغرام_♟️
_ب_: 3
دخلات لبيتها لي فيه ناموسية ديال جوج بلايص مزينة فلون لزرق وفيها وريدات فلبيض وماريوو صغير ومرآة طويلة وزربية فلاحمر ، لبسات بيجامة فلاود وفيها وريدات فلبيض بسروالها ، وهبطات عندهم لقاتهم حاطين لغذا ، تجمعو عليه كملو وناضو جمعو طبلة غسلو لماعن محسن طلع لواحد لبيت ينعس حدا ولدو اما لاب ولجد خرجو مشاو لواحد لمحل يجلسو فيه حتى تقرب لمغرب ويرجعو لدار ، جلسو لعيالات فصالون مجمعات وفلغا مفرقات كل وحدة تعاود على اهلها وراجلها وعادات فولادها وفناسها تانطقات غفران.
غفران: هههه بصراحة على اقوالكم ولي سمعكم يقول منعرف اش هاد زواج راه غير تخربيق.
زهرة[بنرفزة]: اييه حكلك لخطابة شادين صف عليك سيري عزلي وتخيري ونتي بحالي دايرين ليك تقاف ، حد متقدم ليك ونتي راك بديتي تكبري اغزالتي ، تايتقدم ليك شي حد وعاداا هضري وتحدثتيي.
غفران كلام جداها اثر فيها هزات دموعها فعينيها ونساحبات لبيتها سداتو عليها كل موجة كتخبط فيها عقلها رسم خيوط العنكبوت بتفكيرها وحسات بلي كلامهم على حق ودارت فبالها بلي من ليوم تبدل طريقة لبسها وحتى كلامها وتعطي فرصة لاي شاب تقدم ليها سواء فلحلال ولا فطريق لعلاقات لغير شرعية موهيم تبت جداها على هضرتها وتوقفها على كلامها وبلي هي كاين لي يبغيها .
امينة: حشومة عليك امي قلتي ليها هوكايا راهية مشات كتبكي اجااا مرد ليها مجاجها.
كوثر: نيت تفرفيرها دارها ليها هي مليها شبوقات معانا تسكت وتمشي تبع كتوبها .
رحمة: اييه جداها عندها لحق لبنت بدات تكبر وعقلها ماهو فزواج ماهو فستران راس ودخول لمعقول .
زهرة[شربات كاس ديال لماء بللات جوفها]: اييه انا بلعاني بغيت نغزها ونحط ليها جمرة على لبلاصة لمحروقة باش تعرف فين هي ، هي ضحكنا ليها صابتها مليحة وزادت فيه .
على كلامها لخر تم داخل لحاج ميلود مجية على غير عادتو شاف فزهيرتو كيف مسميها حنحن ولمح ليها ناضت ومشات تابعاه لبنات نواوها خايبة وشدو عليها بضحك وتكركير.
دخلو لبيت وسد بابو وشاف فزهيرتو لي حارت من مجيتو .
زهرة: اش تم الحاج خبار لخير مهادي مجيتك!
لحاج ميلود: خير ان شاء الله ، غير هو واحد لوصية شاطناني وفراسي مخبلاني .
زهرة: حكيها ليا نفسخها معاك ونعرفو ساسها من راسها الحاج.
لحاج ميلود[جلس وشاف فيها]: تعرفي صاحبي لحاج محمد لجزار .
زهرة: اييه !
لحاج ميلود: ولدو صغير تاج دين عرفتيه!
زهرة: اييه داك شاب تاجر عندو لمحال لكبير لي فيه كثرة ضواو ياك هو!
لحاج ميلود: اييه تبارك الله الله يبارك ليه ، فعمرو 28 ناوي يجمع راسو ويكمل دينو عطا وكالتو لباه ولمو يشوفو ليه شي بنت ناس.
زهرة: وتبارك الله هو زين وراجل ونص لافشوفة ولافلفلوس ولا فكولشي.
لحاج ميلود: نيت بغاو يتناسبو معانا بغاو ليه غفران على سنة الله ورسوله خاصني نرد على لحاج باش مكان غذا .
زهرة: اميمتي وغدي نطير من قوة لفرحة والله ياااربي وشحال فرحت الحاج ، بلحق كلامك معاها نتا تسمع ليك خير مني انا .
لحاج ميلود: ايوا لهوكايا ملي رجع غنتحدث معاها[ناض] كلامنا يبقا هنا باش ربي يسخر ليها .
زهرة: يااربي ياربي .
يتبع...
