အခန်း (၂၃၀) စီးဝူယာ့၏ နည်းလမ်း
ယို့ဟုန်ယီက သူမဘာသာ လက်ညှိုးထိုးကာ နားမလည်နိုင်စွာ မေးလိုက်သည်။
“ကျွန်မလား ”
သူမက အတားအဆီးအလွှာထောင်ချီ နယ်နမိတ်အတွင်းမှ ထွက်လာကာ ဘေးပတ်လည်ကို ကြည့်လိုက်သည်။ သူမ ကြည့်လိုက်သည့်နေရာတိုင်း လုံးဝ ရှုပ်ပွနေပြီး ကျန်တောင်ထိပ် ခြောက်ခုလုံးမှ မီးခိုးများ ထွက်နေသည်။ ထိုအရာကို မြင်ပြီး သူမ၏ အမူအရာက မည်းမှောင်သွားလေသည်။ သူမက ဒဏ်ရာကို တောင့်ခံကာ လုကျိုးထံ လက်နှစ်ဖက်ယှက်လိုက်ရင်း “လောင်ချန်းပေ့ … မေးပါ ”
“ မင်းက ကျင့်မင်တာအိုဂိုဏ်းရဲ့ လက်ရှိ အကြီးအကဲချုပ် ယို့ဟုန်ယီလား ”
“ ဟုတ်ပါတယ် ”
“ စောစောက မင်းနဲ့ တိုက်နေတဲ့လူက ငရဲဂိုဏ်းချုပ် ယွီကျန့်ဟိုင်လား” လုကျိုးက မေးလိုက်သည်။
ယို့ဟုန်ယီ မျက်နှာထက် ဒေါသထွက်သည့် အမူအရာပေါ်လာကာ “ ဟုတ်ပါတယ်။ သူ ပြာဖြစ်သွားရင်တောင် ကျွန်မ မှတ်မိတယ်။ ကျွန်မတို့ ဂိုဏ်းမှာ ဂိုဏ်းသားထောင်ချီ ရှိပေမဲ့ အခုတော့ ဘာမှမကျန်တော့ဘူး။ လောင်ချန်းပေ့ … ကျေးဇူးပြုပြီး ကျွန်မတို့အတွက် တရားမျှတမှုကို ရှာပေးပါ ”
“ ငါ့ကို တရားမျှတမှု ရှာပေးစေချင်တာလား” လုကျိုးက ရယ်ရမည်လား ငိုရမည်လား မသိတော့သော်လည်း သူ့အမူအရာက တည်ငြိမ်နေဆဲ ဖြစ်၏။
“ ကျွန်မတို့ဂိုဏ်းက ဒီအခြေအနေအထိ ဖြစ်သွားခဲ့ပါပြီ။ သိပ်မကြာခင် ဖြောင့်မတ်ခြင်းလမ်းစဉ်ပေါ်က တခြားဂိုဏ်းတွေလည်း ဒီလိုဖြစ်သွားမှာပဲ။ အဲဒီအချိန်ကျ နယ်မြေတစ်ခုလုံး ရုတ်ရင်းဆန်ခတ် ဖြစ်ပြီးတော့ လူတွေလည်း ဆိုးဆိုးရွားရွား နေကြရလိမ့်မယ်။ လောင်ချန်းပေ့က ငရဲဂိုဏ်းက မိစ္ဆာကို မောင်းထုတ်နိုင်တယ်ဆိုတော့ ကျွန်မတို့ကို ကျေးဇူးပြုပြီး ကူညီပေးပါ ” ယို့ဟုန်ယီက ဒူးထောက်ကာ အလေးအနက် ပြောလိုက်သည်။
အခြားလူများလည်း လုကျိုးထံ ဒူးထောက်လိုက်ကြသည်။
လုကျိုးက ကျင့်မင်တာအိုဂိုဏ်းကို အဆုံးသတ်သူ မဟုတ်သော်လည်း ယွီကျန့်ဟိုင်က သူ့တပည့် ဖြစ်လေသည်။ အကယ်၍ ယွီကျန့်ဟိုင်တစ်ယောက် ကျင့်မင်တာအိုဂိုဏ်းကို အဆုံးသတ်သည့် သတင်းသာ ပြန့်သွားခဲ့လျှင် ကျင့်ကြံရေးလောကက မိစ္ဆာဝေဟင်မျှော်နန်းအပေါ်သာ အပြစ်တင်ကြလိမ့်မည်။
أنت تقرأ
ငါ့တပည့်တွေအကုန် ဗီလိန်တွေချည်းပဲ Book 2
فكاهةအကျဉ်းချုပ် လုကျိုးက ကမ္ဘာလောကကြီးရဲ့ အသန်မာဆုံးနဲ့ သက်တမ်းအရင့်ဆုံး မိစ္ဆာဂိုဏ်းချုပ်ဖြစ်ဖို့ နိုးထလာပြီး သူ့မှာ ဆိုးယုတ်မှုတွေ ပြည့်နေတဲ့ နာမည်ဆိုးနဲ့ ကျော်စောတဲ့ တပည့် ကိုးယောက်ရှိနေတာကို သိလိုက်ရတယ်။ သူ့အကြီးဆုံးတပည့်က ဂိုဏ်းသားထောင်ကျော်ရှိတဲ့...
