ဇာတ်လိုက်မရဲ့ သိမ်မွေ့နူးညံ့တဲ့ သူငယ်ချင်းလေး။

Part 8

Unicode

အခန်း ၈

“ငါ... သူ့ကို စွန့်လွှတ်လိုက်ပြီ”

ချန်ရွှယ်မင်သည် အန်းရှ၏ ကြေကွဲဝမ်းနည်းဖွယ်ကောင်းသောအသံကို ဖုန်းတစ်ဖက်ခြမ်း၌ နားထောင်မိရင်း လက်သီး တင်းတင်းကြပ်ကြပ် ဆုပ်လိုက်မိတော့သည်။

ထိုပုံစံသည် သူမသိထားသော အန်းရှနှင့်ပင်မတူပေ။

အန်းရှသည် သူမ၏ နာကြင်မှုများနှင့် ဝမ်းနည်းမှုများကို ထုတ်ဖော်ပြမည့်သူမျိုး မဟုတ်ပေ။

သူမ၏ဘဝတွင် အချစ်ရဆုံးသောယောက်ျားကိုလည်း ကွာရှင်းလိမ့်မည်မဟုတ်ပါ။

ထိုသို့ဆိုလျှင် မော့ယွီစန်းနှင့် ထောင်ကျစ်မင်တို့သည် သူမကို ထိုကဲသို့ဖြစ်သွားအောင် မည်ကဲ့သို့ လုပ်ဆောင်လိုက်သနည်း။

ထိုကဲ့သို့သာ မဟုတ်ဘူးဆိုလျှင် အန်းရှသည် ဤလုပ်ရပ်မျိုးကို လုပ်ဆောင်မည့်သူမဟုတ်ပါ။

အဲဒီတော့ နောက်ဆုံးမှာ သူမသည် တစ်ခုခုကို မြင်တွေ့ခဲ့သည်များ ဖြစ်နိုင်မည်လား။ မော့ယွီစန်းနှင့် ထောင်ကျစ်မင်တို့နှစ်ဦး၏ နှစ်ပေါင်းများစွာကြအောင် အတူတကွရှိနေမှုတို့ကို သိမြင်သွားလေသလား။

မော့ယွီစန်းနှင့် အန်းရှတို့သည် မကွာရှင်းလျှင်တောင် ထောင်ကျစ်မင်သည် အန်းရှကို စိတ်အနှောင့်အယှက်ဖြစ်စေရန် ကြံရွယ်တော့မည်သာ ဖြစ်သည်။

အန်းရှအနေဖြင့် လက်တန်းပြောလိုက်သည့်စကားဖြစ်နေလျှင်တောင် တစ်စုံတစ်ဦးသည် သူမ၏ မကောင်းကျိုးများကိုသာဖြစ်စေမည့် အကြီးအကျယ် နားလည်မှုလွဲသွားနိုင်သည်ကိုတော့ သူမ မသိခဲ့ပါ။

“ငါ နားလည်ပါပြီ။ နင်က အခု ကွာရှင်းတော့မယ်ဆိုတော့ နင့်ရဲ့ရပိုင်ခွင့်တွေအတွက် ငါ ကြိုးစားပေးပါ့မယ်”။

ချန်ရွှယ်မင် တွေးလိုက်မိသည့်အချက်မှာ မော့ယွီစန်းသည် ထောင်ကျစ်မင်နှင့် ဖောက်ပြားနေလျှင် သူသည် ဤအိမ်ထောင်ရေးတွင် အပြစ်ရှိသူတစ်ဦးဖြစ်နေ၍ ပိုင်ဆိုင်မှုများကို ခွဲဝေသောအခါ အန်းရှကို အသာစီးရစေရန် သူမအနေဖြင့် စွမ်းဆောင်ပေးနိုင်မည်ဖြစ်သည်။