Yu Jiao Ji ( Blue Whisper) မြန်မာဘာသာပြန်စဆုံး

အပိုင်း (၁၆) ချန်ယီ

အပိုင်း (၁၆) ချန်ယီ

ကျောက်စိမ်းဖီးနစ်ဌက်ကြီး ဖန်တီးသွားခဲ့တဲ့ ဒီကမ္ဘာငယ်လေးက အတော့်ကိုထူးဆန်းလှ၏။

ညှို့ယူဖမ်းစားဖွယ်အဆင်းနှင့်တောအုပ်ငယ်လေးရယ်၊ တသွင်သွင်စီးဆင်းနေတဲ့စမ်းချောင်းလေးနဲ့အတူ အရှေ့ဘက်မှာ စိမ်းလန်းစိုပြေတဲ့မြက်ခင်းပြင်တစ်ခုရှိလေသည်၊ သစ်သားအိမ်လေးကတော့ အလယ်တည့်တည့်မှာဖြစ်ပြီး ရေအနက်မသိရသေးသည့်ကန်ငယ်လေးက အနောက်ရပ်မှာဖြစ်ကာ ကြာပန်းတွေအပြည့် ဖူးပွင့်နေတော့သည်။

ကျီယွင်ဟယ် ကျောင်းရန်ကို သစ်သားအိမ်ထဲခေါ်သွားဖို့ ကြံစည်ထားခဲ့ပေမဲ့ ရေကန်လေးကို လည်ပြန်ကြည့်ပြီးနောက် သူမ အရမ်းကိုပျော်ရွှင်မြူးထူးသွားတော့သည်။

“အမြီးကြီးနဲ့ငါး ရှင်က ရေထဲမှာဆို အနာကျက်မြန်တယ်မလား?”

“ဟုတ်တယ်”

သူမ ပြန်လှည့်ကာ သူ့ကို အနောက်ရပ်ဆီသို့ တိုက်ရိုက်ခေါ်ဆောင်သွားပြီး ရေကန်ထဲ ပစ်ချလိုက်တော့သည်။

သူက နူးနူးညံ့ညံ့နှင့်ချောမောလှပသော်ငြားလည်း အလေးချိန်က တော်တော်လေးစီးလှ၏။ ပစ်ချလိုက်သည့်အရှိန်ကြောင့် ဧရာမရေလုံးကြီးတစ်လုံး ပြန်စင်တက်လာပြီး ကျီယွင်ဟယ်၏တစ်ကိုယ်လုံး ရေတွေနဲ့ ရွှဲစိုသွားတော့သည်။ လေထုထဲမှာ ဖင့်နွှဲနေသည့်မြူခိုးလေးအတွင်း၌ သက်တန့်လေးတစ်ခု ထွက်ပေါ်လာခဲ့သည်။

ကျီယွင်ဟယ် သက်တန့်လေးကိုဖြတ်ပြီးကြည့်လိုက်တော့ သူ့ရဲ့အမြီးကြီးဟာ ရေမျက်နှာပြင်ပေါ်မှာ ခုံးလျက်ထွက်ပေါ်နေပြီးနောက် လှပတင့်တယ်စွာ နစ်မြှုပ်သွားတာကို စောင့်ကြည့်နေမိ၏။ အမြီးကြီးဟာ မြေပြင်ပေါ်မှာ ပုံသဏ္ဍာန်မကျသလောက် ရေထဲမှာတော့ အတော်လေးချောမွေ့ပြေပြစ်နေလွန်းသည်။

သူ နောက်ဆုံးတော့ သူ့ရဲ့သဘာဝပုံပန်းသဏ္ဍာန်အတိုင်း ဖြစ်လို့သွားပြီ။ ဘာအကြောင်းကြောင့်ပဲဖြစ်ဖြစ် သူ ကမ်းခြေပေါ်တက်မလာသင့်ဘူးလို့ ကျီယွင်ဟယ် တွေးနေမိ၏။

ကျောင်းရန်ကတော့ ရေကန်ထဲမှာ တဖျတ်ဖျတ်ကူးခတ်ပြီး ဟိုဒီမြူးထူးခုန်ပျံနေတော့သည်။ “ရေကန်ထဲက ငါးလို”ဆိုသည့်ဆိုရိုးစကားက အခုချိန်မှာ သူ့ရဲ့ပုံစံကိုအလိုက်ဖက်ဆုံးပုံဖော်ပြနေတာပဲဖြစ်သည်။