Yu Jiao Ji ( Blue Whisper) မြန်မာဘာသာပြန်စဆုံး

အပိုင်း (၁၀၆) အလှည့်အပြောင်း

အပိုင်း (၁၀၆) အလှည့်အပြောင်း

ကျီယွင်ဟယ်၏လက်ဟာ ဆရာတော်ကြီး၏ရင်အုံဆီ အားပြင်းပြင်းနဲ့ရိုက်နှက်သွားပြီးနောက် သူမရဲ့မျက်လုံးလေးတွေ ဝိုင်းစက်သွား၏။

သူမရဲ့ရိုက်ချက်က ဝါဂွမ်းလုံးလေးတစ်လုံးပေါ် ဆင်းသက်သွားသလိုမျိုး စွမ်းအားတွေပြန့်ကြဲသွားပြီး သူ့ရဲ့ခန္ဓာကိုယ်ဟာ တောက်ပသွားတော့သည်…

ကျီယွင်ဟယ်၏အနက်ရောင်အငွေ့အသက်အပြင်မှာ ရပ်နေတဲ့ချန်ယီတစ်ယောက် သူမြင်တွေ့လိုက်တဲ့အရာကြောင့် ထိတ်လန့်သွား၏။

ဆရာတော်ကြီးရဲ့ခန္ဓာကိုယ်ပတ်ချာလည်က တောက်ပတဲ့အလင်းရောင်တွေဟာ ရင်အုံဆီမှာ လျင်မြန်စွာ စုဝေးသွားပြီး သူမ အသုံးပြုလိုက်တဲ့စွမ်းအားတွေအားလုံးကို စုပ်ယူသွားသည်။

“ယွင်ဟယ်…!”

ချန်ယီ၏ခေါ်သံက သူမ၏နားတွေထဲမရောက်သေးခင် ကျီယွင်ဟယ် လက်ဖဝါးပေါ်မှာစူးရှတဲ့နာကျင်မှုတစ်ခု ခံစားလိုက်ရသည်။ “မသေမျိုးချိတ်စည်း…” ဆရာတော်ကြီးမှာ သူ့ရဲ့ခန္ဓာကိုယ်ကို ကာကွယ်ဖို့မသေမျိုးချိတ်စည်း တကယ်ပဲရှိနေခဲ့လိမ့်မယ်လို့ သူမ မယုံကြည်နိုင်ခဲ့ဘူး။

ချိတ်စည်းအောက်မှာ သူမ၏လက်မောင်းလေး တစ်လက်မချင်းကွာချသွားပြီး သူမ နံရံပေါ်သို့ နောက်တစ်ခေါက် ပြင်းထန်စွာရိုက်ချခံရသည်။

အနက်ရောင်အခိုးအငွေ့အတွေနဲ့ သူမရဲ့အမြီးတွေနှစ်ခုလုံး ပျောက်ကွယ်သွားခဲ့သည်။ ကျီယွင်ဟယ် နံရံပေါ်မှ လျှောကျလာပြီး မြေပြင်ပေါ်မှာ အသက်မဲ့စွာလဲကျသွားခဲ့သည်။

ချန်ယီတစ်ယောက် ဓါးနဲ့အတူ ရှေ့သို့တိုးဝင်ပြီး ဆရာတော်ကြီး၏နောက်ကျောကို ချိန်ရွယ်လိုက်သည်။

ဆရာတော်ကြီး မလှုပ်ရှားသလို ရှောင်ရှားခြင်းလည်းမပြုပေ။ ဓါးဟာ သူ့ရဲ့ခန္ဓာကိုယ်ထဲ ထိုးဖောက်သွားမယ့်အချိန်မှာ သွေးတွေဖုံးလွှမ်းနေတဲ့လူတစ်ယောက် သူတို့နှစ်ဦးကြား ပြေးဝင်လာပြီး ဓါးကိုတားဆီးပစ်လေသည်။

မင်းသမီးဆွန်းသဲ…

သူမ နံရံပေါ်ချိတ်တွယ်ခံရတာမှ လွတ်မြောက်သွားပြီး ဆရာတော်ကြီးကို သူမရဲ့ခန္ဓာကိုယ်နဲ့ ကာကွယ်ပေးလိုက်သည်။ ချန်ယီ၏ဓါးဟာ သူမ၏ပုခုံးထဲ ထိုးဖောက်သွားတယ်၊ သို့သော် သူမ၏သွေးအလူးလူးလက်တစ်ဖက်ကြောင့် ကျိုးပဲ့သွားခဲ့သည်။ သူ ပတ်ဝန်းကျင်လေထုထဲကရေငွေ့ကို ဆင့်ခေါ်လိုက်တယ်၊ ရေခဲအပ်တွေ ဆွန်းသဲနဲ့ ဆရာတော်ကြီးနှစ်ယောက်လုံးထံ ပျံသန်းသွား၏။