🌹هن القوارير🌹 (في طور التنزيل )

part1

👑 👑 هن القوارير 👑 👑
شمس الغريب

الجزء 1:
صوت الصفارة ديال الكوكوت كتسمع بجهد والماكينة ديال الصابون عادية كتقرقر صوتها مسموع وصوتها هي كتلهث بجفاف هابطة كتجفف بيديها باش يبرد قلبها والباب كيدقدق غا يطيح بالخبيط وقفات مسحات العرق من جبينها عاقدة حواجبها تمارة والمحاين ما خباوش جمالها الاخاد ببشرة سمراء وعيون عسلية طايتها زوينة وشعرها كيرلي اسود جامعاه بالزيف بطريقة عشوائية
هبطات بيجامتها الرمادية الباهتة لي مخصصاها للشقا وقادات زيفها دورات عينيها على دارها لي فالسكن الاقتصادي متولة ونقية تقولي قصر من قصور الأغنياء
خرجات صوتها الجوهري باستغراب: شكوووون
قربات حلات الباب تفاجأت بجارتها لي مقابلة ليها: السلام ختي ضياء لباس عليك
تبسمت ليها بمجاملة هي جابدة وقرها مع الجيران وما حالاش باب التعارف معهم غير السلام السلام وصافي وهي أصغر وحدة بيناتهم
ضياء: وعليك السلام ختي حفيظة الحمد لله هاد الساعة ونتي بخير الوليدات مزيان
حفيظة بحال الى جاتها لبيت القصيد: احمم هادشي علاش جيت عندك اا ختي ضياء
حركات حواجبها بتساؤل وحفيظة كملات: احمم كيشفتي الامتحانات بداو والراجل خدمتو يالاه معيشانا والصراحة الوليدات ناقصين فالقراية ولا انا لا باهم نقدرو نعاونوهم رام عارفة ما قاريينش ونتي لي فالعمارة قارية إلى لقيتي كيف ديري ليا الله يجازيك بالخير غير هاد العام لي القضية مزيرة
ضياء حسات بالاحراج ما عرفات باش تجاوب لوكان كانت ديال راسها وفدارهم توافق بعينيها مغمضين ولكن هي مزوجة وعندها مسؤوليات كثيرة ما كترتاحش وبقات فيها حفيظة فنفس الوقت
ضياء: يجي عبد الخالق نقولها ليه ونرد عليك اا ختي حفيظة واخا؟
حركات ليها حفيظة راسها وهي كطل من جناب ضياء على الدار وتشم فريحة النقا مع ريحة الطياب لي باين لذيذ غير من روايحو ما حشمات حتى تبسمات ليها ضياء مودعاها وهي طارت تدي للجارات ما يعاودو على ضياء لي كلشي ليها متول لي يشوفها يقول فالربعينات ماشي بنت عشرينية
ملي مشات حفيظة وهي كتخمم للحوار لي دار بيناتهم حتى وصلات الثلاثة ديال العشية وضارو السوارت فالباب استقبلت راجلها وكأنها ماشي هي لي كانت لابسة ديك التبهديلة كانت هاد المرة بكسيوة فايتة ركابيها بشوية بالاحمر بين سموريتها البرازيلية وشعرها طلقاته ودايرة ماكياج خفيف مخلي ملامحها باينين وفرجليها كلاكيطة مبينة رجيلاتها النقيين بلا صباغة بلا والو وروايحها الخفاف إلى لصقو فالنيف ما بقاو يتحيدو
روايحها هي وروايح النقا ديال الدار والتاويل ديال الدار وديكورها البسيط والانيق فنفس الوقت كيخليو دماغ الواحد غير يدخل لديك الدار يرتاح اوطوماتيكيا قربات من راجلها لي حط البوط دياله فالبلاكار ديال الأحذية لي على الباب وتقاشر حطهم فسلة صغيرة خاصة بيهم حتى هي تما ولبس صندالته ديال الدار
قربات منه مستقبلاه بعناق كله حنان زوجة لزوجها خلاته ينسى عبء اليوم الشاق فالخدمة بعد بشوية دخل للحمام لي حتى هو فالدخلة قضى حاجته وتوضى وخرج لعندها هي لي جالسة فالبيت الصغير موجدة الطبلة ديال الغداء كتسناه حتى يجي
كان زوجها عبد الخالق شاب فاواخر العشرينات ببشرة حنطية وعيون عسلية حروف سوداء شعره كثيف ورطب ولحيته كثيفة كيقطر منها الماء ديال الوضوء دخل للبيت لعندها لقا الطبلة ثاني موجدة بالذ الأطباق لي كلاه اليوم ما ياكلو غدا ولي كلاه ف الغداء ما ياكلو فالعشاء
حياة طيبة وزوجة صالحة وعمل يسير ومنزل مستقل كل ما كيتمناه أي رجل فالسن دياله راه عنده خاصاه حاجة وحدة فحياته

ما هضروش وهما كياكلو حتى كملو وناضت جمعات الطابلة وهو صلى العصر أما هي عطلة فهاد الأيام مشات تغسل الماعن باش تجلس معه شوية عاد تنوض للgوتي ثاني
ضياء جلسات جنب راجلها: عبد الخالق (بتردد) واش مشيتي لدار عمي؟
كان شاد التيليكوموند مجبد فالسداري وهي كتنقي الديسير وتمد ليه وبراد ديال الأعشاب محطوط على الطبلة كيشربوه دائما من ورا الوجبات
عبد الخالق عينيه متبتهم على التلفزيون: اه سلمو عليك الواليدة عيانة شوية خاص تمشي تشوفيها
تزيرات ضياء وحركات غير راسها بالموافقة وصرطات ريقها بتردد مرة ثانية: عبد الخالق (شاف فيها) جات عندنا جارتنا هادي لي مقابلة معانا طلباتني نراجع لها مع ولادها ما عندهاش باش دير ليهم السوايع وقلت لها حتى نتشاور معك والصراحة بقات فيا مسكينة ما لقاوش شي حل آخر
شاف فيها مغوبش باينة رافض الرفض القاطع: ونتي هي الحل لي بان ليهم لا اا ضياء غير قولي ليها ما خلانيش انا راه ...
بقات كتسناه يكمل هضرته ولكن وقف مكره ما باغيش يقول شي حاجة لي يندم عليها أما ضياء عينيها غرغرو وقفات تابعاه بجوج بيهم كيتصرفو بهدوء وكيتكلمو بشوية واخا مناقشين مع بعضياتهم
ضياء: عبد الخالق واش غادي تخرج بلا ما نهضرو
عبد الخالق تنهد: ما باغيش نقول شي حاجة لي تقلقك اا ضياء خليني نمشي نجيب دورة وصيفطي ليا ميساج فيه اش لي خاصك فالدار
ضياء عينيها غرغرو: الهضرة لي ما كتبغيش تقولها انت راه كنسمعها من عند الناس كاملين (بهمس) وخصوصا لي قراب ليك
عبد الخالق شير لراسه بقلة حيلة: وشنو غادي ندير اا ضياء حتى انا عالم بيا غير الله
ضياء بحزم: خلينا نمشيو للطبيب
لبس سبرديلته عبد الخالق لي مخليها للتقضية ولبسها وشاف فيها: اراي ليا القفة اا ضياء وطوي هاد الموضوع وباش ما تمشيش للدار بوحدك غدا انا غادي نجي دبا ونمشيو بجوج
خرج وهي هزات التيلي وهي كتمسح دموعها لي غفلوها صيفطات ليه ميساج فيه اشنو ناقص ودخلات للبيت ديالهم ديال النعاس وجبدات كسيوة تركية حجابية وقادات فولارها رشات ريحتها وقادات حالتها هزات الصاك لي غايواتيها مع الصباط لي باغية تلبس وخرجات للكوزينة هزات كيك كانت موجداه وشي حريشات وجلسات كتسناه
ما تعطلش بزاف كان جاب التقضية لي خاص خداتها وحطاتها فالكوزينة ورجعات لعنده باقي جنب الباب كيتسناها شدها من يديها وسد الباب وهبط هو وياها فالدروج يديه فيديها طلعو للطموبيل لي كانت DACIA فالابيض وتوجهو للحومة لي بعيدة على فين ساكنين بنصف ساعة تقريبا بالطموبيل
الحومة لي ساكنين فيها عائلاتهم بجوج بيهم والصراحة راه ما شهداتش على الحب ديالهم لأنه زواجهم دخلات فيه غير العائلة هي لي جمعاتهم وكان زواج تقليدي 100%
عبد الخالق: عائلتك حتى لغدا ونجيبك عندهم
ضياء: جبتي معاك شي حاجة ندخلوها
عبد الخالق:غير دخلي انا نهبط من الكوفر داكشي
هبطات كما قال ليها دخلات نيشان للدار من بعد ما دقات الباب مخلية ناس الدرب كيهضرو كما العادة لقاتهم كاملين مجموعين خوتو وعيالاتهم وخواتاته وباه وأمه سلمات عليهم وجلسات حاطة داكشي لي جابت فوق الطبلة كيسولو على الحال والأحوال حتى دخل عبد الخالق محمل ومجمل السوق كله جابو

              💣💣💣💣💣 توقاعتكم وآرائكم 💣 💣 💣 💣 💣

كنظن الموضوع بان دبا علاش؟ ياكو يااكووو؟
كيف جاوكم الشخصيات واش بان ليكم؟