🌹هن القوارير🌹 (في طور التنزيل )

part8

👑👑 هن القوارير 👑👑
شمس الغريب

الجزء 8

كيف دخل من الخدمة لقاها لابسة جلابة مخزانية ومقادة حالتها جاه العجب اش كاين ياك خطبة اختها دازت اش باقي مزال
ضياء بترجي: عبد الخالق الله يخليك واش ممكن تديني لعند ختي نعمة
صغر فيها عينيه فاهم البلان: يصحاب ليا غير دارو عقلهم ملي ما بانش ليا شي ولد غريب ف خطبة اختك
ضياء كتقاد فصاكها: علاش غادي يتراجعو غير كانت مزال خاصاهم واحد الورقة داكشي باش تعطلو الإجراءات
عبد الخالق ما باغيهاش تمشي نهائيا: واا شنو دبا
ضياء: اختي جابت الولد وراه ما دايراش شي حفلة غير جامعانا عائلتها وعائلة راجلها باش الولد يتعرف عليهم هذا ماكان
جمع غوباشتو: أنا ما غاديش نطلع معك غادي نحطك حتى تكملو التخربيق ديالكم ونجي من وراك
لبسات بوطها بالنترة ديما كيهرب راسه من عائلتها وما كيديرش معاهم الصواب هادشي كينرفزها خصوصا وأنه راجل اختها كيبان خوهم ماشي راجل اختهم ونعمة كتبان بنت نسابها ماشي عروسة ولدهم قدرات فالاخير تقنعو باش يديها لمحل ديال الالعاب والدراري الصغار خدات للولد لعبة ولبسة زوينة من الفوق حتى لتحت وحطها فدار اختها تسناها حتى طلعات ومشا لدارهم 

من الطلعة كتسمع الضحك والنشاط جاي من دار اختها فرحات لفرحتها لقات الباب محلولة استاذنت واخا هكاك تلاقى ليها امجيد فالباب مع بلال وليد زويون ما شاء الله سلمات على امجيد وتحنات على رجليها عند بلال معنقاه
امجيد بابتسامة: و هادي اا ولدي بلال هي خالتك الثانية ضياء هادي هي الحنينة فيهم
كان الوليد حشمان ومسكين باينة عليه الفرحة حتى هو بحال قرانو باغي يعيش وسط عائلة وباغي الحب والحنان ويهرب من سوء المعاملة لي فالخيرية ولكن مزال غالبة عليه الحشمة
ضياء تبسمات ليه: سير اا حبيبي لعب مع ولاد خوالك وعمامك
مشا بلال غير هاد النسب لي كينسبوه ليهم كيفرحو مسكين واخا لعبهم وكلشي ليهم مختلف على العالم لي خرج منه إلا أنه عاجبه الحال كيتفرج حتى يفهم اللعبة عاد يدخل راسه خايف لا يدير شي تصرف لي يخليهم يرجعوه منين جا وهادي آخر حاجة يتمناها

ضياء ل امجيد: باينة عليه خايف مسكين وتالف
امجيد بابتسامة: هكا قالت اختك من نهار شافته ضريف ومعزول وخايف وباغي التغيير داكشي باش رفضات جميع الاقتراحات والتخويفات ديال لي فالخيرية بدعوى أنه الكبار صعاب وتربيتهم خايبة عكس التربية بلاش ما تقوليه الحقيقة ولكن هي رفضات
ضياء: فينهم؟
امجيد كيطل فالدروج: عبد الخالق ما جاش ؟
تلاعبات بعينيها: عنده شي خدمة ما قدرش غير حطني ومشا
دخلها لعندهم كلشي مجموع عرفات من راحة بلي حتى معاذ خطف وقيتة من خدمته وجا باش يتعرف عليه بلال كونه راجل خالته هنا شافت الفرق الشاسع حسات بنغزة فقلبها وحاولات تلف معاهم وتنساجم حيت بانت ليها أمها حاسة

أما عبد الخالق لي مشا لدارهم مباشرة لقاهم بحال الى كانو كيتسناو فيه الأم والأخوات دياله مجموعين عليها وعينيهم كيف الصقر باين واش موجدين شي طبخة ليه قالت ليه الأم دياله باش يدخل للصالة فين كاينة هي وبناتها حيت عيالات ولادها كل وحدة وفين صدراتها

عبد الخالق: الواليدة ياك لباس
تاجة: زيد اا وليدي زيد اا حبيبي راه ما بقا ليا فالدنيا قد ما فات وقلبي واجعني عليك
دخل عبد الخالق خوفان عليها: الله يطول ف عمرك اا ميمتي علاش هاد الكلام
تاجة: ومالي اا وليدي كدبت انا وباك راه ما بقالناش قد لي فاتنا فالدنيا (زيرات ليه على يديه) واا اا وليدي الصراحة بغينا نشوفو وليداتك
عبد الخالق هاد الموضوع ولا منغص عليه حياته: واا الواليدة الرزاق الله ....
قاطعاته أخته الكبيرة: واا ا خويا سمح ليا نتدخل ماشي بالضرورة يكونو من ضياء
عبد الخالق هز فيها عينيه مصدوم: باش عرفنا حنا بلي ضياء هي لي فيها المشكل
أخته الصغرى: ايييوة هي لي اختها عاقرة ما انت خوتك وخواتاتك كلشي مفرخ ولله الحمد وهي اصلا ها مي تقول ليك
شاف ف تاجة تقول راسمين خطة باش يقنعوه: اا وليدي راه حتى فاطمة أمها تعطلات باش ولدات شرف حتى علاين يطلقوها من عبد الله
عبد الخالق بامل: وفالاخير ولدات
أخته الاخرى: حنا راه ما قلناش ليك طلق ضياء راه حنا لي ختاريناها ليك وكون ترجع بينا الأيام اللور هي لي نختارو ليك اا خويا وحتى هي ما تكونش أنانية راه انت باينة واش هي لي كتبغي ولكن راه طبيعي يكونو عندك وليدات انا نهضر معها إلى بغيتي

راسه زند عليه ما بقا عرف لا ما يقدم ولا ما يوخر وأمه غير ما كتزيد تجبد عليه الموت وبلي باغيا تشوف ولاده وكدا كدا ولكن هو كيشوف بلي ردة فعلها اكيد غادي تكون الانهيار وهو غير سولها باش يدير خير فاخت عمر كانت ردة فعلها جديدة عليه وعاجباه ما يقدرش يخسر ضياء
ملي بان ليهم هكاك نقزات أمه بعدما طيبوها بناتها بالغميز والنغيز: شووف اا وليدي ها الصخط هاا الرضا قدامك إلى ما نضتيش تزوجتي دير ولادك راه ما بقالي فالعمر والو
خرج عينيه مصدوم: واا مي واش يصحاب ليك ضياء غادي تقبل شكون فيكم ترضى راجلها يعاود يتزوج عليها منك نتي اا مي وفين هي هادي لي تقبل تجي ثانية
خواتاته نقزو كاملات: أنا نقبل انا نقبل إلى كان الموضوع هو هذا علاش نكون أنانية ونخلي الراجل بلا ولاد بلا اوتاد ضياء عارفة بينها وبين الله بغات تجي حتى لهنا وتعصى راه حتى انت باغي ولادك راه هي لي كان خاصها تشجعك ماشي حنا

هو يجيب ليهم تبريرات من هنا وهما يضربو ليه كلشي فالزيرو من جهة الثانية قلبو ليه الموارال وخلاوه تايه غادي باش يمشي يجيبها