🌹هن القوارير🌹 (في طور التنزيل )

part29

👑👑 هن القوارير 👑👑
شمس الغريب

الجزء 29:

شرف: ضياااااء.. اجي اجي غايوصلنا جلال حيت الطموبيل ديالي داها ولد عمتي يجيب شي صخرة خاصة
ما زادتش الهضرة ركبات تحت نظراته هو لي مخبي عينيه بالنضاضر احتراما لشرف باش ما يشوفش شوفاته ليها وهما ما بيناتهم والو أما هي لصقات فداك الكوسان اللوطو دياله مريحة وفيها الريحة دياله كترخي الأعصاب هادئة ومثيرة فنفس الوقت بقات كتشمشم فيها وتغمض عينيها وهو حاضيها من المراية

فيقو شرف: اا مالك اا صاحبي على النضاضر بالليل
اول مرة تسمع صوته وتركز فيه حيت ماشي معها كيهضر صوته حرش فيه بحة خطيرة وكيهضر بواحد البرود رجولي كيقتل ماشي تكبر ولكن صوته هكاك
جلال: عندي حساسية من شي حاجة وكيضروني بالضوء
شرف ما عندوش اصلا مع هاد القوالب تيقو وحتى هي تيقاتو وفخاطرها كتقول سعدات مراته بيه لأنه راجل بهاد الرجولة كاملة راه ما شاء الله ولكن ملي تفكرات شوفاته ليها طلقات ليه واحد التغوبيشة قشعها من تحت نضاضرو ضربو الضوء وعرفها ليه حيت كانت كتشوف فيه من الخلف قالت مع راسها راه خائن خيانة بالشوف قلبات وجهها وهو صرط ريقه ما عرفش باش تبلا لي عارف هو أنها غضبات عليه

وصلهم للمكان لي نعت ليه شرف لي اصلا باغي ياخد شي حاجة من شي محل تما
شرف: صافي تمشي بوحدك؟
هبطات تابعاهم محركة راسها وكتهمس ليه: هي راه داخل وهاد البلاصة كتخوف شوية
شرف: أنا غادي نمشي للعطار ما بغيتش نعطلو جلال
دخل هو على الخط: صافي انت غير سير عند العطار انا نمشي معها
قالت مع راسها: مالك انت ما تمشي عند العطار
فاقت ملي شرف كيعتاذر منه: سمح لينا اا صاحبي حتى الخياطة غادي ندخلوك عندها
حرك راسه بالنفي: الدنيا هانية اا صاحبي راحنا عائلة

تفارقو شرف طول الطريق للعطار وهي سبقات جلال بخطى ثابتة معبورة كتمشى شوية ودور تشوف واش من وراها كتلقاه شوية ويلصق معها وتزيد ثاني فالسرعة ووالو تقول عابر ديك المسافة هو

وقفات فالباب ديال الخياطة ودارت هامسة: بلا ما تدخل انا ناخدو ونجي
حرك ليها راسه وبقا برا مراقب داك البلاصة كانت واحد الشلة مجموعة فالقنت وعينيهم على العيالات لي كيدخلو عند الخياطة ولي كيخرجو من الصالون ديال التزيين لي حداها هو بقا عاطي للنسا بظهرو حتى بقات غير هي والخياطة عاد ضار حاضيها وهي هادشي كله لاحظاته ملي كانت كتسنى

عطاتها الخياطة تكشيطة وقفطان كتشوف فيهم باعجاب وقالت لها دخل باش تقيص وفعلا دخلات مدة ربع ساعة خرجات لابسة التكشيطة بسرعة دخل وطرق الباب من داخل ودوز ريدويات بواحد السرعة خيالية خلاهم مصدومين دقائق عاد ضحكات الخياطة وتمتمات بالله يخليكم لبعضياتكم بقات كتشوف فيها ضياء مصدومة ما عرفات باش تجاوبها خرجات ليها غير ما فهمتش
الخياطة: هادي غيرة اا بنتي اش غايكون
بقات كتقاد لها التكشيطة وهي عينيها عليه هو لي عاطيها بالظهر سد عليهم ومزال كيشوف لا يكون باقي شي قنت كيشوفو منه الشوميز دياله لصقات عليه وعنقه الضخم  احمر وبانو عروقو بحال الكابليات ديال الضوء مشنجين بقا فديك الحركة هي كيصحاب ليها ما كيشوفش وجالسة كتبوزا وهو كيشوف الانعكاس ديالها على الزاج ديال المحل حتى لبسات القفطان ثاني ونفس الحاجة وابتسامة على شفايفه عاد دخلات لبسات عليها حوايجها وجمعات لها الخياطة داكشي ديالها لقاته حل الباب وما كاينش فالمحل فرحات باش ما تزيدش تحرج معاه وتكمل ليها خلاصها

ضياء كتجبد من البزطام مبتاسمة: الله يعطيك صحيحتك اا ختي شحال كان بقا ليا
الخياطة ردات ليها الابتسامة:600 درهم لي كانت بقات لك راه خلصها راجلك اا حبيبة
صدماتها مرة أخرى تبسمات لها وخرجات لقاته واقف عند الباب مد ليها يده بعدات كيصحاب لها باغي يشد فيها عاد قرب مبتاسم خدا منها الحوايج هزهم عليها خلاها غارقة فحوايجها وتقدمها بخطوات صغار

تبعاته بسرعة وباش يوقف حطات يديها وخطفاتها بسرعة على دراعه: حممم ما كانش عليك تخلص الخياطة (بدات كتجبد فالفلوس من صاكها)
غوبش فيها مع كان حيد نضاضر فيه الحساسية غير ملي كان شرف أما دبا برا مسكين
جلال: غا تردي الفلوس لبلاصتهم ولا ما غانتفاهموش.. يالاه باش ما نتعطلوش على شرف

عصبها وتمشات معاه كتبع ليه حركة اكتافه ملي يسبقها شوية حتى كيوقف يتسناها عاد كتزرب لقاو شرف فعلا فانتظارهم مقضي بالكثرة فعلا ما كدبش

               💣💣💣💣💣 توقاعتكم وآرائكم 💣💣💣💣💣

الحب الحب وبزاااااف ديال الحب