🌹هن القوارير🌹 (في طور التنزيل )

part38

👑👑 هن القوارير 👑👑
شمس الغريب

الجزء 38:

دازت ديك الليلة أكثر من رائعة ولكن شي حاضي شي وشي شاك فشي عند جميع أطراف القصة
كانت قدام مرآة ديالها كطلي فعرام ديال لي برودوي ديال الليل وريحتهم قاصحة كدخل حتى للحلق وهي معصبة كلها كتغزل وهو متكي كل مرة يشمر بنيفه لي ولا أحمر وكيحكو قهراته ديك الريحة وهادشي مزال جالسة بعيدة باقي غا تجي تنعس حداه مزال والتيلي دياله فيديه كيتفرج فماتش من بلاصته

سكتات حتى عيات وجات ترمات جنبه: باقي كتبغيها؟
سؤال مباغت منها: واش هي باقي باغاني فنظرك من بعد داكشي كله؟
بقات غير كتشوف فيه عينيها مغرغرين وكمل هو: اذن هاد السؤال لا فائدة منه
تقلب للجنب الآخر وخلاها كدمع مزيرة على المانطة بيديها بجوج كتخرج فيها أعصابها
ريحانة ضوراته بالزعفة: عارفها ما باغياكش باقي مزال.. وانت مزال متعلق بيها.. سواء غلطتي ف الشيء لي درتي ولا لاء.. راه حتى انا حملوني معك المسؤولية.. الجارات كيلوحو ليا الهضرة.. ولادهم غير يشوفوني يشيرو عليا.. ناس دربكم ما حاملينش.. وحالتك تراجعات وردو ليا انا اللومة.. مراته الأولى حقا كانت مهلية فيه.. وهادي شوف كيف رجع معها.. انا عييت ومليت بغيت نبداو صفحة جديدة.. عاااافااااك

عاود ضار تقابل معها: الجارات ضياء ما كانتش اصلا كتجمع معاهم قليل إلى دقو بابها وما كتخرجش من الدار إلا أنا وياها ولا بعلمي.. البراهش كانت كتراجع معاهم فالواتساب بالتخبية عليا حيت انا منعتها تراجع معاهم.. الناس ديال الدرب كيعرفو ضياء ملي يالاه تولدات عزيزة على الناس من الصغر نتي يالاه جيتي كتقارني راسك بيها.. حالتي تراجعات بسبابي انا لي وصلت راسي لهاد الحالة.. وضياء فعلا كانت مهلية فدارها فراسها وفيا كنفطر فالدار بفطور ملكي وندي معايا ونرجع نلقى غذاء كل نهار كيكون احسن من لي قبل والدار كتشقشق وضياء بحال شي أميرة كنت كنتعجب من كيفاش كتلحق تدير هادشي كله.. بالحق الإنسان ما كيعرف قيمة الشيء حتى كيفقدو.. أما بخصوص الصفحة جديدة انا راه عاطيك دفتر ونتي كل نهار تقطعي ورقة

هضرته نزلات عليها بحال الصاعقة كيفاش كيمدح فضياء كيفاش كيهضر عليها حسات بالعافية شاعلة معها عاد ختمها لها بديك الجملة ديال عاطيك دفتر ونتي كتقطعي الأوراق يعني رد ليها اللومة ديال كلشي تداركت الوضع وجمعات خناينها ودموعها ما بغاتش تحكر ثاني وفبالها خطط وخطط كيجريو وعارفة الصهد كيجيها من عائلته لي هي شادة معاهم حتى هي الزكاير ولكن قالت مع راسها نتمسكن حتى نتمكن

ريحانة حطات يديها لي كلها كترعد بالضعف والأعصاب فنفس الوقت: عبد الخالق.. شحال بقات عندي من ورقة
قربات من ودنه كتهمس: واخا تبقا ليا غير وحدة نحارب على قبلها.. كلشي كنديرو غير من حبي لراجلي
جرها ناوي يباشر فعلاقة حميمية: هاد الحاجة لي فايتة فيها نتي ضياء.. كتقولي ليا باش كتحسي ماشي غير كتطبقي
كملات معاه واخا تجننات من هاد المقارنة لي طلعات لها فالراس بالحق ماشي وقت الغيرة دبا وقت الخدمة باش تنقي طريقها من أي حاجة منغصة عليها عيشتها هادشي لي كيدور فبالها
فنفس الليلة كوبل آخر بنفس الطريقة غير المشاعر مختلفة جالسة كتمشط شعرها قدام مرايتها وكتدير كريمات ريحتهم مزيج بين العسل والكراميل ولات بحال شي حليوة بدوك الرويحات كتشوف فيه من المراية وكتخطط باغيا تأكد من شكوكها وهو متبعها بعيون نايمة فيها ذبلانة كياثر عليها من بلاصته بلا ما يقرب
ناض لعندها بلا ما يشعر خدا منها المشط كيدوزو على شعرها لي واصل النصف فظهرها وكيبتاسم غير راسه وهي متبعاه كل مرة تميل راسها مع لمساته تخدرات هي وياه خصوصا ملي بدا كيوزع قبلات على عنقها

تنهدات بجهد: هاااااه.. معاااااذ (لحناتها له)
معاذ مغيب معها: عيوووونه.. قلبوووو.. حيااااة معاااذ نتي
ضارت لعنده كتلعب فصدره: واش جلال كيبغي اختي امممم
صوتها وحركاتها خلاوه يترفع ما قدرش يضبط راسه: هممم كيمووووت ويتوفى عليها
طبعات بوسة على صدره وعينيها طرطقو مبلقين فيه ملي حس بيها تشنجات استفاق حتى هو كيحرك راسه بلا وهي مبتاسمة كتهزهز ليه راسها تسلتات ليه من يديه هاربة وهو تابعها فالدار مصدوم من راسه

معاذ: رااااااحة اجي غير نهضر أنا وياك اا حبيبتي
راحة كتهزهز له حجبانها: عفاااااك ماا غا نقولها لحتى واحد
تابعها: واش أنا ما عارفكش اا حبيبتي اجي نهضرو باش نتأكد
والو عاجبها اللعب معاه أما هو خايف على عظامه شدها فالكوزينة ودارها فوق كتافه غادي بيها البيت ومرة مرة يشحطها لمسعودتها وهي كتركل وتموت بالضحك

رماها فوق السرير وتلاح فوقها: همممم قولي دبا.. كيفاش هاد التقنية ديال تاخدي الكلام من فمي هممم؟ (باسها فشفايفها عاصرها)
كضحك وتفركل تحت منه: وانت كيفاش هاد التقنية ديال تخبي على مراتك.. هممم؟ (رجعات ليه البوسة بنفس الحرارة)
خشا راسه فعنقها: إلى عرف شي حد غير بالغلط غادي تبقاي أرملة ااا المسخووطة
خرجات عينيها: لا اااا ويلي ماشي تال ديك الدرجة
عارفها خوافة وكتموت من جلال مركب فيها الرعب غير بالقصص لي كيعاود لها عليه: لا اا حبيبتي حتى لديك الدرجة.. جلال ما معاهش اللعب فشي مسائل
خوفها ومزال الصناطح: اييييوة حتى حنا ما نعطيوهش اختي
معاذ: وعلاش ضيااء لخاطرها.. الحب اا حبيبتي للحب.. اجي نوريك جران اللسان كيف كيكون وبشحال كيطلع

طيب لها لسانها وفمها وهي كلها طابو جنابها ولات طالبة الشرع نسات حتى اش قالها وجلال وضياء نساها حتى اسمها ولات كتعيط غير باسمه ما خلاها تنعس حتى نعسات له راسها المشكلة هي صابحة خامرة ما قارياش هو لي جايبها فعظامه
حطها بلاصتها وغطاها مزيان لبسها باش ما تبقاش عريانة وناض للحمام دوش ورجع جرها خاشيها فيه حب حياته من الطفولة حتى كبر دوز علاقات عادية فالليسي والكلية وملي دخل خدم حبس كلشي ورجعات احتلت تفكيره البطبوطة الصغيرة لي عشق بنت حومتهم القديمة ورجع تبعها لقا راسه عمرو نساها وزاد غرق فبحر حبها كيحمد الله لي هي حداه وفجنبه وكتبادله نفس الأحاسيس

              💣💣💣💣💣 توقاعتكم وآرائكم 💣💣💣💣💣

هههههه مصخوووووطة وهو مصخوط كثااااااااااار منها فقدها الذاكرة وارتاح