🌹هن القوارير🌹 (في طور التنزيل )

part82

👑👑 هن القوارير 👑👑
شمس الغريب

الجزء 82:

مدوزة هاد الاسبوع روعة مع خالتها زهور لي ملي كتلاقا مع الشباب كتسترجع حتى هي شبابها المغصوب وكتعيش اللحظة بلحظة كتتناسى الواقع المر ديالها على الأقل باش ملي ترجع تلقا ذكريات زوينة تصبرها ملي ترجع لحقيقتها.. اسبوع وهما مرتاحين فالدار جلال ملي يخرج للخدمة تعلمه ضياء بالمستلزمات لي ناقصين وهو يتقضى معه وهي وزهور لي تبدلات فظرف أسبوع بانت عليها الراحة النفسية مسكينة

زهور قربات من كرش ضياء: اش بغا الحبيب ديالي ولا الكبيدة ديالي للعشاء انشاء الله
ضياء: خالتي زهور ديري لينا الحريييرة عفاااك
زهور: اويلي راجلك ضال دايع فالخدمة وفاللخر نديرو ليه الحريرة
بترجي: الله يعطيك صحيييحتك اا خالتي.. واا رااه انا لي كنتوحم مالو هو
ضحكات زهور وعنقاتها: واا الأيام شحال كتجري ياا الحبيبة.. ياامس عاد كنتي برغوتة تجيبك ختي فاطمة ونضل انا دايعة بيك ونفوح بيك على بنات الدوار.. حقا بنت اختي فنة

دخلو بجوجات للكوزينة ضياء كتحط وتستف التمر بريوات شباكية والبيض كيتسلق لي يتقدم مع الحريرة لي ريحتها عاطية فالدار الكولوار لي كيدخل عندهم زهور عمرات 2 بواطات وخرجات فالكولوار دقات على الديور بجوج خرجو ليها عيالاتهم دوقاتهم كما العادة وهما يدعيو معها ومع ضياء ويعاودو وحتى هما أصبحت جورتهم مع ضياء متينة خصوصا وأنهم ناس مزيانين بشهادة جلال لي ما امتنعش انها تضايفهم وتصاحبهم

دخلات لقات ضياء كتحط فالطبلة لي فالصالون رجعاتها طابل ديال شي مطعم 5 نجوم لي شاف ديك الطبلة يحلف بلي ماشي الحريرة لي غادي تحط
زهور: ااا مالكي تعبتي راسك كنت أنا نحط
ضياء: اا خالتي راه غير صونا جلال قالك شي صاحبه سنين هادي ما شافو ايوة ملي تلاقاه عرضه للعشاء ايوة قلت غير نوجد الطبلة على ما تجي
دخلات زهور تنير وتعاود ويلها هي غادي تحشم جلال مع صاحبه.. ويلها هي علاش دير بكلام ضياء اليوم ودير الحريرة وضياء حابسة الضحكة حيت خالتها مقندشة تقد ضورها فيها كبو الحريرة فسوبيرة متوسطة زوينة وحطو زليفات

يالاه دخلو للبيت هما وحريرتهم وباش تدوز دار الساروت فالباب وسمعو الكلام ديالهم ضياء كتشرب وتبنن وزهور ما كرهاتش تخشي لها راسها وسط ديك الزلافة
جلال فرحان بصاحبه سنين ما تشاوفو وتلاقاو غير بالصدفة: مرحبااا بخويا عتيق والله الى ساعة مباركة
عتيق: سبحان الله ربي مكتب أنني نتلاقاك من بعد سنين ديال البحث اا صاحبي
جلال: واا غير قال ليا راه واحد السيد اسمه *عتيق جماني* باغي يشري كدا كدا شديت انا غير الاسم ونضت هابط نتأكد واش تشابه الأسماء ولا بصح نيت
عتيق: شكون قال جلال لي حالف من الصغر ما يتزوج يسبقني
جلال ضحك: انت شبعتي زواج فالصغر كل حفلة فالدار شكون العريس عتيق ويتشرط فالعروسة مزال.. قلبتيها لحية نعام ااسس
عتيق شير ليه للسوبيرة: عطينا اا صاحبي عارض عليا توبخني
جلال عادي اصلا ما غوبش ما تقلق اصلا هو ما علمهم ما والو وكل واحد كياكل لي قسم ليه الله عاد عتيق كيشوف فالطبلة باعجاب
عتيق: لي قاد هاد الطبلة نعطيه محترف انا فالسيرفيس
جلال كيكب الحريرة وكيهضر: مزيان نيت لي بنتي اا خويا عطي لمراتي شي دبلوم من داكشي.. وملي تفك على خير بغيتها تجي شي نهار لديك الكويزين عندك تبرد هوايشها
عتيق كيتبنن فالبريوات: لا لا هادي إلى دارت مشروع راه تولي تنافسني
جلال هز راسه: وداكشي لي بغيت انا نيت تزاحمك مراتي.. خصوصا إلى قلت ليها راه كنتي حاgر عليا فالصغر.. مستغل كبر السن ديالك والصحة لي عطاك الله
ضحك عتيق وهو ما خلى حتى حاجة ما ذاق منها حس العمل دياله كيرافقه دائما كيبغي يذوق ويكتاشف ويعطي حتى الملاحظات