🌹هن القوارير🌹 (في طور التنزيل )

part22

👑👑 هن القوارير 👑👑
شمس الغريب

الجزء 22:

كان واحد السكوت رهيب ملي نساحبات القاضية والنواب للمشاورة بيناتهم صدمة كبيرة دخلو فيها كلهم بدون استثناء عاد زيد محامي ضياء لي كان يؤكد ويصر على الطلاق لي باغيا ضياء لأنه صعيب تعيش مع شخص يفتري عليها وكذب فحقها وحرمها من حريتها وسلبها من عائلتها كلشي قالو المحامي بلا كلل ولا ملل

أما واحد خواتاته ضرباتهم الساكتة خصوصا وأنه البرgاgات الحرات ديال الحومة والخبار باينة غادي تكون فاتت الحومة لهيه حضرو سمعو كلشي أما عبد الخالق مزال مصدوم ما قادرش يستوعب اش سمع يعني ضياء ما عاقراش وما طامعة فيه ولا والو كما قالت عائلته وكما فهم من كلام نعمة هاد الأخيرة لي طالقة ابتسامة استفزاز مخلياهم كيتقلاو خصوصا تاجة لي ما عرفات راسها واش طلعات حمارة لي سمحات فعروسة كيف الماء البارد على قلبها وبناتها خرجو عليها ولا انتقمت لأيام زمان

ضياء هي لي كانت مخشية فخوتها باش ما يقربش ليها وكطلب انه القاضية تحكم ليها من أول جلسة بالطلاق وترتاح منهم بالمرة ما قدرش يصبر وجا وقف بعيد بامتار والمحامي دياله واقف ليه لا يدير شي مصيبة
ع.الخالق: علاش اا ضياء ما قلتيش ليا بلي راك ما عاقراش
حكم خزر فيه: سير فحالك الله يرحم الوالدين ما باغيش ندير فيك شي مصيبة سير
شادو شرف يقدر يطير عليه فأي لحظة ولاخر جرو المحامي دياله مبعدو من تما حتى جا عيط عليهم ثاني باش يدخلو يسمعو القرار

ضياء كتمنى هادشي ما يطولش وما يتعطلش طلاقها ويكون اليوم وتمشي مرتاحة دوز السبوع وهي ناشطة مهنية وخوتها أكثر منها باغيينها ترتاح باش يرتاحو لراحتها وباغيين يرجعو بخبر زوين للاب والأم ديالهم ولي بقاو فالدار على نار

أما عبد الخالق ما كرهش يدخل يقلب جميع الأقوال دياله باغي يفهم كيفاش هي دارت التحاليل قبل منه واش مراته كتولد فعلا بغا يحماق صافي وعائلته ما بقاو عرفو اش يديرو واش يقولو ليه بقاو غير كيشوفو فضياء وحتى ريحانة وخوها شداتهم دواخة هما جايين باش يبينو ليه بلي واقفين معه وبطريقة غير مباشرة الموافقة عليه ولكن ملي سمعو هادشي بقاو غير كيشوفو

في حين البرgاgات جالسات وساكتين طالقين ودنيهم باغيين يسمعو أي حاجة بسيطة يوصلوها للناس لي بقاو فالحومة باش يبانو واعرين فالحومة دخلو وخداو الأماكن ديالهم بهدوء كيتسمع غير التوشويش

ضربات القاضية بالمطرقة: هدوووء الله يخليكم
كان واحد السكون رهيب والقاضية هبطات نظيظراتها قدام عينيها كتقرى القرار بكل هدوء وتأني كلشي قادر يفهمها
القاضية: بعد المشاورات والأدلة لي بين يدينا قررنا الموافقة على طلب الطرفين والحكم بالطلاق

ضياء وقفات بالفرحة وعانقات نعمة لي نزلو دموعها فرحانة لاختها ملي ضياء فرحات بطلاقها هاك قدرو يعرفو واخا ما عاودات ليهم والو بلي راه صبرت لشحال من حاجة خوتها عنقوها وتوجهو للمحامي كيسلمو عليه فرحانين ليها
عكسهم هما لي كانو طالبين الطلاق بحال الى ما فرحوش بيه حسو بالشمتة كطلع وتهبط فيهم حرقة كبيرة وشكون تسوق ليهم عبد الخالق بقا غير كيشوف مصدوم وكيشوف فيها كيفاش هي فرحانة قال مع راسه واش ظلمها لهاد الدرجة لي تخليها تفرح لطلاقها هاك بدا كيرجع بذاكرته للوراء كيلقى بلي ظلمها بزاف ولكن كيحس بلي تشمت وبلي فطرات بيه قبل ما يتغدى بها

قرب للمحامي دياله كينغزو: دير شي حاجة انا ما بقيتش باغي نطلق
جراته أخته لواحد القنت خرجات عينيها فيه: باش تعرف راسك بلي كنتي مقولب فيها شوف الغدر مشات للطبيب بلا ما تقولك ....
قاطعها: كانت باغيا تبقى معايا كانت قابلة.. عاد زيد ها هي ما بغات لا فلوس لا والو

باقي كيهضرو سمعو أمهم مشات تعرضت لنعمة فباب القاعة: علاش كذبتي على ربيعة بلعاني خليتينا باش نمشيو للمحامي الكبير يمص دمنا
نعمة ببرود: نتوما لي فيكم الفز حيت مول الفز هو لي كيقفز أما أنا قلت غير الحقيقة سي أحمد راه احسن محامي لينا ديما كنربحو معه الحمد لله وبالنسبة ل اختي غادي تاخد حقها بزز ولا بالخاطر انا قصدت الطلااااااق الطلاق باش تهنى من كابوسكم
حكم جر اخته: مالكم ما فرحانينش راكم ربحتو القضية ولي بغيتوه راه هو لي كان
ضربات تاجة على صدرها: فرحااااانين فرحاانين والعرس لي غادي ندير لولدي غاتبقا الهضرة عليه حتى يفرخ وندير سبوع ثاني نخلي غير شان ولدي لي فالفام
نعمة: وملي تلاقاي مع عزرائيل عنداك تنساي ما تديش ليه الضايgة

مشاو وخلاوهم غادي يموتو بسمهم عبد الخالق مزال تحت تأثير الصدمة واش ضيع مراتو بيديه علاش ما لاحظش ملي كانت كل مرة كتصر أكثر من الثانية باش يمشيو بجوج للطبيب كانت عارفة بلي المشكل ما منهمش وبلي خاص تدخل طبي باغي مزال يستفسر ولكن هيهات ضياء صافي مشات وطلاقها خداتو بقا ليها غير تشدو فيديها

ريحانة قربات منه: عبد الخالق.. ما يبقاش فيك الحال هي كان عليها تقولك بلي مشات للطبيب وبلي هي كتولد تلقاها هي براسها كانت باغيا الطلاق.. عائلتك بغاو لك غير الخير امك مسكينة طلبات غير تشوف ولادك
بقا متبع ضياء لي كضحك مع نعمة وخوتها تفقص: ريحانة تقبلي تزوجي بيا
ضحكات بجهد حتى عينيها غرغرو وحركات راسها بحال شي حمقة: اااه ااه معلوم

                 💣💣💣💣💣 توقاعتكم وآرائكم 💣💣💣💣💣

اااح الله على راحة
ايوة دبا نربطو الأحزمة