🌹هن القوارير🌹 (في طور التنزيل )

part128

👑👑 هن القوارير 👑👑
شمس الغريب

الجزء 128:

الفرحة كملات ليها الحمد لله تفرتكات جقلة من بعد ما كلاو الناس ونشطو بقاو عائلة العروسة فالدار فقط وأصحاب الاشتراك كل واحد مقنت مراته فقنت معاذ فالدخلة ديال الباب واقف مع راحة فنقاش واش تبات أو لا لا حيت سمع انه شي أولاد خالها وخالاتها كبار غادي يجيو يباركو ويستحيل انه يخليها.. فالمقابل كان جلال لي اصلا عارفها ما غاتباتش كيهضرو غير على الوقت فين يجي من وراها وصافي

قرب جلال باس جبينها: بنتي ليا عيانة كون غير نمشيو دبا
ضياء بترجي: لا عفاك غير شوية والله ونمشيو
جا شرف من الداخل لقا خواتاته كل وحدة فقنت: نعمااا اا نييعماا
لوخرين كلهم شافو فيه ضياء حشمات والباقي عادي نعمة من الداخل: نعااام
شرف بمزاح: واا عيطي على امجيد واجي راه نتي لي خاصة فهاد التشكيلة
ضحكو معاه مجموعين وهو شاف فيهم: وا فين غاديين بقاو مزال شوية
معاذ: لا لا والله انا بعدا عيطو عليا من الخدمة
شرف: كون هاني هادي (شدها من كول قفطانها) توصل عندك فالعشية يا انا يا حكم
راحة بحال شي بنية: أنا باغيا نبات
شرف حمر فيها: داركم اا لالة شوية الدنيا غادي تبدا تعمر ببنادم
معاذ قرصها من نيفها وجرها لحضنه كيحزر فيها وشرف ضار لضياء: ياكما حتى نتي باغيا تباتي

دارها جلال من وراه: خوويا شرف خليك عزيز.. ما تخلعش ليا مراتي
ضحك شرف: كي شفتي هي غير باغيا تبقا صافي اا خويا قلبتيها علينا
قلباتها لهم راحة دراما تما ودخلات كتنgر على معاذ: شووف خويا جلال اش دار على ضياء.. دااافع عليها.. وشرف حيت انا باغيا نبات معاكم موحشاكم تجري عليا (هزات صاكها مغوبشة وجات بلا ما تودعهم) تا انا غادي نمشي دبا
حلات الباب وسبقات معاذ خلات الكل مستغرب حتى من نجاة تبعاتها ماموالفاش ليها يتقلق كلشي إلا راحة حرام
نجاة خرجات فيهم نيشان: سمحو ليا.. مال راحة خرجات هكاك
ضياء باقي مبلقة عينيها: والله كون ما كنت نشوف فيها بعيني ما نقول هادي راحة بالله
فاطنة أم زهور تبعات نجاة: يااا تي زيدي راه من صباح وانا نقول لفاطمة جري البنت تجلس راه عينيها مزاgلين غير ديال الوحم وهي كتقول ليا لا راه ما حاملاش
كلشي طرطق عينيه فاطنة كانت قيبلة من زمان وتعرف الحاملة غير من عينيها ملي جات وهي تأكد عليهم أنه راحة حاملة ووالو حتى واحد ما تيقها حيت راحة كدير الفانيد
فبيت البنات القديم كانت جالسة هي وعبد العالي من بعدما حيدات داكشي من وجهها خرجات سدات الباب ورجعات حداه
زهور: عبد العالي قول ليا اا ولدي اش قلقك
عبد العالي عاود ليها الفلم كله لي طرا ديال خاله خلاها كضرب ففخاضها وتندب حناكها على التطييحة لي دار ليها وعاد فهمات كلام عتيق وقفات كتمشي وتجي غا تموت الزيف ولاحته الشعر ونتفاته الوجه وندباتو حتى بان لها الباب شي حد باغي يدخل لوات على راسها لي تشنتف الزيف وحلات لقات أمها قدامها واختها من وراها صرطات ريقها قلبات على فاطمة بعينيها ما بانتش لها
زهور غير بالفن: عبد العالي خرج اا ولدي وقول معك لاختي فاطمة ها حنا هنا