🌹هن القوارير🌹 (في طور التنزيل )

part39

👑👑 هن القوارير 👑👑
شمس الغريب

الجزء 39:

صابح الأحد كلشي خامر وهي وجدات الفطور وحطاته على الطبلة باها وامها لي فايقين صافي رحيمة وراجلها مزال ما هبطو وبايت عندهم ولد شرف الكبير جا معاهم الليلة لي فاتت باش يمشي هو وضياء
عبد الله: واا ماا تعطليش اا بنتي على خووك
فاطمة ضحكات: الله يهديك اا الحاج راه عارض عليها لغدا
حرك راسه بالنفي: قالها تمشي دوز معاهم نهار.. انا راه خفت غير لايكونو باغيين يشدو الطريق لشي بلاصة ويتعطلو
ضحكات ضياء: أنا نفيق هيثم يفطر نلبس ونمشيو
طلعات فيقاته كان ناعس معها فالبيت بلاصة راحة فيقاته مشا يغسل ويبدل عنده باش فدار جده وهي لبسات حوايجها وتقادات لا تكون بصح شي خرجة ولا شي حاجة وهبطات لقات هيثم كيفطر وجداه كتزيد ليه جلسات كتزيد تاكل شي حاجة
هيثم: عميتو ضياااء.. نمشيو؟

ناضت هي وياه غير على رجليهم الدار ما بعيداش بزاف والطموبيل بغات تخليها للاب ديالها لا يحتاجها ولا شي حاجة لقاو نجاة فطرو وكتجمع الماعن والدار لي ما مروناش اصلا بزاف وخوها لابس وحداه أسامة وكوثر ولاده لاخرين لابسين قالت بلي بصح خارجين لشي قنت باقيا غير نجاة لي ما لابساش حيت كتجمع طبعا الأم المغربية دائما هي آخر وحدة توجد كتوجد كلشي وتبقا هي
ضياء: ياكما تعطلت عليكم؟
شرف ابتاسم لها: لا لا باقي الحال نجاة مزال ما لبسات.. تبارك الله على سي هيثم جاي واجد.. فين لقيتي داك القبية؟
عنق ضياء هو العزري ديال خوتها هو أول حفيد لوالديها وشهوة منه: عميتو ضياء شراتو ليا
بادلاته العناق: تستاهل اا الحبيب.. أسامة ، كوثر ما بغيتوش ديالكم؟
طارو حداها كيقلبو ناضو ديك الساعة بدلو دوك لي لابسين بيهم من بعد ما خداو الاذن من نجاة لي مشات كتلبس حتى هي وتوجد راسها

فقهوة جات خارجة على المدينة فالمجال القروي عائلية بامتياز فيها فين يلعبو الوليدات وفيها كل المأكولات سواء بلدية أو عصرية خدا شرف مكان لهم أما هما كلها فين عطا الراس هيثم مشا عند شي دراري كيلعبو كرة دار بلاصته معاهم أسامة حتى هو ضبر على أولاد قده وكوثر مشات للألعاب كاينين تما في حين ضياء ونجاة كيتمشاو وسط الطبيعة ويشمو الهواء النقي وحاضيين معاهم الوليدات

نجاة: ايوة اا ضياء اا حبيبتي.. مزال ما قررتي تبداي صفحة جديدة؟
ضياء هزات فيها عينيها اصلا هاد الخرجة شكات فيها من الاول: هاااا جيني نيشان اا نجاااة اا اختي ها العار
نجاة وقفاتها وجلسو فواحد الطبالي معزولين: شوفي خوك مخرجنا وداير فينا هاد الأجر ههههه غير باش نقلقلك.. وأنا راك عارفة معزتك عندي هما ما بغاوش يقولو لك شحال من حاجة بغاوك توافقي براحتك
قاطعاتها: كيفاش ما فهمتش!!
نجاة: كاين واحد السيد اا ضياء من عائلتكم عايش برا هذا زمان.. ممكن تكوني كتعرفيه؟ المهم سميته عادل هاد السيد قالك كان حاط علك العين قبل ما تزوجي وما عمرات عينه حتى وحدة وبقا بلا زواج.. ونهار طلقتي قالك دار الزردة لهيه وبغا يدخل للبلاد فأسرع وقت على قبلك غير عنده شي خدمة خاص يكملها.. هاد السيد اا بنتي يا ضياء قالك عارف عليك كلشي من الناس القراب ديال العائلة لدرجة أحلامك حققهم لهيه على قبلك.. دار مطعم حيت كيعجبك الطبخ.. خدا دار قالك فشي بلاصة تما وعاودلها الإصلاحات وجات خارجة شوية على المدينة.. المهم قالك عايش تما باحلامك نتي
ضياء كتعصر مخها: واش عادل لي جداته هي لي بنت عم بابا؟
ضربات نجاة على فخضها: هاااااداااك الله يفكرك فالشهادة
ضياء تفكراته: اييه عقلت عليه.. بالحق واقيلة أصحاب الدار ما عارفينش عليه واحد الحاجة.. راه فاش كانت عنده ديك 17 عام تعدى على واحد البنت صغيرة اا ختي.. فوقما كنتفكرها لحمي كيبورش عليا كنكرهو لواحد الدرجة ما كتصورش.. داكشي باش باه ناض صايبلو الأوراق وصيفطو لبرا باش ما يتشدش.. وسنين وهو غابر ما جا حتى دار 27 عام يمكن تما شافني.. اما انا فاش دار هو ديك الزبلة راه كانت عندي 10 سنين والبنت لي تعدى عليها عندها 8 سنين مسكينة هادشي كانت قالتو ليا ليلى بنت عمتي الغالية كانو ساكنين حداهم

نجاة: عطااااك الله الصحة واا انا راه فراسي هادشي قالها لي خوك.. بالحق عمي وخالتي ما فراسهمش هاد الكلام عارفاهم هما ديما بعاد وهو صيفط باه ل عمي وقاله هادشي عمي عجبو الحال مسكين وقال من عائلته وباغي بنته وغايديك برا تكملي قرايتك فرح وقالها ل شرف البارح
ضياء: هاااااا حولو كيقول ليا غاتخرجو وكدا.. مسكين بااا إلى عرفها غادي يتصدم
نجاة: أنا كنت خايفاك نتي لا تصدمي يعمرو لك راسك بيه وملي تعرفي هادشي تقلقلي الساعة صدقتي عارفة
ضياء: الله ياخوود منه حق ديك البنت لي قتلوها بالعصا عائلتها مزال فوق داكشي وعذبوها عاد هو طار من تما اودي بفففف

نجاة تبسمات: بالحق كاينة حاجة اخرى.. كاين واحد اا ختي كيدير المستحيل غير فالبلاد هو سبابك حتى تقيدتي فالصونطر.. ومستاعد يدير أي حاجة على قبلك بالحق هو يا ختي قالك ما يقولها لك حد باغيك تعرفي راسك
قلب ضياء بدا كيتزعزع من الداخل علاش مشا لها تفكيرها ليه هو صافي: شكووون
نجاة صغرات فيها عينيها: احياااااانااا عليك باينة عرفتيييييه
هبطات راسها للارض ما بقات هزاته: دبا يا لالة خووك باغي يعرف واش يزيد يحبس عليك الناس لاخرين تزيدي تفكري فالسيد ولا يخليه يقلب على راسه وعلى طريق وحدة اخرى ليه
هزات راسها بسرعة: علاش شرااااف فراسه
دورات راسها ضياء كتبتاسم: ايييه ااا الحبيبة اصلا عينين داك السيد فاضحينو بالحق شرف هو لي قالها له مع قصده نيشان ملي يالاه طلقتي
حبسات الضحكة عاضة على شفتها: لا باقا باغااا نفكر
ضحكات نجاة: باقااا باااغااا نفكر دبا يطيروه لك اا المصخوطة.. يالاه يالاه شرف خليناه بوحدو كيف اليتيم

مشاو لعنده ضياء ما بقاتش قدات تشوف فيه على عكسه هو لي كيقلب على شي جواب فملامحها ويسول نجاة بعينيه لي ما باغياش تعطيه رأس الخيط كتشوف فاي حاجة إلا هو طلبو كل واحد اش بغا وجلسو كيضحكو مع بعض مدوزين نهارهم
شرف: نتحركو
كلشي وقف سبقوه وهو مشا خلص مشاو للطموبيل الهزة لي غادي تهز راسها بان لها واقف هو ووحدة عاطياها بالظهر هو لي مقابل معها ولوخرى كتلعب بشعرها الطويل كل مرة وتعوج من هنا لهنا لاطاي ديالها فاتنة عاد زايداها باللباس لي مبينها نيت بومبا كتعوج كل مرة بحركة اغراءية عكسه هو لي واقف بثبات واقفين جنب طموبيل ما شافتش اشمن نوع بيضاء كيهضرو باينة فشي موضوع جدي

عمرات عينيها بصورتهم حتى عمراتها وصرفاتهم دموع تجمعو فجناب عينيها بقات كتصوط عليهم قبل لا تطلع عاد ركبات كتهضر مع نجاة كتحاول تناسى وكل مرة تقلب عينيها جهتهم ويتزير عليها قلبها ما تنفسات حتى جا خوها وتحرك شافت آخر شوفة وفخاطرها ما كرهاتش يبقاو حتى تشوف اخرة هاد اللقاء

وصلو للدار لقاو رحيمة كتوجد الحرشة للكاسكروط طلعات للبيت ونزلو دموعها بلا سابق إنذار كتمسح وينزلو ثاني حتى تعصبات علاش تبكي عليه ولكن علاش كيخونها ضاغي رجعاته كيخونها قالت بما انه قالها لخوها وكيتصرف معها بتودد اذن خاص يحافظ على راسه ليها وهادي داخلة فالخيانة تفكير يديها والثاني يجيبها حتى لقاوها ناعسة ملي بغاوها تجي تشرب اتاي عاد فيقوها مرجعين السبب لعياء الدراسة

             💣💣💣💣💣 توقاعتكم وآرائكم 💣💣💣💣💣

اااا ميمتي ميمتي مزال ما كملات فرحتها شافتو مع هاديك شكون هي يالاه قولو