🌹هن القوارير🌹 (في طور التنزيل )

part13

👑👑 هن القوارير 👑👑
شمس الغريب

الجزء 13:

صبح الصباح فاق ثاني للخدمة ما كاينش حسها فالدار ونهار ثاني غادي يمشي بلا احسن فطور يمكن ياكلو وما غاديش يدي معاه ماكلته مرة أخرى وملي هبط غادي بانت ليه ريحانة فانتظاره بابتسامة هاد المرة غير بوحدها بقا كيشوف فيها وهضرة عائلته فباله ضغيا زوجوه بها وردوها قابلة وحاملة

حلات الباب لي جنبه وألقت السلام ردو عليها ناوي يسكت ثاني حتى نطقات
ريحانة: مراتك لباس عليها نسيت سميتها
ما حيدش عينيه على الطريق: ضياء.. لباس عليها الحمد لله
جبدات من صاكها جوج صوندويتشات للفطور مدات ليه واحد: ما كيعجبنيش ناكل بوحدي
شده من عندها جبدات ثاني تيرموس صغيرة كبات ليه اتاي تبسم: جايبة معاك الكوزينة كاملة واقيلة
ضحكات: كنبقا تما ما كنبغيش نضيع الفلوس بالماكلة ديال تما
حرك راسه: اصلا ماشي صحية

عكس المرة لي فاتت الطريق كلها وهما كيهضرو من موضوع لموضوع وغالبا هي لي كتجبدهم حتى وصلها لكليتها نزلات والباب كانت مقابلة معها صديقة لها من أيام دراستها جنب دارهم غير هاد البنت دارت السكن الجامعي شافتها وشافت سيارته تحركات وقربات ليها بابتسامة لعوبة

البنت: هاي هاي ولاو اا ختي يوصلوك الناس حتى لباب الكلية برضا والديك
قلبات عينيها: غا تبداي ثاني
البنت: هو هذا ايوة مالكي راه باينة عليه ولد الناس
ريحانة جراتها باش يدخلو: ياكما بغيتيني نقول ليه اجي تزوج بيا
البنت: كون ما كان قايل لخوك والو ما يهضرش ليك عليه ويقول ليك مشاكله 
ريحانة: كون تشوفي مراتو كيف دايرة
البنت: تكون كما بغات المرأة لي كتولد الولاد هي لي كيبغي الراجل شفتي خوك كيف كان كيموت على مراته
ريحانة: وا هذا راه ما قالش ما جبدش الهضرة والى كانو عائلته لي غايختارو ليه

دخل لوزين لبس لبسته ومشا للماكينات يشوف هنا وهنا حتى وقف عليه واحد من لي خدامين معاه تبسم ليه
الشاب: انت شفتك ما بقيتي تجيب ماكلة وليتي مهموم اا مالك ياك لباس
جمع حواجبه: ما كاين باس
حرك ليه راسه: وا تكلم للشاف
استغرب ولكن حيد ليgات حطهم وزاد للمكاتب الخاصين بهم كفئة

دخل عند الشاف ديالهم: زيد اا سي عبد الخالق زيد (شير ليه للكرسي) تفضل
جلس ع.الخالق وحيد الكاسك ديال الخدمة واستهل السيد كلامه: راك سنين باش خدام معانا اا سي عبد الخالق (حرك ليه راسه) شفنا منك غير الاجتهاد والانضباط وانا جاوني أوامر من الفوق باش نختار منكم المسؤول على الفرع لي غادي يحل جديد فالوزين فقسم الميكانيك
ع.الخالق حس بالفرحة وبقا كيتسناه يكمل: وانا ختاريتك انت وما كنتش باغي نقولها ليكم حتى يجي الشاف الكبير باش ما يحسدوكش لي معاك راك عارف بنادم كيف داير ولكن كان خاص نعلمك حيت خاصك دير واحد الفورماسيون
ما قدرش يكتم فرحته عارف بلي داك البوسط كيعني بزاف أولا الخدمة غاتقلال والخلصة غادي تزاد حس براسه غا يطير بالفرحة

ع.الخالق: الفورماسيون فين تكون؟
تبسم ليه: هنا نيت انشاء الله
رجع لخدمته وهو فرحان بالنسبة ليه جزء كبير من مشكلته غادي تحل وكيتمنى كلشي يبقى على خاطره مشا صيفط ميساج لضياء ديك الساعة

كانت جالسة كتفرك جلبانة هي وراحة وامهم جنبهم ناصبة الطاجين حتى وصلها ميساج منه دخلات 📨 ضياء واش ممكن ترجعي قبل ما نجي عندي ليك واحد الخبر يفرح 📨
قالت مع راسها يكون قبل يمشيو للطبيب هادشي لي غادي يفرحها هاد الساعة ولا يعتاذر على الأقل على لي فات
شافت فرحيمة لي كتقاد فصالاد: رحيمة اختي حكم فوقاش يرجع؟
بتفكير: اليوم اليوووم غادي يجي يتغدى ويطلع ثاني يراقب الفوق
حكم خدام مراقب ديال محلات الصناعة التقليدية كيشوفو الاثمنة لي دايرين والضرائب لي عليهم هادي هي خدمته فالمكتب ويخرج يراقب
ضياء تنهدات: مزيان ملي يكون طالع للقيصارية يوصلني
لا أمها لا راحة قدرو يهضرو ولكن رحيمة مزال ما فراسها والو: تسناي حتى يجي لك عبد الخالق ومنها دوزي معنا العشية
ضياء: لا راه هو لي صيفط ليا ميساج ما يقدرش يجي مورايا

وها داك ما كان وصلها حكم معه فالطريق وحظها السيء باقي لاعب معها وهما طالعين من الشارع باش يحطها قدام عمارتها بان ليها مهبطها ثاني ومبتاسمين لبعضياتهم الحاجة لي زوينة هاد المرة انه حكم كان كيهضر فالتيلي ما ردش البال خصوصا وأنه حكم عكس شرف ما كيتصرفش بالعقل كون شافو كون هبط دفنهم بجوج تما ويدي أخته 

                💣💣💣💣💣 توقاعتكم وآرائكم 💣💣💣💣💣

ااا ربي السلامة كيف غادي تصرف ضياء