🌹هن القوارير🌹 (في طور التنزيل )

part75

👑👑 هن القوارير 👑👑
شمس الغريب

الجزء 75:

وأخيرا تفتح الباب وسلتات من خلف السيارة مع الأسف ما قدروش يشوفوها لأنه ضوء الطموبيل لي دخلات عماهم ضرباتها بجرية لطموبيلتها حسات بفرحة كبيرة انها بدلات مكان طموبيلتها ملي العساس جرا عليها ديمارات الطموبيل وزادت كضحك ومخلوعة فنفس الوقت كانت كتبان بحال شي حمقة وصلات لدارها والرعدة طالعة معها ما عرفاتش علاش فالطموبيل وفالدار ديالها كتحس بالخوف فيهم والرعب واش غير حيت هزات فيهم داكشي ولا شنو المشكل دخلات للدوش ما قدراتش تكب على راسها الما بزاف لأنه ظهرها كله تشرط خاصها تعقمه

خرجات برا مسفحة كتقلب على شي فام دو ميناج حتى بان ليها جارها واحد الخامج عينه زايغة مزوج ومراته يالاه والدة كانت غير هي وياه فالايطاج بقا كيشوف فيها ويتنهد وكيتلفت بحال الشفار وهي كتهبط بلعاني الديباردور من لتحت باش يزيد يبان صدرها بكل حقارة حتى قرب دفعها الداخل ودخل وسد الباب هزات يديها باغيا تغوت وتجعوق وتدير ليه الشوهة سبق سد ليها فمها

كيهمس ويتمحكك معها بحال شي حمار مع شي شجرة: علاش خلينا غير نتفاهمو بعدا
هزات خنافرها للسما: اشنو كيصحاب ليك انا ***** هنا ولا اش هاجم عليا
قاطعها: الحب اا لالة هناء الحب والقلب وما يريد.. واش ما كنبقاش فيك انا مزوج بديك الضبعة.. ودبا ولدات ولات بحال الخنشة.. والتوت والعسل قدامي ونخليه
تحركات قدامه كتعوج حلات الباب ديال الدار من بعدما طلقات ضحكة ديال هادوك لالياتي: امممم ايوة خرج حيت ما عنديش ليك خاااطر نهار نبغي انا نعيط عليك يالاه.. ااه وعيط ليا معاك على شي فام دميناج

مشا طاير وهي فرحانة براسها وكتقول علاش جلال ما يطوعش ليها وهي كلشي كيتمنى غير ليلة معها جات السيدة لي كتكره هناء بحال جميع العمال فهاد الإقامة دخلات عقمات ليها دوك الجروح وهي كتشفى فيها بحال الى فارسينها الكلاب وخرجات بحالها ما بغات تاخد منها حتى ريال عارفين فلوسها حرام دخليهم لجيبك طير البركة غير خرجات السيدة جبدات التيلي حاسة براسها مخنوقة غير كتبقى بوحدها فالدار كتحس بحركة فالدار وشي حاجة غريبة

هناء: الو لالة فطوووش
فطوش: اش بغيتي؟
هناء: ما عرفتش علاش داري والطموبيل كنحس فيهم بالخوف واش غير حيت هزيت داكشي فيهم ولا شنو
فطوش: مممم عادي غير يوماين ويتحيد (ناضت جالسة) ياكما تكفح ليك فيهم
هناء: لا لا ما تكفحش.. علاش تخلعتي؟
فطوش: إلى تكفح راه يقدر ياديك حتى نتي لأنه سحر ما دارش بحاجة خاصة ديالها وانا  تعمدت نخليه ليها وللنسا لي يجيو عندها.. باش عائلتها حتى هي تبغي تفارقها مع راجلها.. فهمتي يعني أي امرأة دازت عليه مشااااات.. داكشي باش داك اليوم زدتك مليون على الحساب خدمة نقية وسريعة
هناء حسات بالفرحة: ربي يخليك وانا اش ندير دبا نطلق شوية القرآن فالدار والطموبيل
طلقاتها فطوش بواحد الضحكة: واش نتي درتي يديك فيدي وانا حاطاها فيد الشيطان واش من نيتك والله الى ضحكتيني.. إلى ما تكفح ليك والو راه ما يطرا والو
رجع جلال للدار وهو كيدور عينيه ومعاه السيدة كيقلبو والجيران كيتساءلو على الصوت منين جاي ديال الضجيج لي سمعو فالاخير كل واحد دخل لداره بلا ماينتابهو لاش ترش لأنه ماء وغبرة ما كتيرش داكشي دخل جلال عادي مشا عندها للبيت مزال ناعسة حمد الله انها ما سمعات والو رجع حط ليها خضر مدخنة مع لحم شرا كلشي من مطعم كيتيق فيه وقاد ليه حتى هو باش يشجعها تاكل طحن ليها عصير فواكه وخلاه ليها لمن بعد هز داكشي ومشا عندها فيقها بلطف وخوف عليها