🌹هن القوارير🌹 (في طور التنزيل )

part50

👑👑 هن القوارير 👑👑
شمس الغريب

الجزء 50:

الغد ليه مع الصباح كيف حلات باب الدار لقات الطموبيل موقفها لها عند العتبة صدمها تهربات من راحة لي جالها معاذ باش يمشيو يفطرو وقالت يقدر يخطفها من تما اللهم رفضات وقالت غادي تمشي لراسها الساعة صدمها

هزات عينيها كتشوف فالجيران لي كلشي خامر حتى قفزها: أنا علاش درت ديك الهيلالة البارح باش طلعي ونتي مرتاحة.. اما انا راه ما عزيزش عليا الهراج وما صوقيش فالجيران.. يالاه اا الكبيدة طلعي نوصلك
قبل لا خرج شي حد طلعات وأول حاجة صونات على أمها لي عارفاها فايقة: ماما جا من ورايا جلال غادي يوصلني
جلال مد ليها حنكه: ما كاينش صباح الخير هممم؟
قربات مبتاسمة باسته بالزربة: صباح الخير
جلال: ياااا الله.. صباااح النوور والورد والياسمين ولي بغيتي.. فين نوصل الأميرة ديالي.. للصونطر ياك؟

كتشوف فيه كيفاش كيتصرف باينة عليه الفرحة بدون قصد داز من درب عبد الخالق وحتى هي اصلا ما رداتش البال مامسوقاش ولكن عبد الخالق لي كان بايت تما هو ومراته لي باقي كتلبس حذائها وما شافتش هاد اللقطة دياله
كيفاش بقا متبع الطموبيل وملامحه لي تحولو للغضب والعصبية ملي شافها كيفاش فرحانة مع راجلها الجديد تسائل مع راسه واش ضاغي نساته واش صافي مشات عشرتهم ضاغي جا لي ينسيها فيه؟ واخا علاش هو ما قدرش ينسى؟
واش حيت ببساطة هو لي كان المستفيد الوحيد من داك الزواج ولا حيت عمرو عطا أهمية لداك الزواج عكسها هي لي كانت باغية تحافظ عليه واش حيت هو لي هدم كلشي بيديه داكشي علاش ندم

خرجات ريحانة: يالاه نمشيو.. وقول لامك راه ماشي انا لي ما خليتهمش يردوك المدير على ديبو باش تفهم كل مرة تعايرني بحال ما عرفت اش درت
ع.الخالق ضرب على الكابو: طلعي ونتي ساكتة لي فيا كافيني ما تزيدينيش الله يرحم بيها الوالدين
طلعات وخبطات الباب حاقدة على الوضع: ايييمتا تقدر تسكت خواتاتك حتى انت هااا.. واعدتيني بالبيرمي وملي ساقو الأخبار بلاصة ما تخلص عليا انا خلصتي على صابرين حقا ما حقا نتي حتى المرة أخرى
ع.الخالق: راني قلت ليك راسي ضارني هنيني حتى نتي
ريحانة: باااااز والله الى باااز
وصلها لباب الصونطر: الحبيبة غادي تقولي لصحاب الدار السيمانة الماجية العقد انشاء الله
ضياء بلوكاها: جلال انا ما بغيتش ندير عرس ثاني (شافتو تعصر غير راسه ما باغيش هو يدير فباله بلي مزوجة قبل اصلا كيحاول يتجاوز هاد المسألة) المهم بغيت غير نهار نفرحو بيه مع بعضياتنا ويكون فيه عقد وكلشي.. يعني واش ممكن تأجلو واحد شوية؟
جلال جمع بونية حطها على فمه كيسمع لها بتركيز: وااخاا اا لالة ضياء عندك من هنا جوج سيمانات وراقك انا نقول لشرف ونتفاهمو
ضياء شدات ليه فيديه: اويلي اا جلال 2 سيمانات اش غادي ندير فيها
جلال بهدوء تام: ما ديري والو نتي غير ارتاحي وقولي ليا لي بغيتي والباقي ما تهزيش ليه الهم نتي
ضياء كتحاول تقنعو: جلال والله الى خاص ندير شحال من حاجة
قرب باسها جنب فمها غادي وكيزعم: نتي غير قولي ليا دوك شحال من حاجة انا ندير ليك لي بغيتي غير ارتاحي ليا نتي لحاااااجة وحدة وحتى هي انا لي غادي ندير كلشي

هبطات بسرعة بلهلا يتبتو ليها لانها فهمات قصده مزيان ولكن غير وصلات للصونطر ودخلات تفكرات بلي هي مطلقة يعني ليلتها الأولى ماشي معاه ولا حتى الثانية ولا الثالثة.... أول مرة تحس بندم كبير على زواجها الأول حسات بظلمها الكبير لجلال حسات بأنها بحال الى غادي تغصبو فشبابه

جراتها راحة من ياقتها: أاااي حماقيتي.. مالكي؟
راحة: لوكان كنتي كتسمعي ما نجركش
ضياء: ياك لباس ؟
راحة: والو يا ختي غير ماما كتصوني ليك تيلي ديالك ما عرفت مالو ثاني.. اا صاحبتي خاصك تبدليه
ضياء: مال ماما؟
راحة: لا والو يا الحبيبة غير سيدي جلال قالك اا لالة من هنا 2 سيمانات غادي تجمعو حب وتبن حيت نتي ما باغياش شي حاجة كبيرة.. وماما قالت لك خاصك تبداي توجدي
ضياء: اا رسول الله ضغيا وصلها لهم
راحة: هممم.. إذن اا الغزالة مع 12 انشاء الله وبما أنه العشية خاوية كلشي غادي يخرج عندنا تسوق جماعي.. غادي تجيب رحيمة طموبيل بابا وتطرق نجاة ونعمة ونسرين غادي تهز زينة وغايدوزو علينا غادي نتغداو ومن تما للجهاد
ضياء: بهاد الزرية؟.
حركات لها راسها باه وصافي زادو
فعلا من داك اليوم وضياء كل نهار خاطفها شي حد مرة البنات مرة جلال مرة ماماها ولالة راضية كل مرة وشكون غادي بيها وكل نهار كترجع محملة ومجملة لدرجة الصالون لي الفوق خواوه ليها باش تحط فيه داكشي ديالها لأنه جلال قالها باش تخلي كلشي عندها حتى يقرب اليوم المعلوم وغادي يجي يهز داكشي من عندها

نجاة كيقادو فداكشي: نعمة صافي كلشي جمعناه ياك؟
نعمة: ااه بقا غير هادشي ديال الحمام
راحة لي عاد دخلات: دبا هادشي هو دفوع لي جايب جلال تبارك الله حتى بنت المرأة ما جاها هاد العدد ديال الطيافر يا ختي تباااااارك الله.. وهادوك لي تما اشنو؟
رحيمة: هادي الهدية ديال عائلتها يا ختشي
راحة قردات حداهم كتمد لهم معاونة: تشباااارك الله علينا يا ختشي..(طلقات عليهم حلقها) وتستاااااهل ضيااااء تستاااااهل.....كلما فالقيصارية يجي لها
نجاة: واا اجيو نصاييو حتى الهدية فالطيافر لي جاب حكم راهم باش نتهناو
راحة: ويلي انا راه مصخريني عندكم وانا نسيت راسي

دخلات ماماها لي كانت لتحت مع العائلة لي جاو ثاني: تي اش قالت لك راضية وما قلتيش ليا؟
راحة ضربات على راسها: والله الى يالاه تفكرت.. جلال اا ماما
ضياء غير سمعات سميته حمارت تلقائيا توحشاته شي 4 أيام ما شافته غير فالتيلي صافي ملاهي هو مع تمارة وهي مخلوعة كتسنى نتائج الامتحانات لي دوزات ومكمل عليها العرس لي بقات لها غير 3 ايام بالتمام والكمال
راحة: عرفتي اا ماما قاعة الأنوار ديك لي فالشوكة فالشارع.. دبا هاديك كراها جلال ليومين ديال العرس قالك تحني فيها والعقد والغد تدير نهار صغير تفرح براسها وراه حتى التريتور خالص اصلا هضر مع شرف راه غير شرف مع الذبيحة ما مساليش

طلقوها نجاة نعمة ورحيمة بزغارت سمعوهم الحومة كاملة لي كلهم تقريبا فرحو لضياء
نجاة: قال ليا شرف واخا عيا يقول ليه را ما بغاتش شي حاجة كثيرة.. لالة راضية مع عاودات ليه على عرس ضياء لي كان وعرف بلي ما تحتافلش بيها كما تستاهل ما طلعات فعمارية ما دارت تصاور مزيانين ملي نوضو تريكته المضاربة مع بعض حلف هو حتى يدير لها عرس قد المقام
ضياء: احسن حاجة هي ما عنديش تصاور ديال العرس معاهم من غير ديال التيلي تمحاو من البال قبل التيلي
عنقاتها امها: خاصك تحمدي وتشكري الله لي بغاك وعوضك
ضياء: ولله الحمد

               💣💣💣💣💣 توقاعتكم وآرائكم 💣💣💣💣💣

نشوفو واش غايدوم هاد الفرح