🌹هن القوارير🌹 (في طور التنزيل )

part139

👑👑 هن القوارير 👑👑
شمس الغريب

الجزء 139:

طول الطريق وهي غا تحماق كضرب وتعاود فداك المقود ما حشمات من باها ولا احترمت وجوده بالحق هو كيجني غير تربية يديه
الاب: رشا علاش هاد الحالة شو شحال من واحد ميت عليك.. ونتي باغية واحد كيدلك ويدل عائلتك قدامك
رشا بعصبية وغوات: باابااا هو لي بغيت وصافي قدما فهمتوها قدما مزيان
الاب: كارولينا غادي تجي غدا ونتفاهمو
ضحكات باستهزاء: واااو ما تفاجأتش ضاغي عيطتي عليها.. هاديك خيتي بعدا هي آخر وحدة نسمع منها اا سي جواااد
الاب: ما تعيقيش اا رشا راه ماماك هاديك وخاصك تسمعي منها
وقفات الطموبيل جنب وخدمات السينيالات كاملين حلات النافذة لي جنبها وشعلات سيجارة نسفاتها وعطاتها لرئتيها هما يتعاملو معها ما راعات للاب ديالها ولا لصحتها ولا للناس لي كتشوف باستغراب مزال وما خاصش اصلا تدخل لنا فكرة انه أنثى كتكمي فمجتمعاتنا الإسلامية والعربية

بعد داك السيجارة: هممم اا جواد.. اش قلتي ماما ياك.. ماما لي سمحات فبنتها وراجلها ومشات مع صاحبها ولدات معاه عاد جات تطلقت.. اشمن أم هادي لي فالعطل لي كتمشي بنتها عندها كتخليها مع أم صاحبها ولا ما نعرف وتمشي هي وأولادها لاخرين فعطلة.. ودبا كطلب منها تجي تعطيني انا نصيحة
شاف فيها باها بعتاب: وانا لي بقيت معاك ومساندك.. اش لقيت منك همم؟ مشيتي على خطاها هي الgارو والشراب.. السهير والديعان.. وملي دخلتي للأمن قلت حياتك غادي تقاد بالحق اش خرجتي ليا.. لا شفقة لا رحمة ما بقيت عارف نقول بنتي ولا ولدي.. ودبا باغيا شخص هو ما باغيكش.. انا اا بنتي ما باغيكش ضيعي حياتك تابعة الهوا.. يكفي انا غلطت هاد الغلط علاش باغيا تكرريه
ديمارات من تما غاديا كتخيط فالطريق حتى وقفات فواحد الحي عادي ولكن زوين وباين الناس دياله كيعرفو بعض وقفات أمام بيت مكون من طابقين وسطح

قلبات عينيها عنده: جواد شرفتي وبنتي ليا ماشي مزيان من الأحسن تبقى مع امك اليوم ترتاح
شاف فيها بانكسار: اهاه حتى الميمة ما باغياش تشوفيها هي لي رباتك وهزات بيك
رشا قلبات عينيها للجهة الأخرى: هي لي ماا غا تبغيش تشوفني.. هههه راني شمكارة وبنت كافرة كما كتقول هي
الاب: عارفة معزتك عندها؟
رشا: حتى هي عزيزة داكشي باش ما بغيتش نكسرها بشي كلمة.. هي ما كيعجبوهاش تصرفاتي وطريقة حياتي وانا ما فيا ما يسمع أكثر فهاد الموضوع
باقي كيهضرو جاهم صوت امرأة كبيرة فالسن وجميلة حروف زينها باقيين متكية على عكازها: زيييد اا جواااد خليها تمشي إلى ما بغاتش تشوفني مرة انا ما بغيتش نشوفها عشرة

ما قدرش يتكلم بقا حاط شفايفه على جبينها وحرك ليها فقط راسه باه وبس وخانته دمعة ونزلات ديك الساعة دخلوها للبلوك وجلال ما قدرش يبقا غادي جاي خواو بيه ركابيه نزل مع الحيط وجلس للارض أما زهور بقات جالسة وعينيها مفيكسيين على باب البلوك دبا عاد قدرو يبينو خوفهم بقا عتيق لي كيتمنى من قلبه انه ضياء تقوم بالسلامة ويحفظ ليها ربي بنيتها من كل أذى وسوء
أما هي ملي دخلات وهي كدعي وتطلب ربي يوقف معها لأنه البنج موضعي مبنجة غير من لتحت حاسة بكلشي حواليها
البناج قرب منها الايربودز: بنتي ندير ليك القرآن فودنيك
ضياء حركات ليه راسها: ااه شكرا
دارهم لها وغمضات عينيها كتقرى معاه فخاطرها مخلية أملها فالله سبحانه استسلمت بالكل للقدر ومنتاظرة أي حاجة.. أما الطبيبة كانت خدامة وكطلب الله أنه الأمور كلها تمشي فأحسن الأحوال بدأت العملية كيتسمع غير صوت المعدات الطبيبة والطبيبة كتكلم معاهم إلى بغات شي حاجة كانت مركزة كل التركيز والكل باغي يتصرف بسرعة لأنه الجنين لي غادي يتزاد غير مكتمل وخاصه ظروف معينة لاكتمال نموه