🌹هن القوارير🌹 (في طور التنزيل )

part15

👑👑 هن القوارير 👑👑
شمس الغريب

الجزء 15:

بزز منها حطها على سريرها بقات كتبكي حتى سخفات ومن تما نعسات منهارة حتى عظم فيها ما صحيح وهو بقا عند راسها كيشوف فيها متأكد بلي هي لي ما كتولدش وبلي ما خاصش تزور الطبيب غادي غير يزيد على ما بيها ولا حافظها أكثر من راسه وعارف بلي غادي تفيق غادي تبدا تقبل المسألة لأنه قلبها اصفى وأنقى منه ما كاينش
كانت نهاية الأسبوع ما كاينة خدمة فاقت كتشم ريحة الخبز كيسخن بقات مدة بلاصتها كتحاول تكذب اش دماغها تفكر ولكن مع الأسف راه داكشي لي وقع ناضت من بلاصتها توجهات للبيت الصغير من بعدما غسلات وتوضات وصلات بان ليها جالس شاد راسه كيخمم قدامه الفطور لي لقاها حطها وجابها تبسمات جنب من هاد النفاق فين عمرو جاب ليها حتى كأس ديال الماء إلى وحلات ليها كتنوض تجري لراسها عكسها هي تعلمت من دارهم بلي طاعة الزوج واجبة عليها وكانت عاجباها لأنه شافت الأمثلة الإيجابية قدامها أمها، اختها، زوجة اخوها ما استثناتش راسها ولكن ما لقاتش المثل

دفعات الكاس لي حط ليها ديال اتاي جنب وبلاصته حطات يديها: ما جيتش نجلس معك فالطابلة باش نفطر اا عبد الخالق
هز عينيه فيها وهي كملات: بغيت نعرف اشنو باغي لاش كتخطط لاش باغي توصل انت وعائلتك ؟
كانت كتكلم بجدية كبيرة وكأنها صافي تسلحت وما بقا يقضي فيها والو ما بقاتش تنهار ولات متوقعة أي حاجة: كيفاش اا ضياء انا ما كنخطط ل والو وما باغيش نتفرق عليك
ضياء بحال الى ما سمعاتش جملته التالية: باغي تزوج
فلتات ليه ابتسامة مهما حاول يخفيها: إلى عطيتي الموافقة انشاء الله
ضياء هزات حاجبها: والى ما عطيتش؟
شاف فيها: ما نظنكش أنانية لدرجة تبغي تخليني بلا أولاد
حركات راسها ضاحكة على راسها: ااياااه عندك الحق انا ماشي أنانية لي بغيتي اا سي عبد الخالق غا تاخد الموافقة

كانو عينيها مغرغرين الشيء لي لاحظه بغا يشد يديها ولكن هرباتهم: شوفي اا ضياء لي بغيتيها نتي هي لي تكون ما بغيتيش ندير لعرس ما نديروش بغيتيها نخليها لهيه فدارنا نخليها بغيتي نكري ليها بعيد علينا وعلى الحومة .. إلى بغيتي حتى ملي تولد نجيبهم هنا نتي لي تربيهم نتي لي تقرري .. والدار هادي انا مستاعد نكتبها لك فاسمك هي والطموبيل باش ما تخافي من والو نتي غير عطيني الموافقة

هو كيهضر وهي غير كتشوف فيه واش هذا بكامل قواه العقلية شكون لي صدق أناني دبا هو ولا هي بقات كتشوف فيه شوية هزات عينيها فيه بشدة ونطقا

شافت فيه بشوفة عمرو شافها منها: شوف اا سي عبد الخالق هاد الهضرة لي كتقول هي لي عمرها ما غادي تكون
طرطق فيها عينيها مصدوم: ااه عمرها ما غادي تكون حيت انت ما تحتاجش دير هاد التضحيات كاملين عندي ليك جوج حلول بجوج فصالحك
هزهز راسه ليها بمعنى كنسمع وهي كملات: الأول نوضو دبا نمشيو لشي كلينيك ندير التحاليل ونشوفو إلى كان كلشي مزيان نقلبو على الحل بجوج كان المشكل مني من تما حطني فدارنا نهار الاثنين من تما لدار القاضي نطلقوو ودير لي بغيتي
صدماته بجهد خلاته حرك راسه بالرفض وكملات هي: والحل الثاني هو إلى ما قبلتيش بهاد الحل الأول غادي نوض نجمع حوايجي ونمشي لدارنا ونهار الاثنين نمشيو لدار القاضي وها انت ما تحتاج تكتب ليا دار ولا طموبيل ولا تعيش مقسوم بينات جوج ولا تفرق أولاد على أمهم وتصدق انت أكبر أناني

كيف صدمها صدماته وصدمتها هي أقوى بكثير من دياله ما بقا ليه فين يتكلم كيشوف فيها ساكت تقول مسحور ما قادر حتى يهضر بنجاته الطلاق منها ما فكرش فيه قال عادي بما انه راه جميع الناس مزوجة بثلاثة وأربعة هو باغي غير الثانية وعنده سبب

زادت كملات عليه: أنا كنت نمشي نخطب ليك ونجيب ليك عروسة بيدي لوكان نهار الأول مشينا للطبيب بجوج وقالو ليا هاك نتي اا لالة عااقرة ونطيح فيها نمرض وتوقف جنبي ونقول هذا هو الراجل لي باغيني وعازني وملي نتوقض غادي نخليك تجيب حتى ثلاثة ماشي انت حكمتي عليا بلي بغيتي ومشيتي درتي التحاليل وتاهمتيني وعائلتك يالاه عقت انا بشوفة خواتاتك ليا وخالتي تاجة لي كنت دايراها فمقام امي وريتيهم بلي انت زعما ما بيك والو

خرج عينيه: عيب عليك اا ضياء تقولي هاد الهضرة وهما شحال بقيتي فيهم
ضحكات باستهزاء: لا باينة ولي غا يزيد يبين شحال بقيت فيهم هي ملي غادي نمشي لدارنا ديك الشوفة ديال جيران ديال الشفقة لي غادي نبقى نشوف ف عينيهم
ع.الخالق: ما غادي يقولوها لحتى شي حد
حركات راسها بالنفي: ما بقاش كيهمني لي عندي قلتو لك
وقف معصب: الطلاق اا ضياء ما كاينش والطبيب لي يقلب ليا ولا الطبيبة لي تقيس مراتي حتى هو ما كاينش وفكري مزيان فالموافقة

وقف عاطيها بالظهر خرج من الدار سمعاته كيدور الساروت فالباب مطرق عليها من برا  زعما باش ما تخرجش وقفات مشات كتقلب على دوبل ديالها حتى كتصدم بلي خرجو معه بقات مبلوكية تما يعني هي محتجزة ما عندها منين تخرج

               💣💣💣💣💣 توقاعتكم وآرائكم 💣💣💣💣💣

اويلي على سد عليها
اش بان ليكم فكلام ضياء؟ وفتصرف عبد الخالق؟